АЖИГЛАГЧ

Монголд, Монголын хэвлэл мэдээлэлд юу болж байна?

Archive for the ‘Монголын Үндэсний Олон Нийтийн Телевиз’ Category

Зайсан толгой бүслэгдлээ.

Posted by Бид on 2010/06/20

Дархан цаазат Богд хан уулын Зайсангийн амыг барилгаар дүүргэсэн багадаад одоо голд нь торойх Зайсан толгой руу өнгөлзөж өнгөрч буй долоо хоногт “Собт трэйд” нэртэй компани баруун хойт энгэрийг нь хашаалж хүнд техник аваачин ухаж эхэлсэн байна. Энэ бол “Оюуны ундраа” холдингийн нууц охин компани бөгөөд өөрийн босс – УИХ-ын гишүүн, Онцгой байдлын сайд асан С.Отгонбаярын мандан бадралын 2005-2007 оны хооронд аялал жуулчлал хэмээх гэм хоргүй нэрээр (эндхийн бусад бүх барилгуудтай адил) газрын зөвшөөрөл авч хадгалаад одоо БОАЖЯ-наас уг зөвшөөрлийг цуцалсныг мэдэнгүүтээ нуувчнаасаа гарч давшилтанд орсон хэрэг. Тэнд хөшөө дурсгалд мөнхөрсөн зөвлөлтийн дайчид дуугарах биш…

Үүнийг мэдсэн мэргэжлийн хяналтын байцаагчид очиж ажлаа зогсоохыг шаардан, улмаар хэвлэл мэдээллийнхэн шавж бөөн шуугиан дэгдлээ. “Собт трэйд” компанид Зайсангийн энгэрт барилга барих зөвшөөрөл байхгүй, байх ч ёсгүй ажээ. Гэсэн ч тэд том самбар, газрын диваажин байгуулах гайхамшигтай төсөл, хөрөнгө оруулалтын 20 сая доллар, бас зураг төсөлд зарцуулсан 2 сая доллар гэсэн сүрдмээр тоонуудаар гайхуулах, шантаажлахыг хослуулж гарлаа.

Хачирхалтай нь 6-р сарын 16-ны Лхагва гаригийн орой манай хэдэн “том” телевиз “Собт трэйд”-ийн охин телевизүүд шиг аашлав.

МҮОНТ-ийн “Цагийн хүрд” мэдээллийн хөтөлбөр:

Оршин суугчид нь нэг саяас давж дэлхийн томоохон хотын жагсаалтанд багтсан хэдий ч Улаанбаатар хотын иргэд чөлөөт цагаа зөв боловсон өнгөрөөх нэг ч газаргүй өнөөдрийг хүрч байгаа юм. Байгаа ганцад нь Зайсан толгой тооцогдож байгаа ч асдаг гэрэлгүй, суудаг сандалгүй, хогондоо дарагдсан байдалтай өдөр хоногийг өнгөрөөж байна. Энэ байдлыг өөрчлөхөөр “Собт трэйд” компани 10 сая долларын хөрөнгө оруулалт бүхий цогцолбор төслийг хэрэгжүүлэхээр бэлтгэл ажлаа холбогдох шаардлагатай бүхий л баримт бичгээ бүрдүүлээд шаваа тавьж ажлаа эхлэх гэтэл гэнэт л түүх, соёлын дурсгалт газар гэсэн шалтгаанаар Байгаль орчны яам зөвшөөрлийг нь цуцлахаар болжээ. Гэтэл Боловрсол, соёл, шинжлэх ухааны яамнаас өгсөн албан бичигт манай улсын түүх соёлын дурсгалт газрын жагсаалтанд байдаггүй гэдгийг дурдсан байна. Энэ бүхий эцэст бүтээн байгуулалтын том ажлын зөвхөн бэлтгэлийг нь хангахад 2 сая гаруй долларын зардал гаргачихаад байгаа “Собт трэйд” компанийнхан хохироход хүрээд байна.

“Зайсан” соёл амралтын цогцолбор төслийн менежер Э.Даваадорж

– “Собт трэйд” компани 2005 онд Байгаль орчны яамнаас зохих журмын дагуу энд аялал жуулчлалын зориулалтаар үйл ажиллагаа явуулахаар зөвшөөрлийг аваад Байгаль орчны урьдчилсан үнэлгээ гэх мэтчилэн шаардагдах бүх бичиг баримт, судалгаа шинжилгээний ажилдаа орж өнөөдрийг хүртэл энэ төслийг урагшлуулахаар хүч зав гарган зарцуулах ажиллаж байна. Энд байшин барилга барихад зүгээр нэг өнөөдөр зөвшөөрлөө аваад маргааш барьчихдаг асуудал биш.

Мянганы зам, Чингэсийн хөшөө гээд монголчуудын бүтээн байгуулалтын томоохон төслүүд амжилттай хэрэгжиж өнөөдөр бид үр дүнг нь хүртэж байгаа ч тухайн үедээ ямар их хэл ам дагуулж болохгүй бүтэхгүйгээр нь дуудаж байсныг үзэгч та бүхэн санаж байгаа. Тэгвэл тухлаад суучих сандалгүй, нар хаах саравчгүй Зайсан толгойд үндэснийхээ түүх соёлыг илтгэн харуулсан, өөрөөр хэлбэл байгалын түүхийн болон угсаатны цогцолбор, усан оргилуур бүхий ногоон байгууламжийг барьж байгуулах энэ төслийг эхлүүлэхэд яагаад ийм их хүнд суртал саад бэрхшээл тулгараад байгааг “Собт трэйд” компанийнхан ойлгохгүй байна.

Зайсан соёл амралтын цогцолбор төслийн менежер Э.Даваадорж

– Бид хууль дүрмийн дагуу барилга эхлүүлэх зөвшөөрлөөс эхлүүлээд газрын лиценз бүх юм хууль дүрмийн дагуу явж байсан. Газрын зөвшөөрөл ном журмын дагуу төлж ирсэн. Түүнээс гадна энэ цогцолбор, энэтэйгээ хамааруулж бид зөвхөн байшингаа бариад зогсохгүй энд усан оргилуурын төв ногоон байгууламж, энэ бүх зураг төслийг цогц байдлаар шийдсэн байгаа.

Зайсан толгойд Монгол-Зөвлөлтийн найрамдлын билэг тэмдэг учраас одоо байгаа хөшөө дурсгалыг шинэчлэх засварлаж арчлалт хамгаалалтыг нь хариуцах үүргийг ч тус компанийхан өөрсдөө үүрсэн байна. Түүнчлэн одоогийн байдлыг нь хадгалах үүднээс маш бага хэмжээний гадсан суурийн ухалтыг хийж байгаль экологид хохирол учруулахгүй байхаар төлөвлөжээ [Сурвалжлага төгсөв]

Үнэхээр тийм үү? Яаж мэдэж байна аа? Хэрвээ сурвалжлага цааш үргэлжилсэн бол “Собт трэйд”-ийн тухай шүлэг дуунд шилжих байсан биз.

Харин уг асуудалд өөр тайлбар өгсөн мэргэжлийн хяналтынхныг ор тас “мартсан”-аа санаж хаяагаа манахаар шийдсэн үү, эсвэл “Собт трэйд”-эд улам илүү таалагдахийг хүссэн үү, дахиад нэг сурвалжлагыг бэлтгэж маргаашийн “Цагийн хүрд”-ээр үзүүлэв. Ингэхдээ мэргэжлийн хяналтын байцаагчийн ярианаас “Собт трэйд”-тэй холбоотой хэсгийг бүрэн хассан төдийгүй өмнөөс нь “Зайсанд баригдсан өндөр барилгуудыг монголын төр буулгаж чадахгүй” хэмээн барьцаж, бас тэнд газар авсан “Жигүүр гранд” (хэд хоногийн өмнө өмөөрөөд байсансан), Мантууш зэрэг компаниудын нэрийг дуудан дахин барьцаж өгөөд “одоо бол өнгөрсөн” гэсэн дүгнэлтээр төгсгөв.

“Собт трэйд” ялна гэсэн үг. Энэ нь Зайсангийн баруун бэлд томоос том хашаа хатгаад чимээгүйхэн хүлээж суугаа нэр нь үл мэдэгдэх компаниудад “урагшаа” гэсэн дохио юм. Хэрвээ мэргэжлийн хяналтын ирж элдэв юм ярьж шуугиан дэгдээвэл тэд МҮОНТ тэргүүтэй телевизүүдтэй “тулж ажиллах”, бас хажууханд нь ордонгоо барьсан Үндсэн хуулийн цэцтэй барьцахаа мэддэг боллоо. 

Мөн МҮОНТ-ийн зэрэгцээ TV9, TV5 телевизүүд бараг ижилхэн сурвалжлагуудыг үзүүлсэн юм.

Зайсан толгой бүслэлтэнд оржээ. Хажуу бөөрнөөс нь барилгын компаниуд, хаа холоос телевизүүд галлаж байна.

“Собт трэйд” компани энэхүү самбартаа амалснаас үзэхүл, “Зайсан соёл амралтын төв” баригдсанаар Зайсангийн амны бусад бүх барилга алга болж онгон дагшин байгаль сэргэнэ. Ганцхан Зөвлөлтийн дайчдын хөшөө цогцолбор үлдэхийг зөвшөөрчээ. Гэхдээ цаадуул нь эргэж барьцаад буцаагаад барилгаар  дүүргэж л таарна.

P.S: Собт гэж Зайсан бол С.ОтгонБаярын Толгой гэнэ.

Posted in Монголын Үндэсний Олон Нийтийн Телевиз | 7 Comments »

Ханан хэрмэн дэх цоорхойнууд

Posted by Бид on 2010/06/16

Монгол Улсын 3 дахь Ерөнхийлөгч Н.Энхбаяр саяхан хана хэрэмний тухай нийтлэл бичсэн гэнэ. Бичихээс ч өөр аргагүй. 2008 оны Ерөнхийлөгчийн сонгуульд ялагдаад намдаа гоморхож олон юм ярьсан тул МАХН нь хүртэл түлхэж гаргаад өмнүүрээ хана босгочихсон. Гэхдээ тэр хананд TV9 телевиз гэдэг овоо том цоорхой үргэлж байхын хажуугаар олон нийтийн телевиз сэм сэмхэн цоорч өгөөд байна.

Өнгөрсөн өвөл, хавар Монгол Улсын 3 дахь Ерөнхийлөгч Н.Энхбаярын удирдсан “Хөдөөгийн хөгжлийн төв” төрийн бус байгууллагаас малчдад тусалсан, Тужийн нарсанд мод тарьсан зэрэг арга хэмжээ бүрийг алгасалгүй сурталчиллаа.

6-р сарын 1-нд Монгол Улсын 3 дахь ерөнхийлөгч Н.Энхбаяр хүүхдүүдтэй хамт төрсөн өдрөө тэмдэглэснийг үзүүлсэн ба 9-ны үдэш энэ үйл явдлаар бэлтгэсэн “Бидний мөрөөдөл” тусгай нэвтрүүлэг гаргав. Маргааш нь Монгол Улсын 3 дахь ерөнхийлөгч Н.Энхбаяр Баян-Өлгий аймгийн мөнх цаст Сайр хайрхны оргилд 58 уулчинтай хамт амжилттай авирсан тухай сурвалжлага түүний яриатайгаар нэвтэрлээ. Араас нь Монгол Улсын 3 дахь ерөнхийлөгч Н.Энхбаяр нутгийн иргэдтэй уулзаж санал бодлыг нь сонссон болон Толбо сумын малчныд зочилсон тухай сурвалжлага ….

“Монгол Улсын 3 дахь Ерөнхийлөгч” гэдэг албан тушаалтай хүний ажил их.

Posted in Монголын Үндэсний Олон Нийтийн Телевиз | 4 Comments »

“Ярилцъя” биш “Пиардая”

Posted by Бид on 2010/06/14

Ням гаригийн үдэш 19.30-аас МҮОНТ хөтөлбөртөө “Нүүр тулсан яриа” шууд ярилцлага оруулж сэтгүүлч Ц.Мөнхтөр “Жаст” группийн ерөнхийлөгч Ш.Батхүүтэй ярилцлаа. Ноднин Олон овоотын лицензийг “Монгол газар”-ын Мянганбаяраас авч асар их нөөцтэй алтны ордыг эзэмшсэн мөртлөө өрийг нь дараа төлөхөөр даналзаж байгаа тэрбээр олон нийтийн телевизийг хүссэн цагтаа захиалдаг болсны ээлжит нотолгоо энэ. Хэдэн зуун тэрбумыг зээлдүүлсэн тал таг дуугүй болсны учир начир манай сэтгүүлчдийн ухаж төнхөх ёстой ганц асуудал билээ.

Хөтлөгч эхлээд “Жаст” компани монголчуудын бахархал, төгс төгөлдөр компани болох, компанийн засаглал, бизнесийн хариуцлага, ам ажлын зөрүү энэ тэрийг асууж хэсэг нялуураад эрхэлдэг бизнесүүдийг нь нэг нэгээр магтуулав. Нефть бүтээгдэхүүний оруулдаг, мах бэлтгэдэг, Хадгаламж банкийг хувьчилсан, мэдээж Олон овоотын лиценз хэрхэн авсан тухай байлаа. Урьд нь ярилцаж сайтар бэлтгэжээ. Дараа монгол бахархалын тухай буюу Жастаар бахархсан асуулт. Төгсгөлд нь “Монголын төр бизнес эрхлэгчдэд хэр тус болж байна аа?” гэж төрийн дарамт шахалт, хөөрхий Батхүүгийн зовлон зүдгүүрийг яриулж тал засахыг оролдсон боловч цаадах нь бөөрөнхийлөөд өнгөрөв. Ийм том луйврыг зүгээр өнгөрөөсөн төрийг яаж муулахав.

МҮОНТ-ийн сэтгүүлч  Мөнхтөр нэрлээгүй л болохоос биш “Пиардая” нэвтрүүлэгтэй болох нь. Түүний Бямба гариг бүр хөтөлдөг “Ярилцъя” нэвтрүүлэг хүртэл пиар тал руугаа яваад байдаг …

P.S: Өнгөрсөн Бямба гаригт бас “Энержи ресурс”-ийн захиалгат нэвтрүүлгийг бэлтгэж хөтлөөд амжжээ.

Posted in Монголын Үндэсний Олон Нийтийн Телевиз | 1 Comment »

C1-ын монополь

Posted by Бид on 2010/06/13

Хэцүү юм болж байна. Улаанбаатарт ямар ч олимп, тэмцээнийг хүлээж аваад орчуулгатайгаар үзүүлж чадах арав гаруй телевиз байсаар байтал Өмнөх Африкт эхэлсэн хөл бөмбөгийн дэлхийн аварга шалгаруулах тэмцээнийг ганцхан C1 телевиз үзүүлж байна.

C1 баталгаатай хийжээ. ФИФА-гаас эрх аваад (Өмнөх дэлхийн аваргынхаас гурав дахин их мөнгө төлсөн гэнэ) Улсын мэргэжлийн хяналтын газар, Оюуны өмчийн газраар дамжуулан бусад бүх телевизэд сануулга өгүүлж энэ удаагийн дэлхийн аваргын тэмцээний дүрс бичлэгийг Монгол улсын нутаг дэвсгэр дээр зөвхөн С1 телевиз цацахыг анхааруулжээ. Бас том компаниудыг энэ талаар бусад телевизүүдтэй хамтран ажиллахыг хориглосон тул АПУ, MCS мэтийн шар айрагны кампаниуд энд тэнд асар байгуулж том дэлгэцэн дээрээ C1-ыг гаргахаас өөр арга үлдсэнгүй.

Энэ байтугай тэмцээнд хамаг юмаа хаяад доргидог телевизүүд чив чимээгүй байх нь өрөвдөлтэй. 11-ны нээлтийн ёслол болоогүй юм шиг кино үзүүлцгээв. Тоглолтуудыг дүнг хулчийсэн мэт хальт мэдээлээд өнгөрлөө. Олон нийтийн телевиз Өмнөд Африк- Мексикийн тоглолтын мэдээг бүр фотогоор харууллаа. TV9 телевиз “Хөөрхөн төрөх албагүй”-гээр тайвшруулж, хааяа өмнөх аваргын шилдэг голуудыг тоймолно. Хөтлөгч Балжинням нь C1 рүү түр “урважээ”. (Харин өнөөдөр хаачив?)

Хамгийн олон үзэгчтэй (өөрсдийнх нь хэлдэг үнэн бол), орон нутагт ганцаараа шууд цацагдаг, спортын мэдээллийн том албатай гээд C1-ээс хамаагүй илүү боломжтой МҮОНТ энэ эрхийг авч чадаагүй гэдэг харамсалтай. Хэдэн сарын өмнөөс үзэгчид бүр хөдөөнөөс утасдаад анхааруулаад байсан гэдэг. Эсвэл эрх худалдаж авах хэдэн мөнгө дутав уу?  Ингээд МҮОНТ-ийн спортын алба нь АСА циркийн арын зүлгэн дээр байгуулагдсан “Африк 2010” хөл бөмбөгийн төв асартай “хамтран ажиллаж” тэнд юу болж байгааг үе үе сурвалжлахад нөгөө C1 гарч байх …  

ФИФА-гийн дүрэм журам ямар байлаа ч  манайх жижиг улсын хэдэн телевиз мөнгөө нийлүүлээд дундаа нэг эрх авч болоогүй юм байх даа?  Телевизүүдийн холбоо хаана байв?

P.S: Дөнгөж сая TV9-ын Инфо сүлжээгээр Сүхбаатар аймгийн Баруун-Урт хотын төв талбайд байрлуулсан 4 х 6 метрийн хэмжээтэй LED дэлгэцийн нээлтийн ёслолоос хийсэн сурвалжлага үзүүлэв. Аймгийн Засаг даргын орлогч ярихдаа тус аймгийн залуучууд хөл бөмбөгийн дэлхийн аварга шалгаруулах тэмцээнийг хамтдаа үзэх боломжтой боллоо гэв. Ямар сувгаар гэдгийг хэлэх илүүц биз.  Даанч тэр талбайд сандал байтугай суучихаар юм харагдаагүй. Нэгмөсөн сандал ширээтэй, гэхдээ задгай асар байгуулж өгөөсэй. Аймгийнхаа хэдэн баарны эзэд рүү дохивол яасан түргэн хийх бол …

Posted in C1 телевиз, Монголын Үндэсний Олон Нийтийн Телевиз | 7 Comments »

МҮОНТ-ийн “Хурлын хүрд”

Posted by Бид on 2010/06/08

2010 оны 6-р сарын 7-ны  Даваа гаригт МҮОНТ-ийн Монголын мэдээ” агентлагийн “Цагийн хүрд” мэдээллийн хөтөлбөрөөр үзүүлсэн мэдээ, сурвалжлагууд бараг бүгд ямар нэгэн хурал, семинар, уулзалт ярилцлагаас хийсэн байхыг анзаарав. Хөдөөнөөс бэлтгэсэн сурвалжлагууд хүртэл хурлын сэдэвтэй. Ганцхан хурал биш байсан нь сурталчилгаа байв.

1. УИХ дахь АН-ын бүлгийн хуралдааны тухай хэвлэлийн хурлаас хийсэн сурвалжлага. Төсвийн тодотголыг хэлэлцжээ. Ч.Сайханбилэгийн яриа.

2. УИХ дахь МАХН-ын бүлгийн хуралдааны тухай хэвлэлийн хурлаас хийсэн сурвалжлага. Таван толгойн асуудлыг хэлэлцжээ. Д.Лүндээжанцангийн яриа.

3. УИХ дахь АН-ын бүлгийн ажлын хэсэг Тавантолгойн асуудлыг хэлэлцсэн тухай  УИХ-ын гишүүн З.Энхболдын яриа.

4. УИХ-ын дарга Дэмбэрэл Дэлхийн банкны төлөөлөгчдийн хүлээн авч уулзсан тухай сурвалжлага

5. МАХН-ын “Ард түмнээ сонсоё” аяны хүрээнд Эрдэнэт хотод иргэдтэй хийсэн уулзалтаас хийсэн сурвалжлага. МАХН-ын ерөнхий нарийн бичгийн дарга Хүрэлсүхийн хэлсэн үгнээс.

6. “Орон нутгийн хөгжил, олон нийтийн оролцоо” чуулга уулзалт Төрийн ордонд болсон тухай сурвалжлага

6. УМХЕГ-аас хүнсний хяналтын байцаагч нараа 10 хоногийн сургалтанд хамруулж байгаа тухай сурвалжлага

7. УМХЕГ-ыхан байгаль орчныг хамгаалах чиглэлээр сарын аян зарласан тухай хэвлэлийн хурлаас хийсэн сурвалжлага.

8. “Энержи ресурс” компани Ухаа худагийн уурхайн дэргэд нисэх буудал барихдаа нөхөн сэргээлт хийж байгаа тухай сурталчилгааны сурвалжлага.

9. Хүний томуугийн H1N1 вирусын асуудлаар болсон үндэсний зөвлөгөөнөөс хийсэн сурвалжлага. Аймгийн ЭМГ-ын дарга нарын яриа. ЭМ-ийн сайд С.Ламбаагийн яриа. Хойт хөршид хүүхдийн халдварт саа өвчний тухай сэрэмжлүүлгийн ЭМГ-ын ажилтны яриа.

10. Завхан аймгийн эмэгтэйчүүдийн чуулганы тухай сурвалжлага. Аймгийн цэцэрлэгийн эрхлэгч зэрэг эмэгтэйчүүдийн яриа.

11. МҮОНТ-ийн хүүхдийн нэвтрүүлгийн тухай судалгааны дүнг танилцуулсан уулзалтаас хийсэн сурвалжлага. Судалгааны албаны дарга Хурцбилэгийн яриа.

12-. Хөдөөгийн иргэдэд цаг агаарын урьдчилан мэдээлэх шинэ сүлжээг танилцуулах уулзалтаас хийсэн сурвалжлага. Газар тариалангийн эрсдэл судлал ТББ-ын тэргүүн Тогтохын яриа.

Цаашаагаа “Монголын мэдээ” агентлагийн технологийн түнш – Summit Computer Systems компани ба Ойн нөхөрлөлийн тухай сурталчилгааны клипүүд гарав.

Төрийн ордонд болдог хурлууд байтугай яам, агентлагт болсон хурлуудыг сурвалжилж байгаа нь багадаад сүүлдээ телевиз дотроо болсон  хурлуудыг сурвалжлан үзүүлдэг болжээ.

Posted in Монголын Үндэсний Олон Нийтийн Телевиз | Leave a Comment »

Монгол 999-ын нүүр царайнууд

Posted by Бид on 2010/06/05

Хэдэн жилийн өмнөөс гадаадаас ирсэн уул уурхайн компаниуд манай хэвлэл мэдээллээр юу хүссэнээ хийлгэж чадахаа харуулсан буюу ид харуулж байгаа бол одоо үндэсний компаниудын ээлж иржээ.

5-р сарын эхээр Монгол 999 (уруугаа харсан 666) нэртэй компаниудын компани байгуулагдав. Би бодохдоо Тавантолгой (мэдээж Энержи Ресурс, орон нутгийн “Тавантолгой” ХК, бас хэдэн луйварчдын сэмхэн гартаа оруулсан хэсгүүдийг хасаад) монголын ард түмний өмч учраас хүн бүрт 2,7 сая хуваасны нэг ногдоно, харин гадаадын болоод дотоодын компаниуд өрсөлдөөд хэн сайн нь зөвшөөрөл авч хөрөнгөө оруулж нүүрс ухаад бидний хувийг төлнө, хэрвээ ашиг гаргаж чадвал өөртөө үлдээх тухай төсөөлж явлаа.

Харин өчигдөр сүрдмээр нэртэй энэ компанийн захирал Тавантолгойг (эсвэл түүний лицензийг эзэмших компанийг) дөрөв хувааж “Эрдэнэс МЖЛ”, Монгол 999, ард түмэн гуравт эзэмшүүлж үлдсэнийг гадаадын хөрөнгийн бирж дээр зарах ёстой тухай  мэдэгдэв. Тэд ард түмний хажуугаар, дээр нь гарч байгаад “илүү тэгш эрхтэй”-гээр Тавантолгойг эзэмшихээр шийджээ. Харин нүүрс ухах ажлыг гадныхныг авчирч хийлгэнэ.  

Энэ мэт олон эргэлзээ байгаа ч ”Монгол 999” юу хийхээ сайн мэдэж юуны өмнө хэвлэл мэдээллийг бөөнөөр болон ширхгээр худалдан авснаар одоо хүмүүсийн толгойд “Үндэсний компаниудаа дэмжицгээе!” урианаас өөр юм бодогдохыг болиулав. Өдөр тутмын сонинуудаар тэдний төлбөртэй мэдээ, ярилцлагуудын хажуугаар хөндлөнгийн байр суурь цухалздаг бол телевизүүд зөвхөн тэдний дуугарснаар дуугарч байна.

Хамгийн том эргэлзээ бол Монгол 999-ын удирдлагууд. Төлөөлөн удирдах зөвлөлд хамгийн сүүлд гэхэд л Олон овоотын лицензийг бултуулж улмаар нэг банкийг дампуурахад хүргэсэн “Монгол газар”-ын Мянганбаярын нэрийг сонссон хүмүүс толгой сэгсэрч эхэлмэгц “Монгол газар”, Жаст групп компанийн хос мэдэгдэл гарган хэвлэл мэдээллээр, түүний дотор бүх телевизээр төлбөртэйгээр зэрэг цацуулж ЖАСТ-ын Батхүү, “Монгол газар”-ын Мянганбаярын захиалгатай ярилцлагуудаар сонинуудыг дүүргэж намжаав.

МҮОНТ-ын “Хариулахгүй ч байж болно” ярилцлагад Ц.Мянганбаяр оролцов. Ямар ч но-той оролцогч хариулаад л баймаар эелдэг асуултууд … Хүслээ, оролцлоо, хариуллаа.

Сонинууд “Зудад малаа алдсан малчдын банкнаас авсан зээлийг хүчингүй болгоно л гэнэ. Тэгвэл барьцаанд лицензээ тавиад алдаж байгаа “Монгол газар”-ын Ц.Мянганбаярын өрийг бас хэрэгсэхгүй болгох байсан юм биш үү. Малчид яагаад төрийн ивээлд багтаж Ц.Мянганбаяр яахаараа “Ганц худаг”-ийн камерт заларчих гээд байдаг юм бэ. Энэ бүгд арчаатай амьдарч яваагийн торгууль биш үү” гэхчлэн нулимс асгаруулах наад захын хэрэг болов.

“25-р суваг” телевизийн “Ам нээвэл…” нэртэй шинэ нэвтрүүлгээр “Цагаан шонхор холдинг” компанийн ерөнхий захирал Ч.Энхтайван ил гарч хүнд бэрх амьдралаа дурслаа.Гэхдээ хамгийн сонирхолтой нь шорон орон биш “Монгол 999” байгуулах санаагаа хэдэн жилийн өмнө бодож олсон тухайгаа уушиг нээсэн явдал юм. Бүх юм түүний санаснаар явж таарлаа. 

Монгол 999-ын дараачийн “брэнд” бол Төлөөлөн удирдах зөвлөлийн даргаар сонгогдсон “Ажнай” Д.Бат-Эрдэнэ юм. Тэрбээр ард түмэндээ хандахад нь хэвлэл мэдээлэл ямар нэгэн тайлбаргүйгээр индэр болж өгөв. Хэрвээ би эндүүрээгүй бол Тавантолгойг хэдийнэ ухаж байгаа Өмнөговь аймгийн орон нутгийн өмчит “Тавантолгой” ХК-ийн 49 хувийн ихэнхийг бөөн хэрүүлтэйгээр хамсан төдийгүй аймгийн удирдлагыг ерөнхийд нь “мэддэг”, 2008 онд УИХ-ын гишүүнээс буумагцаа аймгийн Засаг даргын зөвлөхөөр өөрийгөө томилуулж төрийн хүний дүрд хувираад “Тавантолгой” ХК-ийн ТУЗ-ын дарга болж байсан Бат-Эрдэнэ мөн байна.

P.S: Саяхан Монгол 999-ын ТУЗ-д ордог С.Одонтуяа нар ярихдаа, “зарим компани 50-60 охин компаниа оруулсныг мэдсэн, иймээс 5-р сарын 11-нээс өмнө байгуулагдсан компанийг бүртгэхгүй” гэжээ.  Хэдэн жилийн өмнөөс Монгол 999-ыг  сэдсэн “сайн эрс” аль хэдийнэ амжуулчихжээ. Удалгүй Хадгаламж зээлийн хоршоо шиг хачин юм болох биз.

Энэ олон захирлууд өөрсдийгөө Монгол 999-ын нүүр царай гэж бодож байгаа юм байх даа…

Тэд гэрчилгээгээ авчээ. Сүүлийн хэдэн өдөр монголын бүх сонин энэ талаар шуугиж байна. Төлбөртэйгээр.

Posted in + ТЕЛЕВИЗ, 25-р суваг телевиз, Монголын Үндэсний Олон Нийтийн Телевиз, Улс төр, эдийн засаг | 3 Comments »

“Зам өргөтгөвөл түгжрэл нэмэгдэнэ”

Posted by Бид on 2010/05/30

Өнгөрөгч Бямба гаригт “Монгол үндэстний дууны их наадам. 1-р шатны нэвтрүүлэг” гэж МҮОНТ-ийн хөтөлбөрт зарлагдсан байснаа тэн хагаст нь Хөгжим бүжгийн коллежийн тайлан концерт гарчээ. Universe Best Songs-той өрсөлдөхүйц, тэгэхдээ үндэсний урлагын том шоу хийнэ гэж шоудаад байсан нь бүтээгүй биз. Дараа нь хөтөлбөрт байгаагүй “НУРААЖ ХӨГЖИХ ҮҮ?” нэртэй нэвтрүүлэг гэнэт орж ирэв.

Энэ хавар Баруун 4 замаас баруун тийшхи Энх тайвны өргөн чөлөөг өргөтгөх гэтэл “Жигүүр гранд” компани “Гранд плаза” цогцолбороо барьж ноднин ашиглалтанд оруулахдаа эзэмшсэн газраа хэтрүүлэн машины зогсоол байгуулж түүнийгээ ханаар тусгаарлан явган хүний нарийхан замаас өөр зай үлдээгээгүй тул замын ажил зогсчээ. Ингээд нийслэлийн зүгээс газар чөлөөлж өгөхийг хэдэнтээ шаарджээ.

Шийдэж болох асуудал. Хот төлөвлөлтийг зөрчсөн “Жигүүр гранд” компани алдаагаа засахад хохироод байх юмгүй. Гэтэл тэгсэнгүй. Эхлээд түрээсээр орсон байгууллагуудыг турхирч хэвлэлийн хурал хийлгэж, дараа нь бүр тэгэхээс тэгэх гэж олон нийтийн телевизийг хөлслөн авсэн нь энэ нэвтрүүлэг юм.

“Жигүүр гранд” компанийн ерөнхий инженер, бас тус барилгын архитекторч хоёр “Энэ бол ноднин шагнал авсан гоё барилга… төв зам энэ хэсэгтээ нарийхан байг л дээ…. замын ачаалал дандаа ийм их байхгүй… хэдэн жилээс багасаад машинууд чихэлдэхгүй болно… нийслэлд өөр явах замууд байгаа ” гэх мэтээр хачин тайлбар хийв. Мэргэжлийн ёс зүйгээ умартан хот төлөвлөлтийг нулимсан хүмүүс арьсаа ингэж хамгаалдаг юм байна.

Логогүй микрофон барьсан сэтгүүлч эмэгтэй “Гранд плаза”-д өрөө, талбай түрээсэлдэг учраас эздийнхээ эрхэнд байдаг хүмүүсийг “Өмчлөгчид ярьж байна”, гудамжинд яваа хүмүүсийг иргэдийг “Иргэд ярьж байна” нэрээр баахан ашиглав. Ингэхдээ “Энэ барилга сайхан байна уу?”, “Нэгэнт бүтээн байгуулсан юмыг нураах буруу, тийм ээ?” гэж зальдахад цаадуул нь мэдээж “Яасан гоё барилга вэ!”, “Бүтээн байгуулсныг нурааж болохгүй ээ” гэхгүй хаачихав. Угтаа барилгыг огт хөндөхгүй зөвхөн машины зогсоолоо хэдэн метрийг арагш татах тухай юмсан.

Сүүлдээ сэтгүүлч өөрөө баримжаагаа алдаж “Бүтээн байгуулалтыг ингэж сүйтгэж болох уу? Эвдэж сүйтгэснээр замын түгжрэл багасгана гэж үү? Замын түгжрэлийг багасгахын тулд зам өргөтгөх нь зөв үү? Үүний оронд жолооч нарыг соёлжуулах, утаанд байгаа хорт элементүүдийг багасгах зэргээр гарц олоосой” гэж дэмийрсээр нэвтрүүлгээ дуусгалаа.

Төгсгөлд нь “2010 он” гэснээр өөр нэр хаяг байгаагүй. Баян компанийн гар хөл болж яваа хөөрхий сэтгүүлч ичихдээ нүүрээ нуусан бол ийм хөгийн нэвтрүүлгийг олон нийтийн телевиз огт ичихгүйгээр цацсан байх юм.

    

Posted in Монголын Үндэсний Олон Нийтийн Телевиз | 1 Comment »

Захиалгыг шууд биелүүлэв. Гэхдээ сэмхэн.

Posted by Бид on 2010/05/11

Өнөө орой МҮОНТ-ийн “Цагийн хүрд” мэдээллийн хөтөлбөрөөр үзүүлсэн “Хөшөөтийн уурхайд Мо Эн Ко компани төсөл хэрэгжүүлснээр нааштай өөрчлөлт гарч байна” хэмээсэн оршилтой сурвалжлага нь shuud.mn сайтын сэтгүүлч Ж.Батхишигийн бэлтгэсэн, хэн нэгэн сүүлийн хэдэн өдөр арилжааны сувгуудаар захиалан цацуулж байгаа, “Мянган угалз” ОНАҮГ-ын захирал Д.Энхболд, аймгийн Засаг дарга Г.Нямдаваа, Хөшөөтийн уурхайн ажилтан С.Давааням нарын хүмүүсийн яриа сэлтээс бүтсэн захиалгатай сурвалжлага бараг тэр чигээрээ байх юм. “Цагийн хүрд”-ийн титрийг зүүж өөрийн болгоод орон даяар цацаж өглөө.

Сүүлийн үед “Өнөөдөр” сонин Ховд аймгийн Хөшөөтийн орд газрын асуудлыг “шефэлж” аваад түүнийг стратегийн орд газрын жагсаалтад оруулахыг уриалсан цуврал өгүүлэл нийтэлсэн бол нутгийн иргэд Улаанбаатарт ирж хэвлэлийн хурал зарлан дээрх саналыг дэмжсэн билээ. Маргаж мэтгэлцэх, улмаар шийдэх ёстой асуудал мөнөөс мөн. Үүний тулд бололтой УИХ-ын гишүүн С.Эрдэнэ, Ц.Шинэбаяр нар Хөшөөтөд очиж танилцаад “Хариуцлагатай уул уурхайн загвар дүр зургийг Хөшөөтөөс олж харлаа” гэсэн магтаалтай ирснээр Мо Эн Ко-гийн сурталчилгааны кампанийг хэвлэл мэдээллээр эхлүүлэв. Сонинуудаар Хөшөөтийн их бүтээн байгуулалтын талаар төлбөртэй нийтлэл, ярилцлагууд хөвөрч “Зууны шуудан”-гийн Б.Ганчимэг зэрэг хүнд гарын сэтгүүлчид “Хөшөөтөөс ирж буй сайн мэдээ”-нд гэнэтхэн баясдаг болж, харин телевизүүдээс C1, сайтуудаас Шууд.мн Ховд руу сэтгүүлч Ж.Батхишигийг томилон явуулсны ачаар бүр дуу дүрстэйгээр баясаад зогсохгүй эсрэг байр суурьтай нөхөд рүү “Ховдчуудын аманд орсон 400 саяыг хонзонгоороо булаах сонирхол…” гэх мэтээр уурсаж байна. 

Ингээд УИХ-ын гишүүн С.Эрдэнэ, C1 телевизийн эзэмшил, анх тус телевизийн зөвлөх гэж байсан, одоо shuud.mn сайтын хөрөнгө оруулагч хэмээн яригддаг Монгол банкны дэд ерөнхийлөгч, бас МҮОНТ-ийн Үндэсний зөвлөлийн гишүүн Н.Золжаргал гэх мэтээр бүгд холбогдсоор “Цагийн хүрд”-ийн захиалгат сурвалжлага болон хувирчээ.

Posted in ИНТЕРНЭТ, ХАРИЛЦАА ХОЛБОО, Монголын Үндэсний Олон Нийтийн Телевиз | Leave a Comment »

Дарга дагахуй

Posted by Бид on 2010/04/30

Өнгөрсөн өвлийн зуднаар МҮОНТ-ийн “Монголын мэдээ” агентлагийн сурвалжлагчид зөвхөн УИХ-ын гишүүд, сайд дарга нарын дулаан нөмөрт хөдөөг зорьж байсныг буруутгаад яахав. Хэрвээ MNB гэсэн гурван үсэгтэй цагаан машин цасанд суучихвал аврах ажиллагаа явуулахад наад зах нь үзэгдэхгүй бөөн төвөг удна. Зөвхөн дагаж явсны ачаар жишээлбэл Балдан-Очир гишүүн Завхандаа очоод бөөн өвс тэвэрчихсэн тойргийнхоо үхэр болгонд дөхүүлж өгснийг түүхэнд үлдээж чадсан билээ.

Харин цас ханзарч эхлэнгүүт “Цагийн хүрд”-ийнхэн дөрвөн зүгт бутран одож аймшигт өвлийг арайхийн давсан малчдын амьдралын дүр зургийг тэр чигээр нь татаад авчрах болов уу гэтэл …

Даваа гаригт Булган аймгийн ИТХ дахь Ардчилсан намын хэсэг гишүүд Засаг дарга М.Оюунбатыг огцруулах шаардлага тавьж, нөгөөдөх нь зөвшөөрөхгүй тэмцэлдэж байгааг газар дээрээс сурвалжлан үзүүлэв. Тус аймагт улс төрийн нөхцөл байдал хурцадсан тул АН-ын Ерөнхий нарийн бичгийн дарга Д.Эрдэнэбат Булганыг зорихдоо МҮОНТ-ийг дагуулжээ. 

Мягмар гаригт “Булган аймгийн ажил амьдралын тухай үзүүлье” гэж зарлаад Д.Эрдэнэбат даргын Булган аймгийн зарим сумдад иргэд хөдөлмөрчидтэй хийсэн уулзалтуудыг харуулжээ. “Хоёр хүчин” нийлсэн явдал зөв гэдэг нь харагдаж байна” гэх мэт иргэдийн яриа. Мэдээж Эрдэнэбат даргын лут дүгнэлтүүд бүхий яриа. Төр засагт хэлж арга хэмжээ авахуулах ажээ.

Лхагва гариг. Д.Эрдэнэбат дарга нийслэлдээ буцаж ирээд Булган аймагт очиж ажилласан тухайгаа мэдээлсэн хэвлэлийн хурлаас сурвалжлав. Түүний ярианы хэсэг. Дагаж яваад ирсэн нь багаджээ. 

Ойрдоо эрхбиш дулаарсан болохоор олон нийтийн телевизийнхэн хөдөөг зорих нь нэмэгдсэн ч Сэлэнгэ аймагт болсон газар тариалангийн, эсвэл Өмнөговьд болсон уул уурхайн “урилгатай” арга хэмжээнүүд зонхилжээ. Хөдөөд тусгайлан зориулсан ганц нэвтрүүлэг – “Эргэх дөрвөн цаг”-ийнхан хүртэл “Тогтвортой амьжиргаа-2” төслийнхнөөс салахаа больж тэднийг бараадан хөдөөгүүр айлчилдаг ажилтай болов. 

Саяхан нэг сурвалжлагч нь гэнэт Ховд аймгийг зорьж тэнд явж байсан Монгол улсын гуравдахь Ерөнхийлөгч, “Хөдөөгийн хөгжлийн төлөө” ТББ-ын тэргүүн Н.Энхбаяр гэдэг хүнтэй “санаандгүй” тааралдан ярилцлага авч үзүүлэв. Тэрбээр хөдөөгийн малчдын амьдрал, төр засгаас ямар арга хэмжээ авах шаардлагатай, бас замд гараад 3 дахь хоногтоо явж буйгаа хэлээд хоёр сумын зааг дээр явахад нь гүү унагалсан бэлэг дэмбэрэлтэй учралыг өгүүлэв. Дээрхэн үед сайн хүмүүс хөдөө нутагт дандаа бороо дагуулж ирдэгсэн…

Ер нь манай олон нийтийн телевизийнхэн дарга (одоо бүр намын жижиг сажиг даргыг) дагахгүйгээр, бас төсөл, хөтөлбөр, элдэв ёслол бараадахгүйгээр өөрсдөө хөдөө явж болдоггүй юм байх даа? Одоо даарахгүй шдээ.

Posted in Монголын Үндэсний Олон Нийтийн Телевиз | Leave a Comment »

Ламбаа сайдын концессын нэвтрүүлэг

Posted by Бид on 2010/04/13

Ядарч зүдрэн тусламж эрсэн хүмүүсийн тухай телевизээр байн байн гардаг. МҮОНТ энэ удаад элэгдэж муудаад өнөө маргаашгүй болсон хуучин гэмтлийн эмнэлэг буюу түлэнхийн төвийн барилгын тухай “Гэмтэлтэй гэмтэл” нэртэй сэтгэл өвдмөөр нэвтрүүлэг үзүүллээ. Хандивын данс нээсэн ч болмоор санагдав. 1950, 60-аад онд баригдаж 1986 оноос хойш огт засвар хийгээгүй учраас хана туурга, тааз нь нурж ховхорсныг дүрсээр харуулж дарга, эмч нар нь төдийгүй эмчлүүлэгчдээр батлан яриулав. 4-р сарын 28-нд газар хөдлөхөд шууд нурах гэнэ. УМХГ-аас ашиглалтын шаардлага хангахгүй гэсэн дүгнэлтийг аль эрт гаргасан юм байна.

Яаралтай арга хэмжээ авах шаардлагатай гэсэн үг. Харин дараачийн яриануудаас үзвэл хариуцсан яам нь мэдэхийн дээдээр мэдэж байгаа төдийгүй юу хийхээ төлөвлөчихсөн ажээ.

Уг төвийн харьяалдаг Гэмтэл согог судлалын үндэсний төвийн захирал С.Отгонгэрэл, энэ барилгын оронд орчин үеийн иж бүрэн эмнэлгийн 4-5 давхар барилга барих санал тавьсан, манай яамны удирдлага 2010 оны төсвийн тодотголд оруулж өгье гэж байгаа гэв.

Харин Эрүүл мэндийн сайд С.Ламбаа дараачийн аргыг бодоод олчихжээ. Түүний яриа: Газрын өмчлөл нь манайд байж байгаа учраас би үүнийг 4-5 давхар нөхөн сэргээлтийн эмнэлэг болгож хувиргах ийм төсөл хийлгэж байгаа. Өөрөөр хэлбэл зураг төсөл хийлгэж байгаа… ГССҮТ-ийн өргөтгөл рүү оруулчихья гэж бодож байсан чинь доод талын инженерийн шугам сүлжээ нь даахгүй гэсэн хариу ирсэн учраас яг энэ байршил дээр нь энийг нураагаад оронд 4-5 давхар ийм нөхөн сэргээлтийн гэмтлийн төв байгуулья гэсэн ийм зураглал хийж байгаа… Тийм учраас цаашдаа концессын хуулиар олон улсын байгууллагын хөрөнгөөр, аль эсвэл концессын хуулиар барих, шилжүүлэх боломжтой компанид энэ газрыг нь өгөөд энэ дээр ийм барилга бариачээ гэсэн төсөл боловсруулаад ирэх жилээс эхлүүлэхээр бэлтгэж байна.

Нэгэнт шийдчихсэн юм бол нулимс дуслуулах хэрэг байна уу? Нурааж газрыг нь булаахад олон нийтийн санаа бодлыг бэлтгэж МҮОНТ-д захиалсан бололтой.

Сүүлийн хэдэн жил хотын төвийн хамаг газрыг хуваарилж дуусаад одоо муу нэртэй хуучин барилгууд руу орж байгаа нь энэ. Ямар ч барилгыг 24 жилийн турш засаагүй бол эмтэрч л таарна. Харин цаг хугацаанд нь засаж тордоод байвал хоёрхон давхар, өвөрмөц, магадгүй ямар нэг хэмжээгээр түүхийн дурсгал байж мэдэх энэ барилга дахиад 100 жил ч оршино. Энд заавал эмнэлэг байх албагүй. Түлэнхийн (бас хөлдөлтийг эмчилдэг) шинэ төвийн барилгыг зөвхөн хотын төвд чихэх биш, нийслэлийн захын хороололд жирийн иргэддээ ойртуулан байгуулж яагаад болохгүй гэж? 

Үүний оронд эмтэрч ховхрохыг нь “бахдан” харж нэг ёсны үзүүлэн, шоу болгож гутаагаад, одоо нэмж газар хөдлөлтөөр айлгаж байгаад нурааж концесс гэдэг гоё үгээр халхлан “боломжтой компанид” өгөх юм байна.

Уг нь зураг төсөл хийлгэж байгаа гэх 5-6 давхар эмнэлгээ ядахдаа хажууд нь зэрэгцүүлээд барьж болох. Даанч эргэн тойрны бүх газар, өвчтөнүүд салхилдаг томоос том цэцэрлэгийг хүртэл булааж зараад өндөр барилгуудаар хүрээлүүлж хэдийнэ амжсан билээ. Одоо “хуучин гэмтэл”-ийг өөрийг нь нураана…

Posted in Монголын Үндэсний Олон Нийтийн Телевиз | 3 Comments »

АНАТХ-ны эсрэг “Долоо хоног”

Posted by Бид on 2010/04/13

Өнөө цагт аливаа үйл явдлын том жижиг нь телевизээр хэр гарснаар хэмжигдэнэ. Амлалт нэхэх ард түмний холбооны UB Palace-т болсон цуглаан, цусан тангараг өргөсөн хэвлэлийн хурал, Сүхбаатарын талбай дээр эхэлсэн суулт, одоо үргэлжилж байгаа өлсгөлөн энэ хаврын №1 үйл явдал нэгэнт болжээ. Аль ч телевизийн мэдээллийн хөтөлбөр үүгээр эхэлдэггүй юмаа гэхэд заавал багтааж байна.

МҮОНТ-ийн “Цагийн хүрд” мэдээллийн хөтөлбөр эхэндээ АНАТХ-ныг муутгах талаас нь нэлээн оролджээ.

2010.04.02

УИХ-ын гишүүн, Хууль зүй, дотоод хэргийн сайд Ц.Нямдоржтой хийсэн ярилцлага.  Тэрбээр АНАТХ-ийг баахан загнав. 

2010.04.03

Хамгийн эхний сурвалжлага нь АНАТХ-ны хийх гэж байгаа цуглаан муухай, оролцохгүй гэсэн МоАХ-ны дэд тэргүүн Ш.Түвдэндорж, Шударга иргэдийн фронтын тэргүүн Г.Арслан нарын хэвлэлийн бага хурал байлаа. Тун их ач холбогдол өгчээ.

2010.04.04

Ням гаригийн оргил цагт орон даяар шууд цацагддаг “Долоо хоног” тойм хөтөлбөр. Өнгөрсөн долоо хоногийн мэдээ, сурвалжлагаасаа уйтгартайгаар базаж давтдаг уг хөтөлбөр миний мэдэхээр анх удаа шинэ юм сэдэж цагаа 30 минутаар сунгаж байгаад дахин УИХ-ын гишүүн Ц.Нямдорж, бас Р.Гончигдоржийг  студид хосоор нь урьсан байв. Нямдорж АНАТХ-ныхон болон тэдний ард нуугдсан М.Энхсайхан нарыг нэр цохож илчлэхээ үргэлжлүүлсэн бол Гончигдорж 1,5 сая төгрөгийн амлалтыг янз бүрээр зөвтгөхийг хариуцжээ. Бас болоогүй “Би сүүлийн хоёр жилд олон нийтийн телевизээр анх удаа гарч байна” гэж гомдоллов.

Энэ бол ер бусын “Долоо хоног” байлаа. Хэрвээ захиалга ирвэл “Монголын мэдээ” агентлаг цаг наргүй зүтгэхэд бэлэн ажээ. 

Гэхдээ үйл явдал өөрийнхөөрөө өрнөж 4-р сарын 5-нд цуглаан болдгоороо болсон билээ.

Posted in Монголын Үндэсний Олон Нийтийн Телевиз | Leave a Comment »

Цензур

Posted by Бид on 2010/04/03

Гуравдугаар сарын сүүлчийн өдөр Монгол Улсын Засгийн газар хуралдаж Оюутолгойн гэрээг батлангуут МҮОНТ том компани, төслүүд шиг мөнгө төлдөггүй болохоор нь бараг үйлчилдэггүй, хааяа “Нээлттэй хэлэлцүүлэг” нэвтрүүлгээр хоосон асуулт тавьж хоосон яриулдаг олон нийт, бас уг гэрээг шүүмжилсэн УИХ-ын гишүүдийн өмнө тас хаагдчихав. Зөвхөн Оюутолгойн гэрээний ухуулга хөвөрлөө. 

3-р сарын.31-ны “Цагийн хүрд” мэдээллийн хөтөлбөр:

– Засгийн газрын хуралдаанаар Оюутолгойн гэрээг хүчин төгөлдөр болгосон тухай хэвлэлийн хурал.

– Оюутолгойн гэрээний асуудлаар УИХ-ын байнгын хороод хуралдах гээд чадаагүй, ирц хүрэлгүй маргалдаад тарсан.

– Өнөөдрийн сэдэв: Оюутолгойн асуудлаар. УИХ-ын гишүүн, Эрдэс баялаг, эрчим хүчний сайд Д.Зоригт, Сангийн сайд С.Баярцогт хоёрыг студид авчирч өнөөдөр баталсан гэрээг өөрсдөөр нь тайлбарлан яриулав.

4-р сарын 1-ны 18 цагийн мэдээ.

Оюутолгойн гэрээний эсрэг иргэний хөдөлгөөнийхнийг турхирагчид хэн бэ? гэсэн асуултаар эхэлж “… телевизийн баатар болж үүргээ умартдаг улс төрчдөөс, монголын ард түмний нэр барьж төөрөгдүүлдэг тэр эрх ашгийг асуух ёстой гэж зарим гишүүд үзэж байна… Оюутолгойн гэрээг хүчин төгөлдөр явуулсны үр дүнд харин Таван толгой тун хурдан урагшилна гаж зарим нэг нь үзэж байгаа юм. Үүнтэй зэрэгцэн гудамжнаас дуугарч байгаа зарим нэгэн иргэний хөдөлгөөнийхний тулгалт, нэр бүхий 11 их хурлын гишүүний зөрөөтэй байр суурийг ангийн зарим нөхөд нь таашаахгүй байгаа бололтой” гэв.

Араас нь УИХ-ын гишүүн Ч.Сайханбилэгийн яриа: “… Ерөөсөө энэ Оюутолгойн гэрээ хүчингүй болох хэнд ашигтай юм? Монгол Улсад ямар ч байсан ашиг байхгүй. Эх оронд ашиг байхгүй … Энийг ашиггүй болгох сонирхол хэнд байгаа юм бэ? Хамгийн түрүүнд манай хоёр хөршийгөө би хардаж байгаа юм. Ингээд Монгол улс зөвхөн хоёр хөршөөрөө явсан ийм эдийн засагтай ийм хараат ийм байдалд орох нь хэний эрх ашигт үйлчлэх юм бэ?…”

Сэтгүүлч: Сүүлийн хэдэн сар хэт их улс төрчдийн анхааралд байсан Оюутолгойн гэрээний тухай хэн нь үнэн, хэн нь худлаа яриад байгааг зарим нэг хүн ойлгохоо ч байсан. Харин үүнд Засгийн газар өчигдөр цэг хатгалаа. Гэхдээ зарим нэг тээнэгэлзээ төрүүлж байсан зүйлд улсын хэтэвч атгаж тооцож суудаг сайд нь 6 асуудлаар тодорхой байр сууриа илэрхийлж бөндгөрөөрөө хариуцна гэсэн болохоор тэнэг ч хүн ойлгох асуудлыг битгий их улс төржүүлээрээ гэж эрхэм гишүүн хэлж байна аа. Хэт их улс төржих нь хэнд ч ашиггүй, харин ч дундаас нь огт өөр хүн завшиж мэдэх улс орны эрх ашгийг шоу байлгахгүй ийм л байр суурийг өнөөдөр олонхи гишүүн хэлж байна аа.

Дахиад Ч.Сайханбилэгийн яриа : “Ямар ч тэнэг хүн уншсан ойлгомжтой асуудлууд ш дээ. Одоо энэ дээр өөр яриа байхгүй. Одоо бид нар дахиад л яриа гаргах юм бол олон улсын арбитрийн шүүх дээр очно. Монгол улс дэлхийд өөрөө муухай болж харагдана. Энэ үнэ цэнийг хэн төлөх вэ? Оюутолгойн энэ гэрээ унаад хоёр хөрш рүү орох юм бол Тавантолгойн асуудал адилхан болно. Ураны асуудал адилхан болно. Монголд илрээд байгаа нефтийн асуудал адилхан болно. Бид нар Хойт Солонгос шиг болох хүсэл хэнд байгаа юм. Дэлхийд хаалттай хоёр хөрш нь орж ирээд бодлогоо хийдэг… Гудамжны хөдөлгөөнүүд хаанаас мөнгө аваад хаанаас ингэж их телевиз болгоны эфирээр бид нарт олдоггүй эфир тэр хүмүүст олдоод байгаа юм бэ? Бид нарт гарах мөнгө нь байхгүй байна шүү дээ, төрд алба хааж байгаа шийдвэр гаргагчдад. УИХ-ын гишүүд нь өөрсдөө телевизийн хөтлөгчид болчихсон. Хүн бол телевизийн хөтлөгч байж болно, гэхдээ шийдвэр гаргагч болоод энд ирсэн тохиолдолд юм шийдэх гэж болно шдээ. Түүнээс арван хэдэн жил улс төрд явчихаад шийдвэр гаргагчид нь телевизийн хөтлөгч болоод тэгмээр байна, ингэмээр байна, ингэвэл зүгээр, эсвэл их хурлын гаргасан шийдвэрүүсийг ингэж ёсгүй, тэгэх ёсгүй ингээд явах юм бол би энийг өнөөдөр Их хурлын гишүүн, шийдвэр гаргагчид байна аа гэж үнэхээр харж чадахгүй…

Сэтгүүлч: Ямартай ч өвөг дээдсээс үр хойч бидэндээ өвлүүлж үлдээсэн их говийн их үүц задарч эхэллээ. Харин энэ үүцнээсээ бид ихийг хожиж үлдэх ёстой. Үүний тулд дотроо хөнжлөө жийлцдэг биш, дороо суурьтай хандах учиртай. Хэн нэгний мөнгөөр хий дэмий шоу хийлгүй, уул уурхайгаас ард түмэн баялаг хүртдэг болох нь чухал гэдгийг зарим нэгэн төрийн түшээд ийнхүү хэлж байна.

Ийнхүү Сайханбилэг гишүүн монголын хамгийн том телевизийн дэлгэцэн дээрээс “Бидэнд телевизээр гарах мөнгө алга” хэмээн дэмийрэнгээ бусдыг гудамж талбайгаар цоллож, бас хоёр хөршид урваж шарвасанд сэрдэж дүвчигнэв. Төрийн түшээ гээд байгаа… Гэрээг баталсан хэд хоногт С.Баярцогт, Д.Зоригт сайдууд, бас Сайханбилэг өөрөө бүх сувгаас салахаа больсон билээ. Гагцхүү тэдэнтэй хамт “гудамжны хөдөлгөөнүүд” зэрэгцэж харагдсанд эрхэм гишүүн хилэгнэжээ. Гаргахгүй, ядахдаа төлбөр нэхээд хаах ёстой байж. Үүнийг МҮОНТ соргогоор мэдэрч зөвхөн Сайханбилэг тэргүүтэй “зарим гишүүд”-ийг гаргаж үйлчиллээ. Татвар төлөгчдийн мөнгөөр.

Мөн 4-р сарын 1-ны “Нээлттэй засаг” хөтөлбөр. Засгийн газрын хуралдаанаар Оюутолгойн гэрээг баталж цэг тавьсан тухай тайлбарыг хөгжимтэйгээр найруулан үзүүлэв. Бас л Сангийн сайд С.Баярцогтын яриа.

“Нээлттэй хэлэлцүүлэг” нэвтрүүлэг. Оюутолгойн гэрээний асуудлаар дахиад Сангийн сайд С.Баярцогт, ЭБЭХ-ны сайд Д.Зоригт, БОАЖ-ийн сайд Л.Гансүх гурав оролцож бүтэн цагийн турш үзэгчдийн асуултанд хариулав. Асуултыг утсаар авч тэдэнд дэвсэн өгч байлаа.

4-р сарын 2-ны “Цагийн хүрд” мэдээллийн хөтөлбөр. Ч.Сайханбилэг, С.Баярцогт хэдэнтээ гарч, дараа нь Ерөнхий сайд С.Батболд, тэргүүн шадар сайд Н.Алтанхуяг хоёр албан ширээгээ хуваан зэрэгцэж мэдэгдэл хийхдээ, 4-р сарын 03-ны Бямба гаригийн өглөөний “Ярилцъя…” нэвтрүүлэгт дахиад Ерөнхий сайд С.Батболд студид ирж, орой нь “Цагийн хүрд”-ээр дахиад тэргүүн шадар сайд Н.Алтанхуяг бас студид ирж ярихдаа гэрээний талаар юу хэлсэн нь тодорхой.

Ийнхүү Оюутолгойн гэрээг баталснаас хойшхи хэдэн өдөрт түүнийг эсэргүүцсэн элдэв хөдөлгөөнүүд биш юм аа гэхэд албан ёсоор шүүмжилсэн УИХ-ын 11 гишүүн яг юун зөрчлийг нэхэж, чухам ямар заалтыг дахин нягтлахыг шаардсан талаар МҮОНТ нэг ч удаа хэлж өгсөнгүй, хэлүүлсэнгүй. Хөндлөнгийн байр суурийг ч цухуйлгаагүй.

Шуудхан хэлэхэд энэ бол цензур. Ноднин зун Оюутолгойн гэрээнд гарын үсэг зурахын өмнөх өдрүүдэд яг ингэсэн.  Бас 2008 оны 7-р сарын 2-4-ны өдрүүдэд. Гэхдээ тэр бол ядахдаа Ерөнхийлөгчийн зарлигаар байсан билээ.

Posted in Монголын Үндэсний Олон Нийтийн Телевиз | 3 Comments »

Аяганы хариу өдөртөө …

Posted by Бид on 2010/03/23

Хэдэн жил тээж яваа гомдлыг нь тайлалцаж өгсөн Үндэсний зөвлөлийн гишүүн, “Үндэсний шуудан” сонины ерөнхий эрхлэгч Б.Ганболдыг МҮОНТ өчигдөр орой урамшуулж 2010 оны 2-р улирлын хэвлэл захиалгын энэ өдрүүдэд ус, агаар мэт хэрэгтэй сониных нь сурталчилгааг орон даяар хийж өгөв. Монгол Улсад ийм агуу өдөр тутмын сонин байдаг гэж энэ мөчийг хүртэл зүүдлээ ч үгүй явсан биз, үзэгчид.

3-р сарын 22-ны Даваа гаригийн “Цагийн хүрд” мэдээллийн хөтөлбөрийн сурвалжлагууд дотроос хамгийн урт (4 минутаас давсан) нь энэ байлаа.

Хөтлөгч: “… хэн нэгэн мөнгөтэй хүний захиалгаар нийтлэл мэдээлэл гардаг болсон энэ цаг үед хэнд итгэх вэ гэсэн уншигчдын тээнэгэлзээг өөрчлөх цаг болсон гэж үзэг нэгтнүүд маань уриалж байна. Монголын нийгмийг гэгээрүүлэх үүргээ мөнгөөр биш сэтгүүл зүйн том ёс зүйгээр удирдах тийм эр зориг энэ салбарынханд байгаа. Улс төрчдөөс ангид захиалгагүй сэтгүүл зүй сонин хэвлэлийн салбарт орон зайгаа олсон таатай мэдээллээр бид “Цагийн хүрд” мэдээллийн хөтөлбөрөө үргэлжлүүлж байна. Сурвалжлагч “Нийгмийг эмчлэгч нь, хоточ нохой мэт үнэнч байгч нь, бас дөрөвдэх том засаглал нь сэтгүүл зүй. Энэ салбарт цэвэр тунгалаг байж чадвал эцэс төгсгөлгүй мэт өнөөгийн улс төржилт, хэн нэгнийг хардсан чулуу боож шидсэн тэр л мэдээллүүд бидний тогооноос гарах ёсгүй юм. Үүний оронд харин олон нийтэд толгой бөхийн тэдний төлөө ажиллах ёстой төрийн өндөр дээд эрхмүүдийн ажлыг үнэнч шударгаар нийтэд дэлгэх захиалгагүй сэтгүүл зүй монголын сонины салбарт нэвтрэх цаг болжээ. Цаг үеэ эмчлэх сэтгүүлчдийн ёс зүйг байх ёстой тэр л байр сууринд нь аваачих захиалгагүй нийтлэл, мэдээллээрээ ”Үндэсний шуудан” сонин олны анхаарлыг татаж байна. Энэ сонины хамт олны 80 хувь нь сэтгүүл зүйд 10-20 жил ажилласан, “Бодлын солбицол”, “Ардын эрх”, “Зууны мэдээ” зэрэг сониныг үүсгэн байгуулж байсан мэргэжлийн сэтгүүлчид юм. Тус сонин хэвлэлийн зах зээл дээр ганц зүйлээр тод ялгардаг, энэ нь ардаа ямар нэгэн эзэн, улс төрийн намын харъяалал, компанийн өмчлөлгүй цорын ганц сонин юм. [Ерөнхий эрхлэгч Б.Ганболдын яриа. Нэгэнт сурталчлуулж байгаа болохоос сониноо магтах нь мэдээж тул ишлээд яахав] Сэтгүүлч: Энэ ч утгаараа “Үндэсний шуудан”-гийн нийтлэлийн бодлого нь нийгмийн олонхийн эрх ашгийг хамгаалсан, захиалгагүй учраас үнэний дуу хоолой болж чаддаг гэсэн дүнг тэдэнд уншигчдаас өгч монголын хамгийн олон захиалагчтай өдөр тутмын сонингуудын аман хүзүүнд давхиж явна… [Хамт олны магтаал. Бас л ойлгомжтой тул алгасав] Сэтгүүлч: Сүүлийн үед дуулиан тарьсан “Үндэсний шуудан” сонины нийтлэлүүдээс дурдвал УИХ-ын гишүүдийн тойрогтоо хуваарилсан 76 тэрбум төгрөгийн луйвар, гишүүдийн хууль баталсныхаа төлөө авах болсон 35 сая төгрөгийн булхайг тууштай эсэргүүцэж нийгмийн дэмжлэг болон холбогдох байгууллагуудын анхаарлыг татаж чадсан юм байна. “Үндэсний шуудан” сонины нийтлэлийн бодлого нь нийгмийн сайн сайхан, нийтийн эрх ашиг, шударга ёсны төлөө байдаг. Харин үүн дээр нэмээд ногоон сэтгүүл зүйг хөгжүүлэхийн төлөө нийтлэлийн бодлогынхоо нэг хэсгийг зориулж ирсэн байна. Үүний нэг илрэл нь Тужийн нарсыг нөхөн сэргээх ажлыг анх санаачилж гурван жил дараалан улс орон даяар хөдөлгөөн илрүүлсний үр дүнг өнөөдөр энэ ойн 60 гаруй хувь нь сэргэснээр монголын ард түмэн мэднэ. Дээжилж барьдаг нь дээшээ харсан биш, харин ч ард олныхоо дунд байж чаддаг “Үндэсний шуудан” орон нутагт ч захиалгынхаа тоог нэмэгдүүлж нийгмийн түүчээ байх, өглөө бүр таныг шинэ мэдээллийн талхаар дайлахаар захиалгаа эхлүүлснээ бас уламжилж байна аа”

Манай мэдээллийн хэрэгслүүд дотроос өдөр тутмын сонинууд хамгийн чанартай нь. Тэдгээрийн дунд “Үндэсний шуудан” гарцаагүй урдуур давхидаг байж болно. Тэглээ гээд олон нийтийн телевиз ингэж намба алдан нялуурч болох уу?

Posted in "Зууны шуудан" сонин, Монголын Үндэсний Олон Нийтийн Телевиз | Leave a Comment »

Том гомдол

Posted by Бид on 2010/03/23

Ойрдоо МҮОНТ-ийнхэн нийслэлийн захын гэр хороололд болон хөдөө аймагт тус телевизийн гаралтын чанар муудсан талаар үе үе гомдоллох болжээ. Олон нийтийн телевизийн нэвтрүүлгийн чанараас гадна айлуудад хүрдэг дүрс, дуу нь бас тааруу байгаа ажээ. Дамжуулах байгууллагын нөхдөд хэлээд засуулах ёстой асуудал мөнөөс мөн. Гэхдээ үүнийг зөвхөн шалтаг болгож томоос том гомдол мэдүүлэх нь тэр.

Бямба гаригийн “Цагийн хүрд”-ээр “МҮОНТ-ыг 40 гаруй жил цацаж байсан 4-р сувгаас техникийн шинэчлэл нэрээр 2-р суваг суваг руу шилжүүлснээс нийслэлийн захын хороололд нэвтрүүлгийн гаралт муудлаа” гэсэн эхлэлтэй сурвалжлага 2005 онд Монголын үндэсний телевизийг олон нийтийн болгохдоо дамжуулах байгууламжийг салгасанд харамсаад УИХ-ын гишүүн Ц.Нямдорж нэгэн хуралдаан дээр “2004 оны сонгуулийн дараа МАХН, АН-ын дарга нар гар хөлөө барилцаад олон нийтийн болгохоор шийдсэн. Яамд руу явуулж санал аваагүй, нэг л өдөр Засгийн газрын хуралдаан дээр танилцуулаад их хуралд оруулсан. Ийм шоу л болсон” гэж хэлсэн бичлэгээр үргэлжлүүлэв. Залгаад тухайн үед Монголын радио, телевизийн захирлаар ажиллаж байсан, одоо “Үндэсний шуудан” сонины ерөнхий эрхлэгч төдийгүй МҮОНРТ-ийн Үндэсний зөвлөлийн гишүүн Б.Ганболд ярьж, “ …тэр үед ерөнхийлөгч хориг тавьж рекламгүй болгосон… Байнгын хорооны хуралдаа н дээр З.Энхболд гишүүн дамжуулах байгууламжийг олон улсын жишгээр салгах ёстой гэдэг үүднээс хандсан. Харин УИХ-ын гишүүн Раднаа, мэддэг хүнээс нь асууя гээд телевизээс салах дуртай байсан инженерээс асуугаад шийдсэн…. Архивыг нь хүртэл Улсын төв архивт өгсөн. Хуучин энэ байгууллагыг удирдаж байсан Алтай орилоод, бас л Монгол телевизийн захирал байсан Энхбат, Монгол телевизэд ажиллаж байсан Сарангэрэл, Монгол телевизэд ажиллаж байсан Балхжав нар нийлээд Алтай удирдаад энэ телевизийг устгах ёстой, мөнгийг нь бид авах ёстой гээд ийм зорилгоор хийсэн …” гэсний дараа хөтлөгч “Олон нийтийн эрх ашгийн төлөө энэхүү сурвалжлагыг бэлтгэлээ” хэмээгээд төгсгөв.

Олон нийтийн эрх ашиг бол зөвхөн МҮОНТ-ийг биш, монголын бусад бүх телевизийг тэгш эрхтэйгээр хөдөө, хотгүй чанар сайтай үзүүлэх явдал юм. Иймээс дамжуулах сүлжээ нэгнийх нь мэдэлд бус, тусдаа, тэр тусмаа төрийн мэдэлд байх нь зөв. Олон нийтийн телевизэд байр сав, боловсон хүчнийг бүрэн шилжүүлсэн ба төсөв мөнгө, хөрөнгө оруулалтыг огт таслаагүй. Төлбөртэй нэвтрүүлгээр маш их мөнгө хийдэг хэвээрээ. Нэвтрүүлгүүд нь олигтой сайжраагүй хэрнээ орон нутагт дангаараа шууд цацагддаг монополь эрхээрээ хамгийн их үзэгддэг телевиз хэвээрээ явсаар өнөөг хүрчээ. Хэзээ нэгэн цагт энэ бүхэн дуусна. Дахиад 10 телевизийг орон нутагт дамжуулахад бэлэн болж МҮОНТ тэдгээрийн зөвхөн нэг нь болох өдөр тун удахгүй. Үүнийг гэнэт ухаарахдаа барьц алдаж, дамжуулах станцыг мэдэлдээ байлгаж бусдад зөвшөөрдөг байснаа санагалзсан сурвалжлага байна.

Алтай, Энхбат, Сарангэрэл, Балхжав нарын тухайд гэвэл МҮОНТ-ээр “хүмүүжсэн” хүмүүс шүү дээ. Харин Б.Ганболд өрсөлдөгч телевизүүдийн захирлуудыг ямар нэгэн шалтгаанаар “зоригтой” цоллож өглөө.

Posted in Монголын Үндэсний Олон Нийтийн Телевиз | 1 Comment »

Америкаас “Ярилцъя”

Posted by Бид on 2010/03/20

Оны эхнээс МҮОНТ-ийн Бямба гаригийн өглөөний “Ярилцъя” нэвтрүүлэг “Америкаас явдаг” болсон билээ. Уг нэвтрүүлгийн хөтлөгч Ц.Мөнхтөр эндээс Америк руу явахдаа (миний сонссоноор, хувийн шалтгаанаар) нэвтрүүлгээ хэн нэгэнд даатгалгүйгээр, тэнд суугаа эх орон нэгтнүүдтэй ярилцлага хийж нааш илгээсээр бараг бүтэн улирал өнгөрчээ. Би бүгдийг үзээгүй ч надад тааралдсанууд нь аятайхан ярилцлагууд байв. Юм үзэж нүд тайлсан тэдэнд сонирхуулж хөөрөх, бас зааж хэлэх юм зөндөө ажээ. Дандаа жирийн монголчууд. Ер нь “Ярилцъя” гэхээр л УИХ-ын 76 гишүүн тэргүүтэй дарга, сайд нар (эхлэлийн хөшиг (шторк)-нд гардаг Ерөнхийлөгч Ц.Элбэгдорж, Ерөнхий сайд асан С.Баяр, цаашаагаа УИХ-ын гишүүд, сайдууд, МҮОНТ захирал Наранбаатар гээд томчуудыг хэлж байна) худлаа ярихгүй, хийх ёстой ажлаа “хийх ёстой” гэж хоосон чалчихгүй зүгээр юм байна. Гэхдээ МҮОНТ-ын дарга нар яаж зүгээр байхав, Мөнхтөрийн араар хэдэнтээ амжуулав. Дээрхэн Боловсрол, соёл, шинжлэх ухааны сайд Ё.Отгонбаяр эндээс өөр сэтгүүлчтэй ярилцаад сууж харагдсан.

Цаашдаа энэ нэвтрүүлэг яах юм бол доо…

Posted in Монголын Үндэсний Олон Нийтийн Телевиз | 1 Comment »

МоЭнКо-гоос захиалга иржээ.

Posted by Бид on 2010/03/06

Саяын зуднаар уул уурхайн сэдэв хэсэг татарсан ч уул уурхайн компаниуд Монголын уул уурхайн үндэсний ассоциацийн нэрээр Монголын үндэсний олон нийтийн телевизийг захиалгаар таслахгүй “Хөгжлийн тулах цэг” нэртэй нэвтрүүлгээ явуулсаар ирсэн юм. Өнгөрсөн 7 хоногийн дугаараар гэхэд МҮОНТ-ийн сурвалжлагч Өмнөговь аймагт нээгдсэн дээрх ассоциацийн төлөөлөгчийн газрын нээлт, “Байгальд ээлтэй уул уурхайг хөгжүүлье” семинарт оролцоод авчирсан сурвалжлага үзүүллээ. “Энержи ресурс”, “Саусгоби сэндс”, “Оюу толгой” зэрэг компаниуд байгаль орчныг хэтэрхий сайн нөхөн сэргээж байгааг магтахын зэрэгцээ МУУҮА-ийн ерөнхийлөгч До.Ганболдтой хамтран “Таван толгой” ХК төрийн өмчтэй учраас муу нөхөн сэргээж байгааг шударгаар шүүмжиллээ. Төгсгөлд нь шударга сэтгүүлч маань нэрээ бичсэнгүй. Лав хоёр жил үргэлжилж байгаа “Хөгжлийн тулах цэг”-ийг бүтээгчид нь нэр, хаягаа хэзээ ч тавьж байсангүй.

Өнгөрсөн сард Хөшөөтийн уурхайн асуудал олон нийтийн төдийгүй төр засгийн анхаарлыг татаж аль социализмын үед зөвлөлтийн геологичдын хайгаад илрүүлчихсэн Хөшөөтийн орд газарт яагаад хонконгийн хэдэн хятадад хайгуулын тусгай зөвшөөрөл өгсөн (тэд Хонконгийн хөрөнгийн бирж дээр тавиад тэрбум тэрбум доллар босгож байгаа ), бас стратегийн орд газрын жагсаалтанд багтаах шаардлагатай эсэх талаар маргаан дэгдсэн билээ. Үүнийг ихэнх арилжааны телевизүүд нэлээд дэлгэрэнгүй сурвалжилж өдөр тутмын сонинууд асуудал дэвшүүлсэн олон өгүүлэл нийтэлсэн юм.

Харин МҮОНТ нэг л дуу муутай байсан. Тэд захиалга хүлээж байжээ. 3-р сарын 3-ны Лхагва гаригийн “Цагийн хүрд” хөтөлбөрөөр өвөлжилт хүндрээд байгаа Ховд аймгийн хэд хэдэн сумын малчдад МоЭнКо гэдэг буянтай компани тусалж байна гэсэн нэр хаяггүй сурталчилгааны сурвалжлага гэнэт гарлаа. Бүр Ховд аймагт очиж газар дээрээс нь бэлтгэсэн байх юм. “Гэхдээ ганц сурвалжлагийн төлөө тийшээ нисэж очмооргүй юм даа?”

Үнэхээр тийм байна. Маргааш орой нь “Хөшөөтийн уурхай бүсийн хөгжилд” гэсэн захиалгат нэвтрүүлэг үзүүллээ.

Эхлээд МоЭнКо компани Ховд аймгийн зарим сумдын малчдад их хэмжээний тусламж гардуулан цуглааны арга хэмжээ, тэр  үеэр сумын Засаг дарга нар болон малчдын талархлыг оруулжээ. Дараа нь “Хөшөөтийн уурхайн талаар олон нийт ямар ойлголттой байдаг вэ?” гэсэн тэс өөр асуулт тавьсны дараа МоЭнКо-гийн сурталчилгаа эхлэв: … Олборлолт огт явуулаагүй … Зөвхөн шинжилгээний хэдэн тонн нүүрс гарсан… Энд хятад иргэд байхгүй. Хэдэн хүн ирээд явсан … Гол хувьцаа эзэмшигчид нь Америк, Хятад, Австралийн иргэд… Олборлолтоо эхлэхээс өмнө хатуу хучилттай зам тавьж байгаа… [МоЭнКомпанийн албан тушаалтнуудын яриа… тус компанийн зардлаар суралцаж байгаа оюутнуудын яриа… МоЭнКо компанийн тусламж үзүүлсэн аймгийн МСҮТ-ийн сурагчид, хүүхдийн ордны багш нарын яриа…]

Орон даяар сурталчилгаа хийж өгсөн уг нэвтрүүлгийн төгсгөлд ердөө л “2010 он” гэжээ. Бусад хэвлэл мэдээллээр шуугиад байгаа маргаан дэгдээсэн олон асуултыг огт хөндсөнгүй.

МоЭнКо компани нутгийн малчид ба олон нийтийн телевиз хоёроос нь эхлээд Монгол улсыг ховх худалдаад авчих юм байна.

Маргааш нь дахиад л МоЭнКо компани Ховд аймаг дахь Хөшөөтийн уурхайн усны асуудалд онцгой анхаардаг,  бас зам тавьж байгаа тухай сурталчилгааны сурвалжлага гарч байлаа.

P.S:

Тэр орой “Усны эрчим хүчний шинэ гараа. Дөргөний УЦС” нэвтрүүлэг үзүүлэв. Түүнийг байгуулсан төслийн явц, хэрхэн баригдаж дууссан түүхийг нэгбүрчлэн танилцуулж, Дөргөний УЦС баруун бүсийн эрчим хүчний хэрэгцээг бүрэн хангаж чадахгүй байгаа нь тус цахилгаан станцыг барих шийдвэрийг удаж гаргасан, дэмжлэг дутагдсанаас болсон гэхчлэн тайлбарлав. Төгсгөлд нь “Дөргөн УЦС-2010” гэжээ.  Дараачийн захиалгат нэвтрүүлэг байна.

Posted in Монголын Үндэсний Олон Нийтийн Телевиз | Leave a Comment »

Ерөнхийлөгч, УИХ-ын гишүүн, МАХН, АН-ын ачаар…

Posted by Бид on 2010/03/06

Ер бусын хүйтэн өвөл хөдөөгүүр ямар байгааг хотын бид телевизийн ачаар зөндөө үзлээ. Малынхаа тэн хагасыг үхүүлчихээд “яаж ч чадсангүй” гээд хэнэггүй зогсох муухан дээлтэй малчин эр, “өдий наслахдаа ийм хэцүүг үзээгүй” хэмээн цөхөрлийн нулимсаа ханцуйгаараа шударч суугаа малчин өвгөн бол энэ зудны бэлэг тэмдэг юм. Малчдын энэ мэт яриа хөөрөө, хашаа хороо, ахуй амьдралын дүр зураг өөр олныг үзмээр санагдавч тийшээ хурдан жиип хүлэглэн очоод зудны фонон дээр баатарлагаар зогсох, эсвэл тусламжийн цувааг үдэж зургаа авахуулах УИХ-ын гишүүд, сайд дарга нар халхалчихаад байлаа.  Телевизийн сурвалжлагчид хөдөөгүүр явахдаа зөвхөн дарга нарыг дагадаг учраас тэр.

Юу үзүүлснийг эргээд санахад, хөдөөгийнхөн хамгийн том зааландаа цугларч Улаанбаатараас очсон сайд, дарга нартай уулзалт хийж зовлонгоо ярьж сэтгэлээ онгойлгох үндсэн ажилтай шиг санагдсан шүү.  Сэтгүүлчид дарга дагасаар байгаад хөдөөний хүмүүсийн жинхэнэ амьдралыг олигтой сурвалжилж завдахгүй байх шиг.  Саяын зуднаар малчин айлд очоод “Танайд хоноё” гэсэн сэтгүүлч байв уу? Хөдөөг ХХААХҮЯ-наас сурвалжлахдаа ашиглах баахан дүрстэй буцдаг бололтой.

Сүүлийн үед МҮОНТ-ээр Завхан, Увс, Ховд, Говь-Алтай гээд баруун аймгуудын талаар тухай зөндөө олон мэдээ, сурвалжлага үзлээ. Монгол улсын Ерөнхийлөгч Ц.Элбэгдорж гэнэт хөдөөлөхөөр шийдэж нисдэг тэргээр баруун аймгуудын дээгүүр, зарим аймаг, сумдын төвд тэнгэрээс бууж нисэхдээ сэтгүүлчдийг дагуулсны ач юм. Үнэгүй юм байх биш, “Ийм хүнд үед ерөнхийлөгч хүйтэн гэлгүй ирж сэтгэл санааны дэмжлэг үзүүлж байгаад иргэд талархаж байлаа” гээд өргөмжлөхийг зөндөө сонсов. Амралтын өдрүүдэд гарсан тусгай нэвтрүүлгүүдийн нэр “Монгол Улсын Ерөнхийлөгч Ц.Элбэгдорж хаваржилт хүндэрсэн аймгуудад” байв. Одоо алзахгүй ээ, баруун аймгийнхан…

Өнгөрсөн долоо хоногоос хойш Завхан аймгаас авчирсан өөр нэг цуврал сурвалжлагууд тасрахаа болив.  Тойрогтоо ажиллахаар нутгийн зүг жолоочийнхоо жолоог залуулсан УИХ-ын гишүүн Д.Оюунхорол “сэтгүүлчийг камертай нь дуудах”-аа мартсангүй.

Уржигдар, бас өчигдөр телевизүүдийн хувьд нэг ёсондоо Хэнтий аймгийн Бор-Өндөр тосгоны өдөр байв. Бүх телевиз ижилхэн шахуу сурвалжлагуудыг бэлтгэж нэгэн зэрэг үзүүлжээ. АН-ынхан пүрэв гариг тутмын “4-11” өдөрлөгөө тэнд зохион байгуулах тухайгаа хэвлэл мэдээллийнхэнд зарлахад бүгд очсон байна.

Сүүлийн хэдэн долоо хоногийн турш телевизүүд Сүхбаатар, Дархан-Уул аймгийн талаар хичнээн сурвалжлав даа.  Өчигдөр TV9 телевиз бас нэгэн тусгай нэвтрүүлэг үзүүлэв. Энэ бүхэн бол “Ард түмнээ сонсоё” аяныг зохион дээрх хоёр аймгаас эхлэн зохион байгуулж байгаа МАХН-ын хайр халамж юм. Мэдээж хүссэнээрээ  сурталчлуулж авсан.   

Сенсаац! 

Өчигдөр хэн нэгэн даргыг дагаагүй орон нутгийн сурвалжлага анх удаа олдох шиг боллоо. Хэнтий аймгийн төрийн ажилтнуудын өдөрлөгийн арга хэмжээ болж үнэнч шударгаар ажиллаж ард түмэндээ үйлчлэхээ тангарагласан сурвалжлагыг хэлж байна. Яагаад гэвэл индэр дээр УИХ-ын гишүүн юмуу сайд дарга нараас ганц ч хүн харагдаагүй юм.

Харамсалтай нь бас үгүй ажээ. Авлигатай тэмцэх газрын Урьдчилан сэргийлэх, соён гэгээрүүлэх хэлтсээс орон нутагт цуврал арга хэмжээ зохион байгуулахдаа сэтгүүлчдийг авч явсан гэнэ.

Posted in + ТЕЛЕВИЗ, Монголын Үндэсний Олон Нийтийн Телевиз | Leave a Comment »

Энхбаяр телевизэд эргэн ирж байна..

Posted by Бид on 2010/03/01

Хагас жил чимээгүй шахам байснаа энэ өвлийн зуднаар малчдад тусламж хүргэж, бас олимпийн Ванкуверт оччихсон, монголчын цаначдыг “түрүүлээрэй” хэмээн уухайлж даапаалснаа ярьж телевизээр хэдэнтээ цухалзсан Монгол Улсын гуравдахь Ерөнхийлөгч Н.Энхбаяр ням гаригийн орой МҮОНТ-ийн “Хариулахгүй ч байж болно” нэвтрүүлэгт оролцлоо. Сэтгүүлч Ш.Гүрбазар, түүний сургаар үзэгчид олон асуулт ирүүлснийг дурдсан хэрнээ шууд орхиж “Би таныг дэлхийд танигдсан хүн гэж үздэг“ гэж өөрийнхөө өмнөөс асуув.

Ийм жижиг асуултанд Н.Энхбаяр  “улсаа хөгжүүлсээр яваад ийм болчихлоо” хэмээн том хариулахгүй хаачихав. Тэгснээ “Би одоо харьцангуй чөлөөтэй байдалд байгаа учраас хэлчихье” гэж байгаад асуугаагүй асуултуудад хариулж өгөх нь тэр. 

… Би сонгуулийг харамсалтай нь луйвар болсон гэж үздэг. Намайг луйвардаад хавсарч байгаа унагаачихсан… Ард түмэн намайг нэг хэсэгтээ зүгээр сууж бай гэсэн байх. Нэг хэсэг дуугүй харлаа. Сайн юм хийвэл сайн л биз, харъя гэж бодсон. Хараад байхад нөгөө нөхдүүдийн маань хийж бүтээсэн юм багахан маань байна. Өнөөдөр үүнийг хэлэхгүйгээр сайн хүн болж харагдах гээд яахав… Энэ луйврын онцлог бол манай намын, миний удирдаж байсан намын удирдлагууд намын дарга, сонгуулийн штабын даргын оролцоотойгоор, үл оролцоотойгоор хийсэн. Үүний тулд 2008 оны сонгуулиар бэлтгэлээ хангаад 2009 оны сонгуулиар хийсэн. Үүнийг би намын даргын үйлдэл гэж ойлгодог… Хулгайч хүн хулгайгаа нуухайн тулд гэдэг шиг “Үндэсний шуудан” дээр өгсөн ярилцлагадаа намайг өөрөө уначихлаа гэсэн байна лээ…. Намын удирдлагад байгаа цөөн хэдэн хүмүүсийн хийсэн ажил… Тангадын Галсан гуай “Манайхан өөр намын бөхийг засаад малгайг нь өмсүүлчихлээ” гэсэн… Манай эхнэр Цолмонгийн нэр дээр Swisse Credite 1,3 тэрбум доллар байна гэсэн төөрөгдлийг бий болгосон. Сонгуульд дуусаад зарлана гэсэн зарлагдахгүй байна. Credite Swiss гэдгийг Swiss Credite болгож ганц үгэн дээр тоглосон … Хүн муулж амьдрах муухай… Н.Энхбаярыг муулдаг бүхэл бүтэн хэвлэл мэдээллийн баг, бүхэл бүтэн улс төрчдийн баг бий болжээ…”

Цаашаагаа Оюутолгойн гэрээгээр одоогийн эрх баригчдаас огт өөр баримталж байснаа дэлгэрэнгүй ярив.

Миний мэдэхээс Н.Энхбаяр анх удаа ийнхүү С.Баярыг албан тушаалаар нь дуудаж байгаад өнгөрсөн сонгуульд ялагдсандаа шууд буруутгаад зогсохгүй үүнээс хойш дуугүай суухгүй тэмцэж эхэлснээ мэдэгдлээ. Удахгүй болох МАХН-ын бага хурлаар намын даргын асуудал яригдана…

Н.Энхбаярыг ингэж “чөлөөтэй” яриулахын тулд олон нийтийн телевиз 18.10-аас гарах байсан “Хойд хөршөөр зорчсон тэмдэглэл”-ийг хасч тэр зайнд нь дараачийн хэдэн нэвтрүүлгийг урагшуулж шахаад бараг бүтэн цагийг (хөтөлбөрт уг нь 30 минутийн ярилцлага гэж зарлагдсан) суллаж өгсөн юм.

Posted in + ТЕЛЕВИЗ, Монголын Үндэсний Олон Нийтийн Телевиз | 11 Comments »

Дүүгийн телевиз …

Posted by Бид on 2010/02/26

Сонгинохайрхан дүүргийн Засаг дарга Ч.Сайханбаярыг тойрсон тэмцэл хэвлэл мэдээллийн том сэдэв болж хувирлаа. Хоёр сарын өмнө дүүргийн Иргэдийн төлөөлөгчдийн хурлаас түүнийг олонхийн саналаар огцруулахаар шийдвэр гаргасан боловч одоо өөр нэг олонхи гараад ирчихсэн ИТХ-ын дарга С.Баяртыг огцруулсан мэдээ дуулдах боллоо. Өнгөрсөн хугацаанд “25-р суваг” телевиз ба C1 телевизээр “Сайханбаярын нэрнээс нь бусад худлаа” зэрэг төлбөртэй нэвтрүүлгүүд үзүүлжээ. Бас байн байн хэвлэлийн хурлууд…

Би Сайханбаяр гэдэг дарга сайн, муу ажилласан алин болохыг мэдэхгүй, гэхдээ ОХУ-ын Москва хотод дээд сургууль төгссөн дипломыг хуурамчаар (хуурамч гэдгийг нотолсон албан бичиг Москвагаас иржээ!) үйлдсэн нь түүнийг огцруулаад цагдаад шилжүүлэх хангалттай гэмт хэрэг байлтай.  Одоо Сайханбаяр огцрох эсэх нь Монголд хууль ёс хэрэгжих үү, үгүй гэдгийг шалгасан зарчмын асуудал болж хувирлаа.

Иргэдийн сонгосон Иргэдийн төлөөлөгчдийн хурал гацна гэдэг бол улс төрчдийн жирийн хэрүүлээс тэр өөр. Нийслэлд хамгийн том, хамгийн их асуудалтай (тэр чигээрээ гэр хороолол) Сонгинохайрхан дүүргийн 200 мянган иргэдийн эрх ашиг хөндөгдөж байна гэсэн үг.

Олон нийтийн телевиз хаана байна аа? Бахь байдгаараа сурвалжилж байгаа. Харамсалтай нь зөвхөн нэг талыг дэмжээд байх юм. Зарим жишээг мэдэж авцгаая. 

2010.01.06-ны “Цагийн хүрд”:

СХД-ийн ЗДТГ-ын нээлттэй өдөрлөгөөс хийсэн сурвалжлагаар дүүргийн ажлыг баахан магтахын хажуугаар Сайханбаяр даргаар хэсэг яриулав. Цаадах нь “намайг огцруулах гэсэн цаанаа хэсэг бүлэг хүмүүсийн асуудал байгаа” гэсэн өгүүлбэр хэлж бараг хэлмэгдсэн болж хувирлаа.

2010.01.09-ны 18 цагийн мэдээ:

Хан-Уул, Сонгинохайрхан дүүргийн Засаг дарга нарыг огцруулах тухай саналыг Нийслэлийн Засаг дарга Г.Мөнхбаяр хүлээж аваагүй тухай мэдээлэл, нийслэлийн ЗДТГ-ын дарга Болдсайханы дүүргүүдийн ИТХ-ийн шийдвэрийг буруутгасан тайлбар.

2010.01.23-ны “Цагийн хүрд”:

Мэдээллийн хөтөлбөрийн эхэнд шахуу СХД-ийн ИТХ төсвөө батлаагүйгээс төрийн ажил зогсоход хүрчээ гэсэн сурвалжлага үзүүлэв. Буруутнууд нь мэдээж Засаг даргыг огцруулах гээд байгаа төлөөлөгчид.

2010.02.02-ны “Цагийн хүрд”:

СХД-ийн Засаг дарга Сайханбаяр болон ИТХ-ийн хэсэг төлөөлөгчдийн зарласан хэвлэлийн хурлаас хийсэн сурвалжлагаар ИТХ-ын дарга нь тамгаа аваад алга болсон гэх мэтээр ярьцгаав. Хуурамч дипломын тухай мэдээлэлд Засаг дарга Сайханбаяраар хариу өгүүлэхэд”Би 2006 оноос хойш мэдлэг боловсролоо дээшлүүлэхэд анхаар магистрийн зэрэг хамгаалсан” гээд ОХУ-ын Эрхүү хотод магистр хамгаалсан бас нэг диплом үзүүлжээ.

2010.02.25-ны “Цагийн хүрд”:

СХД-ийн удирдлагыг тойрсон маргаан дуусаагүй байна. СХД-ийн иргэдийн төлөөлөгчдийн огцруулсан  ИТХ-ын дарга тамга, тэмдгээ аваад зугатсанаас болж төрийн ажил хохирлоо гэсэн эхлэлтэй сурвалжлага. Тус дүүргийн Засаг даргын тамгын газрын байранд очиход хэсэг хүмүүс дээрх огцруулалтыг дэмжиж ярив.

Гэтэл энэ өдөр дүүргийн ИТХ-ын дарга С.Баяртыг дэмжсэн хэвлэлийн хурал “Монгол ньюс”-ийн мэдээллийн төвд болж дараа нь нийслэлийн ЗДТГ-ын үүдэнд цуглаан хийснийг арилжааны телевизүүд сурвалжилж урт, богино янз бүрээр үзүүлж байхад “Монголын мэдээ” агентлаг “мэдээгүй” Сонгинохайрхан дүүргийг зорьсон хэрэг.  

Олон нийтийн телевиз хоёр талын байр суурийг ээлжлүүлэн сурвалжлах ёстой баймаар. Тэгдэггүй юм байна. Үндэсний телевиз нэг дүүргийн асуудал дээр ийм хачирхалтай “бодлого” явуулаад байгаагийн цаана нэг учир байна гэж бодоход хүрлээ. Үнэхээр байгаа бололтой. Засаг дарга Сайханбаярыг дэмжиж байгаа ИТХ-ын хамгийн идэвхтэй төлөөлөгчдийн нэг нь МҮОНРТ-ийн ерөнхий захирал М.Наранбаатарын ах юм гэнэ.

“Дүүгийн телевиз” найдвартай үйлчилж байна шүү!

Posted in Монголын Үндэсний Олон Нийтийн Телевиз | 3 Comments »

“Цагийн хүрд” чанарын шаардлага хангаж байна уу?

Posted by Бид on 2010/02/20

Манай телевизүүд сайд, дарга, албан тушаалтнуудыг дагаж гүйсээр байгаад баримжаагаа алдаад байх шиг. Төрийн хоёр яам, агентлаг ийн хоёр дарга бие биендээ албан ёсны найрсаг айлчал хийж хамтран ажиллах гэрээ хэлэлцээрт гарын үсэг зураад зогсохгүй заавал телевиз дуудаж тэр оройжин бүх сувгаар нэгэн зэрэг гарах нь хавтгайрчээ.  Зөвхөн МҮОНТ-ийн “Цагийн хүрд”-ээс авсан ганц нэг жишээ:

… Боловсрол, соёл, шинжлэх ухааны сайд Ё.Отгонбаяр, Нийслэлийн Засаг дарга Г.Мөнхбаяртай хамтран ажиллах гэрээнд гарыг үсэг зурав… Нийслэлийн Засаг дарга Г.Мөнхбаяр харьяа байгууллагуудын дарга нартай бүтээгдэхүүн нийлүүлэх гэрээ байгуулав … УИХ-ын тамгын газар, МУИС-ийн Хууль зүйн сургуулийн хооронд хамтран ажиллах гэрээ байгуулав…

Бие биерүүгээ утастаад (яах гэж төрийн тусдаа холбоо байдаг, яах гэж утас өгч зардлыг даадаг байна аа?) ажлаа зөвлөлдөх, эсвэл уулзаад (ихэнх яам, хотын захиргаа хэдхэн байшингийн зайтай) хуралдахыг хэн ч буруутгахгүй, гэхдээ үүнд телевиз дуудаж сүржигнэх ямар хэрэг байна аа? Яагаад телевизүүд яам, тамгын газарт болсон хурал семинар, уулзалт яриа бүрийг сурвалжилсаар байгаад сургачихаж. Сүүлдээ зөвхөн телевизээр гарахын тулд энэ мэт ёслол үйлддэг болж байх шиг.

Өчигдөр үдэш МҮОНТ-ийн “Цагийн хүрд” болон бусад мэдээгээр Улсын Их Хурлын тамгын газар, ШУА-тай хамтын ажиллагааны гэрээнд гарын үсэг зурсан сурвалжлагыг хэдэнтээ давтан үзүүлэв. Бас болоогүй, араас нь УИХ-ын тамгын газрын ерөнхий нарийн бичгийн дарга Ц. Шаравдоржийг “Цагийн хүрд”-дээ урьж яриуллаа. Дэлгэцийн доогуур “Өнөөдрийн сэдэв: УИХ-аар хэлэлцэх хуулиуд чанарын шаардлага хангадаг уу?” гэсэн сүрхий асуулт тавьсан ч цаадах нь УИХ-ын тамгын газраас ШУА, Хууль зүйн сургууль, бас Ажил олгогч эздийн нэгдсэн холбоотой гарын үсэг зурах зэргээр “асар их ачаалалтай ажиллаж байгаа”, бас УИХ-ын хэвлэл мэдээллийн алба тусдаа вэб сайттай болсон зэргийг тоочлоо. Энэ хооронд хөтлөгч маань хуулийн чанарыг бүрмөсөн огоорч Төрийн ордны арын цэцэрлэгт парламентын ордон барих асуудлыг тойрсон маргааны тухай бөв бөөрөнхий асуулт дэвсэж өглөө.

Ц.Шаравдорж хэдийгээр УИХ-ын гишүүн байсан ч одоо биш, УИХ-ын гишүүдэд үйлчлэх ёстой УИХ-ын тамгын газрын ерөнхий нарийн бичгийн дарга гэдгээ бүрэн умартаж өөрөөс нь ялгаатай нь яг одоо жинхэнэ байгаа хэсэг гишүүдийг сургаж өглөө:

… Төрийн ордны ард талын цэцэрлэгийн 80 хувь үлдэнэ… Парламентын ордон барих тухай УИХ-ын тогтоол 2006 онд гарсан. Зураг төсөл, байршлыг тогтоохыг үүрэг болгосон… Нэгэнт УИХ-аар шийдвэр гарсан бол тэр шийдвэрийг УИХ-ын гишүүд дагах ёстой. УИХ-ын шийдвэрийг шүүмжилж байгаа гишүүд ёс зүйн хувьд болохгүй байна гэсэн үг.

Жинхэнэ гишүүдийн эзгүйд экс гишүүн өөрөө тодорч байгаа бол нэг хэрэг. Гэхдээ “ёс зүйн хувьд болохгүй байгаа” гэгдсэн тэдгээр гишүүд Парламентын ордон барихыг бус, зөвхөн Төрийн ордны арын цэцэрлэгт босгохыг эсэргүүцсэн (УИХ-ын тогтоолд байршил заагаагүйг өөрөө хэлсэн) гэдгийг мэдэхийн дээдээр мэдэж байгаа мөртлөө орон даяар загнаад сууж байх юм. 

Парламентын ордон заавал Төрийн ордны ард байна гэсэн хууль байхгүй. Сүүлийн үед арилжааны телевизийн мэдээллийн хөтөлбөрүүд энэ асуудлаар иргэдийн саналыг сонсоход бүгд эсэргүүцэж харагддаг.  Тэгвэл олон нийтийн телевизийн “Цагийн хүрд” яав? Шаравдорж даргыг яриулаад гүйцээ.

Posted in + ТЕЛЕВИЗ, Монголын Үндэсний Олон Нийтийн Телевиз, Улс төр, эдийн засаг | Leave a Comment »

Ноён Х (“Бороо гоулд”): Монголын бүх телевиз, сониноор гарга!

Posted by Бид on 2010/02/19

Бороогийн ордыг дуусгаад Гацууртын хэмээх дараачийн том орд руу чимээгүйхэн гэтэж суугаа “Бороо гоулд” компани саяын хэдэн өдөр гэнэтхэн мэдээллийн баатар боллоо. Урьд нь дандаа бусдаар өдүүлж байсан бол энэ удаад өөрөө, тэгэхдээ үл үзэгдэх пиарчид болон нэр, нүүр бүхий ажилчдын амаар дуугаа хадаав.

2009 онд Иргэний хөдөлгөөнүүдийн шаардлагаар УИХ-аас ажлын хэсэг байгуулж “Бороо гоулд”-ын үйл ажиллагаанд шалгалт хийж баахан зөрчил илрүүлсний дотор бага агуулгатай үлдэгдэл хүдрээс алтыг ялгаж авахын тулд нуруулдан уусгах технологийг бүтэн жил зөвшөөрөлгүй ашиглаж, тэндээс нь цианит алдагдсан байж магадгүй байсан тул тэр ажлыг зогсоожээ. Удалгүй мэргэжлийн хяналтынхан нарийвчилж шалгаад “цианит алдагдаагүй” гэсэн дүгнэлт гаргасан ч Эрдэс баялаг, эрчим хүчний сайд зөвшөөрөл өгөөгүй найман сар өнгөрөөд байгаа ажээ. Ажлын хэсгийг ахалсан УИХ-ын гишүүн Ж.Энхбаяр удахгүй Засгийн газарт үүрэг даалгавар өгнө гэсэн бол Д.Зоригт сайд, янз бүрийн байгууллагуудаас байгаль орчинтой холбоотой гомдол гарсан учраас бид шалгаж байгаа, шийдвэрлэх хугацаа болоогүй гэж ярьсан юм байна.

Харин “Бороо гоулд”-ын боссууд дахиад цааш хүлээхгүйгээр шийдэж 2010 оны монголын уул уурхайн хоёрдахь том пиар кампанийг эхлүүллээ. Арилжааны телевизүүдын хувьд мэдээж ямар ч асуудалгүй, харин олон нийтийн телевиз яах бол? Тэдний аз болоход урьдын адил “хэзээд бэлэн” хүлээгээд байж.

Ингээд 2010.02.17-ны Пүрэв гаригийн “Цагийн хүрд” мэдээллийн хөтөлбөрөөр хоёрын хоёр захиалгат сурвалжлагыг саадгүй оруулж өглөө.

Эхний сурвалжлага:

… Бороо гоулд компанийн 50 гаруй ажилчид ажилгүй болоход ойртсон байна…Нуруулдан уусгах технологийг 2008 оны 6-р сараас туршжээ. … цианит натри алдагдаагүй гэсэн дүгнэлт хийсэн байна. Харамсалтай нь энэ аргыг монголын нөхцөлд хэрэглэх зөвшөөрлийг өгөөгүй юм байна… “Бороо гоулд” компанийн ҮЭ-ийн хорооны дарга: Бид найман сар гаруй хүлээж байна. 50 гаруй хүний ажлын байр, дээрээс нь нэмээд орон нутгаас ажиллаж байгаа 20 гаруй хүн ажилгүй болж байна… Одоогийн байдлаар 10 гаруй хүн халагдсан байна… Энэ зөвшөөрөл удах тусмаа улсын төсөвт орох 1 тэрбум төгрөгийн асуудлаас эхлээд монгол ажилчдын ахуй амьдрал хэцүүдэж байгаа юм байна.

Дараачийн сурвалжлага:

… Монголын нөхцөлд хэрэглэх эсэх нь асуудал үүсгээд байгаа нуруулдан уусгах технологийг дэлхийн олон оронд хэрэглэдэг… Монголын уул уурхайн үндэсний ассоциацаас өөрийн гишүүдээ барууны дэвшилт технологитой танилцуулах, үйл ажиллагаандаа нэвтрүүлэх зорилгоор аялал зохион байгуулдаг. Энэ удаагийн групп АНУ-ын Невада муж улсад нуруулдан уусгах аргыг хэрхэн хэрэглэж байгааг судалжээ. Группэд Ашигт малтмалын газар, УМХЕГ зэрэг төрийн байгууллагууд, тус ассоциацийн гишүүн байгууллагууд оролцсон байна…. Энэ бүхний эцэст нуруулдан уусгах технологи бол дэлхийн түвшинд хүрсэн технологи юм байна гэсэн дүгнэлт хийхэд хүрчээ… Ямар ч дэлхийн хөгжлийг тодорхойлогч гэгддэг АНУ-ын уул уурхайн салбар энэ аргыг хэрэглэж ашиг олж чадаж байгаа, харин манай улсын хувьд уул уурхайн салбартаа энэ аргыг хэдийнээс хэрэглэх нь одоогоор тодорхойгүй байна…

“Бороо гоулд” үнэхээр шуурхай бөгөөд чадалтай юм аа. Асуудал үүсмэгц төрийн албан тушаалтнууд болон олон нийтийн телевизийг сэтгүүлчийг баахан компанийн захирлуудаар жийрэглэн далайн цаад руу илгээгээд, сэнхрүүлээд, буцаагаад авчирч амжсан байх юм.

Энэ хоёр “хос” сурвалжлагыг ойрын хэдэн өдөр UBS, TV9, TV5 гээд бусад телевизийн мэдээллийн хөтөлбөрөөр тэр чигээр нь үзүүлсэн. Тус тусын хөтлөгчөөр уншуулсныг эс тооцвол үг үсэггүй ижилхэн. Сэтгүүлчийн микрофон дээрх логог хүртэл нэгэн зэрэг титрээр дарж халхалжээ.

Харин МҮОНТ үүгээр зогсохгүй шинжтэй. 

2010.02.19-ны Баасан гаригийн хөтөлбөртөө 18.10. “Алтгүй шороо”. 1-р хэсэг гэсэн нэвтрүүлэг зарласныг сонирхвол “Бороо гоулд” компанийн нуруулдан уусгах технологийг Америкаас дэлгэрэнгүй танилцуулсан сурталчилгааны нэвтрүүлэг байлаа. “Манай сурвалжлах хэсгийнхний очсон Невада муж улсын уурхайд …” гээд нэгд нэгэнгүй ухуулав. 

Өнөөдөр “Бороо гоулд” компанид зөвшөөрөл олгуулах бүхэл бүтэн кампани зөвхөн телевизээр өрнөөгүй, өдөр тутмын сонинуудын хуудсан дээр ч оволзож байх юм. Нөгөө л ажлын байраараа барьцаалагдсан “Бороо гоулд”-ийн ажилчдыг төлөөлж ҮЭ-ийн идэвхтэнүүд учир зүггүй идэвхийлжээ. Хар хүний өмнөөс шар хүн болох вий дээ. Бас дээр дурдсан ажлын хэсэгт багтсан “Эрс шинэчлэл” хөдөлгөөнийхөн хэвлэлийн бага хурал хийхэд МҮОНТ  мэдээгээ хамгийн түрүүнд зориулж “Хариуцлагагүй төрийн түшээдээс болж “Бороо гоулд” компани хохирч байгааг тэд эсэргүүцлээ” хэмээн дуу хоолойгоо нэгтгэлээ.

Одоо Зоригт сайд тэр гарын үсгээ бушуухан зурахгүй бол хүний өөрийнгүй барьж идэх юм байна. Уул уурхайн компанийн барагдахгүй их мөнгө, түүгээр угжуулсан хэвлэл мэдээлэл хоёрыг хэн ч дийлэхгүй.

P.S: Бямба гаригийн 18.10-аас МҮОНТ-ээр “Алтгүй шороо” нэвтрүүлгийн хоёрдугаар хэсэг гарна.

Posted in Монголын Үндэсний Олон Нийтийн Телевиз | 3 Comments »

Сайд хаашаа, сурвалжлагч тийшээ

Posted by Бид on 2010/02/19

Утаанбаатараас гадагш хошуугаа ч цухуйлгаж чаддаггүй МҮОНТ-ийн “Монголын мэдээ” агентлагийнхан ер бусын хүйтэн энэ өвлийн их цаснаар гялс хөдөөлөөд ирсэн байх юм. Огцом шийдэж даарч хөрөхийг үл ажирсны учир гэвэл шинээр тодруулсан Улсын сайн малчдын цолыг гардуулахаар Ерөнхий сайд С.Батболд тэргүүтэй Засгийн газрын гишүүд аймаг, сумдыг амлан авч шинийн нэгний өмнөхөн давхилдан одоход араас нь салахгүй дагасан хэрэг. Мянгат, хоёр мянгат, гурван мянгат малчдын үлгэр жишээ цагаан гэрээр орж өргөмжлөл гардуулах ёслолын хажуугаар, бас ирж очих замдаа малчдын аж амьдрал, цагийн байдлыг сурвалжилж цагаан сараар өдрүүдэд үзүүллээ. Лав УИХ-ын даргын дагуул сэтгүүлчдийн Ховдоос авчирсан “Дэмбэрэлтэй” сурвалжлагууд одоо ч барагдаагүй “Цагийн хүрд”-ээр орой болгон гарч байна. Даргын бие аль хэдийнэ энд, дүр нь тэнд.

Бас болоогүй, Монголын үндэсний олон нийтийн радиогийн “Алтан төлийн эзэн” өргөмжлөлийг (яагаад ч юм мал төллөхөөс өмнө) дээрх сайдуудтай зэрэгцэн гардуулсан МҮОНРТ-ийн Ерөнхий захирал Наранбаатар зурагтаараа тэдэнтэй яг нэг ижил зиндаанд гарахыг амжуулж өгсөн байна лээ.

Ирсэн сайдууд (бас Захирал) тэр дороо буцахад дагаж ирсэн сурвалжлагчид мэдээж хоцроогүй. Зөвхөн цагаан  сараар сайд даргыг дагадаг бол бас яахав. Харамсалтай жилийн дөрвөн улиралд тийм. Хэвлэл мэдээлэл хэзээ, хаана, юуг сурвалжлахыг дээдчүүл мэддэг хэвээрээ. Магадгүй, яг одоо өөр ганц хоёр баатарлаг сурвалжлагч хөдөөгүүр явж байж мэднэ. Гэхдээ тойрогтоо ажиллахаар хөдөлсөн УИХ-ын гишүүд юмуу дараачийн сайд нар тэднийг хөтөлж яваагаас зайлахгүй.

Posted in Монголын Үндэсний Олон Нийтийн Телевиз | Leave a Comment »

МҮОНТ учрыг магадлав

Posted by Бид on 2010/01/17

Төмөр замын асуудлаар дэлгэцэн дээр дэгдсэн тулаанд хэвлэл мэдээлэл бараг л хэлмэгдсэн тухай үг яриа цухалзаж “муусайн олигархууд сэтгүүлчдийг худалдаж авахаа зогсоох”-ыг шаардах болов. Сэтгүүлчдийн нэрийг барьж амжуулах юм аа. Үнэндээ олигархууд сэтгүүлчдийг биш эзэд, захирлуудыг худалдаж авсан бөгөөд цаадуул нь “бонус” болгож сэтгүүлчдийнхээ амыг таглан төмөр замын талаар зөвшөөрөлгүй  дуугарах, тэр тусмаа эрэн сурвалжлахыг зогсоож иж бүрэн үйлчилгээ үзүүлсэн юм. Зөвхөн “25-р суваг” телевизээр сэтгүүлч Пүрэвхүү УИХ-ын гишүүн Л.Гүндалай, ОУСХ-ийн дэд захирал Д.Шүрхүү, эмч Б.Болдсайхан, эдийн засагч Д.Жаргалсайхан нарыг авчирж  маргалдуулав. Гүндалайг үзэх урьдын адил зугаатай, гэвч бүгдээрээ хөндлөнгийн хүмүүс болохоор юу ч тодорсонгүй.

Ухаа худгийн эсрэг ба төлөө захиалгат хоёр нэвтрүүлгийг олон нийтийн телевиз үзүүлээгүй. Яаж тэсэв ээ гэж бодсон шүү! Магадгүй хашир телевиз жинхэнэ эздээс нь урьж байгаад даацтай хэлэлцүүлэх юм болов уу? Би дахиад хууртав.

Мягмар гаригийн оройн “Цагийн хүрд” мэдээллийн хөтөлбөр “Өнгөрсөн амралтын өдрүүдэд хэвлэл мэдээллээр Ухаа худаг – Гашуун сухайтын төмөр замын талаар нэвтрүүлэг явсан, бид учрыг магадлав” хэмээн ихэд намбатай эхэлсэн ч “Төмөр зам тавих зөвшөөрлийг ганцхан “Энержи Ресурс”-д Засгийн газраас олгосон юм биш” гээд өмнөөс нь барьцах маягаар “Монголын алт” (МАК) компанийн зөвлөх, БНМАУ-ын Сайд нарын Зөвлөлийн дарга асан Д.Содномоор урагш тавих шууд төмөр замыг нь хамгаалж яриулсан, бас эдгээр төмөр замууд хэзээ нэгэн цагт төрийн өмчид ирэх тул амар амгалан байцгаа хэмээн ухуулсан сурвалжлага толилуулав. “Монголын мэдээ” агентлаг өөрөө ч бэлтгээгүй, хэд хоногийн өмнө TV9, TV5 зэрэг сувгаар нэр, хаяггүй цацагдсан бүтээл тэр чигээрээ байлаа.

 Хэдэн минутын дараа эхэлсэн “Бизнес ньюс”-ыг эргүүлтэл Энержи ресурс”-ийн захирал Г.Батцэнгэл Ухаа худгаас төмөр зам  татах зөвшөөрөл авсан тухайгаа тайлбарлаж зогсов. Дээрх сурвалжлагын дэлгэрэнгүй хувилбар болж таарлаа.  Сэтгүүлч М.Оюунчимэг бүр хөөрчихсөн “зах зээл хөгжсөн оронд дэд бүтэц нь хувийн хэвшилд байдаг … Ухаа худгийн төмөр замыг хувийн хэвшил барих боловч ашиглах нь монгол улсын бүх иргэнд нээлттэй юм байна” гэсээр жигтэйхэн баяртай өндөрлөв.

Үүнээс үүдээд сонин зүйлийг олж мэдлээ. Олон нийтийн телевиз тэсээгүй юм байна. “Баялгийн хараал”-аар илчлэгдсэн “Нүүрсний зам” захиалгат нэвтрүүлэг 2009 оны 12-р сарын 29-ны үдэш МҮОНТ-ээр “Танин мэдэхүйн аялал” тодотголтойгоор гарчээ. Үүнийг сэтгүүлч Б.Эрдэнэсолонго Улаанбаатар Эрхүү – Владивосток – Находка – Тэньжин – Бугат – Улаанбаатар маршрутаар хийсэн аялал хэлбэрээр бэлтгэж хойшоогоо ОХУ-ын нутгаар Номхон далай хүрсэн төмөр замыг муулж “…. өргөн төмөр замын үе дуусч байгаа бололтой… Орос, Монгол зэрэг хэдхэн орон өргөн төмөр замтай үлдэж байна… Үлдсэн нь дэлхий нийтийн стандарт болсон нарийн төмөр замтай… Оросууд өөрийн төмөр замыг ажилтай болгох гэж монголын нүүрсийг тээвэрлэхийг хүсч байна…Тэд онгоцны буудалд намайг дарамталж 500 рубль авсан” гэх мэтээр оросуудаас юу ч үлдээсэнгүй. Үргэлжлэлийг бид “Баялгийг хараал”-аас мэдэж авсан билээ. Төгсгөлд нь “Эх санаа M.Boom, BK Consult Forshung компанийн захиалгаар Blue Bird Production (Israel) бүтээв” гэж бичсэн байх юм. Үндэстэн дамнасан нэвтрүүлэг мөн дөө.

Бас болоогүй. 2010.01.03-ны Даваа гаригт МҮОНТ-ийн мэдээгээр Тавантолгойн нүүрсийг тээвэрлэх төмөр замыг хаагуур тавих талаар УИХ-ын гишүүн Р.Раштай хийсэн ярилцлага гэнэт оржээ. Ухаа худаг – Гашуун сухайтын төмөр замыг тавихыг “Энержи ресурс”-д зөвшөөрсөн тогтоолд 2008 онд гарын үсгээ тавьсан  эрхэм өөрөө, нарийн төмөр замыг ямар нэгэн дамжлага сааталгүйгээр Хятад руу барих нь эдийн засгийн ач холбогдол ихтэй, Чойроор дамжуулж шилжүүлэн ачилт хийхэд үр ашиггүй гэх мэтээр ярьсан нь мэдээж. Аль чиглэлийг сонгохыг Үндэсний хөгжил, шинэтгэлийн хороо гэдэг судалгааны байгууллагын дүгнэлтийг үндэслэн шийдвэрлэх хэрэгтэй гэж тэр үздэг гэнэ. Тэгвэл ҮХШХ-ны дарга нь ямар байр суурьтайгаа “Баялгын хараал”-ын эсрэг захиалгат нэвтрүүлгээр зарласан билээ.

Ухаа худгийн төмөр замын асуудлаар олон нийтийн телевиз зөвхөн “Энержи ресурс”-ын амыг харж сурталчилгааг  нь сэм сэмхэн (бараг хулгайгаар гэсэн үг) хийж өгдөг нь дахин нотлогдов. “Энержи ресурс”-ийн цөм болсон MCS яагаад өөрийн хэвлэл мэдээллийн хэрэгсэлгүй байдаг вэ гэвэл дурын хэвлэл мэдээллийг, тэгэхдээ МҮОНТ-ийг хамгийн түрүүнд худалдаад авч болдог учраас тэр гэж бодсон шүү.

Posted in + ТЕЛЕВИЗ, Монголын Үндэсний Олон Нийтийн Телевиз, Улс төр, эдийн засаг | Leave a Comment »

2009 оны онцлох үйл явдал: Телевизүүдийн сагсуурал

Posted by Бид on 2010/01/06

2009 он бүрэн дуусч түүх болон хоцорлоо. Харин манай хэвлэл мэдээлэл он дуусахад бүтэн сар дутуу байхад 2009 оныг дүгнэж эхэлсэн билээ.

Ардчиллын 20 жилийн ойгоор Монгол Улсын Ерөнхийлөгч төрийн одон, медалийг мянга түмээр тарааж, араас нь Ерөнхийлөгчийг орлож пээдийх зуршилтай Д.Дорлигжав гэгч “харин ч багадуулчихлаа” гэж ихэрхэж байх тэр өдрүүдэд сонин хэвлэл “Хоёрдугаар ээлжийнхэн хоолондоо буюу” Ц.Элбэгдоржийн найзууд энгэр цоолох цагаар” (“Өнөөдөр” сонин) гэх мэтээр шуурч эхэлсэн боловч цаадах нь арга сийлж өөрсдөд нь бөөн цол, тэмдэг зүүж өгөөд зогсохгүй жил болгоны энэ өдөр сэтгүүлчдийг шагнаж байхаа амлах нь тэр. Одоо “чи ч идсэн, би ч идсэн” …

Тэр мөчөөс эхлэн телевиз, радио, сонины одон медалийн шүүмжлэлээ санал нэгтэй зогсоож он дуусталх өдрүүдэд өөрийн магтаалд (хуучин цагт өөрийн шүүмжлэл гэж байдагсан) умбалаа. Монголын сонины холбоо, Монголын чөлөөт сэтгүүлчдийн холбооны “Дөрөвдэх засаглал”, Монголын телевизүүдийн холбооны “Алтан шонхор”, Монголын сэтгүүлчдийн нэгдсэн эвлэлийн оны шилдэг шалгаруулах ёслолуудаас хийсэн олон цагийн шууд нэвтрүүлэг (дундуур нь согтууруулах ундааны сурталчилгааг хавчуулахаа мартаагүй) МҮОНТ-ээс бусад бүх телевизийн дэлгэцийг эзэгнэв. 2009 онд Монголд, монголчуудад тохиолдсон өөр ямар ч үйл явдалд арилжааны телевизүүд оргил цагаа ийнхүү амь хайргүй зориулаагүй юм. Тэр нь багадаад маргааш өглөө бүгд давтсан гэж байгаа.  Энэ олон телевизэд сайн нэвтрүүлэг, нэвтрүүлэгч, сэтгүүлч, зураглаач, найруулагч, хөтлөгч зөндөө байж таарна, тэднийг мэргэжлийн үүднээс шалгаруулж өргөмжлөх нь зүйтэй байх, гэхдээ өөр ямар ч улсын телевизүүд “эрх мэдлээ ашиглан” улс орон даяараа өглөө, оройгүй цацаж сагсуурдаггүй. Дээрх ёслолууд дээр манай төрийн гурван өндөрлөг гурвуулаа бөөндөж заларсныг (яасан хөнгөмсөг төр вэ?!) харсан сумо Батбаяр гишүүн “та гурав нэг газарт, нэг цагт цугтаа шоудаж болдог юм уу?” хэмээн мэл гайхжээ.

МҮОНТ-ийг хамгийн шилдэг мэргэжлийн телевизээр шалгаруулжээ. Бараг хагас зууны түүхтэй, хамаг юм нь бэлэн, тэрбумаар тэрбумаар тэжээлгэдэг олон нийтийн телевиз өөр ямар байх ёстой вэ? Бас мэдээ, сурвалжлага, ярилцлага, “Шар мэдээ”-гээ минут, секундээр үнэлэн худалдаж үзэгчдээ мэхлэх талаараа мэргэжлийн өндөр түвшинд хүрсэн TV5-ын “Цаг” мэдээллийн хөтөлбөр оны шилдгээр тодорчээ.

Бас болоогүй, телевиз болгон 2009 оны амжилт ололтоо бахадсан нэвтрүүлэг бэлтгэж үзүүлсэн юм. Тийм мундаг телевизүүдийг үздэг байснаа би тэгэхэд л мэдэж авлаа. Олон нийтийн телевизийнх “Олон нийт МҮОНРТ-ийг сурвалжилсан нь” нэртэй хэрнээ өөрсдөө өөрсдийгөө сурвалжилсан байв.

Телевиз бол гарцаагүй хүчирхэг мэдээллийн хэрэгсэл боловч манайд шоу цэнгээн, савангийн дуурь, төлбөртэй нэвтрүүлэг, эх захгүй сурталчилгаанд эзлэгдэж, нийгэм-улс төрийн нэвтрүүлэг нэртэй хоосон ярианууд, харин мэдээллийн хөтөлбөрүүд тэр чигээрээ төр, засгийн ажил болжээ. Ийм байж өөрөөрөө сайрхаж чаддаг телевизүүдийн цаана сонинууд халхлагдаж үлддэг нь харамсалтай. Ноцтой баримт, гүнзгий дүгнэлт, шинэ санаанууд чухамдаа өдөр тутмын сонинуудад нийтлэгддэг билээ.

Posted in + СЭТГҮҮЛ ЗҮЙ, НИЙТЛЭЛ, НЭВТРҮҮЛЭГ, + ТЕЛЕВИЗ, МСНЭ, мэргэжлийн байгууллагууд, Монголын Үндэсний Олон Нийтийн Телевиз, TV5 телевиз | 2 Comments »

МҮОНТ манлайлав

Posted by Бид on 2009/12/06

Ням гаригийн үдэш хачин юм болж МҮОНТ 18 цаг 40 минутаас хөтөлбөртөө зарласан “Амьдрал ISO-д дуртай” гэсэн халамцуу нэртэй, тодруулбал, “Сэнгүр” шар айргыг сурталчилсан нэвтрүүлгээ цуцалжээ. Олон нийтийн радио, телевизийн тухай болоод Архидан согтуурахтай тэмцэх хуулиудийн заалтыг зөрчихөө больж ариун мөрийн замд оров уу?

Даанч тэгсэнгүй. Оронд нь “Энержи ресурс”-ын захиалгат нэвтрүүлгийг гэнэдүүлэн цацаж Ухаа худгийн төлөөх телевизийн сурталчилгааны кампанийг манлайлав. Өмнөх Бямба гаригийн өглөөний “Ярилцья” нэвтрүүлэг ахмад дипломатч, Гадаад хэргийн сайд асан Ц.Гомбосүрэн, тус компанийн гүйцэтгэх захирал Батцэнгэл хоёрыг урьсан бол  тэр үдшийн “Цагийн хүрд”  мань хоёрыг Ухаа худаг дээр зогсоож байгаад яриулжээ.

Түрүүчийн амралтын өдрүүдээр арилжааны телевизүүд “Энержи ресурс”-ийн төмөр замыг эсэргүүцсэн нэвтрүүлгээр дүүрсэн байсан бол энэ Бямба, Ням гариг “Энержи ресурс”-д бүрэн эзлэгдэж, уул овоо шиг их ажил хийсэн Ухаа худаг уурхайн төслийн магтаал, бас саяхан Ухаа худагт баяжуулах үйлдвэрийн шав тавих ёслолд оролцсон УИХ-ын Эдийн засгийн байнгын хорооны дарга Д.Баярсайхан тэргүүтэй гишүүдийн амнаас унасан сайшаалын үгсээр зүйсэн  хоёр янзын нэвтрүүлгийг зэрэгцүүлэн үзүүлж ах телевизтэйгээ хүч нэгтгэв. Үүний тулд телевизүүд хөтөлбөрөө уухайн тас өөрчилж “Энержи ресурс”-ийн хүссэн цагийг гаргаж өгчээ.

Одоо олон нийтийн ба арилжааны телевизийн ялгааг олно уу.

Posted in Монголын Үндэсний Олон Нийтийн Телевиз, Сурталчилгаа, далд сурталчилгаа, "пиар" | 1 Comment »

З.Алтай: Ланд-200-гийн оронд арван хэдэн камер аваад …

Posted by Бид on 2009/12/04

УИХ-ын чуулганы байнгын хорооны хуралдаанаар 2010 оны улсын төсөв хэлэлцэх үеэр МҮОНРТ-ийн үйл ажиллагааны санхүүжилтын 6 тэрбум гаруй төгрөгөөс гадна тоног төхөөрөмж худалдан авахад 500 сая төгрөг нэмж тусгах саналыг З.Алтай гишүүн эсэргүүцсэнийг TV5, UBS зэрэг арилжааны телевизүүд бүрэн эхээр үзүүлсэн юм.

Тэрбээр юу ярьсан бэ?

– Өнөөдөр Монгол Улсад цаг өөр болсон. 15-16 арилжааны телевиз явж байна. Улсаас нэг төгрөгний ч татвар авдаггүй, бор зүрхээрээ хэдэн реклам хөөгөөд амьдарч байгаа. Тэнд хичнээн мянган ялгаа байхгүй радио, телевизийн улсууд ажиллаж байгаа. Гэтэл өнөөдөр их мөнгө тэнд шаардлагатай юм уу, үгүй юм уу. Үндэсний олон нийтийн радио, телевизийн хийж байгаа цагийн хэмжээний багтаамжтай тэр бүх нэвтрүүлгийг энэ арилжааны хэдэн суваг, телевизүүд нөхөөд хангаад явж байгаа. Гэтэл өнөөдөр энэ их мөнгө яагаад орж ирээд байнав гэдэг дээр ганц жишээ хэлье. Радио, телевизийн улсын хорооны ерөнхий захирал өнөөдөр Ланд-200 гэдэг наян хэдэн мянган долларын үнэтэй цоо шинэ машин, монгол төгрөгөөр 120 сая гаран төгрөгийн машиныг өнөөдөр худалдаж аваад зүгээр унаад явж байна. Татвар төлөгчдийн мөнгө шүү, найз нараа. Энэ мөнгөөр чинь арван хэдэн мэргэжлийн сайн чанарын камер авчих мөнгө. Яагаад энийг харьцуулж бодож үздэггүй юм бэ? Тоног төхөөрөмж нь хуучирсан муудсан юм бол Ланд-200 авахынхаа оронд арван хэдэн камер аваад сурвалжлагч нартаа өгчих нь яасан юм бэ? Ингээд бүх юмыг энэ маягаар оруулж ирээд хуучин загварын үлэг гүрвэлийн маягаар иддэг энэ системийг бид өөрчлөхгүй бол болохгүй байна. Цаашдаа бид энэ мөнгийг Засгийн газар дээр даже энэ 6 тэрбумаас ядахдаа 2 тэрбумыг нь арилжааны телевизүүдэд Засгийн газрын харъяа байгууллагууд гэрээний дагуу энэ үндэснийхээ телевизүүдийг дэмжих үүднээс тодорхой сэдэв чиглэлээр нь гэрээ байгуулаад мэдээлийн сан дэргэдээ байгуулаад ингэж өгдөг хуваарьтай зах зээлд шилжихгүй бол аль амбасын үеийн, социализмын үеийн радио, телевизийн тэр юмаар бүх санхүүжилт юмыг өгөх юм бол энэ амьдралд нийцэхгүй юм байгаа юм шүү. Би тэрийн л хэлэх байна. Дарга нь үнэхээр тийм өндөр үнэтэй машин унаад татвар төлөгчдийн мөнгөөр ханхалзаж байдаг, тэгээд өшөө аппаратанд мөнгө хүрэхгүй байна, мөнгө авъя, ядуу байна гээд ингээд орж байгаа чинь логик нь мөн үү? Хяналт байна уу, энд эцсийн эцэст. Би энийг хүлээн зөвшөөрөхгүй байна. 6 тэрбум аваад явбал энэ бол хангалттай мөнгө. Юун 500 сая вэ? Тийм л мөнгө хэрэгтэй юм бол 200-гаа зараад камер болго л доо. Соната аваад явахыг хэн байг гэсэн юм…

Зөв зүйтэй шүүмжлэл дотор бас өөр санаа цохиж явахыг анзаарав уу? Арилжааны телевизүүд МҮОНРТ-ын адил төсвөөс мөнгө хуваарилуулахыг мөрөөддөг төдийгүй яаж хүртэх загвараа бодоод олчихсон УИХ дахь Алтай төлөөлөгчөөрөө дамжуулан санал тавилаа. Товчхондоо, яам, агентлагуудын захиалгаар нэвтрүүлэг бэлтгэж мөнгө авахыг хүсчээ. Манай телевизийн эзэд хараат бус байдал, эрх чөлөөг мөнгөөр солиход хэзээд бэлэн.

Харин З.Алтайн илчилсэн МҮОНРТ-ийн захирлын хөлөглөдөг машин гарцаагүй томджээ. Төрийн ордон орж үүрэг даалгавар аваад буцахын хооронд ингэж тансагладаг үнэн бол төсвийн мөнгө хайран. Хэн нэгэн тэрхүү машины зургийг авч над руу мэйлээр илгээвэл сайтдаа нийтлэхсэн.

Posted in Монголын Үндэсний Олон Нийтийн Телевиз | 11 Comments »

Пэрэнлэй ба телевиз

Posted by Бид on 2009/11/22

МҮОНТ тэргүүтэй телевизүүд өнгөрсөн хавар, зун, намар Пэрэнлэй гэж телевизийн “од”-той найзалсан билээ. Лав “Монголын мэдээ” агентлаг хаврын тариалалт, ургац хураалтын ажлыг сурвалжлах болохоороо хөдөө нутгийг биш ХХААХҮЯ-ыг зорьж Газар тариалангийн бодлогын хэрэгжилтийг зохицуулах газрын дарга Ч.Пэрэнлэй тэргүүтэй нөхдөөс заавал ярилцлага авдаг, хааяа тэднийг даган хөдөөлөхдөө Сэлэнгэ, Булганы аж ахуйнуудын тариан талбайн их ургацын дунд баатарлагаар зогсоон яриулж орой бүр үзүүлсээр өдий хүрсэн юм.

Гэтэл гурав хоногийн өмнөөс Пэрэнлэйг “Ганц худаг” дахь урьдчилан хорих төвд саатуулж Атрын 3-р аянд зориулсан хөрөнгө мөнгийг шамшигдуулсан хэрэгт татсан тухай МҮОНТ-ээр бусад бүх хэвлэл мэдээлэл шуугиж эхэллээ. Пэрэнлэй тэр олон сурвалжлагад оролцож ярилцлага өгөхийн хэдийд хаагуур нь амжуулдаг байна аа?  Үй олон телевиз, сониныхон зөвхөн Пэрэнлэй нарыг дагаж, зөвхөн тэдний амаар сурвалжилж биш, хааяа салж тусдаа яваад Тариалан эрхлэлтийг дэмжих сангийн Сэлэнгэ болоод Хөтөлийн салбараар орж (энэ хоёр салбарын эрхлэгчидтэй хуйвалдаж мөнгө завшсан гэнэ) хавь ойрын хүмүүстэй уулзан ярьж хөөрч байсан бол ч …

Пэрэнлэй өөрийн хамгийн болгоомжлох учиртай хэвлэл мэдээллийг, ялангуяа телевизүүд, тэр тусмаа МҮОНТ-ийг үргэлж дэргэдээ, нэг ёсондоо хараа хяналтандаа байлгаж чаджээ.

Posted in Монголын Үндэсний Олон Нийтийн Телевиз | 1 Comment »

Отгонбаяр сайдын телечадавхи

Posted by Бид on 2009/11/22

Монголын бүх телевиз, радио, сониныг зэрэгцүүлэн эзэмддэг эрхмийг танилцуулья. Нэр нь Ё.Отгонбаяр. Үндсэн ажил нь Боловсрол, соёл, шинжлэх ухааны сайд.

Зөвхөн сүүлийн хэдхэн сард МҮОНТ-ээр түүний “тоглосон” ямар ямар мэдээ, сурвалжлагууд үзсэнээ эргэн санахыг оролдьё. Лхагва гариг бүрийн Засгийн газрын хуралдааны дараа өөрийн салбарын хэлэлцсэн асуудлыг сэтгүүлчдэд танилцуулах, түүнийгээ “Нээлттэй засаг”-аар гүйцээж ярих, их, дээд, дунд, бага сургуулийн хичээлийн жилийн нээлт, сургууль цэцэрлэгийн барилга ашиглалтанд оруулах ёслол дээр үг хэлж харагдах нь зөвхөн бие халаалт байжээ.

Ялангуяа сургууль, боловсролын үйл явдал болгон заавал бүх зурагтаар гардаг, тэр болгонд Отгонбаяр сайд заавал ярилцлага өгдөг заншил тогтоод удлаа. АНУ-ын боловсролын байгууллагатай хамтран ажиллах гэрээнд гарын үсэг зурсан, “Орчлон” сургуулийн сурагчид олон улсын ерөнхий боловсролын үнэмлэхээ хүлээн авсан ёслол, Солонгост болсон урлагийн наадмаас медаль авсан хүүхдүүдэд баяр хүргэсэн, сүүлдээ БСШУЯ ба ЭМЯ хамтран ажиллах (гайхалтай!) гэрээнд гарын үсэг зурсан тухай сурвалжлагууд гарч бүгдээрээ Отгонбаярын яриагаар өндөрлөж байлаа. Төрийн хоёр яам энэ мэт ажлаа телевизгүйгээр, ерөөсөө гэрээгүйгээр, утсаар тохироод хийж чадахгүй юу? Нэг мэдэхэд БСШУЯ-наас ЭМЯ-нд явуулах албан бичигт Отгонбаяр сайд гарын үсэг зурсан тухай сурвалжлага “Цагийн хүрд”-ээр цацагдаж Отгонбаяр сайд тэр бичгийнхээ ач холбогдлыг тайлбарлаж зогсохнээ.

Алс холын Энэтхэгээс хүртэл монголын телевизийн дэлгэцийг эзэгнэсэн гээч. Ерөнхийлөгч Элбэгдорж Энэтхэгт хийсэн албан ёсны айлчлалын сурвалжлагуудын дундуур Ерөнхийлөгчөөс дутуугүй харагдаж ярьсан хүн бол Отгонбаяр.

Гай болж гахайн ханиад дэлгэрэв. Засгийн газрын хуралдаанаар сурагчдын амралтыг наашлуулсан, сунгасан, дуусгахаар шийдсэнийг зөвхөн Отгонбаяр дамжуулж, телехичээлийг Отгонбаяр эхлүүлж, ийм хичээлийг “Боловсрол суваг” телевизийнхэн бэлтгэж бусад телевизээр гаргадгийг Отгонбаяр ойлгуулж, цааш үргэлжлэх эсэхийг зөвхөн Отгонбаяр зарлав. Бусад өдрүүдэд телехичээлийн явцтай Отгонбаяр сайд танилцсан тухай сурвалжлагууд үргэлжилж, Отгонбаяр сайд юу үзсэн талаар Отгонбаяр сайд өөрөө танилцуулж зогссон. Ашгүй хичээл эхэлж телехичээл мэдээний сэдэв биш болохоос өмнө амжиж хичээлүүдийг CD-нд бичүүлэн тараах ёслолын ажиллагааг яаман дээрээ зохион байгуулж бүх телевизээр дахиад нэг гарч CD-ны ач холбогдлыг ярьж билээ.

Бас болоогүй. Отгонбаяр сайд оюутнуудад амны хаалт гардуулсан, Отгонбаяр сайд Т.Ганди сайдын хамт оюутнуудад аарц, чацарганыг улаан гараараа тараасныхаа боловсролын болоод анагаах ухааны гүн гүнзгий утга учрыг зөвхөн Отгонбаяр сайд өөрийн дуу хоолойгоор тайлбарлаж байж санаа амрав.

Өнгөрсөн долоо хоногт Олон улсын оюутны өдөр тохиоход “Цагийн хүрд”-ээр бас л Отгонбаяр сайд гэгээн дүрээрээ мэндчилгээ дэвшүүлж тэр өдөртөө амсхийх шиг санагдсан ч хэдхэн минутын дараа МҮОНТ-ийн сурталчилгааны клипэнд тоглоод дахин гарч харагдах юм. Ийнхүү боловсрол, соёл, шинжлэх ухааны салбарт багтдаг хагас сая гаруй сурагч, оюутан, багш, эрдэмтэн, театр, урлагынхан, тэдний бүх ажил, амьдрал Отгонбаяр сайдын зурагтаар гардаг фон болж хувираад байна.

Хүйтны эрч чангарсан сүүлийн гурав хоногт Отгонбаярын сайдын телечадавхи дагаад чангарлаа.

19-ны Пүрэв гаригийн үдэш НТВ-ийн “Чухал яриа”-гаар БСШУ-ны сайд Ё.Отгонбаяр

20-ны Баасан гаригийн орой TV5 телевизийн “Монгол орноо хөгжүүлье” хөтөлбөрөөр БСШУ-ны сайд Ё.Отгонбаяр.

21-ны Бямба гаригийн өглөө МҮОНТ-ийн “Ярилцъя…” нэвтрүүлгээр БСШУ-ны сайд Ё.Отгонбаяр (Саяхан шинэ ерөнхий сайд Сү.Батболд “боловсрол – тэргүүлэх салбар” гээд хэлчихснийг хоёр талаасаа ийнхүү “баярлан угтав”. Тэгэж яривал эзэн Чингэсээс эхлээд Сүхбаатар, Цэдэнбал бүгдээрээ эрдэм мэдлэгийг дээдэлдэг байсан, энэ утгаараа лав 800 жилийн өмнөөс тэргүүлэх салбар)

P.S:

Өнөөдөр амралтын өдөр МҮОНТ-ийн мэдээг санаандгүй үзтэл нөгөө Ё.Отгонбаяр сайд костюм пиджакаа ч тайлах завгүй “Бид сургуулиудад бүтэн сар хэрэглэх “Санитол” олгосон байгаа… ” хэмээн ярьж зогсоно. Хэзээ амардаг юм болдоо, хөөрхий. Ариутгалын “Санитол”-ыг хүртэл зүгээр өнгөрөөхгүй юм.

Posted in Монголын Үндэсний Олон Нийтийн Телевиз, Улс төр, эдийн засаг | 9 Comments »

Үзэгчид, сонсогчид, уншигчдын өмнө шууд гүйцэтгэв

Posted by Бид on 2009/11/13

OrkhonМҮОНТ-ийн Пүрэв гаригийн хөтөлбөрт 21.15 цагаас “Орхон гол нутгаа тэжээнэ” нэртэй 30 минутын нэвтрүүлгийн нэр дурайхыг үзээд олон нийтийн телевиз гол усныхаа төлөө дуугарахаар шийдсэнд баярлахыг шахав. Харин үзэнгүүтээ Орхон гол дээр усан сан байгуулах төслийг есөн шидээр сурталчилсан захиалгат нэвтрүүлэг болохыг мэдээд гонсойход хүрлээ.

Байгаль орчны сайд Л.Гансүх Монголд айлчилсан Турк улсын Байгаль орчин, ойн сайдтай хамт Улаанбаатараас нисдэг тэргээр хөөрч Булган аймгийн Хишиг-Өндөр сумын нутагт газардахад түрүүлж очсон түшмэд угтан авч хамтдаа энэхүү нэвтрүүлэгт оролцлоо.

Orkhon (11)Тэд Орхон голын усыг далангаар боож томоохон усан сан байгуулна, тэгвэл олон сайхан Орхон, Хэрлэнг бий болно, 30МВт-ийн усан цахилгаан станц байгуулж эрчим хүч үйлдвэрлэнэ, усан сан дүүрэхлээр бусад газар луу урсгана, ингэснээр усаар гачигдаг говийн аймгуудыг ундаална, тэнд байгуулагдах томоохон үйлдвэр, аж ахуйн газруудыг усаар хангана гэхчлэн төслийнхээ ид шидийг угсруулан магтав. Гэхдээ надад Орхон голын усыг газар доогуур булсан төмөр хоолойгоор говь руу урсгаж Оюутолгой, Тавантолгойд (энэ хоёр нэрийг яах аргагүй дурдсан) зориулах эцсийн зорилготой гэж ойлгогдлоо. Саяхан манай Засгийн газар “Айвенхоу Майнз”-ийн мэдэлд Оюутолгойн дорхи гүний усыг шилжүүлсэн гэрээг байгуулсан бол одоо Орхоны усыг хүргэж өгөхнээ? Монголд усны хэрэглээ 10 дахин нэмэгдэх тооцоо, “Гүний усаа хайрлая” уриа хоёрыг зүгээр нэг давтаагүй биз. Лав монголын хүн ам 10 дахин нэмэгдэхгүй… 

Орхон голын ус жилээс жилд багасч заримдаа Орхоны хүрхрээ цутгахаа больчихоод байхад юун усан сан бэ?

Orkhon (1)Харин Гансүх сайд “Энд гол тасарна гэсэн ойлголтыг толгойноосоо авч хая” хэмээн тушаасан бол МҮОНТ-ийн нэр нь үл мэдэгдэх баатар-сэтгүүлч “Орхон голын усан боомтыг Дөргөн Тайширын усан цахилгаан станцтай харьцуулан ашиггүй юманд мөнгө зарцуулах гэлээ гэж улс төржүүлэн ад үзэх хүмүүс байна. Тэдний зарим нь голын усыг бүрэн таслах гэж байна, голоо тэгэж хэрчүүлэхгүй хэмээн эх орон байгаль орчноо хамгаалдаг ардын баатар болж байгаа нь нууц биш ээ” хэмээн хэнийг ч юм довтолж, дээрээс нь Засгийн газрын мөрийн хөтөлбөрт нэгэнт орсон, шийдвэр хэдийнэ гарсныг анхааруулаад “Хил даван урсчихдаг гол дээрээ боомт далан барьж их уснаас нь балгын төдий ердөө гуравхан хувийг ашиглан ангасан цангасан говь нутгаа тэжээлээ хэмээн буруутган эсэргүүцэх “эх оронч” гарахгүй байх аа” хэмээн төгсгөв.

Orkhon (9)Хөөрхий тэр “эх орончид” нь хаана байгаа, хэзээ тэгэж дуугараад одоо хөхөрч няцартлаа балбуулж суугаа юм бол доо, бүү мэд.

Дэлхий дээгүүр сая сая жил урссан гол мөрний усыг боох, эргүүлэх гэх мэт хэт санаархал коммунист Хятадад хүртэл ширүүн маргаан тэмцэл дэгдээдэг. Харин Монгол улсад иймэрхүү энэ асуудлыг өөрөөр шийддэг боллоо. Яаж? Засгийн газар, том компаниуд захиалгаа өгөхөд олон нийтийн телевиз тэргүүтэй хэвлэл мэдээлэл эсэргүүцэгчдийн хүзүүнд “Эх орончид” (мэдээж хашилтанд бичнэ) гэсэн пайз зүүж байгаад үзэгчид, сонсогчид, уншигчдын өмнө шууд гүйцэтгэж байна.

Энэ удаад гардан гүйцэтгэгчид нь МҮОНТ-ийн “Монгол телевиз” кино нэгтгэл” нэрийн цаана нэрээ, нүүр царайгаа нууцалсан нь мэдээж.

Posted in Монголын Үндэсний Олон Нийтийн Телевиз | 4 Comments »

Ням гаригийн хулгайн нэвтрүүлэг

Posted by Бид on 2009/11/08

Нийслэлийн Баянгол дүүргийн Засаг дарга Л.Амгалан хөрөнгө орлогоо (хувийн компани, байр, хадгаламж, дүүргийн төсвөөс зүгээр л авсан 10 сая төгрөг зэргийг орхиж) худал мэдүүлсэн тул АТГ-аас хуулийн дагуу огцруулахыг шаардаад бараагүй өдий хүрлээ. Өөрийг нь сонгосон дүүргийн хурлын төлөөлөгчдөө ийш тийш аваачиж найрлаад хөдөлгөдөггүй, сэтгүүлчдийг хөлсөлж аваад “Би ганц эмэгтэй Засаг дарга, намайг гоочиллоо” гэх мэт ярилцлага өгөөд өрөвдүүлчихдэг. Бас “Мөрөөдлийн цэцэрлэгээ” мэдээ болгоноор ярьж баатар болдог.

Саяхан дараачийн “но” цухуйв. 2008 оны орон нутгийн сонгуулиар Нийслэлийн иргэдийн төлөөлөгчдийн хуралд нэр дэвших хугацаандаа “Баянгол-түншлэл” нэрээр сурталчилгаа явуулж, төсвийн 10 сая төгрөг зарцуулсныг АТГ-аас илрүүлээд дахин хэрэг үүсгэлээ.

Л.Амгалангийн хариулт удаан хүлээлгэсэнгүй.

2009.11.08-ны Ням гаригийн 12 цагийн үед МҮОНТ-ийн хөтөлбөрт байгаагүй хулгайн нэвтрүүлэг гэнэтхэн орж ирэв. [Яг эхлэлийг үзээгүй тул нэрийг мэдэж амжсангүй]. Баянгол дүүргийн ялалт амжилтыг нэгбүрчлэн танилцуулаад энэ бүгдийг Засаг дарга Л.Амгалан манлайлаад зогсохгүй орон гэргүй эрд гэр олгож, бяцхан охиныг нь өөрөө хөтлөн оруулсан зэрэг сэтгэл хөдлөм явдлыг харуулав. АТГ-ын мөрдөн байцаагчид үзээд нулимс дуслуулсан байх учиртай.

Төгсгөлд нь МҮОНТ-ийнхэн нэр хаяг огт тавьсангүй. Аргагүй дээ. Хулгайч нэрээ үлдээлээ гэж сонссон уу?

Бас нэгэн зүйл. Л.Амгалангийн “Баянгол-түншлэл” нэртэй сурталчилгааны кампанийг МҮОНТ хэд хэдэн удаа хулгайгаар сурталчилж 10 саяас нь овоо юм хүртсэн гэдэг.

Posted in 2008 оны Орон нутгийн сонгуулийн сурталчилгаа, Монголын Үндэсний Олон Нийтийн Телевиз | 14 Comments »

Төмөр замын ээлж ирлээ

Posted by Бид on 2009/11/04

“Айвенхоу Майнз”-ийн захиалгаар гэнэтийн ашгийн 68 хувийг цуцлах хуулийг батлах санал хураалтын өмнөхөн УИХ-ын гишүүн Ц.Даваасүрэн “Хүний өөрийнгүй нийлээд энэ хуулийг батлуулах юм байна” хэмээн дуугарч билээ. Одоо Тавантолгойн ээлж ирэхийн өмнөхөн түүний нэгээхэн хэсэг – Ухаа худгийг ухаад урагш гоожуулж эхэлсэн “Энержи Ресурс” компани төрийнхөн, бас хэвлэл мэдээлэлтэй нийлээд төмөр замаа хүссэнээрээ урагш шууд хил давуулах нь гарцаагүй юм байна.

Лхагва гаригт УИХ-ийн байнгын хорооны хуралдаанаар ЗТБХБ-ийн сайд Х.Баттулга уг төмөр замыг урагшаа биш, Сайншанд руу тавьж монголын үндсэн төмөр замтай холбох хэрэгтэйг нотлон маргалдаж, ажлын хэсгийн ахлагч нь “Энержи Ресурс”-ийн эздийн нэг, УИХ-ын дэд дарга Г.Батхүү байхдаа яадаг юм гэж хэрэлдээд дийлдсэн бол “Энержи Ресурс” хэвлэл мэдээллийг яаралтай дайчилж “Өнөөдөр” сонины маргааш өдрийн дугаарт сэтгүүлч Л.Болормаагийн тус компанийн гүйцэтгэх захиралтай хийсэн ярилцлага “Г.Батцэнгэл: Ухаа худаг-Гашуун сухайтын төмөр замын бүтээн байгуулалт бол Монгол Улсын эдийн засагт хямралын үед төдийгүй цаашдаа ч ихээхэн ач холбогдолтой гэж харж байна” гэсэн гарчигтайгаар нийтлэгдэв. 

Мягмар гаригт МҮОНТ-ээр “Транзит Монгол” нэрээр зарлаж байгаад “Халуун сэдэв” захиалгат нэвтрүүлэг үзүүлсэн. Олон нийтийн телевиз хэзээд бэлхэн!

Эхлээд Оросын болоод Казахстаны төмөр замыг тэнгэрт тултал магтсанаа Монголын төмөр замын хоцрогдол, доройтлыг элдвээр дуудаж “2007 онд зүтгүүрүүдийн 85 хувь хуучирсан технологитой байсан бөгөөд байнга эвдэрдэг. Эдгээр зүтгүүрүүд нь удаан, нүүрсээр ажилладаг” гэв. Монгол-Оросын хамтарсан төмөр замыг муулах нь зөв, гэхдээ ингэж гүжирдээд яахнав. Хар утаа хаясан хар зүтгүүр зөвхөн кинон дээр л явдаг болоод удаж байгаа шүү.

Тэгснээ “… Монгол улс хувийн хөрөнгө оруулагчдын төмөр замд оруулах хөрөнгийг талархан хүлээн авч төрөөс ил тод зохицуулах чиглүүлэх болно гэдгийг ойлгуулах нь маш чухал“ гээд захиалагчдынхаа даалгаврыг палхийтэл зарлаж орхив. Төрөөс зохицуулахыг зөвшөөрсөнд баярлалаа! Тэгсэн хэрнээ “… Үнэндээ төмөр замын газрын даргыг ЗТБХБЯ-ны сайд томилдог, үүний зэрэгцээ тухайн яам Улаанбаатар төмөр замын хувьцаа эзэмшигч байдаг, энэ нь тухайн яам төмөр замын салбарт бизнесийн болон бодлогын ашиг сонирхолтой болохыг илэрхийлж байгаа бөгөөд улмаар зохицуулалтын тухай ярихад ашиг, сонирхлын асар том зөрчил гарна” гэж төмөр замын салбарт төрийн бодлогыг хэрэгжүүлдэг яамыг жийж орхиод зохицуулалт хийдэг хараат бус байгууллагыг шаардлаа. Тун удалгүй манай төр төмөр замаасаа хөөгдөх биз. 

Яриаг нь хасч танахыг мэдээгүй юу, Улаанбаатар төмөр замын орлогч дарга Л.Халтар Монгол Улсын Засгийн газрын Худалдаа, тээврийг хөнгөвчлөх үндэсний хорооны гишүүн нэрээр (үндсэн ажлаа нуусныг бодоход мэдэж байж), Монголын төмөр замын газрын Бодлогын хэрэгжилт, хамтын ажиллагааны хэлтсийн дарга Ц.Энхбаяр, Монголын төмөр зам ТӨХК—ийн захирал А.Батболд нар төмөр зам дахь хувийн хэвшлийг мөрөөдөн хэсэг ярьцгаав. Уг нь төрд хамаатай албан тушаалтнууд юмсан. Эцэст нь 2008 онд хятадаас маш гоё зүтгүүр (нүүрсээр ажилладаггүй!) оруулж ирээд төмөр замд шахаж чадаагүй бололтой “Транскон” ХХК-ийн захирал Н.Ариунзаяа гомдлоо тайлав.

Нэвтрүүлэг “Энэхүү нэвтрүүлгийг бэлтгэхэд Засгийн газрын хэрэгжүүлэгч агентлаг – Төмөр замын хэрэг эрхлэх газар, МТЗ ТӨХК, Транскон ХХК гүн туслалцаа үзүүлэв” гэж төгсөв. Ямар нэгэн нэр, хаяг алга. Хэн захиалсан бэ?

P.S:  Уг нэвтрүүлгийг Пүрэв гаригийн үдэш тэр чигээр нь давтан үзүүлэв. Нэг нэвтрүүлгийг МҮОНТ хоёр удаа оргил цагаараа явуулсан бол цаана нь том захиалагч байна гэсэн үг.

P.P.S: Бямба гаригийн орой 3 дахь удаагаа үзүүлэх нь тэр. 

Read the rest of this entry »

Posted in "Өнөөдөр" сонин, Монголын Үндэсний Олон Нийтийн Телевиз | 3 Comments »

“Мөнгө дагасан үнэн”

Posted by Бид on 2009/10/22

МҮОНТ өнгөрсөн Бямба гаригт Лүнгийн хэргийг орон даяар шууд цайруулсан нь багадав бололтой дараачийн Лхагва гаригт арай өөрөөр давтлаа. Энэ нь Лүнгийн замын төгсгөл рүү уригдан очиж бэлтгэсэн “Зам дагасан үнэн” захиалгат нэвтрүүлэг юм.

Намрын зэврүүн шөнийн түнэл харанхуйг зүсэх хүчирхэг машин, техникийн гэрэлд зогсоод хэдэн сараар гэр орондоо харилгүй, үр хүүхдээ ч үзэлгүй зүтгэж буйгаа өгүүлэх ажилчид, Лүнгийн замыг замыг хэрхэн өдий өдий хүргэснээ танилцуулахдаа хүртэл хөдөө хөрж гадаа гандаж харагдах “Очир төв” компанийн дарга нарын дүр зураг сэтгэл хөдлөм…

Ажилчид нь баатарлаг (энэ замаас тавилцаад буцсан хятад ажилчид ч бас баатарлаг!), захирал нь чадварлаг, УИХ-д гараад суучихсан эзэн нь бүр илүү овсгоотой атал Лүнгийн зам тендерт амалсан хугацаанаасаа жилээр хоцорсон нь огт ойлгомжгүй. Цаашилбал, хавийн газрыг там болгосон, өвс бэлчээр сүйтгэсэн … нь бүр хачирхалтай. Гагцхүү МҮОНТ-ийн нэвтрүүлэгт энэ бүхэн багтаагүй. Яагаад гэвэл зам биш “Мөнгө дагасан үнэн” юм. Хэрвээ маргааш хэн нэгэн захиалбал архи, уурхай, хүн … гээд ямар ч нэртэй хамаагүй мөнгийг дагаж сурвалжилна…

Нэвтрүүлгийн төгсгөлд “Очир төв” компанийн гүйцэтгэх захирал ярихдаа, Лүнгийн зам дуусахад 10 км дутуу, замын ажил 11-р сарын 10 хүртэл үргэлжилдэг , хэрвээ цаг агаар саатуулахгүй бол “энэ ондоо багтааж ажиллах төлөвлөгөөтэй ажиллаж байгаа” [яг ингэж хэлэв] гэв. Дуусгана гэсэн үг үү, дуусгахгүй гэсэн үг үү?

Лүнгийн хэрэг хэдэнтээ цайрч одоо нэгэнт баатарлаг үйлс, түүхэн гавъяа руугаа явж байгаа тул ажилчдаа цааш зовоолгүй гэрт нь хариулж, дутуу замаа ирэх хавар эртхэн, тэгээд чанартай тавьж дуусгаасай билээ.

Posted in Монголын Үндэсний Олон Нийтийн Телевиз | 1 Comment »

“Лүнгийн хэрэг”-ийг дахин цайруулав

Posted by Бид on 2009/10/17

“Очир төв“ компанийн захирал Д.Дамба-Очир Улаанбаатараас Лүнгийн чиглэлд 106 км замыг тавьж чадах хүн хүч, технологи, санхүүгийн чадавхаа элдвээр гайхуулан тендерт шалгарсан ч хоёр жилийн дотор замыг орчны бэлчээртэй нь хамт там болгож хувиргаад баруун зүгийг зорьсон хүмүүс болоод нутгийн малчдын хараалыг ид идэж байсан тул тэрбээр 2008 оны УИХ-ын сонгуульд нэр дэвшихдээ ямар ч шаанс байгаагүй юм. Гэхдээ мань эр Улаанбаатараас TV5-ын сэтгүүлч Дагиймаа, “25-р суваг” телевизийн сэтгүүлч Пүрэвхүү (Сонгууль-2008: “Лүнгийн хэрэг”-ийг хэн цайруулав?), дээрээс нь Орхон аймгийнхаа бүх хэвлэл мэдээллийг ховх худалдан авснаар (нэлээд хэдэн км зам тавих мөнгөө зарцуулсан биз) сонгогдон УИХ-д шургалж амжсан юм.

“Энэ намар дуусгахын хооронд юун сүртэй юм” гэж тэр сэтгүүлчид хамгаалаад байсан Лүнгийн зам өнөөдөр байдаггүй ээ. Ядахад “тэмээн дээр ямааны гарз” гэгчээр 2008 оны наадамд зориулж Хүй долоон худаг руу бас л “Очир төв”-өөр тавиулсан хэдхэн км замыг өнгөрсөн зун буцаагаад хуулж дахин тавихад хүрсэн билээ.

Тэгвэл 2009 оны 10-р сарын 17-ны МҮОНТ-ийн “Ярилцья” хөтөлбөрт Д.Дамба-Очир гишүүн баатарлаг дүрээр гарч ирэв. Өнгөрсөн долоо хоногт УИХ-ын чуулган дээр Эрдэнэтийн зэс баяжуулах үйлдвэрийг нэхсэн зоригтноор тодорсон тул уригдсан ажээ. Өөрийгөө сэмхэн өргөж хэлснээр, “Эрдэнэтэд захирал байхдаа” (уг нийгмийн асуудал хариуцсан захирал байсан гэдэг) үүнийг санаачилж УИХ-ын гишүүн болоод Засгийн газрын мөрийн хөтөлбөрт гардан суулгаж өгсөн ч “хэрэгжүүлээгүй Засгийн газар ямар ч хариуцлага хүлээхгүй байна” хэмээн дүгнэж даналзав аа. 

Хариуцлагыг бусдаас нэхэх ёс суртахууны өндөр түвшинд хүрсэн энэ лут эрхмээс сэтгүүлч Ц.Мөнхтөр “Лүнгийн хэрэг”-ийн талаар асуухгүй байж чадаагүй нь мэдээж. Хариултууд гайхалтай!

– “Очир төв” компани ажилчдаа ажилтай байлгах үүднээс энэ замыг авсан … Зам яагаад удаад байна вэ гэвэл өөрийн хөрөнгөөр барьж байгаад гол бэрхшээл байгаа юм…

Уг замын мөнгийг төсвөөс үе шатаар өгч байгаа, харин хугацаандаа дуусдаггүй учраас мөнгө нь дагаж хоцордог. Саяхан Засгийн газар арга тасрахдаа “Очир төв”-д зориулсан бонд гарган мөнгөөр угжин эрхлүүлж эхэлсэн…

Хөтлөгч асуултаа чангаруулж “Яагаад 120 км замыг хуулаад хаячихсан юм бэ? Нэг хэсгийг хуулж зам тавьчихаад дараачийн хэсгийг хуулж болоогүй юм уу?” гэв

Дамба-Очир юу гэж хариулсныг та хэзээ ч таахгүй!

– Манайх европын технологи хэрэглэж байгаа…

Европ технологи биш Дамба-Очирч арга. Нийслэлд хууль зөрчөөд ч хамаагүй, ямар нэгэн аргаар суурь ухаад барилга зоочихвол цайрдагтай яг адил. 120 км-ын хучилтыг туушид нь хуулаад хаячихсан учраас яамнаас хүсээд хүсээд гэрээгээ цуцалж өөр компанид өгч чадахгүй болгосон хэрэг.

Улмаар Дамба-Очир давшилтанд орж “Төв зам учраас ингэж хэл ам их гардаг байх. Бас намайг УИХ-ын гишүүн болсонтой холбоотой байх” гэж бараг л Лхүмбийн хэргээс өөрийгөө цагаатгалаа.

Арга тасарсан сэтгүүлч “Тэгээд Лүнгийн зам маань хэзээ ашиглалтанд орох вэ? гэж асуулаа.

– 11-р сард орох БАЙХ…

Орохгүй гэсэн үг. Цаашаагаа өвлийн хүйтэн, цас мөс… Ингээд туршлагатай сэтгүүлч Ц.Мөнхтөр түүнд талархсанаа илэрхийлснээр “Лүнгийн хэрэг“-ийг дахин нэг удаа цайруулж өглөө. Монголын сэтгүүлчид Дамба-Очирыг барахгүй юм байна.

Одоо миний хувьд ганц найдвар бол Ерөнхий сайд С.Баярын бие нь сайжраад Солонгосоос бушуухан ирж Дамба-Очирыг баахан сэтгүүлчидтэй хамт дагуулан Лүнгийн замын ундуй сундуй дээр очоод саявтар Маршалын баригдаагүй гүүрний дэргэд нэгэн захирлыг загнасан шигээ загнах.

– Где дорога? [Энэ завсарт Дамба-Очир баахан ярина] За одоо би ярьж болох уу? Би зам харахгүй байна. Энийгээ дуусаагүй байж танайх Хүй долоон худагт өөр ажил аваад явж байсан. Төсвөөс танд …. тэрбум төгрөг өгсөн байна. Зам харагдаж байвал би ажил хийсэн гэж үзнэ. Гэтэл та 11-р сард дуусах БАЙХ гэж хээвнэг ярьж байна… Одоо дуусгах юм бол дуусга…

Posted in Монголын Үндэсний Олон Нийтийн Телевиз | 9 Comments »

Ямар сайхан юм бэ?

Posted by Бид on 2009/10/10

Бямба гаригт МҮОНРТ-ийн Ерөнхий захирал М.Наранбаатар өөрийн телевизийн “Ярилцъя” хөтөлбөрт оролцож гурван жил хагас эзэлсэн суудлаа хэн нэгнээс тас харамлаж дахиад арван жил тухалсан ч гайхах явдалгүй тухай санаагаа түс тас хэлж орхив. Мэдээж манж өгүүлбэрээр жийрэглэсэн.

… Намайг энэ албан тушаалд байлгахгүй байх сонирхолтой хүмүүс бий …Үндэсний зөвлөл Ерөнхий захирлыг хуулийн дагуу дахин томилсон… Цаашаа хичнээн ч ажиллаж болно. Би үүнийг өөртөө хамааруулаад хэлж байгаа юм биш… Би Би Си, Эн Эйч Кей-гийн захирал арван хэдэн жил болсон байдаг… Би үүнийг өөртөө хамааруулаад хэлж байгаа юм биш…

М.Наранбаатар захирал Их Британийн BBC, Японы NHK гэдэг олон нийтийн хоёр том телевизийг маш сайн судалсан нь сайшаалтай. Өөрийн биеэр тийшээ айлчилж, Интернэтээр хайж, бас саяхан болж өнгөрсөн ABU-гийн чуулганд ирсэн японы төлөөлөгчдөөс “Танай захирал хэдэн жилийн хугацаатай вэ? Нээрээ юу? Ямар сайхан юм бэ!хэмээн дахин дахин лавлаад баримт нотолгоотой юм хэлсэн гэдэгт эргэлзэхгүй байна.

Гэхдээ BBC юмуу NHK-гийн захирлууд татвар төлөгчид буюу үзэгчдийн мөнгийг хуулийн дагуу зарцуулж ил тод тайлагнадаг (манай нөхөр ноднин 148 сая төгрөгөөр хэтрүүлчихээд санхүүгийн тайлангаа тас нуучихаад байгаа), иймэрхүү зөрчил гаргавал “энэ албан тушаалд байлгахгүй сонирхолтой” хүмүүс гарч ирээд огцруулдаг, цаашилбал олон нийтийн телевиз гэж МҮОНТ шиг төр, засгийн телевизийг хэлдэггүй, олон нийтийн телевиз том компаниудийн мөнгөөр нэр, хаяггүй захиалгат нэвтрүүлэг явуулдаггүй, сонгуулийн үеэр улс төрийн намуудад  “тэнцвэртэй” худалдагддаггүй, 7-р сарын 1-4 болон Оюутолгой гэрээг батлахын өмнөх шиг эгзэгтэй өдрүүдэд олон нийтийнхээ дуу хоолойг хаадаггүй … гэх мэт “жижиг сажиг” зүйлийг огт сонирхоогүй нь илт.

Posted in Монголын Үндэсний Олон Нийтийн Телевиз | 4 Comments »

“Алим” агентлагийн өнөөдрийн дугаар …

Posted by Бид on 2009/10/10

Телевизийн хөтлөгч алдаад үг өгүүлбэрээ буруу хэлж болно. Маргааш нь зөв хэлнэ биз. За яахав, хоёр удаа алдаж болно. Нөгөөдөр гэж өдөр бий… Гэхдээ алдаагаа олон сар, жилээр залруулдаггүй буюу хэлсэн өгүүлбэрээ сайн ойлгодоггүй хөтлөгчдөөр МҮОНТ дүүрэхнээ.

Тодруулбал, “Монголын мэдээ” агентлагийн хөтлөгчид мэдээ мэдээллийг “болгодог” талаар би хэдэнтээ бичиж байсан. Ойлгодоггүй ээ. Араас нь “Гэрэлтэй цонх” хөтөлбөр Интернэтээс зурагтай юутай нь хуулсан, гадаадын одууд ингэлээ тэглээ гэсэн марзан мэдээнүүдээ “5 хором” нэртэйгээр үзүүлж цагаа бөглөхдөө “Бид энэ булангаараа дэлхий дахинд болж байгаа хамгийн сонирхолтой мэдээ, мэдээллээс хүргэдэг билээ” гэж гайхуулж салахгүй юм. Үдэш болгон шүү!

Эгч нарын дэмийрэл хүүхдийн нэвтрүүлгийн хөтлөгч дүү нарт халдварлаж “Алим” агентлагийн өнөөдрийн дугаарыг үзнэ үү” хэмээн хэлд орж байна.

Халдвар тархсаар. Гурав, дөрвөн телевизийн мэдээнээс түүж үзүүлдэг C1 телевизийн “Фокус” нэвтрүүлгийн хөтлөгч бүсгүй “Өнөөдөр болсон анхаарал татсан мэдээ, мэдээллээс хүргэж байна” гэсэн бол БТВ телевизийн “Б цэг” хөтөлбөрийн хөтлөгч залуу “Одоо та бүхэн дэлхийн улс орнуудад болсон гадаадын мэдээ мэдээллээс хүргэнэ” гэхийг сонсов. Эрэгтэй, эмэгтэй ялгаа алга…

Монголчууд буруу ярьж зөв ойлгодог ер бусын авъяастай хүмүүс.

Үүнийг нотлох гэж УИХ-ын дарга Д.Дэмбэрэл өнгөрсөн Баасан гаригийн нэгдсэн хуралдаан дээр С.Эрдэнийг тангараг өргөсний дараа:

– Энэ бол парламентийг бүрэн бүтэн болгох талаар хийж байгаа чухал арга хэмжээ юм. С.Эрдэнийг УИХ-ын гишүүнээр сонгогдсон явдалд талархал илэрхийлье” гэв.

Одоо цагт ямар нэгэн арга хэмжээг “хийдэг”, бас хэн нэгэнд баяр хүргэхийн оронд “талархдаг” болжээ. Спикер хэлж байгаа болохоор зөв ойлгохоос доо …

Posted in BTV, C1 телевиз, Монголын Үндэсний Олон Нийтийн Телевиз | 3 Comments »

Хориг үргэлжилж байна

Posted by Бид on 2009/09/24

Оюутолгойн гэрээний төслийг шүүмжлэгчдийг олон түмэнд хамгийн нөлөөтэй мэдээллийн хэрэгсэл – телевизээр яриулахгүй, үүний тулд аливаа хэлэлцүүлэг, мэтгэлцээн зохион байгуулахгүй байх хоригийг өнгөрсөн Бямба гаригт МҮОНРТ тун боловсон зөрчиж “Ярилцья” хөтөлбөртөө УИХ-ын гишүүн Ц.Даваасүрэн, Ш.Сайхансамбуу хоёрыг урьж Оюутолгойн гэрээний талаар хэсэг яриулав.

Ш.Сайхансамбуу: Бид [Оюутолгойн гэрээний төслийг шүүмжилсэн хэсэг гишүүд] хэвлэл мэдээллээр ярья гэхээр яриулаагүй… Хэдхэн хүн шийдээд тэрийг битгий зурагтаар гарга гэдэг… Бензиний үнийг хуйвалдаад нэмдэг компаниуд шиг…

Ц.Даваасүрэн: Тэр үеэр би сонинд ярилцлага өгсөн чинь сурвалжлагч нь эргээд таны хэлсэн энэ хэсгийг хасахгүй бол нийтэлж болохгүй байна гэсэн. Би тэнд Оюутолгойн гэрээний төслийг энэ хэвээр нь баталбал юу Монгол Улс юу алдах вэ гэсэн тоог хэлчихсэн юм…

Ноцтой мэдэгдлүүд! Эрхэм гишүүд амаа скотчдуулах шахсан байна шүү!

Ашгүй олон нийтийн телевиз гэмшиж хоригийг өөр дээрээ цуцлахаар шийдэв үү гэтэл бас үгүй аж. Засгийн газар “Айвенхоу Майнз”-тай тохирсон гэрээндээ гарын үсэг зурахад нэгэнт саадгүй болсон тул “албан ёсны зөвшөөрөлтэй” хоёр гишүүний гомдлыг ганц удаа тайлахад аюулгүй гэж үзсэн бололтой. Олон ургальч хэлэлцүүлэг өрнүүлэхийн тулд байдаг гэж ойлгогддог “Нээлттэй хэлэлцүүлэг” энэ сэдвийн өмнө тас хаалттай хэвээрээ.  

Маргааш нь “Ийгл” телевизийн “Зочны цаг”-аар “Миний монголын газар шороо” хөдөлгөөний тэргүүн П.Болд уригдаж “… иргэний хөдөлгөөнүүдэд хэвлэл мэдээлэл хаалттай байсан, “… бүх хэвлэлүүд хаагдчихсан учраас бид үгээ хэлж чадахгүй байна… гадаадынхан манай хэвлэл мэдээллийг худалдаад авчихсан байна” гэсэн.

Бас Авирмэд, Дашзэвэг, Хурц, Болд, Владимир нарыг орой болгон урьж Оюутолгойн шударга бус гэрээний төслийг шударга болтол нь үзэлцэнэ гэж зарласан TV9 телевиз сэмээрхэн дуугаа хураажээ. 

“Оюутолгойн хориг” үргэлжилж байна.

Posted in Монголын Үндэсний Олон Нийтийн Телевиз, TV9 телевиз | 1 Comment »

МАХН-ын зөв мэргэн захиалгаар …

Posted by Бид on 2009/09/17

Хэд хоногийн өмнө МАХН-аас санаачлан “Нийгмийн ардчиллын аян”-ыг 2009.09.15-2009.12.15-ны хооронд гурван сарын турш явуулахаар болжээ. АН-ынхны сүр дуулиантай тэмдэглэхээр бэлтгэж байгаа Ардчилсан хувьсгалын 20 жилийн ойтой зориуд давхцуулж хажуугаар нь орохыг хүссэн биз. Намуудын энэ толхилцоон бидэнд ямар хамаа байхав. Гэтэл МҮОНТ уг аяны нээлтэд зориулсан том хэлэлцүүлгийг МАХН-ын захиалгаар тэр өдөр нь тусгайлан зохион байгуулж өглөө.

Posted in Монголын Үндэсний Олон Нийтийн Телевиз | 2 Comments »

“Гэгээн үдэш” ба “Цагийн хүрд”

Posted by Бид on 2009/09/17

Өчигдөр МҮОНТ-ийн удирдлагууд хэвлэл мэдээллийн зарим судлаач, төрийн бус байгууллагын төлөөллийг урьж ярилцав. Тэдний тоонд багтаж очсон миний бие Бямба гаригийн урлаг, соёлын “Гэгээн үдэш” хөтөлбөрийг МҮОНТ-ийн хамгийн сайн нэвтрүүлэг гэж үздэг, харин “Цагийн хүрд” тэр чигээрээ төр засгийн мэдээллийн хөтөлбөр, учир нь бүх мэдээ, сурвалжлага нь албан ёсны арга хэмжээ, хурал, семинар, ёслолын тухай байдаг (үүнийг сэтгүүлчид нь чадах чинээгээрээ нуун далдалдаг), хөдөөнөөс бэлтгэсэн сурвалжлагууд нь төрийн томчуудыг дагаж, сайндаа л ямар нэгэн төсөл, хөтөлбөрийн захиалгаар хийгдэж байгааг (өнгөрсөн зун гэхэд “Монголын мэдээ” агентлагийн нэг ч сэтгүүлч “бие дааж” хөдөө яваагүй) шүүмжилж бас агуулгын хувьд огт ялаагүй “Сүлд”, “Нээлттэй засаг” мэтийг болимоор санагддагаа хэлсэн юм.

Тэр ч яахав. МҮОНТ-ийн удирдлага янз бүрийн хүмүүс, энэ удаад бидний санал бодлыг сонсоо л биз. Харин энэ тухай сурвалжлагыг оройн “Цагийн хүрд”-ээр үзүүлж байх юм. Ямар хэрэг байна аа?

Posted in Монголын Үндэсний Олон Нийтийн Телевиз | Leave a Comment »

Төр, засгийн хагас арилжааны телевиз

Posted by Бид on 2009/09/09

2009 оны 8-р сарын 28-ны “Цагийн хүрд” мэдээллийн хөтөлбөрийн нэгэн мэдээ “МҮОНРТ цаашид ямар удирдлагатай байхыг эцэслэн шийдлээ” гэсэн эхлэлтэй байв. Яагаад эцэслэн? Урьд нь шийдэгдэхгүй зовоож байснаа сая нэг дууссан мэт сүржигнэхийн учир юу байв? Цааш үзэхүл, МҮОНРТ-ийн Үндэсний телевизийн хуралдаан болж ерөнхий захирал М.Наранбаатарыг “хатуу шалгуур”-аар оруулж 90 хувийн саналаар хугацааг нь дахиад гурван жилээр сунгасан юм байна. Хуралдааныг даргалагч, “Үндэсний шуудан” сонины ерөнхий эрхлэгч Б.Ганболд одоогийн захирлыг үүргээ сайн биелүүлсэн гэж магтсан уг  мэдээ МҮОНРТ-ын хараат бус байдал сайжирсан гэх мэт тайлбараар төгслөө.

Яг тэр өдөр АН-ын З.Энхболд, Х.Тэмүүжин нарын УИХ-ын хэсэг гишүүн хоёр жилийн өмнө ОНРТ-ийн хамт олны зөвлөлийн өргөх бичгийн дагуу УИХ-аас ажлын хэсэг байгуулж шалгалт хийсэн дүнг УИХ-ын чуулганаар хэлэлцсэний дараа ерөнхий захирлыг нь сонгон шалгаруулах журмаар томилохыг шаардсаныг ”Цагийн хүрд” харин тас нуув. Тэд үнэнд биш даргадаа хайртай аж.

Маргаашнаас”Өдрийн сонин”-д шүүмжлэлтэй ярилцлагууд гарч томилгоог эгзэгтэй болгож орхив. Харин “Өнөөдөр” сонин МҮОНТ-ийн ерөнхий захирал М.Наранбаатарын ” Би хэний үгэнд ороогүй вэ гэдэг нь сонины ярилцлагуудаас харагдаж байгаа байх” гэсэн том ярилцлагыг нийтэлж Үндэсний зөвлөлийн нарийн бичгийн дарга Б.Баттуяа, Үндэсний зөвлөлийн гишүүн Ц.Гомбосүрэн, С.Цэрэндорж, Л.Болд, бас МҮОНРТ-ийн ҮЭ-ийн зөвлөлийн дарга М.Баттөмөр, бас МҮОНТ-ийн Үдшийн нэвтрүүлгийн редактор, “хамт олны зөвлөлийн гишүүн асан” (яг ингэж бичжээ. 2007 онд өлсгөлөн зарласан нөхдүүдийг гэмшлийг харуулсан хэрэг) Д.Наранцэцэг нарын яриагаар хүч нэмжээ. (“Өнөөдөр”-ийн ээлжит захиалгат нийтлэл. Хэрвээ тийм биш бол нөгөө талын байр суурийг оруулахсан).

Дээрх ярилцлагад Наранбаатар захирал МҮОНРТ-ийг ямар мундаг удирдаж хичнээн их ялалт амжилтанд хүргэснээ сайрхаад сонгуулийн сурталчилгааг ямар ч өө сэвгүй явуулсныг нь “Глоб интернэшнл”, Нээлттэй нийгэм форум, ТББ-ын эвсэл зэрэг мэргэжлийн байгууллагын мониторингоор нотлогдсон тухай ярьжээ. Гэтэл ННФ мониторинг явуулаагүй, зөвхөн “Глоб”-ийг санхүүжүүлсэн бол ТББ-ын эвсэл гэж мэргэжлийн ямар байгууллага байдгийг бүү мэд. Харин үлдээд байгаа “Глоб”-ын мониторинг бол МАХН ба АН-д зориулсан сонгуулийн сурталчилгааны цаг зөвхөн ойролцоо байсан эсэхийг гаргаснаас төдийлөн хэтрээгүй юм.

Үнэндээ юу болсон бэ гэвэл МҮОНРТ нь 2008 оны УИХ-ын ба 2009 оны Ерөнхийлөгчийн сонгуулийн тухай хуулийн заалтуудыг уландаа гишгэж улс төрийн хоёр гол хүчинд “тэв тэнцвэртэй” худалдагдсан билээ. Ингэхдээ ямар “хулгай” хийж, сонгогчдийг хэрхэн хууран мэхэлснийг миний бичлэгүүдээс үзээрэй (МҮОНТ, 2008 оны УИХ-ын сонгууль, 2009 оны Ерөнхийлөгчийн сонгууль гэсэн ангиллууд). Баримт жишээнүүд өдөр, цаг, минуттайгаа бий. Сүүлчийн сонгуультай холбоотой ганц жишээ дурдахад “Цагийн хүрд” мэдээллийн хөтөлбөрөө лангуун дээр гаргаж тавиад нэг минутыг нь 500 мянган төгрөгөөр үнэлж хоёр нэр дэвшигчийн штабт сар гаруйн турш зарсан билээ. Бүр сэтгүүлчдээ дагалдуулаад өгчихсөн…  

Хойшид ядахдаа ичээд дуугүй байх болов уу гэтэл цагаандаа гарч байгаа бололтой.

Өнөөдөр МҮОРНТ-ийн удирдлага ба Үндэсний зөвлөл хоёр нэг болжээ. Тэднийг шүүмжилж хариуцлага нэхвэл бие биенийхээ араар нь орж нуугддаг, эсвэл “олон нийт”, “хараат бус байдал” зэрэг гоё үгээр давшилдаг болж. Тэд нийлээд МҮОНТ-ийг хувьчлаад авчихжээ. 

МҮОНТ муу ажиллаж, хуулиа байнга зөрчиж, удирдлагууд нь хариуцлага хүлээдэггүй гэдэг нь Ардчилсан намынхан л хэлж байгаа болохоос биш яг үнэн. Гагцхүү АН-ынхан өөрсдөө 2005 онд МАХН-тай нэг хөнжилд орж байгаад Олон нийтийн радио, телевизийн хуулийг төрүүлсэн, дараа нь Үндэсний зөвлөлийг тэнцүү хувааж өөрийн талын хүмүүсийг нэр цохож оруулсан, ноднин өвөл яг тэгэж шинэчилсэн билээ. Тэгэхэд зуугаад төрийн бус байгууллага нэгдэж хэдэн нэр дэвшүүлэхэд нэгийг ч аваагүй! Хохь нь! Харамсалтай нь үзэгчид бид хамт хохирч байгаа юм.

Өнөөдөр энэ телевиз, радио хоёр 40,30,20,10 жилийн өмнөх шиг [хоёр] нам, засгийн телевиз хэвээрээ төдийгүй нэмээд арилжааны телевиз болчихож. Ялгаа гэвэл олон нийтийн  пайз зүүсэн. Захиалгат, төлбөртэй нэвтрүүлэг тоймоо алдлаа. Уг нь арилжааны телевизүүд шиг мөнгөнд бүү донт, битгий худалдагд гэж жил бүр татварын төлөгчдийн 7-8 тэрбум төгрөгийг өгдөг. (Тэд үүнээс 2-3 тэрбумыг гартаа ч барьдаггүй, нэвтрүүлгийг орон даяар шууд дамжихад зориулагддаг гэж гомдоллож байсан. Тэгвэл тэр мөнгөөр МҮОНТ-ийн оронд TV9 юмуу “25-р суваг” телевизийг орон даяар орой бүр шууд дамжуулаад юу хэлэхийг нь сонсох юмсан). Тэдэнд 40 жилийн түүхтэй бэлэн телевизийг байшин барилга, техник хэрэгсэл, хүмүүстэй нь өгсөн. 2008 онд 7 биш бүр 11 тэрбумийг хуваарилсан.  Тухайлбал, техникийн шинэчлэл хийхэд 2 тэрбум, дээвэр засах энэ тэрд хэдэн зуун сая, нийлээд 11 тэрбум төгрөг өгсөн. Гэтэл төсвөө 148 сая төгрөгөөр хэтрүүлсэн байх юм. Зөвхөн үүнийхээ төлөө Ерөнхий захирал хариуцлага хүлээх ёстой баймаар.

2009 оны эхээр МҮОНТ-ээс Хямралын эсрэг аян зарлаж орой болгон тусгай нэвтрүүлэг явуулж орон даяар цацсан цагийг тооцвол лав хэдэн арван сая төгрөгт хүрч таарна. Харин аянаа дүгнэхдээ (UB palace-д шоудаж) 30 гаруй сая төгрөг цуглуулснаа зарласан санагдана. Ядарсан ардуудын мөнгийг 500, 1000-аар татахын оронд багтаж ядсан төсвөөсөө ганц хоёр тэрбумыг хэмнэж хүүхдийн оношлогооны төвд зориулсан бол жинхэнэ хямралын эсрэг аян болохсон!

МҮОНРТ 2008 оны үйл ажиллагааны тайландаа төсөв санхүүгээ оруулахгүй тас нуужээ. Гэтэл Олон нийтийн радио, телевизийн хуульд зааснаар бол заавал төдийгүй дэлгэрэнгүй тайлагнах ёстой. (6.1. Олон нийтийн радио, телевиз жил бүр үйл ажиллагааныхаа дэлгэрэнгүй тайланг өдөр тутмын сониноор, эсхүл нийтэд хүртээмжтэй бусад хэлбэрээр мэдээлэх бөгөөд тайланд дараахь мэдээллийг тусгана: … 6.1.2. санхүүгийн жилийн тайлан, аудиторын дүгнэлт; 6.1.3. олон нийтийн радио, телевизийн Ерөнхий захиралтай байгуулсан гэрээний хэрэгжилт… ). Үндэсний зөвлөл үүнийг мэдэхийн дээдээр мэдэж байгаа хэрнээ …. Нийлж нуулцах шалтгаан байна аа?

Тэд 2007-2008 оны санхүүгийн тайландаа аудит хийлгэх компаниар “Улаанбаатар аудит” корпорацийг сонгон авсан байдаг.  Харин хэдхэн хоногийн өмнө “Гэрэлтэй цонх” хөтөлбөрийн “Үдшийн шуудан”-гийн зочноор захирал Осоргаравыг нь урьж баахан сурталчилгаа хийлгэлээ.

Тал засахдаа мундаг юм аа…

Posted in Монголын Үндэсний Олон Нийтийн Телевиз | 9 Comments »

Бойкот

Posted by Бид on 2009/08/27

Оюутолгойн гэрээг байгуулахаас өмнө “Айвенхоу Майнз”, “Рио Тинто” компанийн шаардсан 4 хуулийн өөрчлөлтийг манай Засгийн газрын ажлын хэсгийн зуучилснаар УИХ хэдхэн хоногт гүйцэлдүүлж өглөө.

Чуулганы хуралдаан дээр Сангийн сайд С.Баярцогт “Манай ажлын хэсэг аль нэг талд үйлчлээгүй…” гэж биеэ хамгаалж харагдсан. Уг нь нэг талд үйлчлэх учиртай, тэр нь Монголын тал байх ёстойсон. Хэдэн өдрийн турш түүний урсгасан тайлбар, бусад улс орон ингэдэг тэгдэг жишиг, зах зээлийн 50 жилийн прогноз, гаднын зөвлөх компанийн (цаагуураа Айвенхоу Майнз-ын хувьцаа эзэмшдэг гэсэн) гаргаж өгсөн тоо цифрт эргэлзсэн, алт, зэсийн үнэ огцом өсөхөд 68 хувийн татварын оронд ахиухан юм хүртээх, газрын гүний усыг ганц компанид өгч болохгүй гэсэн Н.Батбаяр, Г.Даваасүрэн, Д.Тэрбишдагва, Д.Энхбат зэрэг гишүүдийн шаардлагыг зөвхөн няцааж байлаа.

Бид 30, 50 жилийн цаадахыг яаж мэдэж байна аа? Нэгэнт мэдэхгүй юм чинь 15 жилээр гэрээ хийгээд сунгаад явбал найдвартай гэж мөн ч их ярьсан даа. Үүний тулд зарим гишүүд Ашигт малтмалын хуульд өөрчлөлт оруулах төсөл өргөн барьсан, гэхдээ үүнийг Айвенхоу Майнз зөвшөөрөөгүй, нэгэнт Айвенхоугийн зөвшөөрөөгүй юмыг УИХ хийхгүй. Хийлгэх ч үгүй.

Дөрвөн хуулийг өөрчлөх нь нэгэнт шийдэгдсэн асуудал байжээ. 57-р тогтоолоор Засгийн газарт үүрэг өгсөн УИХ-ын дарга Д.Дэмбэрэл Үндэсний аюулгүй байдлын зөвлөлийн хуралдааны дараа Засгийн газраас хууль өөрчлөх даалгаврыг дуулгавартай хүлээн авч байхыг харахад “дээгүүрээ яриад шийдчихсэн” нь илт байв. Нэгэнт парламентад сөрөг хүчин байхгүй болохоор эсэргүүцсэн цөөн хэдэн гишүүнийг олонхоороо дарж авлаа.

Компани, Засаг хоёрын талд бүхэл бүтэн хэвлэл мэдээлэл, сэтгүүл, сэтгүүлч, нийтлэлчид хүчин зүтгэлээ. Харин гэрээг эсэргүүцээд байсан иргэний хөдөлгөөнүүдийг манай хэвлэл мэдээлэл энэ хэдэн өдөр бойкотлов.

“Эрс шинэчлэл”, “Миний Монголын газар шороо”, “Иргэдийн альяанс” зэрэг байгууллагын хоёр удаагийн хэвлэлийн хурлыг ихэнх телевиз (TV5, UBS гэх мэт) хав дарав.

Харин МҮОНТ юув дээ. Өөртөө зүүлттэй нэрээ бодоод ганц өгүүлбэрээр ч хамаагүй дурсах болов уу гэтэл тэгсэнгүй. УИХ-ын ээлжит бус чуулганы нээгдэхийн урьд үдэш МУУҮА-ийн ерөнхийлөгч До.Ганболдыг студидээ урьж, Оюутолгойн гэрээг иргэд дэмжиж байгааг нотолсон баахан яриа оруулсан (“Энэ гэрээ түргэн батлагдахыг хүсч байна уу? – гэх мэт асуулт тавихад цаадуул нь “хүсч байна” л гэж хариулахгүй хаачихав) мөртлөө тэр өдрийн иргэний хөдөлгөөнүүдийн хэвлэлийн хурлыг нуун дарагдуулав. Бас чуулган нээгдсэн өдрийн хоёр дахь хэвлэлийн хурлыг бас л олж харсангүй. Эдгээр хурлууд болсон “Монгол ньюс”-ийн мэдээллийн төв рүү очдоггүй юм болов уу гэтэл бусад хурлуудыг сурвалжилсан байх юм.

Хуулийн өөрчлөлтийн эцсийн хэлэлцүүлгийг Медведевийн айлчлалын өдөр хийсэн болохоор бүх анхаарал тийшээ. Жагсаал цуглаан байтугай хэвлэлийн хурлын талаар ярилтгүй. Шударга сайхан гэрээ батлагдтал орой болгон иргэний хөдөлгөөнийнхнийг цуглуулж байгаад бужигнуулна хэмээн тангараг тавьж байсан TV9 ганц удаа хэлэлцүүлэг зохион байгуулсан ч урьсан зочидтойгоо уралдаж чалчдаг бүдүүлэг хөтлөгч, бас Медведев хоёрын “ачаар” үзсэн хүн байгаагүй биз.

Мөнгөтэй Компани, мэдэлтэй Засгийн газар хоёр нийлэхээрээ Монголд хүссэнээ хийж чадахнээ.

Маргааш өөр юуг хүсэх бол?

Posted in Монголын Үндэсний Олон Нийтийн Телевиз, TV9 телевиз | Leave a Comment »

68 хувийг тэг болтол “зодож байна”

Posted by Бид on 2009/08/20

Одоо үйлчилж байгаа хууль тогтоомжийн дагуу, элдэв хөнгөлөлт чөлөөлөлт үгүйгээр  Оюутолгойн гэрээг байгуулаад ир гэсэн тов тодорхой үүрэг өгсөн УИХ-ын 57-р тогтоолын хариуд Засгийн газрын ажлын хэсэг “Ёстой гоё гэрээ байгуулах боллоо, харин хэдэн хуулийг өөрчлүүлье” гэсэн хариу даалгаврыг өргөн барихад Д.Дэмбэрэл дарга “жа” хэмээн хүлээж авсан тэр мөчөөс хойш монголын хэвлэл мэдээллээр гэрээний заалтуудыг магтах, ялангуяа 68 хувийн татварыг муулах сурталчилгааны кампани өрнөж байна. Ерөнхийлөгчийн суудлаас ховхормогцоо сая шударга үнэнийг нэхэж эхэлсэн Н.Энхбаярын TV9 телевиз (бас мэдээж “Зууны мэдээ”) гэрээний төслийг эсэргүүцэгчдийг яриулснаас биш , хэвлэл мэдээлэл, сэтгүүлч, тоймчид бараг бүгдээрээ Засгийн газрын талд орж УИХ-ын чихийг зөөлрүүлэх гэсэн мэт балбаж эхэллээ “Өнөөдөр” сонин УИХ-ын гишүүдийг “Нусаа тат” гэж загнасан бол UBS телевиз “… 68 хувийн татварыг авах гэж байгаа нь УИХ-ын гишүүдийн хувь хүртэх гэсэн сонирхолтой холбоотойг олон хүн мэдэж байгаа”-г илчлэв. (Харин “мэдэж байгаа” хүмүүсээ UBS мэдэж байгаа эсэх нь тодорхойгүй).  Бас Оюутолгойн гэрээ ба хуулийн өөрчлөлтүүдийг хэлэлцэх УИХ ээлжит бус чуулганд “Амжилт хүсье!”, эрхэм гишүүдийг “Зөв шийдвэр гаргаж чадна гэдэгт итгэж байна” гэх мэт боловсон  анхааруулга ч цувлаа… 

Ийнхүү Засгийн газар, “Айвенхо майнз”, түүний мөнгөнд согтсон хэвлэл мэдээлэл гурав 68 хувийн татварыг шууд газарт унаган тэг болтол зодож байхыг хараад манай яруу алдарт олон нийтийн телевиз яаж зүгээр өнгөрөхөв. Бишээ, өмөөрөөгүй… 

Эхлээд “Айвенхоу майнз”-ийн түнш – “Рио Тинто” компанийн сурталчилгааны нэвтрүүлгийг МҮОНТ оргил цагаараа сэмхэн шургуулав. Америкт суралцахдаа Оюутолгойн гэрээний гэнэтийн ашгийн 68 хувийн татвар бурууг мэдчихээд ирсэн МУИС-ын багш Баянмөнх “… энэ татварыг хөрөнгө оруулагч тал зөвшөөрөхгүй… яавал тэдэнд ашигтай байлгахав?” гэх мэтээр хичээл заалаа. Бас геологийн ухааны нэгэн доктор ярив. (Яг энэ хоёр ярианы хэсгээс тэр оройн “Цагийн хүрд” үзүүлсэн юм. Мэдээллийн хөтөлбөр хүртэл захиалгатай байжээ). Төгсгөлд нь “Улаанбаатар хот. 2009 он.

Тэгвэл чуулган нээгдсэн оройн оргил цагаараа Оюутолгойн гэрээнээс 68 хувийг татварыг авч хаяхыг ухуулсан дараачийн нэвтрүүлэг хулгайгаар орж ирлээ. (Бас л хөтөлбөрт байгаагүй гэсэн үг). Нөгөө хичээл зонхилж, түүнийг Засгийн газрын төслийг өргөн барих үед Сангийн сайд С.Баярцогтын хэлсэн үг, УИХ-ын дарга Д.Дэмбэрэлийн “жа”-гаар чимсэн байлаа. Төгсгөлд нь бас л “2009 он” гэжээ.

“Захиалгат нэвтрүүлэг” гэсэн тайлбар тавихаа ч больж. Олон нийтийн телевиз цайрчээ. 

P.S: Энэхүү захиалгат нэвтрүүлгийг нөгөө TV9 телевиз маань 20-ны оройн оргил цагаараа гэнэтхэн үзүүлэв. Мөнгө, мөнгө, мөнгө … Бүр ахиухан мөнгө төлбөл иргэний хөдөлгөөнийхнийг яриулахаа ч болих биз.

Posted in "Өдрийн сонин", Монголын Үндэсний Олон Нийтийн Телевиз, TV9 телевиз, UBS телевиз | 9 Comments »

“Сүлдхэн”

Posted by Бид on 2009/08/20

8-р сарын 19-ны орой Монгол улсын Ерөнхийлөгчийн үйл ажиллагааг долоо хоногоор тоймолдог “Сүлд” хөтөлбөрийг МҮОНТ-ээр үзлээ гэсэн чинь эхний хэсэг үнэхээр тийм байсан ч дараачийн хэсэг нь Ерөнхийлөгчийн тамгын газрын дарга Д.Дорлигжавын ОХУ-д хийсэн айлчлалд зориулагджээ. Хөтлөгчийн ярьснаар, олон чухал гэрээ, хэлэлцээрийг байгуулаагүй ч байгуулах эхлэлийг тавьсан юм байх. Араас нь дарга өөрөө хэдэнтээ гарч ямар ажил амжуулсан, юу мэдэж авснаа тайлбарлаж өгөв.

Энэ янзаараа бол МУ-ын Ерөнхийлөгчийн тамгын газрын дарга Дорлигжавын долоо хоногийн нөр их ажлыг танилцуулдаг “Сүлдхэн” хөтөлбөр шаардлагатай болж мэднэ.

Posted in Монголын Үндэсний Олон Нийтийн Телевиз | 1 Comment »

Дагасан уу, дагуулсан уу?

Posted by Бид on 2009/08/18

Нэгэн чухал эрхмийг “хөдөө орон нутагт ажиллаж байна” (яг тэгэж хэлэв) гэсэн дэлгэрэнгүй сурвалжлагыг 2009.08.17-нд МҮОНТ-ийн “Цагийн хүрд” мэдээллийн хөтөлбөрөөр үзүүлэв. Тэр нь хэн бэ? Монгол Улсын Ерөнхийлөгч, Ерөнхий сайд, УИХ-ын дарга гурвын аль нь ч биш, УИХ-ын жирийн гишүүн ч биш, яамны сайд ч биш, харин “Хаан” банкны гүйцэтгэх захирал Питер Морроу ажээ. Тэрбээр ХААН банкныхаа хөдөө орон нутаг дахь салбаруудын ажил төрөлтэй танилцаж Төв, Сэлэнгэ, Дархан-Уул аймгийн төв болон сумдаар явахдаа МҮОНТ-ийн сурвалжлах багийг хөлслөн дагуулахад цаадуул нь Монгол улсын төрийн “өндөрлөг”-үүдийн түвшинд тун дөхүүлэн өргөмжилж өглөө.

Posted in Монголын Үндэсний Олон Нийтийн Телевиз | Leave a Comment »

Д.Дорлигжавын албан ёсны том айлчлал эхэллээ

Posted by Бид on 2009/08/14

Өчигдөр орой МҮОНТ-ийн “Цагийн хүрд” мэдээллийн хөтөлбөрөөр Монгол улсын Ерөнхийлөгчийн тамгын газрын дарга Д.Дорлигжав ОХУ-ын Ерөнхийлөгчийн тамгын газрын дарга Сурковын урилгаар хоёр өдрийн албан ёсны айлчлал хийхээр мордлоо гэсэн албан мэдээг Монгол орон даяар шуурхайлан цацлаа.

Ээ, бурхан гончигсумлаа минь, ямар том айлчлал вэ!

Араас Дорлигжав дарга өөрөө гарч ирээд, айлчлалын учрыг ойлгохгүй байсан над мэтийн монголчуудад ОХУ-ын Ерөнхийлөгч Медведевын Монголд хийх өөр нэг чухал айлчлалын бэлтгэлийг Гадаад харилцааны яам зохицуулж байгаа ч өөрийн биеэр очиж зарим нарийн ширийн зүйлийг тохирохоос өөр аргагүй тухай тайлбар хийлээ. Маш хэцүү ажилтай явах тул юмыг яаж мэдэхэв гээд “баяртай” гэж хэлсэн хэрэг.

Өнөөдрөөс “Дорлигжав Москвад хүрэлцэн ирлээ. Нисэх онгоцны буудал дээр …. гэсэн мэдээнүүд цувах юм болов уу? Нэгэнт ингэж хүчтэй эхэлсэн юм чинь буцаж ирээд “Чингэс хаан” олон улсын нисэх онгоцны буудал дээр сэтгүүлчдийг цуглуулж ч магадгүй.

Posted in Монголын Үндэсний Олон Нийтийн Телевиз, Улс төр, эдийн засаг | 1 Comment »

Түүхий хөтлөгчөө болгоосой

Posted by Бид on 2009/07/27

Өнөөдөр 18 цагийн мэдээний төгсгөлд МҮОНТ-ийн хөтлөгч Ичинхорлоо “… Өнөөдөр болсон илүү дэлгэрэнгүй мэдээллийг 20 цагаас хүлээн авч үзээрэй” гэлээ.

Явсаар олон нийтийн телевизээр мэдээ зүгээр нэг болоод зогсохгүй бүр дэлгэрэнгүй болдог болжээ. Энэ хөтлөгчийн “ачаар” мэдээ, мэдээлэл Монголд төдийгүй дэлхийд болдог болоод удаж байна. Сүүлийн өдрүүдэд тэрбээр”Монголын мэдээ”агентлаг энэ өдөр манай эх оронд болон дэлхий дахинд болсон мэдээ, мэдээллээс хүргэлээ”, “Дараа нь дэлхий дахинаа болж байгаа мэдээ, мэдээллээс тоймлон хүргэнэ”, “Эх оронд болон дэлхий дахинд болж байгаа мэдээ, мэдээллээс танилцууллаа” гэж ярьсаар байна.

Үндэсний хэл соёлоо цэвэр ариун авч явах үүрэгтэй МҮОНТ хэлж байгаа үг өгүүлбэрийнхээ утгыг одоо хэр ойлгоогүй яваа түүхий хөтлөгчөө л болгомоор юм даа…

Posted in Монголын Үндэсний Олон Нийтийн Телевиз | 16 Comments »

Олон нийтийн телевизийн гамшгийн өдөр

Posted by Бид on 2009/07/18

Долдугаар сарын 16-17-ны шөнө Говь-Алтай аймагт хүчтэй үер бууж 18 хүн амь насаа алдсан бол 17-ны 15-16 цагийн үед Улаанбаатарт хотод бууж лав 5 хүн үрэгдлээ. Олон айлын гэр орон, барилга байгууламж урсч сүйджээ.

Гамшиг тохиолдоод байхад (иймээс Ерөнхийлөгч Эрдэнэтээс, Ерөнхий сайд Японоос эмгэнэл илэрхийлсэн) манай телевизүүд ердийн нэг хурал семинарын хэмжээнд анзаарчээ. Ихэндээ бороо орж байгаа дүрс бүхий мэдээ уншаад Онцгой байдлынхан болон хотын удирдлагууд хуралдаж суугааг баахан үзүүлэв. Говь-Алтайг орхъё гэхэд нийслэлд үер буусан тухай дүрстэй мэдээнүүдээр хязгаарлав. Аль ч телевиз гамшгийн дараах үйл явдлын шууд сурвалжлага хийсэнгүй. (Зөвхөн баяр ёслолыг шууд дамжуулдаг гэж хэн хэлсэн бэ?)  Тэгээд бүгдээрээ юу ч болоогүй мэт оройн хөтөлбөрөө үргэлжлүүлсээр.  Ийгл, бас  TV9 арай илүү байж нурсан хананд даруулсан машин, усанд автсан хонгил зэрэг сурвалжилсан ч тайчигчийн тухай америкийн уран сайхны киног үзүүлж оройг барлаа.

Ганц найдвар – МҮОНТ ямар байсан бэ? 

Үер хэдэн цагийн өмнө буучихаад байхад 18 цагаас товчхон мэдээ, 20 цаг хүртэл уран сайхны киногоо үзүүллээ. Хэтэрхий эрт буусан үерийн “аз дутсан” бололтой.

20.00. “Цагийн хүрд” мэдээллийн хөтөлбөр

– Говь-Алтай аймаг хүчтэй аадар борооноос болж 18 хүн нас барсан тухай мэдээлээд аймгийн Засаг даргатай утсаар ярив. (Болж л байна).

– Улаанбаатарт хүчтэй бороо орсон тухай дурдаад араас нь Онцгой байдлын ажилтантай хийсэн ярилцлага үзүүлснээ ”18 цагт дахиад мэдээ авах гэсэн боловч “дуудлага ихтэй гээд мэдээлэл өгсөнгүй” гэж гомдоллов. (Үйл явдал болсон газруудаар өөрсдөө явж сурвалжлахын оронд албан тушаалтны ам сахих юм даа. Сүүлдээ цаадуул нь залхсан биз)

– Улсын онцгой байдлын комиссын хуралдаан Төрийн ордонд болов гэсэн сурвалжлага. ОБЕГ-ын дарга Амгаланбаатар МҮОНТ-ийн хүссэн ярилцлагыг өгч “Иргэд үерийн усны замд буусан байсан, үүнийгээ онцгой анхаарах хэрэгтэй” гэж ухуулж гарлаа. (Хожимджээ) Тэгснээ хэл нь хальтирч “амь насаасаа хохироод байх нь тийм ч оновчтой зүйл биш” гэсэн хачин юм хэлэв. (Гамшиг тохиолдоод байхад Онцгой байдлын дарга өөрийн биеэр аварч сэргээх ажлыг удирдах, харин олон нийтийн сэтгүүлч цаг алдалгүй очиж сурвалжлахын оронд хоёулаа нийлээд Төрийн ордонд ингэж дэмийрч суух ч гэж дээ)

– Хоёрхон цаг орсон бороо нийслэлийн үерийн усны байгууламжийг шалгалаа. Орос ах нар 400000 хүнтэй хотын усны  байгууламжийг барьж өгсөн ч сая хүнтэй хотод байгууламж алга. (Өдөр болгон хоосон давтдаг сүржин яриа)

Цаашаагаа зөвхөн албан ёсны, дарга дагасан, хурал тойрсон сурвалжлагууд үргэлжиллээ. Дурдвал: С.Баярын Япон улсад хийж байгаа айлчлал… “С.Баярын айлчлалын талаар дэлхийн томоохон хэвлэлүүд ч мэдээлж байна. Японы NHK айлчлалын талаар ч мэдээлж байна” (бас нэг дэмийрэл) гэсэн эхлэлтэй тайлбар… УИХ-ын чуулганы хуралдаанаар нөхөн сонгуулийг товлож, Ерөнхийлөгч асан Н.Энхбаярын хангамжийг шийдвэрлэв… Атрын 3 дахь аяны хүрээнд ХХААХҮЯ-наас бага оврын тракторуудыг орон нутгийн удирдлагуудад гардуулав… Төмөр замын засвар, шинэчлэл эхэлж галт тэрэгний хуваарьт өөрчлөлт оров…. Өмнөговь аймгийн Шивээхүрэнгийн боомтын өргөтгөл ашиглалтанд оров… Мэргэжлийн хяналтын дэд даргын зөвлөлийн хуралдаанаар барилгын чанарын асуудлыг хэлэлцлээ…. УИХ-аас голын сав, ойн бүсэд ашигт малтмалын үйл ажиллагааг хориглох хуулийн талаар хэвлэлийн хурал… Голуудын хөдөлгөөний хэвлэлийн хурлын сурвалжлага… Сингапурын хөгжлийн тухай сурвалжлага… Сингапурын түүхийн тухай дахиад нэг сурвалжлага…. Дэлхийн мэдээ. Спортын мэдээ. Ойрын 5 хоногийн цаг агаарын мэдээ…

21.00. Соно студи: “Маамуу нааш ир”

21.15. “ММ- Тoday” English news

21.25. “Хэцүү ангийн өдрийн тэмдэглэл”

21.40. “Баярын мишээл” /давталт/

23.00. Үдшийн мэдээ

Өнөөдөр болсон дотоод үйл явдлыг  товч дурдаад гадаад мэдээнд шилжиж, хүнийг хумсаар нь таньж эмчилдэг хумс заслын клиник Хятадад нээгдсэн тухай мэдээг гадаадын телевизээс цаг алдалгүй авч орчуулан үзүүлэв.  

23.10. “Гэрэлтэй цонх” хөтөлбөр

… “Таван хором” булан. 1. “Америкийн шүтээн” шоуны хөтлөгч хамгийн их орлоготойгоор тодорсон, 2. Их Британийн дуучин од хүүхэдтэй болох гэж байгаа тухай баяртай мэдээ. 3. Муурууд дуугаараа эзэндээ янз бүрийн мессеж өгдөг гэсэн нийт гурван мэдээ … “Үдшийн шуудан”-гийн зочноор ЦЕГ-ын Санхүү, эдийн засгийн хэлтсийн дарга оролцлж Цагдаагийн баярыг хэрхэн тэмдэглэх тухай ярьж, бас өөрийн шүлгээс уншив… Америкийн цөлийн үзэсгэлэнт газруудыг харуулж тайлбарласан танин мэдэхүйн урт нэвтрүүлэг… Маргаашийн өрнийн зурхай…

МҮОНТ энэ өдөр олон хүний амь үрэгдсэн үерийн гамшиг тохиолдоогүй юм шиг цэнгэн хөгжилдсөөр 24 цаг гэхэд эфирээ хааж гүн нойрондоо дугжирч байлаа.

P.S:

Маргааш буюу 18-нд гамшгийн байдал, уршгийг сурвалжлахын оронд гамшгийн асуудлаар болсон хурлуудын дүрсийг үзүүлж албан мэдээ уншихаас хэтэрсэнгүй. 

P.P.S:

19-нд мөн адил. Ялгаа гэвэл МҮОНТ-ийн сэтгүүлчид нийслэлд болсон гамшгийн газарт очсон байна! Гэхдээ зөвхөн нийслэлийн Засаг дарга Г.Мөнхбаярыг дагаж.

Говь-Алтай руу сурвалжлагч илгээсэн бол эхний мэдээгээ ирүүлэх хугацаа өнгөрлөө…

Posted in Монголын Үндэсний Олон Нийтийн Телевиз | 12 Comments »

22 цагаас өмнө…

Posted by Бид on 2009/07/09

Бараг ижил зорилготой архи, [шар] айрагны компаниуд ба телевизийн эздийн лоббинд дуртайяа автсан УИХ-ын гишүүд Зар сурталчилгааны болон Архидан согтуурахтай тэмцэх хуулийг засварлаж өгснөөр 18-аас доош градустай согтууруулах ундаа, шар айргийг хэвлэл мэдээллээр сурталчлахыг зөвшөөрсөн билээ. Гэхдээ телевизээр бол 22-06 цаг, харин сонин хэвлэлээр долоо хоногт ганц удаа.

Эздэд энэ хамаагүй. Тэдэнд зөвхөн сиймхий хэрэгтэй. Урьд нь хуулийг зөрчиж дураараа сурталчилж ирсэн бол одоо “бараг” зөрчихгүйгээр хүссэн цагтаа, хүссэн градустай сурталчилгаа явуулах эрхээ олж авчээ. Хугацаа, градус хоёрыг хэтрүүлээ л биз…

Сонины хуудсууд архи, пивээр хэдийнэ нэвчсэн бол телевизийн дэлгэц дээр үзэгчдийн сайхан наадах эсэхэд санаа зовсон согтууруулах компаниуд ээлж дараалан байраа эзэллээ: Жем Интернэйшнл, UFC…. Морьтой Чингэс дээр юм байна. Маргааш ажилтай шүү дээ!!!… [Зүгээр] Чингэс … Хан тэнгэр шиг харчууддаа зориулав. Жалам хар… “Арвай” унаагүй байна шүү?…

Тэгээд ихэнхдээ 22 цагаас хамаагүй өмнө гарч байх юм. Нөгөө шинэхэн засагдсан хууль арвай шууд биш будаа болох нь тэр.

Манай арилжааны телевизүүд дүүрчээ. Тэгвэл олон нийтийн телевиз?

МҮОНТ-ийн 2009.07.06-ны хөтөлбөрт 18.25-18.55. “Дэлхийн бренд Монголд 2 жил” гэсэн нэвтрүүлэг зарласан нь “Тайгер” шар айрагны сурталчилгааны нэвтрүүлэг байлаа. Юм болгонд далдагнаж явдаг Ц.Ганхүү нэртэй “од” хөтөлж “Тайгер”-аар ивээн тэтгүүлсэн учраас үгүй гэх эрхгүй хэсэг хүмүүсийг шахаж баахан магтуулаад сүүлдээ яриандаа согтож “… Тайгер” үйлдвэр бол нийгмийн хамгийн хариуцлагатай компани … Тайгер Монголын хөгжилд их хувь нэмэр оруулж байна… Бидний зүгээс, үзэгчдийнхээ зүгээс “Тайгер” брэндийн хамт олон хамгийн сайн сайхныг хүсэн ерөөе!” гэж төгсгөсөн. Тэрбээр өөрөө Тайгер хавьд ажилладаг байх шүү. Бас нэг нөхөр: “Сая УИХ-дээр 18 градусаар бага согтууруулах ундаагаар урлаг спортыг дэмжих хэрэгтэй гэсэн маш зөв санаа гарсан” гэж магтсан.

МҮОНТ-ийн 2009.07.09-ны хөтөлбөр. 18.30-19.30 “Анхны мөнгөн медальт” гэсэн нэвтрүүлэг орсныг үзтэл, “Сэнгүр” шар айрагны ямар нэгэн ой, бас Австралийн үзэсгэлэнгээс мөнгөн медаль хүртсэн үйл явдалд зориулсан сурталчилгааны нэвтрүүлэг байлаа.

Арилжааны ба олон нийтийн телевизийн хооронд ялгаа алга.

Posted in + ТЕЛЕВИЗ, Монголын Үндэсний Олон Нийтийн Телевиз, Сурталчилгаа, далд сурталчилгаа, "пиар" | 2 Comments »

Мэдээ, мэдээлэл дахиад “болов”

Posted by Бид on 2009/06/25

МҮОНТ-ын хөтлөгч Ичинхорлоо мэдээгээ “болгосоор” байна. Өнөөдрийн “Цагийн хүрд” мэдээлллийн хөтөлбөрийн төгсгөл рүү дэлхийн зарим хотын цаг агаарын мэдээг зарласныхаа араас “Дараа нь дэлхий дахинд болж байгаа мэдээ мэдээллээс тоймлон хүргэнэ” гэх нь тэр.

Телевизийн том хөтлөгчид хүртэл хааяа алдаа хийж, буруу зөрүү ярьдаг биз. Гэхдээ олон сар, жилээр ингэж хадуурч суухад нь хэлээд өгөх тэр том байшинд ширхэг ч алга уу?

Posted in Монголын Үндэсний Олон Нийтийн Телевиз | 3 Comments »

Мэдээ, мэдээлэл “болдог” болжээ

Posted by Бид on 2009/06/23

Өчигдөр орой МҮОНТ-ийн “Цагийн хүрд” мэдээллийн хөтөлбөрийн дундуур хөтлөгч Ичинхорлоо:

– “Одоо та бүхэнд дэлхийн томоохон хотуудын цаг агаарыг мэдээлье. Дараа нь дэлхий дахинд болж байгаа мэдээ, мэдээллээс хүргэнэ” гэлээ. Урьд нь бас хэд хэдэн удаа тэгэж ярихыг анзаарч билээ.  

Манай арилжааны бүх телевиз мэдээ, мэдээллийг Монголд юмуу гадаадад “болгодог” болоод удаж байна, гэхдээ монгол хэлээ зөв авч явах үүрэг хүлээсэн, бүр хэл соёл, ёс заншил хариуцсан тусдаа редакци хүртэл байгуулж тансагладаг олон нийтийн телевиз тэднийг дууриаж хөглөхөө болимоор юм.  Тэр хөтлөгчид сайн хэлээд өгөөрэй. 

Нэгэнтээ Ц.Элбэгдорж Ерөнхийлөгч болоогүй байхдаа УИХ-ын чуулганы хуралдаан дээр хэлж С.Баярт амаа алгадуулсан “ядуурлын хямрал” шиг марзан үг хэллэг хаа сайгүй олшроод байна шүү.

Posted in Монголын Үндэсний Олон Нийтийн Телевиз | 11 Comments »

Хэдхэн хоног тэсэхгүй байна

Posted by Бид on 2009/06/16

Алимтай “Хараа” нэртэй ууж хэрэглэдэг бүтээгдэхүүний сурталчилгааг зөвшөөрсөн хоёрын хоёр хуулийн өөрчлөлт өнөө маргаашгүй батлагдахаар дуншиж байгаа ч манай хэвлэл мэдээлэл “тэснэ тэснэ гэхэд яаж тэсэхэв” болж байх шиг. Аль хэдийнэ сонинуудыг дүүргэсэн алимтай “Хараа” одоо зарим телевизийн дзлгэцэн дээр хундаглагдах болжээ. Тэгэхдээ хууль батлагдсан ч хориотой байх учиртай 22 цагаас хамаагүй өмнө!

Олон нийтийн телевиз ч гэсэн энэ найрнаас хоцорсонгүй. 16-ны оройн хөтөлбөртөө “Шинэ технологи, шилдэг бүтээгдэхүүн” гэдэг шинжлэх ухаанч нэртэй нэвтрүүлэг зоосон нь нь АПУ хувьцаат компанийн “Натур агро” хэмээх спиртийн үйлдвэрийн тухай сурталчилгаа байв. Тэр спирт нь хүний биед ямар ч хоргүй төдийгүй ашигтай гэсэн шүү! Улмаар АПУ-гийн зарим “бүтээгдэхүүн”-ийг магтсаар дуусгасан энэхүү эрүүл мэндийн нэвтрүүлгийг бүтээгчид нь нэрээ нуухаа мартаагүй юм.  Бас “Цагийн хүрд”-ээрээ АПУ-г сурталчилгааг сурвалжлагаар явуулж даруулахаа ч мартсангүй.

Posted in Монголын Үндэсний Олон Нийтийн Телевиз, Сурталчилгаа, далд сурталчилгаа, "пиар" | Leave a Comment »