АЖИГЛАГЧ

Монголд, Монголын хэвлэл мэдээлэлд юу болж байна?

Archive for the ‘Монголын Үндэсний Олон Нийтийн Телевиз’ Category

Тэнцвэртэй худалдагдсан …

Posted by Ажиглагч on 2009/06/15

Олон нийтийн телевиз өөрийн сайтдаа “Ерөнхийлөгчийн сонгуулийн сурталчилгааны үеэр МҮОНРТ тэнцвэртэй ажиллажээ” хэмээн зарлав. Гэхдээ тэдний иш татсан сонгуулийн сурталчилгааны мониторингийн хэлэлцүүлэг дээр сууж, бас санал бодлоо хэлсний хувьд МҮОНТ үзэгчиддээ зөвхөн тал үнэнийг хэлснийг гүйцээхээс.

2009 оны 4-5-р саруудад орон даяар нэвтрүүлгээ явуулдаг телевизүүд, түүний дотор олон нийтийн телевиз зөвхөн хоёр нэр дэвшигчийн сонгуулийн штабын захиалгаар ажиллаж өөрсдийн буюу сэтгүүл зүйн мэдээ, сурвалжлага, тайлбар гэж байдгийг “мартсан”-аа бүгд хүлээн зөвшөөрсөн. Тэгэхлээр сурталчилгаа тэнцсэн тэнцээгүй нь тухайн телевизийн гавьяа юмуу буруу биш, харин сонгуулийн штабуудын дур зоргийн хэрэг байв. Хэрвээ хүсвэл нэр дэвшигчээ магтаж, хүсвэл өрсөлдөгчийг нь муулах хоёрыг ээлжилсний дүн магадлалын онолоор ойролцоо гарчээ. 

МҮОНТ үзэгчдээсээ нуусан тал үнэн бол тэд Монгол улсын Ерөнхийлөгчийн сонгуулийн хуулийн дагуу СЕХ-ноос баталж аль намын нэвтрүүлэг хэдний өдөр, хэдэн цаг минутаас явж хичнээн үргэлжлэхийг нэгбүрчлэн зааж өгсөн хуваарийг намуудын штабуудтай хуйвалдан зөрчиж хамаагүй илүү сурталчилгаа хийж өгсөн байлаа. Харин тэнцвэртэй худалдагдсаныг хэлэх хэрэгтэй.

Чухамдаа битгий худалдагдаарай гэж төрөөс Олон нийтийн телевизийн тухай хууль гаргаж, зөвхөн 2008 онд гэхэд төсвөөс болон үзэгчдийн хураамжаас 8 тэрбум төгрөг өгөөд зогсохгүй Ерөнхийлөгчийн сонгуулиар бага сага төлбөртэй нэвтрүүлэг явуулж халтур хийхийг зөвшөөрчээ. Гэтэл тэр нь чамлагдаж “Цагийн хүрд” мэдээллийн хөтөлбөрийн цагаа лангуун дээр тавьж байгаад нэг минутыг нь 500 мянган төгрөгөөр үнэлж улс төрийн хоёр намд сар гаруйн турш зарсан билээ. Ердийн үед 300.000 төгрөг байдаг ажээ.

Posted in 2009 оны Ерөнхийлөгчийн сонгууль, Монголын Үндэсний Олон Нийтийн Телевиз | Leave a Comment »

МҮОНРТ санхүүгийн тайлангаа нууж байна

Posted by Ажиглагч on 2009/06/02

Монголын үндэсний олон нийтийн радио, телевизийн 2008 оны үйл ажиллагааны тайлан тус байгууллагын http://www.mnb.mn вэб сайтад нийтлэгджээ.

Уншлаа. Ноднин МҮОНРТ ер бусын сайн ажиллаж УИХ-ын сонгуулиас эхлээд 7-р сарын 1-ны онц байдлын үеэр үүргээ онцсайн биелүүлж монголын хамаг шагнал өргөмжлөлийг хамаад зогсохгүй Ази, Номхон далайн бүсэд гайхагдаж байгаа ажээ. Үзэгчид магтаж сайшаагаад сүйд гэнэ. Яаж тэгэж чадав аа?

Уг нь “Олон нийтийн радио, телевизийн тухай хууль”-ийн “Олон нийтийн радио, телевизийн үйл ажиллагааны ил тод байдал” гэсэн 6-р зүйлд юу юуг тайлагнахыг нэгбүрчлэн зааж өгсөн байдаг. Сануулья.

6.1. Олон нийтийн радио, телевиз жил бүр үйл ажиллагааныхаа дэлгэрэнгүй тайланг өдөр тутмын сониноор, эсхүл нийтэд хүртээмжтэй бусад хэлбэрээр мэдээлэх бөгөөд тайланд дараахь мэдээллийг тусгана:

6.1.1. олон нийтийн радио, телевизийн хөтөлбөрийн бодлогын хэрэгжилт, нэвтрүүлгийн хөтөлбөрүүдийн тухай мэдээлэл;

6.1.2. санхүүгийн жилийн тайлан, аудиторын дүгнэлт;

6.1.3. олон нийтийн радио, телевизийн Ерөнхий захиралтай байгуулсан гэрээний хэрэгжилт;

6.1.4. ирэх жилийн зорилт, хөтөлбөрт оруулах өөрчлөлтийн талаархи санал;

6.1.5. сонсогч, үзэгчдийн санал, хүсэлт, гомдлын талаархи мэдээлэл, тэдгээрийг шийдвэрлэсэн байдал.

Гэтэл дээрх тайланд санхүүгийн жилийн тайлан, аудиторын дүгнэлт; Ерөнхий захиралтай байгуулсан гэрээний хэрэгжилт ор тас алга. Арилжааны банкууд хүртэл аль эрт аудит хийлгээд олон нийтэд тайлагнаж амжсан байхад шүү!

Ноднин МҮОНРТ-д улсын төсвөөс 8.5 тэрбум төгрөг, Монгол улсыг хөгжүүлэх сангаас хөрөнгө оруулалтанд 2 тэрбум төгрөг, барилгын дээврийн засварт 320 сая төгрөг, тоног төхөөрөмжинд 541 сая төгрөг, нийлээд 11 тэрбум гаруй төгрөгийг хуваарилжээ. Дээрээс нь хуулиар хүлээн зөвшөөрсөн 2 хувиас хэд дахин хэтэрсэн реклам сурталчилгаа, ивээн тэтгэлэг, мөн төлбөртэй нэвтрүүлгийн хууль бус орлогууд нэмэгдэнэ…

Ийм их мөнгийг МҮОНРТ-ын удирдлага тайлагнахгүй, хууль руугаа нулимсан хэвээр байна.

Posted in Монголын Үндэсний Олон Нийтийн Радио, Монголын Үндэсний Олон Нийтийн Телевиз | 4 Comments »

Телевизүүд сонгуулийн шөнө …

Posted by Ажиглагч on 2009/05/26

5-р сарын 24-нд манай телевизүүд Ерөнхийлөгчийн сонгуулийн санал хураалтын явцыг өдөржин сурвалжилж СЕХ-ны зарласан хэвлэлийн хурлыг хэдэнтээ дамжуулсан билээ. Зарим нь бүр Дархан-Уул, Дорноговь зэрэг аймгийн төвд яваад оччихсон, эсвэл бүр холын аймгуудаас дүрстэй дүрсгүй мэдээ, сурвалжлага хүлээн авч үзүүлэв. Хөвсгөл айлын байшин  шатаасныг бид дор нь мэдэж авсан. Ингээд 22 цагт санал хураалт дуусахтай зэрэгцэн СЕХ-ноос сонгуулийн ирцыг 21 цагийн байдлаар мэдээлснээс хойш дэлгэц ширтсэн хүлээлт эхэлж хот хөдөөгүй шөнөжин үргэлжилсэн юм.

Телевиз болгон сонгуулийн дүн яаж тодрохыг цаг минут алдалгүй шуурхай мэдээлж нойргүй хонохоо амалж сүрхий эхэлсэн боловч удалгүй ямар ч мэдээлэлгүй болж усны эрэг дээр гаргаад хаячихсан загас шиг яахаа мэдэхгүй ангалзаж гарав. Өдөр дууссан нацу баше их аварсан даа. Тэгтэл шөнө дундаас хойхно АН-ын байрны хурлын танхимд тойрч суусан дарга нар, хөдөөний ганц нэг багийн санал тоолоход Ц.Элбэгдорж илүү санал авсныг тэнд овоорсон сэтгүүлчдэд дуулгаж эхлэв. Удалгүй МАХН-ны байранд сэтгүүлчдийг үүднээсээ цааш нэвтрүүлээгүй ч хэвлэлийн төлөөлөгч Төмөрбаатар гарч ирээд Н.Энхбаярын түрүүлж яваа хөдөөний баг, сумдын мэдээллийг ширхэгчлэн уншив. Энэ бүгдийг “Ийгл” телевиз уламжлал ёсоороо манлайлж, бас Vivia гэдэг мундаг станцтай болсон МҮОНТ удаалан шууд дамжуулж, бусад нь тун шуурхай сурвалжилж хүргэж байлаа.

Харин намуудын мэдээлэл хоёр хоёр давтагдаж Ц.Элбэгдорж түрүүлж яваа нь илт болохын хэрээр хэдэн сарын турш сонгуулиар эцэж цуцалгүй амьсгалсан зарим телевизийн дуу нь суларсаар өглөөний 06 цагийн үед АН-ын дарга Н.Алтанхуяг Монгол Улс шинэ ерөнхийлөгчтэй болсон шинэ өдрийн мэнд дэвшүүлсэн хэвлэлийн хурлыг “Ийгл” телевиз шууд дамжуулах тэр мөчид МҮОНТ өөрийн 40 жилийн ойн концертыг толилуулан баясгаж байсан бол  TV9, UBS телевизүүд танин мэдэхүйн гоё кино, нэвтрүүлэг гаргаж, TV5, 25-р суваг телевизүүд  эфирээ хаагаад гүн нойрссон байлаа.

P.S: Бас НТВ телевиз энэ бүгдийг шууд дамжуулсан гэж үзсэн хүмүүс хэллээ.

Posted in 2009 оны Ерөнхийлөгчийн сонгууль, Ийгл телевиз, Монголын Үндэсний Олон Нийтийн Телевиз, НТВ телевиз, TV5 телевиз, TV9 телевиз, UBS телевиз | 4 Comments »

Сүүлчийн мөч хүртэл хууль зөрчсөөр өндөрлөв

Posted by Ажиглагч on 2009/05/22

Одоо яг 23 цаг 58 минут. Монгол Улсын Ерөнхийлөгчийн сонгуулийн сурталчилгаа дуусч байна. Намуудын штабын дарга нар болон телевизийн захирлууд гарын үсгээ зурж СЕХ-ны тогтоолоор баталсан төлбөргүй ба төлбөртэй нэвтрүүлгийн хуваарийг манай телевизүүд ядахдаа ганц өдөр зөрчихгүй байж чадав уу?

МҮОНТ:

СЕХ-ноос баталсан хуваарь:
5 сарын 22. Баасан. 21.15-21.30 15 мин – МАХН
5 сарын 22. Баасан. 21.30-21.45 15 мин – АН

Өнөөдөр МҮОНТ хэдэн минут илүү дутуу гаргасныг эс тооцвол чадлаа.

TV9 телевиз:

СЕХ-ноос баталсан хуваарь:
5 сарын 22. Баасан. 18.30-19.00 30 мин – МАХН
5 сарын 22. Баасан. 21.20-21.50 30 мин – АН

Харамсалтай нь TV9 бол цайчихсан телевиз. Өнөөдөр өдөржин, оройжин сонгуулийн сурталчилгаа явууллаа. Жагсаагаад ч барахгүй. Талыг нь Н.Энхбаярыг магтахад зориулсан ч нөгөө талыг түүний өрсөлдөгч Ц.Элбэгдоржид зориулсныг шударгаар хэлэх хэрэгтэй. Ялгаа нь гэвэл түүнийг зөвхөн муулсан байлаа. [Одоо 23.50-д Н.Энхбаярын сонгуулийн сурталчилгааны хаалтын сурвалжлага гарч байна]

TV5 телевиз:

СЕХ-ноос баталсан хуваарь:
5 сарын 22. Баасан. 22.30-23.00 30 мин – АН
5 сарын 22. Баасан. 23.00-23.30 30 мин – МАХН

Тэгвэл өнөөдөр сурталчилгааны дараах нэвтрүүлгүүд явлаа.

20.30-20.43. АН-ын “Шударга мэдээ”

20.44-21.40. МАХН-аас нэр дэвшигч Н.Энхбаяртай TV5 телевиз UBS телевизтэй хамтран хийсэн ярилцлагын нэвтрүүлэг.

22.31-23.27. АН-ын захиалгат нэвтрүүлэг. Сүхбаатарын талбай дээр болсон цуглаан сурвалжлага.

23.28-23.58 МАХН-аас нэр дэвшигч Н.Энхбаярын сонгуулийн сурталчилгааны хаалтын ажиллагаан дээр С.Баяр, Н.Энхбаяр нарын хэлсэн үгийг TV9 телевизтэй зуузай холбон үзүүлж эх орны тухай дууны клипээр чимэглэн төгсгөв.

Монгол Улсын Ерөнхийлөгчийн сонгуулийн хуулийн 28-р зүйлийн 3-т “Улс даяар үйл ажиллагаа явуулж байгаа бүх радио, телевизээр Сонгуулийн ерөнхий хорооны баталсан хуваарьт зааснаас өөр төлбөртэй ба төлбөргүй нэвтрүүлэг явуулж үл болно” гэсэн байдаг. Гэтэл сүүлчийн мөчийг хүртэл төрийн хууль руугаа нулимсан сурталчилгааны кампани болж өнгөрлөө дөө.

Posted in 2009 оны Ерөнхийлөгчийн сонгууль, Монголын Үндэсний Олон Нийтийн Телевиз, TV5 телевиз, TV9 телевиз | 4 Comments »

Ерөнхийлөгчид нэр дэвшигчдийн халз ярилцлага (Эхний сэтгэгдэл)

Posted by Ажиглагч on 2009/05/22

Ямар ч байсан энэ удаа Ерөнхийлөгчийн сонгууль халз ярилцлагатай боллоо. [Хоёрхон хоногийн өмнө Монголын үндэсний олон телевиз, радио өөрөө халз мэтгэлцээн гэж зарласан мөртлөө яг хийх болохоороо сэмхэн халз ярилцлага болгож хувиргасныг сая анзаарлаа] Өчигдөр орой буюу 21-ны Пүрэв гаригийн 21.00-23.00-д болж орон даяар шууд нэвтрүүлж үзэгч, сонсогчдоос урьдчилан хүлээж авсан 1400 гаруй асуултаас багцалж 60 асуулт бэлтгэж хайрцаглаад тэндээсээ сугалж 19 асуултыг тавьж амжив.

Тэр оройн “Цагийн хүрд”-ээр МҮОНРТ-ийн захирал М.Наранбаатар “асуултуудаа урьдчилж үзүүлэхгүй, манай радио, телевизэд тэр хэдэн асуултыг багцлах байтугай өөрсдөө зохиодог мундаг сэтгүүлчид байдаг” гэж даналзаад байсан ч их санасан газар есөн шөнө хоосон гэгчээр сугалж гаргасан асуултууд дэндүү жол, ямар ч найруулгагүй, заримдаа давтагдсан байх юм. Ямар сайндаа шүүхийн тогтолцооны талаар ижилхэн асуулт дахин тавигдахад нэр дэвшигч Энхбаяр ”түрүүн гарсан асуулт байна” гэж дуугарахав. Багцлах байтугай сонгож ч чадсангүй. Ерөнхийлөгчийн эрх хэмжээнд шууд хамаарахгүй баахан асуултууд гарлаа. Үнэхээр мэтгэлцүүлье гэсэн бол тэртээ тэргүй хариулж амжихгүй 60 асуулт бэлтгэх бус, харин хамгийн чухал хэдэн асуултыг тэр мундаг сэтгүүлчдээрээ бэлтгүүлэх байж  дээ. Харин ч хоёр нэр дэвшигч өөрсдөө овсгоо гаргаж тавьсан асуултаас зөрж байж бага сага мэтгэлцсэн шүү!

Ярилцлагын эхний хэсэгт Н.Энхбаяр илүү, төгсгөлийн хэсэгт бараг тэнцүү байж, харин Ц. Элбэгдорж чангахан дуусгах шиг санагдлаа.

Эхлээд нэр дэвшигчид сонгогчиддоо хандаж нэг минутийн үг хэлэхэд Н.Энхбаяр сурталчилгаагаа аавынхаа төрсөн нутгаас эхэлж ээжийнхээ төрсөн нутагт дуусгасан тухайгаа зарлав. Элбэгдоржийн юуг сануулаад байгаа нь шууд ойлгогдов.

Дараах асуултууд байлаа.

1. Монгол орны эдийн засгийн байдлыг хэрхэн үнэлж байна вэ?

2. 7-р сарын 1-ны үйл явдлыг хэрхэн үзэж байна вэ?

Хөтлөгч Ц.Мөнхтөр будлив уу, эхний хоёр асуултын хариултыг Ц.Элбэгдоржоор эхлүүлсний дараа л “асуултыг ээлжилж хариулах ёстой юм байна” гэж сая нэг ойлгов.

3. Газрын лицензийг хэрхэн цэгцлэх вэ? Гадаадын иргэдээс буцааж авах тухай.

Газрын лиценз гэж чухам юуг хэлэв? Нэр дэвшигч Энхбаяр таав бололтой хотын газрыг ч, ашигт малтмалын лицензийг ярив.

4. Шүүхийн шударга тогтолцоог хэрхэн хангах вэ?

Хулгай хийгээд 10 жилийн ял авсан эмэгтэйн жишээг Ц.Элбэгдорж хэлмэгц Н.Энхбаяр “Элбэгдоржийн тэр яриад байгаа давтан хулгай хийгээд 10 жил авсан эмэгтэйг би зарлиг гаргаж өршөөсөн” гээд өөртөө оноо нэмэх нь тэр.

5. Хөдөөгийн иргэдэд дэмжлэг үзүүлэхийн тулд ноолуурын татварыг чөлөөлөх боломжтой юу?

6. Хүнсний аюулгүй байдлыг хангах талаар?

  Н.Энхбаяр хариулахдаа, Элбэгдорж нэр дэвшигч Архангайн цагаан идээг ярилаа. Миний багаасаа идэж өссөн Архангайн ааруул амттай шүү. Өрсөлдөгчдөө баярлалаа гэж дахиад овсгоо гаргав.

7. Одоогийн шүүхийн тогтолцоог хэрхэн дүгнж байна вэ?

8. Бүсийн төвүүдийг эрчимтэй хөгжүүлэх талаар таны бодлого?

Ц.Элбэгдорж сайн мэдэхгүй байгаа бололтой “Бүсийн төвүүдээс гадна орон нутгийн хөгжлийг ярих хэрэгтэй.. “ гээд баахан хальсан бол Н.Энхбаяр “Энэ бол миний хамгийн их анхаарал тавдаг асуудал гээд 8 бүсийн төвийг нэгбүрчлэн нэрлэж байгаад хариулав. Үнэхээр мэддэг юм байна.

9. Монголчууд бүтэн хоёр жил сонгууль хийж байна. Үүнийг өөрчлөх арга байна уу?

Н.Энхбаяр “Бид өдөрт Оюутолгойгоос 1 сая доллар алдаж байна. Сонгуулийг нэгтгэх хэрэгтэй

Ц.Элбэгдорж “Саналыг худалдаж авна гэх юм аа… Худалдаж авахгүй гэхлээр булааж авна гэх юм. Булаалгахгүй гэхлээр шоронд хийгээд байх юм..

10. Монгол оронд засаглалын хуваарилалт ямар байна вэ?

Ямар “мундаг” асуулт вэ? Яг үүнийг ашиглан Н.Энхбаяр гэнэтийн дайралт хийж “Бороо гоулдын тогтвортой байдлын гэрээгээр 43 тонн алт олборлосноос бид150 сая доллар алдсан… Энэ гэрээний цаана авлига байгаа гэж Элбэгдорж ярьдаг… Энэ гэрээг Элбэгдорж Ерөнхий сайд байхдаа хийсэн… Би энд Элбэгдоржийн тухай ярьж байгаа юм биш… ” гээд Элбэгдоржийг угсруулан нэрлэж шууд буруутгалаа.

11. Ерөнхийлөгчөөр сонгогдох юм бол хамтарсан засгийн газрын үйл ажиллагааг хэрхэн дэмжих вэ?

Н.Энхбаяр: Би эх орны хишгийг санаачилсан хүний хувьд энэ Засгийн газрыг дэмжиж ажиллана.

Ц.Элбэгдорж: Олон удаагийн амлалтуудыг нийгмийн амлалтуудыг хэрэгжүүлэхийн тулд хамтарсан Засгийн газрыг байгуулсан… Одоо үндэсний аюулгүй байдлын зөвлөл дан нэг намаас байгаа. Одоо Ерөнхийлөгчийг сонгохдоо үүнийг анхаарах хэрэгтэй.

Тэрбээр шинэ аргумент гаргаж ирлээ.

12. Хэрвээ та ерөнхийлөгчөөр сонгогдвол үндэсний уламжлалыг авч үлдэх асуудлыг системтэй явуулж чадах уу?

Н.Энхбаярын ганц чаддаг сэдэв тул “хөдөө орон нутгаараа явахдаа өөрийн эрхгүй бахархах сэтгэгдэл төрдөг… Би Ерөнхийлөгчийн хувьд санаачлага гаргаж Төрийн дууллаа шинэчилсэн…” гээд авч өглөө.

13. Говь болон алслагдсан бүс нутгийн талаар онцгой арга хэмжээ авах цаг болсон юм биш үү?

Ц.Элбэгдорж: Өмнөговь аймагт АН олонхи болж нийт иргэддээ 50 мянган төгрөг тараагаад өгсөн. Одоо 7 сард бас 50 мянган төгрөг өгнө…

14. Малчдын нийгмийн даатгалын төрөөс хариуцдаг болох тухай?

15. УИХ-ын гишүүн ба Засгийн газрын гишүүдийг заагласнаар төрийг сайжруулж чадах уу?

Ц.Элбэгдорж: Авлигачид төрөөс 3 тэрбум доллартай тэнцэн мөнгө завшсан байна гэсэн тоо гарсан байсан… Оюутны төлбөрийг гар дээр нь тавьж өгөх хэрэгтэй. Сургуулиа, багшаа өөрөө сонгодог байх хэрэгтэй…гэж өрсөлдөгчийнхөө сурталчилгааны нэг гол хөзөр болоод байгаа үнэ төлбөргүй боловсролын талаар байр сууриа илэрхийлэв. (Ийм л асуудлыг тусад нь тавьж мэтгэлцүүлэх байсан юм).

16. Стратегийн ордуудыг ашиглаж эргэлтэнд оруулах талаар таны бодол?

Ц.Элбэгдорж: Хувьцаа болгож ард түмэндээ өгнө. Ерөнхийлөгч гадаадынхан ирэхэд нь ард түмэндээ хувь болгоод өгчихсөн гэж хэлж чаддаг ерөнхийлөгч байх ёстой.

Н.Энхбаяр: Миний байр суурь дэндүү тодорхой… Элбэгдоржтой нэг зүйл дээр санал нийлэхгүй. Хувьцаа хэлбэрээр өгвөл 1990-ээд оны ягаан тасалбар шиг юм болоод иргэд алдчих вий…

17. Өмч хувьчлал хэр зэрэг шударга болсон бэ? Орон сууц? ….Газар гэж битгий хэлээрэй….

Н.Энхбаяр: Өмч хувьчлал нэрээр ягаан цэнхэр тасалбараар үйлдвэрүүдийг авсан гэж ард түмэн маань ярьдаг.

Яг энд Ц.Элбэгдорж чангарч хариу дайралт хийлээ: “Өнөөдөр хүмүүс [Н.Энхбаяр гэсэн үг] амлаж болох бүх юмыг амлаж байна. Харин шударга ёсыг л амлахгүй байна… Социализмын үед гаднаа 500 хонь хэвтүүлчихээд эхнэр нь амаржихад хонь гаргаад шөл уулгачихаж чаддаггүй байсан… Дэлхийн гал зуух болсон Таван толгойг өгөх юм бол ….. хувьцаа нь дараа жил өснө…. Бид Бороо гоулдын гэрээг ашигтай, татвар авахаар байгуулсан байхад дараа жил нь [Энхбаяр та өөрөө] гарч ирээд өөрсдөө татвараас чөлөөлөөд өөрсдөө [Сү.Батболдоос өөр хэн байхав] хувь ороод авчихсан байсан

Хэрвээ жинхэнэ мэтгэлцээн байгаад цааш үргэлжилсэн бол сонгогчид хэн нь хэн болохыг мэдэж авах байсан биз.

18. 7-р сарын 1 давтагдахгүй байж болох уу?

Ц.Элбэгдорж: Шударга ёсон дээр эв нэгдэл суурилдаг. Хүүхдийг нь буудчихаад ээжтэй нь эв нэгдэл ярьж болохгүй!

Н.Энхбаяр: Би зарлиг гаргаж Монгол даяар тархахыг зогсоож чадсан. АН-ын штабын хүмүүс санал сайн авч чадвал 10000 төгрөг өгнө гэсэн байгаа. Шударга сонгууль явуулахад үнэхээр бэлэн байна уу? .. Өдөөн хатгачихаад зөвтгөж ярьж болохгүй. Уучлал гуйх хэрэгтэй..

Зөвхан энэхэн хэсэг жинхэнэ мэтгэлцээн байв.

19. Ажилгүйдэл юунаас үүдэлтэй вэ?…

Мэдээжийн асуулт учраас хариулт сонирхолтой байсангүй.

Төгсгөлд нь хоёр нэр дэвшигч сонгогчиддоо хандаж тус бүр 2 минутийн үг хэлэв.

Ц.Элбэгдорж: Миний өвөө Монгол нь Ховд аймгийн Мөстийн Бодончийн хавцалд төрсөн. Миний аав Мөст суманд төрсөн… би ээжийнхээ хамгийн бага нь … Захны даавуугаа янданд нааж индүүдээд явдаг байсан … Би 4 хүүтэй…

Н.Энхбаяр: Би өрсөлдөгчийнхөө талаар өөрийн зохиол гэсэн тараагаагүй… Монгол улс салаа замын уулзвар дээр ирээд байна… Бүтээх үү, нураах уу?… Эвийн хүч дотор шударга ёс багтаж байгаа…

Одоо л жинхэнээсээ мэтгэлцэж эхэлсэн ч ярилцлагын цаг дуусч хөтлөгч Ц.Мөнхтөр “Нэр дэвшигчдийн халз ярилцлагыг МҮОНТ амжилттай зохион байгууллаа” хэмээн гялс дүгнэж амжив.  Энэ бол түүний хамгийн сайн хөтөлсөн хэсэг.

Posted in 2009 оны Ерөнхийлөгчийн сонгууль, Монголын Үндэсний Олон Нийтийн Телевиз | 21 Comments »

МҮОНТ сонгуулийн сурталчилгааны хуваарийг “тэнцвэртэй” зөрчиж байна.

Posted by Ажиглагч on 2009/05/21

Өчигдөр оройн “Цагийн хүрд” мэдээллийн хөтөлбөрөөр Монголын Үндэсний Олон Нийтийн Телевиз сонгуулийн сурталчилгааг хуулийн дагуу тэнцвэртэй явуулж байна гэж тайлбарлаад үүнийгээ МАХН ба АН-ын сонгуулийн штабын дарга нараар нотлуулав. Тэд “тэнцвэртэй сайн явж байгаа”-г баталж өглөө.

Үнэн үү?

Монгол Улсын Ерөнхийлөгчийн сонгуулийн хуулиар улс орон даяар нэвтрүүлгээ цацдаг телевиз, радиогоор зөвхөн СЕХ-ны баталсан хуваарийн дагуу сурталчилгаа явуулахыг заасны дагуу МҮОНТ-д өчигдөр буюу 5 сарын 20-ны Лхагва гаригт МАХН-аас 19.30-19.45 цагт, АН-аас 19.45-20.00 цагт 15 минутын үнэ төлбөргүй сурталчилгааны нэвтрүүлэг явуулахаар тохиролцож МҮОНТ-ийн захирал ба намуудын штабын дарга нар гарын үсгээ зурж СЕХ-ны тогтоолоор баталжээ.

Өчигдрийн МҮОНТ хөтөлбөрт ч энэ хоёр нэвтрүүлэг хуваарийн дагуу явлаа. (Минут нь бага зэрэг илүү дутуу байсныг орхиё). Гэхдээ сурталчилгаа үүгээр зогссонгүй:

21.35 – 21.50. АН-ын сурталчилгааны нэвтрүүлэг.

21.50 – 22.07. МАХН-ын сурталчилгааны нэвтрүүлэг тус тус явлаа.

Харав уу? МҮОНТ хоёр намын сонгуулийн штабтай хуйвалдаж (өөр ямар үгээр хэлэхэв?) хуваарьт ороогүй хоёр нэвтрүүлгийг нэмж явуулсан байна. Хууль зөрчихийг харилцан тохирч үйлдсэн тул хоёр намын штаб “МҮОНТ тэнцвэртэй байгаа шдээ” гэж хайцаалсан хэрэг. Чухам ийм залилангаас сэргийлж Монгол Улсын Ерөнхийлөгчийн сонгуулийн хуулинд “Улс даяар үйл ажиллагаа явуулж байгаа бүх радио, телевизээр Сонгуулийн ерөнхий хорооны баталсан хуваарьт зааснаас өөр төлбөртэй ба төлбөргүй нэвтрүүлэг явуулж үл болно” гэсэн тусгай заалт оруулсан байдаг.

Бас нэгэн зүйл. Тэр 21.50-иас гарсан МАХН-ын захиалгат нэвтрүүлэг нь нэр дэвшигч Ц.Элбэгдоржийг үндэс угсаагаар нь доромжилсон “Монголоороо л үлдэх юмсан” байх юм. Үндэсний эв нэгдлээс эхлээд хамаг сайн сайхан зарчмыг ягштал баримтлуулахын тулд хараат бус байдлыг нь хуулиар хамгаалж өгсөн Монголын үндэсний олон нийтийн телевиз ийм юм гаргах ч гэж дээ.  Мөнгө цагаан, МҮОНТ-ийн нүд улаан ажгуу.

Арилжааны телевизээс ялгаа алга. Энэ удаагийн Ерөнхийлөгчийн сонгуулиар МҮОНТ-ын “Монголын мэдээ” агентлагийн “Цагийн хүрд” мэдээллийн хөтөлбөрийн цагаа намуудад нэг минутыг нь 500 мянган төгрөгөөр зарсаар өдий хүрчээ. Гэтэл МҮОНТ-ийн бүх нэвтрүүлэг, түүний дотор мэдээллийн хөтөлбөр бэлтгэх зардлыг төсвөөс болон үзэгчид хураамжаараа төлдөг. Чоно борооноор гэдэг шиг МҮОНТ сонгуулийг далимдуулан хулгайн бизнес хийж байгаа хэрэг. Хэрвээ тус телевиз ядахдаа “Цагийн хүрд”-ээрээ сонгуулийн үйл явцыг хэнээс ч мөнгө авахгүйгээр үнэн бодитой бөгөөд тэнцвэртэйгээр мэдээлж чадахгүй юм бол олон нийтийн телевиз гэсэн нэр зүүж төсвөөс мөнгө аваад, татвар төлөгчид бид өгөөд яах юм бэ?

Хамгийн харамсалтай нь МҮОНТ-ийнхэн өөрсдөө энэ бүхнийг одоо хүртэл “ойлгоогүй” тууж яваа бололтой.

Posted in 2009 оны Ерөнхийлөгчийн сонгууль, Монголын Үндэсний Олон Нийтийн Телевиз | 3 Comments »

Тэд яагаад огцордоггүй вэ?

Posted by Ажиглагч on 2009/05/09

Өнгөрсөн хавар Баянгол дүүргийн Засаг дарга Л.Амгалан, Дорнод аймгийн Засаг дарга Ц.Жанлав хоёр хөрөнгө, орлогоо худал мэдүүлж үл хөдлөх хөрөнгө, компаниа нуун дарагдуулсныг Авлигатай тэмцэх газар шалгаж тогтоогоод албан тушаалаас нь огцруулах саналыг Иргэдийн хурлуудад нь тавьснаа мэдэгдсэн билээ.

Бид ярьдаг: Монголоос бусад ардчилсан оронд ямар нэгэн “но”-той юманд нэр холбогдсон албан тушаалтан шууд огцордог, эсвэл түдгэлздэг. Тийм нөхдийг гэрээсээ гарч ажилдаа ирэх, ажлаасаа тарж гэртээ ирэх, хурал цуглаанд оролцох гээд ахлам тутамд нь сэтгүүлчид бүчиж телевизийн камер, сурвалжлагчийн микрофон амар заяа үзүүлдэггүй. Хөрөнгө орлогыг нь эрж хайна, зургийг авна, папараци хийнэ. Албан тушаалаа өгөөд улс төрөөс зайлдаггүй юмаа гэхэд түдгэлзэж нуугдаад үнэн мөнөө олуулсан нь дээр болдог биз.

Дөрөвдүгээр сарын дундуур Батлан хамгаалах яаман дээр Халх голын 70 жилийн ойг тэмдэглэх ажлын хэсгийн уулзалт болоход МҮОНТ-ийг ганцааранг нь шахуу урьжээ. Тэгтэл Дорнод аймгаас Ц.Жанлав дарга ирчихсэн оролцож суув. Тэр ч бүү хэл сурвалжлагчаас айхгүйгээр ой угтсан ажлынхаа талаар ярилцлага өглөө. Шударга биш Засаг дарга сэтгүүлчийн аманд өөрөө ороод ирэх нь тэр! Харамсалтай нь сэтгүүлч маань “Та хөрөнгө орлогын мэдүүлгээ…” гэж эхэлсэн ганц асуулт тавьж зүрхэлсэнгүй.

Нутгийнх нь сэтгүүлчид Жанлав даргыг “зовоож” байна гэж сонсдоогүй, харин ч аймгийн хамгийн том телевиз түүний мэдлийнх, бас аймгийн ганц сонин Засаг даргатайгаа “нягт хамтран ажилладаг” гэсэн.

Энэ хаваржин Баянгол дүүрэгт Л.Амгалан даргын санаачилсан  бүтээн байгуулалт бүх телевизээр байнга гарч дуртайяа ярилцлага өгч байлаа. Сэтгүүлчид түүнийг эвгүй асуултаар зовоосонгүй. Харин өнөөдөр дөрөвдүгээр цахилгаан станцын урдуур “Мөрөөдлийн цэцэрлэг”-ийн нээлтийн ёслол болсныг миний суваг эргүүлэхэд тааралдсан МҮОНТ, TV5, TV9, USB, SBN, “Ийгл” телевизүүд бүгдээрээ сурвалжилж Амгалан даргаас ярилцлага авчээ. Зөвхөн “Ийгл” телевизийн сурвалжлагч тэр асуултыг тавьсан байна. Хариуд нь Амгалан дарга “Нуусан барьсан, худлаа мэдүүлсэн юм байхгүй… ” гэж мэдэгдлээ. Одоо АТГ хүнийг гүтгэсэн болохнээ?

“Ийгл” телевиз ямар ч байсан салхи хагаллаа. Дараачийн удаад, бусад телевизүүд Амгаланд, бас Жанлавт “илүү, илүү” асуулт тавих байх гэж найдахаас.

Posted in + ТЕЛЕВИЗ, Ийгл телевиз, Монголын Үндэсний Олон Нийтийн Телевиз, Нийтлэл, нэвтрүүлэг | 1 Comment »

Ерөнхийлөгчийн бие халаалт

Posted by Ажиглагч on 2009/04/03

Өнөөдөр Ерөнхийлөгч Н.Энхбаяр дөрвөн жилийн өмнө түдгэлзсэн намдаа эргэн ирж Ким Чен Ир хүртэл атаархмаар бүхэл 100 хувийн саналаар Ерөнхийлөгчид нэр дэвшлээ.

СЕХ-нд бүртгүүлсний дараа сонгуулийн сурталчилгаа албан ёсоор эхлэнэ, гэхдээ Ерөнхийлөгч хүн яаж зүгээр байхав…

3-р сарын 25-ны 21.15 минутаас “Монгол улсын Ерөнхийлөгч Н.Энхбаяр; Улс төрийн бодлого, үйл ажиллагаа” нэртэй шинэ нэвтрүүлэг МҮОНТ-ээр нээлтээ хийв. Маргааш нь Эдийн засгийн бодлого, үйл ажиллагаа, нөгөөдөр нь нийгмийн бодлого, цаашаагаа гадаад бодлого, цэргийн бодлого гэх мэтээр цуварсан 15 минутийн нэвтрүүлгүүд байлаа. Нормт хугацаагаа дуусгаж буй Ерөнхийлөгч ажлаа тайлагнасан энэхүү цувралыг маргаашнаас TV9 телевиз МҮОНТ-ийг хүндэтгэх мэт нэг дугаараар хоцорч, гарах цагийг нь давхардуулахгүйгээр цацлаа. Одоо буухиаг нь UBS үргэлжлүүлж байна…. Энэ гурван телевиз үнэхээр синхрон ажиллах юм аа.

Ингээд Н.Энхбаяр гэдэг хүн өнгөрсөн дөрвөн жилд Монгол орныг нуруун дээр авч явсныг мэдэж аваагүй хүн Монголд үлдсэнгүй. Харин билэг тэмдгийн Ерөнхийлөгч байж одон зүүх юмуу уул тахих бодлого, үйл ажиллагаагаа тайлагнах болов уу гэтэл тэгсэнгүй.

Дээрх цувралыг хэн бүтээснийг мэдье гэхэд төгсгөлд нь “2009” гэсэн дөрвөн тоо л байна. МҮОНТ-ээр гардаг Ерөнхийлөгчийн “Сүлд” нэвтрүүлэгтэй төстэй юм чинь олон нийтийн телевизийн бүтээл болох нь илт. Бас хажуугаар нь “Гэрэлтэй цонх” хөтөлбөрийн хэдэн дугаарыг бүхэлд нь Монгол Улсын ерөнхийлөгчийн ивээл дорх “Монгол тэмүүлэл” аянд зориулж амжив.

3-р сарын 30-нд Монгол Улсын Ерөнхийлөгч Н.Энхбаяртай “Нүүр тулсан ярилцлага” нэвтрүүлгийн үеэр сэтгүүлч Ц.Мөнхтөр ээлжит асуултынхаа оршил болгож “Танай зөвлөх надад “Их Монгол Улс” гэдэг ном үзүүллээ. Энэ бол Монгол Улсын тусгаар тогтнолыг хүлээн зөвшөөрүүлсэн ном байна” гэв. Агуу ном! Хөтлөгч Ерөнхийлөгчид тал зассан, даапаалсан хоёрын алин болохыг би сайн ойлгоогүй, гэхдээ Ерөнхийлөгчийн зөвлөхүүд муусайн сэтгүүлчдэд давхар “зөвлөдөг” бололтой юм.

Энэ мэтээр Монгол Улсын Ерөнхийлөгчийн сонгуулийн сурталчилгаа зугуухан эхэллээ. Одоохондоо зөвхөн бие халаалт. Ирэх сар хагасын турш бид энэ байтугай  гоё юм үзэж таарна. Лав уйдахгүй.

Posted in 2009 оны Ерөнхийлөгчийн сонгууль, Монголын Үндэсний Олон Нийтийн Телевиз, TV9 телевиз | 2 Comments »

“2009 он”-ы цаана хэн нуугдав?

Posted by Ажиглагч on 2009/03/25

Сүүлийн үед хэвлэл мэдээллээр Сэлэнгэ аймгийн Мандал, Баянговь сумын хөгжил цэцэглэлтийг ихэд магтан дуулах боллоо. Өөр хаана ч байхгүй барилга, байшин, эмнэлэг, оношлогооны аппарат, сум орныг хөгжүүлэх сан тэнд байдаг аж. Энэ бүхнээ бахдан ярих хоёр сумын Засаг дарга нар удалгүй од болохнээ…Бороогийн орд газрын 40 тонн алтыг тавхан жилийн дотор ховх сорсон мөртлөө Монголд олигтой татвар төлөөгүй гэж “Бороо гоулд” компани гадаадынхантай ямар гэрээ байгуулж болохгүйн жишээгээр тодрон амны уншлага болж байгаа ч дараачийн ордыг авч ухахын тулд монголчуудыг найрах пиарыг хүчтэй хийж байгаа нь тэр. “Бороо гоулд” компаниас өгсөн хандив тусламжийг бараг л тоосго тоосгоор нь тоочин сурталчилсаар.

Гэхдээ өдөр тутмын сонинууд “Бороо гоулд”-ийн нэрийг бахархалтайгаар бичиж байгаа бол телевизүүд нуусхийдэг. Тэд “Бороо гоулд”-аас мөнгө авч пиардаж байгаа нь илэрчих гээд хэцүү байгаа бололтой. Ялангуяа МҮОНТ нуух гэж ядах юм.

3-р сарын 25-ны орой МҮОНТ-ээр “Хөгжлийн тулах цэг”-ээр “Уурхайчны нэг өдөр” нэвтрүүлэг гарлаа. Сэлэнгэ аймгийн Баянгол сумаас бэлтгэжээ. “Энэ удаад янз бүрээр хэлэгддэг Бороо гоулдын уурхайн тухай биш, уурхайчин Батболдын тухай өгүүлье” гэж тун зальжин эхэлсэн ч тэр чигээрээ “нам, засагтаа баярлалаа” гэдэг шиг “Бороо гоулд”-д баярлалаа” гэсэн яриагаар дүүрсэн байв. Эцэст нь “… Уул уурхай гэдэг бол хэдхэн хүний асуудал биш … Сэлэнгэ аймгийн Баянгол сумын нутагт орших Бороогийнг алтны уурхайг ашиглаж эхэлснээс хойш …. орон нутгийн иргэдийн хэрхэн сайнаар нөлөөлснийг дурдахгүй байхын аргагүй” гэж дүгнэлээ. Гэхдээ ийм зөв зүйтэй дүгнэлт хийсэн уран бүтээлчид нэрээ бахархалтайгаар тавихын оронд “2009 он” гэсэн тооны ард нуугдаж нэвтрүүлгээ төгсгөжээ.

“Бороо гуолд” компани Мандал, Баянговь хоёр сумыг нэлээд өөд татсан нь үнэн, гэхдээ бүх үнэний зөвхөн нэг хэсэг. Оюутолгойн хөрөнгө оруулалтын гэрээг УИХ-аар хэлэлцэж, араас нь Тавантолгойн болон бусад гэрээнүүд оочирлож байгаа энэ үед МҮОНТ уул уурхайн асуудлаар янз бүрийн үзэл бодлыг уралдуулж хэлэлцүүлэн нийгэмд ойлголцол бий болгохыг хичээхийн оронд зөвхөн компаниудыг магтаж суух юм.

Энэхүү “Хөгжлийн тулах цэг” бол Даваа гариг болгон гардаг захиалгат нэвтрүүлэг. Өмнөх нэг дугаараар Оюутолгой, Тавантолгойн орд газрыг ашиглахыг түргэтгэхийг ухуулахдаа “Бид Хятадын эрчим хүчний сүлжээнд холбогдочихвол салгана гэсэн ойлголт байхгүй. Хятадуудаар хөрөнгө оруулаад тэднээс бариулчихвал хөрөнгө оруулалтаа нөхөхийн тулд биднээс эрчим хүч авсаар байх болно” гэсэн марзан юм ярьж сонсогдсон. Ийм гүн гүнзгий санааг илэрхийлсэн уран бүтээлчдийн нэр мэдээж “2009 он”

Ноднин 10-р сараас хойш “Эрс шинэчлэл” ба “Миний монголын газар шороо” хөдөлгөөнүүд уул уурхайн асуудлаар нэвтрүүлэг хийж оролцох хүсэлтээ МҮОНТ-ын удирдлагад тавиад чадахгүй байна гэж гомдол мэдүүлж байсан. Тэд хэн нэгэнд таалагдахгүй юм их ярьдаг байх, гэхдээ бүх үнэний бас өөр хэсгийг илэрхийлж байгаа бус уу?

Posted in Монголын Үндэсний Олон Нийтийн Телевиз, Нийтлэл, нэвтрүүлэг | 5 Comments »

“3өв” газар төрж, “зөв” нам дагахын ач холбогдол

Posted by Ажиглагч on 2009/03/11

Сүүлийн өдрүүдэд хэвлэл мэдээлэлд шууд болон шууд бусаар хамаатай гурван албан тушаалд тус тусын хүмүүсийг тавьцгаалаа.

Хэдэн сарын турш сүр бадруулан явуулсан УИХ-ын хэвлэл мэдээлэл, сурталчилгааны албаны даргын сонгон шалгаруулалтаар Нэргүй гэдэг хүн шилэгдсэнийг албан ёсоор зарласан мөртлөө “Өдрийн сонин”-ы сэтгүүлч Б.Золбаярыг томилжээ. УИХ-ын дарга Д.Дэмбэрэлтэй нэг нутагт төрсөн учраас түүнийг таална хэмээн эртнээс тааварлаж байсан үнэн болж таарлаа.

“Зөв” аймаг сумаа олоод төрчихөж чадаагүй юм бол “зөв” намыг дагах байсан юм гэдгийг дараачийн суудал харуулав. Засгийн газрын хэвлэл мэдээллийн албаны даргаар МоСХ-ны гүйцэтгэх захирал, бас МАХН-ын элдэв юмны гишүүн Л.Нинжжамцыг тохоон томилжээ. Түүний бусад ид шидийг нь харж байж хэлье.

Харин Монголын Үндэсний Олон Нийтийн Телевизийн захирлаар Ц.Оюундарь очлоо. Арав шахам жил Америкт амьдарч юм үзэж нүд тайлсан сайн сэтгүүлчийг томилсон нь болж дээ. Харин энэ албан тушаал тэртээ тэргүй АН-ын хуваарьтай тул түүнд О. гэдэг хүнийг томилохоор тодорхой хүрээнд нэлээд эрт шийдсэн ч баараггүй хийхийн тулд сонгон шалгаруулалтыг битүүний урд өдөр зарлуулж хугацааны ихэнхийг Цагаан сарын ууц, буузанд уягдсан олон өдрүүдэд тааруулж бараад үндсэндээ ганцхан долоо хоног үлдээсэн байх юм. Үүний ачаар “ардчиллын биш” нөхдүүд нэрээ дэвшүүлж амжаагүй бөгөөд хоёулаа АН-ын үзэл суртлын шалгарсан дайчид болох Ц.Мөнхтөр (“Монголын мэдээ” агентлагын ерөнхий редактор), Ц.Оюундарь хоёр “шударгаар” өрсөлджээ. Шалгаруулалтыг 3-р сарын 11-12-ны өдрүүдэд зохион байгуулахаар болзолдоо зарласан хэрнээ хэт хичээж 10-ны өдөр урьдчилан амжуулсан нь сонин.

МҮОНРТ-ийн Үндэсний зөвлөл “үүргээ” сайн биелүүлж баталгаатай хийж чадсан байна, гэхдээ арай хэтрүүлчихэж…

Posted in + ТЕЛЕВИЗ, Монголын Үндэсний Олон Нийтийн Телевиз, Улс төр, эдийн засаг | 5 Comments »

“Цагийн хүрд-ээр сайн сурвалжлагууд гардаг. Үүнийгээ анзаардаг болов уу?

Posted by Ажиглагч on 2009/02/21

Надад хандаж МҮОНТ-ийн бололтой залуу сэтгүүлч сэтгэгдэл үлдээхдээ, бидний бэлтгэсэн мэдээ, сурвалжлагуудаас бас сайныг нь хэлж байгаач гэжээ. Тэгэлгүй яахав.

2008 оны 7-р сарын 2-ны өглөө эрт буюу онц байдал тогтоосноос хойш хэдхэн цагийн дараа 1-р эмнэлгийн хүлээн авах тасаг руу орж цагдаа нарт буудуулсан иргэдийн цогцсын зургийг авч, эмч сувилагч нарын яриаг үзүүлсэн Баасанбямбын сурвалжлагыг шууд нэрлэнэ. Даанч ганц үзүүлээд цензурдчихсэн билээ.

Ноднин 12-р сарын дундуур “Монголын мэдээ” агентлаг”-ийн сурвалжлагч эртлэн босч нийслэлийн захын гэр хороололд (Баянзүрх дүүрэг байсан санагдана) амьдардаг бяцхан сурагч багачууд хичээлдээ явахаар автобусан хүлээж ядаад хэдэн буудал алхаж яваа зургийг авч тэр хүйтэн өглөө нимгэн куртка, пүүз углан хөлдөхийн наагуур зогсох жаалтай ярилцаад бусад оронд сургуулийн автобус гэж явдаг тухай сануулж, энэ талаар сургуулийн захирал, БСШУЯ-ны ажилтны арга ядсан тайлбарыг оруулсан юм. Үүнийг үзсэн нийслэлийн иргэдийн хурлын нэгэн төлөөлөгч маш их цочиж хотын төсөв хэлэлцсэн ИТХ-ын 2-р хуралдаан дээр сургуулийн хүүхдийг зөөдөг автобустай болгоё гээд зардал мөнгө гаргахыг шаардсаныг санаж байна. Цаадуул нь дэмжээгүй. Сурвалжлагыг үзээгүй хэрэг. Үүнийг “Цагийн хүрд” хөтөлбөр “Говь” компанийн ээлжит хямдралын оронд 2-3 орой давтах байсан юм. Даанч тэр жаалуудад МҮОНТ-д төлөх мөнгө байхгүй, аягүйтвэл гэр нь тоггүй, орой зурагт  үздэггүй байж мэднэ.

Саяхан Хөвсгөл аймгийн нэгэн малчны арваад шар үхэр эзнийхээ ундны мөсийг зөөдөг сургуультай, нэг удаад 200 кг мөс ачихад идээшлэнгээ аваад харьчихдаг тухай сонирхолтой сурвалжлага гарсан. Үзсэн хүмүүс, бэлчээрт явдаг монгол мал ийм л ухаантай, эзэндээ ээлтэй гэж ирээд ам дамжин магтахыг сонссон. Ийм сонин зүйлийг анзаарсны төлөө тэр тэр сурвалжлагчид баярлалаа.

Төрийн ордон, яам газруудад болсон эцэс төгсгөлгүй олон хурал семинарын сурвалжлага, хоосон ярилцлагуудын дундуур ийм ухаантай, ямар ч зардал, үнэ хөлс нэхдэггүй, хүч чадлаа урвуулан ашигладаггүй, даруухан үхрүүдийг үзэхэд сайхан байсан шүү.

Posted in Монголын Үндэсний Олон Нийтийн Телевиз | 6 Comments »

Дугаар болгон хуулиар хориглосон далд сурталчилгаатай хэвээр байна

Posted by Ажиглагч on 2009/02/21

“Цагийн хүрд” мэдээллийн хөтөлбөр төсөв мөнгөө татвар төлөгчдөөс гаргуулдаг онц эрхтэй мөртлөө түүндээ ханахгүй ил, далд сурталчилгаанаас салж чадахгүй юм. Олон нийтийн радио, телевизийн тухай хуулийн 13.1. Олон нийтийн радио, телевизээр арилжааны болон далд зар сурталчилгаа нэвтрүүлэхийг хориглоно… 13.2.2. улс орны болон дэлхий дахины амьдралын цаг үеийн шинжтэй үйл явдлын талаархи тогтмол мэдээллийн хөтөлбөрийн дундуур зар сурталчилгаа нэвтрүүлэхгүй байх гээд заачихсан байгаа.

Тэгвэл “Цагийн хүрд” дугаар болгондоо 1-2 компанийн бараа, үйлчилгээний сурталчилгааг сурвалжлага болгож (сэтгүүлч нь мэдээж ил гарахгүй, нэрээ хэлэхгүй) заавал оруулдаг. “Говь” компани амралтын өдрүүдэд хямдрал зарласан, Мобиком шинэ уриа лоозонтой болсон, Хас банк салбараа нээсэн гэх мэт. Аргагүй л том компани, банкуудын сурталчилгаагаар зиндаархаж байна. Нэг хэсэг “Цагийн хүрд” эхлэхэд МҮОНТ-ийн дэмжигч “Хадгаламж”, ХАС банкууд мэндчилж, бас төгсгөдөг байсан бол энэ сард “Хөх сүлд” групп, “Хөх сүлд соёл” сангаар солигджээ.

МҮОНТ-д онц эрхтэй өөр хэд хэдэн компани бий. Тэдгээрийн нэг бол “Сүү” ХК. Жижигхэн сурталчилгаанаас эхэлсэн бол одоо “Цагийн хүрд” дотроо оруулж байгаад сүжирдэг болжээ. Саяхан Сонгинохайрхан дүүргийн мэргэжлийн хяналтын албанаас үйлдвэрлэлийг нь зогсоохыг мэдэгдсэн хэвлэлийн хурлыг “анзаараагүй” өнгөрөөв. Тэгснээ тус компаниас зохион байгуулсан эсэргүүцлийн хэвлэлийн хурлыг маргаашийн хөтөлбөрийнхөө эхэнд сүр бараатай (!) үзүүлж “хятадын үйлдвэрлэгчид манай үндэсний үйлдвэрлэгчдийг зах зээлээс шахах гээд байна уу даа?” хэмээн түгшүүр зарласан билээ. Хэд хоногийн дараа Ерөнхий сайд С.Баяр тус компанийг эзэмшигч “Макс” группийн эзэн Ганбаатарынд очиж мориноос унаж босонгуут асуудал гэнэт шийдэгдэж, үйл ажиллагааг нь сэргээх болсон тухай хэвлэлийн хурлыг бас л нэлээн дээгүүр мэдээлэв. Үүнээс хойш “Сүү ХК-ийн гүйцэтгэх захирал “Цагийн хүрд”-ээр хэдэнтээ үзэгдэж, хамгийн сүүлд “Сүү” хувьцаат компанийн үнийн хямдрал, “Аварга чанар” нэртэй шинэ бүтээгдэхүүний тухай дараачийн сурвалжлагыг бэлтгэн толилуулаад байна.

Бас нэгэн зүйл.
“Цагийн хүрд” мэдээллийн хөтөлбөр бусад бүх телевизийн сурвалжилсан “Бороо гоулд”-ийн ажилчдын хэвлэлийн хурлыг дарж өнгөрүүлсэн мөртлөө МҮОНТ-ийн нэвтрүүлэгч Д.Цовоогийн шинэ CD олны хүртээл болсныг хэдэнтээ үзүүлэв. Олон нийтийн телевиз, радиод ажилладаг хүмүүс олон нийтээсээ илүү тэгш эрхтэй байгаа биз?

P.S:
Ням гаригийн үдэш “Миний Монголын сүү” гэсэн нэвтрүүлгийн нэр хөтөлбөрт орсон харагдав. Ийм сайхан юмыг хүртэл магтахдаа мөнгө нэхдэг болсон цаг тул нэг л учиртай санагдсан. Үнэхээр тийм байлаа. Монголчууд бид сүү цагаан идээний уламжлалтай, иймээс цагаан сар болох гэж байгаатай холбогдуулан “Сүү” ХК-иар зочиллоо гэж эхэлсэн сурталчилгааны сурвалжлага ажээ. Фермерүүдээс эхлээд үйлдвэрийн шат дамжлагаар орж дэлгүүрт аяллаа өндөрлөсөн “зочин” сэтгүүлч маань “Сүү ХК”-ийн өмнөөс сар шинийн мэнд дэвшүүлж нэвтрүүлгээ өндөрлөв. Төгсгөлд нь зөвхөн “2009 он” гэжээ. “Зочин”-ы нэр нууц үлдлээ.

Posted in Монголын Үндэсний Олон Нийтийн Телевиз | 3 Comments »

Азтай, азгүй аймгууд ба гишүүнтэй, гишүүнгүй сурвалжлагууд

Posted by Ажиглагч on 2009/02/20

[Би сайтдаа бараг хоёр долоо хоногийн турш бичлэг нэмсэнгүй. Иймээс зарим ажиглалтаа нөхөж оруулав]

МҮОНТ-ийн төдийгүй монголын телевизүүдийн мэдээллийн гол хөтөлбөр – “Цагийн хүрд” өнгөрсөн сараас тодорхой асуудлыг, тухайлбал эхлээд Улаанбаатар хотын агаарын бохирдол, дараа нь хүүхэд багачууд, араас нь засаг захиргааны анхан шатны нэгж – хороо, багын асуудлыг сонгон авч долоо хоногийн турш тал бүрээс нь сурвалжлан үзүүлсэн юм. Гэхдээ мэдээллийн хөтөлбөрт ганц сэдвийг олон хоног онцлох нь төдийлөн зохиогүй, эсвэл цагаан сар дөхөөд ч тэр үү больчихлоо.

Дүн өвлийн хүйтэн тачигнасан нэгдүгээр сараас хойш “Монголын мэдээ” агентлагийн сурвалжлах группууд хөдөө орон нутгаар ердийнхөөс олон явж сурвалжилсан байна. Анзаарвал, дандаа УИХ-ын гишүүдыг дагаж юмуу тэнд тохиосон семинар зөвлөгөөнийг зорьсон байх юм. Хөвсгөл аймаг руу гэхэд УИХ-ын гишүүн Ц.Даваасүрэн, Ц.Энхтүвшин, Завхан руу Ш.Сайхансамбуу, Д.Оюунхорол нарын хамт хөдөө орон нутагт ажиллажээ. (Д.Оюунхорол гишүүн “Ийгл” телевизийг ч багтаа багтаав) Сэлэнгэ, Говь-Алтай, Дархан-Уулд очсон шалтгаан ч иймэрхүү. Мэдээж шадар сайд М.Энхболдод бараа болж Хэнтий, Сүхбаатар луу тусгайлан дагаж явсныг хэлэх хэрэгтэй. Архангай аймагт ашиглалтанд орсон цэцэрлэгийг сурвалжилсан дуранд хэн гарч ирэх бол гэтэл эрхэм гишүүн Н.Батбаярын дүр тодорч байх жишээтэй. Ийнхүү УИХ-ын гишүүд хөдөө хөрж гадаа гандаж яваагаа улс орон даяар нотлох баримттайгаар цацуулсан бол “Монголын мэдээ” агентлагийнхан гишүүнтэй, бас наагуур цаагуур самбаачлан “гишүүнгүй” мэдээ, сурвалжлага баахныг бэлтгэн үзүүлж харилцан ашигтай хамтран ажиллав. Болжээ. Ялангуяа Хөвсгөл, Завханы зарим сурвалжлагууд тун сайн байсан шүү.

Гэхдээ хэдий болтол ингэж дарга дагахав? Сонгогдсон гишүүд нь очоогүй, хурал семинар болоогүй бусад аймгууд “Цагийн хүрд”-ээр гарах аз дутсаар байх уу? Тэнд бас л цас зудтай, мал нь өвсгүй, тэр ч бүү олон хүн хөлдөж амиа алдаж байгаа билээ…

Posted in Монголын Үндэсний Олон Нийтийн Телевиз | 3 Comments »

Вашингтоноос шууд [хүлээн авч] дамжуулав

Posted by Ажиглагч on 2009/01/21

АНУ-ын Ерөнхийлөгч Барак Обамагийн тангараг өргөх ёслол дэлхийн хэмжээний үйл явдал болж улмаар монголын 4 телевиз шууд дамжуулан үзүүллээ. Бишээ, өөрсдөө тэнд очиж наашаа шууд дамжуулсан биш, харин гадаадын телевизүүд цацсаныг зөвшөөрөлтэй зөвшөөрөлгүй хүлээн авч өөрсдийн тайлбар болон орчуулгатайгаар сонирхуулав. (Жил гаруйхны өмнө Оросын шинэ ерөнхийлөгч Д.Медведев тангараг өргөхөд манайхан тэгэж сүйд болоогүй билээ)

Хамгийн түрүүнд америкийн хөрөнгө оруулалттай “Ийгл” телевиз шууд үзүүлэхээ  эртлэн зарласан ба FOX News-ийн дамжуулсныг дамжуулан тайлбарлаж өглөө. Шөнө “Ийгл” нэвтрүүлгээ өндөрлөсөн ч Обама-д зориулсан хүндэтгэлийн цайллага FOX News-ээр цааш үргэлжилж харагдсан.

C1 телевиз нэлээд хоцорсхийж эхлээд орчуулан үзүүлж харагдсан. Чухам хаанахын ямар сувгаас авсныг мэдэж амжсангүй.

Харин “Боловсрол суваг” телевиз Монгол Улсаас АНУ дахь Элчин сайд асан Ж.Чойнхор болон америкийн иргэн бололтой нэгэн эрхмийг студидээ суугаад хамт үзэнгээ ярилцжээ.

barak-obama-inaug-bolobsrol3 barak-obama-inaug-bolobsrol2

Харин МҮОНТ телевиз Б.Обамагийн тангараг өргөх ёслолыг дамжуулахдаа Voice of America-гийн ямар ч тайлбаргүй (natural sound-тай гэдэг) дамжуулалтыг ашигласан боловч техникийн саатлаас үе үе BBC World News рүү шилжиж байлаа. Хоёр хөтлөгч хэтэрхий сайн бэлтгэж баахан материал цуглуулсан нь харин ч садаа болох шиг санагдсан.  Цаана нь тийм сонирхолтой үйл явдал яг одоо болж байхад “хамгийн урт үг хэлсэн ерөнхийлөгч тэр” гэх мэтээр америкийн түүхийн мэдлэгээ гайхуулах нь илүүц байв. Бас студийнхээ арын фонон дээр Улаанбаатарын зураг оруулсны учрыг ойлгосонгүй. “Монгол-Америкийн найрамдал”-ыг бэлэгдсэн юм болов уу? Тэр шөнө суваг эргүүлэхэд дэлхийн ямар ч телевиз Вашингтоны төвд болж байгаа үйл явдлыг зүгээр л үзүүлж, тайлбарлаж байна лээ…

snapshot20090121224312

snapshot20090121223228

Posted in + ТЕЛЕВИЗ, Монголын Үндэсний Олон Нийтийн Телевиз | 3 Comments »

МҮОНТ-ийн Үндэсний зөвлөлийн ирж яваа гишүүд

Posted by Ажиглагч on 2009/01/13

Шинэ он гарахаас хэдхэн цагийн өмнө УИХ-ын чуулганы нэгдсэн хуралдаанаар амжин батлагдсан МҮОНТ-ийн Үндэсний зөвлөлийн шинэ 6 гишүүний талаар хэдэн үг.
Ц.Гомбосүрэн – Гадаад хэргийн сайд асан. Голдуу ахмад дипломатч, нэрт орчуулагчаар нь дууддаг. Өнөөдөр манай нийгэмд байгаа хамгийн эерэг имижтэй хүмүүсийн нэг. “Гомбосүрэн гуай шиг …” гэж байгаад сайны жишээнд татахыг би олонтаа сонссон. Сүүлийн үед “Дэлхийн өсөлт” хэмээх Хойт Америкийн уул уурхайн компанийн лобби байгууллагад монгол талаасаа №1 хүн болсон. Бас нэг хэсэг “Энержи ресурс”-ийн төлөөлөн удирдах зөвлөлийн дарга байсан нь хэвээрээ бол том бизнесийн төлөөлөл гэж ойлгогдож болох юм. Засгийн газраас нэр дэвшүүлэн оруулжээ.
Ч.Дамбажав – Дашчойлин хийдийн хамба лам – Бурханч лам Пүрэвбатын оронд бас л лам хувцастай хүн суух ёстой гэж Монгол Улсын Ерөнхийлөгч шийджээ.
Ц.Зоригтбаатар – Монголын Залуучуудын Холбооны ерөнхийлөгч. Манай бүх залуучуудыг төлөөлдөг мэт хулхи нэртэй энэ байгууллагын эзэд нь УИХ-ын гишүүн, Сангийн сайд С.Баярцогт, УИХ-ын гишүүн, АН-ын бүлгийн дарга Ц.Сайханбилэг нар юм. Тэд 1990 оны дундуур төрийн эрх барилцаж байхдаа МЗХ-ыг байшинтай нь хувьчилж аваад мануулж үлдээсэн Ц.Зоригтбаатартаа шинэ даалгавар өгсөн хэрэг. Мэдээж УИХ-аасаа дэвшүүлсэн. Байнгын хорооны хурал дээр Ц.Батбаяр гишүүн түүний үйлдсэн нэг нүглийг (залуу гэр бүлийн орон сууцны хэрэг) сануулж байлаа.
Б.Ганболд – “Зууны шуудан” сонины үүсгэн байгуулагч бөгөөд ерөнхий эрхлэгч. 2000-2005 онуудад Монголын радио, телевизийн хэрэг эрхлэх газрын даргаар ажиллахдаа Н.Энхбаярын дэглэмийн найдвартай гар хөл байлгаж, дараа нь мөн түүний хулгайлсан “Засгийн газрын мэдээ” сониныг “Зууны мэдээ” нэрээр манаж өгснийхөө шангаар өдөр тутмын сонин байгуулжээ. Нэр дэвших, дэвшүүлэх талаар бодох ч эрхгүй баймаар. Харин түүний найз, УИХ-ын гишүүн, Төрийн байгуулалтын байнгын хорооны дарга Ц.Энхтүвшин бодоод зогсохгүй өөрийн биеэр дэвшүүлж нэгдсэн хуралдаанд танилцуулж батлуулав.
С.Цэрэндорж – Монголын өмгөөлөгчдийн холбооны дэд ерөнхийлөгч. Хүний эрхийн үндэсний комиссын дарга асан. “Цэвэр” хуулийн хүн дээ. [Би түүнийг Ерөнхийлөгчийн хуулийн бодлогын зөвлөх, ХЗДХЯ-ны төрийн нарийн бичгийн дарга Б.Цэрэндоржтой андуурсан байсан тул засварлав – Д.Ц.]. УИХ-аас нэр дэвшүүлжээ.
Д.Гантөмөр – Аялал жуулчлалын тогтвортой хөгжлийн төвийн тэргүүн. Иргэний нийгмийн ийм нэгэн шинэ “од” УИХ-ын байнгын хорооны хуралдаан дээр гэнэт тодорсон юм. Нэгдсэн хуралдаан дээр ч торолгүй гарсан. Ямар ид шидтэй нөхөр вэ? Зарим хүмүүсийн яриагаар, Засгийн газрын тэргүүн шадар сайд, АН-ын дарга Н.Алтанхуягын хамаатан гэнэ. Засгийн газраас нэр дэвшүүлсний учир энэ байж.

Ингээд МҮОНРТ-ын Үндэсний зөвлөлд олон нийтийн гэхээсээ илүү төрийн томчуудын төлөөллүүд нэмж орлоо. Бас бүгдээрээ эрэгтэй.

Харин Ц.Дашдондовын дахин эзлэхэд тун ойрхон байсан долоодох суудал одоогоор хоосон байгаа…

Posted in Монголын Үндэсний Олон Нийтийн Телевиз | 6 Comments »

Төр засаг хэнд “салаавч үзүүлж”, хэнийг таалав?

Posted by Ажиглагч on 2009/01/12

МҮОНРТ-ийн Үндэсний зөвлөлийн гишүүний суларсан 7 орон тоон дээр нэр дэвшүүлж сонгох үйл явц тун хачин болжээ.

2008 оны 11 сарын 12-нд иргэний нийгмийн 90 гаруй байгууллагын төлөөлөл хуралдаж МҮОНРТ-ийн Үндэсний зөвлөлийн гишүүнд санал болгох дараах 16 хүний нэрсийг тодруулсан байна. Жагсаавал,

1. Ч.Лхагважав – МУИС-ийн Физик-электроникийн сургуулийн захирал, “Оддын ай” ТББ-ын Удирдах зөвлөлийн дарга
2. Т.Ундаръяа – Монголын эмэгтэйчүүдийн ТББ-ын үндэсний сүлжээний ерөнхий зохицуулагч,
3. Л.Баян-Алтай – Говийн бүсийн эдийн засгийг хөгжүүлэх санаачилага төслийн ажилтан, Англи улсад төгсөгчдийн холбооны удирдах зөвлөлийн гишүүн
4. Д.Раднаарагчаа – Монголын хоршооллын хөгжлийн төвийн захирал, Монголын үйлдвэрлэл, үйлчилгээний хоршоодын холбооны тэргүүн
5. Д.Энхжаргал – Хүчирхийллийн эсрэг үндэсний төвийн захирал
6. Н.Дашзэвэг – “Монгол” дээд сургуулийн захирал, Монголын үндэсний үйлдвэрлэгчдийн холбооны тэргүүн
7. М.Батсуурь – МУИС-ийн хууль зүйн сургуулийн багш, “Нээлттэй академи” ТББ-ын Удирдах зөвлөлийн гишүүн, “Хүний эрхийн хүрээлэн” ТББ-ын УЗ-ийн гишүүн
8. Ц.Отгонбаяр -Гандантэнгчинлэн хийдийн унзад лам, “Зая” гэгээнтний сангийн удирдах зөвллөлийн гишүүн, Архангай нутгийн зөвлөлийн гишүүн
9. Х.Наранжаргал – “Глоб интернэшнл” ТББ-ын тэргүүн, “Хөх сүлд” ТББ-ын удирдах зөвлөлийн гишүүн
10. Х.Батсайхан – Монголын оюутны холбооны дэд ерөнхийлөгч, БМИҮЗ-ийн хяналтын зөвлөлийн гишүүн, ХААИС, СУИС, МУБИС-ийн УЗ-ийн гишүүн
11. Б.Хишигсайхан – Дэлхийн банкны захиргааны шийдвэрийг стандардчилах төслийн зөвлөх, “Орон нутгийн санаачилга” ТББ-ын УЗ-ийн гишүүн
12. А.Батпүрэв – Мэдээлэл, олон нийтийн харилцааны “Инфорум” төвийн гүйцэтгэх захирал, Олборлох салбарын ил тод байдлын төлөө ТББ-уудын эвслийн зохицуулагч
13. П.Цэвээн – Монголын хүүхдийн эрхийн төвийн гүйцэтгэх захирал
14. М.Бөхбат – Монголын жудо бөхийн холбооны ерөнхий нарийн бичгийн дарга
15. Б.Зоригт – “МГИМО Монгол” ТББ-ын захирал, МЯНН-ын дэд ерөнхийлөгч
16. Г.Байгалмаа – Монголын Ардчилсан Холбооны УЗ-ийн нарийн бичгийн дарга

Ингээд тэдгээрийн нэрс, намтар танилцуулгыг хамтарсан мөрийн хөтөлбөрийн хамтаар Ерөнхийлөгч, УИХ, Засгийн газарт санал болгон өргөн барьжээ. Бас өдөр тутмын сонинуудаар ил тод зарласан. Гэтэл 12-р сарын 31-нд УИХ-ын чуулганы нэгдсэн хуралдаанд нэр дэвшин орж ирсэн хүмүүсийн дотор тэдний нэг нь ч багтсангүй! Дээр дурдсан 16-ын дотор хэн ч мэдэхгүй эргэлзээтэй нөхөд байсан ч Х.Наранжаргал, Т.Ундарьяа, Д.Энхжаргал гурвын ядахдаа нэгийг дэвшүүлж болмоор доо. Тэднийг санал болгосон зуугаад байгууллагын дотор “Транспаренси интернэйшнл Монгол”, Монголын оюутны холбоо, Монголын үндэсний үйлдвэрлэгчдийн холбоо, Хүний эрх, хөгжил төв, Монголын урлагын ажилтны холбоо, Нээлттэй нийгэм форум, “Миний Монголын газар шороо” хөдөлгөөн зэрэг хэн ч ор нэр төдий гэхээргүй нэрс байсан. Магадгүй, тэдний дунд төр, засгийн алдаа дутагдлыг шүүмжилдэг, жагсаж тэмцдэг байгууллагууд орсон учраас “гологдсон” байх.

Чухам ийм “улс төрийн шалтгаан”-аар төр засаг өөр байгууллагуудыг таалсан бололтой. Урьд өдөр нь Монголын ахмадын холбоо, Монголын хэрэглэгчдийн эрх ашгийг хамгаалах нийгэмлэг, “Монгол зөн” ТББ, Монголын залуучуудын холбоо, Монголын энх тайван найрамдлын холбоо, “Фокус” ТББ, Газраа байраар солих иргэдийн холбоо, Өдөр тутмын сонинуудын холбоо, Орон нутгийн хэвлэл мэдээллийн холбоо, Шинжлэх ухаан үйлдвэрлэлийн “Биос”, “Сайн үйлс” зэрэг 20 гаруй төрийн бус байгууллага зэрэгцэн хуралджээ. Анзаарав уу? Төр засгаа дэмждэг, “зөв” байгууллагуудын нэр байна. Тэд хэнийг төр засагтаа санал болгов?

1. Д.Цахилгаан – Дэлхийн Монголчуудын чуулганы ерөнхий нарийн бичгийн дарга
2. Ц.Дашдондов – ШУА-ийн Хэл зохиолын хүрээлэнгийн хүндэт доктор
3. Б.Ганболд – “Зууны мэдээ”, “Зууны шуудан” сониныг үүсгэн байгуулагч, ерөнхий эрхлэгч
4. С.Цэрэндорж – Монголын өмгөөлөгчдийн холбооны дэд ерөнхийлөгч
5. Ц.Зоригтбаатар – Монголын залуучуудын холбооны ерөнхийлөгч
6. Ц.Гомбосүрэн – Гадаад харилцааны сайд асан
7. Д.Амарбаясгалан – Газраа байраар солих иргэдийн холбооны тэргүүн, “Бизнес майнд” компанийн ерөнхий захирал.

Тэр чигээрээ эрх баригч намууд болон том бизнесийг төлөөлсөн хүмүүс ажээ. Иймээс тэр долоогоос дөрөв нь УИХ-ын байнгын хороогоор саадгүй дамжин нэгдсэн хуралдаанд нэр дэвшин орж Ц.Дашдондов хасагдсан ч үлдсэн гурав нь МҮОНТ-ийн Үндэсний зөвлөлд санал нэгтэй сонгогдсонд гайхах хэрэг алга…

Posted in Монголын Үндэсний Олон Нийтийн Телевиз | 4 Comments »

МҮОНРТ-ийн Үндэсний зөвлөлийн үлдэж байгаа болон явж буй гишүүд

Posted by Ажиглагч on 2009/01/09

2008 оны сүүлчийн өдөр – 12-р сарын 31-нд болсон УИХ-ын чуулганы нэгдсэн хуралдаанаар МҮОНТ-ийн Үндэсний зөвлөлийн хугацаа нь дууссанд тооцогдсон 7 гишүүний оронд шинэ хүмүүсийг томилжээ. 2005 оны 10-р сард байгуулагдсан Үндэсний зөвлөлийн гишүүд өнгөрсөн 3 жилд хэрхэн ажилласнаа тайлагнахгүйгээр солигдож эхэллээ. Хэрвээ Үндэсний зөвлөлийн хуралдааны протокол, гаргасан шийдвэрүүд ил тод байдагсан бол МҮОНРТ тийм их хүч хөрөнгө, татвар төлөгчдийн мөнгөөр иймхэн хөтөлбөр үзүүлж ирсний шалтгаан тэд үү, биш үү гэдгийг мэдэж болохсон. Даанч хаалттай учраас Үндэсний зөвлөлийн хэн нь хэн байсныг өөрийнхөө мэдэх хэмжээнд тоймлохоос.

Г.Пvрэвбат
Бурханч лам гэгддэг. Гандантэгчинлэн хийдийн дэргэдэх Монголын бурханы шашны урлахуй ухааны дээд сургуулийн захирал. Ерөнхийлөгчөөс нэр дэвшүүлж сонгогдсон ба тухайн үедээ Монгол улсын Ерөнхийлөгчийн зөвлөх байсан санагдана. Тэнд лам хувцастай хүн сууснаар Үндэсний зөвлөлийг нийгмийн олон төлөөлөлтэй чамин харагдуулдаг байсан. Одоо Үндэсний зөвлөлөөс бууж байгаа.

Х.Чилаажав
Монголын зохиолчдын эвлэлийн гүйцэтгэх захирал. Мэдээж Монгол Улсын Ерөнхийлөгчөөс нэр дэвшүүлж сонгогдсон. Тэрбээр сүүлийн 3 жилд Үндэсний зөвлөлийг удирдахдаа олон нийтэд хаалттай төдийгүй гэнэт алга болчихвол хэн ч нэхэхгүй хэдэн хүн болгож хувиргасан. Уржнан МҮОНРТ-ийн даварсан хэдэн нөхөр өлсгөлөн зарлахад Үндэсний зөвлөл ямар ч нэр хүндгүй, үүрэггүй болохоо харуулсан ба арилжааны нэгэн телевизийн захирал МСНЭ-ийн ерөнхийлөгч нэрээр ирж дүвчигнэхэд тарж арилсан байдаг. 7-р сарын 1-ны онц байдлын үеэр Чилаажав үзэгдээгүй, бодвол гадаадад аялж явсан биз. Үргэлжлэн ажиллана.

Р.Бурмаа
“Нийгмийн дэвшил-эмэгтэйчүүд” хөдөлгөөний тэргүүн. Төрийн бус байгууллагуудаас санал болгож УИХ-аас нь дэвшvvлж сонгосон. 2008 оны УИХ-ын сонгуульд АН-аас нэр дэвшсэн тул хуулийн шаардлагаар больж байгаа. АН-ын гишүүн байжээ.

Р.Хадбаатар
МСоХ-ны ерөнхийлөгч нэрээр сайн лобби явуулсны хүчээр төрийн бус байгууллагуудаас санал болгогдож УИХ-аас нэр дэвшин сонгогдсон. Сэтгүүл зүйг төлөөлж Үндэсний зөвлөлд суусан боловч “Өглөөний сонин”, “Хүмүүс”, “Хүмүүсийн амьдрал” сонины эзэн юм. МАХН-ын гишүүн байснаа 2008 онд илчилж УИХ-ын сонгуульд нэр дэвшсэн тул больж байгаа. Гэхдээ сонгуулийн сурталчилгааны хэд хэдэн нэвтрүүлэг, сурвалжлагаа олон нийтийн телевизээр шургуулж амжсан.

Л.Төмөрбаатар
Сүрьетэй тэмцэх нийгэмлэгийн гүйцэтгэх захирал нэрээр УИХ-аас нэр дэвшиж сонгогдсон. Төдөлгүй Хавдар судлалын Үндэсний төвийн захирал болсон. Үргэлжлэн ажиллана. Намын харьяалал тодорхойгүй.

Н.Содномдорж
УИХ-ын гишүүнээс буугаад МҮЭ-ийн холбооны ерөнхийлөгч байхдаа УИХ-аас нэр дэвшиж сонгогдсон. Үндэсний зөвлөлийн анхны даргаар ажилласан боловч дураараа дургихын зэрэгцээ 15 хүнийг удирдаж чадалгүй тэдэндээ гологдож төдөлгүй огцорсон. МАХН-ын гишүүн. Үргэлжлэн ажиллана. Одоо ҮЭ-ийн дэргэдэх Хөдөлмөрийн дээд сургуулийн захирал байх.

Ж.Занаа
Монголын эмэгтэйчүүдийн төрийн бус байгууллагын удирдах зөвлөлийн дарга нэрээр УИХ-аас дэвшиж сонгогдсон. 2008 оны 7-р сарын Онц байдлын үеэр МҮОНТ хэрхэн ажилласныг УИХ-ын хүний эрхийн дэд хороо хэлэлцэхэд Үндэсний зөвлөлийн бусад гишүүд шиг зугаталгүй ирж тайлбар хийсэн (түүний илэрхийлсэн зарим байр суурь надад өрөөсгөл санагдсан ч) хоёрхон гишүүний нэг. 2008 оны УИХ-ын сонгуульд нэр дэвшсэн (бие даан) тул хуулийг дагуу больж байгаа. Одоо “Иргэдийн алъянс” төвийн тэргүүн.

Г.Цэрэнпүрэв
Монголын банкуудын холбооны гүйцэтгэх захирал нэрээр Монгол Улсын Засгийн газраас нэр дэвшиж сонгогдсон. Тэгтэл Хадгаламж банкны удирдлагад багтдаг болж таарсан. Энэ жишгээр бол төрийн албан тушаалтнууд хүртэл марк сонирхогчдын холбоо юмуу нутгийн зөвлөлийн нэрээр, бизнес эрхлэгчид худалдаа, аж үйлдвэрийн танхимын нэрээр Үндэсний зөвлөлд орж болохнээ?). МАХН-ын гишүүн байх. Үргэлжлэн ажиллана.

Л.Дамдинсүрэн
Монголын хүнсчдийн холбооны гүйцэтгэх захирал нэрээр Засгийн газраас нэр дэвшиж сонгогдсон. Тэр үед Засгийн газрын хэвлэл мэдээллийн албаны дарга байсан Д.Болдхуягийн аав. МАХН-ын гишүүн. Одоо сайн дураараа больж байгаа.

О.Эрдэнэ-Өлзий
Төрийн бус байгууллагуудын чуулганаас санал болгоогүй ч Биеийн тамир, спортын хөгжлийн сангийн тэргүүн нэрээр УИХ-аас сонгогдсон. Ноднин 7-р сарын 1-ны дараа Ж.Занаатай хамт УИХ-ын гишүүдэд тайлбар хийж байв. Одоо Үндэсний “Соёмбо” хөдөлгөөний удирдах зөвлөлийн гишүүн, Монголын тэшүүрийн холбооны ерөнхий нарийн бичгийн дарга. Намын гишүүнчлэл тодорхойгүй. Үргэлжлэн ажиллана.

М.Буянбадрах
FМ107 радио буюу “Медиа групп” ХХК-ийн захирал байжээ. Засгийн газраас нэр дэвшиж сонгогдсон. Төрийн бус байгууллагуудын чуулганаар дамжилгүй гэнэт гарч ирсэн, бас тэгээд арилжааны НТВ телевизэд ажиллаж хувь эзэмшдэг учраас сонирхлын зөрчилтэй гэх мэтээр шүүмжлэлд өртсөн, одоо юу болсныг бүү мэд. Цааш үргэлжлэн ажиллана.

Ц.Дашдондов
ШУА-ын Хэл зохиолын хүрээлэнгийн хүндэт профессор, МСНЭ-ийн хүндэт ерөнхийлөгч, соёлын гавьяат зүтгэлтэн, сэтгүүлч гэсэн олон гуншингийн аль нэгээр мэдээж Ерөнхийлөгчөөс нэр дэвшиж , гэхдээ төрийн бус байгууллагын чуулганыг алгасан нэр дэвшиж сонгогдсон. Энэ удаад Үндэсний зөвлөлийн гишүүнээс больсон мөртлөө буцаж нэр дэвшсэн (мэдээж Ерөнхийлөгчөөс) гайхалтай. Магадгүй Үндэсний зөвлөлийн бусад гишүүд суудалдаа үлдэхийн тулд “Та худлаа гарсан болоод эргээд ороод ир. Ерөнхийлөгч таныг хаалтгүй дэвшүүлнэ” гэж хөөргөөд явуулсан биз. Гэтэл Ц.Дашдондов УИХ-ын байнгын хороог саадгүй давсан мөртлөө нэгдсэн хуралдаан дээр З.Энхболд гишүүнийг загнаж тавьтиргүйтсэнээс болж гацчихаад байгаа. МАХН-ын гишүүн.

О.Мөнгөнтуул
Төрийн бус байгууллагуудын чуулганаар орж нэр дэвшээгүй боловч Эмэгтэйчүүдийн төрийн бус байгууллагуудын сүлжээний нэрээр УИХ дээр гэнэт нэр дэвшин гарч ирсэн. Эрхэм гишүүн Д.Арвин шударга юм ярихынхаа хажуугаар иймэрхүү юм амжуулдаг гэнэлээ. Үндсэн ажил нь Монгол-Италийн бизнесийн танхимын гүйцэтгэх захирал. Намын гишүүнчлэл тодорхойгүй. Цааш үргэлжлэн ажиллана.

Н.Золжаргал
Монголын хөрөнгийн биржийн захирал нэрээрээ алдаршаад сураг тасарсан нэгэн. Сүүлийн жилүүдийн ажил, албан тушаал нь ерөөсөө ойлгогддоггүй. C1 телевизэд зөвлөхөөр ажилладаг сонирхлын зөрчилтэй нь төдөлгүй илэрсэн ч 2005 онд төрийн бус байгууллагуудаар оролгүйгээр Засгийн газраас сэмхэн нэр дэвшиж сонгогдсон. Тэр үед Ерөнхий сайд Ц.Элбэгдорж байсныг хэлбэл нэмэлт тайлбар хэрэггүй буйзаа. Удалгүй МҮОНТ-ийн захирлаар C1 телевизийнхээ эзэн, УИХ-ын гишүүн Х.Баттулгын төлөөний хүн Д.Мөнхбаатарыг тавиулжээ. Сүүлдээ сонирхол буурч нь Үндэсний зөвлөлийнхөө хуралд үзэгдэхээ больсон сурагтай. Одоо бүр больж байгаа ажээ. (Өнөөдөр Худалдаа, хөгжлийн банкны газрын даргыг алба хашдаг гэнэ). 

Л.Болд
Монголын урчуудын эвлэлийн хорооны дарга нэрээр мэдээж Монгол Улсын Ерөнхийлөгчөөс нэр дэвшиж сонгогдсон. Гэхдээ өнгөрсөн хугацаанд МҮОНРТ-ийн талаар нэг үг дуугарч байхыг би сонсоогүй.  Энэхүү сонгуульт ажил нь хөшөө дурсгал бүтээхэд нь огт саад болдоггүй биз, иймээс саяхан Төрийн соёрхол хүртжээ. Намын гишүүнчлэл тодорхойгүй. Цааш үргэлжлэн ажиллана.

Ийм 15 хүн МҮОНРТ-ийн Үндэсний зөвлөлийн гишүүнээр 2005-2008 онуудад ажиллажээ. Өдөр тутмын сонинд дараа оны дундуур нийтлэгддэг МҮОНРТ-ийн жилийн тайланд хэдэн ерөнхий өгүүлбэр оруулдгийг эс тооцвол Үндэсний зөвлөл ажил төрлөө хаалттай байсныг дахин хэлье. Сүүлийн 2 жилд би тэднийг Үндэсний зөвлөлийн гишүүний хувьд зөвхөн гадаад айлчлалын мэдээ, сурвалжлагаар үздэг болсон. МҮОНРТ-ийн дарга нар тэднийг хэд хэдээр нь авч яваад “найзалчихдаг” бололтой. Ноднин Индонезийн амралт сувиллын Бали арал руу бөөнөөрөө хуралд очиж зав чөлөөгүй хөдөлмөрлөсөн тухай хэдэн сурвалжлага, бас бүхэл бүтэн тусгай нэвтрүүлэг үзсэнээ санаж байна. Тэгвэл УИХ-ын дээр дурдсан чуулган дээр З.Энхболд гишүүн тэднийг 14-үүлээ Тайландад очиж амарсан гэж шүүмжилсэн.

Олон нийтийн нэрээр дураараа дургидаг хэдэн хүн үү дээ?

Posted in Монголын Үндэсний Олон Нийтийн Телевиз | 4 Comments »

Монголд хоёрхон телевиз байдаг. Нэг нь олон нийтийн, бусад нь арилжааны.

Posted by Ажиглагч on 2008/12/31

Дэлхийд хоёрхон төрлийн суудлын машин байдаг, тэр нь Мерседес Бенц ба бусад гэдэг шиг монголын телевизүүдийг олон нийтийн ба арилжааны хэмээн хоёр ангилж болно. Энэ нь манай телевизийн салбарт МҮОНТ Мерседес Бенц хосгүй сайн, чанарын эталон гэсэн үг хараахан биш. Гэхдээ МҮОНТ дэлгэцэн дээр үзэгдэхгүй бол бүгд нэхнэ, харин аль нэг арилжааны телевиз алга болчихвол тэгтлээ сүйд болохгүй. Цаана нь дахиад 10 тийм телевиз үлдэх юм чинь…

Би яагаад үүнийг хэлж байна вэ гэвэл хэдхэн хоногийн өмнө Монголын телевизүүдийн холбооны 2008 оны шилдгийн шилдгийг шалгаруулах “Алтан шонхор” шагнал гардуулах ёслолын ажиллагаанд МҮОНТ-ийнхэн оролцоогүй, 17 номинацийн алинд ч нэвтрүүлэг ба уран бүтээлчдээ дэвшүүлээгүй ажээ. Гэтэл ноднин МҮОНТ-ээс нэр дэвшиж зарим нь шалгарч ёслолын ажиллагааг хөтөлсөн МҮОНТ-ийн сэтгүүлч Ш.Гүрбазар телевиздээ ногдсон “Алтан шонхор”-ыг гардаж байсан санагдана. Энэ жил юу болов? МҮОНТ-ээр “Алтан шонхор”-ын талаар мэдээлсэн ч үгүй. Энэ бүхэн тусдаа ярих сэдэв байх.

Яг өнөөдөр Монголын телевизүүдийн холбоо бол арилжааны телевизүүдийн холбоо юм байна (C1, ТМ телевизүүд ч үзэгдсэнгүй). Тэгэхлээр “Алтан шонхор” бол арилжааны телевизүүдэд  хамаатай шагнал гэж ойлголоо.

Бас нэгэн зүйл. 2008 оны “Алтан шонхор” шагнал гардуулах ёслол өнгөрсөн долоо хоногт буюу 12-р сарын 26-ны Баасан гаригт болжээ. Гэхдээ “Өнөөдөр” сонин өөрийн “25-р суваг” телевизийнхэн ямар шагнал хүртсэнийг түрүүлж зарласныг эс тооцвол хэвлэл мэдээлэл таг дуугүй хүлээв. Телевизүүд товч мэдээлэхээс хэтрээгүй бөгөөд үзэгчид бараг юу ч мэдэлгүй хэд хоносон гэхэд болно. Сонин байгаа биз? Ямар нэгэн үйл явдал зөвхөн телевизээр гарсан цагт сая үйл явдал болдог ажээ. Хэрвээ гараагүй бол болоогүй мэт.

Ингээд арилжааны телевизүүд бүтэн дөрөв хоногийн пауз авч байгаад өчигдөр буюу 30-ны Мягмар гаригийн орой 22 цагаас “Алтан шонхор” наадмын тухай нэг ижил нэвтрүүлгийг  бэлтгэн TV5, TV9, 25-р суваг, TV8, НТВ, SBN, “Ийгл” телевизээр нэгэн зэрэг цацлаа.

(Миний хувьд оройтоод хальт харлаа. Өнөөдрөөс бүтнээр олж үзээд шагналтнуудын талаар товч тайлбар хийхээс).

Posted in + ТЕЛЕВИЗ, МСНЭ, мэргэжлийн байгууллагууд, Монголын Үндэсний Олон Нийтийн Телевиз | Leave a Comment »

Монголын хамгийн шилдэг олон нийтийн телевиз болон бусад

Posted by Ажиглагч on 2008/12/24

Хэд хоногийн өмнө МСНЭ-ээс хэвлэл мэдээллийн салбарын 2008 оны шилдгүүдийг зарлажээ. Тус эвлэлийн ерөнхийлөгч Д.Сарангэрэлийн хувийн TV5 телевизээр хэд хоног сүйд болов. Уг нь сэтгүүлчдийн байгууллага сайн сэтгүүлч юмуу нэвтрүүлгийг шалгаруулбал илүү зохих боловч шунаад шилдэг телевиз, радио, сонин, сэтгүүл гэж байгаад яг эздийн байгууллага мэт аашилжээ. Энд гайхаад байх явдалгүй, ерөөсөө МСНЭ бол хэвлэл мэдээллийн эзэд, дарга нарын эрх ашгийг түрүүнд тавьсан байгууллага юм. Шалгаруулалт нь бас тийм. Үүнийгээ далдлах гэж “Монголын сэтгүүлчдийн мэргэжлийн дээд байгууллагын удирдлага шалгаруулалтыг уншигчид болон сэтгүүл зүйн мэргэжлийн судлаачдын санал, дүгнэлтэд үндэслэн хийснээ тэмдэглэж байсан” тухай мессеж хаяв. Хэзээ, хаана, ямар санал асуулгыг уншигчдын дунд явуулж хэдэн хүн оролцсон, бас хэн хэн гэдэг судлаач саналаа өгснийг бүү мэд.

Өдөр тутмын шилдэг сонин – “Өнөөдөр”:

Хэрэв сэтгүүл зүйн талаас нь авч үзвэл тус сонин 2008 онд харьцангуй төв байр сууриа алдаж УИХ-ын сонгуулийн сурталчилгааны үеэр төдийгүй түүний өмнө ба хойно хэнд үйлчилж давхих болсныг бүгд харсан. Тэгэхлээр МСНЭ-ийг ивээлдээ авсан Монгол Улсын Ерөнхийлөгч Н.Энхбаярт ирэх жил саад хийхгүй гэж амалсан Ерөнхий сайд С.Баярын ивээлийн сонинг шалгаруулахгүй байж болох уу? Бусад орных шиг гонжийсон нарийн форматаар хэвлэгдсэнийг хэвлэх үйлдвэрүүд, эсвэл сонины юмуу өдөрт тутмын сонинуудын холбоо дүгнэвэл хамаагүй дээрсэн.

Өдөр тутмын сонины шилдэг сэтгүүлч – Б.Нацагдорж (“Улаанбаатар таймс” сонин):

Олон жилийн туршлагатай сайн сэтгүүлч боловч хэн ч уншдаггүй энэ сонинд 2008 онд юу хийснийг нь үзэгчид байтугай “мэргэжлийн судлаачид” ч мэдэхгүй. Харин Ерөнхийлөгчийн тамгын газраас зохиолч, сэтгүүлч До.Чулуунбаатар тус сонины ерөнхий эрхлэгчээр томилогдон ирж, бас МСНЭ-ны удирдлагад гүйцэтгэх хорооны гишүүн нэрээр буцаж оронгуутаа сониноо өөд татахаар шийджээ. Ингэхдээ өөрийгөө мартаагүй бөгөөд Азийн сэтгүүлчдийн холбооны дэд ерөнхийлөгч нэрээр МСНЭ-ийн дээд шагнал – хүндэт медалиар энгэрээ цоолохыг эелдгээр зөвшөөрсөн байна. (Тэр Азийн сэтгүүлчдийн холбоо гэж юу болох, Чулуунбаатар хэнийгээ төлөөлж суудаг талаар мэддэг сэтгүүлч байна уу?)

Шилдэг телевиз – МҮОНТ:

Юугаараа? Энэ шагналыг авсан МҮОНТ-ийн захирал М.Наранбаатар өөрөө ч сайн ойлгоогүй, 2008 онд манайх техник тоног төхөөрөмжөө шинэчилсэн, бас манай телевиз улс төрчдөд ч үйлчилнэ, олон нийтэд ч үйлчилнэ хэмээн хадуурч харагдсан. Товчхондоо олон нийтийн телевиз учраас шалгарчээ.  Тэгвэл Монголын хамгийн шилдэг олон нийтийн телевиз гэвэл шулуухан бус уу? 2008 оны Монгол Улсын хамгийн шилдэг Ерөнхийлөгчөөр Н.Энхбаярыг, хамгийн шилдэг Ерөнхий сайдаар С.Баярыг шалгаруулснаас ялгаа юу байхав.

Телевизийн шилдэг сэтгүүлч – Э.Дагиймаа (TV5 телевиз):

УИХ-ын сонгуулиар нэр бүхий нэр дэвшигчдийн булхайг нуусан сурталчилгаа хийж өгсөн нь сэтгүүлч хүний хувьд ариун явдал уу? Тэрбээр энэ шагналыг авахад бэлтгэсэн мэт хэдхэн хоногийн өмнөөс тэртээ тэргүй 2 цаг үргэлжилдэг, бизнес мэдээгээр пиг дүүрсэн уртаас урт мэдээллийн хөтөлбөрийнхөө өмнө “Зохиогчийн хөтөлбөр” гэгчээр урьдчилаад 30 минут хоосон чалчдаг болсон юм. Ямар азаар телевизийн удирдлага гэж сайхан юм байдаг байна аа. (Сарангэрэл эзнийг нь хэллээ гэж андуураад магтаад эхлэв ээ! Remote Control буюу алсын удирдлагыг хэлсэн юм шүү).

Монголын шилдэг хамгийн радио – MҮОНР.

Шалгаруулахын тулд хэн нэгэнтэй өрсөлдүүлэх хэрэгтэй. Гэтэл тусад нь шалгаруулсан FM-үүдээс өөр радиог хайгаад хайгаад олсонгүй. Тэгэхлээр МҮОНТ өөрөө өөртэйгээ ширүүн өрсөлдөөд ялалт байгуулжээ.

Радиогийн шилдэг сэтгүүлч – Ц.Түвшинзаяа (МҮОНР-гийн Хүүхдийн нэвтрүүлгийн редакц)

Би сайн мэдэхгүй ч сайн сэтгүүлч байх аа. Баяр хүргэе! Улс төрчдийн хувийн сэтгүүлч, эсвэл наймаачин-сэтгүүлчид бүгд телевиз, сонин руу хошуурдаг, иймээс өөрт чинь саад болоогүй байх. Гэхдээ захирал Б.Пүрэвдаш нь МСНЭ-ийн дээд шагналыг зүүхээ яаж мартахав.

Гэрэл зургийн шилдэг сэтгүүлч-Б.Бямба-Очир /”Өнөөдөр” сонин/:

7-р сарын 1-ны өдрийн жагсаал цуглааны үеэр даварсан этгээдүүдийн чулуунд өртөж хүнд гэмтэл авсан залуу сэтгүүлчид түргэн эдгэрэхийг ерөөх л үлдэж байна.

Хэвлэл, мэдээллийн хэрэгслийг дэмжигч шилдэг байгууллага-“Макс” групп, 

Хэвлэл, мэдээллийн хэрэгслийг дэмжигч шилдэг бизнесмэн-Ж.Оюунгэрэл /”Петровис”/:

Энэ хоёр номинац огт ойлгомжгүй. Хэрвээ өөрсдийн компани, бараа үйлчилгээний реклам сурталчилгааг хамгийн ихээр захиалж хэвлэл мэдээллээр гаргасан бол зүгээр л тэдний бизнесийн үргэлжлэл. Хэрвээ хэвлэл мэдээлэл юмуу сэтгүүлчид мөнгө төлж захиалга өгсөн бол огт өөр хэрэг. Ер нь Д.Сарангэрэл нарын эзэд МСНЭ-ийн эрх мэдлийг дахин авч тэдний өмнөөс төр засагт, бизнест хандаж тусламж дэмжлэг хүсээд байгаагийн цаана эх захгүй реклам сурталчилгаанаас олж байгаа тоймгүй их ашиг орлогоосоо сэтгүүлчидтэйгээ хуваалцах, тэдний нийгмийн асуудлыг шийдэхэд зориулахыг хүсэхгүй учраас тус байгууллагыг сэтгүүлчдийн өмнөөс дуугардаг ҮЭ болгохгүй гэсэн бас нэг шалтгаан бий.

Шилдэг салбар зөвлөл – МСНЭ-ийн Орхон аймгийн салбар зөвлөл:

Би МСНЭ-ийн дотоод ажлыг мэдэхгүй. Гэхдээ энэхүү салбарын нэг ид шид уулын баяжуулах “Эрдэнэт” үйлдвэрт байдаг нь эргэлзээгүй.

Шилдэг сэтгүүл – “Mongolian mining journal” сэтгүүл:

Миний мэдэхээр өнгөрсөн намар 2 дугаар хэвлэгдэж гарсан. Нэр нь хүртэл гадаад, нэг дугаарын үнэ 20 доллар учраас монголчуудад гэхээсээ илүү гадаадынханд зориулсан сэтгүүлийг тодруулжээ. Mongolian #1 magazine гэж өөрийгөө өргөмжилсөн Uptown-аас эхлээд 5 жил тасралтгүй гарч байгаа “Алтан гадас”, “Шинэ ертөнц”, бас “Цаг төр”, бас бус сэтгүүлийг өрсөлдүүлсэн болов уу? Заримынх нь “нам” таараагүй бололтой.

Шилдэг FM радио – Улаанбаатар радиогийн II суваг FM 101.7:

Саяын их хурлаар МСНЭ-ийн гүйцэтгэх хороонд багтсан “Улаанбаатар” радиогийн захирал, МАСЭХ-ны зүтгэлтэн У.Булганы бүтээсэн хамгийн эхний ажил. FM 101.7 бол түүний удирддаг (хувийн ч байж магадгүй) “Улаанбаатар” радиогийн мэдлийн хөгжмийн суваг билээ.

Тэр баярт үдэш дээрх шагналтнуудад хэн ирж баяр хүргэсэн (магадгүй шалгасан) гээч? Та зөв таажээ. Монгол Улсын ерөнхийлөгч Н.Энхбаяр.

Он хараахан дуусаагүй байна. Удахгүй болох телевизүүдийн холбооны “Алтан шонхор” шалгаруулалтыг илүү болно гэж найдья. Сүүлийн хэдэн өдөр телевизүүд дэлгэцэн дээрээ нэр дэвшүүлж байгааг харахад шилдэг найруулагч, зураглаач, хөтлөгч, мэдээллийн хөтөлбөр гэсэн номинацууд харагдаж байсан. Тодорхой учраас өрсөлдөөнтэй, иймээс шударга байх найдлагатай. Миний бодлоор, шилдэг мэдээллийн хөтөлбөрөөр TV9-ын “Энэ өдөр” бараг шалгарах байх. “Инфо” мэдээллийн сүлжээ нь тун давгүй. Шилдэг сурвалжлагч (зүгээр нэг “сэтгүүлч” биш ) шалгаруулбал, уул уурхай, байгаль орчны чиглэлээр ширүүн сурвалжлагуудыг бэлтгэдэг Отгон, газрын асуудлаар эрэн сурвалжилж байсан Отгонжаргал хоёрыг нэрлэе. Бусад телевизээс гэвэл “Ийгл”-ийн Батхишиг санаанд орж байна.

Posted in МСНЭ, мэргэжлийн байгууллагууд, Монголын Үндэсний Олон Нийтийн Телевиз | 5 Comments »

“Цагийн хүрд”-ийн сөрөг сурвалжлага

Posted by Ажиглагч on 2008/12/17

МҮОНТ-ийн “Цагийн хүрд” мэдээллийн хөтөлбөр “Бороо гоулд” компаниас гэнэт халагдсаны мөнгө олгохыг шаардсан ажилчдын эрх ашгийг хамгаалж тэндхийн ҮЭ-ийн хорооноос зарлан хийлгэсэн хэвлэлийн хурлыг сурвалжлан үзүүлэв. Бухимдсан ажилчид компаниа шүүмжилсэн нь ойлгомжтой. 

Бусад сувгуудаар үзүүлснээр бол, “Бороо гоулд” компанитай анх гэрээ байгуулахдаа тэнд ажиллах монголчуудынхаа эрх ашгийг бодолцохгүй яасан юм бэ гэсэн гомдлоо төр засагтаа хэлж байжээ. Тогтвортой байдлыг гэрээний уршгаар монголын хэдэн арван тонн алтыг Монголд бараг юу ч үлдээхгүйгээр гаргасанд тэр гэрээг байгуулсан хүмүүс өөрсдөө ч харамсаж явдаг билээ. Яахав, хэдэн монгол ажилчид гайгүй цалин авсан гэж тайвшруулдаг, гэтэл өнөөдөр алтыг нь аваад ажилчдыг нь гаргаад хаячихлаа. Бороогийн алтны нөөц дууссан, харин Гацууртын шинэ ордыг ашиглах гэрээ байгуулагдаагүй гэсэн шалтаг хэлдэг аж. Танай хохь гэсэн үг. 

Гэтэл “Цагийн хүрд” араас нь“Бороо гоулд” тийм хариуцлагагүй компани юм уу гэсэн асуулт тавиад “дээд зэргийн хариуцлагатай” гэж нотолсон сурвалжлага бэлтгэн үзүүлж байх юм. Үүний тулд Үйлдвэр, худалдааны яамны Геологи, уул уурхай, хүнд үйлдвэрийн газрын дарга С.Баттулгаар тухайн үеийн хууль тийм байсан юм чинь яая гэхэв хэмээн өмөөрүүлээд тус компанийн орон нутагт хийсэн ажил, хандив тусламж мэтийн буяны ажлыг баахан тоочиж сүүлдээ магтах үгээ шавхсан  бололтой саяхан болсон нэгэн тэмцээнд “Бороо гоулд”-ийн баг түрүүлсэн тухай олимп маягийн мэдээ дуулгаад өндөрлөв. 

Ийм “сайн” компанийн өөдөөс үг дуугарч зүрхэлсэн хүмүүсийг олон нийтийн  телевиз ийнхүү “будаа болгов”. Ажилчид хэвлэлийн хурал хиймэгц сөрөг сурвалжлагыг асар шуурхай бэлтгэн үзүүлсэн байна. Яаралтай захиалга орж ирсэн биз.

Уржигдар болсон үйл явдлуудаас Оюутолгой, Таван толгойн  хөрөнгө оруулалтын гэрээний асуудлаар хэд хэдэн иргэний хөдөлгөөнүүд хамтран хэвлэлийн хурал зарлаж хурц хурц мэдэгдлүүд хийснийг монголын телевизүүдээс зөвхөн “Цагийн хүрд” хав дарж өнгөрөөсөн билээ. 

Бас тэгээд олон нийтийн телевиз гээд байгаа…

Posted in Монголын Үндэсний Олон Нийтийн Телевиз | 14 Comments »

МҮОНТ, МҮОНР-г Интернэтээр шууд үзэж сонсож болно

Posted by Ажиглагч on 2008/12/08

nuonrt-internet-44

 Хоёр долоо хоногийн өмнө сэргэсэн МҮОНРТ-ийн http://www.mnb.mn сайт  тэргүүн нүүрэндээ хуучин мэдээтэй, телевизийн долоо хоногийн  хөтөлбөрийг эс тооцвол булангууд нь хов хоосон байгаа. Гэхдээ энэ  сайтаасаа бүх нэвтрүүлгээ ямар ч төлбөр хураамж нэхэхгүйгээр шууд  үзүүлдэг болжээ. Үүгээрээ нэвтрүүлэг болгондоо тоолуур тавьж мөнгө  нэхэж эхэлсэн, эсвэл Интернэт телевиз, live энэ тэр гэж худлаа залдаг  арилжааны зарим телевизийг давж гарлаа. Одоогоор UBS телевиз  нэвтрүүлгээ шууд гаргадаг ч гацаа ихтэй учраас “ядаргаатай” санагдсан. 

 Тэгвэл МҮОНТ-ийн хөтөлбөрийг ганц секундын саатлыг эс тооцвол ямар ч  гацаагүй тод сайхан гарахыг хэдэн оройн турш үзэж байна. Сайт хийдэг  сайн компанийг сонгож техникийн асуудлыг амжилттай шийдэв  бололтой. Мөн FM-ын 106.0 долгионоор явдаг Монголын үндэсний радио,  100,9 долгионы эзэлсэн P3 радиогийн нэвтрүүлгийг ч бас л шууд сонсгож  байна. 

 Ингээд МҮОНРТ яг өнөөдөр Интернэт радио, телевиз болчихсон байна. Татвар төлөгчдийн мөнгөөр бэлтгэж байгаа нэвтрүүлгийг эздэд нь (дарга нарыг хэлээгүй юм шүү) ингэж үзүүлэхэд болохгүй нь юу байхав. Монголынхоо телевизийг зөвхөн Интернэтээр үздэг монголчуудад тун ч  хэрэгтэй.  Үүний зэрэгцээ “Гэрэлтэй цонх” хөтөлбөр гадаадад суугаа монголчуудын тухай булантай болсон байна.  

nuonrt-internet-14  nuonrt-internet-5nuonrt-internet-10  nuonrt-internet-8

P.S: МҮОНТ, радиогийн нэвтрүүлгийн сайн мууг  энд огт хөндөөгүй  юм шүү.

Posted in ИНТЕРНЭТ, ХАРИЛЦАА ХОЛБОО, Монголын Үндэсний Олон Нийтийн Телевиз | 6 Comments »

… Муу хууль байсан ч сайн ажиллаад явчихна …

Posted by Ажиглагч on 2008/12/07

МҮОНТ-ийн Бямба гаригийн “Ярилцья” нэвтрүүлгээр УИХ-ын гишүүн, ХЗДХ-ийн сайд Ц.Нямдорж оролцов. Энэ удаад би нэвтрүүлгийн тухайд биш, харин эрхэм сайд (эрхэм гишүүн + сайд)-ын ярьснаас үүдэн хэдэн үг бичив.  

tsnyamdorj-on-muontv-1 tsnyamdorj-on-muontv

 Тэрбээр Хууль, зүй дотоод хэргийн яаманд 2000 онд сайдаар очоод Монголд хууль ёсыг  тогтоож эхэлсэн, буцаад уначихсан байсныг энэ удаад ч бас босгож байгаа,  үүний тулд юунаас ч айхгүй тухайгаа ярилаа. Бас завсраар нь 2005 оны тавдугаар сард ерөнхийлөгчийн сонгууль эхлэх үед энэ Энхсайхан гэдэг этгээд Оюутолгойн асуудлыг, ашигт малтмалын асуудлыг улс төржүүлж эхэлсэн. Үүнээс болж гурван жил алдлаа. Нэг хүний хорлол багагүй гэдгийг харууллаа” гэж улс төрийн тавцангаас хэдийнэ арчигдаж сураг алдарсан тэр нөхрийн араас чулуу нүүлгэж амжлаа. Яасан тавьдаггүй хорсол вэ? (Хэдэн жилийн өмнө нэгэн охин гар утас хулгайлаад “Нямдоржийн”  гэгдэх эрүүгийн хуулиар 11 жилийн ял авсанд монгол даяар дургүйцэхэд таг дуугүй байснаа Ерөнхийлөгчийн өршөөлөөр суллагдсаны хэзээ    хойно “тэр чинь давтан хулгай хийсэн юм чинь” гэж байнгын хорооны хуралдаан дээр ярьж суусан билээ. Ая нь таарвал буцааж хийхнээ). Бас Америкт ерөнхийлөгч нь голдуу хуульч байдаг гэж нотлов. Барак Обама хуульч байж түүнийг зоригжуулсан хэрэг. Одоо Нямдоржоос өөр Монголын ерөнхийлөгчид таарах хүн алга аа… 

 За, тэр яахав. Монголд хууль яагаад хэрэгжихгүй байгаа, ялангуяа сонгууль будилсан талаар төрийн хуулийн бодлогыг авч явдаг сайдын байр суурь надад сонин байсан юм.   

Ц.Нямдоржийн ярианаас ишлэл: 

Улс төрийн соёл гэдэг юм руу орох гэж байна. Манайд төрийн ажлыг ном журмынх нь дагуу хийж чадахгүй байна. Манай хуулийн орчин муу биш шүү. Гагцхүү ёс суртахуун, тэр хуулийг нь хэрэгжүүлж байгаа гол хүмүүс, улс төрийн гол хүчин хуулиас өөр байх [?] юм бол нэмэр байхгүй… Хуулийн цаана ёс суртахуун гэж нэг юм байна

 Араас нь хөтлөгч Мөнхтөр “сонгууль будилсныг хууль руу чихэж байна, муу хуультай учраас сонгуулиа хийж чадахгүй байна” гэсэн асуулт дэвсэж өгөхөд,  

Тэр бол ажлаа хийж чадахгүй байгаа хүмүүсийн хэлдэг үг. Сая хотын сонгууль дахихад арилжаа, бар дэлгүүрүүдээ ажиллуулахаа болиход санал авах өдрөө 51 хувь бүрдчихх байсан. Сая хүрлээ. Зохион байгуулбал болж л байгаа биз. Ард түмэн сонгуульд ирж байгаа биз…  Хууль дээр алхам тутмыг бичүүлэх гэж оролдоод байдаг. Алхам тутмыг бичүүлэх хуульчийн ерөнхий сэтгэлгээ хуулийнхаа ерөнхий онолыг дагасан ерөнхий сэтгэлгээний задрал гэж юм байдаг, тэр нь задраагүй байна. [Эрхэм сайд дэндүү цэгцгүй ярих юм. Бага сага найруулаад ч нэмэр алга. Өмнөөс нь бичилтэй биш-Д.Ц.] … Жишээ 25-р тойрог дээр гарсан маргаан хагас жил боллоо,  эхний гурав нь гарцаагүй ялсан юм чинь өргөн барьж болно оо доо. Би энэ санааг хэлээд байгаа… Тэгэж чадахгүй  дандаа хууль руу дайрдаг… Сэтгэлгээний задрал … Хуулийн орчин муу байж болно.  Самбуу гуай шиг, Эрдэнэбатын Оюун гуай шиг ийм хүмүүс их хуралд сууж байвал хууль муу байсан ч сайн ажиллаад явчихна. Мянган  сайн хууль бичиж өгөөд, бүр цэг таслалаар нь зааж өгөөд ч ёс суртахуунгүй гишүүн, сайд ч байсан, агентлагын дарга ч байхад  хэцүү… Төрийн том ёс суртахууны асуудлыг би ирэх дөрвөн жилд хоёр нам хамтраад засаг барьж байгаа дээр сайн бодоосой гэж хэлэх гээд байна…  гэхчлэн цааш үргэжлүүлэв.

Сайдын хэлснээр бол Монголын хуулиуд маш сайн ч юм шиг, тэгснээ муу байсан ч хамаагүй юм шиг, гагцхүү улс төрчид ёс суртахуунтай л байвал болох юм гэнэ.  Хууль зүй биш, Ёс суртахуун, дотоод хэргийн сайд гэлтэй. Тэгвэл ерөнхийлөгч нь хуульч байдаг АНУ-д, эсвэл Энхсайхан гэх мэтийн “ёс суртахуунгүй” улс төрчгүй бусад улс орнуудын хуулиуд нь яагаад “алхам тутмыг бичсэн” байдаг юм бол? 

2008 оны УИХ-ын сонгууль ерөнхийдөө шударга болсон байж таарна. Хоёр гурван жилийн өмнө Нямдорж УИХ-ын дарга байхдаа удирдаж, бас “сэмхэн” засаж сайжруулсан УИХ-ын сонгуулийн хууль чухамдаа энэ “алхам тутмыг” зааж өгөөгүй учраас эцэс төгсгөлгүй маргаан. Орон нутгийн сонгуулийн хууль ч мөн адил.  Бараан зах, баар савыг хааж байж ирц хүргэнэ гэсэн заалт хаа ч байхгүй. Эсвэл хууль бусаар хааж байж ирц хүргэв үү? Бас нэг будлианы сэжүүр.

Эрхэм гишүүд өөрсдийгөө өмгөөлөн СЕХ-ны дарга Д.Баттулга, нийслэлийн сонгуулийн хорооны дарга Ц.Болдсайхан хоёрыг яллаж, Төрийн ордонд авчран загнаж, бухимдсан иргэд, залхсан сэтгүүлчид гал дээр тос нэмж давхиад байгаа болохоос биш сонгуулийн хууль “шүүрэн шанага” гэдэг бол ортой.  Төрийн эрх мэдлийн төлөөх улайрсан тэмцлийг ямар ч эргэлзээ төрүүлэхгүйгээр зохицуулахад эдгээр хуулийн чадал хүрэхгүй байгааг бид энэ зунжин, намаржин харлаа. Шүүх хүртэл шийдэж чадахгүй байна.   

Ардчилал бол процедур гэж хаа нэгтээ уншсан санагдана. Ягштал бодож тогтоосон хууль журмыг дагахыг хэлнэ. Тэгвэл өнөөдрийн хуулиуд аль социализмын үеийн Октябрийн баярын уриа лоозон шиг ерөнхий санагдах боллоо. Социализм, МАХН энэ тэр гэсэн үгийг хасаад жишээ татвал: “Нөхөд өө! Хууль  ёсыг хэлбэрэлтгүй сахин биелүүлцгээе!”, “Улс төрийн соёлтой байцгаая!” гэх мэт. 

Нямдорж сайдын яриагаар бол Монголын хуулиуд  сэвгүй ажээ. Өөрөө “засаж янзалсан” болохоор аргагүй ээ. Одоо зөвхөн улс төрийн соёл, сэтгэлгээний задралыг шаардаж, цаг гарвал Энхсайханыг ээлжит удаагаа муулж суух бололтой. Саяхан яамных нь Нээлттэй хаалганы өдрөөр хэдэн хөгшдийг дагуулан очиж уйлсны төлөө Баасан гэдэг эмэгтэйг 14 хоног бариулж хорьсон байх юм.  

Мөн ч өндөр улс төрийн соёл шүү…

Posted in Монголын Үндэсний Олон Нийтийн Телевиз, Улс төр, эдийн засаг | 7 Comments »

Олон нийтийн телевизэд онц эрхтэй нэр дэвшигчид

Posted by Ажиглагч on 2008/11/29

Нэр дэвшигчдийн эх захгүй их мөнгө хажуугаар нь урсаж арилжааны телевизүүд рүү цутгахыг МҮОНТ хэдэн өдрийн турш хараад “тэснэ тэснэ гэхэд яаж тэсэхэв” гэгчээр өчигдөр буюу сонгуулийн сурталчилгааны сүүлчийн орой хэдэн төгрөг хийхээр шийджээ.   

20  цагийн “Цагийн хүрд” мэдээллийн хөтөлбөрөөр  Улаанбаатар хотын хөрсний бохирдлыг багасгахын тулд хууль эрх зүйн орчинг шинэчлэх хэрэгтэй хэмээн “Ногоон бүс, экологи” ТББ үзэж байна гээд тус байгууллагын тэргүүн Ганбатыг яриулсан сурвалжлага үзүүлэв.  Өмнөх санал хураалтын өмнө буюу 10-р сарын 10-нд “Цагийн хүрд”-ийн “Өнөөдрийн сэдэв”-ээр студэд уригдаж чадсан овсгоотой нөхөр мөн байна.  Хэрвээ би эндүүрээгүй бол Сонгинохайрхан дүүргийн ИТХ-ийн сонгуульд нэр дэвшээд яваа.

Дараачийн сурвалжлага Дэлхийн банкнаас зохион байгуулсан олон улсын 10-р бага хуралд ХАС банкны гүйцэтгэх захирал Ч.Ганхуяг оролцож үг хэлсэн тухай байж тэр үгийг хэлсэн тухай нь үг хэлүүлэв.  МҮОНТ-ийн хувьд онцгой эрхтэй энэ залуу нийслэлийн ИТХ-ын Сүхбаатар дүүрэг дэх 9-р тойрогт бие даан нэр дэвшиж байгаа. Намын гишүүн биш ч гэсэн мөнгөтэй, мөнгөтэй төдийгүй МҮОНТ-д зээл сурталчилгаагаар тусалж байгаа гэсэн.

muont-oron-nutgiin-songuuli-hasbank-ganhuyag12 

Араас нь Замын-Үүдэд  вагоны эргэлтийг сайжруулсан учраас ачаа саатахаа больсон тухай яаралтай мэдээлэв. Орон нутгийн сонгуультай ямар ч холбоогүй сурвалжлага уу гэтэл  нийслэлйн ИТХ-ын Баянгол дүүрэг дэх 4-р тойрогт нэр дэвшигч В.Отгондэмбэрэл Улаанбаатар төмөр замын дарга нэрээрээ гарч ирээд  контейнер энэ тэрийн талаар ярих нь тэр. Өмнөх санал хураалтын өмнө бас л энэ студэд уригдан ирж төмөр замын ажлын талаар ярьж суусан билээ. 

muont-oron-nutgiin-songuuli-otgondemberel

“Монголын мэдээ” агентлаг  ганц хөтөлбөрийн туршид гурван нэр дэвшигчийг “амжуулсан” нь багадаад сурталчилгаа дуусахын өмнөхөн “Үдшийн  мэдээ”-ндээ дахиад нэгийг нэмлээ. Тэр нь нийслэлийн ИТХ-д Баянгол дүүрэг дэх 4-р тойрогт МАХН-аас  нэр дэвшигч, тус дүүргийн Засаг дарга Л.Амгалан байв. “Нийслэл хотын хөгжлийн илэрхийлэл болсон Баянгол дүүргийн иргэдэд шинэ боломж нээгдэж байна. Тэд хөгжлийн гарцаа хэлэлцэх нэгэн чуулганыг удахгүй зохион байгуулах гэж байна… ирэх сарын 12-нд “Баянгол-түншлэл” чуулган зохион байгуулах меморандумд тус дүүргийн Засаг дарга Амгалан гарын үсгээ зурлаа” гэсэн утгатай сурвалжлага юм. Мэдээж Амгалан даргыг заавал яриулж “Та санал бодлоо хороон даргадаа хэлбэл 2012 он хүртэл хэрэгжих Засаг даргын мөрийн хөтөлбөрт тусах юм байна”  гэж төгсгөв. Тэр хүртэл Засаг дарга хэн байх ёстойг ойлгов уу?  

 muont-oron-nutgiin-songuuli-lamgalan2  muont-oron-nutgiin-songuuli-lamgalan

МҮОНТ-ийнхэн халтур хийсэн, эсвэл “Цагийн хүрд”-ийг бэлтгэдэг “Монголын мэдээ” агентлагын захирал Д.Энхтуяа албан тушаалаа ашиглан өөрийн намын нэр дэвшигчийг дэмжсэн гэж ойлгогдлоо. Мөнгө төгрөг авалгүй өгөөмөр загнасан ч байж мэднэ. Тэд хоёулаа МАХН-ын дэргэдэх Монголын ардчилсан социалист эмэгтэйчүүдийн холбооны зүтгэлтнүүд юм.

Posted in 2008 оны Орон нутгийн сонгуулийн сурталчилгаа, Монголын Үндэсний Олон Нийтийн Телевиз | 1 Comment »

МҮОНТ дахин санал хураалтын өмнө хуучнаа эхлэв

Posted by Ажиглагч on 2008/11/28

Орон нутгийн сонгуулийн  дахин санал хураалтын өмнө намууд болон нэр дэвшигчид эх захгүй сурталчилгаагаа сэргээсэн бол МҮОНТ бас л хууль зөрчиж хэдэн төгрөг олж байна. 

Өчигдрийн жишээ. 2008 оны 11-р сарын 27-ны “Цагийн хүрд” мэдээллийн хөтөлбөрөөөр аж үйлдвэрийн технологийн парк байгуулах явдал чухал ач холбогдолтой гэсэн тайлбар үзүүлэв.  Цаасан дээрх төслийн тухай юм байна. Аж үйлдвэрийн технологийн паркийн консорциум гэж байгууллагын ерөнхийлөгч Энх-Амгалан гэдэг залуу хоёр удаа гарч ирээд хууль эрх зүйн орчин хэрэгтэй тухай ярив. Гэтэл яг энэ сурвалжлагыг өмнөх санал хураалтын өмнө буюу 10-р сарын 6-нд  “Цагийн хүрд”-ээр үзүүлсэн билээ. Яагаад давтав? “Таван эрдэнэ” компанийн захирал, нийслэлийн ИТХ-ын Хан-Уул дүүрэг  дэх 13-р тойрогт МАХН-аас нэр дэвшин өрсөлдөж байгаа “Таван эрдэнэ” компанийн захирал  Б.Энх-Амгаланд МҮОНТ-ээр дахин гарч өөрийгөө рекламдах хүсэл төржээ. Мөнгөтэй хүн хүсвэл МҮОНТ хэзээд бэлэн. 

muont-iin-tsagiin-hurd-benkh-amgalan

Дараачийн сурталчилгааг шөнө дундаас хойш үйлдэв. “Гэрэлтэй цонх” хөтөлбөрийн  “Үдшийн зочин” ярилцлагад  Нийслэлийн ИТХ-ийн  сонгуульд Хан-Уул дүүрэгт МАХН-аас нэр дэвшигч, “Орхон” их сургуулийн захирал Н.Хажидсүрэн оролцож 10 минутийн турш сургааль айлдав. Хүмүүүс унтаж амрах гэж байхад шүү. Намайг сонгоорой гэж хэлэхээсээ ичсэн биз. 

muont-iin-gereltei-tsonk-hajidsurengiin-surtalchilgaa2  muont-iin-gereltei-tsonk-hajidsurengiin-surtalchilgaa11

Хууль сануулья.  Орон нутгийн хурлын сонгуулийн тухай хуулийн 30-р зүйлийн 9-р заалт  “Олон нийтийн радио, телевизээр орон нутгийн Хурлын сонгуулийн аливаа сурталчилгаа явуулахыг хориглоно гэсэн  бол Олон  нийтийн радио, телевизийн тухай хуулийн 13-р зүйлийн 1-р заалтад Олон нийтийн радио, телевизээр арилжааны болон далд зар сурталчилгаа нэвтрүүлэхийг хориглоно” гэжээ. 

МҮОНРТ-ийн томчууд болон тэдний өгсөн үүргийг дуулгавартай биелүүлдэг сурвалжлагч байтугай зургаан настай сурагч хүртэл “б-о-л-о-х-г-ү-й” гэж үсэглээд ойлгомоор тодорхой байгаа биз?

Posted in 2008 оны Орон нутгийн сонгуулийн сурталчилгаа, Монголын Үндэсний Олон Нийтийн Телевиз | Leave a Comment »

www.mnb.mn сэрэв

Posted by Ажиглагч on 2008/11/26

МҮОНРТ-ийн http://www.mnb.mn сайт 2008 оны 1-р сарын 14-нээс хойш шинэчлэгдэлгүй бүтэн жилийг үдэх шахсанаа сая сэргэж ажиллаж эхэлсэн байна. Одоогоор эхний нүүрний хэдэн мэдээ, нэвтрүүлгийн хөтөлбөрийг эс тооцвол бусад хуудсууд хов хоосон байна. Бас МҮОНТ-ын нэвтрүүлгийг шууд үзүүлж байсан боловч сүүлдэээ гацаад таг болчихов.  

Өнөөдөр UBS, TV5, TV9, 25-р суваг, НТВ гээд арилжааны гол гол телевизүүд аль эрт сайтаа байгуулж түүгээр дамжуулан өөрсдийгөө сурталчлаад зогсохгүй мэдээлийн хөтөлбөр, нэвтрүүлгээ зарж мөнгө олж эхэлсэн билээ. Тэгвэл олон нийтийн телевизэд сайн сайт хэд дахин илүү хэрэгтэй.

Олон нийтийн радио, телевизийн тухай хуулинд “МҮОНТ нь үйл ажиллагааныхаа дэлгэрэнгүй тайланг өдөр тутмын сониноор, эсхүл нийтэд хүртээмжтэй бусад хэлбэрээр мэдээлэх бөгөөд тайланд дараахь мэдээллийг тусгана:
6.1.1. олон нийтийн радио, телевизийн хөтөлбөрийн бодлогын хэрэгжилт, нэвтрүүлгийн хөтөлбөрүүдийн тухай мэдээлэл;
6.1.2. санхүүгийн жилийн тайлан, аудиторын дүгнэлт;
6.1.3. олон нийтийн радио, телевизийн Ерөнхий захиралтай байгуулсан гэрээний хэрэгжилт;
6.1.4. ирэх жилийн зорилт, хөтөлбөрт оруулах өөрчлөлтийн талаархи санал;
6.1.5. сонсогч, үзэгчдийн санал, хүсэлт, гомдлын талаархи мэдээлэл, тэдгээрийг шийдвэрлэсэн байдал
” гэж заасан байдаг.

Ийм тайлан өдөр тутмын сонинд нэг удаа гарсныг би үзсэн, харамсалтай нь илтгэл, танилцуулга тал руугаа хэвийсэн, бас санхүүгийн жилийн тайлан, аудиторын дүгнэлт гэх хэлэхээр юм олдоогүй. Сонин дээр дэлгэрэнгүй гаргахлаар их мөнгө төлдөг гээд олон нийтийн мөнгийг хэмнэсэн бол сайтдаа тавьчихмаар.

Яг өнөөдөр жирийн үзэгчид, олон нийтийн зүгээс МҮОНТ-тэй холбогдолтой мэдээлллийг хүссэн цагтаа авах, нэвтрүүлгийн дэлгэрэнгүй хөтөлбөр, танилцуулгыг үзэх, бас тэднийг Үндэсний зөвлөлд хэн хэн төлөөлж “хаагуур, ямар юмаа хийж яваа”-г мэдэх боломж алга байна. Сайтын өмнөх хувилбар дээр “МҮОНТ-ийнҮндэсний зөвлөлийн дарга Х.Чилаажавын “Илгээлт” гэсэн их зантай мэндчилгээнээс өөр юу ч байгаагүй.

Одоо http://www.mnb.mn сайт МҮОНТ-ийг үргэлж ил тод байлгах цонх болоосой.

Posted in ИНТЕРНЭТ, ХАРИЛЦАА ХОЛБОО, Монголын Үндэсний Олон Нийтийн Телевиз | 5 Comments »

МСНЭ-ийн 3-р их хурал: TV5 хөөрч МҮОНТ бойкотлов

Posted by Ажиглагч on 2008/11/08

Сэтгүүлчдийн их хурлын талаар манай телевизүүд юуг мэдээлэв? Ихэнх нь “хаяагаа хадрахгүй” зарчмаар илүү дутуугүй сурвалжлаад өнгөрсөн. Харин хоёр телевиз тэс өөрөөр хандлаа. 

Оройн 18 цагт их хурал дуусаагүй үргэлжилж байсан ч TV5 телевизийн “Цаг” мэдээллийн хөтөлбөр МСНЭ-ийн их хурал 3-р их хурал хэмээх түүхэн үйл явдлын талаар дэлгэрэнгүй сурвалжлагаар эхэллээ. Ерөнхийлөгч, Ерөнхий сайд хоёр илгээлт явуулсан, гэхдээ сайд дарга нарыг уриагүй, иймээс сэтгүүлчид дангаараа толгойгоо мэдэж хараат бусаар хуралдсан гээд МСНЭ-ийн ерөнхийлөгч Д.Сарангэрэлийн илтгэлийн хэсгээс сонсгож дэлгэцэн дээрх танилцуулгаас ньүзүүллээ. Өнгөрсөн 3 жилд МСНЭ-дээ 45 сая төгрөг оруулсан, жишээлбэл  ДОХ-ын төслөөс 2 үе шаттайгаар 15 сая төгрөгийн төсөл харэгжүүлсэн, Их Монгол улсын 800 жилийн ойн арга хэмжээний төсвөөс 10 сая төгрөг авсан, мөн МСНЭ-ийг өөрийн байртай болгож тохижуулсан, Монголын сэтгүүлчдийн байгууллагын түүхэн тэмдэглэл ном гаргасан гэхчлэн тайлагнажээ. Бас Брюссель төвтэй ОУСБ-ын зарчмыг ямарч эргэлзээгүйгээр, ямар нэгэн далд эрх ашгийг бодохгүйгээр ажиллаж чадсандаа баяртай байна хэмээн тэр илтгэжээ. Араас нь Д.Амбасэлмаа, М.Зулькафиль хоёроор МСНЭ өнгөрсөн 3 жилд маш сайн ажиллласан гэж магтуулаад, төгсгөлд нь МСНЭ-ийн ерөнхийлөгчөөр Д.Сарангэрэл дөнгөж сая сонгогдсон баяртай мэдээг хамгийн түрүүнд хүргэлээ. Оройн 21 цагаас энэ сурвалжлагаа давтан үзүүлэв.  

TV5 телевиз ингэж хөөрөхөөс өөр яахав. Сурвалжлагын гол баатар бол өөрийнх нь эзэн. Яахав, ерөнхий зөвлөх гэсэн даруухан нэртэй. (Цаашдаа ерөнхий эзэн юм уу эзэн зөвлөх гээд нэрлэвэл ямар бол?)

Гэтэл Монголд хамгийн олон сэтгүүлч нэг дор ажилладаг төдийгүй улс оронд болсон үүнэс ч жижиг үйл явдлыг тэр орой сурвалжилсан МҮОНТ-ийн “Цагийн хүрд” мэдээллийн хөтөлбөр таг дуугүй өнгөрөөх нь тэр.  Магадгүй, их хурал оройтож тарсан учраас амжаагүй, эсвэл сурвалжлагч нь их хурлын зааланд ороод сэтгэл хөдөлж коктейльдоод саатчихсан, иймээс маргааш орой үзүүлэх биз гэж бодоод өнгөрөв.  

Гэтэл маргааш оройн “Цагийн хүрд“ сэтгүүлчдийн их хурлыг дахиад тоосонгүй. (Эсвэл өдрийн мэдээгээр мэдээлсэн байж болох. Үзсэн хүн байвал хэлээрэй)

МҮОНТ сэтгүүлчдийн их хурлыг мэдээлэхгүйгээр бойкотолсны жинхэнэ шалтгаан өөр байх. Ноднин МҮОНТ дотроо бужигнаж суулт өлсгөлөндөө хүрсэн тэр өдрүүдэд TV5 хэмээх арилжааны телевизийн эзэн Д.Сарангэрэл МСНЭ-ийн ерөнхийлөгч нэрээр давхиж ирээд нэмж бужигнуулсны хариуг жилийн дараа барив бололтой. 

Нэг телевизийн, тэр тусмаа олон нийтийн телевизийн дотоод хэрэгт нөгөө телевизийн эзэн оролцохыг эсэргүүцэх нь түмэн зөв.  Гэхдээ  Д.Сарангэрэлийн Брюссель төвтэй ОУСБ-ын зарчмыг ямарч эргэлзээгүйгээр, ямар нэгэн далд эрх ашгийг бодохгүйгээр ажиллаж чадсан гэж худлаа ярьснаас эхлээд сэтгүүлчдийн даргаар өөрийгөө дахиад сонгуулсан зэргийг нь илчилж сурвалжилсан бол дээр байж. Юуны тулд шударга үнэнийг эрэлхийлж бүх нийтэд хэлэх үүрэгтэй олон нийтийн телевиз билээ? Тэр тусмаа сэтгүүлчид нь төлөөлөгчөөр оролцоод байхад.

Posted in + ТЕЛЕВИЗ, МСНЭ, мэргэжлийн байгууллагууд, Монголын Үндэсний Олон Нийтийн Телевиз, TV5 телевиз | 7 Comments »

Т.Билэгтийн дэглэсэн жүжигт МҮОНТ сайн тоглож байна

Posted by Ажиглагч on 2008/11/05

15-р хорооллын хөл бөмбөгийн талбай буюу “Найрамдал” цэнгэлдэх хүрээлэнг устгаж орон сууцны  хороолол барих газар олгосон  захирамжийг цуцлах шийдвэрийг Нийслэлийн Засаг дарга Т.Билэгт хагас жил цааргалж байж сая нэг гаргасан боловч түүнийгээ үнэхээр хэрэгжүүлэх эсэх нь мэдэгдэхгүй, доод албан тушаалтнуудынхаа араар нуугдчихаад байгаа билээ. Өмнөх Засаг дарга Ц.Батбаярын захирамжийг цуцлана гэдэг бол алдаа гаргасныг нь хүлээн зөвшөөрнө, түүнийг Засаг дарга байхад нь “жа” хэмээн алгаа хавсарч бөхөлзсөн хот төлөвлөлт, газрын алба, мэргэжлийн хяналтын албан тушаалтнуудыг буруутгана, тэгээд эхний барилгуудаа эхэлчихсэн хятад компанид асар их нөхөн төлбөрийг хаанаас гаргах асуудлыг шийднэ гэсэн үг. Юуны тулд тамга атгасан Засаг дарга билээ. Хэрвээ чадахгүй бол үүнийгээ хэлээд огцорсон ч яахав. Даанч Билэгт дарга сүр бараатай сайхан эр боловч дэндүү хулчгар ажээ. Монгол эрчүүдийн чанар үнэхээр мууджээ. 

Үүнийг анзаарсан “Зүүн Ази хөгжил” компанийн хятад эздийн TV9 телевиз рүү яаралтай илгээсэн гүйцэтгэх захирал ба хуулийн зөвлөх гэсэн хоёр монгол Билэгтийн захирамжийг баахан шоолж толгой сэгсрээд нийслэлчүүд буруу хүнийг Засаг даргаар тавьсныг анхааруулж цаашид сонголтоо зөв хийж байхыг уриалсан билээ. Анзаарав уу? Бидний сонголт буруу болохыг Хятадын компани хэлж өгдөг болжээ. Аргагүй ээ, бид өөрсдөө сонгож чадаагүй юм чинь. Удалгүй сонгоод өгөх биз… 

Ерөнхийлөгчийнхөө телевизээр ингэж муухай хэлүүлсэн ч “буруу сонголт” маань хариу барьсангүй. Харин хэд хоногийн дараа “Ийгл” телевизийн сурвалжлагч түүнийг ямар нэгэн арга хэмжээний үеэр тосч уулзаад захирамжийнх нь талаар асууж амжжээ. Билэгт дарга шууд л “Нийслэлийн ИТХ-аас өгсөн үүрэг учраас би захирамж гаргасан” гэж амиа аврангуутаа “миний зарчмын байр суурь бол байшингуудын дунд салангид газар олгохгүй, орон сууцыг хорооллоор нь бариулна, иргэдийнхээ эрх ашгийн төлөө ажиллана” гэж лоозогноод шууд цааш эргэж дараачийн асуултаас бултаж одлоо.  

Одоо гол найдвар бол Билэгт дарга өмнөх сурвалжлагыг нь үзэж уяраад захирамжаа гаргасан гэдэгт үнэнээсээ итгэчихсэн МҮОНТ-ийн “Монголын мэдээ” агентлаг юм. Өчигдөр оройн “Цагийн хүрд” мэдээллийн хөтөлбөр ээлжит сурвалжлагаа “зөвхөн манай агентлаг сурвалжилсны ачаар олон нийт сайн мэдэх болсон 15-р хорооллын “Найрамдал”  стадионы тухай үзүүлье” гэж сагсуухан эхэлсэн ч барилгын ажил зогсоогүй үргэлжилсээр байгаа тухай гунигтай мэдээ дуулгаж нийслэлийн Засаг даргын шийдвэрийг хэрэгжүүлэх төрийн албан хаагч олдохгүй байна гээд Баянзүрх дүүргийн Засаг дарга, Нийслэлийн мэргэжлийн хяналтын газрын дарга хоёрын албан тушаалыг (нэрийг биш шүү!) дурдлаа. Тэднийг олоогүй бололтой (гэтэл яг тэр өдөр Баянзүрх дүүргийн Засаг дарга Мөнхбаатар МҮОНТ дээр өөрийн биеэр ирчихсэн, мэдээллийн төвд нь хэвлэлийн хурал хийлгээд явж харагдсан) НМХГ-ын улсын байцаагч Батхүү хэмээх жижиг түшмэлийг ээрч цаадах нь тэр барилгын барьж байгаа “Богд Ар” компанийн захирлыг урьж нүүр нүүрээ харж байгаад бичиг гардуулна гэж амаллаа. Гэтэл “Богд ар” бол зөвхөн гүйцэтгэгч билээ. Тэгэхлээр уг газрын эзэн “Зүүн Ази компани хөгжил” компанийн газрыг буцааж авах аргаа олохгүй баларч байгаа бололтой. 

Үнэхээр тийм үү? Газрын зөвшөөрлийг цуцалсан захирамжийн биелэлт 14 хоног саатсанд хэн буруутай вэ? Үүрэг буулгасан албан тушаалтнууддаа хариуцлага тооцохгүй юм уу? Барилгын ажил үргэлжилсээр байх юм бол нөхөн төлбөр өдөрт л сая сая саяар нэмэгдэж байгааг мэдэж байгаа юу? Эсвэл буулгах  аргагүй болтол бариулаад “Одоо өнгөрсөөн. Хүний өмчид халдаж болохгүй” аргаа  хэрэглэх гээд байна уу? гэх мэт асуултын хариуг зөвхөн Билэгт дарга өөрөө өгч чадна. 

Харамсалтай нь “Монголын мэдээ” агентлагийн сурвалжлагч энэ өдөр Билэгт даргыг өдөржин дагасан мөртлөө асууж зүрхэлсэнгүй. Үүний оронд түүнийг Баруун тасганы гэр хорооллыг барилгажуулах төслийн хүрээнд нэг байшин босгож байгаатай танилцсан, бас орчны газраа баталгаажуулж авсан СӨХ-өөр орж “Хотын Засаг дарга СӨХ-ийн дээд зөвлөлтэй гэрээ байгуулснаар орон сууцны дэргэдэх газрууд аврагдсан” талаар бахдан үзүүллээ. Дагалдаж явсан Нийслэлийн газрын албаны дарга Сундуйгаас ч асуусангүй. 

Билэгт дарга өрөөнөөсөө гарч, нийслэлийнхээ гадаа гандаж хөдөө хөхрөх энэ шоу 3 хоног үргэлжилнэ. Үлдсэн хоёр хоногт Билэгт дарга гэнэт зориг орж 15-р хорооллын тэр барилгын талбай дээр очиж захирамжаа өөрийн биеэр гардуулбал сайхан аа. Гэхдээ түүнийг очсон очоогүй хоёр хоног дагаж амнаас нь юу унахыг уралдан шүүрэх хэвлэл мэдээллийнхэн дундаас зориг гаргаж Билэгт даргаас шууд асууж хариу авч чадах сэтгүүлч олдох болов уу? Хэрвээ хариулахгүй зугатаад байвал эрэн сурвалжлаад үзээсэй. Гэхдээ “Монголын мэдээ” агентлаг шиг Билэгтийн бичиг хаана явааг 14 хоног хайж зарлаг хийхгүй юм шүү.   

Дуусаж өгөхгүй байгаа орон нутгийн сонгуульд зориулж Билэгт даргын дэглэсэн энэ жүжгийг дуусгах цаг болсон.

Posted in + ТЕЛЕВИЗ, Монголын Үндэсний Олон Нийтийн Телевиз, Нийтлэл, нэвтрүүлэг | 1 Comment »

Үндэсний телевиз нь TV9 юм шиг …

Posted by Ажиглагч on 2008/10/26

Манайд албан ёсоор үндэсний хэмжээний цорын ганц телевиз бол МҮОНТ билээ. Энэ нь нэвтрүүлгийн бодлого төдийгүй хамрах хүрээгээрээ ч хамаг Монголын телевиз гэсэн үг. Харамсалтай нь үүнийг зөвхөн сайд дарга нарыг хөдөө явахад дагаж, үгүй бол хааяа нэг сурвалжлах хэсэг илгээж “Эргэх дөрвөн цаг” нэвтрүүлгээр улиралд ганц эргэх харуулахаас хэтрэхгүй юм.  Тэгвэл сүүлийн үед  TV9 телевиз лав мэдээллийн хөтөлбөрөөрөө энэ статусыг илт булаацалдаж үдэш болгон давж гардаг болжээ.  

Өнгөрөгч Бямба гаригт л гэхэд тус телевизийн “Энэ өдөр” мэдээллийн хөтөлбөр орон нутаг дахь TV9 Инфо сүлжээний сурвалжлагчдаасаа орон нутгийн сонгуулийн дараа шинээр бүрэлдсэн Орхон, Дундговь аймгуудын ИТХ-уудын анхны хуралдааны тухай дүрстэй сурвалжлага хүлээн авч үзүүлэв. Тэнд МАХН АН хоёр ямар харьцаагаар ялж ялагдсан, ИТХ-ийн даргаар хэнийг сонгосон, мөн Засаг даргаар хэнийг сонгож Ерөнхий сайдад өргөн барьсныг үндэсний, олон нийтийн (бараг л иргэдийн гэсэн үг) телевизээс бус, арилжааны энэ телевизээс үзэж харлаа. Бас Хэнтий  аймгийн зарим суманд ямар шалтгаанаар санал хураалтыг хүчингүй  болгож сонгуулийн эцсийн дүн гацсаныг мэдэж авлаа. 

TV9 Инфо сүлжээ бол маш чухал санаачлага. Аймгийн төвд суугаа хэн нэгэн сэтгүүлчийг сонгож Улаанбаатарт авчирч семинардаад нэг нэг жижиг камер атгуулаад буцаахад л мэдээ сурвалжлага наашаа хөврөх нь тэр. Тэдний яриаг 24 цагийн турш утсаар хүлээн авч цаасан дээр буулгаад уншсан ч, эфирт цацсан ч өчүүхэн төдий саадгүй болжээ. Алганд багтах дүрстэй кассетийг өдөрт биш юм аа гэхэд маргааш, нөгөөдөр нь яаж ийгээд ирүүлчихнэ… 

Монголын хамгийн том телевиз байж МҮОНТ орон нутагт сурвалжлагч ажиллуулах нь үүрэг төдийгүй нэр төрийн хэрэг баймаар. Орон нутгаас мэдээ, сурвалжлага авах ажлыг зохион байгуулах хэцүү биш гэдгийг  TV9 гялалзтал харуулж эхэллээ.  Элдэв бэрхшээл тоочих, тэрбум тэрбум төгрөг нэхэх шаардлага огт алга. 

Инфо сүлжээгээрээ TV9 буюу TV90 телевиз маш том амбицтай гэдгээ цухалзуулж байж мэдэх. Гэтэл МҮОНТ-ийн “Эргэх дөрвөн цаг” дэндүү удаан байна, өнөө цагт хөдөө нутгаа 24 цаг тутам эргэж байсан ч болмоор…

Posted in + ТЕЛЕВИЗ, Монголын Үндэсний Олон Нийтийн Телевиз, TV9 телевиз | 3 Comments »

Сурвалжлагын үр дүнгээс хэзээ үр дүн гарах вэ?

Posted by Ажиглагч on 2008/10/24

Өчигдрийн “Цагийн хүрд” мэдээллийн хөтөлбөр “Бид газрын маргаантай холбоотой олон сурвалжлагыг та бүхэнд үзүүлж байсан” гэсэн оршилтойгоор 15-р хорооллын биеийн тамирын талбай дээр орон сууцны хороолол барьж байгаа тухай өнгөрсөн Бямба гаригийн сурвалжлагаа товчлон үзүүлээд, бидний сурвалжлагын үр дүн гарч өчигдөр нийслэлийн Засаг дарга бөгөөд Улаанбаатар хотын захирагч Т.Билэгт 515 тоот захирамжаар “Зүүн Ази хөгжил” компанийн газар эзэмших эрхийг цуцалж барилгын ажлыг зогсоон хөл бөмбөгийн талбайг сэргээхээр шийдвэрлэсэн тухай шинэ сурвалжлагаа үзүүлэв.

Сайхан аа! МҮОНТ ганц сурвалжлаад л нийслэлийн Засаг даргыг бөнжигнүүлж тэрхүү хөл бөмбөгийн талбайг бараг аварчээ. Одоо захирамжийг хэрэгжүүлэх л үлдэж. Сурвалжлагч нийслэлийн газрын албаны дэд дарга М.Буяндэлгэртэй уулзахад цаадах нь “газрын тухай хуулинд буруутай этгээдээр төлүүлнэ гэж заасны дагуу захиргааны арга хэмжээ авах тухай ярив. Өөрсдөө зөвшөөрөл өгчихөөд юу вэ? Эсвэл гарын үсгээ зурсан өмнөх Засаг дарга, одоо УИХ-ын гишүүн Ц.Батбаяр гэгч этгээдийг хэлэв үү? Нийслэлийн ерөнхий төлөвлөгөөг өөрчилж хөл бөмбөгийн талбайг орон сууц болгосны хариуцлагыг хэн хүлээх вэ? “Бид хуулийн дагуу зөвшөөрөл авсан тул заавал барина” гэж аль хэдийнэ мэдэгдсэн тэр компани шүүхэд хандаж олон сар жилээр сунжирсан зарга үүсгэнэ. Эрхбиш төр улстай юм байна, захиргаадаад ч хамаагүй зогсоож магадгүй, гэхдээ хуультай улс болохоор нэгэнт барьж эхэлсэн тэр олон барилгад нөхөн төлбөр өгнө? Хаанаас гаргах юм бэ? Дээрээс нь өөр газар олгож таарна. Хаана? Энэхүү газрын зөвшөөрлийг цуцлах талаар нийслэлийн ИТХ-ын тэргүүлэгчдийн тогтоол 4-р сарын 2-нд гарсан байхад яагаад хагас жил хүлээж барилгын ажлыг эхлэх боломжийг тэр компанид олгов?   

Энэ бүх асуултанд зөвхөн Т.Билэгт дарга өөрөө хариулж чадна. МҮОНТ-ийн сурвалжлагч түүнийг олж уулзахын оронд захирамжийг нь хаанаас ч юм үзэж баясаад нийслэлийн газрын албаны дэд дарга (ядахдаа жинхэнэ дарга нь биш) гэх мэт жижиг нөхдүүдийг дагаж шогшсон байх юм. МҮОНТ та өөрийгөө хүндлээч. Олохгүй байна уу? Билэгт дарга маань жанжин Сүхбаатарын талбайн чанх баруун талын хоёр давхар байшингийн хоёрдугаар давхарт баруун гар тийшээ эргээд суудаг юм шүү. 

Тэгнээ, өнөөдөр “Зүүн Ази хөгжил” компани барилгын ажлаа зогсоогоогүй төдийгүй Билэгтийн захирамжийг ч хүргүүлээгүй сураг дуулдана. Тэр хөл бөмбөгийн талбай хаана байдгийг бас заалгах гээд байгаа юм болов уу… 

Манай телевизүүд юу чаддагийг шалгах төстэй асуудал нийслэлд мөн ч олон бий. Туулын эрэгт ундны усны бүсэд тухалсан “Дүнжингарав” зах ч юмуу дархан цаазат тусгай хамгаалалттай Богд уулын Зайсангийн амыг дүүргэсэн бүхэл бүтэн хорооллыг нэгэнт өнгөрсөн учраас орхиё. Тэгвэл Гачууртад голын эргийг сэндийчээд орхисон гольфийн талбайг, эсвэл төмөр замын арктай шар байшингийн өмнөх 16 давхар барилгын суурь мэтийг очиж үзээд “сурвалжлагын үр дүн”-гээ гаргаасай. Цаашилбал, ахмадын холбооны балгас болсон байр гэж байна. Бүр ойрхон, Сүхбаатарын талбайн урд талын зориуд засалгүй үлдээсэн хэсгийг түүний өмнөх цэцэрлэгтэй хамт яах гээд байгааг Билэгт даргаас асуугаад үзээч. 

Энэ бүгдийг одоо л сурвалжлахгүй бол өнөөдөр Билэгт дарга нийслэлийн Засаг дарга байгаа дээрээ тэр газруудыг хэнд олгож ямар барилга бариулах тухай захирамжуудаа үйлдэж, нийслэлийн ерөнхий төлөвлөгөөг сэмхэн өөрчилж, бүх юмыг “хуулийн дагуу” тамгалж суугаа. Ирэх хавар хашаа босгож газар ухаад эхлэхэд “дутагдлын хажуугаар дуугүй өнгөрдөгггүй” шударга сэтгүүлчид давхиад очсон ч “сурвалжлагын үр дүн” гарахад нэгэнт хожимдсон байх болно.

Posted in + ТЕЛЕВИЗ, Монголын Үндэсний Олон Нийтийн Телевиз | 1 Comment »

Ц.Батбаяр, Г.Мөнхбаяр, Т.Билэгт гурвыг хэн “өшиглөх” вэ?

Posted by Ажиглагч on 2008/10/19

15-р хорооллын хөл бөмбөгийн талбай устахын ирмэгт тулж барилгын талбай болж хувирсан тухай “Ийгл” телевизийн хэлэлцүүлгийг үзээд МҮОНТ-ийн “Монголын мэдээ” агентлагын сурвалжлагч “дуугүй байж чадахгүй нь” гэдгээ зарлаж нэгэн сурвалжлага бэлтгэн “Цагийн хүрд”-ээр үзүүлэв. Газар дээр нь очиход хятад ажилчдаар дүүрсэн барилгын талбай угтаж монголоор хариулчих нэг ч хүн олдоогүй аж Гэхдээ “Ийгл”-ээр дэлгэсэн зарим баримтыг давтан дэлгэлээ. Яахав, “Ийгл”-ыг үзээгүй хүмүүс анх удаа мэдэж авсан биз.

Энд хөл бөмбөг, волейболын гэх зэрэг том жижиг 3 талбай байдаг ч хоосон газар байгаа мэт аашилж 2002 онд “Эрин интернэйшнл” компанид шилжүүлснийг ноднин хятадуудад 1,5 сая доллараар худалджээ. Харин “Цагийн хүрд”-ийн сурвалжлагч төрийн байгууллагууд дандаа буруу шийдвэр гаргаад байдаггүй гэсэн баяртай мэдээ дуулгаж, тухайлбал 2008 оны 4-р сарын 2-нд нийслэлийн ИТХ-ын дарга Г.Мөнхбаярын гарын үсэгтэй тогтоол гарч урьд олгосон захирамжийг цуцлаад энэ мэт зарим талбайг буцаан засаж тохижуулахад зориулж 976 сая төгрөгийг төсөвт суулгасан гэлээ.

Харамсалтай нь тэр тогтоол нь нийслэлийн удирдлагын зөв мэргэн шийдвэр гэхээсээ илүү УИХ-ын сонгуулийн өмнө сонгогчдыг хуурч мэхэлсэн хэрэг байж. Яагаад гэвэл ийм тогтоол гаргаснаа зарлахгүй нууцалсан. Бодвол хөл бөмбөгийн талбайг устгах анхны захирамж гаргасан өмнөх Засаг дарга Ц.Батбаяр УИХ-д яг тэр Баянзүрх дүүргээс нэр дэвшин сонгогдож амжихыг хүлээжээ. Удалгүй Монгол-Хятадын “Зүүн Ази хөгжил” компани барилгын ажлаа шууд эхэллээ. Гэтэл тогтоолыг хэрэгжүүлэх үүрэгтэй нийслэлийн Засаг дарга Т.Билэгт өөрөө барилгын суурь ухахыг иргэд эсэргүүцэн тэмцэж байгаа тухай сурвалжлагууд зунжин, намаржин телевизээр гарахад таг дуугүй суусан юм. Одоо ч амаа тас жимийсэн хэвээрээ.

Хэрвээ “Монголын мэдээ” агентлаг үнэхээр хүсч байгаа бол нэр нөлөөгөө ашиглаж нийслэлийн дарга нарыг олж  уулзаасай (“Ийгл-ээс зугатаад байна гэсэн). Тэрнээс биш “Хай, сайхан хоолны нэр хэлваа” гэдэг шиг сүртэй албан тушаал зүүсэн нэрүүдийг хоосон давтаад нэмэргүй. МҮОНТ-ийн сурвалжлагч очихлоор тэд дургүй байсан ч уулзана, гэхдээ мэдэн будилж толгой эргүүлэх нь мэдээж. Тэр тусам цааш эрэн сурвалжилж нийслэлийн  төв дэх хөл бөмбөгийн хамгийн сүүлчийн талбайг устгасны төлөө суудлаасаа онхолдтол нь “өшиглөмөөр”.

Манай телевизүүд ямар ч асуудал байсан бодлого, үзэл баримтлал, эрх зүйн орчин, хариуцлагын тогтолцоо гэх мэтээр том том яриа хэлэлцүүлэг өрнүүлж сурчээ. Харин үйл явдал, баримтын хойноос явахаас айдаг, яагаад гэвэл цаанаас том дарга нар гарч ирдэг. Тэгвэл “Ийгл” телевизийн спортын сэтгүүлчид Монголын хөл бөмбөгийн холбоо ба 15-р хорооллын хөл бөмбөгийн талбай  гэсэн тов тодорхой хоёр жишээг сонгож авч зад хэлэлцүүлэхэд л Ганболд, бас Ц.Батбаяр, Г.Мөнхбаяр, Т.Билэгт нарын эрх мэдэлтнүүд хэрхэн дур зоргоороо дургисны зах зух цухалзах нь тэр.

Цаашдаа манай үй олон чөлөөт телевизүүдийн яруу алдарт сэтгүүлчид дор дороо “нэг нэг юм” бодож, нийслэлд булаалгасан, одоо булаалгаж байгаа, хойшид ч булаалгах хүүхдийн тоглоомын, биеийн тамирын талбай юмуу цэцэрлэг болгоныг хэлэлцүүлэх эсвэл эрэн сурвалжлах кампани өрнүүлбэл ямар вэ?

Posted in + ТЕЛЕВИЗ, Ийгл телевиз, Монголын Үндэсний Олон Нийтийн Телевиз | Leave a Comment »

11,4 тэрбум төгрөг багадаад байна

Posted by Ажиглагч on 2008/10/13

Өнөөдөр УИХ-ын чуулганы нэгдсэн хуралдаан дээр Монгол улсын ерөнхий арбитрч Л.Жавзмаа хэлэхдээ, МҮОНРТ төсвөөс санхүүждэг мөртлөө дансаа арилжааны банкинд байршуулаад хяналтгүй зарцуулж байна гэж шүүмжлэв. Ноцтой баримт байна. Орой нь МҮОНТ өөрийн “Цагийн хүрд” хөтөлбөрөөр Жавзмаа даргын илтгэлийг ишлээд МҮОНРТ төсвийн мөнгөнөөс 91 сая төгрөгийг хэтрүүлэн зарцуулжээ  гэсэн өөр нэгэн баримтыг дурдлаа. Дутагдлаа дуугүй өнгөрөөгүй, зах зухаас хэлсэн нь овоо л доо. 

2008 онд улсын төсвөөс МҮОНТР-ийн захирлын мэдэлд 2008 онд 8.550 сая төгрөг, дээрээс нь Монгол улсыг хөгжүүлэх сангаас хөрөнгө оруулалтанд 2 тэрбум төгрөг, үндэсний төвийн барилгын дээврийн засварт 319,9 сая төгрөг, тоног төхөөрөмжинд 541,1 сая төгрөг, бүгд нийлээд 11,4 тэрбум төгрөгийг төсөвлөсөн нь багадаад  хэцүү байгаа бололтой. Ил далд сурталчилгаа, ивээн тэтгэлт, компаниудтай хамтран ажиллах гэрээний нууц орлогууд гэж бас бий…

Posted in Монголын Үндэсний Олон Нийтийн Телевиз | Leave a Comment »

Ирц хүрээгүй сонгууль ба хөдөөд хүрээгүй телевизүүд

Posted by Ажиглагч on 2008/10/13

Өчигдөр 2008 оны орон нутгийн хурлын сонгуулийн санал хураалтын өдөр байлаа.  

Санал хураалтын явцыг манай телевизүүд шуурхай сурвалжилж өдрийн турш байн байн мэдээлсэн бол “Ийгл” телевиз шууд дамжуулж байв. МҮОНТ ч гэсэн өдөр тийшээгээ нэг удаа шууд сурвалжлаад болив.

Энэ удаад нийслэлийн сонгогчдын ирц өглөөнөөс эхлээд маш бага байж, үдшийн 22 цагт санал авах байруудын хаалга хаагдахад хуулинд заасан 50 хувьд хүрэх эсэх нь энэ өдрийн ноцтой асуудал болж хувирлаа. Сүүлчийн эгзэгтэй энэ хэдэн минутийг “Ийгл” телевиз сонгуулийн нэгэн хэсгээс “яг одоо 21 цаг 59 минут” гэж байгаад хаалгаа барьж түгжихийг хүртэл шууд дамжуулсан ч ирц хүрсэн цөөхөн хэсгийн нэг байж таарав. Хэсгийн дарга нь ярилцлага өгч үүнийг хэлсэн. Хэрвээ ирц хүрэхгүй тэвдэж байгаа хэсгийн санал авах байрны уур амьсгал, шөнийн гудамжинд цагаан хоолойноос цуурайтах “Иргэд ээ! саналаа өгөөрэй” гэсэн ухуулга, сандран гүйлдэх хүмүүсийг харуулсан бол тун сонирхолтой байхсан. 

Маргааш өглөө нь МҮОНТ миний мэдэхээр сүүлийн жилүүдэд анх удаа Даваа гаригийн 9 цагт сэрж нэвтрүүлгээ эхэлсэн ба өнгөрсөн шөнө Нийслэлийн сонгуулийн хорооноос зарласан хэвлэлийн хурлуудыг мэдээлж бусад бүх телевизээс өрслөө. Болж л байна.

Гэхдээ үндэсний хэмжээний гэгддэг цорын ганц телевиз мөртлөө хөдөө орон нутаг дахь аймаг, сумдын иргэдийн хурлын сонгуулийн явц, тухайлбал ирцыг тусгайлан мэдээлсэнгүй. “Нэгдсэн дүн ирээгүй байна” гээд хааж байх юм. Монгол улс ганцхан Улаанбаатар биш. Нийслэл хотод 400 гаруй мянган сонгогч амьдардаг (ихэнх нь саналаа өгөөгүй) бол хөдөө орон нутагт бараг хоёр дахин олон буюу 900 шахам мянган сонгогчтой (ихэнх нь саналаа өгсөн) тул тэднийг тоохгүй орхиж болох уу? Ямар UBS биш. Хэрвээ ойрын аймаг руу “Ниссан”  хөлөглөөд давхихаас залхуураад байвал монголын бүх 21 аймаг, бараг бүх сумд руу Мобиком, Юнител, G-Mobile-ийн дуртай утсаа цохиж хүссэн мэдээлэл, ярилцлага авч, зарим нь уул давж ус гатлан сумын төвдөө ирсэн хөдөөний сонгогчдийн ирц хэрхэн 50 хувийг давж цаашаа  60, 70 хувь руу авирахыг нийслэлчүүдэд гайхуулж ичээх байсан юм. 

P.S: Маргаашийн үдэш болчихоод байхад хөдөө орон нутаг дахь сонгуулийн тухай сурвалжлага, хэдэн дүрс, ядахдаа ганц тоо ч алга аа.

Posted in + ТЕЛЕВИЗ, 2008 оны Орон нутгийн сонгуулийн сурталчилгаа, Монголын Үндэсний Олон Нийтийн Телевиз | Leave a Comment »

Нэр дэвшигч гэдгээ нуусан нэр дэвшигчдийн гарт МҮОНТ

Posted by Ажиглагч on 2008/10/11

“Төөрсөөр төрөлдөө” киноны Балт хоорондоо барьцалдсан улаантан, цагаантан хоёрт салгаад “хэрвээ дахиад ингэвэл…” гээд нэг нэг сум харуулдаг шиг товч бөгөөд тодорхой заалт Орон нутгийн хурлын сонгуулийн тухай хуульд дурайж байна.

30.9.Олон нийтийн радио, телевизээр орон нутгийн Хурлын сонгуулийн аливаа сурталчилгаа явуулахыг хориглоно.

Аливаа буюу ил далд сурталчилсан мэдээ, сурвалжлага, ярилцлага болгон хориотой гэсэн үг. Зөвхөн, хэрвээ, бусад энэ тэр гэсэн ямар ч цоорхой байхгүй.

Тэгвэл 2008 оны орон нутгийн сонгуулийн сурталчилгааны кампанийн үеэр Монголын үндэсний олон нийтийн телевиз (Олон нийтийн радиог мэдэхгүй, яагаад гэвэл сонсоогүй) нэр дэвшигчдийг яаж ийгээд сурталчилж чадлаа.

Бүр 9-р сарын сүүлчээр “Гэрэлтэй цонх” хөтөлбөрөөр урьд үзэгддээгүй хүмүүс, тухайлбал “Сод Монгол” группийн ерөнхийлөгч Анандбазар, Чингэлтэй дүүргийн Засаг даргын орлогч Баярмагнай уригдаж юу ч хамаагүй ярьдаг болов. Тэд хожим нэр дэвшигчид болж таарсан.

Сурталчилгааны кампани эхэлмэгц нийслэлийн ИТХ-ын 9-р тойрогт дэвшихээр шийдсэнээ зарласан “Хас” банкны захирал Ч.Ганхуягийн хэвлэлийн хурлын “Цагийн хүрд”-ээр хамгийн түрүүнд тусгайлан сурвалжилсан билээ. Араас нь сураг тасарсан Ceo Club нэвтрүүлгээ сэргээж Ч.Ганхуягийг “Оюуны ундраа” компанийн захирал Амарсайханаар жийрэглэж байгаад дахин яриулав. Улмаар Ганхуяг захирал энэ өдрүүдэд МҮОНТ-ээр хамгийн олон удаа сурталчлуулсан юм. “Хас” банкны лизингийн зээлээр “Моннис” компаниас баахан машин авсныхаа хариуд “Цагийн хүрд”-ын дугаар болгондоо “Хас” банкны тухай сурвалжлага оруулж буйгийн үргэлжлэл болой.

Нэг удаа 18 цагийн “Цагийн хүрд”-ээр нийслэлийн ИТХ-д Сонгинохайрхан дүүрэгт МАХН-аас нэр дэвшсэн залуучууд бүгдээрээ гадаадад боловсрол эзэмшсэн, тэдний боловсруулсан хөтөлбөр сайн болсон гэж магтсан сурвалжлага үзүүлснээ 20 цагийнхаас хасчихсан байсныг саналаа. Телевизийн дарга нар хэл амнаас болгоомжилж илүү нарийн аргад шилжих хэрэгтэйг ойлгожээ. Ямар арга бодож олсныг баримтаар харуулья.

2008.10.06
“Цагийн хүрд”:
– Нийслэлд аж үйлдвэрийн парк байгуулах шаардлагатай тухай тайлбар сурвалжлага. УИХ-аас эрх зүйн орчин бий болгох ёстой гэнэ. Харин ийм парк байгуулах консерциумын ерөнхийлөгч гэсэн цол гуншинтэй Б.Энх-Амгалан хэмээх залуу хоёр удаа ярьж паркаа Хан-Уул дүүргээс байгуулж эхлэнэ гэв. Нийслэлийн ИТХ-ын сонгуулийн Хан-Уул дүүрэг дэх 12-р тойрогт АН-аас нэр дэвшсэнийг мэдээж хэлээгүй.

2008.10.07
“Өглөө” хөтөлбөрийн “Замд гаръя” нэвтрүүлэг:
– Баянзүрх дүүргийн Засаг даргын тамгын газраас зохион байгуулж дүүргийнхээ нутаг дэвсгэрээр хийсэн аялал экскурс маягтай. Засаг дарга Б.Мөнхбаатарыг таниулахаас гадна дүүргийн ЗДТГ-ын хэлтсийн дарга Э.Бат-Амгалан, Э.Оюун-Эрдэнэ нарыг харуулж яриулав. (Тэд бүгд нэр дэвшигчид байв). Сүүлийн үед МҮОНТ Баянзүрх дүүргийн удирдлагатай нэлээд сүжирсэн ба хэд хоногийн өмнөх “Цагийн хүрд”-ээр тус дүүргээс сонгогдсон ИТХ-ын төлөөлөгч нэг нөхрийн буяны ажлыг сурвалжилсныг саналаа.

“Гэрэлтэй цонх”:
Монголын манлайлагч эмэгтэйчүүдийн нийгэмлэгийн тэргүүн Н.Оюундарь уригдаж өөрийн баян тансаг намтраас эхлээд Байгаль орчны яаманд ажиллахдаа байгуулсан гавъяагаа дурдаж, мөн шөнийн цагт гэр хорооллын цахилгааныг үнэгүй болгохоо амлав. Нэр дэвшигчийн мөрийн хөтөлбөрийг санагдуулахгүй байна уу? НИТХ-ын сонгуулийн Сүхбаатар дүүрэг дэх 10-р тойрогт МАХН-аас нэр дэвшигч учраас аргагүй ээ.

2008.10.08
“Цагийн хүрд”:
– Хүнсний аюулгүй байдлын сэдвээр Монголын хүнсчдийн холбооны тэргүүлэгч Халтмаагийн Баттуулыг студидээ урьж ярилцав. Хүнсчдийн холбоо арав шахам тэргүүлэгчтэй боловч ганцхан тэрбээр яагаад уригдав? Яагаад гэвэл нийслэлийн ИТХ-ын Хан-Уул дүүрэг дэх 12-р тойрогт АН-аас нэр дэвшигч бөгөөд “Махимпекс”, “Талх чихэр” гээд том компаниудын захирал, бас УИХ-ын гишүүн Х.Баттулгын дүү уригдах хүсэлтээ тавьсан учраас.

“Та хариулахгүй ч байж болно”:
– Хэдэн өдрийн өмнөөс арай өөр хүн оролцох анонс яваад байсан ч ч энэ орой гэнэдүүлж байгаад Нийслэлийн ИТХ-ын дарга Г.Мөнхбаярыг авчирч хариулаад байхаас өөр аргагүй манж асуултуудыг тавилаа. Хөтлөгч Ш.Гүрбазар.

“Гэрэлтэй цонх”:
Сэлэнгэ аймгийн ЗДТГ-ын даргын тухай “Нутаг амьтай хүн” нэртэй хөрөг маягийн нэвтрүүлэг. Ямар ид шидтэй хүн болохыг ойлгосонгүй. Нутагтаа сүрхий нэр дэвшигч бололтой.
– “Зочны цаг”. “Чингис хаан” банкны хөрөнгө оруулалт хариуцсан дэд захирал Т.Батмагнайг урьжээ. Нийслэлийн ИТХ-ын сонгуулийн Сүхбаатар дүүрэг дэх 9-р тойрогт АН-аас нэр дэвшигч байв.

2008.10.9
“Цагийн хүрд”:
– Ирэх 11-р сард болох АНУ-ын ерөнхийлөгчийн сонгуулийн дүн Монголд хэрхэн нөлөөлж болох тухай тайлбар дотоод мэдээнүүдийн дундуур гэнэт орж ирлээ. Ингээд гадаад харилцааны мэргэжилтэн биш дотоод улс төр судлаач Д.Мягмарсүрэнгээр тайлбарлуулж байх юм. (Обама, Маккейны түвшинд өөрийгөө таниулж чадсан энэ залуу бол Чингэлтэй дүүргийн Иргэдийн хурлын сонгуулийн 3-р тойрогт МАХН-аас нэр дэвшигч Д.Мягмарсүрэн).
– Сүүлийн үед орон сууцны үнэ ханш хэрхэн өөрчлөгдөж байгааг тайлбарласан сурвалжлага. Дундуур нь Zoom үл хөдлөх хөрөнгийн компанийн захирал Ж.Отгонбилэг санаа оноо хэлэв. (Нэр дэвшигч эсэхийг мэдэж чадсангүй)
– Нийслэлийн Хан-Уул дүүргийн гэр хороололд дэд бүтэц ерөөсөө алга байгаад санаа зовсон сурвалжлага. CFC группийн ерөнхийлөгч Б.Ариунболд дэлгэцнээ гарч “би энд төрсөн, тэрнээс хойш юу ч өөрчлөгдөөгүй байна, би цахилгаан татна” гэж амлаад далд оров. Мөрийн хөтөлбөрийн товчоо байгаа биз. (Нийслэлийн ИТХ-ын Хан-Уул дүүргийн 12-р тойрогт АН-аас нэр дэвшигч Б.Ариунболд)
– “Өнөөдрийн сэдэв: Төмөр замын цаг үеийн ажил” гэсэн ярилцлага. Монголын төмөр замын дарга В.Отгондэмбэрэлийг студид урьж нүүрс болон ургац тээвэрлэлт зэрэг намрын ажилд төмөр зам хэр бэлэн байгааг асуув. Орлогчийн орлогч нь хариулахад хангалттай байжээ. Том дарга “бэлэн” гэж хэлээд цааш ярих юм үлдээгүй учраас Мянганы сорилтын сангийн мөнгө хэзээ орж ирэх тухай ойр зуур юм сонирхсон болоод өндөрлөв. (Нийслэлийн ИТХ-ын сонгуульд Баянгол дүүргийн 3-р тойрогт МАХН-аас нэр дэвшигч В.Отгондэмбэрэл)

2008.10.10
“Цагийн хүрд”:
– “Өнөөдрийн сэдэв: Улаанбаатар хотын ногоон бүс” ярилцлагаар “Ногоон бүс, байгаль экологи” ТББ-ын гүйцэтгэх захирал Д.Ганбат студэд уригджээ. Иргэдийг гэгээрүүлэх хэрэгтэй гэсэн ганцхан санаа хэлэв. Үүний тулд хайран цагаа зориулах хэрэг байсан юм уу? (Нийслэлийн Сонгинохайрхан дүүргийн ИТХ-ын сонгуульд нэр дэвшигч Д.Ганбат бололтой)
– Хас банкны 10 жилийн ой ба шинэ үйлчилгээний нээлтийн сурвалжлага.
– “Өнөөдрийн сэдэв: Монгол Улсад бичил санхүү үүссэний 10 жилийн ой”. “Хас” банкны гүйцэтгэх захирал Ч.Ганхуягийг студид урьж сайн гэгч яриулав. (Нийслэлийн ИТХ-ын сонгуулийн Сүхбаатар дүүрэг дэх 9-р тойрогт бие даан нэр дэвшигч Ч.Ганхуяг гэдгийг бүгд мэддэг болсон)
– Иргэд орон нутгийн сонгуульд хэрхэн оролцож саналаа өгөх тухай нийслэлийн сонгуулийн хорооны дарга Ц.Болдсайханы яриа. Ганц хэрэгтэй тайлбар байв.
– Сонгинохайрхан дүүргийг дарсан хур хог тэндхийн иргэдийг бухимдуулж байна, гэхдээ энэ асуудлыг удалгүй Японы тусламжтайгаар шийдэх гарц нээгдэж байгаа гээд УИХ-ын гишүүн кёкшүзан Д.Батбаяраар тайлбарлуулав. (Төрсөн дүү Батсайхан нь яг энэ дүүрэгт нэр дэвшиж төстэй зүйл ярьж яваа).
– Дахиад Сонгинохайрхан. Тус дүүргийн Засаг дарга Т.Найдан удалгүй “Өнөр” хорооллын арын дэнж дээр Өнөр-2″ хороолол барихаа амалсан бол нийслэлийн Засаг дарга Т.Билэгт хот баруун тийшээ тэлж хөгжих тухай мэдэгдэв. Сүүлийн хэд хоногийн турш телевиз, радио, сониноор зогсоо зайгүй ярьж цээжлүүлсэн мөрийн хөтөлбөрүүдийн нэг байна. Залгуулаад тэд МАХН-ын туг далбаа намирсан сурталчилгааны арга хэмжээн дээр зэрэгцэн сууж байгааг харууллаа. (Нийслэлийн ИТХ-ын Сонгинохайрхан дүүрэг дэх 8-р тойрогт МАХН-аас нэр дэвшигчид). Шууд сурталчилгаа байлаа.

“Гэрэлтэй цонх”:
– “Зочны цаг”. Женко группийн зөвлөх Х.Баттуул студид уригджээ. Хөтлөгчийн зүгээс “Та Хан-Уул дүүргийн 12-р тойрогт АН-аас нэр дэвшсэн. Ямар ажил хийх гэж байна. Амжилт хүсье. Хан-Уул дүүргээ хэвийн байдалд нь оруулаарай” гэчхлэн нууж хаалгүй сурталчилж өглөө. Нийслэлийн ИТХ-ын сонгуулийн Хан-Уул дүүрэг дэх 12-р тойрогт АН-аас нэр дэвшигч Х.Баттуул хэдхэн хоногийн өмнө “Цагийн хүрд”-ээр Монголын хүнсчдийн холбооны тэргүүлэгч нэрээр бас уригдсан билээ.
– Сүхбаатар дүүргийн 18-р хороон дээр сонгуулийн ажил хэрхэн өрнөж байгааг сонирхуулья гэсэн сурвалжлагаар “Нью Майнд” компанийн захирал Г.Идэрмаа тус хорооны тулгамдсан асуудлыг хэрхэн шийдвэрлэх талаар ярив. Энэ эмэгтэй нийслэлийн ИТХ-ын 10-р тойрогт МАХН-аас нэр дэвшигч гэдгийг мэдээж хэлээгүй.

Ийнхүү орон нутгийн сонгуулийн сурталчилгааны сүүлчийн мөч – 10-р сарын 10-ны 24 цаг хүртэл МҮОНТ далд сурталчилгаа хийсээр байв. УИХ-ын сонгуулийн үеэр хулгайгаар явуулсан иймэрхүү сурталчилгаагаа МҮОНТ-ын дарга нар “сэтгүүл зүйн бүтээл байсан” гэж зөвтгөхийг оролдсон. Тэгвэл 11-ны өглөө буюу сурталчилгааны чимээгүй өдөр “Цагийн хүрд”-ээ давтахдаа нэр дэвшигчдийг яриулсан “бүтээлүүд”-ээ  бүгдийг хассан байлаа. Сурталчилгаа байсныг өөрсдөө хүлээн зөвшөөрсөн хэрэг.

Posted in 2008 оны Орон нутгийн сонгуулийн сурталчилгаа, Монголын Үндэсний Олон Нийтийн Телевиз | Leave a Comment »

МҮОНТ-ын 41 жил 1 сарын ойг удахгүй тэмдэглэнэ …

Posted by Ажиглагч on 2008/09/28

Хэрвээ улс орон даяар шууд цацагддаг Монголын Үндэсний Олон Нийтийн Телевиз ямар нэгэн юманд бүтэн оройн хөтөлбөрөө тэр чигээр нь зориулж, бас “Цагийн хүрд” мэдээллийн хөтөлбөрөө түүгээр эхлүүлбэл Монголд ер бусын үйл явдал тохиожээ гэсэн үг. Магадгүй сүүлчийн ядуу айл 3 давхар хаус руугаа нүүж,  эсвэл эвслийн Засгийн газрын гишүүд МАХН ба АН-ыг төлөөлөн хоёр хоёроороо хөтлөлцөн айлуудын хаалга тогшиж 1,5 сая төгрөгийн боодлуудыг хүн бүрийн тоогоор гардуулж “Бид азтай сайд” хэмээн хашгирахыг  оройжин сурвалжилж үзүүлсэн байж болох. Үгүй бол 7-р сарын 1-2-ны шөнө амиа алдсан 5 хүнийг хар хувцастай харь гаригийнхан буудсан нь бүрэн нотлогдсон тухай мэдээлэхийг Онц байдлын штабаас зөвшөөрч Сайнжаргал хурандаа студид байраа эзлэн оройжин ярьсан байж мэдэх. 

Харин  2008 оны 9 дүгээр сар 27-ны Бямба гаригт МҮОНТ өөрийнхөө 41 жилийн ойг ийм агуу түүхэн үйл явдал хэмээн үзээд өөрийгөө зориулжээ. 40 биш, 45 ч биш, зүгээр л 41 жилийн ой!

Эхний нэвтрүүлэг “Бидний нэг өдөр” нэртэй бөгөөд МҮОНТ-ийнхэн гэж ер бусын авъяаслаг бөгөөд хөдөлмөрч хамт олон ажлаа ямар гайхамшигтай хийж чаддагыг бишрүүллээ.  Лав Даваа гаригийн өглөө бүр шуурхай зөвлөгөөнтэй, түүн дээр Жигжидсүрэн найруулагч муухай хувцастай хүнийг нэвтрүүлгээр харагдуулсныг шүүмжилж, араас нь сайн болсон нэвтрүүлэгтээ баяр хүргэж бүгдээрээ алга ташдаг аж. (Сүүлийн үед МҮОНТ-ээр ямар сайн нэвтрүүлэг гарсан билээ?) Бүр сурвалжлагад явуулах машиныг хуваарилдаг албаны дарга нь хүртэл чадалтай эмэгтэй гэнэ.   

Араас нь “Ардын дуу” цэнгээнт нэвтрүүлэг гарсан нь МҮОНТ-ийн уран бүтээлчдийн зугаацалт байв. Ерөнхийдөө тун гайгүй дуулцгаав.  Энэ хүмүүсээр ардын дуу бүжгийн чуулгыг солиод үзвэл гэмгүй бөгөөд тэдэнд театр, тайз хэрэггүй, өөрсдийгөө өдөр болгон телевизээр гаргасан ч чадна.

18 ба 20 цагийн “Цагийн хүрд”-ийн эхний тайлбар, сурвалжлагууд мэдээж энэ түүхт ойд зориулагдав. Монгол телевизэд монголчууд баярлаад баярлаад ханах ёсгүй гэдгийг ухаарлаа. 

21 цагаас “Эфир-41” нэртэй нийтлэл-уран сайхны шууд нэвтрүүлэг эхэлж бараг шөнө дунд болтол үргэлжлэв.  Нэгэн зэрэг 4 газраас буюу 600-ын студиэс гадна Дуурь бүжгийн эрдмийн театр, МҮЭ-үүдийн СТО, М-Клуб гэсэн 4 газраас дамжууллаа. Ш.Гүрбазар, Ш.Сүрэнжав нарын дурсамж сэтгэгдэл, “Баянмонгол” чуулга, сонгодог хөгжмийн концерт, хошин шог, дуу.  Дараа нь Ш.Гүрбазарын жүжиг. 

Ийнхүү МҮОНТ-ийнхэн энэ оройжин гоё концерт сонсонгоо өөрийгөө толинд харж баяссан авгай шиг баяртай байв. Гагцхүү үүний тулд хамаг техник хэрэгслээ дайчилж Улаанбаатарын энд тэндээс шууд нэвтрүүлэг зохион байгуулж сүржигнэх хэрэг байсан уу? Хожим ингэж нойр хоолгүй хөдөлмөрлөсөн гээд одон медаль нэхнэ дээ. Нийслэлийн гудамж талбай, “Нарантуул” зах, ажлын байр, хичээлийн танхим, хуримын ордон, барилгын компанид булаагдаж байгаа хүүхдийн тоглоомын талбай гээд жирийн амьдрал дундаас шууд нэвтрүүлдэггүй байж шүү.   

Хайран мөнгө. 2008 онд улсын төсвөөс МҮОНТ-д 10 гаруй тэрбум төгрөг өгснөөр ёстой нэг туйлж өгч байна. Дээрээс нь элдэв компани, банк, нэр дэвшигчдэд худалдагдаж тоймгүй их мөнгө олж байгаа. Тэгсэн мөртлөө   телевизүүд дундаас хамгийн цөөн цагийн нэвтрүүлэгтэй, Даваа гаригт гэхэд 18 цагт л сая нэг сэрдэг байж дахиад нэг суваг хэрэгтэй гэж нэхээд байсан билээ. Хэрвээ тэр сувгийг өгчихвөл МҮОНТ-ийн 41 жил 1 сарын ой, 41 жил 2 сарын ой … гэх мэтээр хавтгай тэмдэглэж, үүнийгээ  шууд нэвтрүүлгээр харуулж дүүргэх юм байна.

Posted in Монголын Үндэсний Олон Нийтийн Телевиз | 2 Comments »

Гүрбазар цагдааг уйлуулав. Захиалгаар.

Posted by Ажиглагч on 2008/09/22

Миний олж үзсэнээр лав “25-р суваг”, бас МҮОНТ-ээр цагдаагийн алдарт хурандаа Сайнжаргалын оршил яриагаар эхэлсэн “Нулимстай захидал” захиалгат нэвтрүүлэг гарав. 

7-р сарын 1-2-ны шөнө 4-5 иргэдийг буудаж алсан байж магадгүй хэмээн хоригдсон цагдаа нарыг өмөөрч тэднийг Ганц худгаас суллаж гадуур байцаагаач гэсэн утгатай энэ нэвтрүүлгийг МҮОНТ-ийн сэтгүүлч Ш. Гүрбазараар хийлгэж текстийг өөрөөр нь уншуулжээ. Нэвтрүүлгийн үндсэн хэсэг нь төр, түмнийхээ өмнө хүлээсэн үүргээ чин шударгаар биелүүлсэн цагдаа нараар бахархаж, бас тэднийг өрөвдсөн уран сайхны эрэгцүүлэл агаад нэгэн цагдаа шоронгоос захидал бичиж байгааг дүрсэлж “Цагдаа уйлж байна” хэмээн сэтгэл эмтрэм уянгалуулав.  Гэхдээ захиалгаар. Төгсгөлд нь зөвхөн “Монгол Улс. 2005 он” гэсэн хаяг тавьжээ. Нэрээ яагаад тавьж болохгүй гэж? Цагдаа нар, тэдний ар гэрийнхэн Мөрдөн байцаах албыг бүслэн дарамтлахаас эхлээд ажил хаялтаар айлгаж, өлсгөлөнгөөр сүрдүүлж  буйгийн үргэлжлэл нь Гүрбазар болжээ. 

Тэдгээр цагдаа нарыг  суллаад байцаах хэрэгтэй байж болно. Тэглээ гээд ноцтой асуулт хэвээрээ үлдэнэ: Хэрвээ дээрх иргэдийг үнэхээр цагдаа нар буудаад алчихсан нь нотлогдвол яахав? Магадгүй цагдаа нар 10 байшин, тэрбум төгрөгийг хамгаалж  100 хүний амийг аварсан байж болно, иймээс тэр шөнө 5 хүний амь хөнөөснийг хасаад 100 – 5 = 95 хүний амь аварсан гээд хэргийг цайруулахыг хүсээд байгаа юм уу? Монголын цагдаа нар бидний амь нас, эрүүл мэнд, өмч хөрөнгийг хамгаалдаг, тэднийг хүндэлж хайрлах ёстой, гэхдээ гэмгүй хүмүүсийг буудаад алчихсан бол хуулийн  дагуу шийтгэу таарна, тэд буруутай эсэхийг тогтоохын тулд одоогоор зөвхөн шалгаж байгаа, энэ явцад шаардлагатай гэж үзээд хорьсон билээ.  

Эртний домог байдаг: Хааны харуул шөнө зүүрмэглэх зуураа дайсны их цэрэг сэмхэн ирж явна гэж зүүдлээд хаандаа дуулгаж гэнэ. Яаж мэдэхэв хэмээн сэрэмжилсэн хаан цэрэг зэвсгээ бэлтгэсний ачаар үнэхээр ирж байсан дайсныг угтан дарж чадав. Улс гүрнээ аварсан тэр харуулыг хаан яасан бэ? Мэдээж шагнасан, гэхдээ шөнө унтдаг муу харуул гээд шийтгэсэн гэдэг… 

Posted in + ТЕЛЕВИЗ, 2008.07.01, Монголын Үндэсний Олон Нийтийн Телевиз | 1 Comment »

Хоёр намын “зөв мэргэн” шийдвэрийг МҮОНТ баяртай хүлээн авчээ

Posted by Ажиглагч on 2008/09/08

2008 оны УИХ-ын сонгуулийн өмнө “улс орны ирээдүй” болон “ардчиллын хувь заяа”-г дуудан үхэх сэхэхээ үзэлцэж, сонгуулийн дараа тангарагаа өргөж чадалгүй бүтэн хоёр сар хэрэлдсэн МАХН ба АН гэнэтхэн эвлэрч хамтарсан засгийн газар байгуулах зөвшилцөлд хүрсэн нь өнгөрсөн долоо хоногийн гол үйл явдал байлаа.  Уг нь УИХ бараг бүхэлдээ хоёр намаас бүрдсэн тул тэндээ зөвшилцөөд байж болох ч сайд, дэд сайд, төрийн нарийн бичгийн дарга, газар, хэлтсийн дарга гээд төрийн албан тушаалд оочирлуулахад л МАХН ба АН-ын хурлууд зөвшилцлийг тэгэсхийгээд дэмжих нь тэр. 

Юу болоод өнгөрөв өө? 

Дөрвөн жилийн өмнө УИХ-ын сонгуулиар хоёр нам бараг тэнцсэний дараах анхны зөвшилцөл нэг нь нөгөөгөө хулхидаж төгссөн тул саяын сонгуулиар ичээд энэ сэдвээр огт дуугараагүй. Харин 6-р сарын 29-30-ны шөнө МАХН-ын дарга С.Баяр ялалт байгуулснаа зарлахдаа Засгийн газрыг дангаараа байгуулахаа хамгийн түрүүнд амлав. Тэр шөнөдөө цэцэг навчинд булуулж бөглөө мултлан нойргүй хоносон ялагчид маргааш шууд ажилдаа очсон ба дахиад нэг унтаад босоход 7-р сарын 1-ны нар мандсан байлаа. Үдээс хойш МАХН-ын байрны урд цуглаан эхэлсэн билээ… 

Энэ удаагийн зөвшилцөл бол юуны өмнө 7-р сарын 1-2-ны шөнө Онц байдлыг тогтоосны дараа нийслэлийн төв хэсгийг бүрэн мэдэлдээ авсан мөртлөө лав 4 хүний амийг хөнөөлгөсөн улс төрийн (Онц байдлын штабын дарга, Хууль зүйн дотоод хэргийн сайд Ц.Мөнх-Оргил,  Цагдаагийн ерөнхий газрын даргын үүрэг гүйцэтгэгч генерал Ц.Амарболд нарын хувьд бол бүр хатуу) хариуцлагаас мултрах гэсэн МАХН ба сонгуульд ялагдсан ч бялуунаас хоцрохыг хүсээгүй АН-ын дарга нарын наймаа. Одоо улс орны хөгжил цэцэглэлт, ард түмний сайн сайхан амьдралын тухай том юм ярьж байхад юун хэдэн хүний амь. Иймээс С.Баяр зөвшилцлийг зарласан хэвлэлийн  хурал дээрээ “цагдаа буудсан юмуу, цагдаа хувцас өмссөн хүмүүс буудсан юм уу” хэмээн хэсэг бясалгаад,  хэвлэл мэдээллээр “цагдаа буудсан” гэж бичиж байгаа нь Үндсэн хууль зөрчсөн хэрэг болно хэмээн анхааруулж сууна лээ. “Бид 90-онд яагаа ч үгүй,  гэтэл одоо хүн аллаа, энэ Засгийн газар огцрохос өөр ямар ч аргагүй” гээд цамнаад байсан АН одоо зүгээр л “хэргийн  учрыг олж хариуцлага тооцох”-ыг шаарддаг болж. 

Ёстой л шинэ сайхан амьдралыг цогцлооход “үхэхгүй амь, урсахгүй цус гэж үгүй” болжээ. Хүн төрөлхтөн одоо хэр илүүг бодож олоогүй гэгддэг олон намын тогтолцоо, сөрөг хүчин энэ тэрийг дурсах ч үгүй байна. 

Гэх мэтээр би бодлоо. Хүн болгон энэ мэтээр ярьж хэлэлцэж байх юм. Даанч телевизийн дэлгэцэн дээр зөвхөн хоёр намын мэдээ. УИХ-ын гишүүд тангараг өргөсний араас залгасан С.Баяр, Н.Алтанхуяг нарын хаалттай уулзалт, тэдний хэвлэлийн хурлууд, хоёр намын бага хурлуудыг манай телевизүүд нэгд нэгэнгүй үзүүлж хоёр намын дарга МҮОНТ-ийг эфирийг хоёр орой дараалан эзэлж бүтэн цаг ярьцгаасан. Гэхдээ маргаан хэлэлцүүлэг огт алга.  TV9 телевиз гудамжинд яваа хүмүүсийг зогсоож “эвтэй бол хүчтэй” талаар баахан хэлүүлэв. Хоёр намын гомдсон гурван гишүүн ярилцлага өгснийг эс тооцвол эсрэг дуу хоолой  үл сонсдоно.  

Ганц найдвар олон нийтийн телевиз юмсан. МҮОНТ энэ чухал сэдвээр хэлэлцүүлэг маргаан өрнүүлж дэмжигчид ба эсэргүүцэгчид, улс төрчид ба хөндлөнгийн нөхдийг сонсгох болов уу гэтэл таг чиг. Ядаж сонирхолтой нэвтрүүлэг гарахсан. Урьд цагт МАХН-ын зөв мэргэн шийдвэрийг хэвлэл мэдээлэл дуулгавартайгаар сурталчлан таниулдаг байсан бол өнөөдөр МҮОНТ хоёр намынхыг тэгдэг болжээ. Иймээс С.Баяр, Н.Алтанхуяг хоёрынхоос зөрсөн эсэргүү яриа хөөрөөг ард иргэдэд сонсгож элдэв юм бодогдуулах шаардлагагүй, тэрний оронд хал балгүй албан мэдээ ба нэр хаяггүй сүржин шүүмжлэл, залхмаар олон тоглолт, өөрийнх мөнгөөр өөрийг нь шагнадаг захиалгат агшин, уйтгарт аяллын цаг, Холливудын хулгайн кино үзэж суувал таарна гэж үзэгчдээ басаад байх шиг.  

Цаашдаа тэртээ тэргүй биднээс асуухгүйгээр дээгүүрээ хуваагаад авчих сандал суудлыг учир зүггүй сайн сурвалжилна даа…

P.S:  Яг тэгэж байна. Мягмар гаригийн “Цагийн хүрд”-ээр УИХ-ын байнгын хороодын даргад нэр дэвшсэн хүмүүсийг “нутгаасаа итгэл өвөрлөн сонгогдсон … арвин туршлагатай..  намын нөхөд нь итгэл хүлээлгэв … гээд донгодож өгч байна.

Posted in Монголын Үндэсний Олон Нийтийн Телевиз | Leave a Comment »

МАХН, АН-ын шинэ зөвшилцөл МҮОНТ-ийн эфирийг бие биендээ найр тавьснаар эхэллээ

Posted by Ажиглагч on 2008/09/03

Энэ өдрийн 20 цагийн МҮОНТ-ийн “Цагийн хүрд”-ын араас хөтөлбөрт байгаагүй “Цаг үе, үйл явдал” шууд нэвтрүүлэг залган авч АН-ын шинээр сонгогдсон дарга Н.Алтанхуяг 45 минутийн турш ярилаа. Ингэж түргэн авах болсны шалтгаан нь парламентын хоёр том нам зөвшилцөх ёстой гэж үзэж буйгаа зарлах явдал байжээ. Улс төрийн сөрөг хүчин гэхээр эрх баригч хүчинтэй сөрөлдөөд байдаг гэсэн хоцрогдсон ойлголтыг таягдан хаяхыг уриалж ард түмнийхээ гэрэлт ирээдүй, сайн сайхан амьдралын төлөө хэнтэй ч яахаас ч буцахгүй гэдгээ мэдэгдэв. Урд өдөр нь  МАХН-ын дарга С.Баяртай уулзаад юу  ярилцсан нь ийнхүү тов тодорхой  болох нь тэр. Өнөө маргаашгүй МАХН-ын ээлжит бүгд хурал хуралдаж шинэ Засгийн газар байгуулах асуудлыг хэлэлцэнэ…

2008 оны 6-р сарын 2-нд сонгогчид МАХН-ыг илт давуугаар ялуулж, АН-ыг дарга нь ухамсраараа огцортол нь ялагдуулчихаад байхад дахиад зөвшилцөхөөр далдуур үгсэж байгааг МҮОНТ ийнхүү халуунаар дэмжиж оргил цагаа хайр гамгүй зориуллаа. Яагаад? Монголын хамгийн том телевизийг 2004 оны сонгуулийн дараах зөвшилцлийн үр дүнд МҮОНТ нэрээр хуваан эзэмших болсон (МҮОНТ-ийн Үндэсний зөвлөлийн гишүүдийн намын харьяаллыг харна уу) хоёр нам энэ удаагийн зөвшилцлөө МҮОНТ-ийн эфирийг бие биендээ найр тавин хэрэглүүлэхээс эхлэж байна.

Бас тэгээд олон нийтийн телевиз гээд байгаа. Бид чинь яах гэж сонгууль явуулсан болж байна аа?

Posted in + ТЕЛЕВИЗ, Монголын Үндэсний Олон Нийтийн Телевиз | Leave a Comment »

Онц байдлын хий үзэгдэл

Posted by Ажиглагч on 2008/08/31

МҮОНТ-ын “Ярилцъя” шууд ярилцлагын хөтөлбөр УИХ-ын сонгуулийн дараа хоёр сар “амраад” энэ Бямба гаригаас дахин явж эхэллээ.

Эхлээд суваг солиход УИХ-ын гишүүн З.Энхболд улс төрийн нөхцөл байдлын талаар ярьж дуусаад намын хурал руугаа яаран одов.

Дараа нь Усны хэрэг эрхлэх газрын хэлтсийн дарга оролцож Монгол оронд усны асуудал ямар байгаа талаар ярилаа. Мэдээж Туул голын нэр дурдагдсан.  Тэгсэн мөртлөө сүүлийн саруудад Туулын ундны усны эх үүсвэрийн бүсэд халдсан хамгийн ноцтой жишээ – Гачууртад байгуулж эхэлсэн гольфийн талбай асуудал юу болсныг таг дуугүй өнгөрөөв. Уг нь энэ дарга тэнд оччихсон, хууль зөрчсөн үйлдэл байна гэж мэдэгдээд зогсож байсансан. Хөтлөгч Мөнхтөр ч асуусангүй. Тэгснээ дэлхийн ундсны усны хомсдлын талаар  санаа зовинон ярилцсаар өндөрлөв. Ёстой л нөгөө “хүн төрөлхтнийг хайрлах нь хөршөө хайрлахаас амархан” гэж үнэн аж.

Дараа нь 7-р сарын 1-ны үйл явдлын дараах онц байдлын үеэр 4 хүнийг буудаж алсанд сэжиглэгдэн Ганц худагт хоригдож байгаа цагдаагийн ажилтнуудын өмнөөс өдөр алгасалгүй үед жагсаал цуглаан зохиож хэвлэлийн бага хурал зарлан телевизийн  дэлгэцээс салахаа больсон Алтангэрэл болон цагдаагийн чөлөөнд гарсан хурандаа Билгээ хоёр уригдан оролцлоо. Дэлгэцийн дор “Төрийн цагдаа” гээд их л учиртай биччихэж.  Цагдаа хүмүүсийг буудаж алсан эсэх тухай ярьж байхад шүү.

Бусад телевизийн сурвалжлагч охид, хөвгүүд сайн ухахгүй байгаа учраас урьд нь цагдаагийн ажилтан байсан энэ Алтангэрэл  улам оодорч хоригдсон цагдаа нарын ар гэрийнхныг ашиглан “цагдаа ажил хаяна”, “өлсгөлөн зарлана” гэх мэтээр сүрдүүлэх болсон билээ. Хашир сэтгүүлч Мөнхтер оновтой асуулт тавьж хандыг нь дарах болов уу гэтэл үгүй аж. Наад Алтангэрэл чинь юуг мушгин гуйвуулж байгааг ойлгохгүй байна уу? Ерөнхийлөгчийн гаргасан, УИХ-аас баталгаажуулсан Онц байдлын тухай зарлигийг ёсчлон биелүүлж төрийн төлөө үүргээ гүйцэтгэснийхээ төлөө төлөө шоронд хоригдоод байна гэж Алтангэрэл дахин худал заллаа. Тэр есөн цагдааг үүний төлөө бус, харин дөрвөн хүн буудуулж амиа алдсантай холбогдуулан шалгаж байгаа бус уу?  Нийслэлд эмх журмыг сахиулах үүрэгтэй мөртлөө хөдөөгүүр нэг тарчихсан байсан тэдгээр цагдааг авчирч хорьсон нь ялласан хэрэг огт биш, харин төрийн цагдаа нарт халдаж МАХН-ын байрыг шатаасантай холбогдуулан Ганц худагт хорьсон 180-аад хүний нэгэн адил зөвхөн сэжиглэн шалгаж байгаа хэрэг билээ. Ийм энгийн зүйлийг хөтлөгч асуухыг хүсээгүй учраас цаадуулын ам халж, тухайлбал Билгээ хурандаа “прокурорын байгууллага цагдаа руу халдаж байна, ямар нэгэн нам хүчний захиалга юм шиг байна, ингэснээр хүчний байгууллагуудын нягт хамтын ажиллагаанд ан цав суулгалаа, тэгэж ярих юм бол цагдаагийнхан хэв журам сахиулахдаа дарга нь хэлсэн хэлээгүй буугаа авч гараад буудах эрхтэй байсан, тэгээд буудсан биз хэмээн хадуурав. Хөтлөгч Мөнхтөр түүнд Онц байдлын үеэр галт зэвсэг хэрэглэхийг Ерөнхийлөгч хатуу хориглосон тухай сануулах болов уу гэтэл үгүй, харин ч “цагдаагийн 500 албан хаагч бэртэж гэмтсэн бол энгийн иргэдээс дөнгөж 12 хүн гэмтсэн …гадаадад бол цагдаа нарт гар хүрвэл шууд бууддаг” маягийн юм ярьж улам хөөргөж байх юм.

Сүүлийн өдрүүдэд МҮОНТ-ээр Ганц худагт хоригдсон цагдаа нарын ар гэрийнхний зовлон дээр дөрөөлсөн Алтангэрэл нарыг илт дэмжиж “Цагийн хүрд”-ээрээ байнга сурталчилж өгч байгаа төдийгүй хэд хоногийн өмнө 7-р сарын 1-ны жагсаал цуглаан ямар ямар хууль зөрчсөн тухай нэр хаяггүй нэвтрүүлгийг хулгайгаар үзүүлсэн билээ.

2008 оны 7-р сарын 1-4-ны Онц байдлын хий үзэгдэл МҮОНТ-ээр тэнүүчилсээр байх шиг. Бүтэн хоёр сар өнгөрөөд байхад тэрхүү үйл явдлын учир шалтгааныг эрэн сурвалжилж талуудын байр суурийг харуулсан нэвтрүүлэг ганцыг ч хийсэнгүй. Арай штабаас Сайнжаргал хурандаагийн зөвшөөрөл хүлээж өдий хүргээгүй байлтай…

Posted in 2008.07.01, Монголын Үндэсний Олон Нийтийн Телевиз, Нийтлэл, нэвтрүүлэг | 1 Comment »

Монгол башё-гийн өмнөх газар хөдлөлт

Posted by Ажиглагч on 2008/08/27

Өнөө өглөө Байгаль нуурын орчимд 6 баллын нэлээд хүчтэй газар хөтлөлт болжээ. Тэр нь 9.35-ын үед Улаанбаатар хотод хүрч доргиогоод авлаа. Зарим өндөр барилгад чичрэлт мэдэгдэж ширээ сандал хөдөлсөн тул хүмүүс гудамжинд гарч хүлээзнэсэн байна.

Хэвлэл мэдээллээс энэхүү газар хөдлөлтийн талаар хамгийн түрүүнд МҮОНТ 11 цагийн мэдээгээрээ дуулгаж дүрсгүй цагаан мэдээ уншиж сонсгов. Бусад телевизүүд Монгол башё-г шууд дамжуулахад бэлтгээд завгүй байсан бололтой ямар нэгэн мэдээ гаргасангүй.

Үйл явдлыг хамгийн шуурхай мэдээлж чадах нь вэб сайтууд билээ. Эхлээд 10 цаг 02 минутад http://www.news.mn сайт маш товч мэдээлээд 11 цаг 06 минутад Онцгой байдлын ерөнхий газраас тайлбар авч тавьсан байна. Орос зүгт Булган Сэлэнгэд, нийслэлийн баруун дүүргүүдэд илүү мэдрэгдсэн гэнэ. Тэгвэл http://www.olloo.mn сайт 10 цаг 31 минутад энэ тухай товч мэдээг Байгаль нуурын газрын зурагтай тавьжээ. Улаанбаатарт эвдрэл хохирол гараагүй, нэмж чичрээгүй болохоор сайтууд дахин сонирхсонгүй.

Харин телевизүүд “Монгол баше” руу хандаж МҮОНТ, TV5, TV9, 25-р суваг, бас сумо “сонирхдоггүй” Ийгл шууд дамжуулан үзүүлэв. Зөвхөн башё дууссаны дараа 17 цагаас C1 телевиз газарт хөдлөлтийн талаар анхны дэлгэрэнгүй сурвлжлага үзүүлж араас бусад телевизүүд залган авлаа.

Posted in ИНТЕРНЭТ, ХАРИЛЦАА ХОЛБОО, Монголын Үндэсний Олон Нийтийн Телевиз, Нийтлэл, нэвтрүүлэг | Leave a Comment »

Онц байдлын үеэр Интернэтийг хаагаагүй сайн Ерөнхийлөгч …

Posted by Ажиглагч on 2008/08/07

7-р сарын 1-ны үйл явдлын дараа амь насаа алдсан 5 иргэний ар гэрийнхнийг Монгол Улсын Ерөнхийлөгч Н.Энхбаяр хүлээн авч уулзах үеэр МҮОНТ-ийг хэдэнтээ дурдаад авчээ.

Тэдгээр иргэд МҮОНТ-ийн удирдлагад хандаж, хүмүүсийг буудсан хэрэг явдлын тухай нэвтрүүлэг хийлгэх хүсэлт  тавьсан боловч цаадуул нь тодорхой хариулт өгөлгүй бултчихжээ. Уг нь онц байдлын 4 өдрийн туршид амь үрэгдсэн хүмүүсийн талаар огт дуугараагүй, эхний өглөө 1-р эмнэлгээс санаандгүй хийсэн сурвалжлагаа ч дахиж үзүүлэхгүй хассан олон нийтийн телевиз нүглээ наманчилж энэ байтугай нэвтрүүлгийг санаачлагаараа хийчихсэн баймаар. Тэнд онц байдал өнөөдөр ч үргэлжилсэн хэвээр бололтой.

Уулзалтын үеэр Ерөнхийлөгч “Би онц байдал зарлахдаа олон нийтийн санаа сэтгэлийг үймүүлэхгүйн тулд арилжааны телевизүүдийг хааж ганцхан МҮОНТ-ийг үлдээсэн, харин сонин хэвлэлүүд гардгаараа гарсан, FM радио, бас Интернэтийг яагаа ч үгүй” гэлээ. Юу  ярьчихав аа?!

Зарим FM-ийн байр үймээн самууны хөлд өртөж шатсаныг бид мэднэ. Гэтэл монгол телевизийн цамхаг дээр байрлуулсан антенныг нь ямар ч тайлбаргүйгээр унтрааснаас болж хэд хэдэн FM тасарчээ. Инээдтэй нь гэвэл, бусад FM-үүд дуугаа хураасныг мэдээд “тэгэх ёстой юм байлгүй” гээд эфирээ хаасан “ухамсартай” FM байсан аж. Гэтэл зарлиг мутарласан Ерөнхийлөгч өөрөө үүнийг мэдээгүй тууж явна. “Яаж энэ улс орныг удирдана даа” гэж дуу алдмаар. Тэр өдрүүдэд FM-ийн антенныг хэн унтрааж Ерөнхийлөгчийн зарлигыг зөрчсөнийг шалгахад ч илүүдэхгүй.

Бас Ерөнхийлөгч онц байдлын өдрүүдэд Интернэтийг яагаа ч үгүй, вэб сайтууд чөлөөтэй ажилласан тухай хэлээд авсан. Баярлалаа, Ерөнхийлөгч өө. Гэхдээ Интернэтийг дэлхийн хамгийн хүчирхэг гүрний ерөнхийлөгч, таны анд Жорж Буш хүртэл хянаж чаддаггүй, нөгөө Бен ладен, “Аль Кайда” нь ална хядна  гээд онлайнаар заналхийлсэн хэвээр билээ. Бас Хятадын Шинжааны “Дорнод Туркестан” нэртэй алан хядагчид Олимпийн үеэр дэлбэлж шатаах мэдэгдлээ цацсаар байгааг Интернэтийг цензурдэх арвин туршлагатай Хятадын мэргэжил нэгт Хуа Жинтао ч болиулж чадалгүй Олимпоо эхлүүлж байх шиг. Харин манай Ерөнхийлөгчийн толгойд “олон нийтийн санаа бодлыг үймүүлэхгүйн тулд” Интернэтийг цензурдэх санаа төрсөн ч бүтэхгүйг нь мэдээд арилжааны телевизээс өөр юуг ч хориглоогүй сайн Ерөнхийлөгч болж харагдахыг оролдов уу? Тэгээгүй юм бол иймэрхүү дэмий юм ярихгүйсэн.

Posted in 2008.07.01, ИНТЕРНЭТ, ХАРИЛЦАА ХОЛБОО, Монголын Үндэсний Олон Нийтийн Телевиз, FM радио | 3 Comments »

Шангри-Ла-гийн тухай баярын сурвалжлага эгшиглэв

Posted by Ажиглагч on 2008/07/31

MCS групп компани Сүхбаатарын талбайн зүүн урд босгоод дуусч буй офисийнхоо  урдах цэцэрлэгийг сэргээж эмнэг булгиулж байгаа хүүхдийн баримлыг шилжүүлэн усан оргилууртай болгосноо албан ёсоор зарласан хэвлэлийн хурал бүх телевизээр гарч байна. Зарим телевиз сурвалжлагаа шуудхан “бизнес мэдээ”-гээр нэрлэсэн бол олон нийтийн телевиз бүр баярын магтуу эгшиглүүлэн ер бусын хүндэтгэлтэйгээр үзүүлэв. “Цагийн хүрд” мэдээллийн хөтөлбөрийн дугаар бүрт заавал 1-2 төлбөртэй сурвалжлагыг сэмхэн багтаадаг, нэг нь энэ бололтой.

Хорвоод хосгүй Шангри-Ла зочид буудал хэмээх 16 давхар залилангаа MCS-ийнхэн хэвлэл мэдээллийг хөлслөн гүйцэлдүүлсэн, одоо нэгэнт барьчихсан хойноо даапаалан зарлаж, одоо бүр хаана газар авч юу хийхээ дур мэдэн шийдэж байгааг сэтгүүлчид асууж ч зүрхлэхгүй суужээ.

Энэ аргагүй. Анх 2003-2004 оны үед Сүхбаатарын талбайн хаяанд өндөр цамхан барилга босгох сураг дуулаад олон нийт дургүйцэж эхэлмэгц MCS-ийнхэн монголын хамаг хэвлэл мэдээллийг худалдан авч бөөн бөөнөөр нь ээлж дараалан Хонконг руу айлчлуулснаар Шангри-Ла хэмээх газрын диваажинг яг энд бушуухан барихгүй л бол наанадаж Улаанбаатар хот, цаанадаж Монгол орны хөгжил цэцэглэлт бүрэн зогсоно гэдэгт монголчууд сэнхэрч нам дарагдсан билээ. Гэтэл өнөөдөр Шангри-Ла зочид биш, томоос том офис сүндэрлэснийг юу гэх вэ?

Тэгтэл жинхэнэ Шангри-Ла зочид буудлаа Хүүхдийн парк буюу Үндэсний соёл, амралтын хүрээлэнгийн хажууд босгоно гэж зарлах нь тэр. Аль хэдийнэ сэмхэн аваад хашаалчихсан тэр газраа MCS группийн ерөнхийлөгч Ж.Од  “паркийн газар биш” хэмээн айлджээ. Харсаар байтал паркийн төмөр хашаан дотор байхад шүү!  Бас жинхэнэ Шангри-Лаг барихад эргэн тойронд арвин зай талбай хэрэгтэй гэнэ. Удалгүй хүүхдийн парк Шангри-Лагийн үүдний цэцэрлэг маягийн юм болж, хажууханд нь завилсан их Д.Нацагдорж буудлын үүд сахисаар үлдэж магадгүй. Яахав, тойруулаад хэдэн цэцэг тариад өгнө, дургүй хүргэвэл зайлуулсан ч чадна.

Хэвлэлийн хурлын үеэр MCS групп дархан цаазат Богд уулын Хүрхрээгийн амыг эзэмшихээр шийдсэн тухай “баяртай” мэдээ дуулгав. Хичнээн гоё цанын бааз барих тухай танилцуулгад уярсан телевизийнхэн  яагаад?  гэсэн асуулт тавих сөхөөгүй, хэдэн жилийн өмнө Шангри-Лаг магтсан шигээ оройжин сурталчилж өглөө.  Цанын баазын араас юу босохыг яг мэдэж байгаа юм уу? Нийслэлийн сая иргэний нүдэн дээр Шангри-Ла офис болж хувирчихаад байхад шүү!

Монголд MCS гэдэг компани юу хүснэ, монголын төр зөвхөн зөвшөөрөх үүрэгтэй болжээ. Нөгөө төрийн ил тод байдал, нийслэлийн хот төлөвлөлт, газрыг төсөл шалгаруулалт, дуудлага худалдаагаар олгох энэ тэр хаачив аа? Шангри-Ла-гийн газрыг хотын захиргаа, харин Богд уулыг БОАЖЯ мэдэх учиртай. Энэ удаад дархан цаазат уулын Хүрхрээгийн амыг яах талаар нийтэд зарлахгүй, ярьж хэлэлцэхгүй нууж байгаад MCS-ийн мэдэлд сэмээрхэн  өгчихчээ.

Posted in + ТЕЛЕВИЗ, Монголын Үндэсний Олон Нийтийн Телевиз, Нийтлэл, нэвтрүүлэг | Leave a Comment »

МҮОНТ-ийн “Хар, цагаан”-ыг захиалсан ч болно

Posted by Ажиглагч on 2008/07/29

Өнөөдөр нээгдэж өгөхгүй байгаа УИХ-ын чуулганы хуралдаанд АН-ын дарга Ц.Элбэгдорж орж ирээд Ерөнхийлөгч болон МАХН-ынхныг зад загнаад гарч явсан билээ. Цуг байсан З.Энхболд гишүүн үг хэлэхдээ, энэ хагас, бүтэн сайн өдөр МҮОНТ дээр бэлтгэсэн бөгөөд АН, ардчиллыг харааж зүхсэн нэвтрүүлэг явсан тухай хэлэв. Тэр хоёр өдөр хаагуур юу явсныг үзээгүй, харин өнөөдөр буюу Мягмар гаригийн оройн 18.30-19.00 цагаас “Хар цагаан” буюу “Босго” нэртэй захиалгат нэвтрүүлэг TV9 телевизээр гарлаа.

Уг нь 7-р сарын 1-ны үйл явдлаар манай телевизийнхэн түүний дотор МҮОНТ-ийн найруулагч, соёлын гавъяат зүтгэлтэн Го.Бадарч баримтат нэвтрүүлэг хийхээр шийдсэн бол сайн хэрэг. Өөрийгөө тоодог сэтгүүлч болгон үүнийг эрэн сурвалжилж дэлгэн харуулаасай.

Харамсалтай нь хачин нэвтрүүлэг үзлээ. Сонгуулийн сурталчилгааны үеэр МАХН-ын захиалгат нэвтрүүлгийг нууцаар хийж баригдаагүйдээ эрдсэн Го.Бадарч энэ удаад багаа хуулж хаяад хар цагаандаа гарч өөрийн бэлтгэдэг  “Хар цагаан” нэвтрүүлгээ МАХН-ын захиалгыг биелүүлэхэд гамгүй зориулжээ.

“Би өнөөдөр 60 нас хүрч байна, гэхдээ тэр яахав, 7-р сарын 1-ны үйл явдал хэцүү байна” гэж эхлээд МАХН-ын шатсан байшин дотуур нааш цааш холхих зуураа АН-ыг газар доогуур ортол муулсан нэвтрүүлэг байв. Байраа шатаалгасан МАХН-ыг өрөвдөж, байрыг нь шатаагсдыг өмөөрөөд байгаа АН-ыг баахан муулж гашуудсанаа “Ямар азаар МАХН ялаа вэ?”, эсвэл “Монголд өнгөт хувьсгал хийх гээд чадаагүй, болж” гэхчлэн баясаад ч байх шиг. Энэ мэтээр хагас цаг дүвчигнэхийг сонсоход захиалагчид нь маш их мөнгө төлжээ гэж ойлгогдож байлаа. Дахиад жаахан нэмсэн бол АН-ын байр луу ганцаараа дайрч ороход бэлэн харагдсан шүү.

Би нэвтрүүлгийн агуулгын зөв бурууг шүүхгүй, нөгөө олон ургальч үзэл, талуудын байр суурь хаачсаныг нэхэхгүй, харин Монголын Үндэсний Олон Нийтийн Телевизээс ийм нэвтрүүлэг гарч болох уу гэж асуух гэсэн юм. Дарга нар нь “манайх биш, манайхаар гараагүй” гээд зайгаа барихаар бэлдчихсэн биз. Гэтэл МҮОНТ дээр хийсэн гэдгийг Энхболд гишүүн хэлсэн төдийгүй нэвтрүүлгийнхээ  төгсгөлд нэрээр нь жагсаасан найруулагч, зураглаач нар бүгдээрээ МҮОНТ-ийнхэн байх юм. Го.Бадарч өөрөө МҮОНТ-ын урдаа барьдаг уран бүтээлч, иймээс ноднин тодорхойлж соёлын гавъяат зүтгэлтэн цол олгуулсан билээ. Тэрбээр энэхүү нэвтрүүлгийг бэлтгэхэд гүн туслалцаа үзүүлсэн TV5, TV9 телевизэд төдийгүй МҮОНТ-дээ талархлаа илэрхийлэхээ мартсангүй. Ингэж илчлэх гэж байх уу?

Олон нийтийн радио, телевизийн хууль ч бүр өнгөрчээ. Ядахдаа МҮОНТ-ийн Үндэсний Зөвлөлөөс баталсан сонгуулийн сурталчилгааны хугацаанд баримтлах бодлого, журамд “нам эвсэл, нэр дэвшигчдийн сурталчилгаанд олон нийтийн радио, телевизийн лого, шторк ашиглахыг, олны танил болсон нүүр царай, дуу хоолой бүхий олон нийтийн радио, телевизийн сэтгүүлч, хөтлөгч, нэвтрүүлэгч, уран бүтээлчид оролцохыг хориглоно” гэж бичсэн байна. Сонгууль дууссан учраас уландаа гишгэж болно гэж бодов уу?

Бадарч тэгэж бодоод зогсохгүй цагаандаа гарчээ. Нэвтрүүлгийнхээ төгсгөлийн хэсгийг УИХ-ын хүний эрхийн дэд хорооны хуралдаан дээр МҮОНТ-ийн удирдлагыг дуудаж шүүмжилсэн З.Энхболд нарыг балбахад  зориулав. Ингэхдээ зарим санааг М.Наранбаатар захирлаараа хэлүүлж байна. Тэгснээ “Урьд нь бид дөрвөн жилийн өмнө төр барьж байсан намуудын гар хөл болж байсан нь үнэн, одоо бол үгүй” гэсэн мэдэгдэл маягийн юм уншлаа.

Одоо МҮОНТ намуудын гар хөл болохгүй, зүгээр л нэг намын захиалгаар ажиллах юм байна. Аргаа ч өөрчилж. Энэ удаад уран бүтээлчиддээ “гүн туслалцаа үзүүлж” захиалгат нэвтрүүлэг хийлгээд өөр сувгаар цацууллаа.

Posted in + ТЕЛЕВИЗ, Монголын Үндэсний Олон Нийтийн Телевиз | Leave a Comment »

Улсын баяр наадмыг 1967 оноос хойш шууд дамжуулсан

Posted by Ажиглагч on 2008/07/14

Хэрвээ би андуураагүй бол бүр 1967 оны Улсын баяр наадмын концерт болон бөхийн барилдааныг  Монгол телевизээр туршилтын журмаар дамжуулсан гэдэг. Шөвгийн дөрөвт  Баянмөнх, Мөнхбат хоёр хэдэн цаг ноцолдоод хэн хэнээ хаяагүй тул хоёуланг хасч үзүүрт үлдсэн Дэмүүлийг түрүүлүүлсэн тэр наадам байх. Наадмын концертыг телевизээр дамжуулахад театрынхан”хүмүүс үзэхээ больчихно” гэж дургүйцэж байсан бол АИХ-ын дарга Ж.Самбуу гуай өмнөх микрофоноо нээлттэй байгааг мэдэлгүй Дэмүүлийг “мэх хийдэггүй золиг байна” гэх мэтээр ярьсан нь хүмүүст сонсогдсон гэж телевизийн ахмадууд дурссан байдаг.

Энэ жилийн наадмыг Улаанбаатарын ихэнх телевиз шууд дамжууллаа. 12-ны өдрийн үдээс хойш шөвгийн дөрөв болон  үзүүр түрүүг МҮОНТ, 25-р суваг, TV5, TV9, UBS, C1, Ийгл, ТM шууд дамжуулан үзүүлэхийг үзлээ.  Төв цэнгэлдэх хүрээлэн 15 мянган хүний багтаамжтай, харин нийслэлчүүдийн  тоо, зочин гийчидтэйгээ нийлээд сая гаруй сая гэвэл бараг бүгд телевизээр үзжээ. Хэд нь аль телевизээр  үзсэн, чухам аль нь илүү сайн тайлбарласныг харьцуулбал сонин байхсан. TV5 телевиз гэхэд нэг камераа нэлээд өндөрт зоож цэнгэлдэхийг бүхэлд нь дээрээс харуулж байв. Наадмын бөхийг цэнгэлдэхийн суудлаас үзэх сайхан, гэхдээ  телевизээр бол илүү ойроос, бас хэн яаж давсныг тэр дор нь давтана, хүсвэл удаашруулна…

Харин хурдан морины уралдааныг  Хүй долоон худгаас МҮОНТ, UBS, НТВ шууд дамжуулав. Ганц үйл явдлыг ийм олон сувгаар зэрэг дамжуулах хайран зардал чирэгдэл мэт. Гэхдээ телевизийн техник, технологи хөгжиж хямдарсаар дурын телевиз үүнийг хийхэд түвэггүй болжээ.

МҮОНР мэдээж аль алийг шууд дамжуулсан. Бас 2-3 жилийн өмнө “Элгэн нутаг” FM радио Хүй долоон худгаас шууд нэвтрүүлэг явуулсан бол энэ удаад үгүй. Тэр өргөн хөндийд хүн машин багширч, хуушуурдаж, хурдан морьдын тоос татаж, жипнүүд даган давхилдаж хүүхдүүд гийнгоолж айргын таван морьдыг барьж байгааг шууд үзүүлж байхад Улаанбаатарчуудад ярьж өгөх шаардлага алга болжээ.

Өнөөдөр аливаа үйл явдлыг телевизээр шууд дамжуулна гэдэг сонин биш. Телевизийн мэдээ зөвхөн өчигдөр биш, тэр ч бүү хэл өнөөдөр, бүр дөнгөж сая биш, харин яг одоо болж байгаа үйл явдлыг хэлдэг болж буйгийн нэг жишээ бол энэ жилийн наадам. Өмнөх жишээ бол 7-р сарын 1-ны үймээн самуун.

Энэ зун Монголын энд тэндгүй үргэлжлэх олон найр наадмыг хөдөөнөөс  ч шууд дамжуулбал гайхах явдалгүй. Ноднин баруун аймагт болсон хурдан морины нэгэн уралдааныг TV9 телевиз тэгэж дамжуулахаар зарлаж байсныг саналаа. Үнэхээр тэгэх чадсан эсэхийг мэдэхгүй.

Posted in + ТЕЛЕВИЗ, Монголын Үндэсний Олон Нийтийн Телевиз | Leave a Comment »

МҮОНРТ ямар ч шүүмжлэлийг хүлээж авахгүй. Өөдөөс хэрэлдэнэ

Posted by Ажиглагч on 2008/07/09

Өчигдөр УИХ-ын Хүний эрхийн дэд хорооны хуралдаанаар Монголын Үндэсний Олон Нийтйин Телевиз саяын онц байдлын үеэр хэрхэн ажилласан талаар хэлэлцжээ. Эрхэм гишүүдээс дан АН-ынхан буюу Х.Баттулга, Э.Бат-Үүл, Б.Батбаатар, Л.Гүндалай нар ирж, харин МАХН-ыг төлөөлдөг Б.Бат-Эрдэнэ, Ц.Шаравдорж хоёр алга байв. Шаравдоржийн тухайд гэвэл МҮОНТ-ийн дотоод хэрэгт хэн ч оролцох ёсгүй гэж эсэргүүцээд оролццоогүй юм гэнэ.

МҮОНРТ-ийг төлөөлж Үндэсний зөвлөлийн гишүүн Ж.Занаа, Р.Бурмаа, О.Эрдэнэ-Өлзий гурав, мөн Ерөнхий захирал М.Наранбаатар, МҮОНР-ийн дарга Б.Пүрэвдаш нар оролцлоо. Харин МҮОНТ-ийн захирал Ц.Мөнхбаатар үзэгдсэнгүй.

Нэлээд ширүүн яриа болсныг сонин хэвлэлүүд бичиж МҮОНТ өөрөө дэлгэрэнгүй сурвалжлага үзүүллээ. Хуралдааны үеэр эрхэм гишүүд ширүүхэн шүүмжилж бүр загнасан бол нөгөөдүүл өөдөөс нь хэгжүүрхэж сүүлдээ (М.Наранбаатар: “Ямар мэдээллийг тэнцвэртэй гэдэг юм бэ, Гүндалай гишүүн ээ?”, Б.Пүрэвдаш: “Чи бидэнд мөнгө өгөөгүй…”) гэхчлэн хэрэлджээ.

Энэ хуралдаанаас МҮОНТ-ийн талаар хачин сонин зүйл зүйл олныг мэдэж авлаа. Тухайлбал, Наранбаатар захирал “манайхыг Хувьсгалт намаас нэг дарамталдаг… АН-аас нэг дарамталдаг … Сая сонгуулийн үеэр манайхан дүнгээ тавиулсан, харьцангуй шударга ажилласан гэдгээ хэлэх ёстой” гэж ярихыг сонслоо. Дарамталж байна гэж урьд нь нэг ч удаа гомдол мэдүүлээгүй мөртлөө МАХН-ын ба АН-ын нэр дэвшигчдийг сурталчилсан мэдээ, сурвалжлага, ярилцлагыг өдөр ч, шөнө ч хулгайгаар нэвтрүүлж, бас хоёр том намын даргын “дарамт”-нд” орж тэдний мэтгэлцээнийг зохион байгуулах гэж оролдоод баригдсан билээ. Тэгэхлээр Наранбаатар захирал маш дуртайгаар дарамтлуулсан бололтой.

Онц байдлын дөрвөн өдөр бүр хачин юмнууд болжээ. Засгийн газрын хэвлэлийн албаны дарга Б.Батбаатар Монгол телевиз дээр бүрэн эрхт төлөөлөгч аятай ирээд суучихсан юм байна. “Үндэсний телевизээр явж байгаа мэдээ мэдээллийг зөвхөн факсаар хүргүүлээд байх нь учир дутагдалтай байна, чи очоод Наранбаатартай уулзаач, би түүнтэй утсаар ярилаа гэсэн. Энэ бол Онцгой байдлын штабын дарга Мөнх-Оргилын хэлсэн үг шүү. Очиж уулзаад та хоёр ажил төрлөө зохицуулаад явуулаач ээ гэсэн. Ингээд би 7-р сарын 2-ны үдээс хойш 16 цагийн үед телевиз дээр очсон. Тэгэхэд үндэсний телевиз ердийн журмаар нэвтрүүлгээ явуулаад Мөнхтөр ерөнхий редактор нь сууж байсан. Наранбаатар, ерөнхий редактор бид гурав уулзаад сууж байхад Үндэсний зөвлөл сая хуралдаад онц байдлын дагуу хуулийнхаа дагуу ажиллах юм байна гэсэн шийдвэр гаргалаа гэсэн. Энэ талаараа тайлбарлах хэрэгтэй гээд тэр өдөр, маргааш нь хэд хэдэн удаа дамжуулсан… Ер нь гарч байсан мэдээлэл онцгой байдлын штабын шугамаар ирж байсан үүрэг даалгаврын дагуу хийж байсан мэдээ мэдээлэл. Тэрнээс биш бид хэн нэгний мэдээ мэдээллийг энийг хэрэггүй гэж хасч хаяагүй, энийг заавал оруул гэж шахаад тулгасан юм огт байхгүй. Үүнийг би баталгаатай хэлж чадна”

Анзаарав уу?  Онц байдлын штабыг төлөөлсөн Батбаатар дарга МҮОНТ-ийг яагаа ч үгүй, “мэдээллийг факсаар явуулахад учир дутагдалтай” байсан учраас тэнд очоод тетрис тоглож суусан, тэрнээс биш хэн нэгний мэдээ мэдээллийг хасч хаяагүй, шахаад тулгасан юм огт байхгүй гэж баталгаатай хэллээ. Өөрөөр хэлбэл, МҮОНТ “хасч хаяхаар” мэдээ сурвалжлага бэлтгээгүй , цаашилбал, 1-р эмнэлгийн хажууд хүмүүс амиа алдсан тухай сурвалжлагыг өөрсдөө хассан, хомроглон баригдаж албадан саатуулагдсан хэдэн зуун хүмүүсийн талаар өөрөө л сурвалжлаагүй 3 хоносон юм байна. Үндэсний зөвлөлийн гаргасан шийдвэр ийм болж таарлаа.

Нэгэнт Батбаатар дарга хажууд суучихаад явж өгөхгүй байсан учраас онц байдлын штабын мэдээг дамжуулахаас өөр аргагүйдсэн гэж бодьё. Тэгвэл онц байдлын штабын биш мэдээ, сурвалжлагууд хаана байв? Өнөөдөр онц байдал дуусаад бараг долоо хоносон ч өнгөрсөн 4 хоногийн алдсанаа нөхсөн мэдээ, эрэн сурвалжлага, олон өнцөг, байр суурь Монголын хамгийн том телевизийн дэлгэцэн дээр үзэгдэхгүй хэвээрээ. Нөгөө л зөвшөөрөлтэй албан мэдээнүүд.  Ашгүй наадам эхэлж бүх юм баяр ёслол болж хувирч энэ сэдвийг бүгд мартав.

Хүний эрхийн дэд хорооны хуралдаан дээр З.Энхболд гишүүн “Монголын мэдээ “ агентлагын зураглаачийг зандарсан нь эвгүй харагдсан, гэхдээ М.Наранбаатар, Б.Пүрэвдаш хоёр огцорвол таарна, МҮОНРТ-д өгдөг 8 тэрбум төгрөг хайран байна, татан буулгаад энэ мөнгийг арилжааны телевизүүдэд өгвөл таарна гэсэн түүний үг зарим зүйлийг бодогдууллаа.

МҮОНТ жил бүр татвар төлөгчдийн 8 тэрбум төгрөгийг авч байгаа бол хариуд нь ямар нэвтрүүлэг үзүүлж байгааг хэн үнэлж дүгнэж байна вэ? Жирийн үзэгч хэлэхлээр тоохгүй. УИХ-ын гишүүд юм хэлэхлээр өөдөөс нь хэрэлддэг болж.

Уг нь хуулиараа бол Үндэсний зөвлөл үнэлж дүгнэх ёстой. Гэтэл зөвлөлийн 15 гишүүн бараг бүгдээрээ намын гишүүд бөгөөд МАХН ба АН гишүүдийн тооны харьцаа ойролцоогоор 2:1. Тэд хоёр намаа дууриан зөвшилцөж МАХН-ын талынхны дэмжсэнээр Ерөнхий захирлаар М.Наранбаатарыг, харин АН-ын талынханд хувийг нь хүртээж телевизийн захирлаар Женко Баттулгын хүн гэгдэх Ц.Мөнхбаатарыг томилсон учраас тэдэнтэй хариуцлага тооцож чадахгүй.

Цаашилбал, Үндэсний зөвлөл өөрөө ямар ч хариуцлага хүлээхгүй. Яагаад гэвэл УИХ-аас 6 жилийн хугацаатай томилчихсон. Ингээд  МҮОНТ-ын нэвтрүүлэг сайн муу ямар байгаа, нэрийг нь зүүж, мөнгийг нь үрж байгаа олон нийтийн эрх ашигт хэр нийцэж байгааг хэн ч хянахгүй болжээ. Хараат бус байх, бодит мэдээлэл олж авах иргэний эрхийг хүндэтгэх, олон ургальч үзэл, ил тод байдлыг эрхэмлэх зарчмууд байтугай  “Олон нийтийн радио, телевизээр нэвтрүүлэх зар сурталчилгааны нийт хугацаа тухайн өдрийн нэвтрүүлгийн цагийн хоёр хувиас хэтрэхгүй байна”, “Олон нийтийн радио, телевизээр арилжааны болон далд зар сурталчилгаа нэвтрүүлэхийг хориглоно”, “улс орны болон дэлхий дахины амьдралын цаг үеийн шинжтэй үйл явдлын талаархи тогтмол мэдээллийн хөтөлбөрийн дундуур зар сурталчилгаа нэвтрүүлэхгүй байх, мөн ийм мэдээллийн нэвтрүүлэгч зар сурталчилгаа бэлтгэх, бүтээх, дамжуулахад оролцохгүй байх” зэрэг тов тодорхой заалтуудыг улаан цайм гишгэлж байгааг харсаар байж Үндэсний зөвлөл нэг ч үсэг дуугараагүй, өнгөрсөн сонгуулиар УИХ-ын сонгуулийн хуулийг хамар дор нь зөрчөөд  байхад юу ч “олж хараагүй” билээ. Саяын сонгуулиар гурав нь нэр дэвшсэн учраас тэр. Харин энэ өдөр өөрсдийн томилсон захирлуудтайгаа нийлж төрийн түшээдтэй хэрүүл хийж сууцгаав.

Posted in 2008.07.01, Монголын Үндэсний Олон Нийтийн Телевиз | 2 Comments »

МҮОНТ-ийн Үндэсний зөвлөл 3 нэр дэвшигчтэй байжээ

Posted by Ажиглагч on 2008/07/08

Олон нийтийн радио, телевизийн тухай хуулийн текстийг үзэж байгаад сонин юм олж харлаа. “Олон нийтийн радио, телевизийн удирдлага, зохион байгуулалт” гэсэн 4-р бүлгийн 21.10-т “Үндэсний зөвлөлийн гишүүн Монгол Улсын Ерөнхийлөгч, Монгол Улсын Их Хурал болон аймаг, нийслэл, сум, дүүргийн иргэдийн Төлөөлөгчдийн Хурлын сонгуульд нэр дэвшсэн тохиолдолд түүнийг Yндэсний зөвлөлийн гишүүнээс чөлөөлнө” гэж бичсэн байх юм.

Тэгвэл саяын УИХ-ын сонгуулиар Үндэсний зөвлөлийн гишүүн Р.Бурмаа АН-аас нийслэлийн Чингэлтэй дүүргийн 24-р тойрогт, Р.Хадбаатар МАХН-аас Хөвсгөл аймгийн 17-р тойрогт, харин Ж.Занаа бие дааж Хан-Уул дүүргийн 21-р тойрогт тус тус нэр дэвшсэн билээ.

Хуулинд “..нэр дэвшсэн тохиолдолд … чөлөөлнө” гэж заасан нь бүрэн чөлөөлөх биш, зөвхөн сонгуулийн кампанит ажлын хугацаанд түдгэлзүүлэх тухай ойлголт бололтой. Өөрөөр хэлбэл, МҮОНРТ-ийн үндэсний зөвлөлийн гишүүн аль нэг намын өмнөөс сонгуульд нэр дэвшиж хэн болохоо харуулчихаад ялагдангуутаа буцаж ирээд олон нийтийн эрх ашиг, нэвтрүүлгийн хараат бус бодлого энэ тэрийг ярьж сууж болдог юм байна. Өнөөдөр УИХ-ын хүний эрхийн дэд хорооны хуралдаанд Yндэсний зөвлөлийг төлөөлөн Р.Бурмаа, Ж.Занаа хоёр оролцжээ.

Posted in 2008.07.01, Монголын Үндэсний Олон Нийтийн Телевиз | Leave a Comment »

Ийгл телевиз тэр орой юуг буруу хийсэн бэ?

Posted by Ажиглагч on 2008/07/06

Сүүлийн хэдэн өдөр “Ийгл” телевизийг 2008 оны 7-р сарын 1-ны өдрөөс эхлэн шөнө дунд хүртэл шууд нэвтрүүлэг явуулсных нь төлөө нэлээд шүүмжилж байгаа билээ. Тухайлбал, 2008 оны 7-р сарын 5-ны орой буюу онц байдлын сүүлчийн өдөр МҮОНТ-ийн студийг эзэгнэсэн дэд хурандаа Т.Сайнжаргал “Ийгл” телевизийг “илчилсэн” бичлэг авчирч үзүүлсэн байна.

Хөтлөгч:
– Ерөнхийдөө хэвлэл мэдээллийн байгууллага маань нийгэмд өндөр хариуцлагыг үүрч явдаг… Олон нийтэд өгсөн мэдээ, мэдээллүүдийн дунд ямар нэгэн байдлаар буруу ойлголт төрүүлэх, ташаа мэдээлэл өгөх зэргээр олон сөрөг үр дагаврууд гарсныг мэргэжлийн  байгууллагууд хянаж эхлээд байгаа юм байна.

Ийгл телевизийн нэвтрүүлгийн хэсэг. Сурвалжлагч Соёлмаа:
– Сонгуулийг эсэргүүцэж байгааг үзэгчид маань ойлгож байгаа байх …
Студи руу утсаар холбогдсон үзэгчийн ярианы хэсэг:
– …хатуу байлгах хэрэгтэй. Монголын ард түмнийг хүлцэнгүй номхон хонь шиг гэж их басамжлаад байвал…[сайн сонсогдсонгүй. Гэхдээ нэлээд хатуу үгс хэлэв бололтой

Студид үргэлжилсэн яриа. Дэд хурандаа Сайнжаргал.
– СЕХ-ны албан ёсны дүн гаргаагүй байхад ийм асуудал боссон. Үүнийг сонгуулийн дүнг эсэргүүцэж байна гэж тайлбарлаж болохгүй. Бид энүүгээр хэвлэлийн эрх чөлөөг хязгаарлаж байгаа биш… Нийгмийн эмх замбараагуй байдал бий болоход тодорхой хэмжээгээр хэвлэл мэдээлэл, сэтгүүлч буруу ташаа дүгнэлт хийж гаргаснаас болж олон нийтэд буруу ойлголт төрүүлсэн…
Хөтлөгч
– Хүн хүчний [цугларсан хүмүүсийн] тоог нэмэгдүүлэхэд зарим нэг талаар нөлөөлсөн?
Сайнжаргал.
– Тийм зарим нэг байдлаар нөлөөлсөн… Гэр орондоо хэвтэж амарч  болохгүй, иргэдээ та нар ир, нэгд, тэмц гэсэн уриалгуудыг нийтэлсэн …

Тэр үдэш “Ийгл” телевиз яах ёстой байсан бэ? МАХН-ын байрны орчноос шууд нэвтрүүлэг явуулахгүй, бас үзэгчдийн сэтгэгдлийг утсаар авахгүй байсан уу? Дашрамд хэлэхэд, ихэнх үзэгчид үймээн самуун дэгдээгчдийг шүүмжилж байлаа. Тэр тусмаа нэг ч сурвалжлагч, хөтлөгч үймээн самуун, бослого хөдөлгөөнд уриалаагүй…

Posted in 2008.07.01, Ийгл телевиз, Монголын Үндэсний Олон Нийтийн Телевиз, Нийтлэл, нэвтрүүлэг | 3 Comments »

Онц байдал зогсоход зөвхөн хоёр телевиз нээгдэв

Posted by Ажиглагч on 2008/07/06

2008 оны 7-р сарын 5-6-ны шөнө дунд онц байдал бүрэн зогсов. 00 цаг 00 минутаас эхлэн энэ мөчийг тэсч ядан хүлээсэн телевизүүд дөрөв хоногийн турш хураасан мэдээ, сурвалжлагын үер буулгахыг хүлээж суулаа. Өнөөдөр онцгой өдөр, Бямба гариг, маргааш Ням гариг учраас нийслэлчүүд шөнөжин сууж бүх сувгийг нэгэн зэрэг үзэхэд бэлэн байсан биз.

Гэвч шөнө дунд өнгөрөхөд зөвшөөрөгдсөн эрх чөлөөгөө зөвхөн НТВ телевиз эдэлж, үймээн самууны дараах үйл явдлын мэдээ, тухайлбал  албадан саатуулах байрнаас хийсэн, тэгэхдээ хоригдсон залуучуудын уйлалдсан ээж, эгч нартай ярилцсан сурвалжлага үзүүллээ.  Харин TV9 телевиз нэвтрүүлэг явуулах эрх чөлөөг эхлээд уран сайхны кино үзүүлэх эрх чөлөө гэж үзэв. Бусад телевизүүд эфирээ ч нээсэнгүй.

МҮОНТ яав? Онц байдлын штабын мэдлээс ангижирч дэд хурандаа Сайнжаргал буцсан ч нөгөө л албан мэдээ, “Магнайгийн клип”-ээ үргэлжлүүлэв. Араас цэнгээнт нэвтрүүлэг, “Гэрэлтэй цонх”. Цаадуул нь бүтэн дөрөв хоног юу нэвтрүүлэхийг хянасан төдийгүй онц байдал цуцлагдсаны дараа үзүүлэх сурвалжлага хийж бэлтгэж хадгалахыг хүртэл зөвшөөрөөгүй юм болов уу?

P.S: Улаанбаатарт 18 цаг болж байна. “Ийгл” телевизийг, бусад телевизийн ганц нэг мэдээ, сурвалжлагыг эс тооцвол онц байдлыг сайн дураараа үргэлжлүүлсээр байх шиг санагдлаа. Бүгд оройн мэдээллийн хөтөлбөрөөр хамаг юм үзүүлэхээр хүлээж байгаа бололтой.

Posted in + ТЕЛЕВИЗ, 2008.07.01, Монголын Үндэсний Олон Нийтийн Телевиз, НТВ телевиз, TV9 телевиз | Leave a Comment »

МҮОНТ дөрөв хоног “онц” байв

Posted by Ажиглагч on 2008/07/05

Онц байдлын 4 хоног дуусч байна.  Гав ганцаараа нэвтрүүлгээ явуулсан МҮОНРТ-ын онц эрх ч нэгэн зэрэг дуусна. Тэр эрхээ хэрхэн эдэлсэн талаар өөрийн анзаарч мэдсэнээ хуваалцья.

Энэ өдрүүдэд улс төртэй холбогдоогүй бол юу ч яахав гэж бодоод үзүүлсэн нэвтрүүлгүүд нь өвдөг, гуяны булчинг чангалах дасгал заах зэргээр үзэгчдийг тайвшруулах биш бухимдуулсан тул улам сайн цензурдсэн бололтой эфирээ гадаадын танин мэдэхүйн баримтат кино,”Хутагтууд” нэртэй түүхийн цуврал, ялангуяа спорт, наадмын сэдэвтэй нэвтрүүлэг, дуу хөгжим, концертоор дүүргэсээр дөрвөн өдрийг өнгөрөөв. “Өглөө“ хөтөлбөр, “Гэрэлтэй цонх” хэвээр явсан. (Харин “Соёл эрдэнэ” телесэтгүүлийн ээлжит дугаар СТӨ-г сүйтгэсэн тухай байлаа). Ерөнхийдөө МҮОНТ уйтгартай байсан гэж үзэгчид хэлж байна. Нэвтрүүлэг муутай газар гэдгээ харуулчих шиг боллоо.

Эхний хоёр өдөр МҮОНТ мэдээллийн хөтөлбөр болгон “Шуурхай мэдээ” байж УИХ-ын гишүүн, Онц байдлын штабын дарга Ц.Мөнх-Оргилтой хийсэн ярилцлагыг алгасалгүй оруулав.. Тэрбээр энэ дөрөв хоногт “олон ургальч үзэл байхгүй” гэж мэдэгдсэн юм.  Эхэндээ “Шуурхай мэдээ”-гээр үзэгчдийн саналыг утсаар авч байсан ч тэд илт “эсэргүү” юм яриад байсан тул хэд явуулаад хаав. (Бас нэгдүгээр эмнэлгийн урд хоёр залуу хэрхэн буудуулж амиа алдсан талаар эмнэлгийн ажилтнууд болон гэрч нарын яриа бүхий сурвалжлагыг  бэлтгэж үзүүлсэн сэтгүүлч, редакторыг тэр сурвалжлагатай нь хамт эфирээс зайлуулж шийтгэсэн сураг байна).    

Дараа өдөр ҮАБЗ-ийн нарийн бичгийн дарга Ганболдын ярилцлагыг “Шуурхай мэдээ” болгоноор давтав. Харин өчигдрөөс хойш ЦЕГ-ын хэвлэл мэдээллийн төвийн дарга, дэд хурандаа Т.Сайнжаргал “Монголын мэдээ” агентлагийн цорын ганц зочноор томилогдсон мэт байв. Мэдээ болгон Сайнжаргалтай…

Тэрбээр мөрдөн шалгалтын нотлох баримтанд авсан дүрс бичлэгүүд, тухайлбал, Иргэний хөдөлгөөний намын О.Магнай “Одоо араас манай хүч ирж байна. Цөмөөрөө дахиад МАХН-ын байр луу дайрч орно” хэмээн хашгирч байгаа, бас “Отгонжаргалын Магнай” гэсэн бичигтэй малгай өмссөн залуу “Баярмагнай гэдэг хүнээс сая төгрөг авсан” тухайгаа хэлсэн байгаа “клипийг” тэр оройжин, бас өнөөдрийн турш өглөөнөөс орой болтол товч болон арай дэлгэрэнгүй хувилбараар нэвтрүүлж, ингэхдээ “Шагналын эзэн” нэртэй 10 хүүхдээ хүмүүжүүлж байгаа ээжийн тухай аятайхан кино үзүүлж байсныг тэг дундуур нь тасалж байгаад хүртэл үзүүлэв. 

  

Сайнжаргал үүнийг тайлбарлахаа “үймээн самууныг өдөөн турхирсан жинхэнэ эзэд нь хариуцлагаас мултрах бий гэсэн иргэдийн санал хүсэлтийн дагуу үзүүлж байгаа юм” гэв.  Иргэдийн санал хүсэлтийг хэлүүлэхгүй байгаа мөртлөө түүнийг биелүүлж,  мөрдөн шалгалт дуусаагүй байхад зөвхөн Магнайн эсрэг нотлох баримтыг хэдэн янзаар бэлтгэж МҮОНТ-ээр байн байн үзүүлж байгааг үзээд түүнийг баривчлахын тулд олон нийтийн санаа бодлыг бэлтгэж байна уу гэж бодоход хүрсэн шүү. Одоо “жинхэнэ эзэн” бол Магнай гэдгийг үзэгчид цээжилж авсан байж таарна.

Бусад мэдээ сурвалжлага юуны тухай байсан бэ? Сонинууд лав гурав хоног шуугиж байгаа албадан саатуулах байранд хоригдсон хүмүүсийн тухай сурвалжлагыг дөнгөж өнөөдөр 15 цагийн мэдээгээр үзүүлсэн байх жишээтэй.

МҮОНТ энэ хэдэн  өдөр Цагдаагийн ерөнхий газрын дэргэдэх студи шиг ажиллав.

Өөр хэдэн ажиглалт.

Энэ өдрүүдэд уриалга, мэдэгдэл гаргасан төрийн бус олон байгуулагаас “Хөх Монгол” бүлгэм, “Даяар Монгол” хөдөлгөөний уриалгыг онцолж “Цагийн хүрд”-ээр хэдэнтээ яриулав. Хас тэмдэг зүүж нацист маягаар хувцасласан эдгээр залуусаас монголын залуучууд үлгэр дууриал авч хууль сахихыг заалгахнээ.

MM Today news-ийг Монголын Үндэсний телевиз гэдэг мэдээллийн найдвартай эх сурвалжаас мэдээлэл авахыг хүсдэг Монголд суугаа гадаадынханд зориулсан хөтөлбөр гэж боддог  байлаа. Гэтэл Баасан гаригийн дугаараар Улаанбаатарт болсон жагсаал цуглааны талаар дэлхийн вэб сайтууд  юу бичсэнийг харуулав. Цаадуул нь мэл гайхсан биз.

Иймэрхүү сул өдрүүдэд  телевизээр хуучны монгол кино үзүүлдэгсэн. Харин энэ удаад болохгүй,  яагаад гэвэл хуучны монгол кинонууд тэр чигээрээ улс төр юм байна.  (Үүнийг бид саяын сонгуулиар ханатлаа харсан)

P.S: Онц байдлын дөрөвдэх өдрийн төгсгөл рүү МҮОНТ арай чөлөөтэй болж телевизүүдийн холбооны хэвлэлийн бага хурлыг дамжуулж (З.Алтай тэргүүтэй захирлууд тэр чигээрээ улс төрийн мэдэгдэл хийв), үймээн самууны талаар сэтгүүлчид болон нэр алдартай хүмүүсийн сэтгэгдлээс бүрдсэн хоёр нэвтрүүлэг гаргалаа. Ямар ч байсан уйтгартай биш.

Posted in 2008.07.01, Ийгл телевиз, Монголын Үндэсний Олон Нийтийн Телевиз | 1 Comment »

Монгол хэлээр хоёр телевиз нэвтрүүлгээ явуулж байна

Posted by Ажиглагч on 2008/07/02

Тэр шөнө Монгол Улсын Ерөнхийлөгч Н.Энхбаяр зарлиг гаргаж 2008 оны 7 дугаар сарын 1-ний 23.30-аас эхлэн Улаанбаатар хотын нутаг дэвсгэрт онц байдлыг дөрөв хоногийн хугацаатай зарласан билээ. Хамгийн түрүүнд жагсаал цуглааныг хориглож хотын төвд хол хорьсон нь ойлгомжтой. Харин Үндэсний олон нийтийн радио, телевизээс бусад телевизийн үйл ажиллагааг онцгой байдлыг цуцлах хүртэл зогсоосон нь санаандгүй байлаа.

Эхлээд TV90 телевиз Ерөнхийлөгчийн зарлигыг уншингуутаа яг 24 цагт нэвтрүүлгээ дуусгаж, араас нь бусад телевизийн дэлгэц ээлж дараалан жирэлзлээ. Монгол улсад ганцхан телевизтэй өдрүүд эхэллээ. Сонин санагдаж байсан шүү. Хэдхэн минутийн өмнө арван хэдэн сувгийн дунд эргэлдэж байсан бол одоо гав[тай] ганц. Ихэнх айлууд кабельтай болохоор олон суваг үздэг хэвээрээ ч монгол хэлээр гэвэл МҮОНТ-ээс гадна Өвөр монголын алдарт “Одон” телевиз л нам, засгийнхаа бодлого шийдвэрийн ягштал баримталж илүү дутуу юм үзүүлж харуулалгүй, улс төрийн алдаа зөрчилгүй ажиллаж байгааг дурдья. (Харин өнгөрсөн хавар Түвдэд бослого хөдөлгөөн гарахад “Одон” телевиз хаагдаагүй, гэхдээ мэдээж томоотой байсан)

Ерөнхийлөгчийн зарлигт олон нийтийн радио, телевизээс “бусад телевизийн үйл ажиллагааг” гэж дурдсанаас биш “бусад радио” гэж алга.  Өнөөдөр FM радионуудын долгионыг бүгдийг хайж олоход Монголын радиогоос бусад нь шижигнэж шажигнасан чимээгээр мэндчилж байх юм. Зарлигт дурдаагүй мэдээллийн хэрэгслийг амыг хэн барив? (Зарим FM радиог шатааж сүйтгэсэн тухай мэдээлсэн, тэгвэл бусад нь?)

Арилжааны телевизүүд зарлигыг дуулгавартай дагасан байна. Ноднин Зар сурталчилгааны хуулинд өчүүхэн өөрчлөлт оруулж рекламанд цагийн хязгаарлалт тавих яриа гарангуут “телевизүүд юугаа яахаа төр засгаар хэрхэвч заалгахгүй” гэж З.Алтай, бас TV5-ын ерөнхий зөвлөх гэсэн хуурамч албан тушаалтай эзэн Д.Сарангэрэл хоёр мөн ч их сүржигнэсэн дээ. Одоо дуугаа хураасан нь (ядахдаа “нэвтрүүлгээ гаргамаар л байна, даанч ерөнхийлөгч…” гэсэн гомдол ч хэлэхгүй юм) төр засгаа дээдэлснийх биш, харин сонгуулийн сурталчилгааны кампаниар эфирийн цагаа намууд болон нэр дэвшигчдэд бөөнөөр болон ширхэглэн худалдаж хэдэн арван тэрбум төгрөгийн орлого олчихсон, харин одоо амсхийж болно гэж үзсэнийх.

Ашиг, орлого буюу мөнгөнийхөө төлөө чангаас чанга дуугарч хамгаалж чаддаг, харин зарчмыг бол үгүй юм байна.

Posted in + ТЕЛЕВИЗ, 2008.07.01, Монголын Үндэсний Олон Нийтийн Телевиз | 1 Comment »

2008 оны 7-р сарын 2. “Дэлхийд танигдсан Монгол брэнд”

Posted by Ажиглагч on 2008/07/02

 

Харамсалтай нь яг өнөөдөр “Дэлхийд танигдсан монгол брэнд” огт өөр харагдаж байна. Тэгээд энэхүү брэндийг зөвхөн МҮОНТ-ээр рекламын од энэ залуу тайлбарлан таниулж байв.

Posted in 2008.07.01, Монголын Үндэсний Олон Нийтийн Телевиз | Leave a Comment »