АЖИГЛАГЧ

Монголд, Монголын хэвлэл мэдээлэлд юу болж байна?

Archive for the ‘25-р суваг телевиз’ Category

“Одонтуяа гишүүн”

Posted by Ажиглагч on 2012/03/31

Өнгөрсөн Мягмар гаригт C1 телевизийн “Иргэний удирдлага” нэвтрүүлгээр Ш.Батцэцэг нэртэй хөтлөгч Л.Эрдэнэчимэг гэдэг хатагтайтай муухай төр засаг, шударга сонгууль, хөөрхий эмэгтэйчүүдийг ярьж суулаа. Нягталбаас, хоёулаа АН-ын гишүүн,  хоёулаа УИХ-ын сонгуульд нэр дэвшихээр довтолгож буй ажээ. Энэ нэвтрүүлэг Мягмар гариг бүр 18.30-19.00 цагийн хооронд гардаг юм байна. Хөтлөгч нь хэвээрээ, харин оролцогчид солигдож голдуу нэр дэвшихээр жагсагсад ээлжилдэг гэнэ.

Монголын телевизүүдийн шинэ одон С.Одонтуяа бүсгүй энэ долоо хоногт “Бүсгүйчүүд” нэвтрүүлгээ амжуулсан төдийгүй Пүрэв гаригт “25-р суваг” телевизийн “Дуусдаггүй яриа” нэвтрүүлэгт мэргэжилтэн дүрд хувиран ээлжит удаагаа уригдуулан оролцов. 100 мянган айлын орон сууцны асуудал Одонтуяа нэртэй хүнээр дутаагүй мэдээж болохоор “би орьё” гээд давхиж очжээ. Хамгийн хөгжилтэй нь Монголын барилгачдын холбооны ерөнхийлөгч М.Батбаатар яриан дундаа “… Одонтуяа гишүүн түрүүн хэллээ… “ гэв. Өдөржин зуун мянган орон сууцны ажлаа хийгээд орой харьж сая нэг зурагт үздэг ерөнхийлөгчийн толгойг эргүүлж чадсан байна.

Нэр дэвшихгүй [байх] өөр нэг од гялтганасан нь Усны газрын дэд дарга Б.Батбаяр. 3-р сарын 22-нд тэмдэглэсэн Дэлхийн усны өдөрт зориулсан бүх мэдээ, сурвалжлага, ярилцлага ганцхан З.Батбаяр хэмээх гол баатартай байв. Засгийн газрын хэрэгжүүлэгч агентлагийн дэд дарга нь зогсоо зайгүй хэрэгжүүлэхийн оронд зогсоо зайгүй ярьдаг болохоор Монголд усны асуудал улам хурцадсаар байх нь аргагүй. Усны газарт хэвлэл мэдээлэл хариуцсан ажилтан байдаг бол түүнийг эхлээд ажилгүй болгож дараа нь халсан байх. Энэ удаад Батбаяр дарга Парист болсон Дэлхийн усны том хуралд оролцоод ирснийгээ бүх сувгаар ярьж, дараа нь аян замын бичлэгээ TV9 телевизээр нэвтрүүлэг болгон үзүүлжээ. Ямар их зав, чөлөө вэ? Хайран Монголын ус…

Posted in 25-р суваг телевиз, C1 телевиз, TV9 телевиз | Leave a Comment »

“Танайд дахиж хоноё”

Posted by Ажиглагч on 2011/06/28

Хэдэн жил айлд хоноогүй сэтгүүлч Г.Алтантүрүү “Танайд хоноё” нэвтрүүлэгтээ буцаж ирэв. “25-р суваг” телевизийн 15 жилийн ойн хүрээнд 2006-2008 онуудад хоносон 114  айлынхаа 20-д зочилно гэлээ. Дажгүй сайн нэвтрүүлэг байснаа 2008 оны УИХ-ын сонгуулийн өмнө айлд мөнгөөр унтаж эхэлснээр хүндээ алдаж улмаар ажлаасаа гарч энэ хооронд “Толь” нэртэй сонин эрхэлж, өөр хэдэн телевизэд удаа дараалан нэвтрүүлэг эхэлсэн ч хөлөө олохгүй өдий хүрсэн юм. Харин одоо зохиж байгаа гэж жигтэйхэн. Ялгаа нь “25-р суваг” телевизийн захиалгаар Pawn студид бэлтгэв” болсон байна.

Долоо хоногт нэг гэвэл 20 айлыг ондоо элбэг амжуулна. Ашгүй, сонгууль мөдгүй тул нэр дэвшигчдийнд “уригдаж” амжихгүй биз. Харин дахин хоносон эхний айлын эзэгтэй Баасан 2012 оны сонгууль нэр дэвшихээ аль хэдийнэ зарласан байсан ч дэндүү хол сонгуультай төдийлөн хамаагүй нэвтрүүлэг болсон нь мэдээж. 

Урьд ба одоо хоносон дүрсүүдийг нэвтрүүлгийн дундуур зэрэгцүүлэн үзүүлж харагдсан. Баасан хатагтай МУИС-ийн хуулийн ангид суралцаж ахуй амьдрал өөдрөг сайн яваа ажээ. Харин хэдэн жилийн өмнө учир зүггүй хамгаалан тэмцэлдээд байсан Ахмадын холбооны байрыг нураасан тухай асуултанд “Тэр чинь Улаанбаатар хотын өмч юм чинь. Тэгээд ч 50 хувь нь замын шугаманд орсон байсан. Бид гаднын хүмүүст өгөхгүй гэсэн зорилгодоо хүрсэн”  хэмээн хариулжээ. “Цогт тайж” киноны зургийг энд авсан, Улсын филармони олон жил байрласан түүхтэй учраас эцсээ хүртэл хамгаална, өндөр байшин барина гэж бүү горьд, муусайн Энхбаярын гар хөлүүдэд өгөхгүй гээд баахан монгол нэрсийг илчилж цамнаад байснаа таг мартсан байна.

Монголд бас нэгэн улс төрч ном ёсоороо мэндэлж байх шиг.

Posted in 25-р суваг телевиз | Leave a Comment »

“Дэмий яриа”

Posted by Ажиглагч on 2011/06/02

Суваг солиход “25-р суваг” телевизийн “Дуусдаггүй яриа” нэвтрүүлэгт УИХ-ын гишүүн О.Чулуунбат, Лу.Гантөмөр, Батж.Батбаяр, Ш.Сайхансамбуу, дээрээс нь МҮХАҮТ-ийн дарга С.Дэмбэрэл нар төрийн өмчийн талаар ярилцаж сууна. Уг нь тэд одоо үлдсэн төрийн өмчийг хувьчилж барих талаар ярихаар цуглажээ. Батбаяр гишүүн “Хүн зөвхөн хувийн өмч, хувийн ашиг сонирхлынхоо төлөө зүтгэнэ. Иймээс төрийн өмчийг устгах хэрэгтэй” гэж цамнасан бол Гантөмөр гишүүн “Манайхан төрийн өмчийг улам ихээр тахин шүтэж байна. Ингээд байвал бид сүйрнэ. Саяхан судалгаа үзэхэд сонгогчид овоо тахиж шоудаж байгаа хүмүүсийг илүү дэмжсэн байна” гэж хэлэх мөчид дэлгэцэн дээрх санал асуулгын явцыг танилцуулахад үзэгчдийн дийлэнх хувийн өмчийн талд байсан ч “2000 онд асуусан бол хоёр дахин их дэмжих байсан” хэмээн цааш зүтгэсээр монголчууд хувийн өмчийг үзэн ядлаа хэмээн буруутгасан шүүх хурал шиг юм болж хувирлаа.

Тэд нотлох баримт хэлэв үү? Хүмүүс төр лүү тэмүүлдэг, бас Тавантолгойг хувийн компаниудад даатгахын оронд төрийн компани байгуулсныг дурдах шиг болов.

Яаж ч муулаад, монголчууд хувийн өмчийн эсрэг биш. Хураая, буцаая гэж дуугарсан хүнтэй би лав сүүлийн арав гаруй жилийн хугацаанд тааралдаагүй. Буруу зөрүү хувьчилсан тухай шүүмжлэлүүд хүртэл хувьчлах, гэхдээ шударгаар хувьчлахын төлөө юм.

Иймэрхүү нөхдүүд гарч тухлаад хувийн өмчөө зайнаас арвижуулаад хоосон чалчиж суухад яадаг ч үгүй төр өөд хүмүүс авирахгүй хаачихав. Тавантолгойг шийдсэн эрхмүүд бол тэд өөрсдөө. Сонгууль дөхөхлөөр амлаад давхичихдаг, Их хурлын танхимд суухлаараа өгнө, тараана гэж гараа өргөдөг, харин камерын өмнө төрөл арилжиж шударга нь дэнддэг, сөрөг намын санаатай ч бие биендээ үг дуугарч чадахгүй мөртлөө одоо нийлээд иргэд рүүгээ агсардаг болов, энэ “дуусдаггүй яриачид”. Энэ удаагийнх бүр шал дэмий яриа байлаа.

Тэд бас төрийн өмчит компанийн ТУЗ-д багтдаг төрийн албан тушаалтнуудын урамшуулал багаддаг тухай гомдол мэдүүлж, мөн Эрдэнэтийн ядарсан Ганзориг захирлыг баахан өрөвдөж цалинг нь сарын 50 саяд хүргэвэл хамаа намаагүй идэж уухгүй гэлээ. Хүний шуналд хязгаар үгүйг мэддэггүй юм байх даа.

Posted in 25-р суваг телевиз | Leave a Comment »

Худлаа ярихгүй байх …

Posted by Ажиглагч on 2011/05/23

Монголын өдөр тутмын сонинууд, дагаад сайтууд (эсрэгээр ч байж магадгүй) цөмийн хаягдлыг тойрч дахин нэг оволзов. Гаднаас цөмийн хаягдал оруулж булшлах асуудлаар монголын нэр нь үл мэдэгдэх албаны хүмүүстэй битүү хатуу яриа энд тэнд болсон тухай мэдээлэл цацагдах бүрийд ингэдэг. Төр засагт ганцаараа сөрөг TV9-өөс бусад телевиз Гадаад харилцааны яамны няцаалтыг уншихаас хэтэрдэггүй бол “25-р суваг” телевизийн өнгөрсөн долоо хоногийн “Дуусдаггүй яриа” нэвтрүүлэг энэ сэдвийг цаг гаруй сөхөж УИХ-ын гишүүн Д.Энхбат, О.Чулуунбат, Л.Гантөмөр, Н.Батбаяр нар тусгай үүрэг гүйцэтгэгч элчин сайд А.Ундраа, бас Цөмийн энергийн газрын бололтой нэг албан тушаалтыг оролцуулан мэтгэлцэхийг  Ням гаригт үзлээ.

Олныг шуугиулсан асуултуудын хариулт олдов уу? Үгүй. Эмнэлэгт туяагаар эмчлүүлэхэд цацрагийн хор маш бага, харин цөмийн станц дэлбэрвэл аймаар, иймээс атомын цахилгаан станц барих, цөмийн хаягдал хадгалах эсэхэд хариуцлагатай хандах ёстой, цаашид бэлтгэлтэй байх ёстой …  талаар сонслоо. Фукушимагаас хойш энэ байтугай мэдэж авсан бидэнд дэндүү чамлалттай.

Монголд цөмийн хаягдлыг булшлах сэдвээр маргаан дэгдсэн шалтгаан энэ бүхнийг мэдээгүйдээ биш, харин гадаадын хэвлэлд бичсэн тэр яриа хөөрөө болсон уу, үгүй юу гэдэгт байгаа юм. Товчхондоо, худлаа яриагүй биз?

Худал хэлсэн улс төрчдийг илчлэх нь тэдэнтэй хариуцлага тооцох бараг цорын ганц арга. Билл Клинтон Моника Левинскийтэй орооцолдоод биш, харин тэгээгүй гэж хуурахыг оролдоод огцрох дөхсөн гэдэг. “Улаанбаатар таймс” сонины пайз зүүлгэсэн байшин, газрыг хууль бусаар хувьчилсантай холбогдуулан шадар сэтгүүлчийг нь барьж хорьчихоод байхад экс Ерөнхийлөгч Н.Энхбаяр таг дуугүй суугаа нь худлаа хэлэхгүй гэснийх. Үнэнийг хэлбэл өөрөө суух аюултай учраас яалтай билээ. Л.Гүндалай гишүүн ЭМЯ-ны сайд байхдаа төсвийн мөнгө завшаагүй, Д.Идэвхтэн гишүүн Тавантолгойд лиценз эзэмшдэггүй гэхчлэн худлаа ярьсныхаа төлөө улс төрөөс арчигдаагүй нь зөвхөн Монголд байдаг гаж үзэгдэл. Эрх баригч хоёр нам 1,5 ба 1 сая төгрөг тараахаар амалснаа эвтэйхэн цайруулахын оронд “заавал өгнө” гэж дайраад Монгол Улсын төсвийг тамлаж байгаа. Ердөө 2012 оны сонгуулийн өмнө худалч нэр зүүхгүйн тулд! 

Цөмийн хаягдлыг Монголд булшлах талаар огт ярилцаагүй гэж албаны хүмүүс “хариуцлагатай” мэдэгддэг ч олон нийт, сэтгүүлчид гадаадын хэвлэлд гарсан тэр баримтуудыг няцаах баримтыг үзэхээс нааш салахгүй. “Дуусдаггүй яриа” нэвтрүүлэгт оролцсон тусгай үүрэгт элчин сайд Ундраа “би тийм яриа хийгээгүй” гэсэн ч энэ нь өөр сайд, дарга, албан тушаалтнууд тэгээгүй гэсэн үг хараахан биш. Гэнэт УИХ-ын гишүүн О.Чулуунбат америкчууд цөмийн эрчим хүчний асуудлаар Монголд ирэхэд нь уулзсан гэж цухуйлгаад авах нь тэр! Хожим уулзаагүй гэж худлаа хэлсэн болохгүйн тулд авсан сөрөг арга хэмжээ биз. Манай 76-аас ганцхан Чулуунбат, тэр тусмаа цөмийн эрчим хүчинд огт хамаагүй байж яагаад уригдав? Уулзалтын протоколыг үзэхсэн. “Цөмийн хаягдал хүмүүсийн яриад байдаг шиг аймаар зүйл биш, манай Улаанбаатарын утаа, ил жорлонгоос цөмийн хаягдал арав дахин бага хортой” гэсэн түүний тооцоо ямар учиртай вэ? Дэндүү хоргүй ийм юмнаас Чулуунбат гишүүн гэртээ хадгалсан ч болохнээ.

Мардайд, Дундговь, Дорноговьд уран олборлох нь өнөө маргаашгүй болж, бас атомын цахилгаан станц барихыг 2020 хэдэн он гэж аль хэдийнэ товлоод зарласан. Яриа хэлэлцүүлэг нэг их байтугай огт өрнөөгүй. Харин араас нь залгуулаад цөмийн хаягдал булшлахыг дээрх аргаараа явуулж эхэлтэл энэ шуугиан дэгджээ. Гар барьж, гарын үсэг зураагүй ч ярьж хөөрсөн баримтууд хэдэнтээ цацагдахад анхдагч эх сурвалжууд өөрсдөө дуугүй байхад өмнөөс нь няцаагаад байдаг… 

Нэвтрүүлгийг хөтөлсөн Д.Энхбат гишүүн худлаа нээрээгийн тухай хамгийн чухал асуултыг эхэн хавьд тавьсан гүйцээхийн оронд том бодлого хаялцахыг илүүд үзэв. Чулуунбат гишүүнээс бол асуугаа ч үгүй. Өөр аргагүй. Улс төрчид хоорондын “Дуусдаггүй яриа”  нэг иймэрхүү дуусдаг. Харин муу, сайн ч гэсэн сэтгүүлч хөтөлсөн бол (тэгээд улс төрчид урьдчилаад захиалчихаагүй бол) шуугиан тарьсан гаднын нийтлэлүүдийн үг, өгүүлбэрийг ишлэж, огноо, овог нэрийг дуудаж байгаад хариулт нэхэх байсан, хэрвээ мэдэхгүй гэвэл дараачийн дугаарт мэддэг хүмүүсийг оролцуулна.

Цөмийн хаягдал мэт мянга хэмжиж нэг огтлох дэндүү ноцтой асуудлаар зөв шийдвэр гаргах цорын ганц арга бол худлаа ярихгүй байх. Эхний худал дараачийн худлыг төрүүлж, тэгээд хэзээ ч зогсохгүй гинжин урвал зад тавина… Чухамдаа ийм учраас эхний худал байсан эсэхийг яг мэдэхийг хэрэгтэй.

Posted in 25-р суваг телевиз | 4 Comments »

Хэн бэ, хэдэн он бэ?

Posted by Ажиглагч on 2011/03/21

Суваг эргүүлтэл TV9 телевизээр хэзээ эхэлсэн бүү мэд Ерөнхийлөгч асан Н.Энхбаяртай хийсэн ярилцлага дуусч байна. Миний үзэх хооронд зөв зүйтэй зөндөө олон юм хэлэв. Харин өмнө нь яагаад өөр зүйл ярьж хийж явсан тухай асуултанд “хүн өөрчлөгддөг юм” хэмээн бурханлаг хариулт өглөө. Улс төрчид ариун мөрийн замд орохын тулд заавал нэлээд өндрөөс түсхийтэл газарт унах ёстой ажээ.

Сонирхолтой нь TV9-ын биш сэтгүүлч хөтөлж суув. Дэлгэцийн доогуур “25-р суваг” телевизийн сэтгүүлч Пүрэвхүүгийн Монгол Улсын гуравдахь Ерөнхийлөгч Н.Энхбаяртай хийсэн ярилцлагыг үзэгч та бүхэндээ толилуулж байна. Анх 3-р сарын 5-нд эфирт цацахаар төлөвлөсөн уг ярилцлагаа “25-р суваг” телевиз гаргахыг хориглосон болно” гэсэн тайлбар урсана.

Энэ бол зөвхөн МАН-ын явуулга биш. Н.Энхбаяр ярихдаа “Би өнгөрсөн хугацаанд “Бясалгал”, “Хана” гэсэн хоёрхон өгүүлэл бичсэн. Зарим хүн долоо хоног болгон бичээд телевизээр уншаад байгаа биз дээ” гэсэн юм.  Нээрээ “25-р суваг” телевизэд хоёрын хоёр экс ерөнхийлөгч яаж багтахав.

Posted in 25-р суваг телевиз, Улс төр, эдийн засаг, TV9 телевиз | Leave a Comment »

“Гэртээ харья”

Posted by Ажиглагч on 2011/01/09

Бүгд шүүмжилдэг болоод байгаа (гэхдээ бүгд үздэг байх) “25-р суваг” телевизийн “Танайд хоноё” нэвтрүүлэг мухардаад байх шиг. Хөтлөгч Ганзориг хэг ёг хийж хамаа намаагүй ярьсаар, саяын Ням гаригийн дугаараар очсон айлдаа хонохгүй гараад явчихлаа.

Уг нь Замын цагдаагийн ажилтан Ганбаатарыг зам дээр эргүүл хийж байхад нь “барьж аваад” гэрт нь очсон юм. Долоон буудал руу хашаанд ах, дүүгээрээ амьдардаг, илэн далангуй яриатай, том охин, хоёр хүү, хүргэнтэй өнөр өтгөн айл байна. Зарим асуулт, хариулт  хөгжилтэй байсан ба ганц нэгийг түүж дурдмаар санагдав.

-Охин юу хийдэг вэ?
-Охин жирэмсэн…
-Урьд нь юу хийж байсан?
-Хөдөө аж ахуйн их сургуульд нэг жил сураад гарсан.
-Яагаад?
-Юу гэж хэлэх юм бэ дээ… Дүүг нь ХААИС-д оруулах гээд гаргачихсан…
-Ямар том хаус вэ?
-Хаус биш ээ… Ганц худгийн амнаас тоосго ухаж барьсан. 7 машин тоосго ухаж авсан.
-[Эхнэрээс нь] Юу хийдэг вэ?
-Долоон буудлаас Нарантуул хүртэл явдаг шугамтай.  
-Замын цагдаагийн шидэт дохиур байдаггүй юм уу?
-Байхгүй. Манай нөхөр намайг хулгайн шугаманд явуулдаггүй.

Гэрийн эзны ярианаас дахиад хэдэн өгүүлбэр: …Үндэсний телевизийг 24 цагаар явдаг болгомоор… Танайхаар “Танайд хоноё” нэвтрүүлгийг үздэг дээ…  Би одоо журмын хашаанд ажилладаг. Сая нэмэгдлээр эргүүлд гарч байсан юм. Ажил дээрээ мах аваачаад чанаад идчихдэг … Наадах чинь өргөмжлөл. Иргэдтэй зөв боловсон харилцдаг гээд биччихсэн байгаа …

Гэхдээ хөтлөгч маань дутуугүй хөгжилтэй. Замын цагдаагийн хувцсыг нь өмсөж дохиурыг гартаа аваад гэнэт сагсуурч үзэгчид рүү чичлэн:   

– Нөхдүүд дүрэм зөрчихгүй шүү. Зөрчвөл амь настай ярина шүү!

Зам дээр зогсоовол хүн алах нөхөр байна. Тэгснээ унтахаар хэвтэх гэж байсан ээжийнх рүү нь урилгагүй тавьж оров. Хамгийн сүүлд Ганбаатарынх зочиндоо нэг өрөөгөө суллаж өгөхөд тухлах аядсанаа гэнэтхэн “олон ам бүлтэй, жирэмсэн охинтой энэ айлыг  нөгөө өрөөндөө шахцалдаж унтана гэдэг сэтгэлд буухгүй байна” гээд хонохгүйгээр явахаар шийдэхэд гэрийн эзэн “…Манай өчүүхэн гэр орныг тоож ирсэнд баярлалаа. Үүгээр манай амьдралд маш том түүх болж байгаа” гэсээр үлдэв.

Харин Ганзориг тэднийхээс гараад “Манай улсын нэг замын цагдаа иймэрхүү амьдарч байна” хэмээн ерөнхийдөө гайгүй эхэлснээ “Эд өөрийнхөө амьдралд ханаж цадаад …. Миний хувьд орон гэргүй байгаа биш харья” гэж амаараа факталсаар харанхуй гудамжаар цааш уруудлаа. Хэдэн метрийн цаана зураглаач нь, машин нь гүйцэж очоод авсан байлгүй дээ. 

Айлд хоноогүй нь зөв байх.

Posted in 25-р суваг телевиз | 3 Comments »

100000

Posted by Ажиглагч on 2010/12/29

“25-р суваг” телевизийн “10000” нэвтрүүлгийн 2010 оны сүүлчийн дугаар. Шинэ жилийн баяр дөхсөн тул ивээн тэтгэгч компаниас 10 биш 100 мянган төгрөгийг хэдэн бялуутай хамт өгүүлснийг хэнд өгөхөө хайсан хөтлөгч залуу хар хүйтэнд “Драгон” төвийн гадна ширээгээ засан төвхнөжээ. Хүмүүс ээлжилсээр хамгийн сүүлд дээлтэй, толгойгоо алчуураар битүү боож таяг тулсан эмээ ирж суулаа. Нэрээ Янжин гэв. 83 настай,  саруул ухаантай хөгшин байна. Үр ач нараа тойруулж пүнхийсэн дулаан гэртээ жаргаж суух буянтай нас. Гэтэл …

Гурван хүүхэдтэй байсан ч гурвуулаа нас барсан, хөгшин нь бас өөд болсон, одоо 10 гаран насны ганц ачтайгаа “ханын материалаас хойшоо” айлын хашаанд амьдардаг ажээ. “Улс надад тэтгэвэр өгдөг болохоороо харж л байгаа… надад түлээ түлшний мөнгө өгсөн, одоо түлээ барагдаж байна даа” гэв. 

–          10 мянган төгрөг хэр их мөнгө вэ?

–          Ач бид хоёр гамнаад тав хоног хэрэглэнэ. Түлээ түлшээ авна, идэж уух юм аа авна…

–          Эмээ, та амьдралаа яаж болгоод байна вэ?

–          Олон нутгийн зөв санасан хүн 1000 цаас ч аваад өгөх юм, 500 цаас ч аваад өгөх юм, өөрийнхөө тэтгэврийг авах юм, тэтгэврээ аваад хүүхдийнхээ сургуулийн юмыг бараг одооноос бэлдээд … олон түмнээр голцуу л болж байна…

–          Та энд юу хийж яваа юм бэ?

–          Би энд мөнгө хайгаад явж байна.

–          Эмээ, та шинэ оны юм бэлдэж амжив уу?

–          Байхгүй ээ. Ямар сайндаа хүн амьтантай уулзаад мөнгө төгрөг олдвол муу хүүдээ ганц ундаа ч гэсэн авч өгөх юм уу даа гэсэн шиг бодоод явж байгаа…   

Ийм ярианы дараа хөтлөгч залуу тэр 100 мянган төгрөгийг, бялууг Янжин эмээд өгөхгүй байж чадах уу? Мэдээж чадахгүй. Бүр гэрт нь хүргэж өгөхгүй байж ч чадаагүй. Эмээ үүдний пиндээ орж хүзүүнээсээ зүүсэн түлхүүрээ удтал оролдон байж тэс хүйтэн гэртээ ороод түлээгээ уудлан гал ноцоохоор тонголзож “энэ мөнгөөрөө шинэ жилээ, дараа нь монголынхоо шинийг угтана аа” гэсээр хоцров.

Ач хүү нь гэртээ байсангүй. Тэр жаал удахгүй хичээлээсээ ирнэ, тэгээд хичнээн их баярлах бол!

Өнөөдөр бүх сувгийг эзэгнэсэн энэ их найр наадам, жаргал цэнгэлээс илүү сэтгэл хөдөлгөсөн нэвтрүүлэг байлаа.

Posted in 25-р суваг телевиз | 8 Comments »

Телевизээр үзчих үү?

Posted by Ажиглагч on 2010/10/02

Өнгөрсөн  7 хоногийн дундуур монголын телевизүүдээр бяцхан тулаан оволзоод өнгөрөв. Монгол Улсын гуравдахь ерөнхийлөгч Н.Энхбаяр Драмын театрт “Ухрах уу, Урагшлах уу? нэртэй хэлэлцүүлэг хийсний дараа…  

2010.9.28.

УИХ-ын гишүүн Ц.Нямдоржийн захиалгат ярилцлагыг Ийгл, UBS мэтийн хэдэн хэдэн телевизээр урагш хойш зөрүүлэн гаргасан болохоор тэрбээр Энхбаярыг оройжин муулаад хэвтэж байх шиг (мэдээж диван сандал дээрээ) санагдав. 

2010.09.30

TV5 телевизийн сэтгүүлч Дагиймаад захиалсан МАХН-ын ерөнхий нарийн бичгийн дарга У.Хүрэлсүхийн уртаас урт ярилцлага лав НТВ, BTV, мэдээж TV5, Ийгл, TM зэрэг телевизээр зэрэг зэрэг гарсан. Өөр юм үзэх зай завсар үлдээсэнгүй.  МАХН-ын угсраа цохилтын хоёрдахь нь.

2010.10.01

“25-р суваг” телевизийн хөтөлбөрт байгаагүй “Ам нээвэл…” нэвтрүүлэг гэнэт дайран орж ирэв. Өчигдөр нокдаунд орсон Н.Энхбаяр сэтгүүлч Пүрэвхүүг яаралтай дуудуулсан хэрэг. Миний хальт сонссон ярилцлагын хэсэг: Би тэднийг 10 хуруу шигээ мэднэ. Тэдний мэдэхгүй юмыг ч мэднэ. Бие биенийхээ тухай мэдэхгүй юмыг ч мэднэ. Яагаад гэвэл би тэдний төвд нь байсан…

Энэхүү ноцтой сүрдүүлэг бол Н.Энхбаярын хариу цохилт. Харин уг ярилцлага дуусав уу үгүй юу, 25-р суваг телевиз залгуулаад Н.Энхбаярыг муулсан өөр нэг захиалгат нэвтрүүлгийг үзүүлэх нь тэр. Монголын анхны хувийн, ардчилсан, чөлөөт телевиз тэднийг “сайхан” зодолдууллаа.

Posted in + ТЕЛЕВИЗ, 25-р суваг телевиз | 1 Comment »

“Би хаашаа нисч байна аа?”

Posted by Ажиглагч on 2010/06/07

“25-р суваг” телевизийн “Танайд хоноё” нэвтрүүлэг эхэлчихсэн байсан тул хөтлөгч Ганзориг “би одоо бяцхан жүжиг тавина” гэж анхааруулсан эсэхийг сонсож амжаагүй. Юутай ч мань хүн онгоцон дотор хачин хачин юм ярьж гарлаа.

… Оройтоод МИАТ-ын онгоцонд ороод унтсан чинь нэг мэдэхэд нисч явна… [Хажуугаа суугаа гадаад эрээс] “Би хаашаа нисч байна?”…. Өө Берлин нисч яваа юм байна… За за хонуулах айл олдох байлгүй дээ.

Тэгснээ нэг мэдэхэд Берлинд буучихсан… дараачийн секундэд хилээр гарчихсан …. гудамжинд яваа нутгийн хүмүүст “Танайд хонох” санал тавихад цаадуул нь үргэж зугтаад …

Хэдэн сарын өмнө “Танайд хоноё” нэвтрүүлгийг буцаад сэтгүүлч Г.Алтантүрүү хөтлөх болсон тухайгаа мэдэгдэж, бүр “25-р суваг”-ийн хөтөлбөрт хэдэнтээ зарлагдсан ч худлаа байсан. Бодвол хэн нэгэн түүнд “Толь” нэртэй сонин гаргах их мөнгө өгсөн тул түүнийгаа бараадахыг илүүд үзсэн байх.

Ингээд өнгөрсөн сард сэтгүүлч Ганзориг “… Энэ нэвтрүүлгийг намайг хөтөл гэсэн. Би Алтай гишүүний эсрэг, Алтай захирлын эсрэг үг хэлэх эрхгүй…” хэмээгээд ажилдаа орж Тэрэлж рүү явдаг автобуснуудын эзэн Болд, Нархажид сүмийн хамба Мэндбаяр хоёрынд хоножээ. Гурав дахь удаад Берлинд хоносон нь “нэг мэдэхэд онгоцонд сууж байсан” далдын хүчний ид шид биш. ХБНГУ-д айлчилсан Гадаад хэргийн сайд Д.Занданшатарыг дагаж ниссэн сэтгүүлчдийн тоонд Ганзориг багтжээ. Үүнийгээ зүгээр хэлчихийн оронд жүжиглэж марзагнах хэрэг байв уу?

Хөтлөгч маань явсаар Берлин дэх Монголын Элчин сайдын яаманд очиж утасдуулан Германд хөөмийн хамтлаг байгуулан ажиллаж амьдардаг залууг хаанаас ч юм ирүүлж (“тэнд туршлага судалж яваа” УИХ-ын гишүүн Бямбадоржтой хамт явж байв) 400 км-ын хол орших гэр лүү нь 3-4 цаг довтлон очиж хонолоо. Хөөмийг тойрон хэт их асууж залхаасан тул цаад айл “Одоо шөнийн 1 цаг болж байна. Унтах уу?” гэж байж арайхийн салав.

Робот шиг хоолойгоор гацаж ярьдаг энэ залуу ойр зуурын мэдээ, сурвалжлагыг сүржин унших, бас З.Алтай захирлаа дууриан сонгуульд нэр дэвшиж Ленин (эсвэл Гитлер?) маягаар ёслон “Намайг сонго” хэмээн хэг ёг дуугарах яахав, харин “Танайд хоноё” мэтийн энгийн ярианы нэвтрүүлэгт нэг л зохихгүй байх юм. Сүүлийн үед япончуудын бүтээсэн роботууд тун аятайхан эгшиглүүлж ярьдаг болсон шүү.

Posted in + ТЕЛЕВИЗ, 25-р суваг телевиз | 6 Comments »

Монгол 999-ын нүүр царайнууд

Posted by Ажиглагч on 2010/06/05

Хэдэн жилийн өмнөөс гадаадаас ирсэн уул уурхайн компаниуд манай хэвлэл мэдээллээр юу хүссэнээ хийлгэж чадахаа харуулсан буюу ид харуулж байгаа бол одоо үндэсний компаниудын ээлж иржээ.

5-р сарын эхээр Монгол 999 (уруугаа харсан 666) нэртэй компаниудын компани байгуулагдав. Би бодохдоо Тавантолгой (мэдээж Энержи Ресурс, орон нутгийн “Тавантолгой” ХК, бас хэдэн луйварчдын сэмхэн гартаа оруулсан хэсгүүдийг хасаад) монголын ард түмний өмч учраас хүн бүрт 2,7 сая хуваасны нэг ногдоно, харин гадаадын болоод дотоодын компаниуд өрсөлдөөд хэн сайн нь зөвшөөрөл авч хөрөнгөө оруулж нүүрс ухаад бидний хувийг төлнө, хэрвээ ашиг гаргаж чадвал өөртөө үлдээх тухай төсөөлж явлаа.

Харин өчигдөр сүрдмээр нэртэй энэ компанийн захирал Тавантолгойг (эсвэл түүний лицензийг эзэмших компанийг) дөрөв хувааж “Эрдэнэс МЖЛ”, Монгол 999, ард түмэн гуравт эзэмшүүлж үлдсэнийг гадаадын хөрөнгийн бирж дээр зарах ёстой тухай  мэдэгдэв. Тэд ард түмний хажуугаар, дээр нь гарч байгаад “илүү тэгш эрхтэй”-гээр Тавантолгойг эзэмшихээр шийджээ. Харин нүүрс ухах ажлыг гадныхныг авчирч хийлгэнэ.  

Энэ мэт олон эргэлзээ байгаа ч ”Монгол 999” юу хийхээ сайн мэдэж юуны өмнө хэвлэл мэдээллийг бөөнөөр болон ширхгээр худалдан авснаар одоо хүмүүсийн толгойд “Үндэсний компаниудаа дэмжицгээе!” урианаас өөр юм бодогдохыг болиулав. Өдөр тутмын сонинуудаар тэдний төлбөртэй мэдээ, ярилцлагуудын хажуугаар хөндлөнгийн байр суурь цухалздаг бол телевизүүд зөвхөн тэдний дуугарснаар дуугарч байна.

Хамгийн том эргэлзээ бол Монгол 999-ын удирдлагууд. Төлөөлөн удирдах зөвлөлд хамгийн сүүлд гэхэд л Олон овоотын лицензийг бултуулж улмаар нэг банкийг дампуурахад хүргэсэн “Монгол газар”-ын Мянганбаярын нэрийг сонссон хүмүүс толгой сэгсэрч эхэлмэгц “Монгол газар”, Жаст групп компанийн хос мэдэгдэл гарган хэвлэл мэдээллээр, түүний дотор бүх телевизээр төлбөртэйгээр зэрэг цацуулж ЖАСТ-ын Батхүү, “Монгол газар”-ын Мянганбаярын захиалгатай ярилцлагуудаар сонинуудыг дүүргэж намжаав.

МҮОНТ-ын “Хариулахгүй ч байж болно” ярилцлагад Ц.Мянганбаяр оролцов. Ямар ч но-той оролцогч хариулаад л баймаар эелдэг асуултууд … Хүслээ, оролцлоо, хариуллаа.

Сонинууд “Зудад малаа алдсан малчдын банкнаас авсан зээлийг хүчингүй болгоно л гэнэ. Тэгвэл барьцаанд лицензээ тавиад алдаж байгаа “Монгол газар”-ын Ц.Мянганбаярын өрийг бас хэрэгсэхгүй болгох байсан юм биш үү. Малчид яагаад төрийн ивээлд багтаж Ц.Мянганбаяр яахаараа “Ганц худаг”-ийн камерт заларчих гээд байдаг юм бэ. Энэ бүгд арчаатай амьдарч яваагийн торгууль биш үү” гэхчлэн нулимс асгаруулах наад захын хэрэг болов.

“25-р суваг” телевизийн “Ам нээвэл…” нэртэй шинэ нэвтрүүлгээр “Цагаан шонхор холдинг” компанийн ерөнхий захирал Ч.Энхтайван ил гарч хүнд бэрх амьдралаа дурслаа.Гэхдээ хамгийн сонирхолтой нь шорон орон биш “Монгол 999” байгуулах санаагаа хэдэн жилийн өмнө бодож олсон тухайгаа уушиг нээсэн явдал юм. Бүх юм түүний санаснаар явж таарлаа. 

Монгол 999-ын дараачийн “брэнд” бол Төлөөлөн удирдах зөвлөлийн даргаар сонгогдсон “Ажнай” Д.Бат-Эрдэнэ юм. Тэрбээр ард түмэндээ хандахад нь хэвлэл мэдээлэл ямар нэгэн тайлбаргүйгээр индэр болж өгөв. Хэрвээ би эндүүрээгүй бол Тавантолгойг хэдийнэ ухаж байгаа Өмнөговь аймгийн орон нутгийн өмчит “Тавантолгой” ХК-ийн 49 хувийн ихэнхийг бөөн хэрүүлтэйгээр хамсан төдийгүй аймгийн удирдлагыг ерөнхийд нь “мэддэг”, 2008 онд УИХ-ын гишүүнээс буумагцаа аймгийн Засаг даргын зөвлөхөөр өөрийгөө томилуулж төрийн хүний дүрд хувираад “Тавантолгой” ХК-ийн ТУЗ-ын дарга болж байсан Бат-Эрдэнэ мөн байна.

P.S: Саяхан Монгол 999-ын ТУЗ-д ордог С.Одонтуяа нар ярихдаа, “зарим компани 50-60 охин компаниа оруулсныг мэдсэн, иймээс 5-р сарын 11-нээс өмнө байгуулагдсан компанийг бүртгэхгүй” гэжээ.  Хэдэн жилийн өмнөөс Монгол 999-ыг  сэдсэн “сайн эрс” аль хэдийнэ амжуулчихжээ. Удалгүй Хадгаламж зээлийн хоршоо шиг хачин юм болох биз.

Энэ олон захирлууд өөрсдийгөө Монгол 999-ын нүүр царай гэж бодож байгаа юм байх даа…

Тэд гэрчилгээгээ авчээ. Сүүлийн хэдэн өдөр монголын бүх сонин энэ талаар шуугиж байна. Төлбөртэйгээр.

Posted in + ТЕЛЕВИЗ, 25-р суваг телевиз, Монголын Үндэсний Олон Нийтийн Телевиз, Улс төр, эдийн засаг | 3 Comments »

Захиалгагүй, захиалгатай “Миний мэргэжил сэтгүүлч”

Posted by Ажиглагч on 2010/04/30

“25-р суваг” телевизийн “Миний мэргэжил сэтгүүлч” нэвтрүүлгийн өмнөх дугаар олон жилийн өмнө менежментийн гэрээгээр хувьчлагдсан Хүүхэд, залуучуудын театр (найруулагч И.Нямгаваа залилан хийж ХААН банкинд зарчихсан) , “Од” кинотеатр (“Содтрэйд” хувьчилж аваад “Амьд ус” христийн сүмд зарсан), Баянзүрх дүүргийн эмнэлэг (үйлчилгээ нь сүйдтэй сайн болоогүй), “Ард” кинотеатр (жүжигчин Сосорбарамын “Од” ганц хүний театр мэдэлдээ авсан ч нэг мэдэхэд Анод банкинд шилжсэн. Одоо Хас банкных)-ын баримтуудыг эрэн сурвалжлан гаргаж ирсэн, харин менежментээр бараг хувьчлагдчихаад байгаа Санхүү, эдийн засгийн дээд сургуулийг яагаад ч юм  орхигдуулсныг эс тооцвол сонирхолтой болсон билээ. 

Харин энэ оройн дугаарыг Монголын алт – МАК корпорацитай “хамтран бэлтгэжээ” (Сэтгүүлч Пүрэвхүүгийн өөрийнх нь үг). Том компани, том сэтгүүлч хоёр яаж хамтрав аа гэвэл нэг нь МИ-8 гэдэг бүхэл бүтэн нисдэг тэргээр үйлчилсэн бол нөгөө нь төлбөрийг өөр чаддаг юмаараа хийв. Эхлээд МАК-ийн уурхай, шинжилгээний лаборатори, хоолны газар, засвар үйлчилгээний төв, МАК-ийн Хятадтай хамтарсан  “Чинхуа МАК Нарийн сухайт” компанийн тавьсан замыг танилцуулж, мөн гаалийн даргатай ярив. Дараа нь үндсэн ажлаа эхлэн МАК-ийн Цогт хэмээх захиралтай “хамтран ажиллаж” нүүрсийг Хятад руу шууд урагшаа гаргахаас өөр аргагүй болон нарийн төмөр замын давуу талын тухай ярилцлаган лекц уншуулахдаа ийм төмөр замыг эсэргүүцэгчдийн хэлдэг санаануудыг асуулт болгон тавьж дуулгавартайгаар няцаалгаад буцахдаа дахин хөлөглөсөн МАК-ын нисдэг тэргийг педаль, суудлын тоо, үнэ, хичнээн их шатахуун хэрэглэдэгийг нь хүртэл эрчээ алдалгүй тасралтгүй рекламдсаар нийслэлд буусан нэвтрүүлэг боллоо. Үнэхээр их өртөгтэй захиалгын цаана гарахын тулд амсхийх завгүй зүтгэхээс өөр яахав.   

Захиалгагүй, захиалгатай, захиалгатай эсэх нь тодорхойгүй, захиалгатай … гэх мэтээр ээлжилдэг “Миний мэргэжил сэтгүүлч” бол энэ.

Posted in 25-р суваг телевиз | 2 Comments »

Аймшгийн нэвтрүүлэг

Posted by Ажиглагч on 2010/04/22

Одоо Өмнөговийн нүүрсний аварга ордуудаас Хятад руу тавих төмөр замыг хаагуур дайруулах, тэр нь өргөн нарийн ямар царигтай байх тухай маргаан Засгийн газрын боловсруулсан хуулийн төслийг УИХ-д өргөн барьж хэлэлцүүлэхийн өмнөхөн дахиад ширүүсэх төлөвтэй.

Өчигдөр “25-р суваг” телевизийн хөтөлбөрт 20.20 “Төмөр замын бүтээн байгуулалт” гэсэн даруухан нэвтрүүлэг бичигджээ. Харин жинхэнэдээ “Төмөр замын тээвэр сэхэх үү? мөхөх үү? гэсэн аймшигтай нэртэй байлаа. Товчхондоо, Сайншанд руу тавьж, тэр тусмаа өргөнийг сонговол Оросыг дагаад мөхнө, харин шууд урагшаа, хил рүү нарийныг татвал Хятадаар дамжаад дэлхийтэй холбогдож сэхнэ. Энэ санааг УИХ-ын гишүүн Р.Раш, экс ерөнхийлөгч П.Очирбат, төмөр замын инженер О.Сүрэн (УИХ-ын гишүүн асан), Ерөнхий сайд Д.Содном нар янз бүрээр нотолж ярив. Жишээлэхэд П.Очирбатын хэлснээр, өргөн төмөр зам баривал олон улсын  гэрээ хэлэлцээрийг зөрчиж, үндэсний аюулгүй байдалд харшлах аж. Айчихлаа.

Харин “Энержи Ресурс”, МАК компаниуд нарийн төмөр зам тавьж эх орноо аврах юм байна. Нэр, хаяггүй энэ нэвтрүүлгийн захиалагчийг эрж хайх шаардлагагүй болов.

Posted in 25-р суваг телевиз, Улс төр, эдийн засаг | 3 Comments »

Арилжааны телевизээс л үзлээ

Posted by Ажиглагч on 2010/04/03

Хэд хоногийн өмнө TV8 телевизийн Hard Talk нэвтрүүлэг  УИХ-ын гишүүн, Эрдэс баялаг, эрдэм хүчний сайд Д.Зоригт, “Миний Монголын газар шороо” хөдөлгөөний тэргүүн П.Болд хоёрыг студидээ авчран маргалдуулжээ.  Хөтлөгч залуу Оюутолгойг гэрээг сайн мэдэхгүй учраас олигтой асууж чадаагүй, иймээс задгай ярилцлага болов. Гэхдээ энэ бол хоёр талын бараг анхны телевизийн халз уулзалт байсан юм.  

Өчигдөр орой, Баасан гаригийн үдэш “25-р суваг” телевизийн “Дуусдаггүй яриа” нэвтрүүлгийн  зууван ширээний нэг талд УИХ-ын гишүүн Н.Батбаяр, О.Чулуунбат, Ц.Даваасүрэн, З.Энхболд, Б.Бат-Эрдэнэ, нөгөө талд С.Баярцогт, Д.Зоригт нарын гишүүдийг өөд өөдөөс харуулж суулгаад жинхэнэ hard talk өрнүүлэв. Мэтгэлцээн шууд л ширүүсч “дахиад ийм нэвтрүүлэгт оролцохгүй” гэж дуугарсан Баярцогт сайд хаяад нь явах нь гэж бодогдсон ч эрхбиш соёлтой хүмүүс болохоор рекламан завсарлага авч яаж ийгээд дуусгав.  Миний хувьд эхэндээ бүгдээрээ зөв юм яриад байх шиг санагдсан ч бие биенээ хэдэнтээ харилцан няцаасны эцэст бага сага зүйлийг өөртөө ойлгож авлаа.

Эрхбиш ашигтай гэрээ хийжээ. Гэхдээ нөхцөл байдал өөрчлөгдөж хэрэг бишидсэн ч 2040 он гартал гар хүрч болохгүй юм байна. Ер нь 10, 20 байтугай 30, 40, 50 жилийн дараахыг мэдэж шийддэг ямар мундаг сайдууд вэ? Хэдэн арван жилийн дараа хүртэж магадгүй орлогын төлөө өнөөдөр баясаад яахав. Хурдан ухаад урагшаа зөөж болохоор нь Тавантолгойдоо (Энержи Ресурс, Дайцүки, Ажнай мэтүүд амжаад эмтэлж авсныг орхихоос) найдья, монголчуудаа. Ямар азаар “Яндаж болдогггүй далай шиг яасан баян нутаг вэ?”   

Надаас эхлээд жирийн иргэд, олон нийтэд нэлээд юм ойлгуулсан сайн мэтгэлцээн байв. Харамсалтай нь, үүнийг олон нийтийн биш арилжааны телевизээс үзлээ.

Posted in 25-р суваг телевиз, TV8 телевиз | 5 Comments »

Бэлэн мөнгө амалсан юм уу?

Posted by Ажиглагч on 2009/11/11

МАХН-ын Эх орны хишигУржигдар “25-р суваг” телевизийн “Хэлэлцүүлэг” нэвтрүүлэг УИХ-ын гишүүн Ч.Хүрэлбаатар, Э.Мөнх-Очир, Д.Зоригт, Д.Одхүү нарыг урьж 2008 оны сонгуулиар Ардчилсан намын түрүүлж амалсан 1 сая, МАХН-ын давуулж амалсан 1,5 сая төгрөгийг хоёуланг нь бэлэн мөнгөөр өгүүүлэх хөдөлгөөнийг санаачилсан ҮШН-ын Б.Цогтгэрэл, бас нэг нөхөр, Г.Уянга нартай зэрэгцүүлж суулгаад нэлээд сайн мэтгэлцүүллээ. Харин амлалтуудаа хэдийнэ нэгтгээд “Хүний хөгжлийн сан” нэрээр бүр гоёыг амалж яваа улс төрчид “бид энд хэн нэгэнд боорлуулахаар ирээгүй” хэмээн нам дарж “Энэ бол хоёр намын улс төрийн амлалтын тухай нэвтрүүлэг. Монтажлахдаа энэ талаас нь хийгээрэй” гэж Г.Уянгыг хэлэхэд Хүрэлбаатар гишүүн “Монтажлах юм бол шүүхэд өгнө шүү” гэсэн хариу барьж байлаа.

Нэвтрүүлгийг хөтөлсөн сэтгүүлч Пүрэвхүү, Ариунаа нар “Та нар бэлэн мөнгө амалсан шүү дээ?” хэмээн хамт нэхэлцсэн боловч тэдэнд нотлох баримт (бичлэг гэх мэт) байсангүй. Хоёулаа 2008 оны УИХ-ын сонгуулиар МАХН ба АН-ын нэр дэвшигчдийн сурталчилгаанд ээлжлэн зүтгэсэн учраас тэр.

2008 оны сонгуулийн хавар хоёр намын улс төрчид 1 сая ба 1,5 сая төгрөгийн амлалтаар сонгогчдыг ховсдож, айл гэрүүдээр батламж тараан баярхаж явахад “Бэлэн мөнгө амлах хуулиар хориотой байхад танай нам яагаад?”, “Үнэхээр бэлэн мөнгө өгөх юм уу?”, “Энэ батламж чинь бэлэн мөнгө шиг харагдаад байна даа!?”, “Яг хэзээ өгөх вэ, нэг удаа юу, жил болгон юм уу? “Хүмүүс сонгуулийн маргааш өглөө эртхэн очиж авна гэж яриад байна?”, “Бэлэн мөнгийг өөр юмаар орлуулж зальдахгүй биз?”,  гэх мэтээр шаардаж, бас сонгогчдоос “Та 1,5 сая ба 1 сая төгрөгийг яг бэлнээр авна гэж ойлгов уу, эсвэл?” гэж мэтээр асуулт тавьж хариулт аваад хадгалчихсан сэтгүүлчийг би санахгүй байна. Тэр өдрүүдэд хэвлэл мэдээллийнхэн нэр дэвшигчдийн дуудлагаар очиж үйлчлээд тийм сэхээ байгаагүй юм.

Одоо батламж нэртэй цааснаас өөр ямар ч ул мөр үлдээгүй.

Posted in 2008 оны УИХ-ын сонгуулийн сурталчилгаа, 25-р суваг телевиз | 6 Comments »

Төлбөртэй сэтгүүлч

Posted by Ажиглагч on 2009/08/20

“25-р суваг” телевизийн сэтгүүлч Пүрэвхүү төлбөртэй нэвтрүүлгийн мөнгөнд үнэхээр донтчихжээ.

Өнгөрсөн долоо хоногийн “Сэдэв” нэвтрүүлгээрээ Оюутолгойн гэрээний асуудлаар зөвхөн МУУҮА ба уул уурхайн салбарынхны байр суурийг зөвхөн тэднээр яриулж тайлбарласан бол араас нь “Оюутолгойн гэрээ…” нэртэй захиалгат нэвтрүүлэг бэлтгэснийг өчигдөр зарим телевизээр үзүүлэв. Энэ удаад захиалагчиддаа бүр сайн үйлчилж илүү дэлгэрэнгүй тайлбарласан нь мэдээж. Сүүлдээ бүр “хар хүний төлөө шар хүн” гэгчээр давшилж гарах нь тэр:

… Иргэний хөдөлгөөнийхөн эх орончид мөн үү? … Хэн чанга хашгирснаар бол илжиг хот байгуулчих байсан гэж перс ардын үг бий… Иргэдийн 80 хувь Оюутолгойн гэрээг байгуулахын төлөө байна… Иргэний хөдөлгөөнийхөн хаанахын ард түмнийг төлөөлөөд байна аа?… Тэдэнд зориулж монголын ард түмний төлөөллийн үгийг хүргэе…

Ингээд Оюутолгойн гэрээг түргэхэн байгуулж ашиглалтанд оруулах нь зөв үү гэсэн мэдээжийн асуултыг гудамжинд яваа хүмүүст тавьж “зөв” гэсэн мэдээжийн хариултыг баахан урсгалаа. (Жишээлбэл, “сэтгүүлч хүн хэн нэгэнд худалдагдахгүй байж эсрэг тэсрэг байр суурийг хүмүүст хүргэх нь зөв үү?” гэсэн асуулт тавиад үзвэл?)

Удахгүй сэтгүүлч Пүрэвхүүд мөнгө төлж нэвтрүүлэг захиалаагүй бол монголын ард түмний тооноос хасагдаж мэдэх нь.

Posted in 25-р суваг телевиз | 2 Comments »

Сонгуулиар завсарладаг мэргэжил

Posted by Ажиглагч on 2009/08/10

Ерөнхийлөгчийн сонгуулиар сураг алдран далд фронтод сэмээрхэн дайтаж яваад ирсэн зарим сэтгүүлч хэсэг амсхийгээд дэлгэцнээ дахин үзэгдэж эхэллээ.

Жишээлбэл, нэр дэвшигч Ц.Элбэгдоржийн сонгуулийн сурталчилгааны штабт зүтгэсэн “25-р суваг” телевизийн сэтгүүлч Пүрэвхүү “Миний мэргэжил-сэтгүүлч” нэвтрүүлгээ сэргээж Сүхбаатарын талбайн урдах Ахмадын холбооны байранд очиж Баасан хатагтайтай уулзсан бичлэгээ үзүүлэв. (Нурах шахсан барилгад Баасан конторлож ахмадууд цугларсан хэвээрээ, хэрвээ тэдний мэдэлд өгчихвөл хөрөнгө оруулагч бэлэн, засаад гоё байшин болгохоо амалж байна)

Ингээд сонгуулийн өдрүүдэд Пүрэвхүүгийн “Миний мэргэжил – сэтгүүлч” биш байсан бол одоо буцаад мөн болсон хэрэг.

Сурталчилгаа эхлэхэд хоёр намын штаб телевизийн захирлуудад хандаж “татгалзахааргүй санал” олныг тавьсны нэг нь гайгүй сэтгүүлчдийн нэр цохож штабтаа авч ажиллуулах хүсэлт байжээ. Бараг бүх захирлууд зөвшөөрч сэтгүүлчдээ зарчихсан байна. Зараагүй, зүгээр л чөлөө өгөөд явуулсан гэх биз. Гэхдээ редакцийн ёс зүйн зарчим энэ тэрийг “мартсаныхаа” төлөө тухайн телевиз асар их сурталчилгааг өндөр тарифаар саадгүй авч цацсан билээ. Зарагдсан сэтгүүлчийн тухайд гэвэл тусдаа гэрээ байгуулж үнэ хөлсөө тохирсон …

Харин одоо “шударга, тэнцвэртэй”, бас “хэнд ч худалдагдахгүй” ажиллах цаг ирлээ. Юу ч болоогүй юм шиг …

Posted in 2009 оны Ерөнхийлөгчийн сонгууль, 25-р суваг телевиз | 7 Comments »

TV9 өөрөөсөө ичиж TV5 ичихээ ч болив

Posted by Ажиглагч on 2009/05/27

Өчигдөр Монгол Улсын Ерөнхийлөгчийн сонгуулийн сурталчилгаанд хийсэн мониторингийн дүнгээ Хэвлэлийн хүрээлэн (өдөр тутмын болон долоо, арав хоногийн сонинууд) ба “Глоб Интернэйшнл” ТББ (улс орон даяар цацагддаг телевиз, радиогийн5-р сарын  18-22-ны таван өдрийн хөтөлбөр) хамтран хэвлэлийн хурал хийж танилцуулжээ. Үүнийг сонинууд яаж мэдээлснийг бүү мэд, харин миний үзсэн телевизүүд өөрсдөө хэрхэн танилцуулав? Хамгийн сонирхолтой нь TV9 байлаа.

ТВ-9 телевизийн “Энэ өдөр” мэдээллийн хөтөлбөр.

Хэвлэлийн хурлын тухай сурвалжлагадаа зөвхөн сонинуудын тэнцвэртэй байдалд учир зүггүй санаа тавьж Хэвлэлийн хүрээлэнгийн мониторингийн дүнгээс баахан уншсанаа телевизүүдийн мониторингыг шууд алгасч зөвхөн МҮОНТ-ээр явуулсан халз ярилцлагыг хэдэн хувь үзсэн тухай дурьдаад өөрийгөө тас нууж дуусгав. Өөрөөсөө ичсэн байх.  Мониторингийн мэдээнд тус телевизэд “Нийт цагийн 71,2%-ийг эзэлж байгаа Н.Энхбаярын мэдээллийн 93,2% нь эерэг байна. Харин Ц.Элбэгдоржийн мэдээлэл нийт цагийн 28,8%-ийг эзэлж, үүний 76,9% нь сөрөг мэдээлэл байна” гээд дурайж байлаа.

TV5 телевизийн “Цаг” мэдээлийн хөтөлбөр

Дээрх хэвлэлийн хурлыг мэдээлэхдээ “нэр дэвшигчдийн сурталчилгаа эрчимтэй явагдаж байсан сүүлийн 5 хоногт дүн шинжилгээ хийхэд үндэсний хэмжээнд эфирээ цацдаг манай телевиз онц гэсэн үнэлгээ авсан байна. Хэт нэг талыг барьсан мэдээ нэвтрүүлэг гаргалгүй, тэнцвэртэй байдлаар хандсан нь ийм дүгнэлтэд хүрэхэд нөлөөлжээ” гээд сийхгүй залав. “Глоб”-ийн мэдээг үзэхэд ямар ч дүн алга. Өөртөө дүн тавиад зогсохгүй UBS, 25-р суваг телевиз тэнцвэр муутай байсныг нотолсон тоонууд уншиж тэрүүхэндээ нүглийг нь илчлээд амжив.  Хэлээгүй л болохоос биш муу дүн тавьжээ. Гэхдээ TV5 өөрөө Монгол Улсын Ерөнхийлөгчийн сонгуулийн хууль, СЕХ-ноос баталж өөрсдөө гарын үсгээ зурсан хуваарийг хэрхэн эрээ цээргүй зөрчсөнийг би урьд нь бичиж байсан. Зөвхөн сүүлчийн 5 хоногт 130 минутийн сурталчилгааны нэвтрүүлэг явуулах хуваарьтай атлаа 475 минутийг явуулж бараг 4 дахин хэтрүүлжээ. Тэнцвэрийн тухайд гэвэл 2 намд хоёуланд нь зэрэг худалдагдсаных.

“25-р суваг” телевизийн “25 цаг” мэдээллийн хөтөлбөр

Мониторингийн дүнг танилцуулахдаа тус нэвтрүүлгийг нэр дэвшигчдийн сонгуулийн штабаас захиалсан эсэх, нэгэнт тэгш боломж олгосоор атал тухайн цагт нь нэвтрүүлгээ болон ярилцлагаа өгөхгүй өөрсдийн сонголтоо хийсэн зэрэг нарийн учрыг нь төдийлөн тодруулаагүй болохоор зарим талаар бүрэн хэмжээний тэнцвэрт байдлын судалгаа гэж хэлэхэд боломжгүй харагдаж байгаа юм…” гэлээ. Зүүдээ ярих гээд хулгайгаа ярьчихлаа. Нэр дэвшигчдийн сонгуулийн штабаас захиалаагүй буюу хууль зөрчсөн нэвтрүүлэг явуулдаг, өрсөлдөгч талууд заримдаа нэвтрүүлгээ өгдөггүй байхад л  хоёр талын сурталчилгааны хэмжээг хэд дахин хэтрүүлснээ хүлээн зөвшөөрөв.

“Нарийн учир” гэж телевизүүд хууль зөрчихдөө сонгуулийн штабуудтай хэрхэн хуйвалдсаныг хэлсэн юм болов уу? Түүнийгээ жагсаагаад ил болгомоор юм даа.

Posted in 2009 оны Ерөнхийлөгчийн сонгууль, 25-р суваг телевиз, TV5 телевиз, TV9 телевиз | 3 Comments »

Завханд болсон хонолт

Posted by Ажиглагч on 2009/03/02

“25-р суваг” телевизийн хөтлөгч Тэнгис цагаан сарын өмнөхөн хөдөө ухасхийж 1000 гаруй км-ын цаана нэг хоноод иржээ. Изнис-ийн цагаан онгоц хөлөглөн Завхан аймгийн төв – Улиастайд бууж тэндээсээ нэгэн жип олж суун явсаар цасан цагаан хөндийд хонь хариулах малчин залуутай уулзаж түүнийг ёс болгон гуйж гэрт нь хонохоор очлоо. Гаднаа хашаа хороо нь цэмцийсэн, гэртээ халуу дүүгисэн (дэлгэцэн дээрээс л тэгэж санагдсан шүү), бас телевизортэй, унинаасаа гар утас дүүжилсэн, орчин үеийн сайхан айл угтав. Ажилсаг эзэгтэй, хоёр хөөрхөн хүүхэд (гуравдах нь сурагч, сумын төвд дотуур байранд суудаг, тэр нь утсаар залгаж ярив) угтаж сайхан зочилж хонууллаа. Гэрийн эзэн ч сайн малчин, гадагш гарч туйлдсан нэг тугалыг тордсоор байгаад хөл дээр нь босгож чадав.

Гэвч…

Хотоос ирсэн хөтлөгч маань тэднийд хайрцагтай бэлэг гардуулахад дээд талд нь Gem Интернэйшнл-ийн гонзгой “бүтээгдэхүүн” зурвас харагдаад өнгөрөв. Удалгүй араас нь жип, бас чиргүүлтэй 69 хоёр дурандуулан байж тэдний гадаа ирж зогсоход дотроос нь сумын Засаг дарга, бас хэн гээч… Gem International-ийн цээж задгай ажилтан бууж малчдад өвс тарааж буян хийж яваагаа хэлэв. Ингээд 20 боодол өвстэй тэр айлд 10-аад боодол өвс авчирснаа буулгаж эхлэв.

Эргэлзээ төрөөд явчихав. Тэнгис яагаад Монголын 21 аймгаас чухам Завханыг сонгож гэнэт зүглэсэн, онгоцноос буугаад ямар бэлэн жип олоод замд гарсан, замдаа яагаад жолоочийг биш дугуй эргэхийг л харуулсан, тэр айлд хоноход машин, жолооч хоёр хаачсан, ерөөсөө Gem-ийнхэн энэ өвөл ганц удаа хөдөө гарч өвс тараахад Тэнгэс бас тэнд явж таарсан, өглөө босоход хаанахын ямар жип ирж авсан гээд бодоод байхнээ бас нэг захиалгат “Танайд хоноё” байсан бололтой. Энэ удаад хонуулсан айл өөрөө ч захиалаагүй …

Сумын Засаг дарга сайн айлыг сонгож сайн бэлдүүлсэн байна. Зөв өө. Хөдөөний айл гэхлээр заавал ундуй сундуй, даарч хөхөрсөн байх албагүй. Гэхдээ цайлган цагааныг нь далимдуулан Gem Интернэйшнл-ийн рекламанд тоглуулж, телевиз үзэгчдийг хуурах тоглоомондоо оролцуулах дэмий санагдав. Тэрний оронд “бүтээгдэхүүн” дагаж ирснээ хэлээд, бас ганц “бүтээгдэхүүн” задлаад (тэр орой нутгийн хоёр залуу энэ айлд хонохоор буусан, тэд хаачив?) шөнөжин юм ярьж суухгүй дээ. Хотдоо эргэж ирээд нөхөж унтана биз.

Энэ нэвтрүүлгийн дундуур өөр реклам ороогүй нь учиртай байж…

Posted in + ТЕЛЕВИЗ, 25-р суваг телевиз | 7 Comments »

“Миний мэргэжил – [төлбөртэй] сэтгүүлч”

Posted by Ажиглагч on 2009/02/22

Өчигдөр орой “25-р суваг” телевизийн “Миний мэргэжил-сэтгүүлч” нэвтрүүлгийн 6 дахь дугаар гарав. Оросын РТР телевизийн “Профессия – репортер” гэдэг эрэн сурвалжлагын тусгай нэвтрүүлгийг дууриаж, нэрийг нь хуулан орчуулжээ. Манайд бол Пүрэвхүүгийн зохиогчийн хөтөлбөр бөгөөд одоогоор газар дээр нь очиж бэлтгэсэн уртхан сурвалжлагын хэмжээнд байна.

Энэ удаад редакциас өгсөн даалгаврын дагуу “Эмээлт” өртөө рүү явж тэндхийн цагдаа нар, ченжүүд, иргэдтэй уулзаж, айлуудаар орж зовлон жаргалыг нь сонсов. Тэндээс УИХ-д сонгогдсон Д.Тэрбишдагва, C.Оюун, Д.Батбаяр, нийслэлийн хуралд сонгогдсон Т.Билэгт, Л.Эрхэмбаяр нарыг нэрлэж өөрсдийн тойргоо эргэж тойрон нүүр царайгаа харуулахыг уриаллаа. Болж.  

Гэхдээ би өмнөх хоёр дугаарын талаар нэг юм хэлэхгүй бол “дутагдлын хажуугаар дуугүй өнгөрсөн” болно.

2009 оны 2-р сарын 7-ны дугаараар Говьсүмбэр аймагт очиж Шивээ-Овоогийн оросын цэргийн хаягдсан хотхонд амьдардаг иргэдийн амьдралыг харуулав. Өөрийн унаагаар очиж ундуй сундуй барилгуудыг тойрч халаалт доголдож даарч бээрсэн айлуудаар орж энд тэндгүй хөлхөх согтуу хүмүүстэй уулзаж ярилцсан юм. Яахав, хаа сайгүй байдаг бидний амьдралын дүр зураг. Энэ утгаараа Говьсүмбэрийг муулаа ч үгүй, магтаа ч үгүй.

Гэтэл 2009 оны 2-р сарын 14-ны орой санаандгүй юм болов. Пүрэвхүү өөрийн “гараар” хийсэн өмнөх нэвтрүүлгээ няцаасан “төлбөртэй” нэвтрүүлэг бэлтгэн үзүүлэх нь тэр.

minii-mergejil-setguulch-darga minii-mergejil-setguulch-gobisumber2

Аймгийн ЗДТГ-ын хэлтсийн дарга, Шивээ-Овоо сумын засаг дарга, МСҮТ-ийн захирал нарын хүмүүс өмнөх нэвтрүүлэг буруу зөрүү ойлголт өгснийг сануулаад аймаг, байгууллагынхаа ажил амьдрал, ялангуяа Засаг дарга Баянмөнх гэдэг хүнийг магтан шагшлаа. Хотоос ирж энд амьдрах нь дээр гэж нотолсон үлгэр жишээ залуучууд гарав. Мэргэжлийн сургалт үйлчилгээний төв үнэхээр сайхан юм байна. Даардаг айлууд даарахаа больчихож.  Бас цэцэрлэгийн эрхлэгч авгай түрүүчийн нэвтрүүлгээр халамцуу гарч дэл сул юм ярьсан эрийг дэргэдээ нов номхон зогсоочихсон, хөдөлмөрийн дэвтрийг нь дэлгээд шагширч өглөө. minii-mergejil-setguulch-gobisumber17

Хөөрхий эр телевизийн дуранг өрөвдөлтэйө ширтэнэ… Муу ч, сайн ч эр хүнийг ингэж гутааж болох уу? 

minii-mergejil-setguulch-gobisumber19

Өмнөх нэвтрүүлгээр сэтгүүлч Пүрэвхүү Шивээ-Овоог бараан талаас нь харуулсан байг. (Бичлэгээ компьютер графикаар засчихаагүй л бол тэгээгүй). Буруу зөрүү юм хэлсэн байг. Гэхдээ энэ нь долоохон хоногийн дотор төрөл арилжиж урьд нь огт шүүмжлээгүй Говьсүмбэр аймгийн төвийн албан байгууллагууд, уурхай, тэр тусмаа Засаг даргыг нь тусгай нэвтрүүлгээр тэнгэрт тултал магтан сурталчлах шалтгаан огтхон ч биш.

Говь-Сүмбэр аймгийн дарга нар хэдэн төгрөг амлахад л 2008 оны Монголын шилдэг сэтгүүлч буугаад өгчээ. Үүнээсээ ичээд өөрөө харагдахгүй нуугдаж тайлбараа өөр хүнээр уншуулсан ч зарим асуултыг өөрөө тавих нь сонсогдсон. Одоо нэгэнт мөнгөө төлсөн (төсвийн мөнгө биз) Говьсүмбэрийн удирдлага сүүлийн үед бусад сонин хэвлэлд гарсан бүх шүүмжлэлийг давхар няцаан амжуулж өгсөн дөө.

Ноднин “25-р суваг” телевизийн удирдлага Алтантүрүү гэдэг чадварлаг залууг буруу залж айлд мөнгөөр очиж унтдаг болгож сургаад балласан бол одоо энэ охиноор Говьсүмбэр аймгийн нэгэн тосгоныг жаахан шүүмжлүүлээд дараа нь мөнгө авч залруулжээ. Юугаараа шантааж биш гэж? Хэрвээ эхний нэвтрүүлэг байгаагүй бол хоёрдахь нэвтрүүлэг хийгдэхгүй, улмаар Говьсүмбэр аймгийн төсвөөс татвар төлөгчдийн хэдэн төгрөг “25-р суваг” телевизийн дансанд шилжихгүй байсан.

Одоо манай хэвлэл мэдээллийнхэн шантаажыг ил тод хийдэг болжээ.

Posted in 25-р суваг телевиз, Нийтлэл, нэвтрүүлэг | 17 Comments »

“Улаанбаатар” зочид буудалд хоноё”

Posted by Ажиглагч on 2008/12/29

Ноднин телевиз үзэгчдийн сэтгэл санааг эзэмдэж хөтлөгч Алтантүрүү нь Монголын телевизүүдийн холбооны шагналыг Ерөнхий сайд С.Баяраас гэрт нь хонох урилгын хамт авч байсан “25-р суваг” телевизийн “Танайд хоноё” нэвтрүүлэг энэ 2008 оныг зочид буудлын тансаг өрөөны ванны өрөөнд үдэх шив. Сайн сайхан яваа мэт боловч нөгөө шинэ сонин хүмүүс, тэдний амьдрал, оройн хоол унд, үдшийн яриа алга байлаа. Нэг л биш ээ.

Тайлбарлая.
2008 оны төгсгөлийн буюу 12-р сарын 28-ны “Танайд хоноё” нэвтрүүлгийн эхэнд өмнөх ням гаригт очсон олон хүүхэдтэй ядруу айлд туслахыг хүссэн сайхан сэтгэлтэй хүмүүсийн хандивыг аваачиж өгснөөр эхлэв. Дараа нь хөтлөгч Тэнгис хонох айлаа олохоор УИД-ын урд ирж зогсоод “Би хонох айл олох гэж маш их хичээдэг. Өнөөдөр хонуулах айл олдохгүй бол яанаа” хэмээн ямар нэгэн буруу юм хийснээ нуусан жаал (“Аав аа, би аяга хагалаагүй ш дээ” гэдэг урьдчилж хэлдэг шиг) мэт тун сэжигтэй эхлэв. Уг нь түүнийг хичээдэггүй гэж хэн ч зэмлээгүй юмсан. Ингээд хөтлөгч маань тэр хавиар сүлжилдэх түмэн хүнээс хэдэн охид, эмэгтэйчүүдыг сонгож “танайд хоноё” гэсэн санал тавихад цаадуул нь мэдээж татгалзлаа. Өрхийн тэргүүнээс асуухгүйгээр нэг (хоёр) “хар юм”-ыг бас камертай дагуулаад очдог ёс жудаггүй эзэгтэй гэж байх уу? Байхгүй! Нөхөргүй ганц бие юмуу өрх толгойлсон бол бүр үгүй.

Хэргийн учир тэр дороо тайлагдаж хөтлөгч маань “Би өнөөдөр зочид буудалд очиж хононо” гэж мэдэгдлээ. Уг нь сонин санаа. Буудлын амьдралын нэгэн үдэш юмуу шөнийг харуулж яагаад болохгүй гэж?. Даанч “Улаанбаатар” гэдэг зочид буудалд очиж хонохоор шийдсэнээ зарлаж, үүнийгээ “хүүхэд байхаасаа сайн мэддэг байсан” гэж тайлбарлав. Гэхдээ жинхэнэ шалтгаан өөр. Тус буудал “Монгол ньюс” компанийн хөрөнгө оруулалттай, бараг түүний охин компани шахуу билээ. Илүү тайлбар хэрэггүй биз.

Дараачийн мөчид хөтлөгч Тэнгис “Улаанбаатар” зочид буудлын ресепшн дээрээс түлхүүр авч байх юм. “Хонуулчих л даа. Мешокоо дэвсээд унтчихна. Саад болохгүй, тэгэх үү” гэсэн нэвтрүүлгийнхээ алдарт гуйлтыг хэрэглэх шаардлага гараагүй бололтой. Буудлын менежер биечлэн үйлчилж ганц хонохоор ирсэн хөтлөгчид Ерөнхийлөгчийн өрөөг танилцуулж тэнд оруулах шиг болов. (Гэхдээ үйл явдлын дүрсүүд рекламын клип шиг солигдоод байсан тул би андуурч болох). Ингээд хөтлөгч номертоо ганцаараа үлдэнгүүтээ (зураглаачтайгаа хоёулаа гэсэн үг) ваннтай усанд шумбаж зургаа авахуулаад “Шинэ жилээр хүмүүс гэр бүлээрээ байхыг хүссэн учраас намайг хүлээж аваагүй байх” гэж худлаа залж “Намайг уриалгахан хүлээж авсан “Улаанбаатар” зочид буудлын хамт олонд баярлалаа” хэмээн талархаад хөнжилдөө шурган нойрссон ба өглөө босоод юу ч дуугаралгүй хөгжмөөр “зодоод” тэр чигээрээ гарч нэг мэдэхэд буудлын гадаа явж харагдав. Ядахдаа өрөөгөө хүлээлгэж өгсөн байгаасай. Ийнхүү дэндүү богинохон мөртлөө сурталчилгаа нь хонолтоосоо урт “Буудалд хоноё” өндөрлөв.

Хоёр жилийн турш үзэж дассан Алтантүрүү солигдож шинэ хөтлөгч гарч ирэхэд, тус тусмаа олимпийн аварга Бадар-Ууганыд хоноход үзэгчид эхний удаад ихэд сонирхсон боловч одоо больжээ. Шинэ хөтлөгчийг олон хүн шүүмжилж байна. Аливаа нэвтрүүлэгт хөтлөгч солигдож болдог, гэхдээ шинэ хүн юм бол өөртөө таарсан, өөрийн чаддаг шинэ юмыг оруулж байж үзэгчдийг урвуулах учиртай. Даанч шинэ хөтлөгч маань Алтантүрүүг муухан дууриагчийн хэмжээнд эхэлж энэ оны төгсгөлд гоё буудалд арын хаалгаар хонож ванны өрөөнд ус палчигнуулахаас өөр олигтой юм бодож олсонгүй. Харамсалтай.

Posted in + ТЕЛЕВИЗ, 25-р суваг телевиз, Нийтлэл, нэвтрүүлэг | 6 Comments »

Бадар-Ууганыд Алтантүрүү биш Тэнгис хонов

Posted by Ажиглагч on 2008/12/01

Хэд завсарлаад сэргэсэн “Танайд хоноё” нэвтрүүлэг энэ удаад олимпийн боксын аварга Бадар-Ууганыд зочиллоо. Тэрбээр өөрт нь амлаад байсан олон байранд ороогүй, харин ШШБГ-аас өгсөн ганц сууцанд аав ээж, дүү нартайгаа цуг амьдардаг ажээ. Ухаантай сайн залуу, азтай гэр бүл байна. Иймээс сайхан нэвтрүүлэг боллоо.

Бадар-Ууганаас дутуугүй сонин юм гэвэл тус нэвтрүүлгийн хөтлөгч Г.Алтантүрүү солигдсон явдал байлаа. Сүүлийн жилүүдэд Монголын телевизэд гарч ирсэн хамгийн өвөрмөц нэвтрүүлэг зүв зүгээр явж байтал нэвтрүүлэг, арилжаа хоёроо ялгахаа больтлоо мөнгөнд донтсон “25-р суваг” телевизийн удирдлага нь УИХ-ын болон орон нутгийн сонгуульд нэр дэвшигчдийнд захиалгаар хонуулж цаадах нь үүнийгээ нуух гэж жүжиглэсээр нэр нүүрээ барсан билээ. Тиймээс нэвтрүүлэгтээ гутсан байх. Манай залуучууд ажилдаа дургүй болохоороо яадаг билээ?  Тэгээд телевизээсээ гарсан сурагтай. (Мэдээж өөрийн нэвтрүүлэг хийж олон телевизийн нэгээр гаргана. Монголд телевизээр мөнгө олдог аргыг тэр сайн сурсан биз) 

Харин 25-р сувагтаа үлдсэн “Танайд хоноё” нэвтрүүлгийн шинэ хөтлөгч Б.Тэнгист тийм явдал тохиолдохгүй гэж найдья. Ядахдаа дараа жилийн ерөнхийлөгчийн сонгууль хүртэл. Бас манай зарим бүтээгдэхүүний үйлдвэрүүд “Тэнгис” гэдэг брэнд бүү гаргаасай. Гаргавал энэ нэвтрүүлгийг хөтлөгчтэй нь хамт худалдаад авчихаж мэднэ. 25-ын удирдлага эсэргүүцэж сүйд болохгүй…   

Энэ удаад “Танайд хоноё” нэврүүлгийн дундуур хангалттай олон реклам явдаг хэвээрээ, хөтлөгч нь унтахдаа хүртэл “Говь” компанийн унтлагын мешокийг рекламдаж үүгээрээ Алтантүрүүг давж гарсан харагдлаа. Илүү хэрэггүй байх аа…

tanaid-honoyo0 tanaid-honoyo31

tanaid-honoyo1 tanaid-honoyo4

tanaid-honoyo6 tanaid-honoyo7

tanaid-honoyo8tanaid-honoyo2

Posted in + ТЕЛЕВИЗ, 25-р суваг телевиз | 6 Comments »

Телевизээр гардаг телевизийн ба сонины тоймууд

Posted by Ажиглагч on 2008/11/25

Уг нь энэ олон телевизийн хамгийн сайн мэдээ, сурвалжлагуудыг нэг дор үзчихдэг бол сайхан л юм. Харамсалтай нь телевизүүд хоорондоо өрсөлддөг, бас зохиогчийн эрх гэж нэг юм байдаг …

C1 телевиз ийм оролдлогоо ерөөсөө орхихгүй юм аа.  Өөрийгөө төв телевиз бодчихсон мэт. Хоёр жилийн өмнө  жижиг телевизүүдийг аргалж, МҮОНТ-ыг төлөөний хүнээрээ лоббидож, заримаас нь шууд хулгайлж байгаад үдэш бүрийн 23 цагаас “Фокус ньюс” нэртэй мэдээллийн хөтөлбөрийг бэлтгэн үзүүлсээр овоо рейтинг цуглуулж реклам сурталчилгаа чангаадаг болсон ч тэгэсхийгээд зогссон.

Гэвч өнгөрөгч 10-р сараас “Фокус ньюс”-ээ сэргээгээд байна. (Эхлээд сэтгүүлч Алтаншагай хөтөлж байснаа гэнэт больчихов. Энэ телевизэд бас л тогтсонгүй юу?). Завгүй яваад телевизүүдийн мэдээлийн хөтөлбөрийг үзэж чадаагүй хүмүүст нэг дороос үзүүлж, тэгэхдээ өөр өөр өнцгөөс харах боломжийг олгож байна гэх сүрхий тайлбар хийж байгаа ч  өөрөөсөө гадна НТВ, SBN, TM,  хааяа Оросын “Айст “ гэсэн хэдхэн телевизийн мэдээ сурвалжлагаас оруулж байна. Зөвшөөрсөн нь тэд бололтой. Жижиг телевизүүдийн мэдээний тойм юмуу даа. Иймээс дутуугаа нөхөхийн тулд өдөр тутмын сонинуудын тоймыг араас нь залгаж оруулдаг болжээ. Харин хөтлөгчийн зүгээс улс төрийн элдэв тайлбар, дүгнэлтээр хэтэрхий “баяжуулдаг” нь зохихгүй байна лээ.

Зөвхөн сонинуудын нийтлэлийг ашигладаг, агуулгын хувьд төстэй Press Express нэртэй хөтөлбөр NTV телевизээр гардаг байснаа сураг тасарчээ. Энэ жил УИХ-ын сонгуулийн сөрөг сурталчилгааны дайчин нэвтрүүлэг болж хувирсан тэр халуундаа шатсан байх.

Сонинуудыг тоймлодог өөр нэвтрүүлэг хэд хэд бий. TV9 телевизийн Focus Press аядуу, гэхдээ долоо хоногт ганц удаа учраас шинэ мэдээлэл өгөх нь ховор.  Ням гаригт “25-р суваг” телевизийн “Rock news” нэвтрүүлэг  “сонин сонины сониноос” гадна Интернэтийн монгол сайтуудад тавигдсан элдэв мэдээг хөгжимтэйгээр дуулгаж хэсэгхэн зугаацуулж байна.

Бас “25-р суваг” телевизийн өглөөний хөтөлбөр “Өнөөдөр” сониноос хэн нэгнийг урьж шинэ дугаарын тоймыг яриулдаг  бол C1 телевизийн “Өнөөдрийн эхлэл” хөтөлбөр өдөр тутмын сонинуудын хуудсыг шажигнатал эргүүлж баахан пөөх, байз, аах уух зэрэг уран сайхантайгаар бага сага хэлж өгдөг.

Сонины тоймыг телевизээр уншихад эзэд нь дургүйцлээ барилаа гэж дуулдаагүй.  Тэртээ тэргүй бүгдийг нь дуудаад өгч барахгүй тул сурталчилгаа болохоос хэтэрдэггүй байх. Гэхдээ манай телевизүүд сониныг тоймлодог арга дэндүү болхи, өнгөрсөн зууных хэвээрээ. Хөтлөгч л ганцаараа сониноо үзэж хэдхэн мөчийн өмнө гартаа авсан шинэ дугаарыг гүйлгэж хараад ойлгож амжсан ганц нэг материалаа ярьдаг. Гадаадын телевизийг ажиглахад, сонины хуудсуудыг дэлгэцэн дээр ээлжлэн гаргаж онцлох нийтлэлийг томруулан үзэг харандаагаар зааж, нэг ёсондоо уншигч буюу үзэгчдэд харуулж байгаад тайлбарладаг. Манай телевизүүд чадахгүй гэж үү? Эхлээд аль нэг сонинтой тохиролцож шинэ дугаарыг нь .pdf-ээр аваад …

Эсвэл манай сонины эзэд бас дургүйцэх юм болов уу?

Posted in + СЭТГҮҮЛ, + ТЕЛЕВИЗ, 25-р суваг телевиз, C1 телевиз, Нийтлэл, нэвтрүүлэг, TV9 телевиз | 8 Comments »

“За тэгье … Танайд хоноё… Хэдээр вэ?”

Posted by Ажиглагч on 2008/09/29

“25-р суваг” телевизийн “Танайд хоноё” нэвтрүүлгийн хөтлөгч Алтантүрүү хэсэг завсарласны эцэст дахин мөнгөөр айлд хонож эхэллээ. Тэрбээр өөрөө соёлтой залуу болохоороо “би зорьж ирсэн, хажуугаар нь бас урилгатай ирсэн” гээд боловсон үгээр тайлбарлаж байна. Зорьж ирэхийг нь мэдээд урина гэж юу байхав, тэгэхлээр урьсан учраас зорьсон байж таарна. 

Бямба гаригийн “Танайд хоноё”. 

Энэ удаад “Өсөхбаяр” сангийн тэргүүн Өсөхбаяр нэртэй залуугийнхийг “зорин уригджээ”. Тийм байх аа. Өнгөрсөн зун ийм нэртэй сан байгуулсан тухайгаа хэвлэлийн хурлаар зарлахад хүмүүс “Өсөхбаяр аваргынх байж таарна, энэ залуу түүний өмнөөс гүйх нь, харин яагаад Хан-Уул дүүргээс ажлаа эхлэх юм бол” гэж бодоод өнгөрсөн. Тэгтэл аваргын нэрээр анхаарал татаж байгаад нийслэлийн ИТХ-ын хуралд Хан-Уул дүүргээс бие даан нэр дэвшихээр эртнээс онилсон овсгоотой залуу байж. 

Алтантүрүүг гэртээ авчран зочлоод, хонуулсны (бас мөнгө өгсний) хариуд Алтантүрүү

Иргэдийн төлөө орон нутгийн сонгуульд өрсөлдөж байгаа энэ 26-хан настай энэ залуу Улаанбаатар хотын оршин суугч бидний амьдрах орчныг шийдэж өгөх итгэл даах хүн мөн үү биш үү гэдгийг үзэгч та бүхэнд харуулахыг хүссэн юм.  Сонгуультай холбоотой учраас би энд их юм яримааргүй байна… гээд мешок руугаа шурган орж нойрлоо. 

Түүнд их юм ярих хэрэг үнэхээр байгаагүй, учир нь Өсөхбаяр өөрийгөө “гадаадад 10 хонохлоор дотор давчдаад буцаж ирмээр санагддаг” гэх мэтээр тултал рекламдаж авсан. Дахиад жаахан яриулсан бол Хан-Уул дүүргээсээ  холдож Энхтайвны гүүрийг даван хотын төв рүү орохлоор дүүргээ санадаг сэтгэлээ илчлэх нь гарцаагүй байсан. Ийм эх оронч бөгөөд хан-уулч хүнийг сонгохгүй байж болох уу? Болохгүй. 

Ням гаригийн “Танайд хоноё”.   

Сүүлийн өдрүүдэд Японы Комацу пүүсийн Монгол дахь салбарын захирал Э.Тамир орой болгон телевизээр гарч компанийхаа 15 жилийн ойн мэндчилгээг монголын ард түмэнд дэвшүүлсээр бүгдийн танил болжээ. (Яг одоо дахиад гарч байна. Сайн уу, Тамир аа!)

Тэгтэл  орон нутгийн сонгуулийн кампани эхэлж таарснаас болов уу нийслэлийн ИТХ-д Ардчилсан Намаас нэр дэвшихээр тодрох нь тэр. 

Ингээд Алтантүрүүг  дуудан гэртээ хонуулж аж амьдралаа илүү сайн дэлгэхээр шийджээ. Гэтэл юу болов? Эхлээд тансаг харшаараа оруулж тоолж барахааргүй олон өрөөгөөрөө шагайлгаж хөөрхий сэтгүүлчийг маш их горьдоосон (Алтантүрүү “энд хономоор байна… хонуулахгүй юм байх даа” гээд үглээд байсан) мөртлөө хонуулахгүй, бас авгайгаа үзүүлэхгүй (зөвхөн хүүхдүүд нь харагдсаныг бодоход авгай нь тэр хавьд нуугдсан байж) машиндаа суулган авч давхисаар Өлзийт хавьд байдаг мориныхоо хашааны дэргэдэх байшинд аваачиж хэсэг ярьж суугаад унтууллаа. Тун тохилог байшин, гэхдээ л хачин байгаа биз? Алтантүрүү маань “яая гэхэв” хэмээн хэд үглээд дуугүй л хонов.  Мориныхоо жүчээнд очоод унтчих гэвэл зөвшөөрөх байсан. Мешоктойгоо очсон юм чинь. Мөнгө, тэгэхдээ их мөнгө авчихсан бол яая гэхэв…

Posted in + ТЕЛЕВИЗ, 2008 оны Орон нутгийн сонгуулийн сурталчилгаа, 25-р суваг телевиз | 5 Comments »

Сонгууль-2008: “Лүнгийн хэрэг”-ийг хэн цайруулав?

Posted by Ажиглагч on 2008/09/07

2008 оны УИХ-ын сонгуулийн сурталчилгаанд манай хэвлэл мэдээлэл, сэтгүүлчид хэрхэн оролцож ямар үүрэг гүйцэтгэсэн зарим баримт жишээг “Сонгууль-2008” нэрээр эргэн сануулья.

Баруун зүгт Лүнгийн замыг “Очир төв” компани хоёр жилийн турш там болгоод байна. Уг нь тендерт ялж цоо шинэ засмал тавих үүрэг хүлээн ажлаа эхэлж хуучин замыг туушид нь хуулж хаясан мөртлөө шинийгээ барьж дуусалгүй өдий хүрснээс хөндий дүүрэн салаа замууд үүсч эрүүл хөрс, малын бэлчээрийг сүйтгэсэн билээ. Саяхан Зам, тээвэр аялал жуулчлалын яамны дэд сайдын яриаг сонсоход 11-р сард бүрэн дуусах гэрээтэй энэ зам дээр тус яамныхан бараг бүрэн бүрэлдэхүүнээрээ очоод сахиж суугаа боловч сайндаа л 50-70 хувийг энэ онд багтаан ашиглаланд өгвөл дээдийн заяа гэнэ. Бас наадмаар Хүй долоон худаг руу хагас дутуу тавьсан замаа одоо дахиж байгаа сурагтай.  

Хэрвээ манай сэтгүүлчид “Лүнгийн хэрэг”-ийг нэгэн дуугаар шуугиад эхэлсэн бол ийм хулхи компанийн эзэн Дамба-Очир төрд орох нь бүү хэл  өөрөө хүрз бариад тэнд халуун асфальт шидэлж зогсох учиртайсан. Гэтэл тэрбээр 2008 оны УИХ-ын сонгуултар МАХН-ын нэрээр Орхон аймгаас сонгогдож Төрийн ордонд тухалж сууна. 

Сонгуулийн сурталчилгаа эхэлмэгц Дамба-Очир “хэдэн төгрөг” гаргахад л монголын телевизүүд түүний өмнө бүрэн сөгджээ. Эхлээд МҮОНТ Дамба-Очирт худалдагдаж сонгуулийн байтугай ямар ч сурталчилгаа явуулах эрхгүй “Цагийн хүрд” мэдээллийн хөтөлбөрөөрөө  Лүнгийн замын байдлыг гүжирдэн магтаж Дамба-Очирыг хэдэнтээ сурталчилж өглөө. (Үүнийг би нэгэнтээ бичиж байсан) 

Хамгийн анхны, ардчилсан, хараат бус, чөлөөт телевиз “25-р суваг” дараачийнх. Тус телевизийн хамгийн сайн сэтгүүлч Пүрэвхүү бүсгүй “Лүнгийн зам” нэртэй 20 минутийн баримтат бүтээлээ туурвижээ. Нойр хоолгүй ажиллан зам барьж байхад гүтгэлээ гэж Дамба-Очирын өмнөөс гомдоллоод УИХ-ын чуулган дээр шүүмжлэл хэлсэн З.Энхболд, Батж.Батбаяр нарын зургийг харуулж “тэр хоёр улс төрийн шалтгаанаар дайрсан” гээд баахан балбаад дараа нь АН-аас Хэнтий аймагт нэр дэвшигч нэгний компанийн урьд тавьсан замаас хэдэн цоорхой илрүүлэн микроскопоор томруулах шахам харуулж барьцлаа. Лүнгийн замаар тэр болгон яваад байдаггүй эрдэнэтчүүд Дамба-Очирыгоо өрөвдөн нулимс унагасан биз.

 

 

Удалгүй 25-р суваг телевиз “Очир төв” нэртэй  бас нэг нэвтрүүлэг гарч эгэл жирийн амьдралын илүүд үзэж одоо болтол гуравхан өрөө байранд амьдарч байгаа Дамба-Очир хэмээх гайхамшигт хөвгүүний тухай бас нэг нэвтрүүлэг толилуулсан. Ерөнхийдөө Эрдэнэтийг босгоод авч яваа хүн гэж ойлгогдсон шүү. Тайлбарыг МҮОНТ-ийн хөтлөгч Ичинхорлоо яруу тодоор уншлаа. Олон нийтийн радио, телевизийн хуулиар хориотой зүйл. 

Үүнийг үзэж сэтгэл хөдөлсөн бололтой TV5-ын тоймч Э.Дагиймаа тэр сайн хүнийг дэмжихээр Эрдэнэтийн зүгт яаран мордож очоод “Сүүлийн үед таны тухай шуугиантай материал их гарч, хар пиар яваад байна“ хэмээн ичингүйрэн асуулаа. Хариуд нь Дамба-Очир сонгуульд өрсөлдөгчдийн элдэв гүтгэлэг доромжлолыг тоохгүй гэж даналзсанаар Дагиймаагийн бах ханаж боодол мөнгө өвөртлөн буцаж иржээ. 

Posted in + ТЕЛЕВИЗ, 2008 оны УИХ-ын сонгуулийн сурталчилгаа, 25-р суваг телевиз | 1 Comment »

Tuul River Countryside компани TV9 ба “25-р суваг” телевизийг амархан буулгаж авлаа

Posted by Ажиглагч on 2008/07/31

Гачууртад Туулын эрэг дээр  Улаанбаатар хотын ундны усны бүсэд гольфийн талбай байгуулахаар наадмын өдрүүдийг угтуулан эксковатораар газар хагалж эхэлснийг нутгийн иргэд хармагцаа очиж эсэргүүцсэн төдийгүй телевиз дуудаж сурвалжлуулсан тэр маргаан нийслэлд урьд нь гарч байсан бүх маргааны нэгэн адил дуусч байх шиг. Товчоор хэлбэл, компаниуд дийлдгээрээ дийлж, иргэд ялагддагаараа ялагдаж, гагцхүү зөвшөөрөл өгсөн дарга нар огт цухуйхгүй үлдэж байна.

Энэ маргааныг хамгийн сайн сурвалжилсан нь TV9 телевиз. Сэтгүүлч Отгонжаргал нутгийн иргэдтэй хамт хамгаалалтын албаныхантай үзэлцэж, ажилчидтай хөөцөлдөж, зөвшөөрөл олгосон Баянзүрх дүүргийн Засаг дарга асан, одоо  УИХ-ын гишүүн Э.Мөнх-Очирын хаягаар хатуу үг хэлж, улмаар мэргэжлийн хяналтынхан болон БОЯ-наас хүн аваачиж тэнд гольфийн талбай барих нь хууль зөрчсөн болохыг хэлүүлж барилгын ажлыг зогсоох ам шийдвэр гаргуулж иргэдтэй хамт баярлаж байв.

Харин  өнөөдөр тэр гольфийн талбайг барьж байгаа Tuul River Countryside компанийн дэд захирал эмэгтэйтэй ярилцлага хийснээ үзүүллээ. Олон хоног олдохгүй байсан компанийн төлөөлөл (жинхэнэ эзэд нь тодорхойгүй үлдсэн ч) ийнхүү дэлгэцийн өмнө  гарч  ирсэн нь өөрсдөө хүссэнийх. Цаад эзэд нь тийм команд өгчээ. Ингээд бүх зөвшөөрлийг хуулийн дагуу авсан, Улаанбаатар хотын газар зохион  байгуулалтын төлөвлөгөөнд тусгагдаж ИТХ-аар баталсан учраас Мөнх-Очир дарга зөвшөөрөл олгосон, Туул голд ямар  ч хор нөлөөгүй, ажлын байр олноор бий болно, Гачуурт тосгоныхныг ажилд авна гэсэн тайлбарууд урсав. Сэтгүүлч маань түүний аманд бүрэн багтаж “зөвшөөрөлтэй юм байна” гэж хүлээн зөвшөөрөн бууж өглөө. Түүнд өөр мэдээлэл, хөндлөнгийн тайлбар, эрэн сурвалжилсан баримт дутаж байгаа нь илт.

Орой “25-р суваг телевиз” бас энэ талаар сурвалжлага үзүүлэв. Гольфийн талбайг бариулахгүй гэсэн иргэдийн байр суурийг сэтгүүлч Оюунбат үзэгчдэд  дэлгэрэнгүй сонсгов. “Зөвшөөрөл олгосон дарга нар лав монгол хүн биш” гэж зарим иргэд бухимдана. Энэхүү сурвалжлагын араас “хоёр талын байр суурийг тэнцвэртэй үзүүлэх үүргээ биелүүлж” гэсэн тодотголтойгоор нөгөө  Tuul River Countryside-ийн дэд захиралтай ярилцав. “Гацууртынханд ажлын байр олон гарна, одоо хэлмэрч, хөтөч, туслах ажилчин хэрэг болно” гээд нөгөөдөхөө амлав. Гацууртынхан бүгд гадаад хэлтэй учраас хэлмэрчийн ажилд орж тайвшрах юм байна л даа. Бас гольфийн талбай байгуулахыг хориглохоо камерийн өмнө амалж байсан мэргэжлийн хяналтын байцаагч Оюунчимэг “зөвшөөрөлтэй юм байна, арга алга” гэснээ байгаль орчны үнэлгээгээр “Туул голд үзүүлэх нөлөө дунд зэрэг” гэж хэлснийг харуулав. Гэхдээ ярилцлага авсан сурвалжлагч Ганзориг энэ мэт асуулт тавиагүй. Учир нь  тэрбээр саяын сонгуулиар Э.Мөнх-Очирын сурталчилгааны сэтгүүлчээр ажилласан билээ.

Tuul River Countryside компани TV9 ба “25-р суваг” телевизийг дуудаж ганц ярилцлага өгөөд амыг  нь хялбархан таглачих шиг боллоо. Одоо Гачууртын иргэд телевиз дуудвал энэ хоёр телевиз очихгүй, элдэв шалтаг хэлнэ…

Posted in + ТЕЛЕВИЗ, 25-р суваг телевиз, Нийтлэл, нэвтрүүлэг, TV9 телевиз | 2 Comments »

Телевизийн захирлууд vs “Ийгл”

Posted by Ажиглагч on 2008/07/06

Өчигдөр орой онц байдлыг хараахан цуцлаагүй байхад буюу 22 цагийн үед МҮОНТ-ээр Монголын телевизүүдийн холбооны хэвлэлийн хурлыг үзүүллээ. З.Алтай,Д.Сарангэрэл, Ц.Энхбат, Ц.Балхжав нарын телевизийн эзэд юу ярив? Тэд 7-р сарын 1-нд болсон үймээн самууны цаад эздийг яг мэдэж байгаа ажээ. Итгэхгүй байна уу?

TV9 телевизийн захирал Ц.Энхбат бүр үүх түүхтэй нь хэлж өглөө.
– Миний мэдэхээр улс төрийн тогоонд чанагдсан намуудаас ийм үйлдэл гараагүй, жишээлбэл МАХН-ын зүгээс, АН-ын зүгээс, ИЗН-ын зүгээс гараагүй. Энд тодорхой эзэн байгаа. Бид мэдэж байгаа. 2005 оноос эхэлсэн процессын үйл ажиллагаа өнөөдөр ингэж үр дүнгээ олж байгаа байхгүй юу?… Үүний ард хүмүүс байгаа. Хүмүүс байгаа учраас ийм үйл явдал болсон. Бид мэдэж байна. Украинд ийм юм болсон, Сербид ийм юм болсон, Гүржид ийм юм болсон. Киргизэд ийм явдал болсон 5000 хүн босоод улс орныг эргүүлдэг….  Яг ийм сценариар болсон үйл явдал… Манай улсын тусгаар тогтнол, аюулгүй байдалд халдсан зохион байгуулалттай үйл явдал…

МАХН, АН, ИЗН буруугүй, харин 2005 оноос эхэлсэн гэхлээрээ иргэний хөдөлгөөнийхөн болж таарлаа. Үүнийгээ цагдаагийнханд шууд мэдэгдүүштэй. 

Бас  “25-р суваг” телевизийн захирал, саяхан УИХ-ын гишүүнээр сонгогдсон З.Алтай “Зарим нэгэн хэвлэл мэдээллийн байгууллага, сурвалжлагчид дэвэргэх, уриалан дуудах байдалтайгаа ажилласан тул сэтгэл дундуур байна” гэсэн бол TV5 телевизийн ерөнхий зөвлөх Д.Сарангэрэл “Үндсэн хуулинд ард түмнээ эмх замбараагүй байдалд уриалан дуудаж 2 сая хүнээ хооронд нь алалцуулж талалцуулна гэдэг бол …. Ард түмнээ эмх замбараагүй байдал, дайн тулаанд уриалан дуудна гэдэг бол улс төрийн хүчин, хэвлэл мэдээллийн байгууллагад хуулиар хориглосон зүйл” гэж хатуу анхааруулав.

Энд заримсаад байх юмгүй, “Ийгл” телевизийн тухай яригдаж байна. “Ийгл” телевиз хүмүүсийг  үймээн самуунд уриалан дуудсан, дэвэргэсэн гэж хэвлэл мэдээллийг хянах хүсэлтэй хууль хяналтынхан, зарим улс төрчид төдийгүй одоо телевизийн захирлууд дүгнэж байгаа учраас асуудал өөрөөр эргэж байгаа юм. Сүүлийн жилүүдэд  Ц.Энхбат, З.Алтай нар “Ийгл” телевизийг хэдэнтээ шүүмжилсэн ба ноднин TV9 ба “Ийгл” телевизүүд эфирээр бяцхан дайтаад авсан билээ.

Саяхан “Ийгл” телевиз буюу EBC-ийн ерөнхийлөгч Том Терри гэдэг христийн номлогчийн вэб сайтад Монголын парламентын хаалттай хуралдааны үеэр саяын үймээн самуунд хэвлэл мэдээллийн гүйцэтгэсэн үүргийг зөвхөн тус телевизийг тойрч ярилцсан, зарим гишүүд “Ийгл”-ийг шууд буруутгасан тухай бичжээ. Үүнийг УИХ-ын гишүүдийн нэг нь түүнд ховлосон юм байх. (Монголд нууц юм гэж алга аа!). Тэр ч бүү хэл хэвлэл мэдээлэлд гадаадын эзэмшлийг хязгаарласан хууль гаргах замаар “Ийгл”-ийг энэ салбараас шахан гаргаж болох тухай ч мэдчихэж.

Ер нь Монголын хэвлэл  мэдээллийн салбар, ялангуяа өргөн нэвтрүүлэгт гадаадын хөрөнгө оруулалтыг хориглох шаардлагатай байх аа. Тухайлбал, “Ийгл” мэт цаанаа шашны зорилго агуулсан телевизийг хязгаарлах ёстой. Энэ дэндүү хэцүү. Парламент доторх тэр мэдээлэгчээс эхлээд лоббистууд зөндөө. Эрх хуваан баригч хоёр нам америк ах нарынхаа эсрэг дуу гарахаас ч айна…

Гагцхүү одоохондоо “Ийгл” телевиз үнэхээр  сайн хийж чадаж байгаа юмыг хүлээн зөвшөөрөхөөс өөр яахав.  Өнөөдөр монголын телевизийн захирлуудаас ганцхан зүйлийг хүсмээр байна: Эгзэгтэй нөхцөлд “Ийгл”-ийн нэрийг нь ч хэлж чадахгүй битүү шүүмжилж суухын оронд илүү сайн, илүү шуурхай мэдээ хийж, үзэгчдийн санал бодлыг илүү ихээр хүлээн авч  “Ийгл” гэдэг христийн телевизийг зөвхөн христчүүд л үздэг болгоодхооч.

Posted in + ТЕЛЕВИЗ, 2008.07.01, 25-р суваг телевиз, Ийгл телевиз, TV5 телевиз, TV9 телевиз | 7 Comments »

“Танайд хоноё” жүжиг болов

Posted by Ажиглагч on 2008/05/05

“25-р суваг” телевизийн “Танайд хоноё” нэвтрүүлгийн ээлжит дугаар Ням гаригийн орой гарлаа. Сүүлийн үед миний хувьд хамгийн сонирхолтой  хэсэг нь хонох айлаа хэрхэн олсноо харуулсан оршил жүжиг болоод байна. 

Энэ удаад хөтлөгч Алтантүрүү Улаанбаатарын хөл чимээнээс зайлсхийж сүүлийн үед архины хордлого энэ тэр дуулддаг тэр газрын амьдралтай танилцахаар шийдсэнээ мэдэгдээд замд гарч Багануур дүүргийн захиргааны өмнөх талбай дээр очиж тааралдсан хэдэн хүүхнийг зогсоож “Танайд хоноё” гэж гуйлаа.   Нэг эмэгтэй эгчийндээ амьдардаг ч ерөнхийдөө зөвшөөрөх янзтай байтал Алтантүрүү өөрөө “Эгч чинь уурлах болов уу?” гээд ухарчихаж байх юм. Ашиггүй айлд хонохыг хүсээгүй биз. Бас эрэгтэйчүүд буюу өрхийн тэргүүнүүдэд хандаагүй нь тохиолдлын хэрэг биш бололтой. (Би хасч монтажлан найруулсан бичлэгээс энэ дүгнэлтийг хийж байна. Бүтнээр нь үзүүлсэн бол…).

Дараа нь Алтантүрүү хүмүүсээс гуйхаа больж “Зөндөө  хүмүүсээс асуугаад бүтсэнгүй. Миний ард байгаа захиргааных нь байранд ороод Засаг даргынд хоноё гэж бүгдээрээ дайрья”  гэж хэлээд оров. Харуул манаа ч яасан юм, нариийн бичгийн дарга чтааралдахгүй явсаар Багануур дүүргийн Засаг дарга Д.Эрдэнэбатын албан өрөөнд явж орлоо.

Дараачийн үйл явдлууд төдийлөн сонирхолтой бус. Мэдээж Засаг дарга шууд зөвшөөрч Алтантүрүүг гэртээ авчрахад авгай хүүхдүүд нь  гал тогооны өрөөндөө эргэлдэн угтлаа. Гурван өрөө бололтой ердийн орон сууцны айл ажээ. Багануурынхны жишиг амьдрал иймэрхүү юм байна гэж хөтлөгч хэдэнтээ давтсан бол Засаг дарга өөрөө “Миний амьдрал нэг иймэрхүү” гэж лав 10 удаа хэллээ. Цааш өөрийгөө элдэв янзаар магтаж (бусдын жишгээр амьдардаг, авлигал авч үзээгүй, би хүнтэй харилцахдаа зарчим л ярьдаг гэх мэт), ухаантай санал дэвшүүлж (Засаг даргыг иргэд нь сонгодог байвал зүгээр), тэгснээ гурил элдэн цуйван хийж хичнээн ардач эр болохоо харуулж амжлаа. Алтантүрүү уламжлал ёсоор “Хэлсэн үгэндээ үнэнч, холбирдоггүй хүн юм шиг байна” гээд хэсэг магтаад “мешок”-тоо орж нойрсов. Хүнийг ганцхан оройн дотор танина гэдэг ховор чадвар шүү.

Харин өглөө босоод микрод сууж буцахаа хэлж Засаг даргаар үдүүлэн тэднийхээс гарсан юм. “25-р суваг” телевизийн хамгийн сайн нэвтрүүлгийнхээ сурвалжлах хэсгийг аппарат хэрэгсэлтэй нь явганаар илгээлээ гэж үү? Минийхээр бол, төлбөргүй нэвтрүүлэг хийдэг, иймээс унаа ч байхгүй гэдгээ харуулах гээ давхар жүжиг тавиад амжив. 

Хэрвээ үнэхээр төлбөргүй нэвтрүүлэг байсан бол Д.Эрдэнэбат нь УИХ-ын сонгуульд АН-аасаа нэр дэвших хүсэлтэй, бас Багануурын Засаг дарга төдийгүй тэргүүн баян, “Ноён” групп хэмээх том компанитай, Багануурын  хамгийн том “Ноён” телевизийн эзэн, Улаанбаатарт гэхэд л Алтантүрүүг өдөр болгон  хонуулаад цуйвангаар байтугай  дайлж чадах “Залуучууд” зочид буудлыг эзэмшдэг гэдгийг яриулж болох байсан даа.

Бямба гаригийн “Өнөөдөр”-ийн дугаарт Алтантүрүү том ярилцлага өгөхдөө  “Нэвтрүүлгийн нэр “Манайд хонооч” болсон байна лээ?” гэсэн асуултанд,  “Алтантүрүү сонгуулиар далимдуулж мөнгө хийж байна гэж. Мөнгө аваад оцойтлоо баяжсан юм алга, ажлаа хийгээд л явж байна. Сонгуультай холбоотойгоор долоо хоногт хоёр айлд хонож байгаа нь үнэн. “MN 25 дугаар суваг” телевиз бол арилжааны телевиз. Гэхдээ энэ үед хэнийд хонох вэ гэдэг нь хамгийн чухал. Монголын сэтгүүлчдийн нэгдсэн эвлэлээс 2007 оны “Ирээдүйтэй залуу сэтгүүлч” гэсэн шагналыг надад өгсөн. Өөрөө ч мэдээгүй, манай хамт олон шагналыг минь аваад ирсэн. Тийм болохоор би итгэл алдахыг хүсэхгүй байгаа. Хэн нэгнийг дэмжсэн, магтаж малгайлсан нэг ч асуулт тавьдаггүй. Байгаагаар нь л гаргахыг хүсдэг. Нэр дэвшигч итгэл даах хүн мөн үү гэдгийг харуулахыг хүсч байгаа” гэжээ.

Бас НТВ телевизийн “Үнэн үү” нэвтрүүлэг  (зочиндоо  асуулт тавьж үнэн хариулсан эсэхийг дэлгэцийн доогуур графикаар харуулдаг бололтой) сэтгүүлч Алтантүрүүг урьжээ. Ярилцлага гэхээсээ илүү сэтгэл зүйн сорилтыг санагдуулах  бөгөөд хөтлөгч Нямбаяр сүрхий асууж чаддаг залуу байна. Жишээлбэл, хуруугаа учиртайхан имэрч “ийм юм аваад айлд хоноод байна уу?” гэж асуулаа. Алтантүрүү  “Үгүйсгэхгүй. 25-р суваг бол телевиз арилжааны телевиз. Шударга, гарах ёстой хүмүүсийнд урилгаар хонож байгаа” гээд “мөнгө авлаа гээд асуудгаа л асууна, яаж асуулт тавихав гэдэгтээ байгаа юм” гэхчлэн өөрийгөө  хамгааллаа. Гэхдээ хөтлөгч Нямбаяр “Сонгууль дуустал УИХ-ын гишүүдээр явах юм байна”, “Үнийг нь авсан тэр хүндээ тааруулж ярина даа?”, “Бялдуучилж явахгүй гэж итгэж байна” гэдгээ хэлээд авч байв. 

Ийнхүү айлд “Танайд хоноё” нэвтрүүлэг “Захиалгаар хоноё”  юмуу “Дуудлагаар хоноё” болсон нь тодорхой болжээ. “Шударга, гарах ёстой” нэр дэвшигч гэдгийг яаж мэдэж байна аа? Алтантүрүүг урьсан болохоор уу? Мөнгийг нь авчихсан бол зөвхөн “Нэр дэвшигч итгэл даах хүн мөн” гэдгийг харуулж болно. Харин нэр дэвшигч “итгэл даах хүн биш” гэдгээ харуулах гэж мөнгө төлдөггүй л байхгүй юу… 

Иймээс гудамжинд хүмүүсийг зогсоож “Танайд хоноё” гэсэн жүжиг тавихын оронд “Би уригдлаа” гээд нэр дэвшигчийнд шуудхан явж очвол ядахдаа шударга юм даа.  Монголын сэтгүүл зүйн найдвар болсон шинэ үеийн нэгэн сайн сэтгүүлч элдэв улс төрчидтэй сэмхэн тохирч мөнгө төгрөг авчихаад дараа нь санаандгүй тааралдсан мэт уулзаж, гэрт нь очоод огт уулзаж байгаагүй мэт жүжиглэж үзэгчдээ хууран мэхэлдэг болсон нь  харамсалтай. Шинэ үеийн захиалгат сэтгүүл зүй ийнхүү эхэлжээ.

Posted in 25-р суваг телевиз, Нийтлэл, нэвтрүүлэг | 9 Comments »

Алтай монголын бүх телевизээр ингэж агсарвал ч …

Posted by Ажиглагч on 2008/05/03

“25-р суваг “ телевизийн захирал З.Алтай УИХ-ын сонгуульд нэр дэвшихээр шийдэж Монголын телевизүүдийн холбооны өмнөөс хэвлэлийн хурал зарлан хуралдуулав. Түүнийг Ц.Балхжав (UBS), А.Ганбаатар (НТВ), Д.Сарангэрэл (TV5), Ц.Энхбат (TV90) нар дэмжихээр ирсэн байлаа.

МТХ-ны ерөнхийлөгч З.Алтай шуудхан эхэллээ: Би УИХ-ын сонгуульд Баянзүрх дүүргээс бие дааж нэр дэвшихээр шийдлээ. Уг нь дэвшье гэж бодоогүй, гэхдээ энэ улс орны байгаа байдлыг хараад тэссэнгүй, улсаа бодохоор шийдлээ, би амиа бодсон бол 25-тайгаа яваад байх байсан, 16 жил, 18 жил тэслээ, бидний ирээдүй дэндүү бүрхэг, дэндүү харанхуй байна, одоо иргэний үүргээ гүйцэтгэх боллоо. Аль нэг намд орохгүй, аль нэг нам хүчнийг дагаж далбайхгүй, аль болох энэ нам, улс төрөөс хол байя… Энэ нөхдүүд арван хэдэн жил буг болчихоод суугаад байна, тэгэхлээр  тэнд нэг амттай юм байна аа, тэдний нэг ч гэсэн суудлыг авья … Миний ард Монголын телевизүүд байна, монголын сая сая үзэгчид байна, телевиз шиг хүчтэй хэрэгсэл байхгүй, яадаг юм би телевизийн ашиглана, мэргэжлээ ашиглана… Намайг телевизээр их мөнгө олдог гэж бодож байна уу, юу ч олдоггүй, миний дансыг  шалгаад үз, юу ч гарахгүй…

Энэхүү хачин яриагаа 20 гаруй минутийн турш зогсоо зайгүй урсгав. Алтай юу болчихов оо? Зүгээр л сонгуульд нэр дэвшихээ зарлаад, бас телевизээрээ олигтой мөнгө олдоггүй, ядуугаа өрөвдүүлэх гээд байгаа юм бол хөрөнгө орлогын мэдүүлгээ гаргаад үзүүлэхийн оронд сагсуураад, тэгснээ агсраад ч байх шиг. Хэн л түүний дансыг шалгаад явав гэж…

Араас нь телевизийн захирлууд бие биенээ хөөргөж гарав: 
Д.Сарангэрэл: Би Алтайг 20 гаруй жил мэднэ…. Баянзүрх дүүргийн сонгогчдыг уриалж байна. Сэтгүүлчдийг уриалж байна.
З.Алтай: Монголын эмэгтэйчүүд Сараа шиг байгаасай.  Дэлхийн олон мундаг улс төрч сэтгүүлчдийн дундаас гарсан шүү… Ер нь чи өөрөө дэвшвэл яасан юм бэ?
Ц.Энхбат: Тавь шүргэж байгаа бидэн шиг улсууд албан тушаал энэ тэр горьдоод явдаггүй.  Энэ удаагийн сонгуулийн хууль азийн хоолтой тэстэй. Би бол телевизийнхээ зүгээс дэмжинэ.
Д.Сарангэрэл: Сэтгүүлчдэд үзэгнээс өөр хөрөнгө байхгүй, гэхдээ бид хандивын хүлээн авалт зохион байгуулна.
А.Ганбаатар: Үүнийг сонгуулийн сурталчилгаа болгож битгий  сурталчлаарай…
З.Алтай: Би УИХ-д ордог л юм бол… Орохгүй бол гомдохгүй ээ. 
Д.Сарангэрэл: Маргааш 3500 сэтгүүлч UB Palace-д үнэгүй шоу үзнэ. Билетээ авсан биз дээ…

Хэвлэлийн хурлыг шууд дамжуулсан “25-р суваг” телевизийн 2-р суваг төгсгөлд нь “Үүргэвчтэй аялал“ нэвтрүүлгийнх нь хөгжмийг эгшиглүүлж захирлынхаа сурталчилгааг эхлүүлэв. Сонгуулийн кампани, сурталчилгааг албан ёсоор зарлаагүй байхад телевизийн захирлууд ингэж хавсайдаж болох уу? Тэр жигшээд байгаа улс төрчдөөсөө ялгаагүй нөхдүүд байна. 

2000 онд байх аа, Монголын радиогийн сэтгүүлч М.Цагаан УИХ-ын сонгуульд Говь-Алтай аймгаас нэр дэвшихдээ нутагтаа нэг ч очихгүйгээр зөвхөн өөрийн хөтөлдөг нэвтрүүлгээр сурталчилгаа хийсээр байгаад гарчихна гэж тооцоолж хэдэн сар амаа чилтэл донгодоод бараагүй билээ.  Харин энэ удаад З.Алтай монголын бүх телевизээр сурталчлуулсаар байгаад гарч ирэхээр шийджээ. Гэхдээ энэ хэвлэлийн хурал дээрх шиг дүвчигнөөд, түүнийг нь монголын бүх телевиз үзүүлээд байвал эсрэгээр ч эргэж мэднэ.

P.S: Энэхүү хэвлэлийн хурлыг “25-р суваг” тэр өдөртөө хэдэн удаа, Бямба гаригийн үдэш хөтөлбөрт орсон Алтантүрүүг айлд хонуулахгүй “амрааж” байгаад бүрэн үзүүллээ. Ням гаригт Алтайн алдарт “Үүргэвчтэй аялал” нэвтрүүлэг гарч эхэллээ. Гэхдээ сонгуулийн сурталчилгаа гэдэг бол гадаадад оччихоод монгол хэл мэдэхгүй улсуудыг монголоор муулж зугаацахаас арай өөр байж таарна…

Posted in 25-р суваг телевиз, Нийтлэл, нэвтрүүлэг | 1 Comment »

Захиалгаар үйлдсэн “Дуулиант хэрэг”

Posted by Ажиглагч on 2008/04/27

Социализмын  үеийн хэргүүдийг сэргээн өгүүлдэг “25-р суваг” телевизийн “Дуулиант хэрэг” нэвтрүүлгийн захиалгат дугаарыг үзлээ.  Хадгаламжийн банкны хэргээр яллагдсан УИХ-ын гишүүн У.Хүрэлсүхийн давж заалдах шатны шүүх хурлын өмнө түүнийг өмөөрсөн нэвтрүүлэг байна. УИХ-аас эхлээд МАХН, цагдаагийнхан хүртэл энэхүү “уран бүтээл” дээр дайчлагдан оролцжээ. УИХ-ын гишүүн Ц.Нямдорж, Онцгой байдлын ерөнхий газрын  зөвлөх байсан Д.Базарсад, ЭМЯ-ны санхүү, эдийн засгийн газрын дарга Н.Түмэндэмбэрэл, БСШУЯ-ны сайд Ө.Энхтүвшин, МАХН дахь жигүүрийн зохицуулагч Ж.Бат-Эрдэнэ, хуульч Б.Баярсайхан идэвхийлэн зүтгэж харагдана. Ерөнхий сайд С.Баярын яриаг ч оруулахаа мартсангүй.  Төр засаг тэр чигээрээ шүүхэд нөлөөлөхийг оролджээ.

Улс төрчид Хүрэлсүхийг хайрлах болсны шалтгаан тов тодорхой. Харин “Хадгаламж” банкны хэргийг шалгах ажлын хэсгийн ахлагч хошууч Ж.Болд, ахлах мөрдөн байцаагч, цагдаагийн хошууч Н.Мишигдорж нар  өмгөөлөгч болчихсон аятай “байхгүй, буруугүй, тогтоогдоогүй” хэмээн ярьж Солонгосын казиногоос ирсэн “бид бичлэг өгөөгүй” гэсэн бичгийг эхээр нь үзүүлж гайхуулав. Номхон зогсож байгаад дээрээс үүрэг авсан биз. Гэхдээ тэдэнд тавих энгийн асуулт байна: “Хадгаламж” банкны 14 тэрбумыг Чимэдцэрэн гэдэг ганцхан хүн Солонгосын казинод алдсаныг яг мэдэж байгаа юм уу? Хэзээ, хэдэн удаагийн тоглолтоор, хэд хэдээр алдсаныг тогтоов уу? Хэрвээ солонгосын талд албан ёсоор хүсэлт тавиад мэдчихвэл үлдсэн мөнгө нь хаачсаныг тодруулах ажил үлдэнэ. У.Хүрэлсүхэд өгсөн алдарт  фургоны мөнгөнөөс эхлэнэ. Цаашилбал, МАХН-даа, МАСЗХ-ндоо, найз нөхөддөө, унаа тэрэг, байр байшин … гэх мэтээр нэмээд үзэхэд 14 тэрбум гарч байх учиртай. Зөвхөн ингэж тогтоосон цагт “Хадгаламж” банкны хэргийг шалгаж дууслаа гэж хэлнэ. Та нар энэ хэргийн үнэн мөнийг олж чадаагүй, Чимэдцэрэнгийн аманд багтчихсан гэдгээ хүлээн зөвшөөрөх үү?

“Хилсээр шийтгэгдэх” гээд байгаа Хүрэлсүхийг өмөөрч уйлан хайлах хэвлэл мэдээлллийнхээн! Дээрх асуултыг мөрдөн байцаагчдад тавиад үзээрэй. Асуудал Хүрэлсүх шийтгэгдэх гээд байгаадаа биш, бусад нь шийтгэгдэхгүй үлдсэндээ байгаа юм биш үү? Одоо Хүрэлсүх ч шийтгүүлэхгүй үлдэх нь захиалгаар үйлдсэн “Дуулиант хэрэг”-ээс тов тодорхой болов.

Posted in 25-р суваг телевиз, Нийтлэл, нэвтрүүлэг | Leave a Comment »

Сүхбаатарын талбайгаар дүүрэн УИХ-ын гишүүдийн аав ээж хөлхдөг

Posted by Ажиглагч on 2008/04/27

Бямба  гаригт “25-р суваг” телевиз “Танайд хоноё” нэвтрүүлгээ яг адилхан бүтэн цаг үргэлжлэх “Шинэ үеийнхэн ярьж байна” нэвтрүүлгийн нэрээр далдалж  байгаад гэнэтхэн үзүүлэв. Уг нь Ням гаригийн хөтөлбөрт зарласан байлаа.  

Монголчууд үнэхээр цөөхөн юм аа. Гудамжинд гараад дурын нэг хөгшнийг зогсооход л УИХ-ын гишүүний аав байж таардаг. Итгэхгүй байна уу? Сүхбаатарын талбай дээр хөтлөгч Алтантүрүү нэгэн буурайтай тааралдсан нь УИХ-ын гишүүн, бас 2008 оны УИХ-ын сонгуульд нэр дэвшигч Бадамдамдингийн аав Рагчаа гуай өөрөө явж байв.

Ингээд Рагчаа гуайнд хонохоор ороход авдран дээрх жаазнаас эрхэм гишүүн учиртайхан ширтэж угтлаа.  Харин хөтлөгч маань “танихгүй” гүрийв. Удалгүй Рагчаа гуай хүүгээ “УИХ-д ажилладаг, УИХ-ын гишүүн гэж явдаг” таалгахад wow! гэж дуу алдсанаа хөтлөгч бушуухан өөр зүйл ярьж, альбом дотроос Бадамдамдингийн зураг гарч ирэхэд ч тоохгүй дүр эсгэв.  Гэхдээ тэссэнгүй, унтахаасаа өмнө Рагчаа гуайгаас хүүгийнхээ төлөө саналаа өгөх эсэхийг асууж, хүүхдүүдийг нь магтаж амжлаа.  Үнэхээр магтахаар сайн хүүхдүүдтэй буянтай сайхан хөгшид байна лээ.

Энэ нэвтрүүлгээс би юу мэдэж авсан бэ гэвэл, Сүхбаатарын талбайгаар дүүрэн УИХ-ын гишүүний аав ээжүүд хөлхдөг болжээ. Сонгууль ойртсоных биз. Магадгүй Алтантүрүү хөдөө явж малчин айлд нохой хориулаад буусан ч “манай хүү УИХ-д ажилладаг…” гээд угтаж магадгүй.

Posted in 25-р суваг телевиз, Нийтлэл, нэвтрүүлэг | Leave a Comment »

Нууц задлуулж хөөрөг сурталчлуулсан “Танайд хоноё”

Posted by Ажиглагч on 2008/04/21

Өнгөрсөн Бямба, Ням гаригт “25-р суваг” телевизийн “Танайд хоноё” нэвтрүүлэг ил байтугай далдуур  ч улс төржсөнгүй.  Гэхдээ сонинтой.

Эхлээд “Нарантуул” зах дээр очиж 46 жилийн турш ЗИЛ-130 машин барьсан Цэрэндолгор гэдэг эмэгтэйг олж гэрт нь очиж хонов. Гэр хороололд хоёр давхар байшинтай, тэндээ дэлгүүр, цайны газар ажиллуулдаг, тэгээд одоог хүртэл жолоо мушгидаг ер бусын эмэгтэй байлаа.

Орой хуучны зураг үзүүлж сууснаа Цэрэндолгор “Ярьж болох юм уу үгүй юм уу, бүү мэд, яахав чамд яриад өгчихье”  гэсэн оршилтойгоор Монгол Улсын анхны Ерөнхийлөгч П.Очирбатын залуугийн нууцыг задалчихав. Олон жилийн өмнө Цэрэндолгорын ахтай хамт хойно сурч  байсан П.Очирбат  ахыг нь нутаг буцахад Багшийн дээдэд сурдаг Цэгмид гэдэг охинд захиа дайжээ. Харин ах нь дүүгээрээ буюу Цэрэндолгороор  өгүүлжээ. Тэр үед залуухан байсан болоод ч тэр үү захиаг гардуулахаасаа өмнө тэсэлгүй нь задалж (“наалтаар нь салгаж байгаад”) үзэхэд “Би энд нэг охинтой  найзалдаг болсон, тэр маань жирэмсэн, тэгэхлээр хоёулаа ингээд болъё”  гэж бичсэн байжээ. Манай анхны ерөнхийлөгчийн эхнэрийн нэр Цэвэлмаа байх аа?

Ийнхүү хүний итгэлийг эвдэж  захиаг нь задалж уншсан нь багадаад 40 гаруй жилийн дараа бүх нийтэд зарласан Цэрэндолгор муухай юм хийснээ одоо ч ойлгоогүй тийм “хээгүй” (анхны ерөнхийлөгч шиг) эмэгтэй байж таарлаа.  Алтантүрүү ч яахав олон юм бодолгүй яриаг нь нэмж хасалгүй оруулжээ. Бас нэг сонин гэвэл Алтанцэцэг өглөө босоод том биетэй Алтантүрүүд яг тааруулан оёж бэлтгэсэн цамц бэлэглэж харагдав. Шөнө суугаад оёчихов уу?

Ням гаригийн “Танайд хоноё”. Хөтлөгч Алтантүрүү Өмнөговь аймаг руу нисэн очиж очиж Даланзадгадын төв талбай дээрээс нь Аварзэд гэдэг хүнийг зогсоож гэрт нь очиж хоносон нэвтрүүлэг байв. Социализмын үед аймгийн намын хорооны нарийн бичгийн даргаар ажиллаж байсан, зах зээл эхлэнгүүт намаасаа гарч аймаг дахь “Жуулчин говь”, НИК компанийн салбарын дарга болсон, одоо “Монгол улс мандан бадраг” нэртэй төрийн бус байгууллагатай, гэртээ буу сум, хөөрөг болон хуучны үнэт эдлэл олныг хураасан, түүнийгээ нуулгүй үзүүлэхдээ юм л бол “үнэ тохирвол өгчихнө, хотын ханшаар хоёр өрөө байрнаас буухгүй” гэхчлэн Алтантүрүүг хонуулсныхаа шанд бараагаа үнэгүй сурталчлуулж амждаг сүрхий эр ажээ.  Харин Алтантүрүү түүнийг “бусдын төлөө өөрийгөө зориулан амьдарч яваа хүн” хүн гэж магтах юм. Хичнээн сайхан зочлууллаа зүгээр л өөрийгөө хичээж явсан хүнийг ингэж магтах нь илүүц.

Posted in 25-р суваг телевиз, Нийтлэл, нэвтрүүлэг | Leave a Comment »

Нэвтрүүлгийнхээ баатраас уран бүтээлчид нь ичив

Posted by Ажиглагч on 2008/04/18

Өчигдөр “25-р суваг” телевизээр “Бид хойч үедээ юу үлдээх вэ?” нэртэй нэвтрүүлэг үзүүлэв.  Зайсан толгойн ам барилгаар дүүрч дархан цаазтай Богд уул, бас Туул гол хэрхэн сүйрч байгаа талаар айдас төртөл зураглаад “энэ асуудалд санаа зовж явдаг нэгэн эмэгтэйтэй уулзая” гээд эргэхэд жипнээс яг бууж таарсан эмэгтэйг тосч уулзсан нь Я.Батцэцэг байв. Хөтлөгч ихэд хөөрч “Дархан цаазат уулаа авч үлдэх гэсэн цөөнч гэсэн хүн байгаа нь аз. Одоо л авралын мэдээ сонсгоё” гэсний дараа Батцэцэг ярьж “Цаашдаа Богд ууланд барилга барихаа больж хотоо хоёр тийш нь сунгавал бүх асуудал шийдэгдэнэ” хэмээн айлдлаа. Ердөө л энэ үү? Нэгэнт баригдчихсан барилгуудыг яах талаар таг.  Юунд иймхэн “агуу” санал дэвшүүлж гайхуулах болсныг  таахад түвэггүй байлаа. Я.Батцэцэг бол УИХ-ын сонгуульд нэр дэвших санаатай, Үндэсний шинэ намын удирдах зөвлөлийн гишүүн билээ. Хөтлөгч “Тэр тэгэх гээд байна, энэ ингэх гээд байна гэж хардаад яахав? хэмээн урьдчилсан өмөөрч байх нэвтрүүлгээ төгсгөв.

Я.Батцэцэг бол “Атимос” нэртэй компанийн захирал бөгөөд ноднин МУИС-ийн оюутны хоёр байрны багахан зайнд  оюутнуудын цонхыг нь таглан 10 давхар сууц барихаар довтолж, эсэргүүцэж цугларсан оюутнуудыг цагдаагаар даруулж заримыг нь бүр хориулж байгаад санасандаа хүрсэн нэгэн билээ. Тэгэхлээр хотын төвийн эмх замбараагүй барилгажилт, оюутнуудын эрхийг хохироосон үйлдлүүдээ яаж засах, хойч үедээ ямар хот үлдээх талаар саналыг нь сонсохсон.

Нэвтрүүлгийн төгсгөлд Үндэсний шинэ намын нэр, лого, тэгээд ““Бид хойч үедээ юу үлдээх вэ? 2008 он” гэсэн хэдхэн үг тавьж, харин энэхүү сурталчилгааны бүтээлийг туурвисан студи болон сэтгүүлч, редактор, хөтлөгчид нэр, хаягаа тас нуусан байна. Батцэцэгээс эсвэл өөрсдөөсөө ичсэн биз.

Posted in 2008 оны УИХ-ын сонгуулийн сурталчилгаа, 25-р суваг телевиз, Нийтлэл, нэвтрүүлэг | Leave a Comment »

“Захиалгаар хоноё”

Posted by Ажиглагч on 2008/04/13

Онигооноос эхлэе. Аав хүү хоёрын яриа:
– Миний хүү худлаа ярьж болдоггүй юм. Аав нь чам шиг байхдаа ерөөсөө худлаа ярьдаггүй байсан. 
– Та тэгээд хэзээнээс эхэлсэн юм бэ?
“25-р суваг” телевизийн “Танайд хоноё” нэвтрүүлгийн хөтлөгч Алтантүрүүгийн хувьд О.Отгонсайхан гэдэг шинэвтэр  улс төрчийнд очиж хонохын өмнөхөн үзэгчиддээ хандаж “намайг мөнгө аваад айлд очиж хоноод байна гэж битгий бодоорой” гэж анхааруулсан тэр мөчөөс эхэлсэн болов уу.

2008 оны 3-р сарын 8-нд Алтантүрүү Эрдэнэтэд очиж уулын баяжуулах “Эрдэнэт” үйлдвэрийн БЕЛАЗ-ийн жолооч, Монгол Улсын хөдөлмөрийн баатар Жигмэдцэрэнгийнд хоножээ.  Гэхдээ үүнийгээ бараг сарын дараа буюу 4-р сарын 6-нд үзүүлэв. Энэ хооронд дээр дурдсан О.Отгонсайхан, АН-ын нарийн бичгийн дарга Х.Тэмүүжин, МАХН-ын ерөнхий нарийн бичгийн дарга Ё.Отгонбаяр (энэ долоо хоногт сэтгүүлч маань гэнэт идэвхжиж 2 айлаар хоноглож  амжив), дараа “Бишрэлт холдинг” компанийн захирал, Нийслэлийн ИТХ-ын төлөөлөгч Б.Ундармаа, “Монос фарм” компанийн ерөнхий захирал Л.Эрдэнэчимэгийнд очиж хийсэн нэвтрүүлгүүд оочир дайрчээ. Гудамжинд тааралдсан хэнийг ч хамаагүй шалсаар байгаад очоод хоночихдог Алтантүрүүд бүтэн сарын турш зөвхөн улс төрчид буюу 2008 оны УИХ-ын сонгуульд нэр дэвшихыг хүсэгчид тааралдсан ер бусын сонин хэрэг байлаа.

2008 оны 4 дүгээр сар 6-ны нэвтрүүлэг. Хөтлөгч Алтантүрүү “Бишрэлт” компанийн орчмоос хэдэн хүнээс “танайд хоноё, тэгэх үү” гэж асууснаа больж компанийн төв хаалган дээр очиж тэндээс гарч ирсэн хүүхнийг тосон очиж “танайд хоноё” гэж гуйсан нь дээр дурдсан Б.Ундармаа байжээ. Улмаар нэвтрүүлэг Ундармаагийн гэрт шилжив. Харин хөтлөгч маань гэрийн эзнийг огт тоосонгүй, тэгээд ч гэрийн эзэн гэнэтхэн хаанаас ч юм гарч ирээд өөрөө зочин шиг бишүүрхэж нэг ч үг дуугарахгүй сууснаа хоолоо идчихээд хаашаа ч юм алга болчихдог хачин гэр бүл байна лээ. “Хоноц хоноцдоо дургүй” гэдэг шиг. Үнэндээ эхнэрийг нь сурталчлах нэвтрүүлэг байсан учраас нөхөр илт илүүджээ. Нэгмөсөн томилолтоор ч юм уу явуулчихсан бол дээр байж.

Дараачийн Бямба гаригт буюу 12-нд хоносон айл яг адилхан. Нөхөр нь энэ гэрт хэн нь хэн бэ? гэдгийг  харуулж, бас зогсоо зайгүй хоол унд хийж зогсох эхнэрээ чөлөөлж зочинтойгоо ярилцахын оронд тэгэсхийгээд бултчихав. Алтантүрүү нэвтрүүлгээ эхлэхдээ “одоо хүмүүс зусландаа гарч байна, тийм нэг айлд очно” гээд хэлээд хотоос гарч зуслангийн бүх байшинг алгасан явсаар хамгийн холын эдлэн шахуу газартай байшинг олж хаалганы төмрийг хөнгөхөн  цохингуут нэгэн эмэгтэй баяр баясгалантай тосон авсан нь энэ айлын жинхэнэ эзэн, “Монос фарм” компанийн ерөнхий захирал Л.Эрдэнэчимэг байлаа.  Байшинд ороход Эрдэнэчимэгийн аав, ээж ширээний ард байраа эзэлсэн хүлээж суулаа. Алтантүрүү ийм бэлэн айлыг  яасан сайн олж байна аа? НТВ-гээр гардаг “Зөн билгийн тулаан”-д оролцвол шууд түрүүлнэ.

Ийнхүү “Танайд хоноё” нэвтрүүлэг аажмаар “Захиалгаар хоноё” болон хувирч байна. Захиалгын цаана мөнгө байдаг  биз. Ийм сайн нэвтрүүлэг маш үнэтэй байж таарна.

P.S:  Ням гаригт Алтантүрүү гэнэт санаа зовсон бололтой Эрдэнэтийн “БЕЛАЗ”-ийн жолооч  Жигмэдцэрэнгийнд хоносон тэр нэвтрүүлгээ дахиад нэг үзүүллээ.

Posted in 25-р суваг телевиз, Нийтлэл, нэвтрүүлэг | Tagged: , | 4 Comments »

“Танайд хононгоо сурталчлая”

Posted by Ажиглагч on 2008/03/24

Өчигдөр Монголын телевизийн хамгийн сонирхолтой нэвтрүүлэг – “Танайд хоноё” 2008 оны УИХ-ын сонгуулийн сурталчилгаанд яаж оролцохоо зарлачих шиг боллоо.  Товчхондоо бол, УИХ-д нэр дэвшигчид урихлаар очиж хонох юм байна.  Энэ нь нэр дэвшигчдийн сурталчилгааг хийж өгнө гэсэнтэй адил сонсодлоо.  Гэхдээ хөтлөгч Алтантүрүү ”Би монголын телевизүүдын ирээдүйтэй залуу сэтгүүлчээр  шалгарсан, энэ итгэл найдварыг дааж ажиллана. Гэхдээ төрийн томчууд ард түмний итгэлийг хэрхэн дааж ажиллах нь чухал. Би урьд нь Ерөнхий сайд С.Баярт уригдсан” гэхчлэн эв хавгүй займчуулаад дараачийн айлд уригдан очиж яваагаа хэлэв.

Хэрвээ нэр дэвшигчид “итгэл даах” эсэхийг хянах юм бол ядуу айлд давхиад ордог шигээ дуртай нэр дэвшигчийнд гэнэдүүлж очмоор юм даа. Бодвол нэр дэвшигчид Алтантүрүүг өөрийг нь гэнэдүүлэн санал тавьж эхэлсэн хэрэг.  Ингээд “урилгаар зочлох” гэсэн эвтэйхэн тайлбарыг бодож олжээ. Төлбөртэй болов уу? Монголын телевизүүдэд төлбөргүй нэвтрүүлэг гэж бараг үлдээгүй  болохоор ингэж асуух зүйн хэрэг. Харин Алтантүрүү “Намайг мөнгө авчихаж гэж битгий бодоорой” гэснээр үнэхээр авсан эсэх тодорхойгүй үлдэж, харин үзэгчид бид “аваагүй” гэж бодох ёстой боллоо. Бас нэгэн хачирхалтай зүйл бол энэ нэвтрүүлэг “25-р суваг” телевизийн долоо хоногийн хөтөлбөрт багтаагүй байснаа гэнэт гарч ирсэн явдал юм.  Хамгийн сайн нэвтрүүлгээ бичихээ мартмааргүйсэн…

Ингээд уригдаж хоносон айл нь УИХ-ын гишүүн агсан О.Энхсайханы төрсөн дүү О.Отгонсайханых байлаа. Тэр залуу нэр дэвшихээр шийджээ. Эсвэл өөрийгөө огоорч зөвхөн ахыгаа дурсахын тулд урьсан болов уу гэвэл амьдралынхаа түүхэн замналаас “өвгөн партизаны яриа” шиг юм өрнүүлж, бас хөтлөгч Алтантүрүү өглөө босоод тагтан дээрээс нь “өөрөө сайхан амьдралтай болсондоо санаа амралгүй бусдын төлөө тэмцдэг хүмүүс” гэхчлэн магтсаар нэвтрүүлгээ өндөрлөв.

Энэ бүхэн “Танайд хоноё” гэсэн брэнд болсон нэртэй, зарим дугаар нь үнэхээр гайхамшигтай болдог тус нэвтрүүлэгт огт зохихгүй байна. Монголын сэтгүүлчдийг гутааж байгаа захиалгаар хөдөлдөг тэр үзэгдэл “Танайд хоноё” нэвтрүүлгийг “Танайд хононгоо сурталчлая” болгож хувиргавал дэндүү харамсалтай. Одоо нэвтрүүлгийн цагийн бараг тэн хагас нь сурталчилгаа болсон, хөтлөгч маань цагаан сэтгэлээ илэрхийлж сүү рекламддаг нь хангалттай бус уу?

Posted in 25-р суваг телевиз, Нийтлэл, нэвтрүүлэг | 4 Comments »

“Рекламыг хязгаарлавал телевизийн нэвтрүүлэг зогсоно. Зогсооё л доо. Телевизгүй байгаад үзэг”

Posted by Ажиглагч on 2008/02/05

“Азийн чоно”-ын довтолгооны дараа Зар сурталчилгааны хуулинд дахь архитай холбоотой хэдэн заалтыг чангаруулах далимаар эх захаа алдсан телевизийн сурталчилгааг зохицуулах хэдэн заалт оруулсан хуулийг төслийг хүлээж авсан даруйдаа телевизүүдийн холбооны ерөнхийлөгч З.Алтай яаралтай мэдэгдэл хийж “Рекламыг хязгаарлавал телевизийн нэвтрүүлэг зогсоно. Зогсооё л доо. Телевизгүй байгаад үзэг” гэж сандраасан билээ. 

Маргааш нь Засгийн газрын ээлжит бус хуралдаанаар Зар сурталчилгааны хуулийн төслийн талаар хэлэлцэхэд телевизийн захирлууд, тодруулбал З.Алтай, Д.Сарангэрэл, Ц.Балхжав, Ц.Мөнхбаатар (энэ нөхөр  юугаа хийж явсан бэ? МҮОНТ-ын  рекламын асуудлыг хуулиар тов тодорхой шийдчихсэн  бус уу?), Ц.Энхбат, А.Ганбаатар, бас “Зууны шуудан” сонины Б.Ганболд нар уригдаж З.Алтай босч байр сууриа тайлбарлаж үг хэлсэн байна. Араас нь Ерөнхий сайд өөрөө шууд телевизийнхээ талд орж “Зар сурталчилгааг зах зээл  зохицуулдаг юм аа” гэж хэлснээр  хуулийн төслийг боловсруулсан ХЗДХЯ-ныхан дуугарч зүрхлээгүй биз, ингээд дээрх заалтууд хасагдах болжээ.  ЗГ-ын хуралдаанаас гарч ирсэн З.Алтай, Д.Сарангэрэл нар Монголд хэвлэлийн эрх чөлөө аврагдсаныг зарласнаар монголчууд бид телевизтэйгээ үлдсэн билээ.

Гэхдээ бас таван минут үзүүлээд зургаан минутийн рекламаар тасалдаг нэвтрүүлэг, гол баатрын ярианаас “Номин”-гийн хямдрал хавьгүй чухал уран сайхны кинонууд, сэтгүүлч-худалдагч гэсэн хос мэргэжилтэй охид хөвгүүд “намууд хариуцлагаа  ухамсарлах цаг болжээ” гэх мэт улс төрийн гүн гүнзгий дүгнэлт ба шийт шопын жинсний хямдралын сэтгэл догдлом зар хоёрыг зай завсаргүй ээлжлүүлдэг, үүнээс болж бүтэн цаг хагас үргэлжилдэг мэдээллийн хөтөлбөр гэгчтэйгээ үлдлээ.

Уг нь манайд телевизийн сурталчилгааг (сониныхыг түр орхиё) ямар нэгэн байдлаар зохицуулах цэг хэдийнэ болсон. Ерөнхий сайд С.Баярын дахиад л найдаж орхисон зах зээл, чөлөөт өрсөлдөөний үр дүнгээс үзэгчид залхаж гүйцлээ.

Далд сурталчилгаа гэж байдаг. “Далд сурталчилгаа явуулсан тохиолдолд хєдєлмєрийн хєлсний доод хэмжээг 20 дахин нэмэгдvvлсэнтэй тэнцэх хэмжээний торгууль тєлнє” гэсэн заалт яваа боловч хуулийн төслийг боловсруулсан Хууль зvй, дотоод хэргийн сайд үнэхээр яаж зохицуулахаа байтугай яаж танихаа ч мэдэхгүй яваа.

Арилжааны телевизүүд зөвхөн дураараа дургихыг бодохын оронд яг одоо өөрийн зохицуулалт хийж үзээсэй. Хэрвээ энэ янзаараа дахиад үргэлжилбэл төрөөс оролцох шаардлага гарч мэднэ. Өнөөдөр архины сурталчилгааг бага сага цэгцлэхээс өөр аргагүй болсон явдал бол эхний дохио.

Зар сурталчилгааны зохицуулалтыг үзэгчдийн эрх ашгийн үүднээс хийх ёстой. Тэглээ гээд телевизүүд хохирно гэсэн үг огт биш. Жишээ авья. Түрүүчийн ням гаригт сэтгүүлч Алтантүрүү дуучин Сарантуягийнд хоносон нэвтрүүлэг “Би Сарантуяагийн хоноё, та нар реклам үз” болчихсон байх юм. Чанартай чанаргүй бараатай захын наймаачин хүртэл энэ сайн нэвтрүүлгийн рекламын цагийн худалдаад авч чадаж байна. Хэрвээ рекламын цагийг хязгаарлавал нэг секундын тариф өсч “25-р суваг” телевизийн дансанд юмуу Алтантүрүүгийн түрийвчэнд орох мөнгө яав ч багасахгүй. Реклам  цөөрөх тусам “Танайд хоноё” гэх үзэгчдийн тоо нэмэгдэнэ, дагаад рекламын тариф өсч улмаар орлого нэмэгдсээр байх болно.  

Харамсалтай нь манай телевизүүд тэгэхгүй нь бололтой. Тэгэхлээр ганц найдвар бол үзэгчид, олон нийт өөрөө юм. Яагаад олон нийт гэж? Яагаад З.Алтайн хэлдгээр хөндлөнгийн хүмүүс “миний хувийн өмчид халдах ёстой юм бэ?”. Олон нийтийн зүгээс (эсвэл тэдний өмнөөс төр) телевизүүдийн байр сав, техник, тоног төхөөрөмж, данс мөнгөнд нь биш, гэхдээ зар сурталчилгаа зэрэгт “халдах” үндэслэл байдаг юм аа. Гэхдээ энэ бол дараачийн сэдэв.

Харин одоо энэ бичлэгийг уншиж байгаа та  дэлхийн улс орнуудад телевизийн зар сурталчилгааг яасхийж зохицуулдаг талаар юу мэддэгээ хуваалцаач гэж хүсч байна.

Posted in 25-р суваг телевиз, Нийтлэл, нэвтрүүлэг | 6 Comments »

С.Баярын телевиз, сонин …

Posted by Ажиглагч on 2008/01/27

Саяхан  “Өдрийн сонин” дээр “С.Баярын телевиз, сонин гэж шинээр нэрлэгдэх болсон …” хэмээн дайруулан бичсэн харагдав.

Урьд нь С.Баярын нэрийг зүүсэн юмуу зүүлгэсэн ямар нэгэн телевиз юмуу сонин дуулдаагүй, энэ бол анхных.
Лавшруулж сонирхвол, “Өнөөдөр” сонин” ба “25-р суваг телевиз”-ийг хэлжээ. Арваад хоногийн өмнө Монгол улсын Ерөнхий сайд С.Баяр Монгол ньюс”-ийн төв байранд ирж “Өнөөдөр” сонины редакц, “25 дугаар суваг” телевизийн хамт олонтой уулзаад төгсгөлд нь талийгаач Балдорж эрхлэгчийг хамгийн сайн сайхнаар дурсаад “… Би сонссон. Б.Нандинтүшиг маань сониныхоо Ерөнхий эрхлэгч, телевизийн Ерөнхий захирал болсныг… Нандиадаа туслах ёстой. Энэ бол миний үүрэг,  би үүргээ  биелүүлнэ ээ. Ерөнхий сайдын, нэг намын даргын хувьд биш, С.Баяр гэдэг хувь хүнийхээ хувьд би тусална, чадах ядахаараа тусална” гэж хэлсэнтэй холбоотой бололтой.

МАХН-ын дарга, Ерөнхий сайд хүн арав гаруй телевиз,  өдөр тутмын сонинудаас нэгийг ялгаад “хувь хүнийхээ хувьд” тусалж болох уу? Тэр тусмаа сонгууль дөхөж байхад. (Харин огцорсныхоо дараа бол ёстой хувийн хэрэг) Уг нь сэтгэл санааны хувьд юмуу зүрх  сэтгэлээрээ гэхчлэн хэлсэн бол дээр байж. Цаашдаа нам, төрийн өндөр албан тушаалд байгаа цагтаа “хувь хүнийхээ хувьд”  яаж тусалснаа ил тод байлгахаас өөр аргагүй болж байна. Жишээлбэл,  ЗГ-ын үйл ажиллагааг “Өнөөдөр” сонин юмуу 25-р сувгаар хэрхэн сурталчлуулсан, ирэх сонгуулийн кампаниар МАХН яаж хамтран ажилласнаа зарлах хэрэгтэй. Эс тэгвэл АН-ын албан ёсны биш төв хэвлэл – “Өдрийн сонин” энэ байтугайг бичээд эхлэнэ.

Posted in 25-р суваг телевиз, Нийтлэл, нэвтрүүлэг | 1 Comment »

“25-ын захирал Алтай” байх уу?

Posted by Ажиглагч on 2008/01/16

Өчигдөр “АЭ энд ЖААГ” ХХК буюу “25 дугаар суваг” телевизийн хувь эзэмшигчдийн хурал болж олонхийн саналаар Б.Нандинтүшигийг “25 дугаар суваг” телевизийн Ерөнхий захирлаар томилсон тухай мэдээлэв. Энэ үйл явдал Монголын хэвлэл мэдээллийн өмчлөл гэж эгзэгтэй асуудал байдгийг сануулаад авлаа.

Сэтгүүлч З.Алтай “25-р суваг” телевизийн захирлаар үүсгэн байгуулагдсан цагаас нь эхлэн 11 жил тасралтгүй ажиллаж “25-ын захирал Алтай” гэсэн хэвшмэл хэллэг болтол бий болтол бид дасчээ. Бас Телевизүүдийн холбооны ерөнхийлөгчөөр сонгогдож, саяхан Зар сурталчилгааны хуулинд нэмэлт өөрчлөлт оруулах асуудлаар Засгийн газрын хуралдаанд уригдаж байр сууриа хамгаалж харагдсан  билээ.

Хэрвээ та анзаарсан бол “Өнөөдөр” сонин дээр үргэлж “MN-25-р суваг” гэж бичдэг бол “25-р суваг” телевиз өөрийнхөө дэлгэцээр MN гэдэг хоёр үсгийг хэрэглэдэггүй. Үүний цаана юу байна вэ гэвэл “АЭ ба ЖААГ” компанийн 25,5 хувийг Ц.Балдорж, 25,5 хувийг Ш.Отгонбилэг, харин үлдсэн 49 хувийг ЖААГ буюу Жаргалсайхан, Алтай, Авирмэд, Галсанжаргал нар эзэмшдэг дундын телевиз байсан тул хоёр тал бие бие рүүгээ бага зэрэг чангаадаг байжээ. Өнөөдөр хяналтын багц нь талийгаачдын эхнэр, хүүхдэд шилжиж, тэд захирлаар Балдоржийн Нандинтүшигийг тавьсан хэрэг. Түүнийг Ерөнхий захирал гэсэн байна, тэгэхлээр З.Алтай ердийн “захирал”-аар үлдсэн байж магадгүй юм.

“Монгол ньюс” группэд “Монгол ньюс лейбор” (гадаадад ажиллах хvч гаргах vйл ажиллагаа эрхэлдэг), АBМ (хэвлэл тvгээн, борлуулах), Duty free (“Буянт-Ухаа” нисэх буудал дахь vйлчилгээний цэг), “Алтан төгрөг” (банк бус санхvvгийн байгууллага) зэрэг охин компаниуд багтаж, мөн “Монгол ньюс”-ийн хөрөнгө оруулсан “Улаанбаатар зочид буудал” ХК, “САС MONGOLIA” Монгол, Японы хамтарсан аялал жуулчлалын компани, “King Palace” Монгол, Хятадын хамтарсан барилгын компани, “Улаанбаатар – 2” жуулчны бааз, “24 цаг”  дэлгүүрийн сүлжээ байдаг гэсэн. Оны өмнө “Монгол ньюс”-ын үүсгэн байгуулагч Ц.Балдорж агсны охин Нандинтүшигийг “Монгол ньюс” компанийн Ерөнхий захирал бөгөөд “Өнөөдөр” сонины Ерөнхий эрхлэгчээр,  одоо “25-р суваг” телевизийн ерөнхий захирлаар томилжээ. Бүх хөрөнгө нэг гарт төвлөрч байна. Одоо жинхэнээсээ MN-25-р суваг телевиз гэж нэрлэх буйзаа.

Редакцийн бие даасан байдал гэж нэг асуудал хэвлэл мэдээлэлд бий. Гэхдээ энэ тохиолдолд ярих асуудал хараахан биш…

(Уншигч та “Монголын хэвлэл мэдээллийн эзэмшил” гэсэн Тусгай хуудсыг үзэж мэдээлэл, санал бодлоо нэмэрлээрэй)  

Posted in 25-р суваг телевиз, Нийтлэл, нэвтрүүлэг | 2 Comments »