АЖИГЛАГЧ

Монголд, Монголын хэвлэл мэдээлэлд юу болж байна?

Archive for the ‘Нийтлэл, нэвтрүүлэг’ Category

Мөнгө өгөхөөс нааш …

Posted by Бид on 2012/04/22

Эдийн засаг, бизнесийн сэдвийг барьж авсан сэтгүүлч, сонин хэвлэл, телевиз, радиогийн нэвтрүүлэг зөндөө. Гэхдээ бараг бүгдээрээ эдийн засгийн өсөлт, инфляц, татварын бодлого, өрсөлдөх чадвар, Таван толгой, ипотек, бодлогын хүү, дунд хугацааны хөтөлбөр, хөрөнгийн зах зээл, арга ядахад дэлхийн эдийн засгийн хямрал гээд дандаа том ярих тул зах зээлийн бодит үйл явдал, үзэгдлүүдийг тоож сонирхдог нь алга.

Гурав, дөрөвхөн жилийн өмнөөс электрон ба цахилгаан барааны зах зээлд “Некст электроникс” нэртэй тоглогч мэндэлж Улаанбаатарын энд тэнд, Дархан, Эрдэнэт, бас “төрөлх нутаг” (рекламын танилцуулгандаа бичсэнээр) Ховдод шар хаягтай дэлгүүрүүдээ байгуулсан юм. Тэгтэл нодингоос дэлгүүрүүдийн хагас нь Next Сenter нэртэй болж өөрчлөгдлөө. Хоёр найзын байгуулсан компани овоо хөл дээрээ босмогц муудалцаад салсан, гэхдээ урд зүгээс бараа оруулах сувгаа хоёулаа сайн мэдэх тул тус тусдаа үргэлжлүүлсэн мэт сэтгэгдэл төрж билээ. Тэгтэл энэ хавар дахин нэр, хаяг солигдож зарим дэлгүүрийн хаяг “Arina Electronics” болж өөрчлөгдөв.   Ариунаа биш Арина!  Яах аргагүй нэг юм болоод байна. Гэхдээ үүнийг сонин хэвлэлд сурвалжилж бичсэн, эсэхүл телевизээр үзүүлснийг санахгүй байна.

Хэрэв сэтгүүлчид энэ мэт зах зээлийн элдэв сонин, өөрчлөлт хандлагыг ухаж үздэгсэн бол сонин хэвлэл, телевиз, радиогийн эдийн засгийн булан, нэвтрүүлэг, бас энэ зүгийн сэтгүүлүүд өнөөдрийнх шиг уйтгартай байхгүйсэн. Хамгийн том BSB компани цахим дэлгүүр байгуулж лангуугаа Интернэтэд нээсэн нь өрсөлдөгч компаниудын бүтэл муутай өмнөх оролдлогуудаас юугаараа өөр, ер нь энэ зах зээлийг “Номин электроникс”, BSB, Global Electronics (Panasonic),”Оюуны ундраа” чухам ямар бараагаар хэд хичнээнээр хуваадаг гээд огт бичдэгггүй сэдэв, асуудал түм бум.

Ноднин ижилдүү дэлгэцтэй хэдэн зурагтаас сонгож ядсан эмэгтэй “хямдралтай юу, бэлгэнд нь юу ирэхэв” гэхчлэн баахан асууж асууж 10 хувь хямдруулсан тухай хов хоосон тоо, шал хэрэггүй залгуур малгуурханд хууртаад миний харсаар байтал тааруухныг нь авчихсан. Манай хэрэглэгчдийн сэтгэл зүй, тэдний эрэлт хэрэгцээ, цаашилбал жилийн 365 хоногийн турш үргэлжилдэг мөнхийн Sale, сая тэрбумын хонжворт сугалааны заль, цаанаас нь шоволзох маркетингийн арга ухаан, бас залилангууд зэрэг сэдвүүд хааяа нэг гардаг гомдол, заргыг эс тооцвол огт хөндөгдөөгүй. “Номин электроникс” бараагаа зарахдаа хүмүүсийн гэрт нь явж орох шахдаг хэрнээ баталгаат засварын газраа нийслэлийн тэртээ баруун захад цөлж эвдэрхий бараа таарсан азгүй худалдан авагчдаа дахин шийтгэдэг нь бас сэдэв.

Дээр эхлүүлсэн электрон барааны жишээг үргэлжлүүлье. Монгол нэр зүүсэн зурагт, ноутбүкүүд ар араасаа гарч ирлээ. Зургийн аппарат, камераас бусдыг бид “хийж” байна. Үндэсний үйлдвэрлэл! Хорь гаруй жилийн түүхийнхээ дунд хэсэгт “Номин электроникс”-т худалдагдаж амжсан “Монэл” брэндийн хэрнээ гаднаасаа MacAir шиг харагдах цалин цагаан ноутбукууд ямар үзүүлэлттэй, хэр сайн болохыг худалдагчид нь өөрсдөө сайн хэлж чадахгүй байна.  Уржнан MGM компани начин заан гээд бөхийн цолтой ширээний компьютер, ноднингоос соёмбо үсэгтэй ноутбүк гаргаж дээжээс нь УИХ-д бэлэглэсний нэг нь спикерийн ширээн дээр заларч амжсан. (Монгол Улсын Их хурлын танхимд телевизийн студи адил сурталчилгаа тавьсантай адил байсныг анзаарсан бололтой төдөлгүй болсон). Одоо “MCS электроникс”-ийн “Могул” ноутбүкүүд зах зээлийг эзэлж байх шиг. Гэхдээ рекламдсан шигээ зайгаа үнэхээр 5 цаг 30 минут барьдаг эсэхийг нотолсон, эсвэл няцаасан тестийг хаа нэгтэйгээс уншихсан. Энэ бүхэн эдийн засгийн бус технологийн сэтгүүл зүйн хариуцах ажил байх, гэтэл “Компьютер таймс” зэрэг төрөлжсөн сэтгүүлүүд хүртэл учир зүггүй магтахаас өөрөөр дуугарахгүй юм.

Хамаг шалтгаан энд байна. Манай хэвлэл мэдээлэл аливаа бизнес, компани, бараа, үйлчилгээг хамгийн түрүүнд реклам сурталчилгаа, бэлэн мөнгө гардаг АТМ шиг хардаг болжээ. Мөнгө өгвөл сурталчилна, өгөхгүй бол инфляц, хямрал, бодлогын хүү, дэлхийн эдийн засгийн хямрал мэтийн агуу сэдвүүдээ мөлжөөд суучихна.

“Мобиком” корпорацийн гүйцэтгэх захирал Д.Болор чимээгүйхэн ажлаа сэлгэж “Скайтел”-д яг тийм албан тушаалд очсоноор шууд өрсөлдөгч байсан “Юнител”, бас “Скайтел”-ийг зэрэг эзэмшдэг MCS-ийн хүн болжээ. Улс төрийнхөөр бол МАН-аас гараад АН-д элсэх, эсвэл эсрэгээр хийсэнтэй адил юм. 1,2 сая хэрэглэгчтэй “Мобиком”-ын эсрэг тун саяхан нэг сая хэрэглэгчтэй болсноо зарласан “Юнител”-ийн зарлаагүй дайн шийдвэрлэх шатандаа орж байх шиг. Хэрэглэгчиддээ байр орон сууцыг үе үе арав, таваар тарааж байхад хэдхэн нэгж, ярианы минутаар урамшуулж өрсөлддөг “Мобиком” удаан тэсэхгүй. Сэтгүүлчид шуугиулах, чаддаг нь эрэн сурвалжлах сэдэв энэ боловч зөвхөн захиалгат ярилцлагууд үзэгдээд өнгөрөв.

Сонин, телевизүүд компаниудтай хамтран ажиллах нууц гэрээний нууц заалтуудад дөрвөн мөчөө хүлүүлээд реклам сурталчилгааны захиалга, бас дуудлага ирэхийг тэсч ядан хүлээж гүйцэтгэсээр хамаг цаг, зай талбайгаа барж байна.

Posted in Нийтлэл, нэвтрүүлэг | 3 Comments »

Сэтгүүлчийн дутуу асуулт

Posted by Бид on 2012/03/29

Автотээврийн газрын орлогч дарга Н.Пунцаг ярьж байна. Аль сувгаар гэдгийг анзаарсангүй. Сурвалжлагч залуу эхлээд гудамжаар нааш цааш явж тансаг машинуудын дугаарыг түүж үзээд мөнгөтэй, эсвэл эрх мэдэлтэй хүмүүсийн унаанд зөвхөн тэгш, ижил тоонуудтай азын гэгдэх дугаар ногдож байгааг нотолчихоод, үүний цаана арын хаалга, том бизнес байна гэсэн сэжгээр асуулт тавьжээ. Уржнан автомашины дугаар олгох эрхийг Замын цагдаагийн газраас ЗТБХБ хэрүүл уруултайгаар мэдэлдээ авч Авто тээврийн газартаа өгөхөд шударга ажиллаж чадахаа гайхуулаад байсан. Одоо Пунцаг дарга “Хүмүүс ирээд хүссэн дугаараа авдаг. Ажил хийж байгаа хүн хардлагад өртөх л юм. Хүмүүс орж ирээд арын хаалгаар өгч байна гэсэн гомдол мэдүүлдэг. Гомдол гаргаад ир гэхлээр тийм юм байдаггүй” гэж хээвнэг хариулахад сэтгүүлч юу ч хэлж чадалгүй дуусгажээ. Сэтгүүлчид дандаа дутуудуулах юм. Азын дугаарууд зөвхөн нэг хэсэг хүмүүст очоод байгаагийн шалтгааныг тайлбарлахыг шаардах байжээ.

Posted in Нийтлэл, нэвтрүүлэг | Leave a Comment »

Гурван өдөр, хоёр шөнө

Posted by Бид on 2011/03/18

Хэзээ хойно зарим өдөр тутмын сонинууд  гэнэт сэрж “Ийгл”, ялангуяа “Шууд” телевизийг  Японы газар хөдлөлт, цунамийг дэвэргэлээ хэмээн буруутгаснаар тэднийг дахин рекламдаж орхив. Өдөр тутмын сониныхон, бас телевизийнхэн хүртэл дээрх хоёрыг үзэж суусан нь илт мэдэгдэж байна.

Шүүмжлэх юм мэдээж зөндөө. Бие биенээ давах гэсэн “Ийгл” ба “Шууд”-ын хөтлөгчдийн ам халж бараг л газар хөдлөхөөс өрсөж Японоос шууд дамжуулж эхэлсэн мэт ярьсан тал бий. Шууд нэвтрүүлгүүд Баасан гаригаас эхлэн нийт гурван өдөр, хоёр шөнө үргэлжилсэн, гэхдээ Бямба гаригийн шөнө Улаанбаатарт газардах МИАТ-ийн онгоцыг сахиж сурвалжилсны дараа өөрсдөө ч цуцаж, бас залхаж эхэлсэн юм.

Ням гаригт “Ийгл” телевиз бас л шууд, гэхдээ Японоос биш, Спортын төв ордноос сагсан бөмбөгийн “Спрайт ” лигийн тоглолтыг дамжуулж, бас христийг сурталчилах үүрэгтэйгээ ч санажээ. Японы тухай мэдээлэл тасраагүй, гэхдээ илт цөөрч, хөндлөнгийн тайлбарууд зонхилох болж жишээлэхэд, АЦС-ийн тухай мэргэжлийн тайлбарыг AP агентлагаас орчуулан үзүүлж, бас энэ сэдвээр академич Б.Чадраатай ярилцжээ.

Харин “Шууд” телевиз цааш чадлаараа тэссэн юм.  Хандив цуглуулахыг уриалах зэргээр юу эс хийв. Кабелийн жижигхэн телевиз мөртлөө  сурвалжлагчаа МИАТ-ын онгоцоор Япон руу нисгэж мэдээ сурвалжлага авчруулав. “Японд байгаа хүмүүстэйгээ ярьсан хүмүүс бидэнтэй холбогдож мэдээлэл өгөөч” гэхчлэн шууд ярилцлагаа унтраахгүйг ихэд хичээв. Мэдээж “Ийгл”-ийн эхэлсэн нөгөө “нэг аймгийн нутаг дэвсгэрийн” асуудал гол сэдэв байлаа. Гэхдээ л өмнөх мэдээ, сурвалжлага, түүний дотор үзэгчидтэй хийсэн ярилцлагуудаа байн байн давтах болж Ням гаригийн оргил цагаар гэнэт Японыг орхиж 21.25-аас ”Ирж яваа цаг” монголын уран сайхны кино үзүүлээд амарсан юм. “Шууд” телевизийн “Ийгл”-ээс илүү гэвэл www.shuud.mn сайттайгаа хоршиж тэндээс мэдээ, сэтгэгдэл зэргийг шууд авч, эфирт уншиж барахгүй текст, жагсаалтыг тэнд байршуулж байсан юм.

Тэр өдрүүдэд “Ийгл”, “Шууд” хоёр хэтрүүлсэн байх, гэхдээ хэн мэдлээ. Японд суугаа үр хүүхдээ нэхсэн аав ээж нар утасдаад, МИАТ-ийн онгоц хоосон буцаж ирээд, атомын цахилгаан станц дэлбэрэхээр завдаад, Чернобыль бодогдоод …

Бидний үздэг 20 шахам монгол сувгаас зөвхөн кабелиар явдаг жижиг хоёр телевизийг гоочлоод яахав. Хэнээс ч захиалга аваагүй, мөнгө төгрөг нэхэхгүйгээр алдаж оноод ажлаа хийсэн байна. Тэр хэдэн өдөр чадаагүй “том”-чууд өөрсдийгөө хичээнэ биз ээ.

“Ийгл”, “Шууд” хоёр үнэхээр “айлгаж” чадсан шүү!  Тэдний эхэлсэн яриаг бусад телевизүүд өлгөж авсан, шууд утас ажиллуулж дууриасан, бас хөгжөөсөн. NBS-ын сурвалжлагч гудамжинд гарч “Японд нэг аймгаа түрээсэлбэл аль аймаг дээр вэ?” гэсэн асуулт тавихад зарим нь бүр итгэчихсэн “би эрх мэдэлтэй хүн биш … ярьж байгаад шийдэх биз”  хэмээн хариуцлагаас мултарч харагдсан.

Posted in Ийгл телевиз, Нийтлэл, нэвтрүүлэг, Шууд ТВ | Leave a Comment »

Тариаланч захирлууд

Posted by Бид on 2010/10/07

Дээрхэн үед сонинд ажиллаж байхдаа хааяа Сэлэнгэ, Булганаар  явж тоос, тосонд дарагдсан тракторч, комбайнчдыг сурвалжлаад тэднийг тариаланчид гэж нэрлэдэгсэн.  Ургац хураалтын үеэр Сангийн аж ахуйн дарга,  намын үүрийн дарга нар тариан талбай дээр хонож өнжөөд ч энэ алдрыг хүртэхгүй…  

Саяхан “Ургацын далай”-гаар ” Тариа ногоо хураах ажлаас эрчүүд зугатаж байхад энэ тариаланч эмэгтэй нойр хоолгүй зүтгэж байна” гэлээ. Бахархан хартал  “… компанийн захирал” гуншинтай эмэгтэй дэлгэц дүүргэв. Ноднин улсын аварга тариаланч цол хүртсэн нэгэн эрхмийн тухай хөрөг нэвтрүүлгийн баатар жипнээсээ буухгүй, сэтгүүлчийг ч буулгахгүйгээр амьдралынхаа түүхэн замналаа хүүрнэсэн томоос том компанийн захирал байж билээ.

Цаг үе өөр  болжээ.  Аргагүй дээ, Монголын тариаланчдын холбооны дарга нь Монголын хөрөнгийн биржийн захирал Ц.Содхүү байхад. Сэлэнгэ аймагт үй олон тариаланчдын эзэн юм гэсэн. Цаашилбал, Монголын барилгачдын холбоо гэж барилгын компаниудын захирлуудын холбоо байна…

Сэтгүүлчдийн холбоог энэ удаад орхиё.

Posted in Нийтлэл, нэвтрүүлэг | 1 Comment »

“Танайд хонохгүй”

Posted by Бид on 2010/10/07



Өнгөрсөн Ням гаригийн үдэш надад тааралдсангүй юу, эсвэл гарсангүй юу, “25-р суваг” телевизийн “Танайд хоноё” нэвтрүүлгийг олж үзсэнгүй. (Бодвол хөтлөгч Ганзориг холхон хонохоор уригдаад явсан биз). Харин TV9 телевизээр “Хамтдаа зочилъё” гэдэг нэвтрүүлэг төгсөж байхыг харлаа.

Алтантүрүүгээс хойш, Ганзоригоос өмнө “Танайд хонож” байсан Тэнгис гавъяат тамирчин Үйтүмэнгийн хамт нэгэн бакь эрийнд зочилжээ. Найзууд гэнэ. Мэдээж хүүе, хаая, пөөх, еэ, яая … болцгоож сайхан хоол хийлгэж идсэн ч хонохгүйгээр явцгаалаа.  Унтаад яв ч гэсэнгүй. Нээрээ хоёулаа (зураглаачтай нийлээд гурвуулаа) айлд хоновол арай дэндэнэ ээ.

Яах аргагүй “Танайд хоноё” нэвтрүүлгийн хувилбар байлаа.  Гэхдээ айлын авгай ор засч унтуулахгүй,  нойрсохоосоо өмнө ваннын өрөөнд орж ганцаараа ярихгүй, өглөө гэрийн эздээс заавал сүүлд босохгүй… болохоор тиймхэн санагдав. Дэлгэцийн доогуур www.ocean-entertainment.mn гэж бичсэн нь “25-р суваг”-аасаа яагаад ч юм гарсан хөтлөгч Тэнгисийн тусгаар тогтнолын нэр биз.  

Айлд очдог мөртлөө хонодогүй “Ажлын дараа” нэртэй өөр нэвтрүүлгийг TV5-ын сэтгүүлч Амарбаяр хэдэн жилийн турш хөтөлж байгаа. Эхлээд ажил дээр нь очиж ажлын өрөөг нь, дараа нь салахгүй дагаж (цаадах нь нэрэлхээд хазайхгүй шууд харьдаг, тойрсон ч фитнесс, намын байр гээд боловсон газруудаар орно) гэр орныг сурвалжлаад гарах зуураа хамаг юмыг асууж амждаг болохоор хэн хэндээ амар.

Posted in + ТЕЛЕВИЗ, Нийтлэл, нэвтрүүлэг | 1 Comment »

Мэдээлэл-сурталчилгааны хөтөлбөрүүд

Posted by Бид on 2010/09/08

Телевиз болгон мэдээллийн хөтөлбөртэй: МҮОНТ-ийн “Цагийн хүрд”,  “25-р суваг” телевизийн “25 цаг”, UBS телевизийн City news, “Ийгл” телевизийн “Ийглийн мэдээ”, TV5 телевизийн “Цаг”,  TV9 телевизийн “Энэ өдөр”, C1 телевизийн мэдээллийн хөтөлбөр, “Фокус”, НТВ телевизийн “Үндэсний мэдээ”, SBN телевизийн SBN News, TV8 телевизийн “Толь”, TM телевизийн “Таны мэдээ”, BTV-ийн “Б цэг” мэдээллийн хөтөлбөр гэх мэт.

Харамсалтай нь эдгээр хөтөлбөрөөр үзүүлдэг мэдээ ба сурталчилгааны хооронд тов тодорхой зааг ялгаа байдаггүй хэвээрээ (урьд нь ч байгаагүй) төдийгүй “бизнес мэдээ” гэдэг төлбөртэй мэдээ, сурвалжлагууд холилдсон,  дээрээс нь “Цагийн хүрд” төр засгийн, “25 цаг” УИХ-ын гишүүн З.Алтайн, City news нийслэлийн дарга, албан тушаалтнуудын, “Ийгл” телевиз  христийн шашны (яг мэдээгээр биш, харин завсраар нь)… гэх мэтээр сурталчилгаа явуулдгийг нэмбэл тэд мэдээлэл-сурталчилгааны хөтөлбөрүүд юм.

Posted in + ТЕЛЕВИЗ, Нийтлэл, нэвтрүүлэг | 2 Comments »

Сайд ахын “ажлын” өдөр

Posted by Бид on 2010/09/08

Монголд Баасан ахын төрсөн өдөр гэж долоо хоног тутмын үндэсний хэмжээний том найр бий. Заримдаа Баасан эгчийн 111-ээс  суллагдсан өдөр ч гэдэг.  Харин хагас болоод бүтэн сайны хоёр өдөр бүх нийтээрээ нам…

Үгүй ээ, тийм биш болжээ. Өнгөрсөн амралтын өдрүүдээр Ерөнхий сайд С.Батболд Сэлэнгэ, Булган, Орхон аймгуудаар тойрч ургац хураалтын явцтай танилцаж бас иргэдтэй уулзалт хийгээд иржээ. Мэдээж телевиз, сонины сурвалжлагч охид хөвгүүдийн урт цувааг дагуулсан. Бас Эрдэс баялаг, эрчим хүчний сайд Д.Зоригт  бусад албан тушаалтнуудын хамт Тэрэлжид байдаг яамныхаа амралтанд  сэтгүүлчдийг бөөндөж цэвэр агаарт хавтгай уулзалдсан байна. Араас нь Гадаад харилцааны сайд Г.Занданшатар мөн зангиагаа тайлж хаяад өөр хэсэг сэтгүүлчдийг урьж ухуулж сэнхрүүлээд авчээ.  Бас  болоогүй, нийслэлийн дарга нар Улаанбаатарыг бужигнуулсан зам засварын явцтай энэ амралтын өдрөөр танилцаж, ингэхдээ бүр олон сэтгүүлчийг “камертай нь” дуудсан байлаа. (Зөвхөн амралтын өдөр явж шалгадаг болохоор цаадуул нь ажлын өдрүүдэд “амарч”, ингээд зам засвар сунжирдаг байж магадгүй).  

Яг энэ өдрүүдэд УИХ-ын дарга Д.Дэмбэрэл бас хэдийг дагуулан Дорнод аймагт ажилласан ч манай сэтгүүлчид бүгдэд нь хүрэлцлээ. Энэ удаад Ерөнхийлөгч чимээгүй байсан ч хэрвээ ямар нэг юм сэдсэн бол дахиад зөндөө сэтгүүлч олдох байсанд эргэлзэх явдалгүй.

Манай телевизүүдийн мэдээллийн хөтөлбөрийн 90 хувь нь төрийн ажил алба (дээрээс нь уулзалт, хурал семинар) бөгөөд зөвхөн дарга дагаж сурвалжлаад сурчихжээ. Ингэж сургасан Ерөнхий болоод бусад сайдууд зориудаар хагас, бүтэн сайнд сэтгүүлчдийг цуглуулж, үүний ачаар гэртээ тарвалзаж суугаа бид төрийн томчууд маань та бидний төлөө хэрхэн амрах ч завгүй “ажиллаж” явааг бахдаж ханах ёсгүй бололтой.

Жинхэнэ ажлын өдрүүдийн тухай ярилтгүй. Тэд телевизээр тэртээ тэргүй пиг…

Posted in Нийтлэл, нэвтрүүлэг | 1 Comment »

Одоо шоудах л үлджээ

Posted by Бид on 2010/08/14

Нийслэлийн Засаг дарга Г.Мөнхбаяр захирамж гаргаж Туул голоо авран хамгаалах үйлсэд олон нийтийн оролцоог нэмэгдүүлэх зорилгоор голын сав дагуух бохирдлыг цэвэрлэх, гэмт хэргээс урьдчилан сэргийлэх үүднээс “Хатан туул ба цаг хугацаа” нэртэй хоёр сарын аянг зохион байгуулахаар болж уг аянд Нийслэлийн ЗДТГ, Нийслэлийн Онцгой байдлын газар, Нийслэлийн Цагдаагийн газар, Нийслэлийн Мэргэжлийн хяналтын газар, Нийслэлийн Байгаль хамгаалах газар болон “Ногоон суваг байгаль” ТББ-ууд хамтран оролцох болсон тухай зарласан билээ. Болж дээ. Юу ч хамаагүй хийх хэрэгтэй.

Гэтэл нийслэлийн хамгийн том ба ашигтай байрлалтай сурталчилгааны самбарууд дээр “Ногоон суваг” ТББ, МАХН хоёр санаачлагч болж тэдний зөв мэргэн удирдлагын дор Нийслэлийн Засаг даргын тамгын газар, бас хаанаас ч юм гараад ирсэн “Монгол шуудан” ХК, “Эко констракшн” ХХК хоёртой хамт зөвхөн “дэмжсэн” болон хувирчээ. Хөөрхий нийслэлийн онцгой байдал, цагдаа, мэргэжлийн хяналтынхан аахилдгаараа аахилж харин дээд хоёр таахалзах юм байна.

“Ногоон суваг” ТББ уг нь телевизийн нэвтрүүлэг. Хэвлэл мэдээлллийн үүрэг үнэнийг хэлэх, илчлэх атал шоуны оройд заларчээ.

МАХН бол Туул гол амь тэмцсэн сүүлийн 20 жилийн турш төрийн байтугай Улаанбаатарын эрхийг тасралтгүй барьж Туултай холбоотой бүх шийдвэрийг гаргаж хэрэгжүүлсэн буюу хэрэгжүүлж чадаагүй нам. Шоудах л дутаж гэнэ.

Нийслэлийн Засаг даргын тамгын газрын тухайд. Туулын хоёр эрэг эмх замбараагүй барилгаар дүүрч, хайрга олборлон сэндчиж, хог асгаж, угаадас цутган бохирдуулсан явдал бүгд нийслэл хотын шийдсэн буюу шийдэж чадаагүй асуудлууд. Голын эргийг тохижуулж нийслэлийн иргэд зуны халуунд амарч хэвтэх “пляж” байгуулсан бол ч …  

Төрийн өмчит “Монгол шуудан” ХК энд юугаа хийнэ вэ?

Өөрийгөө үндэсний бүтээн байгуулагчаар өргөмжилсөн “Эко констракшн” бас наалдаад авч. Орон сууц захиалагчдаа зогсоо зайгүй хулхидахаа биш юмаа гэхэд Туулын эргээс хайрга зөөж хогоо асгахаа боливол илүү тустайсан.

Бүгдээрээ Туулын төлөө дуугардаг, гэтэл Туул мөхөөд байдаг. Яагаад гэвэл нам, төр, телевиз, компанийн аль ч нь хийх ёстой ажлаа хийдэггүй.  Өнөөдөр хоцорсон ч гэсэн алдаагаа засахыг оролдох, хүлээсэн үүргээ биелүүлж эхлэхийн оронд нийлээд шоудах боллоо. Энэ янзаараа бол тэд Хатан туулыг сүүлчийн замд нь үдэх оршуулгын команд байж мэдэх нь.

Posted in Нийтлэл, нэвтрүүлэг | Leave a Comment »

Талибуудын хөдөлмөр ба мэдээллийн мэдээлэл

Posted by Бид on 2009/11/04

Хэд хоногийн өмнө Биеийн тамир, спортын төрийн бодлогын асуудлыг УИХ-ын чуулганаар хэлэлцэх үеэр Н.Энхболд гишүүн тогтоолын төсөл алдаатай, тодруулбал, “хэлэлцэх эсэх нь зүйтэй гэж тогтов” гэсэн өгүүлбэр ойлгомжгүй байна гэхэд уг төслийг бэлтгэж оруулсан нийгмийн бодлогын байнгын хорооны дарга Д.Оюунхорол “монголчууд буруу яриад зөв ойлголцдог тэр жишгээр ойлгочихвол зүгээр юм шиг байна” хэмээн тас ширвэв.

Саяхны нэг өдөр телевизийн суваг хэдэн сувгийг хэсэгхэн зуур солиход тааралдсан элдэв ярианы алдаануудын зах зухаас сонирхоно уу.

Сэлэнгэ аймгаас ирсэн нэгэн Засаг дарга: Улаанбаатар хотын агаар маш их бохирдож байгаа гэж маш их ярьж байгаа. Бид үүнд бага ч гэсэн хувь нэмэр оруулахаар зорилгоор энд мод авчирч тарьж байна…

“Ийгл” телевизийн World news: Афганистаны … мужид НАТО-гийн 3 мянган цэрэг байгаа бол талибаны 12 мянган дайчин ажиллаж байгаа юм… [Талибууд мөн ч хөдөлмөрч улс шүү!!!]

Эрүүл мэндийн дэд сайд Цолмон УИХ-ын хуралдаан дээр: … тайван бус байх юм бол халдварын тархалт 2-3 дахин нэмэгдэнэ гэсэн олон улсын судалгаа бий.

[Сувгийг харж амжсангүй]: … АНУ сүүлийн 70 жилд учирч байгаагүй эдийн засгийг давж гарлаа гэж мэдээлэв.

Монгол Улсын шадар сайд М.Энхболд: …. томуугийн халдвартай … хүн тогтоогдсон байна. Иймд бид энэ үйл явцыг бид эрчимжүүлэхээр ажиллаж байна…

“Инфо ТВ” сэтгүүлийн сурталчилгааны клип: …. Өөр ямар ч мэдээ, мэдээллээс сонсоогүй мэдээллийг хүлээн аваарай ..

“25-р суваг” телевизийн “Арай ч дээ” нэвтрүүлгээр УБЕГ-ын хэлтсийн дарга:… Сонгуулийг ямар хэлбэрээр явуулах эсэхийг…

Мөн нэвтрүүлгийн хөтлөгч Ариунаа: … 4-р цахилгаан станц өөрийн хүртэл хөлдөх аюул тулгараад … Энэ сонины хариу тайлбарыг өгөх хүн Төрийн өмчийн хорооноос олдсонгүй…

Мэдээж миний дуртай “болсон мэдээлэл” монголын телевизийн бүх сувгийг эзэлсэн төдийгүй олон улсын тавцанд гарч “дэлхийн зах зээл дээр болсон мэдээ, мэдээлэл”-д хүрснийг мэдлээ.

Аливаа улс үндэстэн, ямар ч уран илтгэгч яриандаа алдаж будилдаг ч дараачийн мөчид залруулаад явдаг. Харин бид юу ч болоогүй мэт үргэлжлүүлдэг. Алдсанаа ч анзаардаггүй. “Хүн яаж сэтгэнэ, тэгэж ярьдаг” гэсэн мэргэн үг бий. Ингэж эмх замбараагүй сэтгэдэг хүмүүс ажил амьдралаа эмх цэгцтэй зохион байгуулж, дэс дараа, цаг хугацаа, процедурыг дагаж чадах уу? УИХ нь хүртэл буруу бичээд, дээрээс нь Нямдоржтонгууд хулгайгаар засаад, араас нь “зөв ойлго” гэж загнаад (УИХ-ын гишүүнийг шүү! Жирийн иргэнийг бол баллахнээ!!!) байхлаар Монгол Улсад хууль журам тогтох уу?

Posted in Нийтлэл, нэвтрүүлэг | 3 Comments »

Нэвтрүүлэг ба цаг хугацаа

Posted by Бид on 2009/09/07

Бүр 1950-иад оны сүүлчээс монголын радиод ажиллаж эхэлсэн ахмад сэтгүүлч Д.Амбасэлмаа: “Миний бичсэн чанартай чанаргүй нь хамаагүй, мэдээлэл хийж байсан бодит түүх юм” гэж хэлснийг уншаад цаг хугацааны үнэ цэнийг дахин нэг ухаарлаа. 1959 оны ямар ч нэвтрүүлгийн бичлэг 2009 оны хамгийн сайн нэвтрүүлгийнхээс илүү үнэ цэнэтэй болсон байх шүү.

Posted in Нийтлэл, нэвтрүүлэг | Leave a Comment »

УИХ-ын бас нэг гишүүн телевизтэй болов

Posted by Бид on 2009/08/05

Долдугаар сарын сүүлчээс дахиад нэг телевиз агаарын долгионоор (бас кабелиар) нэвтрүүлгээ цацаж эхлээд байна.

Нэр нь BTV.

Ноднингоос хойш Кёкүшю цамхагийн оройд шинэ телевиз дуншаад байна гэсэн нь ийнхүү мэндлэв. Б үсгийн тухайд гэвэл УИХ-ын гишүүн Кёкүшюзан Д. Батбаярын, бас “эдийн засаг бизнесийн чиглэлээр дагнан нийтлэл, нэвтрүүлгээ хүргэх анхны телевиз” гэж зарласан тул Бизнесийн гэсэн утгыг агуулжээ.

Шууд нээгдсэн www.btv.mn сайт дахь танилцуулгад хөрөнгө мөнгө, байшин саваа хүртэл гаргасан Д.Батбаярыгаа огт дурсаагүй байх юм. Түүний мөнгөөр л “Сони” корпорацид “2008 онд үйлдвэрлэсэн хамгийн өндөр үзүүлэлт бүхий мэргэжлийн техник хэрэгсэл, үйл явдлыг шууд дамжуулах DBS станцтай” болсон байж таарна.

Танилцуулга нь “олон нийтэч байр сууринаас” ажилладаг телевиз байх амлалтаар эхэлж байна. Бараг л олон нийтийн телевиз! Бас 21 аймаг болон томоохон улсын нийслэлүүдэд суурин сурвалжлагчтай гэж худлаа залжээ. Хэдийдээ амжсан байхав?

Харин аль ч телевизийн нэрийн хуудас болсон мэдээллийн хөтөлбөр нь “Б цэг” нэртэй, тэр нь эдийн засаг, худалдаа, үйлчилгээний агуулгатай байгаа нь содон санагдлаа.   

Гэхдээ шинэ телевиз хөл дээрээ босохыг нь хүлээж, бас амжилт хүсэх л үлдэж байна.

Posted in + ТЕЛЕВИЗ, BTV, Нийтлэл, нэвтрүүлэг | 2 Comments »

Монголын зам муу, гэхдээ Малайзынх маш сайн …

Posted by Бид on 2009/07/18

Сүүлийн өдрүүдэд МҮОНТ тэргүүтэй телевизийн хэд хэдэн сувгаар Сингапур, Малайз хичнээн сайхан хөгжиж байгааг харуулсан сурвалжлагууд тасралтгүй гардаг боллоо. Ялангуяа автозамынх нь ганц ч нүхгүй, толигор сайхныг ээ!!!

Манай телевизүүд яагаад энэ хоёр улсыг гэнэт сонирхов? Нэг ч сэтгүүлч энэ талаар дуугарсангүй.

Харин “Өнөөдөр” сониноос явсан сэтгүүлч “Эдийн засаг, дэд бүтцийн хөгжлөөрөө дэлхийд гайхагдах орнуудын туршлагаас эх орондоо нэвтрүүлэхийн тулд монголчуудынхаа оюуны мэлмийг нээх тал дээр УИХ-ын гишүүн Х.Баттулга сэтгүүлчидтэй хамтран ажиллахаар шийджээ. Тэрбээр хувиасаа хөрөнгө гарган, хэвлэл мэдээллийн 26 ажилтныг Сингапур, Малайзаар аялуулсан нь дээрх ажлын гараа болов” хэмээн шударгаар бичив.

Зөвхөн гараа нь ийм байгаа юм чинь  цаашаа мөн ч урт зам туулахнээ. Гэхдээ УИХ-ын гишүүн төдийгүй Зам тээвэр, дэд бүтэц хариуцсан сайд Х.Баттулга эхлээд монголын зам ямар байгааг, хэрхэн Сингапур, Малайзынх шиг болгож буйгаа сурвалжлуулмаар аа.  Хэвлэл мэдээллийн 26 ажилтныг нийслэл хотын замаас эхлээд Лүнгийн замаар аялуулаасай.

Социализмын үеийн онигоо байдаг:

Сангийн аж ахуйн хурал дээр хоёр асуудал хэлэлцэхээр төлөвлөв.  1. Малын саравч засах ажил  2. Коммунизм байгуулах зорилтын тухай.  Хурал эхлэхэд дарга босч ” Одоогоор банз байхгүй тул шууд хоёрдахь асуудалдаа орьё” гэжээ.

Posted in "Өнөөдөр" сонин, + ТЕЛЕВИЗ, Нийтлэл, нэвтрүүлэг | 2 Comments »

Тэд яагаад огцордоггүй вэ?

Posted by Бид on 2009/05/09

Өнгөрсөн хавар Баянгол дүүргийн Засаг дарга Л.Амгалан, Дорнод аймгийн Засаг дарга Ц.Жанлав хоёр хөрөнгө, орлогоо худал мэдүүлж үл хөдлөх хөрөнгө, компаниа нуун дарагдуулсныг Авлигатай тэмцэх газар шалгаж тогтоогоод албан тушаалаас нь огцруулах саналыг Иргэдийн хурлуудад нь тавьснаа мэдэгдсэн билээ.

Бид ярьдаг: Монголоос бусад ардчилсан оронд ямар нэгэн “но”-той юманд нэр холбогдсон албан тушаалтан шууд огцордог, эсвэл түдгэлздэг. Тийм нөхдийг гэрээсээ гарч ажилдаа ирэх, ажлаасаа тарж гэртээ ирэх, хурал цуглаанд оролцох гээд ахлам тутамд нь сэтгүүлчид бүчиж телевизийн камер, сурвалжлагчийн микрофон амар заяа үзүүлдэггүй. Хөрөнгө орлогыг нь эрж хайна, зургийг авна, папараци хийнэ. Албан тушаалаа өгөөд улс төрөөс зайлдаггүй юмаа гэхэд түдгэлзэж нуугдаад үнэн мөнөө олуулсан нь дээр болдог биз.

Дөрөвдүгээр сарын дундуур Батлан хамгаалах яаман дээр Халх голын 70 жилийн ойг тэмдэглэх ажлын хэсгийн уулзалт болоход МҮОНТ-ийг ганцааранг нь шахуу урьжээ. Тэгтэл Дорнод аймгаас Ц.Жанлав дарга ирчихсэн оролцож суув. Тэр ч бүү хэл сурвалжлагчаас айхгүйгээр ой угтсан ажлынхаа талаар ярилцлага өглөө. Шударга биш Засаг дарга сэтгүүлчийн аманд өөрөө ороод ирэх нь тэр! Харамсалтай нь сэтгүүлч маань “Та хөрөнгө орлогын мэдүүлгээ…” гэж эхэлсэн ганц асуулт тавьж зүрхэлсэнгүй.

Нутгийнх нь сэтгүүлчид Жанлав даргыг “зовоож” байна гэж сонсдоогүй, харин ч аймгийн хамгийн том телевиз түүний мэдлийнх, бас аймгийн ганц сонин Засаг даргатайгаа “нягт хамтран ажилладаг” гэсэн.

Энэ хаваржин Баянгол дүүрэгт Л.Амгалан даргын санаачилсан  бүтээн байгуулалт бүх телевизээр байнга гарч дуртайяа ярилцлага өгч байлаа. Сэтгүүлчид түүнийг эвгүй асуултаар зовоосонгүй. Харин өнөөдөр дөрөвдүгээр цахилгаан станцын урдуур “Мөрөөдлийн цэцэрлэг”-ийн нээлтийн ёслол болсныг миний суваг эргүүлэхэд тааралдсан МҮОНТ, TV5, TV9, USB, SBN, “Ийгл” телевизүүд бүгдээрээ сурвалжилж Амгалан даргаас ярилцлага авчээ. Зөвхөн “Ийгл” телевизийн сурвалжлагч тэр асуултыг тавьсан байна. Хариуд нь Амгалан дарга “Нуусан барьсан, худлаа мэдүүлсэн юм байхгүй… ” гэж мэдэгдлээ. Одоо АТГ хүнийг гүтгэсэн болохнээ?

“Ийгл” телевиз ямар ч байсан салхи хагаллаа. Дараачийн удаад, бусад телевизүүд Амгаланд, бас Жанлавт “илүү, илүү” асуулт тавих байх гэж найдахаас.

Posted in + ТЕЛЕВИЗ, Ийгл телевиз, Монголын Үндэсний Олон Нийтийн Телевиз, Нийтлэл, нэвтрүүлэг | 1 Comment »

“2009 он”-ы цаана хэн нуугдав?

Posted by Бид on 2009/03/25

Сүүлийн үед хэвлэл мэдээллээр Сэлэнгэ аймгийн Мандал, Баянговь сумын хөгжил цэцэглэлтийг ихэд магтан дуулах боллоо. Өөр хаана ч байхгүй барилга, байшин, эмнэлэг, оношлогооны аппарат, сум орныг хөгжүүлэх сан тэнд байдаг аж. Энэ бүхнээ бахдан ярих хоёр сумын Засаг дарга нар удалгүй од болохнээ…Бороогийн орд газрын 40 тонн алтыг тавхан жилийн дотор ховх сорсон мөртлөө Монголд олигтой татвар төлөөгүй гэж “Бороо гоулд” компани гадаадынхантай ямар гэрээ байгуулж болохгүйн жишээгээр тодрон амны уншлага болж байгаа ч дараачийн ордыг авч ухахын тулд монголчуудыг найрах пиарыг хүчтэй хийж байгаа нь тэр. “Бороо гоулд” компаниас өгсөн хандив тусламжийг бараг л тоосго тоосгоор нь тоочин сурталчилсаар.

Гэхдээ өдөр тутмын сонинууд “Бороо гоулд”-ийн нэрийг бахархалтайгаар бичиж байгаа бол телевизүүд нуусхийдэг. Тэд “Бороо гоулд”-аас мөнгө авч пиардаж байгаа нь илэрчих гээд хэцүү байгаа бололтой. Ялангуяа МҮОНТ нуух гэж ядах юм.

3-р сарын 25-ны орой МҮОНТ-ээр “Хөгжлийн тулах цэг”-ээр “Уурхайчны нэг өдөр” нэвтрүүлэг гарлаа. Сэлэнгэ аймгийн Баянгол сумаас бэлтгэжээ. “Энэ удаад янз бүрээр хэлэгддэг Бороо гоулдын уурхайн тухай биш, уурхайчин Батболдын тухай өгүүлье” гэж тун зальжин эхэлсэн ч тэр чигээрээ “нам, засагтаа баярлалаа” гэдэг шиг “Бороо гоулд”-д баярлалаа” гэсэн яриагаар дүүрсэн байв. Эцэст нь “… Уул уурхай гэдэг бол хэдхэн хүний асуудал биш … Сэлэнгэ аймгийн Баянгол сумын нутагт орших Бороогийнг алтны уурхайг ашиглаж эхэлснээс хойш …. орон нутгийн иргэдийн хэрхэн сайнаар нөлөөлснийг дурдахгүй байхын аргагүй” гэж дүгнэлээ. Гэхдээ ийм зөв зүйтэй дүгнэлт хийсэн уран бүтээлчид нэрээ бахархалтайгаар тавихын оронд “2009 он” гэсэн тооны ард нуугдаж нэвтрүүлгээ төгсгөжээ.

“Бороо гуолд” компани Мандал, Баянговь хоёр сумыг нэлээд өөд татсан нь үнэн, гэхдээ бүх үнэний зөвхөн нэг хэсэг. Оюутолгойн хөрөнгө оруулалтын гэрээг УИХ-аар хэлэлцэж, араас нь Тавантолгойн болон бусад гэрээнүүд оочирлож байгаа энэ үед МҮОНТ уул уурхайн асуудлаар янз бүрийн үзэл бодлыг уралдуулж хэлэлцүүлэн нийгэмд ойлголцол бий болгохыг хичээхийн оронд зөвхөн компаниудыг магтаж суух юм.

Энэхүү “Хөгжлийн тулах цэг” бол Даваа гариг болгон гардаг захиалгат нэвтрүүлэг. Өмнөх нэг дугаараар Оюутолгой, Тавантолгойн орд газрыг ашиглахыг түргэтгэхийг ухуулахдаа “Бид Хятадын эрчим хүчний сүлжээнд холбогдочихвол салгана гэсэн ойлголт байхгүй. Хятадуудаар хөрөнгө оруулаад тэднээс бариулчихвал хөрөнгө оруулалтаа нөхөхийн тулд биднээс эрчим хүч авсаар байх болно” гэсэн марзан юм ярьж сонсогдсон. Ийм гүн гүнзгий санааг илэрхийлсэн уран бүтээлчдийн нэр мэдээж “2009 он”

Ноднин 10-р сараас хойш “Эрс шинэчлэл” ба “Миний монголын газар шороо” хөдөлгөөнүүд уул уурхайн асуудлаар нэвтрүүлэг хийж оролцох хүсэлтээ МҮОНТ-ын удирдлагад тавиад чадахгүй байна гэж гомдол мэдүүлж байсан. Тэд хэн нэгэнд таалагдахгүй юм их ярьдаг байх, гэхдээ бүх үнэний бас өөр хэсгийг илэрхийлж байгаа бус уу?

Posted in Монголын Үндэсний Олон Нийтийн Телевиз, Нийтлэл, нэвтрүүлэг | 5 Comments »

“Миний мэргэжил – [төлбөртэй] сэтгүүлч”

Posted by Бид on 2009/02/22

Өчигдөр орой “25-р суваг” телевизийн “Миний мэргэжил-сэтгүүлч” нэвтрүүлгийн 6 дахь дугаар гарав. Оросын РТР телевизийн “Профессия – репортер” гэдэг эрэн сурвалжлагын тусгай нэвтрүүлгийг дууриаж, нэрийг нь хуулан орчуулжээ. Манайд бол Пүрэвхүүгийн зохиогчийн хөтөлбөр бөгөөд одоогоор газар дээр нь очиж бэлтгэсэн уртхан сурвалжлагын хэмжээнд байна.

Энэ удаад редакциас өгсөн даалгаврын дагуу “Эмээлт” өртөө рүү явж тэндхийн цагдаа нар, ченжүүд, иргэдтэй уулзаж, айлуудаар орж зовлон жаргалыг нь сонсов. Тэндээс УИХ-д сонгогдсон Д.Тэрбишдагва, C.Оюун, Д.Батбаяр, нийслэлийн хуралд сонгогдсон Т.Билэгт, Л.Эрхэмбаяр нарыг нэрлэж өөрсдийн тойргоо эргэж тойрон нүүр царайгаа харуулахыг уриаллаа. Болж.  

Гэхдээ би өмнөх хоёр дугаарын талаар нэг юм хэлэхгүй бол “дутагдлын хажуугаар дуугүй өнгөрсөн” болно.

2009 оны 2-р сарын 7-ны дугаараар Говьсүмбэр аймагт очиж Шивээ-Овоогийн оросын цэргийн хаягдсан хотхонд амьдардаг иргэдийн амьдралыг харуулав. Өөрийн унаагаар очиж ундуй сундуй барилгуудыг тойрч халаалт доголдож даарч бээрсэн айлуудаар орж энд тэндгүй хөлхөх согтуу хүмүүстэй уулзаж ярилцсан юм. Яахав, хаа сайгүй байдаг бидний амьдралын дүр зураг. Энэ утгаараа Говьсүмбэрийг муулаа ч үгүй, магтаа ч үгүй.

Гэтэл 2009 оны 2-р сарын 14-ны орой санаандгүй юм болов. Пүрэвхүү өөрийн “гараар” хийсэн өмнөх нэвтрүүлгээ няцаасан “төлбөртэй” нэвтрүүлэг бэлтгэн үзүүлэх нь тэр.

minii-mergejil-setguulch-darga minii-mergejil-setguulch-gobisumber2

Аймгийн ЗДТГ-ын хэлтсийн дарга, Шивээ-Овоо сумын засаг дарга, МСҮТ-ийн захирал нарын хүмүүс өмнөх нэвтрүүлэг буруу зөрүү ойлголт өгснийг сануулаад аймаг, байгууллагынхаа ажил амьдрал, ялангуяа Засаг дарга Баянмөнх гэдэг хүнийг магтан шагшлаа. Хотоос ирж энд амьдрах нь дээр гэж нотолсон үлгэр жишээ залуучууд гарав. Мэргэжлийн сургалт үйлчилгээний төв үнэхээр сайхан юм байна. Даардаг айлууд даарахаа больчихож.  Бас цэцэрлэгийн эрхлэгч авгай түрүүчийн нэвтрүүлгээр халамцуу гарч дэл сул юм ярьсан эрийг дэргэдээ нов номхон зогсоочихсон, хөдөлмөрийн дэвтрийг нь дэлгээд шагширч өглөө. minii-mergejil-setguulch-gobisumber17

Хөөрхий эр телевизийн дуранг өрөвдөлтэйө ширтэнэ… Муу ч, сайн ч эр хүнийг ингэж гутааж болох уу? 

minii-mergejil-setguulch-gobisumber19

Өмнөх нэвтрүүлгээр сэтгүүлч Пүрэвхүү Шивээ-Овоог бараан талаас нь харуулсан байг. (Бичлэгээ компьютер графикаар засчихаагүй л бол тэгээгүй). Буруу зөрүү юм хэлсэн байг. Гэхдээ энэ нь долоохон хоногийн дотор төрөл арилжиж урьд нь огт шүүмжлээгүй Говьсүмбэр аймгийн төвийн албан байгууллагууд, уурхай, тэр тусмаа Засаг даргыг нь тусгай нэвтрүүлгээр тэнгэрт тултал магтан сурталчлах шалтгаан огтхон ч биш.

Говь-Сүмбэр аймгийн дарга нар хэдэн төгрөг амлахад л 2008 оны Монголын шилдэг сэтгүүлч буугаад өгчээ. Үүнээсээ ичээд өөрөө харагдахгүй нуугдаж тайлбараа өөр хүнээр уншуулсан ч зарим асуултыг өөрөө тавих нь сонсогдсон. Одоо нэгэнт мөнгөө төлсөн (төсвийн мөнгө биз) Говьсүмбэрийн удирдлага сүүлийн үед бусад сонин хэвлэлд гарсан бүх шүүмжлэлийг давхар няцаан амжуулж өгсөн дөө.

Ноднин “25-р суваг” телевизийн удирдлага Алтантүрүү гэдэг чадварлаг залууг буруу залж айлд мөнгөөр очиж унтдаг болгож сургаад балласан бол одоо энэ охиноор Говьсүмбэр аймгийн нэгэн тосгоныг жаахан шүүмжлүүлээд дараа нь мөнгө авч залруулжээ. Юугаараа шантааж биш гэж? Хэрвээ эхний нэвтрүүлэг байгаагүй бол хоёрдахь нэвтрүүлэг хийгдэхгүй, улмаар Говьсүмбэр аймгийн төсвөөс татвар төлөгчдийн хэдэн төгрөг “25-р суваг” телевизийн дансанд шилжихгүй байсан.

Одоо манай хэвлэл мэдээллийнхэн шантаажыг ил тод хийдэг болжээ.

Posted in 25-р суваг телевиз, Нийтлэл, нэвтрүүлэг | 17 Comments »

Ил тод байдал: Бид юуг мэдэхийг хүсч байна вэ?

Posted by Бид on 2009/01/30

Өнөөдөр “Глоб Интернэйшнл” ТББ-аас АВЛИГА БА МЭДЭЭЛЛИЙН ЭРХ ЧӨЛӨӨ” сэдвээр зохион байгуулсан дугуй ширээний ярилцлагад оролцож тавьсан илтгэлээ нийтлэв.

Социалист нийгэм хүмүүсийн эрэлт хэрэгцээ, ашиг сонирхол, түүнийг илэрхийлж хангах суурь нөхцөл болсон мэдээллийн урсгалыг хаан боогдуулж хаалттай байлгаснаас болж сүйрсэн гэж хэлбэл нэг их хэвтрүүлэг болохгүй биз. Зүүн Европын орнуудад коммунист дэглэмийг “Америкийн дуу хоолой”, “Эрх чөлөө” радио станцууд нураасан гэж хэлдэг. Энэ бүхэн нэгэнт түүх болжээ.

Өнөөдөр нийгмийн бүхий л институци, түүний дотор төр, бизнес, улс төрийн нам, төрийн бус байгууллагууд нээлттэй байна гэдэг бол ардчилал, зах зээл оршин тогтнох үндэс болж юм. Ардчилалд ил тод байдал ямар хэрэгтэйг бид сайн мэднэ. Зах зээлийн тухайд бусдаас илүү бараа, үйлчилгээгээр хангасан тал нь амжилт олж, бусад нь түүнийг давж гарахын төлөө чөлөөтэй өрсөлдөж үүний ачаар нийтдээ хөгжиж дэвшдэг тэр механизм саадгүй ажиллахын тулд энэхүү үйл явц дээд зэргээр нээлттэй байх учиртай. Үнэ, ханш, чанараас эхлээд эрэлт хэрэгцээ, нөөц баялаг, цаашилбал зах зээлд оролцогчид, тэдний эзэмшил, сонирхлын зөрчлийн тухай мэдээлэл хэдийнчинээн хаалттай байна, чөлөөт шударга өрсөлдөөнөөс төдийчинээн ухарч байгаа хэрэг юм. Read the rest of this entry »

Posted in Нийтлэл, нэвтрүүлэг | 7 Comments »

Уран яруу сэтгүүл зүй

Posted by Бид on 2009/01/09

2009 оны эхний бүтэн долоо хоногийн гол үйл явдал бол эдийн засгийн хямрал биш харин яруу найргийн “Болор цом” наадам, Монголын зохиолчдын эвлэлийн 80 жилийн ой байлаа.

Би “Болор цом”-ын шүлгүүд сайн муу байсан, эсвэл Монгол Улсын №1 орчуулагч Н.Энхбаяр төрийн одон медалийг зохиолчиддоо боорцог мэт тараасан тухай биш, харин сэтгүүл зүйн тухай ганц санаа хэлэх гэсэн юм. Сүүлийн хэдэн хоног хэвлэл мэдээлэл, ялангуяа телевиз, ялангуяа МҮОНТ, МҮОНР зохиолчдод “эзлэгдэв”. Биш ээ, дотор нь дүүрэн яруу найрагч, зохиолчид байдаг, тэгэхлээр аль хэдийнэ эзлэгдсэн юм байна. Мэдээ нь хүртэл “МҮОНР-ийн яруу найрагчид төрийн дээд шагнал хүртлээ” гэхчлэн гарчиглажээ.

Манайд зохиолч, яруу найрагч гээд байгаа тэр хүмүүсийн ихэнх сонин хэвлэл, радио, телевизэд ажилладаг. Амьдралын зорилго нь гоё шүлэг, дууны үг, роман бичих, харин амьдрах арга нь сэтгүүлч хийх. Мэргэн цэцэн ярих, уран гоё бичих авъяас сэтгүүлчийн ажилд зайлшгүй хэрэгтэй, гэхдээ энэ олон шүлэгч-сурвалжлагч, яруу найрагч-редактор, зохиолч-эрхлэгчид сэтгүүл зүйг өөр лүүгээ чангаадаг нь зүйн хэрэг. 850 орчим настай Чингэс гэдэг хүнийг олж уулзаад ярилцах хүсэлт тавихад цаадах нь эелдгээр зөвшөөрч, ингээд сониндоо цуврал ярилцлага нийтлүүлсэн сэтгүүлч хүртэл бий. “Баримт түшсэн эрэгцүүлэл” гэх мэт гоё төрөл зүйл зөндөө. Даанч ч сулхан баримт нь нурахад түших юмгүй болж хоосон цэцэрхлийн  балчигт шалхийдэг.  Мэдээжийн санаа, бүгд мэдэх юмыг тойрсон нуршуу нийтлэл, нэвтрүүлгээр сонин хэвлэл, радио телевиз пиг дүүрэн байх юм.

Хэрвээ уран зохиолч хүн яг өнөөдрийн бужигнаанаас ангид, түүхэнд үлдэх мөнхийн бүтээл туурвилын хойноос явдаг бол сэтгүүлч хүн яг өнөөдрийн үйл явдлын тэмдэглэл хөтөлж үлдээх үүрэгтэй. Зөв буруу нь хамаагүй баримт, жишээ, санал бодол… Зөвхөн энэ биш. Одоо баримтыг дүгнэж чаддаг, ил далд учир шалтгааныг илрүүлдэг, сайн муу чиг хандлагыг хэлдэг сайн тоймчид манай хэвлэл мэдээлэлд хэрэгтэй болжээ. “Аавдаа авгай авахыг зааж” том том дуугарч энэ улсын Ерөнхийлөгчөөс нь эхлээд сургадаг жижигхээн охид, хөвгүүд, бас аль социализмын үеэс “улс төрийн тоймч” нэрийг зүүсэн Дашзэвэг нар  биш шүү. Тэр Дашзэвэг хүртэл цаанаа яруу найрагч, дууны шүлгийн мастер байсан нь илэрсэн бөгөөд сүүлдээ цэнгэн хөгжилдсөөр үзэгдэхээ ч больжээ.

Posted in Нийтлэл, нэвтрүүлэг | 4 Comments »

“Улаанбаатар” зочид буудалд хоноё”

Posted by Бид on 2008/12/29

Ноднин телевиз үзэгчдийн сэтгэл санааг эзэмдэж хөтлөгч Алтантүрүү нь Монголын телевизүүдийн холбооны шагналыг Ерөнхий сайд С.Баяраас гэрт нь хонох урилгын хамт авч байсан “25-р суваг” телевизийн “Танайд хоноё” нэвтрүүлэг энэ 2008 оныг зочид буудлын тансаг өрөөны ванны өрөөнд үдэх шив. Сайн сайхан яваа мэт боловч нөгөө шинэ сонин хүмүүс, тэдний амьдрал, оройн хоол унд, үдшийн яриа алга байлаа. Нэг л биш ээ.

Тайлбарлая.
2008 оны төгсгөлийн буюу 12-р сарын 28-ны “Танайд хоноё” нэвтрүүлгийн эхэнд өмнөх ням гаригт очсон олон хүүхэдтэй ядруу айлд туслахыг хүссэн сайхан сэтгэлтэй хүмүүсийн хандивыг аваачиж өгснөөр эхлэв. Дараа нь хөтлөгч Тэнгис хонох айлаа олохоор УИД-ын урд ирж зогсоод “Би хонох айл олох гэж маш их хичээдэг. Өнөөдөр хонуулах айл олдохгүй бол яанаа” хэмээн ямар нэгэн буруу юм хийснээ нуусан жаал (“Аав аа, би аяга хагалаагүй ш дээ” гэдэг урьдчилж хэлдэг шиг) мэт тун сэжигтэй эхлэв. Уг нь түүнийг хичээдэггүй гэж хэн ч зэмлээгүй юмсан. Ингээд хөтлөгч маань тэр хавиар сүлжилдэх түмэн хүнээс хэдэн охид, эмэгтэйчүүдыг сонгож “танайд хоноё” гэсэн санал тавихад цаадуул нь мэдээж татгалзлаа. Өрхийн тэргүүнээс асуухгүйгээр нэг (хоёр) “хар юм”-ыг бас камертай дагуулаад очдог ёс жудаггүй эзэгтэй гэж байх уу? Байхгүй! Нөхөргүй ганц бие юмуу өрх толгойлсон бол бүр үгүй.

Хэргийн учир тэр дороо тайлагдаж хөтлөгч маань “Би өнөөдөр зочид буудалд очиж хононо” гэж мэдэгдлээ. Уг нь сонин санаа. Буудлын амьдралын нэгэн үдэш юмуу шөнийг харуулж яагаад болохгүй гэж?. Даанч “Улаанбаатар” гэдэг зочид буудалд очиж хонохоор шийдсэнээ зарлаж, үүнийгээ “хүүхэд байхаасаа сайн мэддэг байсан” гэж тайлбарлав. Гэхдээ жинхэнэ шалтгаан өөр. Тус буудал “Монгол ньюс” компанийн хөрөнгө оруулалттай, бараг түүний охин компани шахуу билээ. Илүү тайлбар хэрэггүй биз.

Дараачийн мөчид хөтлөгч Тэнгис “Улаанбаатар” зочид буудлын ресепшн дээрээс түлхүүр авч байх юм. “Хонуулчих л даа. Мешокоо дэвсээд унтчихна. Саад болохгүй, тэгэх үү” гэсэн нэвтрүүлгийнхээ алдарт гуйлтыг хэрэглэх шаардлага гараагүй бололтой. Буудлын менежер биечлэн үйлчилж ганц хонохоор ирсэн хөтлөгчид Ерөнхийлөгчийн өрөөг танилцуулж тэнд оруулах шиг болов. (Гэхдээ үйл явдлын дүрсүүд рекламын клип шиг солигдоод байсан тул би андуурч болох). Ингээд хөтлөгч номертоо ганцаараа үлдэнгүүтээ (зураглаачтайгаа хоёулаа гэсэн үг) ваннтай усанд шумбаж зургаа авахуулаад “Шинэ жилээр хүмүүс гэр бүлээрээ байхыг хүссэн учраас намайг хүлээж аваагүй байх” гэж худлаа залж “Намайг уриалгахан хүлээж авсан “Улаанбаатар” зочид буудлын хамт олонд баярлалаа” хэмээн талархаад хөнжилдөө шурган нойрссон ба өглөө босоод юу ч дуугаралгүй хөгжмөөр “зодоод” тэр чигээрээ гарч нэг мэдэхэд буудлын гадаа явж харагдав. Ядахдаа өрөөгөө хүлээлгэж өгсөн байгаасай. Ийнхүү дэндүү богинохон мөртлөө сурталчилгаа нь хонолтоосоо урт “Буудалд хоноё” өндөрлөв.

Хоёр жилийн турш үзэж дассан Алтантүрүү солигдож шинэ хөтлөгч гарч ирэхэд, тус тусмаа олимпийн аварга Бадар-Ууганыд хоноход үзэгчид эхний удаад ихэд сонирхсон боловч одоо больжээ. Шинэ хөтлөгчийг олон хүн шүүмжилж байна. Аливаа нэвтрүүлэгт хөтлөгч солигдож болдог, гэхдээ шинэ хүн юм бол өөртөө таарсан, өөрийн чаддаг шинэ юмыг оруулж байж үзэгчдийг урвуулах учиртай. Даанч шинэ хөтлөгч маань Алтантүрүүг муухан дууриагчийн хэмжээнд эхэлж энэ оны төгсгөлд гоё буудалд арын хаалгаар хонож ванны өрөөнд ус палчигнуулахаас өөр олигтой юм бодож олсонгүй. Харамсалтай.

Posted in + ТЕЛЕВИЗ, 25-р суваг телевиз, Нийтлэл, нэвтрүүлэг | 6 Comments »

СОНГУУЛИЙН “БИЗНЕС” МЭДЭЭ

Posted by Бид on 2008/12/09

2008 оны 12-р сарын 8-нд “Глоб Интернэйшнл” ТББ-аас зохион байгуулсан “19-р зүйл ба хараат бус сэтгүүл зүй” дугуй ширээний ярилцлагад зориулж өөрийн бичсэн илтгэлийг дор нийтлэв.

Аливаа нийтлэл, нэвтрүүлгийг (нийтэд хүргэдэг гэсэн утгаар бүх төрөл зүйлийг энд багтааж байна) захиалгаар бэлтгэж явуулах нь сэтгүүл зүйн мөн чанарт харшилдаг. Хэвлэл мэдээлэл бусдаас мөнгө авч тодорхой бараа, үйлчилгээг нийтэд танилцуулж болох авч энэ тохиолдолд нийтлэл, нэвтрүүлэг биш сурталчилгаа гэж нэрлэнэ. Энэ бол сэтгүүл зүйд шийдэгдсэн асуудал. Нийтлэл, нэвтрүүлгийг зар сурталчилгаанаас зааглах нь сэтгүүл зүйн үндсэн зарчмуудын нэг юм. Read the rest of this entry »

Posted in + ТЕЛЕВИЗ, 2008 оны УИХ-ын сонгуулийн сурталчилгаа, Нийтлэл, нэвтрүүлэг | 6 Comments »

Телевизээр гардаг телевизийн ба сонины тоймууд

Posted by Бид on 2008/11/25

Уг нь энэ олон телевизийн хамгийн сайн мэдээ, сурвалжлагуудыг нэг дор үзчихдэг бол сайхан л юм. Харамсалтай нь телевизүүд хоорондоо өрсөлддөг, бас зохиогчийн эрх гэж нэг юм байдаг …

C1 телевиз ийм оролдлогоо ерөөсөө орхихгүй юм аа.  Өөрийгөө төв телевиз бодчихсон мэт. Хоёр жилийн өмнө  жижиг телевизүүдийг аргалж, МҮОНТ-ыг төлөөний хүнээрээ лоббидож, заримаас нь шууд хулгайлж байгаад үдэш бүрийн 23 цагаас “Фокус ньюс” нэртэй мэдээллийн хөтөлбөрийг бэлтгэн үзүүлсээр овоо рейтинг цуглуулж реклам сурталчилгаа чангаадаг болсон ч тэгэсхийгээд зогссон.

Гэвч өнгөрөгч 10-р сараас “Фокус ньюс”-ээ сэргээгээд байна. (Эхлээд сэтгүүлч Алтаншагай хөтөлж байснаа гэнэт больчихов. Энэ телевизэд бас л тогтсонгүй юу?). Завгүй яваад телевизүүдийн мэдээлийн хөтөлбөрийг үзэж чадаагүй хүмүүст нэг дороос үзүүлж, тэгэхдээ өөр өөр өнцгөөс харах боломжийг олгож байна гэх сүрхий тайлбар хийж байгаа ч  өөрөөсөө гадна НТВ, SBN, TM,  хааяа Оросын “Айст “ гэсэн хэдхэн телевизийн мэдээ сурвалжлагаас оруулж байна. Зөвшөөрсөн нь тэд бололтой. Жижиг телевизүүдийн мэдээний тойм юмуу даа. Иймээс дутуугаа нөхөхийн тулд өдөр тутмын сонинуудын тоймыг араас нь залгаж оруулдаг болжээ. Харин хөтлөгчийн зүгээс улс төрийн элдэв тайлбар, дүгнэлтээр хэтэрхий “баяжуулдаг” нь зохихгүй байна лээ.

Зөвхөн сонинуудын нийтлэлийг ашигладаг, агуулгын хувьд төстэй Press Express нэртэй хөтөлбөр NTV телевизээр гардаг байснаа сураг тасарчээ. Энэ жил УИХ-ын сонгуулийн сөрөг сурталчилгааны дайчин нэвтрүүлэг болж хувирсан тэр халуундаа шатсан байх.

Сонинуудыг тоймлодог өөр нэвтрүүлэг хэд хэд бий. TV9 телевизийн Focus Press аядуу, гэхдээ долоо хоногт ганц удаа учраас шинэ мэдээлэл өгөх нь ховор.  Ням гаригт “25-р суваг” телевизийн “Rock news” нэвтрүүлэг  “сонин сонины сониноос” гадна Интернэтийн монгол сайтуудад тавигдсан элдэв мэдээг хөгжимтэйгээр дуулгаж хэсэгхэн зугаацуулж байна.

Бас “25-р суваг” телевизийн өглөөний хөтөлбөр “Өнөөдөр” сониноос хэн нэгнийг урьж шинэ дугаарын тоймыг яриулдаг  бол C1 телевизийн “Өнөөдрийн эхлэл” хөтөлбөр өдөр тутмын сонинуудын хуудсыг шажигнатал эргүүлж баахан пөөх, байз, аах уух зэрэг уран сайхантайгаар бага сага хэлж өгдөг.

Сонины тоймыг телевизээр уншихад эзэд нь дургүйцлээ барилаа гэж дуулдаагүй.  Тэртээ тэргүй бүгдийг нь дуудаад өгч барахгүй тул сурталчилгаа болохоос хэтэрдэггүй байх. Гэхдээ манай телевизүүд сониныг тоймлодог арга дэндүү болхи, өнгөрсөн зууных хэвээрээ. Хөтлөгч л ганцаараа сониноо үзэж хэдхэн мөчийн өмнө гартаа авсан шинэ дугаарыг гүйлгэж хараад ойлгож амжсан ганц нэг материалаа ярьдаг. Гадаадын телевизийг ажиглахад, сонины хуудсуудыг дэлгэцэн дээр ээлжлэн гаргаж онцлох нийтлэлийг томруулан үзэг харандаагаар зааж, нэг ёсондоо уншигч буюу үзэгчдэд харуулж байгаад тайлбарладаг. Манай телевизүүд чадахгүй гэж үү? Эхлээд аль нэг сонинтой тохиролцож шинэ дугаарыг нь .pdf-ээр аваад …

Эсвэл манай сонины эзэд бас дургүйцэх юм болов уу?

Posted in + СЭТГҮҮЛ, + ТЕЛЕВИЗ, 25-р суваг телевиз, C1 телевиз, Нийтлэл, нэвтрүүлэг, TV9 телевиз | 8 Comments »

ХААН банк уучлал гуйж мэдэхгүй …

Posted by Бид on 2008/11/20

ХААН банк Амгалан дахь салбараасаа болж TV9 телевизээр хөгөө чирснийхнээ дараа яасан гэж та бодож байна?  Банкны удирдлага нь тэр салбар дээр очиж ихэмсэг дарга залууг загнаж, ааш муутай ажилтнуудаа журамлав уу? Магадгүй Амгалангийн ядарсан авгай хүүхнүүдийг цуглуулж уучлал гуйв уу? Үгүй бололтой.

Маргааш орой нь  TV9 телевиз “Хаан” банкыг учир зүггүй өмөөрөх нь тэр. Энэ удаагийн сурвалжлагаар улирал тутамд олгогддог халамжийн мөнгө олгогдсож эхэлснээр ХААН банкны салбаруудын  ачаалал ихсэж байна,  тэр мөнгөнүүд өөр өөр дансаас ордог учраас 2-3 хоногийн зөрөө  гардаг гээд Нийгмийн халамжийн газрын ажилтнаар санхүүүжилтйн хуваарь, дүрэм журмыг баахан  тайлбарлуулав.  Хүүхдийн мөнгө дуусчихна гэж иргэд болгоомжилдог нь  ташаа ойлголт гэнэ. Өчигдөр TV9-ыг дуудсан сурвалжлуулсан Амгалангийн авгай хүүхнүүд үүнийг мэддэггүй учраас  хий дэмий бужигнаж “Танд ойрхон, түмэнд итгэлтэй”  банкийг хүндрүүлж ёс алджээ гэсэн санаа.  Араас нь ХААН банкны дэд захирал Л.Батсайхан өөрийн биеэр дэлгэцнээ морилж  тус банкинд халамжийн мөнгө хаанаас орж ирдэгийг дахин тайлбарлаж, хүүхдийн мөнгийг дансанд нь хийгээд өгчихдөг тул заавал Амгалангаас авах шаардлагагүй, хотын төвд явж байвал тэндээс авч болно, Зүүнхараа очоод авж болно, Өмнөговь очоод авч болно, онлайнаар авч болно гээд гайхуулж өгөх  нь тэр. 

Өмнөговь руу нисэх байтугай хотын төв орох автобусны мөнгөтэй болохын тулд эхлээд хүүхдийн мөнгөө авах хэрэгтэй тэдгээр авгай хүүхнүүдийг даапаалаад ч байх шиг. Энэ янзаараа Амгалангийн салбараа хаачихаад хүүхдийн мөнгөө Интернэтээр ав гэх юм байна. Сурвалжлагч залуу дэд захирлыг даган баясаж ХААН банкны 400 гаруй салбартай 80 хувь онлайнаар холбогдсон, 70 гаруй мөнгөний машинаас авч болно гэхчлэн үргэлжлүүлж өндөр сүрлэг барилгуудыг харуулсаар сурвалжлагаа өндөрлөв. 

Амгаланд хүүхэд шуухаддаа дарагдан суугаа үйлчлүүлэгчдээ хаалган дээрээ тосч угтдаггүй юм аа гэхэд хүний ёсоор харьцаж эвтэйхэн тайлбарлаад хуваарь гаргаж төрөөс дамжуулсан мөнгийг хэл амгүй тараачихаж чадахгүй байж юун сүртэй юм бэ?  

Миний магтаад байсан TV9 юу болов оо? Тэр өглөө ХААН банкны удирдлага TV9-ын захирал руу утасдаж гомдол мэдүүлсний дагуу өөр сурвалжлагчийг томилж дээрх  сурталчилгааг хийж эрхэм банкны нэр хүндийг цэвэрлэж өгсөн биз. Эсвэл мөнгөний хүүдийнээсээ хэдэн төгрөг гаргаж захиалсан “Бизнес мэдээ” ч байж болох юм. Манай телевизүүдийн төлбөртэй, төлбөргүй мэдээнүүд ялгагдахаа больсон билээ. 

ХААН банкны дэд захирал энэ орой Амгалангийн хүүхнүүдийг чадсан (банкийг нь хайр найргүй балбасан телевизийг ганцхан хоногт урвуулна гэдэг тоглоом биш) амжилтаа бататгаж TV5 телевизийн бас л төлбөртэй “Зочны цаг”-ийг худалдаж аваад хадгаламж эзэмшигчдээ удалгүй харж үзэх тухайгаа бахдан ярилаа.  

Ингэж олон юм ярихын оронд “Уучлаарай,  та бүхнийг дахиж бухимдуулахгүй” гээд уучлал гуйсан бол ХААН банк засарчээ гэдэгт би л лав итгэх байсан юм.  Бүх юмыг мөнгөөр шийдээд сурчихсан хүмүүст уучлал гуйх сэтгэл байдаггүй юм болов уу?

Posted in + ТЕЛЕВИЗ, Нийтлэл, нэвтрүүлэг | 8 Comments »

ХААН банкны Амгалан дахь шившиг

Posted by Бид on 2008/11/18

Нийслэлийн зүүн урд зах – Амгалангийн иргэд хүүхдийн мөнгөө авах гэж улиралд нэг удаа ХААН банкны салбарын үүдийг хэд хоногоор сахиж үхэн хатан оочирлодог, хэрвээ авч амжихгүй бол дараа улирал хүртэл хойшилдог юм байна. Тэд энэ удаад банкныхны хүнд суртал, хараал ерөөлийг дахин амсаад гомдсондоо телевиз дуудсан нь TV9 байжээ.

Сэтгүүлч Отгонжаргал үймэлдсэн иргэд, нялх нярай хүүхдээ тэвэрсэн эхчүүдийг нэгд нэгэнгүй харуулж тэдний заримыг дотор нь онгойтол яриулсан (“… Эднийх дандаа ингэдэг … 8-р сард хүүхдийн 25 мянгыг C1 телевизийг ирүүлж байж авсан .. Өнөөдөр хоёр дахь телевизээ дуудаад сая нэг мөнгө өгч эхэлллээ … Энэ банкийг ажиллуулмааргүй байна…”) төдийгүй дээд давхарт өрөөндөө тухлан гар утсаараа хууч хөөрч суугаа салбарын захирал дээр ороод ёстой нэг болгож өглөө.  Цаадах нь залуугаараа арай л эрт  хамраа сөхсөн том дарга болсон нь илт бөгөөд “иймэрхүү юм телевизээр гаргавал сайн юм болохгүй” гэж анхааруулаад бичлэгээ зогсоохыг шаардсанаа дахин утсаа авч цонхон дээрээ очиж ар нуруугаа харуулан “Шагдарын Соном … дансанд мөнгө орсон… ” гэх мэтээр ярьж сэтгүүлчийг хүн гэж  тоохгүйгээ харуулав. Хувийн ажлаа сэтгүүлчийг явсны дараа нууж ярьмаар юм даа.

TV9-ийн энэ шүүмжлэл зөвхөн ХААН банкны Амгалан дахь салбарын тухай байсангүй. ХААН банкаар төсвийн мөнгөний ихэнх нь дамжиж тэтгэвэр, тэтгэмж, нийгмийн халамжийн мөнгийг тараасныхаа төлөө их ашиг олдог, гэтэл дээрээс нь нэмж БСШУ-ны шинэ сайд Ё.Отгонбаяр боловсролын салбарт ажиллагсдын цалин хөлс болон салбарын бүх байгууллагын дансыг тус банкинд байршуулахаар болсон гэнэ. Сэтгүүлч  үүнийг “нэг банкийг хэт шүтсэн, монополь байдлыг бий болгосон шийдвэр” гэж дүгнээд “… олон салбар нэгжээрээ дамжуулан төрийн мөнгөний ихэнхийг гартаа оруулж асар их ашиг олдог ХААН банк  даахгүй нохой булуу хураахын үлгэрээр шунаж авсан тусгай эрхэндээ даруулаад амьсгал хураах нь холгүй байгаа…”-г Амгалан салбараар жишээ болгож  тус банк төрийн мөнгөнөөс нэмж шимэхийг болиулж гаргасан шийдвэрээ эргэж харахыг сайдад уриалж амжлаа.

Сүүлийн саруудад TV9 телевиз ХААН банкийг дэс дараатай балбаж байгаа. Энд ямар нэгэн бодлого байж магадгүй ч энэ сурвалжлагыг магтахаас өөр арга алга. Ядарсан авгай хүүхдүүдийн мөнгийг улиралд ганц удаа эвтэйхэн тарааж суртал нь, бас салбарын захирал нь сэтгүүлчдийн өмнө пээдийхээ больтол нь сурвалжлаад байх хэрэгтэй.

haanbankamgalan-21 haanbankamgalan-31haanbankamgalan-41 haanbankamgalan-51haanbankamgalan-61 haanbankamgalan-71haanbankamgalan-81 haanbankamgalan-91haanbankamgalan-101 haanbankamgalan-112

Posted in + ТЕЛЕВИЗ, Нийтлэл, нэвтрүүлэг, TV9 телевиз | 2 Comments »

“Эко констракшн”-ий Нямдаваа телевизийн дэлгэцнээс салахгүй нь ээ

Posted by Бид on 2008/11/17

Сүүлийн хэдэн жил захиалагчдаа зогсоо зайгүй хулхидаж байгаа “Эко констракшн” компанийг муулж бичээгүй сонин, муугаар үзүүлээгүй телевиз гэж Монголд үгүй болжээ.  Барилгаа  хугацаанд нь ашиглалтанд оруулж үзээгүй болохоор өөр яахав.  Боссон барилгууд нь бөөн гомдол дагуулдаг ч эрхбиш хатуу төмөр  хэлхэж цемент зуурч нийлүүлсэн юм болохоор тогтоод байдаг биз.

Ийм  дампуу компанийн захирал Нямдаваа гэгч залуу хэвлэл мэдээллээс бултаж сурсан нэгэн боловч өнгөрсөн долоо хоногийн сүүлчээр “Ийгл” телевизийн сурвалжлагч Батхишигтэй Зам тээвэр, барилга, хот байгуулалтын яамны үүдэн дээр таарчихаж.

Сурвалжлагч ярилцлага авахыг хүсэхэд цаадах нь сайдын өрөө рүү ухарч хэсэг нуугдсанаа сайдын туслах залууг дайчлан камерийн дуранг таглуулж байгаад хажуугаар нь гарч гоё машиндаа хамт суун зугтжээ. Удалгүй түүний үүрэг өгсний дагуу бололтой “Эко констракшн”-ий нэг  нөхөр “Ийгл”-ийн сурвалжлагчид бүгдийг ярьж өгнө хэмээн мэхэлж компани дээрээ дуудаж ирүүлээд “Бид өөрсдөө танайд хүсэлтээ тавиад нэвтрүүлэг хийлгэж болох уу?” гэж тандсан байх юм.  “Бид мөнгө өгвөл биднийг магтсан нэвтрүүлэг хийж өгөх үү?” гэсэн үг.

Өнгөрсөн зун тус компани  “2008 он” гэсэн зохиогчтой (төгсгөлд ингэж бичсэнээс өөр нэр хаяггүй) захиалгат нэвтрүүлгийг бараг бүх телевизээр (түүний дотор “Ийгл”-ээр) үзүүлэхдээ “Эко констракшн”-д гомдсон хэдэн зуу, мянган захиалагч байгааг тас нууж, зөвхөн  гэрээлсэн байрандаа удахгүй орно гэж найдсан хэсэг захиалагчаар компаниа баахан магтуулж жүжигчин Равдангаар хөтлүүлсэн билээ. Цаадуул нь хамаг мөнгөө төлчихсөн, хэд дахин хойшилсон байраа яаж ийгээд авахын тулд аргагүйн эрхэнд магтаж өгсөн биз.

Үйл явдал цаашаа улам сонирхолтой өрнөжээ. Маргааш нь Нийслэлийн мэргэжлийн хяналтын улсын байцаагч А.Мягмаржав “Ийгл”-ийн сэтгүүлчийг хүлээн авч уулзаад “Эко констракшн” компани алдаа дутагдлаа зассан гэж нотолсноо сэтгүүлчийн гаргаж ирсэн баримтад уурсан “Чи нийслэлийн ИТХ-д нэр дэвшээд байгаа  Нямдаваа захирлын нэр хүндэд бусдын захиалгаар халдлаа” гэж загнаад “Зууны шуудан” сонинд гарсан ”Захиалгын сэтгүүл зүй газар авах гээд байна” гэсэн ярилцлагын гарчгийг нотлох баримт болгон зааж, бас “сайдын туслах Эко компаниас барилгын зураг авах гэж явсан юм мэдэв үү?” гэх мэтээр даналзсан байх юм.  Урьд нь А.Мягмаржав “Өнөөдөр” сонины орлогч эрхлэгч, бас Монголын радиогийн “Хурд” агентлагийн захирал байсан юмсан. Сайн хүнийг төрийн алба сайн эвдэх юмаа.

Бямба гаригт ЗТБХБ-ын сайд Х.Баттулга сэтгүүлчдийг дагуулан барилгын компаниудийг эргэхэд Нямдаваа захирал нөгөө зовлонт “Ийгл”-ийн сурвалжлагч бүсгүйтэй дахин учрах нь тэр. Гэхдээ юу ярьсан гээч? “Хэрвээ төр засаг банкуудад яаралтай үүрэг зээл өгүүлбэл барьж дуусгах гээд хүлээгээд сууж байна” гэнэ ээ.  Сурвалжлагч гайхаж “хэрвээ танай компани барилгаа ноднин хугацаанд нь оруулсан бол барилгын материалын үнэ өсөхөөс өмнө амжих байсан биш үү” гэсэн сурвалжлагчийн асуултанд  дахиад л “банкнууд зээл өгвөл …” гээд юу ч болоогүй юм шиг тормолзож зогслоо.

eco_construction_nyamdavaa2

“Эко констракшн” гэж компани ямар нэгэн ид шидээр (зарим хүмүүс ид шид биш, нууц эзэн нь нийслэлийн Засаг дарга асан М.Энхболд учраас тэр гэдэг ) хотын энд  тэндгүй газар эзэмшиж үй олон захиалга авч баахан орон сууцны барилга эхэлсэн боловч тэрнийгээ барахгүй сунжруулсаар энэ жилийн үнийн өсөлттэй золгожээ. Дараачийн удаад банкинд үүрэг өгөөгүй төр, өөрт нь зээл олгоогүй банкуудийг буруутгаж ярих юм байна. Магадгүй, аргаа барсан захиалагчдаараа “Нямдаваа захиралд зээл олго” гэсэн жагсаал цуглаан хийлгэж мэднэ. Өөрийгөө нийслэлийн ИТХ-д сонгуулах бол энүүхэнд.

Хотын дарга нар төсвийн мөнгөөр байр авахдаа зөвхөн “Эко констракшн”-ий байрыг сонгодог нь тус компанийн өөр нэгэн ид шид юм. Хэд хоногийн өмнө нийслэлийн хамгийн өндөр настанд олгосон нэг өрөө байрны түлхүүрийг Нямдаваа нь хувиасаа өгч байгаа мэтээр гардуулж UBS телевизээр шоудаж харагдсан.

Одоо Нямдаваа захирал телевизээс зугатах биш, телевизээс салахаа болохнээ.

Posted in + ТЕЛЕВИЗ, Ийгл телевиз, Нийтлэл, нэвтрүүлэг, UBS телевиз | 3 Comments »

Орон нутгийн сонгууль дуустал айлтгүй…

Posted by Бид on 2008/11/05

Газрын маргаан дээр очно гэдэг бол нийслэл байтугай дүүрэг, хорооны Засаг даргын ганц айдаг зүйл. Харин өнөөдөр нийслэлийн Засаг дарга бөгөөд Улаанбаатар хотын захирагч Т.Билэгтийн цуваа 15-р хорооллын биеийн тамирын талбай дээр аймшиггүйгээр яваад ирсэн байлаа. 

Ийм эр зориг гаргахын тулд хагас жил бэлтгэжээ. Эхлээд нийслэлийн ИТХ-ын тогтоолыг дагах уу яахуу гэж хаваржин, зунжин, намаржин эрэгцүүлсний эцэст газар олголтыг цуцалсан захирамжийг 14 хоногийн өмнө гаргасан бол өчигдөр доод албан тушаалтнууд нь  барилгын ажлаа зогсоох мэдэгдлийг барилгын компанид гардуулж, тэр оройдоо Баянзүрх дүүргийн цагдаа тусгай ажиллагаа явуулан хятад ажилчдыг хөөн зайлуулснаар Засаг даргыг морилоход ямар ч саадгүй болсон байлаа.  

Ингээд Билэг дарга дагуулж ирсэн сэтгүүлчиддээ хандан “Би нийслэлийн Засаг даргын хувьд гаргасан шийдвэрээ хэрэгжүүлнэ, энэ талбайг биеийн тамир, спортын  зориулалтаар ашиглуулна” гэсэн цогтой мэдэгдэл хийгээд мордов. Харин энэ үеэр “Зүүн Ази хөгжил” компанийн монгол захирал бас хүрч ирээд “Билэгт даргын шийдвэр өөрөө хууль бус. Бид хувийн өмч байсан газрыг худалдаж авсан. Хэрвээ Билэгт даргатай учраа олохгүй бол Ерөнхий сайдад хандана, тэгээд бүтэхгүй бол шүүхээр шийдүүлнэ” гэсэн хариу мэдэгдэл хийсээр үлдлээ.

Тэднийг шүүхээр явах гэсээр байтал орон нутгийн дахин сонгууль өндөрлөж Билэгт дарга энэ хэргийг зуурсан өмнөх Засаг дарга Ц.Батбаяр шиг аюулгүй газарт очсон байх биз…   

Харин телевизүүд энэ оройжин (“Ийгл” телевиз бүр өдөр) дээрх хоёр мэдэгдлийг зэрэгцүүлэн үзүүллээ. Болж л байна.

Posted in + ТЕЛЕВИЗ, Нийтлэл, нэвтрүүлэг | Leave a Comment »

Т.Билэгтийн дэглэсэн жүжигт МҮОНТ сайн тоглож байна

Posted by Бид on 2008/11/05

15-р хорооллын хөл бөмбөгийн талбай буюу “Найрамдал” цэнгэлдэх хүрээлэнг устгаж орон сууцны  хороолол барих газар олгосон  захирамжийг цуцлах шийдвэрийг Нийслэлийн Засаг дарга Т.Билэгт хагас жил цааргалж байж сая нэг гаргасан боловч түүнийгээ үнэхээр хэрэгжүүлэх эсэх нь мэдэгдэхгүй, доод албан тушаалтнуудынхаа араар нуугдчихаад байгаа билээ. Өмнөх Засаг дарга Ц.Батбаярын захирамжийг цуцлана гэдэг бол алдаа гаргасныг нь хүлээн зөвшөөрнө, түүнийг Засаг дарга байхад нь “жа” хэмээн алгаа хавсарч бөхөлзсөн хот төлөвлөлт, газрын алба, мэргэжлийн хяналтын албан тушаалтнуудыг буруутгана, тэгээд эхний барилгуудаа эхэлчихсэн хятад компанид асар их нөхөн төлбөрийг хаанаас гаргах асуудлыг шийднэ гэсэн үг. Юуны тулд тамга атгасан Засаг дарга билээ. Хэрвээ чадахгүй бол үүнийгээ хэлээд огцорсон ч яахав. Даанч Билэгт дарга сүр бараатай сайхан эр боловч дэндүү хулчгар ажээ. Монгол эрчүүдийн чанар үнэхээр мууджээ. 

Үүнийг анзаарсан “Зүүн Ази хөгжил” компанийн хятад эздийн TV9 телевиз рүү яаралтай илгээсэн гүйцэтгэх захирал ба хуулийн зөвлөх гэсэн хоёр монгол Билэгтийн захирамжийг баахан шоолж толгой сэгсрээд нийслэлчүүд буруу хүнийг Засаг даргаар тавьсныг анхааруулж цаашид сонголтоо зөв хийж байхыг уриалсан билээ. Анзаарав уу? Бидний сонголт буруу болохыг Хятадын компани хэлж өгдөг болжээ. Аргагүй ээ, бид өөрсдөө сонгож чадаагүй юм чинь. Удалгүй сонгоод өгөх биз… 

Ерөнхийлөгчийнхөө телевизээр ингэж муухай хэлүүлсэн ч “буруу сонголт” маань хариу барьсангүй. Харин хэд хоногийн дараа “Ийгл” телевизийн сурвалжлагч түүнийг ямар нэгэн арга хэмжээний үеэр тосч уулзаад захирамжийнх нь талаар асууж амжжээ. Билэгт дарга шууд л “Нийслэлийн ИТХ-аас өгсөн үүрэг учраас би захирамж гаргасан” гэж амиа аврангуутаа “миний зарчмын байр суурь бол байшингуудын дунд салангид газар олгохгүй, орон сууцыг хорооллоор нь бариулна, иргэдийнхээ эрх ашгийн төлөө ажиллана” гэж лоозогноод шууд цааш эргэж дараачийн асуултаас бултаж одлоо.  

Одоо гол найдвар бол Билэгт дарга өмнөх сурвалжлагыг нь үзэж уяраад захирамжаа гаргасан гэдэгт үнэнээсээ итгэчихсэн МҮОНТ-ийн “Монголын мэдээ” агентлаг юм. Өчигдөр оройн “Цагийн хүрд” мэдээллийн хөтөлбөр ээлжит сурвалжлагаа “зөвхөн манай агентлаг сурвалжилсны ачаар олон нийт сайн мэдэх болсон 15-р хорооллын “Найрамдал”  стадионы тухай үзүүлье” гэж сагсуухан эхэлсэн ч барилгын ажил зогсоогүй үргэлжилсээр байгаа тухай гунигтай мэдээ дуулгаж нийслэлийн Засаг даргын шийдвэрийг хэрэгжүүлэх төрийн албан хаагч олдохгүй байна гээд Баянзүрх дүүргийн Засаг дарга, Нийслэлийн мэргэжлийн хяналтын газрын дарга хоёрын албан тушаалыг (нэрийг биш шүү!) дурдлаа. Тэднийг олоогүй бололтой (гэтэл яг тэр өдөр Баянзүрх дүүргийн Засаг дарга Мөнхбаатар МҮОНТ дээр өөрийн биеэр ирчихсэн, мэдээллийн төвд нь хэвлэлийн хурал хийлгээд явж харагдсан) НМХГ-ын улсын байцаагч Батхүү хэмээх жижиг түшмэлийг ээрч цаадах нь тэр барилгын барьж байгаа “Богд Ар” компанийн захирлыг урьж нүүр нүүрээ харж байгаад бичиг гардуулна гэж амаллаа. Гэтэл “Богд ар” бол зөвхөн гүйцэтгэгч билээ. Тэгэхлээр уг газрын эзэн “Зүүн Ази компани хөгжил” компанийн газрыг буцааж авах аргаа олохгүй баларч байгаа бололтой. 

Үнэхээр тийм үү? Газрын зөвшөөрлийг цуцалсан захирамжийн биелэлт 14 хоног саатсанд хэн буруутай вэ? Үүрэг буулгасан албан тушаалтнууддаа хариуцлага тооцохгүй юм уу? Барилгын ажил үргэлжилсээр байх юм бол нөхөн төлбөр өдөрт л сая сая саяар нэмэгдэж байгааг мэдэж байгаа юу? Эсвэл буулгах  аргагүй болтол бариулаад “Одоо өнгөрсөөн. Хүний өмчид халдаж болохгүй” аргаа  хэрэглэх гээд байна уу? гэх мэт асуултын хариуг зөвхөн Билэгт дарга өөрөө өгч чадна. 

Харамсалтай нь “Монголын мэдээ” агентлагийн сурвалжлагч энэ өдөр Билэгт даргыг өдөржин дагасан мөртлөө асууж зүрхэлсэнгүй. Үүний оронд түүнийг Баруун тасганы гэр хорооллыг барилгажуулах төслийн хүрээнд нэг байшин босгож байгаатай танилцсан, бас орчны газраа баталгаажуулж авсан СӨХ-өөр орж “Хотын Засаг дарга СӨХ-ийн дээд зөвлөлтэй гэрээ байгуулснаар орон сууцны дэргэдэх газрууд аврагдсан” талаар бахдан үзүүллээ. Дагалдаж явсан Нийслэлийн газрын албаны дарга Сундуйгаас ч асуусангүй. 

Билэгт дарга өрөөнөөсөө гарч, нийслэлийнхээ гадаа гандаж хөдөө хөхрөх энэ шоу 3 хоног үргэлжилнэ. Үлдсэн хоёр хоногт Билэгт дарга гэнэт зориг орж 15-р хорооллын тэр барилгын талбай дээр очиж захирамжаа өөрийн биеэр гардуулбал сайхан аа. Гэхдээ түүнийг очсон очоогүй хоёр хоног дагаж амнаас нь юу унахыг уралдан шүүрэх хэвлэл мэдээллийнхэн дундаас зориг гаргаж Билэгт даргаас шууд асууж хариу авч чадах сэтгүүлч олдох болов уу? Хэрвээ хариулахгүй зугатаад байвал эрэн сурвалжлаад үзээсэй. Гэхдээ “Монголын мэдээ” агентлаг шиг Билэгтийн бичиг хаана явааг 14 хоног хайж зарлаг хийхгүй юм шүү.   

Дуусаж өгөхгүй байгаа орон нутгийн сонгуульд зориулж Билэгт даргын дэглэсэн энэ жүжгийг дуусгах цаг болсон.

Posted in + ТЕЛЕВИЗ, Монголын Үндэсний Олон Нийтийн Телевиз, Нийтлэл, нэвтрүүлэг | 1 Comment »

UBS-ийн хоёр нүүр

Posted by Бид on 2008/10/18

Баянгол дүүрэгт Төмөр замын арктай шар гэж 9 давхар содон орон сууц бий. Социализмын төгсгөлд орос ах нар Энх тайвны өргөн чөлөө рүү харуулж нүүрэн талдаа хэдэн мод, цэцгийн мандал, амарч суух санал бүхий гурвалжин талбайтайгаар барьж үлдээсэн билээ. Тэрүүхэндээ үзэмжтэй. 

Гэтэл энэ жаахан зай 2003 онд тэр үеийн нийслэлийн Засаг дарга бөгөөд Улаанбаатар хотын захирагч, одоогийн шадар сайд М.Энхболдод хүнийх учраас илүү харагдаж 16 давхар үйлчилгээний барилга босгохыг  “Халиун толгой” нэртэй компанид зөвшөөрсөн захирамж гаргажээ. Үүнээс хойш цонхоо таглуулж СӨХ-ийн мэдлийн талбайгаа булаалгахыг хүсээгүй оршин суугчид 5 дахь жилдээ тэмцэж байна. 

Иймэрхүү тохиолдолд ганц аврал нь тэдний сонгосон эрхэм гишүүд, Засаг дарга нар биш харин шуурхай давхиж ирээд Засаг даргын сонорт хүргэж өгөх  телевиз болж таардаг. Хамгийн түрүүнд нийслэлийн UBS телевизэд ханддаг боловч “бид газрын маргаан сурвалжилдаггүй” гээд тоож ирсэн удаагүй. Энэ хооронд иргэд хэрүүл зарга хийсээр яваад Монголд байдаг хамаг хууль дүрмийг зөрчсөн М.Энхболдын захирамжийг дараачийн Засаг дарга Ц.Батбаяраар цуцлуулсан шийдвэрийг ноднин гаргуулж чадлаа. Гэвч “хуулийн дагуу” зөвшөөрөл авсан “Халиун толгой” давж заалдан түдгэлзүүлсэн ба “Авзага трэйд” хэмээх гүйцэтгэгч компанийн хүчээр оршин суугчдыг бульдозероор түрэн хөөж байгаад томоос том суурь ухаад авчээ. Тэгтэл оршин суугчдад аз таарч 2008 оны УИХ-ын сонгууль дөхөж нийслэлийн ерөнхий менежер Э.Мөнх-Очир тодрохоор шийдэн уг газар дээр “25-р суваг” телевизийг дагуулан очиж “энд яасан ч бариулахгүй” гэж камерийн өмнө амлаад удалгүй нийслэлийн Засаг дарга Т.Билэгтийн сонгуулийн шоугаар цуцалсан 4 захирамжийн тоонд багтаав. Удалгүй дахин аз тохиож орон нутгийн сонгууль дөхөж түүнд нэр дэвшингээ иргэддээ хайр зарласан Баянгол дуургийн Засаг дарга ухсан нүхийг булуулахаар хэдэн машин шороо авчран буулгуулжээ… 

Гэнэт 10-р сарын 4-ны Бямба гаригийн өглөөний 9 цагийн үед нөгөө “газрын маргаан сурвалжилдагүй” UBS телевиз сэмхэн ирж сурвалжлаад буцжээ. (Амралтын өдрийн өглөө эрт шүү! Газрын маргаан болгоныг ингэж шуурхай сурвалжилдаг бол сайхнаа!). Оршин суугчид сүүлчийн мөчид мэдэж уулзахаар очсон боловч зутгаад явчихаж. 

Тэр оройн City News мэдээллийн хөтөбөрөөр дараах сурвалжлага үзүүлж Ням гаригийн өглөө давтсан байна. Яриаг нь сийрүүлье. 

Сурвалжлагч: 

… шөнө дөлөөр машин машинаар нь шороо асгаж тэдний үйл ажиллагааг доголдуулсан байна. Та бүхний харж байгаа энэ газар 2 жилийн өмнө зарласан тендерт ялалт байгуулан “Халиун толгой” компани авчээ. Энэ компанийнхан авсан газартаа үйлчилгээний төв барин доод давхартаа мөсөн каток байгуулахаар төлөвлөж “Авзага трэйд” компанитай гэрээ байгуулан гүйцэтгэгчээ олсон байна. Ингээд өнөөдрийг хүртэл хугацаанд бэлтгэлээ базаан 800 сая төгрөгийн хөрөнгө оруулалтыг хийжээ. Гэтэл өнгөрсөн шөнө хэн нь үл мэдэгдэх хүмүүс ирээд засаж янзалсан талбайд нь хэдэн машин шороо асгасан байна. Тэд иргэдээс ирсэн гомдлын мөрөөр энэ газрыг бөглөж байна гэж хариулсан байх юм. Өмнө нь сонгуулийн үеэр мөн ийм явдал болж байсан бөгөөд тухайн үед нь болон өмнө шат шатны шүүхийн байгууллагад хандаж холбогдох шийдвэр тогтоолуудыг гаргуулсан юм байна. Энэ баримт бичиг одоо ч өөрсдөд нь байдаг бөгөөд энэ газар бол “Халиун толгой” компанийх гэдгийг батлах юм. Шөнө дөлөөр ирсэн хүмүүс харуулуудыг нь үл тоон хашаа хороог нь эвдсэн байлаа. 

Манаач: 

Цагдаа өөрөө ирчихээд [ойлгомжгүй] бид нарыг өмөөрсөн юм  байхгүй, харин машин зохицуулаад тэр энэ гээд эдний талд байгаа байхгүй юу … 

“Халиун толгой” компанийн хуулийн зөвлөх Цэрэндорж: 

Гол хор уршиг нь бүтээн байгуулалтын үйл ажиллагааг хийж байж Монгол улс хөгжинө. Хэний мөнгөөр буулгаж байгаа шороо юм. Энэ чинь татвар төлөгчдийн мөнгөөр хөлсөлж авчраад татвар төлөгчдийн мөнгөөр буулгаж байгаа шороо. Тэгэхлээр яагаад Улаанбаатар хотын хөгжлийн эсрэг ийм асуудал хийгээд байгаа юм. Газрын албаныхан өөрсдөө хуулиа зөрчиж байна гэж би үзэж байна. Тийм учраас цаашдаа бид нар нэгэнт энэ асуудлыг бид хохирлоо нэхэмжилнэ. Албан ёсоор шүүхийн шийдвэр гарсан. Дахиж бид нар хохирлоо нэхэмжилж шүүхэд хандана. Ийм бодолтой байгаа..

Хэрвээ энд бүтээн байгуулалтын ажил хийгдэж дуусвал оршин суугчид 24 цагийн туршид чөлөөт цагаа өнгөрүүлэх талбайтай болно. Гэтэл иргэдийн нэрийг барьж хуулийн гадуур ажиллахаа болих хэрэгтэй гэдгийг хэлж байна. Мэдээллийг Шинэбаяр, Баттуяа нар хүргэлээ

Энэхүү  сурвалжлагын зорилго тодорхой. “Халиун толгой” компани ухсан нүхэндээ 800 сая төгрөгийг хөрөнгө оруулалт хийсэн, энд бариулахгүй бол нэхэмжилнэ шүү гэж шантаажилж байгаа хэрэг. Иймээс татвар төлөгчдийн мөнгөнд “санаа зовжээ”. Үүний тулд UBS телевизийг хөлсөлж авчээ. Захиалгыг гардан гүйцэтгэсэн сурвалжлагч Шинэбаяр оршин суугчдаас зугатаах нь аргагүй. Тэгээд энэ жижигхэн талбайд 16 давхар барилгаас гадна оршин суугчдийг 24 цаг тоглуулах мөсөн гулгуурын талбай байгуулах тухай үлгэр ярьж өгсөн байна. 

Сурвалжлагыг үзсэн иргэд бухимдаж Ням гаригт UBS телевиз  рүү очиход уулзах хүн олдоогүй ба Даваа гаригт дахин очиход мэдээллийн албаны дарга Отгонжаргал нь “Сурвалжлагч Шинэбаяр хөдөө ажлаар явсан (нийслэлийн телевизийн сурвалжлагч хөдөөг сурвалжилж гэнэ) гээд уулзуулаагүй тул энэхүү маргаантай холбоотой хамаг материалаа үлдээж, бас араас нь хэдэнтээ нэхсэний хүчинд 13-ны Даваа гаригт сурвалжлуулжээ. Тэр оройдоо гарсангүй. Асуухлаар “Нийслэлийн захирагчийн ажлын албанаас асууж байж болно” гэсэн аж. Нэхээд л байж. 

Ингээд 16-ны Пүрэв гаригт оршин суугчдын байр суурийг илэрхийлсэн, гэхдээ ямар нэгэн албан тушаалтныг нэрлээгүй, тэр ч бүү хэл сурвалжлагчийнхаа нэрийг ч дурдаагүй сурвалжлага үзүүлэв. За яахав, ингээд хоёр талын байр суурийг нэг нэг удаа үзүүлж 1:1-ээр тэнцүүллээ гэж хэлж болох уу? Үгүй. 

Яагаад? 

Хэрвээ “Халиун толгой” компанийн захиалгат сурвалжлагыг Бямба гаригийн үдэш оргил цагаар “City news”-ээрээ үзүүлсэн бол оршин суугчдынхыг Пүрэв гаригт өдрийн 14 цагаас гаргаж UBS2 хэмээх кабелийн сувгаар 16 цагт давтжээ. 

Иргэд яах гэж телевизэд ханддаг вэ? Гуйгаад гуйгаад ирж өгдөггүй эрх мэдэлтэй дарга, албан тушаалтнуудын нүдэнд өртөж чихэнд сонсогдох гэж. 14 ба 16 цагийн мэдээг ямар ч дарга хэзээ ч үзэхгүй, яагаад гэвэл дараачийн тоглоомын талбайг булаах шийдвэрээ үйлдээд ажил дээрээ сууж байдаг цаг. Тэгэхлээр барилгын компанид дээрэлхүүлж аргаа барсан оршин суугчдыг UBS телевиз элэг барьж даапаалсан байна.

Posted in + ТЕЛЕВИЗ, Нийтлэл, нэвтрүүлэг, UBS телевиз | Leave a Comment »

15-р хорооллын хөл бөмбөгийн талбай баяртай!

Posted by Бид on 2008/10/17

Нийслэлийн төв хэсэгт азаар үлдэж хоцорсон хамгийн сүүлчийн спортын талбай болох 15-р хороолол дахь “Найрамдал” хөл бөмбөгийн талбайг хэрхэн авч үлдэх талаар өчигдөр орой “Ийгл” телевиз 1 цаг 30 минутийн шууд хэлэлцүүлэг зохион байгуулж өөрийн хоёр, “25-р суваг”-ийн Дөлгөөн, C1 телевизийн Бадрал, “Таван цагираг” сонины Түмэнбаяр, хөл бөмбөг тайлбарлагч Батзаяа нарын спортын сэтгүүлчид, “үүргэвчтэй аялагч” Ц.Ганхүү, Биеийн тамир спортын улсын хороо (БТСУХ)-ны хоёр түшмэл, тэгээд уг талбай дээр барилга барьж эхэлсэн монгол-хятадын “Зүүн Ази хөгжил” компанийн монгол талын захирал Доржрагчааг оролцуулав.

Компанийн захирал шууд л мэдэгдэв: Бид энэ газрын зөвшөөрлийг хууль журмын дагуу авч, зураг төслөө хотын ерөнхий архитектороор батлуулаад орон сууцны хороолол барьж эхэлсэн. Бид заавал барьж дуусгана. Харин хөл бөмбөгийг өөр газарт тоглож болно. Хаана ч юм өөр талбай барихад тусалж болох юм…

Тийм ээ, бүх зүйл дууссан. Одоо энэ талбайг үгүй болсонд тооц. Нэгэнт нийслэлийн Засаг дарга гарын үсгээ зураад олгосон бол одоо хэн ч зогсоохгүй. Шүүхээр заргалдаад ч нэмэргүй. Ярилцлагын дундуур үзүүлсэн сурвалжлагаас үзэхэд баахан хятадууд хэд хэдэн суурь ухаж эхний давхруудын каркасыг цутгасан харагдана. Хэрвээ хотын шинэ дарга барилгын ажлыг зогсоож буулгах шийдвэр гаргавал хөрөнгө оруулагч хятадууд газарт булсан хэдэн төгрөгөө хэдэн арав, зуун тэрбум гэж хэлээд түүнийгээ хэд үржүүлж нийслэл хотоос нэхэмжилнэ. Энд барилга барих зөвшөөрөл өгсөн нийслэлийн Засаг дарга асан, одоо УИХ-ын гишүүн Ц.Батбаяр яах ч үгүй. Манайд төрийн албан хаагчийн буруутай үйлдлээс болж учирсан хохирлыг төр хариуцах үүрэгтэй. Гэтэл илүүдээ гарсан мөнгө нийслэлд байхгүй. Ярилцлагад оролцсон сэтгүүлчид маргаашнаас нийслэлийн Засаг дарга Т.Билэгтэд шаардлага, дараа долоо хоногт Ерөнхийлөгч Н.Энхбаярт өргөх бичиг барих юм гэсэн. Нэмэргүй ээ.

Тэд сайндаа л хотын хаа нэгтээ орчин үеийн хиймэл зүлэгтэй хөл бөмбөгийн талбай барьж өгөх гоё шоу эхлүүлнэ. Нэгэнт улс орон хөгжиж хөрөнгө мөнгө цутгаж байгаа болохоор энэ байтугай гоё стадион барих биз. Гагцхүү энэ хооронд ид гүйж харайх насандаа яваа хүүхэд залуучууд хичээл номоо тараад гэрийнхээ хажууханд аав ээжийн нүдэнд дээр тоглож наадахгүй, хөл бөмбөг, хоккейн тэмцээнд оролцохгүй, хөгжөөн дэмжиж шуугилдахгүй өнгөрч байгаа юм. Бас 15-р хорооллын болоод ялангуяа эргэн тойрны хэдэн орон сууцны оршин суугчдын амьдрах орчин илт муудаж хичнээн цонх таглагдаж нар үзэхээ болихыг огт ярихгүй байна.

Ярилцлагад оролцсон БТСУХ-ны Зоригтбаатар нэртэй түшмэл хэлэхдээ, БТСУХ бол Засгийн газрын хэрэгжүүлэгч агентлаг, та нар агентлагын хуулийг унших хэрэгтэй, газрын маргаан дээр очдог байгууллага биш гэж баахан даналзсанаа спорт бол бүх нийтийн үйл хэрэг, та нар зурагтаар дандаа гоол оноо ярьдаг, ард түмний эрүүл мэнд ярьдаггүй, мэргэжлийн хяналтын байгууллагад яагаад хандаагүй юм бэ гэж сэтгүүлчдийг загнав. Хачин юм болохнээ. Нийслэл хотынх нь спортын хамаг талбайг барилгын компаниуд эрх мэдэлтнүүдтэй хуйвалдан арваад жилийн турш булааж байхад ганц удаа ган хийгээгүй, тэр яриад байгаа мэргэжлийн хяналт руугаа ганц хуудас бичиг явуулаагүй, хэвлэлийн хурал  зарлаж сэтгүүлчдэд хандаж үзээгүй биеийн тамир, спортын байгууллага дэлхийд нэг байдаг аж. Бид ёстой л “азтай монголчууд” юм даа.

“Ийгл”-ийн сэтгүүлч Төрийн ордон дотроос Ц.Батбаяр гишүүнийг хайж олоод “15-р хорооллын биеийн тамирын талбайн газрыг олгох шийдвэрийг та үзэглэжээ. Ямар тайлбар хийх вэ?” гэж асуухад “Би олон шийдвэр дээр гарын үсэг зурсан болохоор санахгүй байна. Бодвол нэг байгууллагаас нөгөөд шилжүүлсэн газар биз” гэсэн утгатай хариу барьж бултах аргаа хэдийнэ олчихсон байна лээ.

15-р хорооллын хөл хөлбөмбөгийн талбайг тойрсон маргаан бол үнэн хэрэгтээ нийслэлийн Засаг дарга нар нийслэлийн иргэдийн эрх ашгийг нулимж гаргасан олон шийдвэрийн нэг, цаашилбал түүний мэдэж хариуцдаг хот төлөвлөлт хэрхэн дампуурсан тухай асуудал юм. Ц.Ганхүү “Бид буруу хүмүүсээ авчирсан байна. Шийдвэр гаргасан тэр хүмүүсаас асуух хэрэгтэй. Цөмөөрөө хотын захиргаан дээр очъё” гэж уриалсан нь зөв хаяг юм. Нийслэлийн төвийн хамгийн сүүлчийн биеийн тамирын талбайг ерөнхий төлөвлөгөөнөөс хэн хэзээ арчиж хаясан, үүнийг Засаг дарга яагаад зогсоогоогүй зөвшөөрөл олгосон, цаашилбал уг талбайг анх эзэмшиж байгаад сэмхэн худалдсан МҮЭ-үүдийн холбооны удирдлага (бодвол тэр үеийн ерөнхийлөгч Д.Содномдорж), цааш нь 1,5 сая доллараар дамлан худалдсан гэгдээд байгаа “Эрин интернэйшнл” нэртэй компанийн эзэд чухам юу үйлдсэн, ингэхдээ бие биедээ хэрхэн тус хүргэж ямар хариу барьсныг илчлэхээс нааш юу ч өөрчлөгдөхгүй.

Нийслэлийн дарга нар хотын нийтийн өмч хөрөнгө, газрын асуудлыг шийдэхдээ иргэд, оршин суугчдаас хэзээ ч асуудаггүй нь өнгөрсөн жилүүдэд батлагдсан аксиом билээ. Ярилцлагын үеэр орос 3-р сургууль, монгол 6, 31, 20-р сургуулийн биеийн тамирын талбайнууд хэрхэн өндөр барилгад эзлэгдсэн 4 жишээг үзүүлсэн. Өнгөрсөн жилүүдэд нийтийн эзэмшлийн газруудыг хаа сайгүй ингэж “хуулийн дагуу” булаажээ. Хамгийн тод жишээ бол хүүхдийн тоглоомын талбайн булаалт. Тухай бүр газрын маргаан дэгдэж иргэд барилгын компаниудтай тулгарч зодоон цохиондоо хүрснийг телевизийн дэлгэцээр үзээд тэр зөвшөөрлийг олгосон хотын дарга нарын хөх инээд нь хүрч суудаг биз. Яагаад гэвэл тэд “хуулийн дагуу” олгосон. Иймээс барилгын компаниуд заавал ялдаг.

Энэ удаад ч тэгнэ.

Posted in + ТЕЛЕВИЗ, Ийгл телевиз, Нийтлэл, нэвтрүүлэг | Leave a Comment »

Онц байдлын хий үзэгдэл

Posted by Бид on 2008/08/31

МҮОНТ-ын “Ярилцъя” шууд ярилцлагын хөтөлбөр УИХ-ын сонгуулийн дараа хоёр сар “амраад” энэ Бямба гаригаас дахин явж эхэллээ.

Эхлээд суваг солиход УИХ-ын гишүүн З.Энхболд улс төрийн нөхцөл байдлын талаар ярьж дуусаад намын хурал руугаа яаран одов.

Дараа нь Усны хэрэг эрхлэх газрын хэлтсийн дарга оролцож Монгол оронд усны асуудал ямар байгаа талаар ярилаа. Мэдээж Туул голын нэр дурдагдсан.  Тэгсэн мөртлөө сүүлийн саруудад Туулын ундны усны эх үүсвэрийн бүсэд халдсан хамгийн ноцтой жишээ – Гачууртад байгуулж эхэлсэн гольфийн талбай асуудал юу болсныг таг дуугүй өнгөрөөв. Уг нь энэ дарга тэнд оччихсон, хууль зөрчсөн үйлдэл байна гэж мэдэгдээд зогсож байсансан. Хөтлөгч Мөнхтөр ч асуусангүй. Тэгснээ дэлхийн ундсны усны хомсдлын талаар  санаа зовинон ярилцсаар өндөрлөв. Ёстой л нөгөө “хүн төрөлхтнийг хайрлах нь хөршөө хайрлахаас амархан” гэж үнэн аж.

Дараа нь 7-р сарын 1-ны үйл явдлын дараах онц байдлын үеэр 4 хүнийг буудаж алсанд сэжиглэгдэн Ганц худагт хоригдож байгаа цагдаагийн ажилтнуудын өмнөөс өдөр алгасалгүй үед жагсаал цуглаан зохиож хэвлэлийн бага хурал зарлан телевизийн  дэлгэцээс салахаа больсон Алтангэрэл болон цагдаагийн чөлөөнд гарсан хурандаа Билгээ хоёр уригдан оролцлоо. Дэлгэцийн дор “Төрийн цагдаа” гээд их л учиртай биччихэж.  Цагдаа хүмүүсийг буудаж алсан эсэх тухай ярьж байхад шүү.

Бусад телевизийн сурвалжлагч охид, хөвгүүд сайн ухахгүй байгаа учраас урьд нь цагдаагийн ажилтан байсан энэ Алтангэрэл  улам оодорч хоригдсон цагдаа нарын ар гэрийнхныг ашиглан “цагдаа ажил хаяна”, “өлсгөлөн зарлана” гэх мэтээр сүрдүүлэх болсон билээ. Хашир сэтгүүлч Мөнхтер оновтой асуулт тавьж хандыг нь дарах болов уу гэтэл үгүй аж. Наад Алтангэрэл чинь юуг мушгин гуйвуулж байгааг ойлгохгүй байна уу? Ерөнхийлөгчийн гаргасан, УИХ-аас баталгаажуулсан Онц байдлын тухай зарлигийг ёсчлон биелүүлж төрийн төлөө үүргээ гүйцэтгэснийхээ төлөө төлөө шоронд хоригдоод байна гэж Алтангэрэл дахин худал заллаа. Тэр есөн цагдааг үүний төлөө бус, харин дөрвөн хүн буудуулж амиа алдсантай холбогдуулан шалгаж байгаа бус уу?  Нийслэлд эмх журмыг сахиулах үүрэгтэй мөртлөө хөдөөгүүр нэг тарчихсан байсан тэдгээр цагдааг авчирч хорьсон нь ялласан хэрэг огт биш, харин төрийн цагдаа нарт халдаж МАХН-ын байрыг шатаасантай холбогдуулан Ганц худагт хорьсон 180-аад хүний нэгэн адил зөвхөн сэжиглэн шалгаж байгаа хэрэг билээ. Ийм энгийн зүйлийг хөтлөгч асуухыг хүсээгүй учраас цаадуулын ам халж, тухайлбал Билгээ хурандаа “прокурорын байгууллага цагдаа руу халдаж байна, ямар нэгэн нам хүчний захиалга юм шиг байна, ингэснээр хүчний байгууллагуудын нягт хамтын ажиллагаанд ан цав суулгалаа, тэгэж ярих юм бол цагдаагийнхан хэв журам сахиулахдаа дарга нь хэлсэн хэлээгүй буугаа авч гараад буудах эрхтэй байсан, тэгээд буудсан биз хэмээн хадуурав. Хөтлөгч Мөнхтөр түүнд Онц байдлын үеэр галт зэвсэг хэрэглэхийг Ерөнхийлөгч хатуу хориглосон тухай сануулах болов уу гэтэл үгүй, харин ч “цагдаагийн 500 албан хаагч бэртэж гэмтсэн бол энгийн иргэдээс дөнгөж 12 хүн гэмтсэн …гадаадад бол цагдаа нарт гар хүрвэл шууд бууддаг” маягийн юм ярьж улам хөөргөж байх юм.

Сүүлийн өдрүүдэд МҮОНТ-ээр Ганц худагт хоригдсон цагдаа нарын ар гэрийнхний зовлон дээр дөрөөлсөн Алтангэрэл нарыг илт дэмжиж “Цагийн хүрд”-ээрээ байнга сурталчилж өгч байгаа төдийгүй хэд хоногийн өмнө 7-р сарын 1-ны жагсаал цуглаан ямар ямар хууль зөрчсөн тухай нэр хаяггүй нэвтрүүлгийг хулгайгаар үзүүлсэн билээ.

2008 оны 7-р сарын 1-4-ны Онц байдлын хий үзэгдэл МҮОНТ-ээр тэнүүчилсээр байх шиг. Бүтэн хоёр сар өнгөрөөд байхад тэрхүү үйл явдлын учир шалтгааныг эрэн сурвалжилж талуудын байр суурийг харуулсан нэвтрүүлэг ганцыг ч хийсэнгүй. Арай штабаас Сайнжаргал хурандаагийн зөвшөөрөл хүлээж өдий хүргээгүй байлтай…

Posted in 2008.07.01, Монголын Үндэсний Олон Нийтийн Телевиз, Нийтлэл, нэвтрүүлэг | 1 Comment »

Монгол башё-гийн өмнөх газар хөдлөлт

Posted by Бид on 2008/08/27

Өнөө өглөө Байгаль нуурын орчимд 6 баллын нэлээд хүчтэй газар хөтлөлт болжээ. Тэр нь 9.35-ын үед Улаанбаатар хотод хүрч доргиогоод авлаа. Зарим өндөр барилгад чичрэлт мэдэгдэж ширээ сандал хөдөлсөн тул хүмүүс гудамжинд гарч хүлээзнэсэн байна.

Хэвлэл мэдээллээс энэхүү газар хөдлөлтийн талаар хамгийн түрүүнд МҮОНТ 11 цагийн мэдээгээрээ дуулгаж дүрсгүй цагаан мэдээ уншиж сонсгов. Бусад телевизүүд Монгол башё-г шууд дамжуулахад бэлтгээд завгүй байсан бололтой ямар нэгэн мэдээ гаргасангүй.

Үйл явдлыг хамгийн шуурхай мэдээлж чадах нь вэб сайтууд билээ. Эхлээд 10 цаг 02 минутад http://www.news.mn сайт маш товч мэдээлээд 11 цаг 06 минутад Онцгой байдлын ерөнхий газраас тайлбар авч тавьсан байна. Орос зүгт Булган Сэлэнгэд, нийслэлийн баруун дүүргүүдэд илүү мэдрэгдсэн гэнэ. Тэгвэл http://www.olloo.mn сайт 10 цаг 31 минутад энэ тухай товч мэдээг Байгаль нуурын газрын зурагтай тавьжээ. Улаанбаатарт эвдрэл хохирол гараагүй, нэмж чичрээгүй болохоор сайтууд дахин сонирхсонгүй.

Харин телевизүүд “Монгол баше” руу хандаж МҮОНТ, TV5, TV9, 25-р суваг, бас сумо “сонирхдоггүй” Ийгл шууд дамжуулан үзүүлэв. Зөвхөн башё дууссаны дараа 17 цагаас C1 телевиз газарт хөдлөлтийн талаар анхны дэлгэрэнгүй сурвлжлага үзүүлж араас бусад телевизүүд залган авлаа.

Posted in ИНТЕРНЭТ, ХАРИЛЦАА ХОЛБОО, Монголын Үндэсний Олон Нийтийн Телевиз, Нийтлэл, нэвтрүүлэг | Leave a Comment »

Tuul River Countryside компани TV9 ба “25-р суваг” телевизийг амархан буулгаж авлаа

Posted by Бид on 2008/07/31

Гачууртад Туулын эрэг дээр  Улаанбаатар хотын ундны усны бүсэд гольфийн талбай байгуулахаар наадмын өдрүүдийг угтуулан эксковатораар газар хагалж эхэлснийг нутгийн иргэд хармагцаа очиж эсэргүүцсэн төдийгүй телевиз дуудаж сурвалжлуулсан тэр маргаан нийслэлд урьд нь гарч байсан бүх маргааны нэгэн адил дуусч байх шиг. Товчоор хэлбэл, компаниуд дийлдгээрээ дийлж, иргэд ялагддагаараа ялагдаж, гагцхүү зөвшөөрөл өгсөн дарга нар огт цухуйхгүй үлдэж байна.

Энэ маргааныг хамгийн сайн сурвалжилсан нь TV9 телевиз. Сэтгүүлч Отгонжаргал нутгийн иргэдтэй хамт хамгаалалтын албаныхантай үзэлцэж, ажилчидтай хөөцөлдөж, зөвшөөрөл олгосон Баянзүрх дүүргийн Засаг дарга асан, одоо  УИХ-ын гишүүн Э.Мөнх-Очирын хаягаар хатуу үг хэлж, улмаар мэргэжлийн хяналтынхан болон БОЯ-наас хүн аваачиж тэнд гольфийн талбай барих нь хууль зөрчсөн болохыг хэлүүлж барилгын ажлыг зогсоох ам шийдвэр гаргуулж иргэдтэй хамт баярлаж байв.

Харин  өнөөдөр тэр гольфийн талбайг барьж байгаа Tuul River Countryside компанийн дэд захирал эмэгтэйтэй ярилцлага хийснээ үзүүллээ. Олон хоног олдохгүй байсан компанийн төлөөлөл (жинхэнэ эзэд нь тодорхойгүй үлдсэн ч) ийнхүү дэлгэцийн өмнө  гарч  ирсэн нь өөрсдөө хүссэнийх. Цаад эзэд нь тийм команд өгчээ. Ингээд бүх зөвшөөрлийг хуулийн дагуу авсан, Улаанбаатар хотын газар зохион  байгуулалтын төлөвлөгөөнд тусгагдаж ИТХ-аар баталсан учраас Мөнх-Очир дарга зөвшөөрөл олгосон, Туул голд ямар  ч хор нөлөөгүй, ажлын байр олноор бий болно, Гачуурт тосгоныхныг ажилд авна гэсэн тайлбарууд урсав. Сэтгүүлч маань түүний аманд бүрэн багтаж “зөвшөөрөлтэй юм байна” гэж хүлээн зөвшөөрөн бууж өглөө. Түүнд өөр мэдээлэл, хөндлөнгийн тайлбар, эрэн сурвалжилсан баримт дутаж байгаа нь илт.

Орой “25-р суваг телевиз” бас энэ талаар сурвалжлага үзүүлэв. Гольфийн талбайг бариулахгүй гэсэн иргэдийн байр суурийг сэтгүүлч Оюунбат үзэгчдэд  дэлгэрэнгүй сонсгов. “Зөвшөөрөл олгосон дарга нар лав монгол хүн биш” гэж зарим иргэд бухимдана. Энэхүү сурвалжлагын араас “хоёр талын байр суурийг тэнцвэртэй үзүүлэх үүргээ биелүүлж” гэсэн тодотголтойгоор нөгөө  Tuul River Countryside-ийн дэд захиралтай ярилцав. “Гацууртынханд ажлын байр олон гарна, одоо хэлмэрч, хөтөч, туслах ажилчин хэрэг болно” гээд нөгөөдөхөө амлав. Гацууртынхан бүгд гадаад хэлтэй учраас хэлмэрчийн ажилд орж тайвшрах юм байна л даа. Бас гольфийн талбай байгуулахыг хориглохоо камерийн өмнө амалж байсан мэргэжлийн хяналтын байцаагч Оюунчимэг “зөвшөөрөлтэй юм байна, арга алга” гэснээ байгаль орчны үнэлгээгээр “Туул голд үзүүлэх нөлөө дунд зэрэг” гэж хэлснийг харуулав. Гэхдээ ярилцлага авсан сурвалжлагч Ганзориг энэ мэт асуулт тавиагүй. Учир нь  тэрбээр саяын сонгуулиар Э.Мөнх-Очирын сурталчилгааны сэтгүүлчээр ажилласан билээ.

Tuul River Countryside компани TV9 ба “25-р суваг” телевизийг дуудаж ганц ярилцлага өгөөд амыг  нь хялбархан таглачих шиг боллоо. Одоо Гачууртын иргэд телевиз дуудвал энэ хоёр телевиз очихгүй, элдэв шалтаг хэлнэ…

Posted in + ТЕЛЕВИЗ, 25-р суваг телевиз, Нийтлэл, нэвтрүүлэг, TV9 телевиз | 2 Comments »

Шангри-Ла-гийн тухай баярын сурвалжлага эгшиглэв

Posted by Бид on 2008/07/31

MCS групп компани Сүхбаатарын талбайн зүүн урд босгоод дуусч буй офисийнхоо  урдах цэцэрлэгийг сэргээж эмнэг булгиулж байгаа хүүхдийн баримлыг шилжүүлэн усан оргилууртай болгосноо албан ёсоор зарласан хэвлэлийн хурал бүх телевизээр гарч байна. Зарим телевиз сурвалжлагаа шуудхан “бизнес мэдээ”-гээр нэрлэсэн бол олон нийтийн телевиз бүр баярын магтуу эгшиглүүлэн ер бусын хүндэтгэлтэйгээр үзүүлэв. “Цагийн хүрд” мэдээллийн хөтөлбөрийн дугаар бүрт заавал 1-2 төлбөртэй сурвалжлагыг сэмхэн багтаадаг, нэг нь энэ бололтой.

Хорвоод хосгүй Шангри-Ла зочид буудал хэмээх 16 давхар залилангаа MCS-ийнхэн хэвлэл мэдээллийг хөлслөн гүйцэлдүүлсэн, одоо нэгэнт барьчихсан хойноо даапаалан зарлаж, одоо бүр хаана газар авч юу хийхээ дур мэдэн шийдэж байгааг сэтгүүлчид асууж ч зүрхлэхгүй суужээ.

Энэ аргагүй. Анх 2003-2004 оны үед Сүхбаатарын талбайн хаяанд өндөр цамхан барилга босгох сураг дуулаад олон нийт дургүйцэж эхэлмэгц MCS-ийнхэн монголын хамаг хэвлэл мэдээллийг худалдан авч бөөн бөөнөөр нь ээлж дараалан Хонконг руу айлчлуулснаар Шангри-Ла хэмээх газрын диваажинг яг энд бушуухан барихгүй л бол наанадаж Улаанбаатар хот, цаанадаж Монгол орны хөгжил цэцэглэлт бүрэн зогсоно гэдэгт монголчууд сэнхэрч нам дарагдсан билээ. Гэтэл өнөөдөр Шангри-Ла зочид биш, томоос том офис сүндэрлэснийг юу гэх вэ?

Тэгтэл жинхэнэ Шангри-Ла зочид буудлаа Хүүхдийн парк буюу Үндэсний соёл, амралтын хүрээлэнгийн хажууд босгоно гэж зарлах нь тэр. Аль хэдийнэ сэмхэн аваад хашаалчихсан тэр газраа MCS группийн ерөнхийлөгч Ж.Од  “паркийн газар биш” хэмээн айлджээ. Харсаар байтал паркийн төмөр хашаан дотор байхад шүү!  Бас жинхэнэ Шангри-Лаг барихад эргэн тойронд арвин зай талбай хэрэгтэй гэнэ. Удалгүй хүүхдийн парк Шангри-Лагийн үүдний цэцэрлэг маягийн юм болж, хажууханд нь завилсан их Д.Нацагдорж буудлын үүд сахисаар үлдэж магадгүй. Яахав, тойруулаад хэдэн цэцэг тариад өгнө, дургүй хүргэвэл зайлуулсан ч чадна.

Хэвлэлийн хурлын үеэр MCS групп дархан цаазат Богд уулын Хүрхрээгийн амыг эзэмшихээр шийдсэн тухай “баяртай” мэдээ дуулгав. Хичнээн гоё цанын бааз барих тухай танилцуулгад уярсан телевизийнхэн  яагаад?  гэсэн асуулт тавих сөхөөгүй, хэдэн жилийн өмнө Шангри-Лаг магтсан шигээ оройжин сурталчилж өглөө.  Цанын баазын араас юу босохыг яг мэдэж байгаа юм уу? Нийслэлийн сая иргэний нүдэн дээр Шангри-Ла офис болж хувирчихаад байхад шүү!

Монголд MCS гэдэг компани юу хүснэ, монголын төр зөвхөн зөвшөөрөх үүрэгтэй болжээ. Нөгөө төрийн ил тод байдал, нийслэлийн хот төлөвлөлт, газрыг төсөл шалгаруулалт, дуудлага худалдаагаар олгох энэ тэр хаачив аа? Шангри-Ла-гийн газрыг хотын захиргаа, харин Богд уулыг БОАЖЯ мэдэх учиртай. Энэ удаад дархан цаазат уулын Хүрхрээгийн амыг яах талаар нийтэд зарлахгүй, ярьж хэлэлцэхгүй нууж байгаад MCS-ийн мэдэлд сэмээрхэн  өгчихчээ.

Posted in + ТЕЛЕВИЗ, Монголын Үндэсний Олон Нийтийн Телевиз, Нийтлэл, нэвтрүүлэг | Leave a Comment »

Балай хэвлэлийн хурлууд үргэлжилсээр. Гэхдээ сэтгүүлчид хаяж гарч сурч байна.

Posted by Бид on 2008/07/30

Өнөөдөр зурагтаар хэвлэлийн хурал хоёрыг бүрэн эхээр нь үзлээ. Сэтгэгдлээ хуваалцья.

Нэг.
“Чингэсийн Монгол төр” бүх ард түмний хөдөлгөөний гуншинтай гурав дөрвөн хүн ээлжит хэвлэлийн хурал-лекцээ “Монгол ньюс”-ийн мэдээллийн төвд сонсгов.  Араас нь хурал байгаагүй бололтой бүтэн цаг гаруйн турш монголын төр ямар муухай байгаа (үүнтэй санал нийлж болох юм) тухай ярьж, иймээс өчигдөр Сүхбаатарын талбай дээр 76 хүнтэй “жинхэнэ” парламент байгуулсан тухай зарлан тунхаглав. Дундуур нь Чингэсийн төр барих онол Монголыг аврана, Чингэс хааны дэлхийн академийн П.Даваанямыг Монголын Улсын Ерөнхийлөгч зөвлөхөөрөө ажиллуулах ёстой гэх мэтээр урсгалаа.

Тэд хэддэх удаагаа үүнийгээ лекцэлж байгааг бүү мэд, гагцхүү тэр онол, Давааням хоёр Монголыг чухам яаж аврахыг одоо хүртэл хэн ч ойлгоогүй билээ. Зарим сурвалжлагч энэ талаар асуухыг оролдсон нь тэднийг уурыг хүргэж “Бид бүтэн цаг яг энэ тухай яриад байхад “Ийгл” телевиз” биднийг тодорхой юм хэлээгүй гэсэн, би ч бас сэтгүүлч, ер нь та нар зүгээр л тэнцвэртэй мэдээл” гэж загнаснаар сэтгүүлчид дуугаа хураав.

Хурлын төгсгөлд “Өчигдөр сонгогдсон 76 элч хүрэлцэн ирсэн байна, эндхийн камер эргэж харуулдаггүй юм байна, иймээс та нар  өөрсдийгөө ард түмэндээ мэдүүлээдхээч” гэхэд танхим тэр чигээрээ уухайгаар дүүрлээ. “Монгол ньюс”-ийнхэн энэ “түүхэн” мөчийг ард түмэн заавал харах ёстой гэж үзсэн бололтой камераа анх удаа эргүүлэн харуулахад танхимд зөвхөн чингэсчүүд алгаа дэлгэн хурайлж зогсох ба бүх сэтгүүлч хаяад явчихсан байв.  

Тэр орой би нэг ч телевизээр энэ хурлын тухай сурвалжлагыг олж үзээгүй. (Нэмж хэлэхэд жинхэнэ парламентын даргаар П.Даваанямын ах нь сонгогдсон аж)

Хоёр.
Өөрийгөө Говийн хөгжлийг дэмжих төрийн бус байгууллагын төлөөлөл, бас Өмнөговь аймгийн Манлай сумын иргэн Х.Сугар гэж танилцуулсан нэгэн эрхэм хэвлэлийн бага хурал хийв. Төр гацсанаас болж говийнхон хохирч байна, тухайлбал, ноолуурыг нь 32 мянган төгрөгөөр авахгүй гацаад байна, үүний гол буруутан Ц.Элбэгдорж гээд өнгөрсөн 18 жилийн турш түүний үйлдсэн бүх нүглийг тоочсон илтгэл шахуу юмыг нэг амьсгаагаар уншлаа.

Асуулт, хариулт эхлэв. Эхний сэтгүүлч (“Монгол ньюс”-ийн мэдээллийн төвийн камер эргээгүй учраас чухам хэн болох нь харагдсангүй):

– Та аль намын гишүүн бэ? Та энэ хурлыг байгууллагаа төлөөлж хийж байна уу?
– Би МАХН-ын гишүүн. Би говийн ард иргэдийнхээ байр суурийг илэрхийлж байна… 

Дахиж асуулт гарсангүй. Тийм шаардлага ч байсангүй. Манай сэтгүүлчид иймэрхүү балай хурлыг ингэж тарааж цаг заваа хэмнэж сурч байгаа нь сайн хэрэг.

Орой нь хэд хэдэн телевиз энэ тухай сурвалжлага үзүүлэв. “25-р суваг” ба UBS телевизүүд Х.Сугарыг “говьчуудын төлөөлөл” гэж хөөргөсөн бол TV9 телевиз Ц.Элбэгдоржийн эсрэг дайралтыг хасч зөвхөн ноолуур сэлтийг ярьсан болгож харуулав. TV9 заримдаа Ерөнхийлөгч шиг “эв нэгдлийг сахих” юмаа.

Posted in + ТЕЛЕВИЗ, Нийтлэл, нэвтрүүлэг | Leave a Comment »

Монголын хэвлэл мэдээлэл С.Эрдэнээс айдаг…

Posted by Бид on 2008/07/26

Өдөр ТМ телевиз, орой TV5 телевизээр УИХ-ын сонгуульд Баянгол дүүрэгт нэр дэвшигч АН-ын С.Эрдэнийн булхайг илчилсэн нэвтрүүлэг үзүүллээ. Хөтөлбөрт ороогүй, гэнэт “хулгайгаар” үзүүлсэн тул эхлэлийг өнгөрүүлж нэрийг нь харж чадсангүй, гэхдээ дундуур нь “Эрүүгийн гэмт хэрэгтнүүд Монголын төрд тавтай морил” гэсэн үгс байн байн гарч байв. Төгсгөлд нь нэр хаяг алга, гэхдээ түүний өрсөлдөгч бөгөөд яг одоо зарга хийж байгаа Н.Баяртсайханы зүгээс болов уу.

Нэвтрүүлгээс үзэхэд С.Эрдэнэ хөгийн нөхөр юм байна. Нийгмийн даатгалын хөрөнгөөр ичгүүр сонжуургүй туйлж байгаа хориод баримтыг нэгд нэгэнгүй дэлгэж баримтаар нотолжээ. Эрүүгийн гэмт хэрэгтэн гэж зөв хэлжээ. Сонгуультай холбоотой жишээ гэвэл сурталчилгааныхаа хамаг материалыг нийгмийн даатгалын мөнгөөр хэвлүүлсэн хамгийн бага булхай. Өөрийн удирддаг УНДЕГ, түүний харьяа байгууллагаас 30 гаруй хүнийг өөрийн нэр дэвшсэн 25-р тойргийн хороодод томилон ажиллуулсан байх юм. Төрийн албан хаагчид үүнийг зөвшөөрсөн хэрэг үү? С.Эрдэнэ “орон сууцны дэмжлэг” нэрээр тус бүрт нь бэлэн мөнгө, заримд нь бүр арав гаруй сая төгрөгийг сонгуулийн өмнө гаргаж өгчээ. УНДЕГ-ын хөрөнгө оруулалт, тендер хариуцсан мэргэжилтэн Д.Үүрийнтуяа 25-р тойргийн хорооны нарийн бичгийн даргаар ажиллахдаа санал хураалтын дүнгийн протоколыг хуудсаар нь сольж үүнийгээ зөвтгөх гэж хэвлэлийн хурал хийж идэвхийлэн ажилласны учир нь С.Эрдэнийн удирдлага дор ажилладаг, дээрээс нь АН-ынх, түүнээс 14 сая төгрөгийн “орон сууцны дэмжлэг”, урьд нь 3 удаа орон сууц авсан гэнэ. Бас С.Эрдэнэтэй хамтран тендерийн мөнгө идэж суугаад гарсан нэгэн аж.

Өнгөрсөн 5-р сард С.Эрдэнийг Авлигатай тэмцэх газар шалгахаар өгсөн байхад АН түүнийг нэр дэвшүүлсэн байх юм.

Ийм хүнийг “эрүүгийн гэмт хэрэгтэн” гэж тодорхойлохоос өөр яахав. АН сонгуульд нэгэнт ялагдсан болохоор тун удалгүй С.Эрдэнэ албан тушаалаасаа хусагдана, араас нь түүний хамаг булхай сад тавина. Иймээс УИХ-д сонгогдож Занданшатар, Хүрэлсүх, Бадамжунай нар шиг халдашгүй эрхээр хамгаалагдахын тулд яахаас ч буцахгүй болжээ. 2006 онд “Ийгл”-ийн сэтгүүлч Батжав С.Эрдэнийн булхайн зах зухыг сөхөж эрэн сурвалжилж явсан ч түүнийг элдвээр дарамталж, бас Ийгл-ын америк эзэн монголын  “дотоод хэрэг”-т хэт их оролцохгүйгээр шашнаа сурталчилж суухыг илүүд үзэж Батжавыг АНУ руу цагаачлуулж намжаасан байдаг.

“Эрүүгийн гэмт хэрэгтнүүд Монголын төрд тавтай морил” нэвтрүүлгийн маргааш С.Эрдэнэ мөн АН-аас нэр дэвшигч Д.Нямхүү нарын хамт хэвлэлийн бага хурал хийлгэж сонгуулийн булхай, шударга ёс, ард түмний сонголт, СЕХ-ны дарга Баттулгын алдаа завхралын талаар баахан ярив. Гэтэл нэг ч сэтгүүлч С.Эрдэнээс “Үнэн үү” гэж асуугаагүйгээр барахгүй нэг ч асуулт тавьсангүй. 

Дээр дурдсан ноцтой баримтууд илэрч гараад байхад манай телевизүүдийн камерууд УНДЕГ-ын үүдэнд зоолттой, С.Эрдэнийг, Үүрийтуяа тэргүүтэй бусад 30-аад албан хаагчидтай нь хамт мөшгөөд салж өгөхгүй эрэн сурвалжилж баймаар санагдах юм.  Монголын хэвлэл мэдээлэл С.Эрдэнээс айдаг нь үнэн юм байна.

P.S: Хэд хоногийн өмнө УИХ-ын гишүүн Н.Баяртсайхан С.Эрдэнийн зарим булхайг илчилж хэвлэлийн хурал хийлгэснийг C1 телевиз үзүүлээгүй, харин С.Эрдэнэтэй өөртэй нь байн байн ярилцлага хийж байлаа. АН-ын дарга “Женко” Баттулгын телевиз нийслэлийн АН-ын дарга С.Эрдэнийн халаасанд элбэгхэн багтдаг.

Posted in Нийтлэл, нэвтрүүлэг | 1 Comment »

“Монгол ньюс”-ийн мэдээллийн төвд лекц, бөө гээд юм юм болж байна

Posted by Бид on 2008/07/15

“Чингэс хааны дэлхийн академи, “Чингэсийн Монгол төр” бүх ард түмний эвслээс Мөнх тэнгэрийн зарлигаар найман зууны дараа Монгол улс болон хүн төрөлхтний ирээдүйг аврагч элч-Чингэс хааны язгуур тодорсон тухай зарласан хэвлэлийн хурал өнөөдөр 11 цагаас “Монгол ньюс” мэдээллийн төвд болсныг “25-р суваг” телевизийн хоёрдугаар сувгаар үзүүлснийг үзлээ.

Хурлын эхнээс дуустал Чингэсийн Монгол төр фронтын удирдагч Д.Төмөрбаатар голлож, хааяа дагалдах хүмүүс (нэг нь  Даваанямтай төстэй, дүү нь бололтой)  нь залган авч ямар ч завсар гаргалгүйгээр тасралтгүй лекц уншиж түүндээ Монголын аврагчаар, өнөө цагийн  Чингэсээр тодорсон Чингэс хааны академийн тэргүүн П.Даваанямыг биширсээр яг бүтэн цагийг барав. Дундуур нь хоёр гурван удаа “асуулт байна уу” гэж дэлгэцэнд үл үзэгдэх сэтгүүлчдэд хандсан ч тэдний асуултанд хоёр гурван өгүүлбэрээр хариулахын оронд лекцийнхээ дараачийн  хэсгийг эхлүүлж байлаа. Тэгснээ бүгд босч баахан уухайлав. Танхим тэр чигээрээ уухайлсныг бодоход дагалдагчид нь танхимаар дүүрэн байсан биз. СэтгүүлдТөгсгөлд нь их үйл  хэрэгтээ хандив хүсч П.Даваанямын нэр дээрх дансны дугаарыг зарласан юм.

Дараачийн хэвлэлийн хурал. Бөө судлалын академи ба “Эсгий туургатны дэлхийн академи” гэдэг сүртэй нэртэй хоёр ТББ-ыг төлөөлсөн бөө бололтой эмэгтэй  ямар нэгэн юмыг шүлэглэн ярьсаар (эсвэл бөөлсөөр) бүтэн 2 цагийг барав.

Өнөөдөр хэвлэлийн бага  хурлууд утгаа алдаж. Сэтгүүлчид, ялангуяа телевизийнхэн биеийн амрыг бодож хэвлэлийн хурал хэмээх бэлэн үйл явдлыг  хамгийн ихээр сурвалжилдаг, цаадуул нь үүнийг мэдчихээд 50 мянган төгрөг төлөөд чөлөөт индэр маягаар юу дуртайгаа бурж, тэр оройжин монголын бүх телевизийн мэдээгээр орж гараад сурчихаж.  Тэдэнд хурцхан асуулт тавьж ичээгээд өгдөг сэтгүүлчид алга.

Яагаад “дэлгэцнээ үл үзэгдэх сэтгүүлчид” гэж? “Монгол ньюс“-ийн мэдээллийн төвийн камер хөдөлгөөнгүй зоогдсон, зөвхөн индрийг харуулдаг учраас бөөтэй хурлын төгсгөл рүү танхимд сурвалжлагч үлдсэн эсэхийг мэдэх боломж байсангүй.

P.S: Орой зурагтаар үзэхүл, энэ өдөр сонгуулийн маргаантай холбоотой учраас илүү сонирхолтой хэвлэлийн хоёр хурал МҮОНТ ба Хэвлэлийн хүрээлэнд болжээ. Яагаад “Монгол ньюс”-ийн мэдээллийн төвийг сонгоогүй вэ? Эсвэл  “Монгол ньюс” хүлээж авсангүй юу?

Posted in Нийтлэл, нэвтрүүлэг | Leave a Comment »

Ийгл телевиз тэр орой юуг буруу хийсэн бэ?

Posted by Бид on 2008/07/06

Сүүлийн хэдэн өдөр “Ийгл” телевизийг 2008 оны 7-р сарын 1-ны өдрөөс эхлэн шөнө дунд хүртэл шууд нэвтрүүлэг явуулсных нь төлөө нэлээд шүүмжилж байгаа билээ. Тухайлбал, 2008 оны 7-р сарын 5-ны орой буюу онц байдлын сүүлчийн өдөр МҮОНТ-ийн студийг эзэгнэсэн дэд хурандаа Т.Сайнжаргал “Ийгл” телевизийг “илчилсэн” бичлэг авчирч үзүүлсэн байна.

Хөтлөгч:
– Ерөнхийдөө хэвлэл мэдээллийн байгууллага маань нийгэмд өндөр хариуцлагыг үүрч явдаг… Олон нийтэд өгсөн мэдээ, мэдээллүүдийн дунд ямар нэгэн байдлаар буруу ойлголт төрүүлэх, ташаа мэдээлэл өгөх зэргээр олон сөрөг үр дагаврууд гарсныг мэргэжлийн  байгууллагууд хянаж эхлээд байгаа юм байна.

Ийгл телевизийн нэвтрүүлгийн хэсэг. Сурвалжлагч Соёлмаа:
– Сонгуулийг эсэргүүцэж байгааг үзэгчид маань ойлгож байгаа байх …
Студи руу утсаар холбогдсон үзэгчийн ярианы хэсэг:
– …хатуу байлгах хэрэгтэй. Монголын ард түмнийг хүлцэнгүй номхон хонь шиг гэж их басамжлаад байвал…[сайн сонсогдсонгүй. Гэхдээ нэлээд хатуу үгс хэлэв бололтой

Студид үргэлжилсэн яриа. Дэд хурандаа Сайнжаргал.
– СЕХ-ны албан ёсны дүн гаргаагүй байхад ийм асуудал боссон. Үүнийг сонгуулийн дүнг эсэргүүцэж байна гэж тайлбарлаж болохгүй. Бид энүүгээр хэвлэлийн эрх чөлөөг хязгаарлаж байгаа биш… Нийгмийн эмх замбараагуй байдал бий болоход тодорхой хэмжээгээр хэвлэл мэдээлэл, сэтгүүлч буруу ташаа дүгнэлт хийж гаргаснаас болж олон нийтэд буруу ойлголт төрүүлсэн…
Хөтлөгч
– Хүн хүчний [цугларсан хүмүүсийн] тоог нэмэгдүүлэхэд зарим нэг талаар нөлөөлсөн?
Сайнжаргал.
– Тийм зарим нэг байдлаар нөлөөлсөн… Гэр орондоо хэвтэж амарч  болохгүй, иргэдээ та нар ир, нэгд, тэмц гэсэн уриалгуудыг нийтэлсэн …

Тэр үдэш “Ийгл” телевиз яах ёстой байсан бэ? МАХН-ын байрны орчноос шууд нэвтрүүлэг явуулахгүй, бас үзэгчдийн сэтгэгдлийг утсаар авахгүй байсан уу? Дашрамд хэлэхэд, ихэнх үзэгчид үймээн самуун дэгдээгчдийг шүүмжилж байлаа. Тэр тусмаа нэг ч сурвалжлагч, хөтлөгч үймээн самуун, бослого хөдөлгөөнд уриалаагүй…

Posted in 2008.07.01, Ийгл телевиз, Монголын Үндэсний Олон Нийтийн Телевиз, Нийтлэл, нэвтрүүлэг | 3 Comments »

“Экспресс ньюс” хамтлагт С.Наранбаатар, А.Батпүрэв нар тоглож хөгжмийг нь Ардчилсан Нам захиалдаг. Үүнийгээ нуудаггүй.

Posted by Бид on 2008/06/26

 

2008 оны УИХ-ын сонгуулийн сурталчилгааны кампани дуусах дөхжээ. Зарим зүйлийг дүгнэж эхэлмээр санагдлаа.

 

Намуудын сурталчилгааны нэвтрүүлгүүдээс би “Экспресс ньюс”-ийг бусдаасаа илүү гэж үнэлж байна. Хэд хэдэн шалтгаан бий. Юуны өмнө  “Экспресс ньюс” бол  нэг удаагийнх биш, аль 3-р сараас хойш ажлын өдөр болгоны орой 23. 30-24.00 цагийн хооронд C1 телевизээр тогтмол гарч ирсэн нэвтрүүлэг. (Энэ нэвтрүүлгийг  хүмүүс үздэг гэдэг утгаар би ганцаараа биш  УИХ-ын гишүүн, МАХН-аас  нэр дэвшигч Сү.Батболд, “Иргэн та баялаг” сангийн тэргүүн, АН-аас нэр дэвшигч С.Одонтуяа нар үнэлж  өөрсдийн сурталчилгааны нэвтрүүлгийг “”Экспресс ньюс”-ийн цагаар явуулсан билээ)

 

Гэхдээ миний хувьд хамгийн  гол шалтгаан бол уг нэвтрүүлгийг бэлтгэдэг хийлч, төгөлдөр хуурч хоёр нүүр царайгаа харуулдаг. Харуулдаг төдийгүй хөгжмөө цааш тавиад нэвтрүүлгээ хөтөлдөг. Тэр хоёр хөгжимчний нэрийг С.Наранбаатар, А.Батпүрэв.  Тэгвэл МАХН-ын сурталчилгааны бүх нэвтрүүлэг,  АН-ын бусад нэвтрүүлгийг бэлтгэсэн хүмүүс нэрээ тас нуудаг.  Хэн ч гарч ирж хөтлөхийг зориглодоггүй бөгөөд текстээ үл үзэгдэгч хөтлөгчөөр уншуулж байна.  Ядахдаа төгсгөлд нь нэрээ ч тавьдаггүй.  Энэ бүхэн яагаад чухал гэж? Өөрсдөө ил гарна гэдэг бол хэлж ярьж, үзүүлсний төлөө хариуцлага хүлээхэд бэлэн харуулж байна гэсэн үг.

 

“Экспресс ньюс”-ээр хэнд хэн үйлчлээд байгаа нь нь тов тодорхой. Гагцхүү үүнийгээ нуухгүй байгаа нь надад таалагддаг.

 

Агуулга нь миний хувьд чухал биш. “Экспресс ньюс”  хамтлагийн хөгжмийг Ардчилсан нам захиалдаг тул АН-ын номлоод байгаа “зөв” бодлогыг  хамгаалж “буруу” бодлоготнуудыг балбасан  мэдээ, сурвалжлага үзүүлж дундуур нь АН-ын реклам явдаг “цэвэр” сурталчилгааны нэвтрүүлэг билээ. 

 

Дугаар болгондоо ярилцлагатай.  Өнгөрсөн хугацаанд хэн хэнтэй ярилцсаныг харахад ихэнх нь буюу лав 40-өөд хүн АН-аас УИХ-ын сонгуульд нэр дэвшихийг горилогчид,  нэр дэвшигчид байлаа.  Завсар зайгаар нь хөндлөнгийн ганц нэг хүмүүсийг урьж оролцуулахдаа АН-ын бодлогод хал балгүй асуудлаар, эсвэл АН-ын гол өрсөлдөгч МАХН буюу одоогийн төр засгийг  шүүмжилсэн хүмүүс байв.  Жишээлбэл, “Эрс шинэчлэл” хөдөлгөөний тэргүүн Энхбат, Баярхүү (“Эрс шинэчлэл” хөдөлгөөн), Туяа (Хадгаламж, зээлийн хоршооны хохирогчдын холбооны тэргүүн), САПУ-гийн хохирогчийн төлөөлөл. САПУ-гийн захирал асан Жамъянсүрэн (2 удаа) гэх мэт.  

 

МАХН-ын байхаа больчихсон “Шударга ёс” жигүүрийн Г.Баярсайханыг маш их өргөмжилж нийт 5 удаа яриулжээ. Бас Ногоон намын УБ хотын салбар зөвлөлийн дарга Бум-Ялагчийг арай доогуур үнэлж  3 удаа яриулав. Тэд хоёулаа өөрсдийн намын удирдлагыг илчилсэн мэдэгдэл хийсэн учраас тэр.  Бас нэг малчныг урьсан нь Төв аймгийн малчин Сумъяадорж байж “Телевизээр Батжаргалын Батбаяр гэдэг хүн төр ноолууыг 30 мянгаас доошгүй үнээр худалдаж авья гэсэн санал их сайхан байна” гэлээ. Дараа нь 83 настай ахмад дайчин Түдэвдоржийнд очиж төр засгаас орон сууц нэхэлцэв.  “Монгол оймс” ба “Мастер матрас” үйлдвэрийн дарга нарын яриа АН-ын үйлдвэржүүлэлтийн бодлогод яв цав нийцлээ.  I Love New UB клубын дэмжигч Ануударь гэдэг залууг оролцуулсан нь  сүүлийн үед залуучуудыг байлдан дагуулж байгаа гэж сурталчилдаг I Love New UB гэдэг нь АН-ын  сонгуулийн сурталчилгааны ээлжит кампани учраас тэр.  Бас “Перфект” хамтлагийн ахлагч Гантөмөр гэдэг залуу монголын урлагын хамаг одуудын дуулсан МАХН сонгуулийн сурталчилгааны дууны уран бүтээлчдэд олгосон зардлын тооцоог гаргасан  төдийгүй одоо ид гялалзаж байгаа дууны одуудыг бөөндөж бутниргэсэн билээ.

 

“Экспресс ньюс”  харин МАХН-аас нэг ч хүн нэр дэвшигчийг урьж оролцуулаагүй, урьсан нь ч цаадуул нь илт АН-ын талын нэвтрүүлэгт оролцох ч үгүй байсан биз.

Posted in 2008 оны УИХ-ын сонгуулийн сурталчилгаа, Нийтлэл, нэвтрүүлэг | 3 Comments »

Хувийн телевизүүд тэнцвэргүй сурталчилгаа явуулахыг хэн ч хориглоогүй…

Posted by Бид on 2008/06/14

Өмнө дурдсанчлан “Ярилцъя” нэвтрүүлгийн төгсгөлд улс төрч, нийтлэлч Баабар сонгуулийн кампани хэрхэн өрнөж байгаа талаар өөрийн дүгнэлтээ ярилаа.  Миний хувьд хэвлэл мэдээлэлтэй холбогдуулан юу хэлсэн нь сонин байв.

Баабар ярихдаа,  
– [Хэвлэл мэдээлэл] хуулийнхаа хүрээнд ажиллах ёстой. Ийм л зарчим байх ёстой. Юугаа магтнав, юугаа  муулнав хуулийн хүрээнд бүрэн чөлөөтэй. СЕХ  телевиз, сонингуудад  [ хязгаарлалт]…  Хүн өөрийнхөө хөрөнгийг өөрөө захиран зарцуулах ёстой.  Би сонин гаргаад юм уу телевиз байгуулчихаад ганцхан депутат мөнгө өгөөд тэрнийг магтаад  л байж болно ш дээ. Яагаад гэвэл энэ бол миний миний захиран зарцуулах эрх байхгүй юу. Сонгуулийн хороо юун дээр [хязгаарлалт] тавих ёстой ганцхан танай телевиз дээр тавих ёстой.  Яагаад гэвэл танай телевизийн хөрөнгө төрөөс, ард түмнээс гарч байгаа.  Ийм учраас тэнцвэртэй байдлыг ганцхан Үндэсний олон нийтийн телевиз дээр тавина уу гэхээс биш бусад мэдээллийн хэрэгсэл дээр чи заавал тэнцүү байх ёстой … Энэ чинь миний хөрөнгө юм чинь тэнцүү байх ёстой байж байх ямар утгатай  юм. Би хүүхдээ олимпиадад, тэмцээнд оруулья л даа. Би өөрийнхөө хүүхдэд тэнцүү харагдах ёстой юм уу . Би ганц өөрийнхөө хүүхдийг л рекламдана…. Өнөөдөр НТВ юм уу TV9-ыг тэнцвэртэй байгаарай гэж загнана гэдэг хүний хөрөнгийг тэгэж болохгүй… Гэхдээ энэ жилийн мэдээллийн хэрэгслүүдийг хараад ерөнхийд нь ажиглаад байхад муухай гүтгэлэг мүтгэлэг урьдынхыг бодвол их багассан. Телевизүүд өөрсдөө тэнцвэртэй байх сонирхол байна. Сонгуулийн хорооны даалгавраар биш…

Харамсалтай нь Баабар сонгуулийн хууль, дүрмийг гүйцэт уншаагүй бололтой. Хөтлөгч бас уншаагүй байж сонгуулийн тухай ярилцлага хөтөлжээ.

Тайлбарлая.  УИХ-ын сонгуулийн тухай хуулиар МҮОНТ-ийг тэнцвэртэй  байх ёстойг шаардсаны дагуу СЕХ-ноос намуудын сурталчилгааны цагийг тус бүр 75 минутаар тэв тэнцүү хуваарилж өгсөн нь үнэн. Харин хувийн телевизүүдийг тэгээгүй, зөвхөн сурталчилгааны хэмжээ нэвтрүүлгийн нийт цагийн 10 хувиас хэтэрч болохгүйг хуулинд заасан. Магадгүй энэ заалт бас л хувийн өмчөд халдсан хэрэгт орж магадгүй ч УИХ-ын сонгуулийн тухай хуулийг Баабарын, бас хөтлөгч Мөнхтөрийн Ардчилсан Нам нь МАХН-тай сайхан зөвшилцөж байгаад 2005 онд баталсан болохоор гайгүй биз.

Уг нь хувийн телевиз аль болох тэнцвэртэй сурталчилгаа явуулахыг хичээх нэг шалтгаан байдаг. (Үүнийг сайтар ярилцах юмсан).  Өнөөдөр зарим төрийн бус байгууллага сонгуулийн сурталчилгааны мониторинг хийхдээ хувийн телевизүүд тэнцвэртэй байгаа эсэхийг хянаж байгаа нь сонгуулийн хуулиа уншаагүйнх огт биш… 

2008 оны УИХ-ын сонгуулиар хувийн телевизүүд тэнцвэртэй байх сонирхолтой болсон тухайд. Сайндаа ч биш, тэдэнд мөнгө өгвөл тэнцвэртэй байхаас ч буцахгүй болчихсон хэрэг. МАХН-ын сонгуулийн штаб юмуу нэр дэвшигч мөнгөө төлөөд захиалгат нэвтрүүлэг явуулахад маргааш нь АН-ынхан мөнгөө бариад ороод ирнэ. Ердөө л энэ. Өнөөдөр аз болж МАХН-ын хүч бараг тэнцүү, өөрөөр хэлбэл хоёулаа адилхан хэмжээ хязгааргүй их мөнгөтэй. Иймээс хувийн телевизүүд МАХН ба АН хоёрыг бахархмаар “тэнцвэртэй” сурталчилж байгаа билээ.   

Posted in 2008 оны УИХ-ын сонгуулийн сурталчилгаа, Нийтлэл, нэвтрүүлэг | Leave a Comment »

МАХН ба АН-ын нэр дэвшигчид илүү тэгш эрхтэй…

Posted by Бид on 2008/06/14

Зөвхөн өөрт нь зориулсан хууль, дүрэм хүртэл гаргаж тов тодорхой зааж өгөөд байхад  МҮОНТ, буюу түүний “Монголын мэдээ“ агентлаг хоёр намынхаа сурталчилгааг сийхгүй явуулсаар байх юм.

Бямба гариг тутмын “Ярилцъя” нэвтрүүлгийн ээлжит дугаар. Хөтлөгч эхлээд ашигт малтмал, газрын тосны үнийн өсөлтийн талаар яриулахаар Ашигт малтмал, газрын тосны хэрэг эрхлэх газрын даргаар ажиллаж байсан Лу.Болдыг  студид урьж авчирчээ. Уг нь төрийн албаа хүлээлгээд өгчихсөн, ямар ч хариуцлага хүлээхээ больсон Болдын оронд томилогдсон юм уу үүрэг гүйцэтгэж байгаа хэн байна, тэр нөхөр ирж яримаар санагдана.  Гэтэл үгүй ажээ. Ингээд хөтлөгч Ц.Мөнхтөр төрөлх намаасаа УИХ-ын сонгуулийн 21-р тойрогт нэр дэвшигч Лу.Болдоос  мөрийн хөтөлбөрийнх нь гол өгөөш болсон “”Баян Монгол” корпорац байгуулах талаар дэлгэрэнгүй ярина уу, хэн яаж байгуулах вэ? гэх мэт “зөв” асуултууд тавьснаар Лу.Болд дураараа болж бяцхан сургалт явуулах мэт сайхан тайлбарлаж өглөө.  Бас “Алтан дорнод Монгол”, “Бороо гоулд”  Монгол улсад ямар ч ашиггүй байсан талаар том мэдэгдэл хийв. Албан тушаал дээрээ 4 жил болохдоо ингэж чанга дуугарахгүй яасан юм бол? Энэ ч яахав. Хэд хоногийн өмнө Лу.Болд албан тушаалаа тушаахаасаа өмнө кадастрын албаны  даргадаа мэдэгдэлгүйгээр Хөвсгөл аймгийн нутагт ашиглалтын лиценз олгосон нь илэрч тус нутгийн оюутнууд АМГТХЭГ-т дайрах шахуу орж бөөн дуулиан дэгдээд байгаа билээ. Гэвч хөтлөгч энэ талаар асуулт тавьсангүй. Лу.Болд ийм асуултыг захиалаагүй учраас тэр биз. Ийнхүү Монголын Үндэсний олон нийтийн телевизийн хөтлөгч Ц.Мөнхтөр УИХ-ын сонгуульд Хан-Уул дүүрэгт нэр дэвшигчдийн дундаас сонголтоо аль хэдийнэ хийчихжээ.

Гэхдээ үнэгүй юм гэж үгүй. Араас нь Усны хэрэг эрхлэх газрын дарга Бадрах гэдэг нэр дэвшээгүй эрхмийг жийрэг болгож 8-хан минут ойр зуурын юм яриулаад МАХН-ын нэр дэвшигч Т.Гандийн сурталчилгааг эхлүүлэв.  Тэр хатагтай  төрийн түшээгээр 16 жил ажиллахдаа цээжилсэн бололтой гоё гоё санаанууд хэлж байх юм. Харин хөтлөгч “үнэхээр сайхан санаа байна” гэж шагшаад “Сонгуулийн тухай ярих шаардлага байхгүй. Яагаад гэвэл манайх олон нийтийн телевиз” гэж шударга зан гаргаснаа нэг секундын дараа зөрчиж  “Гэхдээ асууя. Танай тойрогт  42 хүн нэр дэвшиж байгаа…” гэж хүслээ хэлэхэд сэтгүүлч Т.Ганди өлгөн авч  ард иргэд юуг бодож сонгууль өгөх ёстойг хэлж өгөв. 

Ажиглаад байхнээ МҮОНТ-ийн “Ярилцья” нэвтрүүлэгт МАХН ба АН-ынхан ерөнхийдөө тэгш эрхтэй,  бусад нам, эвслийн нэр дэвшигчидтэй харьцуулбал илүү тэгш эрхтэй юм байна.  Энэ санаа минийх биш, Жорж Оруэлийн “Амьтны ферм” номонд гардаг.

Дөрөвдэх ярилцагч нь  улс төрч, нийтлэлч Баабар байлаа. Тэр юу ярьсан талаар дараагийн бичлэгт оруулья. (Блогийн бичлэг товчхон, гэхдээ тогтмол байвал зүгээр учраас)

Posted in 2008 оны УИХ-ын сонгуулийн сурталчилгаа, Монголын Үндэсний Олон Нийтийн Телевиз, Нийтлэл, нэвтрүүлэг | 2 Comments »

УИХ-ын сонгуулийн хэвлэл мэдээллийн сурталчилгааны тэнцвэрт байдлын талаар нам, эвсэл, нэр дэвшигч, иргэд, хуулийн этгээдийн өргөдөл, гомдлыг хүлээн авч байна

Posted by Бид on 2008/06/12

Та бүхэнд нэгэн хэвлэлийн мэдээг толилуулья.

Сонгуулийн ерөнхий хорооны дэргэд Хэвлэл мэдээллийн орон тооны бус зөвлөл байгуулагдлаа. Уг зөвлөлийн ажиллах журам, бүрэлдэхүүнийг нь баталж нэг талаас хэвлэл мэдээллийн мэргэжлийн болон төрийн бус байгууллагууд, нөгөө талаас сонгуульд оролцож буй нам, эвслийн тэгш төлөөллөөс бүрдүүлсэн байна.

Зөвлөл нь нам эвсэл, нэр дэвшигчийн  хэвлэл мэдээллийн сурталчилгааны тэнцвэрт байдал буюу Улсын Их хурлын сонгуулийн тухай хуулийн 37.4-37.5 дахь заалт (сурталчилгааны сонин хэвлэл, ухуулах болон зурагт хуудас, бусад материалын хэмжээний хязгаарлалт), 37.7-37.10 дахь заалтууд (Олон нийтийн  радио, телевизийн сурталчилгааны тэнцвэртэй байдал ба арилжааны телевизийн төлбөртэй сурталчилгааны хязгаарлалт)-ын хэрэгжилтийн талаар ирүүлсэн өргөдөл гомдлыг хянан үзэж санал дүгнэлт гарган Хороонд танилцуулах үүрэгтэй ажиллах юм.

Одоо 2008 оны УИХ-ын сонгуулийн хэвлэл мэдээллийн сурталчилгааны тэнцвэрт байдлын талаар нам, эвсэл, нэр дэвшигч, иргэд, хуулийн этгээдийн өргөдөл, гомдлыг СЕХ-ны ажлын албаар дамжуулан хүлээн авч байна.

2008.06.12

Тайлбар: Энэ зөвлөлд Цэрэнжав миний бие багтдаг, бас зөвлөлийн даргын үүргийг гүйцэтгэх болсон тул чадах ядахаараа санаа тавьж, өөрийн блогийг ашиглан хүмүүст хүргэж байгаа маань энэ.

Posted in 2008 оны УИХ-ын сонгуулийн сурталчилгаа, Нийтлэл, нэвтрүүлэг | Leave a Comment »

МҮОНТ зарим нэр дэвшигчдийн сурталчилгааг үнэ төлбөргүй хийж өгдөг

Posted by Бид on 2008/06/08

УИХ-ын болон орон нутгийн сонгуулийн сурталчилгааны хугацаанд олон нийтийн радио, телевизийн баримтлах бодлого, бас журам гэсэн хоёр баримт бичиг гарчихсан, бас  сонгуулийн сурталчилгаа албан ёсоор эхлээд байхад МҮОНТ-ийнхэн сурсан зангаа ерөөсөө тавихгүй юм. Бас л “Цагийн хүрд”-ээр жишээ авья.

2008.06.03.
Шастины нэрэмжит нэгдсэн 3-р эмнэлэгт гаднын тусламжаар орчин үеийн  оношлогооны лаборатори байгуулж хүлээлгэн өгсөн ёслолын ажиллагаанаас хийсэн сурвалжлага. Гэтэл тоон дунд үсэг цохиж явна гэгчэээр УИХ-ын гишүүн Н.Баяртсайхан нээлтэд оролцон ярилцлага өгчээ. Эрхэм гишүүд эмнэлэгт очиж тууз хайчлах дуртай ч  нийгмийн бодлогын байнгын хорооны дарга ч юм уу, эсвэл тухайн тойргоос сонгогдсон гишүүн байх учиртай.  Тэгвэл Н.Баяртсайхан аль нь ч биш, бүр Хан-Уул дүүргээс сонгогдсон билээ. Гэхдээ учир нь амархан олдов: Тэрбээр 2008 оны УИХ-ын сонгуульд  тэрхүү 3-р эмнэлэг байрладаг Баянгол дүүргээс сойгдох болсон гэнэ.

2008.06.05.
УИХ-ын сонгууль ойртож байгаа энэ цаг мөчид сонгогчид юу хүсч байгааг мэдэж хэрэгжүүлэх нь маш чухал гэсэн сүрхий оршилтой сурвалжлагыг Сэлэнгэ аймгаас бэлтгэжээ. Хөтлөгч иргэдийг бизнес эрхлэхэд  нь тусалж дэмжих тухай текст уншиж байтал аймгийн төвийн гудамжинд нэрээ титрт нь  “Эдийн засагч О.Чулуунбат” гэсэн даруухнаар бичүүлсэн (урьд нь үргэлж “Монгол банкны ерөнхийлөгч асан” гэж даналздагсан)  МАХН-аас нэр дэвшигч  нөхөр таааралдаж 1. Иргэд бизнес эрхлэхэд  нь зээл олгох хэрэгтэй, 2. Банкуудын зээлийн хүүг бууруулах хэрэгтэй,  3. Дэлхийгээр дүүрэн мөнгө хэвтэж байна, авах хэрэгтэй гэсэн гурван хэсэг бүхий микро лекцээ уншиж амжив. Сэлэнгэ аймагт 10 гаруй хүн нэр дэвшээд байхад хотоос очсон нэгийг нь ямар мундаг олов оо. Хэрвээ Чулуунбат төрийн албан тушаалтан бол ажлаа хийж явна гэхсэн.

2008.06.07.
Энэ бямба гаригийн “Монголын мэдээ” агентлагын “Ярилцъя” нэвтрүүлэг  3 хэсэг ярилцлагаас бүрдэв.
Эхлээд Сэлэнгэ аймгаас “Эдийн засагч О.Чулуунбат” гэдэг даруухан эрийг дуудан нь авчирч 20 минут лекцлүүлэв. Хөтлөгч Мөнхтөр “жишээлбэл нэг суманд газар тарилан эрхлэх гээд зээл авбал … гэж нэр дэвшсэн аймагт нь зориулсан асуулт дэвсэж өгөхөд Чулуунбат дэлхийгээр дүүрэн байгаа мөнгийг тоолж баахан хадуурснаа  гэнэт сэхээрч “Би сая Сэлэнгэ аймгийн 2 сумаар яваад ирлээ. Хүмүүс мөнгө нэхэхээ больжээ, харин үйлдвэрлэл эрхлэх зээл нэхэж байна” гээд тойргийнхоо сонгогчдод сая нэг хандлаа.

Дараачийн ярилцлагын сэдэв – “”Хүн-байгаль”. Энэ сэдвээр Монголд ярьж чадах цорын ганц хүнийг олсон бололтой, “Экологич,  доктор Баярсайхан” гэдэг сагсуу залуу сүүлийн хоёр сарын турш арван телевизээр 24 цагийн турш нэгэн зэрэг тасралтгүй чалчиж байгаа нь хангалтгүй гэж хөтлөгч Мөнхтөр  үзжээ.

Араас нь “УИХ ба улс төрийн намууд” сэдвээр УИХ дахь МАХН-ын бүлгийн дарга Ц.Нямдорж, АН-ын бүлгийн дарга Гансүх нар ярилаа. Энэ их хурал сайн ажилласан гэж дуу нийлүүлэн хамгаалсан энэ ярилцлага урьдчилан бэлтгэсэн бичлэг байв. Тэгэж захиалсан биз. Төгсгөлд нь  УИХ-ын гишүүн М.Энхсайханы яриа. 

Бүгдээрээ УИХ-ын сонгуульд нэр дэвшигчид байх юм. Сонгуульд нэр дэвшээгүй ч гэсэн юм ярьж чаддаг хүн Монголд алга уу? Би МҮОНТ-ийнхнийг мөнгө аваад далд сурталчилгаа хийсэн гэж хэлж чадахгүй. (Яагаад гэвэл МҮОНТ-ийн санхүү нь олон нийтэд хаалттай) Тэгвэл зарим нэр дэвшигчдийн сурталчилгааг үнэ төлбөргүй, оочир дугааргүй, дахин дахин хийдэг болж таарлаа. МҮОНТ татвар, хураамж төлөгчдийн мөнгөөр хэдхэн нэр дэвшигчид үйлчилжээ гэсэн үг.

Posted in 2008 оны Орон нутгийн сонгуулийн сурталчилгаа, Монголын Үндэсний Олон Нийтийн Телевиз, Нийтлэл, нэвтрүүлэг | 1 Comment »

Олон нийтийн радио, телевиз төлбөртэйгээр аливаа сурталчилгаа явуулахгүй…

Posted by Бид on 2008/06/02

Өмнөх жилүүдэд сонгууль дөхөхийн хэрээр хамаг нэвтрүүлгүүд далд сурталчилгаа болон хувирч, сэтгүүлч болгон “төрд гарах ёстой” нэгнийг даган шогшиж, “Цагийн хүрд”-ийн дуранд дандаа нэр дэвшигчид өртөж салдаггүйсэн.  Тэгвэл гурван жилийн өмнө олон нийтийн телевиз болж дэгэнд орсноос хойшхи анхны сонгууль энэ юм.  Өнгөрсөн гурван жилд сурталчилгаа овоо цэгцэрсэн ч хуулиар зөвшөөрсөн 2 хувиас үргэлж илүү байсан.  Элдэв байгууллага, төсөл, хөтөлбөрийн төлбөртэй нэвтрүүлгүүд огт тасраагүй. Ил сурталчилгаа татарсан ч  үлдсэн нь улам далд орж, ихэнхдээ ивээн тэтгэлт болж хувирснаар сүүлийн арваад жил Монгол телевизэд эрхэлсэн хувийн студиуд орлогоо алдаж сүйд болоогүй. Одоо телевизээрээ “Хас”, Хадгаламж банк, Мобиком G-Mobile-оор ивээн тэтгүүлж “Цагийн хүрд” болгоноор  элдэв нээлт, хаалт, шинэ үйлчилгээ заавал ордог. (Мартсанаас, олон нийтийн радио, телевизийн хууль хэрэгжиж байгаа эсэхийг хэн хянаж мониторинг хийж хянаж байна аа?)

Харин саявтар МҮОНТ-ийн Үндэсний Зөвлөл хуралдаж УИХ-ын болон орон нутгийн сонгуулийн сурталчилгааны хугацаанд олон нийтийн радио, телевизийн баримтлах бодлого, бас журам гэсэн хоёр баримт бичгийг батлан гаргаж сурталчилгааг нэгмөсөн журамлах шиг боллоо. Тухайлбал,

“Монгол Улсын Их Хурлын сонгуулийн тухай хуулийн 37.7 болон 37.8-д заасны дагуу олон нийтийн радио, телевиз төлбөртэйгээр аливаа сурталчилгаа явуулахгүй” 

Тэгэхлээр МҮОНТ улс төрийн нам, эсвэл, нэр дэвшигчдээс нэг төгрөг ч авахгүй гэсэн үг. Тэгвэл жирийн сэтгүүлч уран бүтээлчдэд ямар нэгэн “шаанс” үлдээв үү?  Арилжааныхан шиг дөрвөн жилд ганц  удаа хэдэн төгрөг хийж болохгүй  юу? Ямар ч арга алга уу? Алга аа!

“Нам эвсэл, нэр дэвшигчдийн сурталчилгаанд олон нийтийн радио, телевизийн лого, шторк ашиглахыг, олны танил болсон нүүр царай, дуу хоолой бүхий олон нийтийн радио, телевизийн сэтгүүлч, хөтлөгч, нэвтрүүлэгч, уран бүтээлчид оролцохыг хориглоно.
“Нам, эвсэл, нэр дэвшигчдийн сонгуулийн кампанит ажил, олныг хамарсан хаалттай болон нээлттэй арга хэмжээнд олон нийтийн радио, телевизийн лого болон шторк ашиглах, олны танил болсон нүүр царай, дуу хоолой бүхий олон нийтийн радио, телевизийн сэтгүүлч, хөтлөгч, нэвтрүүлэгч, уран бүтээлчид гэрээ төлбөртэйгээр болон сайн дураар, санаатай болон санаандгүй байдлаар, ажлын болон ажлын бус цагаар хамрагдах, оролцохыг хориглоно”

Нэрийг дурдаагүй болохоос биш 2008 оны УИХ-ын сонгуулиар Чимгээ, Харцага, Бямбадорж нар МАХН-ын сонгуулийн шоуг хөтлөхгүй, одоогийн захирал Наранбаатар өмнөх  сонгуулиар, Гүрбазар, Золжаргал нар энэ сонгуулийн өмнөхөн шиг нэр дэвшигчидтэй ухаантай  яриа өрнүүлэхгүй, эсвэл нэг намын өмнөөс нөгөө рүү давшлахгүй гэсэн үг.  Сонгуулийн сурталчилгааны хугацаанд баримтлах бодлого хэмээх дараах баримт бичиг муу юм бодохыг ч хориглосон мэт “…… үнэнийг хүргэхийн төлөө… шударга … хараат бус … тэнцвэртэй …арилжааны нөлөөллөөс ангид… ардчилал, хүний эрхийг дэмжинэ … цөөнхийг гадуурхахгүй… бодит үнэнийг нэвтрүүлнэ… ардчиллын үнэт зүйлсийг дэмжинэ…” гэжээ. Хэрвээ үндэсний телевизийнхнийг дарамтлаад байвал “…гаднын этгээд нэвтрүүлэг эфирт явахаас өмнө үзэх, сонсохыг шаардахыг хориглоно … Яриа материалд засвар оруулах хүсэлт, шаардлагыг хүлээж авахгүй… Яриа ярилцлага авах хүнийг  таны өмнөөс сонгон тулгахыг зөвшөөрөхгүй…” гэхчлэн тэмцэх аргыг хүртэл зааж өгсөн, сэтгүүл зүйн ёс зүйн сурах бичиг юмуу өнгөрсөн 18 жилд бидэнд хэвлэлийн эрх чөлөө заасан барууны багш нарын лекцээс шууд хуулчихсан мэт төгс болжээ.

Posted in Монголын Үндэсний Олон Нийтийн Телевиз, Нийтлэл, нэвтрүүлэг | Leave a Comment »

МҮОНТ-ийн “сурсан юмыг сураар боож болохгүй”

Posted by Бид on 2008/05/29

2008 оны УИХ-ын сонгууль дөхөхийн хэрээр МҮОНТ сурсан зангаараа нэр дэвшихээр горилогчдын сурталчилгааг сурсан зангаараа улаан цайм хийсээр байх юм. “Цагийн хүрд”-ээр жишээ авч өнгөрсөн 4 ба 5- р саруудад миний анзаарсан заримыг (бүгдийг үзсэн биш) дурдъя.

2008.04.07
Өнгөрөгч 4-р сард Эрдэнэт үйлдвэрийн худалдаа эрхэлсэн орлогч захирал байсан Дамба-Очир тус үйлдвэрийн ажилчдын цалин хөлсийг нэмэгдүүлэх  шаардлагыг үйлдвэрийн удирдлагыг тавьж байна гэсэн сурвалжлага.  Дундуур нь Дамба-Очир нь өөрөө гарч “ажилчдын дундаж цалинг 1 сая төгрөгт хүргэж ёстой” гээд авч өглөө. (Энэ сурвалжлагад сэтгүүлчийн нэр байхгүй, текстийг нь хөтлөгч уншив).  Эрдэнэт үйлдвэрт ажиллахаа больсон мөртөө “хар хүний  төлөө шар хүн” гэгчээр ажилчдынх нь цалин мөнгөнд нь санаа зовж түүнийгээ улс орон даяар цацуулж суугаа энэ эрхэм МАХН-аас нэр дэвшихээр санаархагч байсан нь төдөлгүй ил болсон билээ.

2008.04.19
“Очир төв” ХХК баруун чиглэлийн замыг хугацаанд нь ашиглалтанд оруулна гэж ухуулсан сурвалжлага. МҮОНТ яагаад үүнд санаа зовох болов оо гэвэл ноднин тендерт ялсан ч Лүнгийн замыг засах байтугай түр замаа ч тавьж чадаагүйн улмаас замын машинууд мянганы биш мянган зам гарган сүлжилдэж  замын дагуух хамаг бэлчээрийг сүйтгэхэд хүргэсэн тус компанийн захирал нь нөгөө Эрдэнэтийн сайхан сэтгэлт Д.Дамба-Очир юм. Тэр бас л өөрийн шударга царайг харуулж “хугацаандаа өгнө” гээд ярьж зогсоно. Үзэгчид итгэхгүй гэсэн мэт ЗТАЖЯ-ны Автозамын газрын дарга Баасанхүүгээр дэмжүүлэв.

2008.05.07
Орхон аймгийн оюутан, залуучуудын холбооны 2-р чуулганыг очиж сурвалжилжээ. Болж л байна. Харин хүндэт ерөнхийлөгчөөр нь Орхон аймагт төвтэй “Очир Төв” компанийн захирал Дамба-Очирыг сонгосныг мэдээлэв. Тэгэхлээр чуулганыг биш  Дамба-Очирыг сурвалжилсан юм байна.
Араас нь Улаанбаатар-Лүнгийн чиглэлд “Очир Төв” компанийн барьж байгаа замын  ажлыг өмөөрсөн том сурвалжлага үзүүлэв. Тус компани туслах зам барьсан боловч хөрсний онцлогоос хамарч шороо суларч жолооч нар залхууран салаа замууд гаргасан, малчид хашаа, хороогоо нүүлгэхгүй цааргалсан, орон нутгийн эрчим хүчнийхэн цахилгаан тасалдаг гэхчлэн “Очир төв” ямар ч буруугүй болохыг орон даяар нотоллоо. Ямар муу хөрс, яасан муухай малчид, эрчим хүчнийхэн бэ?

2008. 4. 21.
Нийслэлийн Сүхбаатар дүүргийн нэгдсэн эмнэлэгийн удирдлагын менежмент сайн байгаа учраас (дарга нь сайн байна гэсэн үг – Д.Ц) амжилт олж байна гэсэн оршил, төгсгөлтэй сурвалжлагыг үзүүлэв. Дундуур нь тус эмнэлгийн захирал М.Чимгээ хоёр удаа ярьж эмнэлгийнхээ хамаг цонхыг вакуумдсанаа гайхуулав. “Монголын мэдээ” агентлаг  40 жилийн түүхэндээ анх удаа эрүүл мэндийн салбарын удирдлагын менежментийн асуудалд ингэж сүрхий анхаарч тэгэхдээ Улаанбаатарын бүх эмнэлгээс зөвхөн Сүхбаатар дүүргийн эмнэлгийг сонгож авлаа. Чимгээ бол МАХН-аас нэр дэвшихэээр горилогч.

2008.05.19.
Энтеровирус-71 вирусын  тархалтын явц ямар байгаа тухай сурвалжлагыг Халдварт өвчин судлалын үндэсний төвөөс бэлтгэн үзүүлэв. Мэдээж уг өвчинд өртсөн хүүхдүүдийг зөвхөн тэнд эмчилдэг болохоор аргагүй биз. Гэтэл дундуур нь Сүхбаатар дүүргийн нэгдсэн эмнэлгийн дарга Чимгээ дүрээрээ гарч ирээд энтеровирусээс сэргийлэхийн тулд гараа сайн угаах хэрэгтэй тухай мундаг зөвлөгөө өгөөд алга болчихов.  Сурвалжлага цаашаа Халдварт өвчин судлалын төвөөс үргэлжилсэн  юм.  (Дашрамд дурдахад, хөтлөгч нь түүнтэй ижил нэрт Чимгээ бөгөөд “Эрүүл хүн Монголын Чимгээ” сурталчилгааг бас уншдаг билээ)

2008.04.26.
Орон нутагт малын хулгай их байгаа, үүнээс болж малчид яаж зовж зүдэрч байгаа тухай сурвалжлагыг хаанаас бэлтгэсэн  гэж та бодож байна? Та энэ өдрийн “Цагийн хүрд”-ийг үзээгүй бол хэзээ ч таахгүй.  Боловсрол, соёл, шинжлэх ухааны яамнаас!  Мэдээж хөдөө авсан бичлэгээр дүрсжүүлсэн байж таарна. Тэгвэл хэн ярьсан бэ? БСШУЯ-ны санхүү, эдийн засгийн газрын дарга  Ц.Даваасүрэн. Тэрбээр Хөвсгөл аймгийн морин спорт, уяачдын холбооны тэргүүн бөгөөд аймгийнхаа малын хулгайн эсрэг хэрхэн амжилттай  тэмцэж байгаа тухайгаа ярив.  Улаанбаатараасаа холдохгүй, тэгсэн мөртлөө яамны ажлаа хийхгүй тэртээ Хөвсгөл аймгийнхаа малын хулгайд санаа тавьсан хачирхалтай сурвалжлага хийх болсон учир гэвэл Даваасүрэн МАХН-аас нэр дэвшихыг горилогч  ажээ.

Би сүүлийн 2 сарын “Цагийн хүрд”-ийг бүгдийг үзсэн биш, өөр зөндөө байж таарна. Лав  Байгаль орчны сайд Г.Шийлэгдамба монголын байгаль хамгаалагч хүүхдүүдийг Австрид айлчуулсан тухай сурвалжлага хэд хэд гарсан. Үзэхүл Монголд 20 аймаг, бас нийслэл гэж байдаг ч өөрийн нэр дэвшихээр горилж байгаа Өвөрхангай аймгийн  хүүхдүүдийг голлон сонгосон байх юм. Бас  Хөвсгөл аймагт “Хүмүүс” сонины уншигчдын клуб байгуулсан тухай сурвалжлага нь тус сониныг үүсгэн байгуулагч төдийгүй, МАХН-аас  нэр дэвшигч  Р.Хадбаатарын сэм сурталчилгаа байх жишээтэй. Уг нь МҮОНТ-ийн Үндэсний зөвлөлийн гишүүн ухамсартай хүн юмсан.

Миний үзсэн дээрх сэм сурталчилгаанууд бүгдээрээ МАХН-аас нэр дэвшигчдийнх байх юм.  Яагаад гэвэл МҮОНТ-ын  “Монголын мэдээ” агентлагын захирал нь МАХН-ын дэргэдэх МАСЭХ-ны зүтгэлтэн Энхтуяа гэж эмэгтэй байдаг. Өөр тайлбар хэрэгггүй буйзаа.  МҮОНТ-ийн сурсан юмыг Олон нийтийн радио, телевизийн хуулиар боож болохгүй ажээ.

Posted in 2008 оны УИХ-ын сонгуулийн сурталчилгаа, Монголын Үндэсний Олон Нийтийн Телевиз, Нийтлэл, нэвтрүүлэг | 2 Comments »

Монголын хэвлэл мэдээлэл “Дүнжингарав”-ын аманд элбэгхэн багтав

Posted by Бид on 2008/05/28

Байгаль орчны Яамнаас эхлээд байгаль орчны хяналтын алба, Усны хэрэг эрхлэх газар гээд монголын гол усыг хамгаалах (хамгаалуулах) үүрэгтэй байгууллагууд, бас хууль  хяналтынхан бүгдээрээ Улаанбаатарт тухалдаг мөртлөө тэдний нүдэн дээр нийслэлийн дарга нар Туул голын орчмыг хэрхэн хувийн өмч шигээ эдэлж байгааг зүв зүгээр харж суугаа билээ.  Эхлээд М.Энхболд гэдэг дарга нийслэлийн ундны усны ариун цэврийн бүсийг зүүн тийш Их тэнгэрийн гүүр хүртэл ухрааж хэдэн том компанид бэлэглэсэн ч ханаагүй бөгөөд жишээлбэл, Нарантуул захаас харалдаа Туулын эрэг хүртэлх цэлийсэн газрыг алдарт “Мон-Уран” компанид сэмээрхэн олгоод дэвшээд явчихсан. Үүнийг Н.Болормаа тэргүүтэй нийслэлийн Иргэдийн хурлын төлөөлөгчид таслан зогсоохын оронд  тэнд байсан цэвэр усны худгуудыг төсвийн хөрөнгөөр нүүлгэн шилжүүлэх шийдвэр гаргаж арыг нь даасан билээ. Нэг нь хулгай хийж нөгөө нь улс мөрийг балласан хэрэг.

Удалгүй тэнд  Дүнжингарав захын барилгын төмөр каркас чимээгүйхэн босч эхэлсэн юм. Байгаль, ус хамгаалдаг яам, газар, албан тушаалтнууд мэдээж юу ч “анзаараагүй”.  Харин хэвлэл мэдээлэл тэр чигээрээ босоод ирэв. Сонинууд “Дүнжингарав нийслэлчүүдийг ундны усгүй болгох нь ээ”, “Дүнжингаравын нууц эзэн хэн бэ?”, “Дүнжингарав захыг байгаль орчны үнэлгээгүй, хууль бусаар барьж байна” гэх мэт гарчгаар дүүрсэн бол  телевизийн сурвалжлагчид Дүнжингаравын зургийг ойроос авах гэж хамгаалагч нарт зодуулж цохиулсан баатарлаг сурвалжлагуудыг үзүүлэхэд олон нийт өөрийн эрхгүй өндөлзөж “Дүнжингарав захыг нурааж хатан Туулаа аврахын төлөө”  хөдөлгөөнийг хэн нэгэн санаачилж (тэргүүн нь УИХ-д нэр дэвших байсан биз) бүх нийтийн тэмцэл эхлэхэд тун дөхөөд байлаа. 

Гэнэтхэн хэвлэл мэдээлэл тэр чигээрээ дуугаа хураав. Юу болов? 2008 оны 4-р сараас өдөр тутмын сонинуудад “Дүнжингарав” зах Туул голын усыг хамгаалахад 200 сая төгрөг зарцуулжээ” гэсэн яг ижилхэн гарчигтай ярилцлагууд нийтлэгдлээ. Араас нь Дүнжингарав хэмээх диваажингийн тухай (баригдаж дуусаагүй байхад ямар сайн мэдэж байна аа?) элдэв мэдээ, сурталчилгаанууд хөвөрлөө. Сонинууд команд авсан мэт Дүнжингарав захыг зөвхөн магтдаг болов.  Хааяа сөрөг хүчний сонинууд  М.Энхболдыг муулахдаа Дүнжингаравыг хальт дурддаг боловч маргааш нь гэхэд алдаагаа засч байв. Зөвхөн муу нэртэй жижиг сонинууд Дүнжингаравыг шүүмжилсэн хэвээрээ ч тэднийг хэн ч уншихгүй…

Одоо телевизүүдийн ээлж ирлээ. Хэд хоногийн дараанаас Дүнжингаравын рекламыг бүх телевизээр зогсоо зайгүй үзүүлэх болов.  Эхнийх нь “Уралдах уу? Уралдая…”. Бас Дүнжингаравт ажлын байр түрээсэлж авбал турах тухай нэг реклам бий. Одоо хамгийн олон үзүүлж байгаа нь энэ:

 

Харин аль телевиз  Дүнжингаравын рекламны ард нуугдахгүйгээр ил тодоор магтаж эхлэх нь сонин байлаа. Гэхдээ удаан хүлээлгээгүй юм. 2008 оны 5-р сарын 27-нд TV9 телевиз Дүнжингарав захын бүтээн байгуулалтын явцыг бахархан шагшсан сурвалжлага үзүүллээ. Тэр  ч бүү хэл TV9-ын захирал Ц.Энхбат өөрөө морилон очиж гоё макет загварыг Ким Ир Сен маягаар үзэж харагдав. Дараачийн  сурвалжлагад “таны телевиз”-ийн спортын нэвтрүүлгийн ивээн тэтгэгчээр “Дүнжингарав” зах ажиллах болсныг зарлаж хоёр тал хамтран ажиллах гэрээнд гарын үсгээ зурж байгааг харуулав. Ийнхүү хэдэн сарын турш нууц байдалд ажилласан үл үзэгдэгч “Инвэкс” ХХК-ийн ерөнхий захирал Баярбаатар анх удаа ил гарч ярилцлага  өгөв.  Дүнжингарав монголын хэвлэл мэдээллийг худалдан авч чадлаа. Хатан Туул өөрийгөө хамгаалах гэж реклам өгч чадахгүй нь харамсалтай…

Өнөөдөр телевиз үзэхлээр монголчууд  2008 оны 8-р сарын 8-нд болох Бээжингийн олимпийн бус Дүнжингарав захын нээлтийг үзэхээр хоног тоолон хүлээж байх шиг санагддаг боллоо.

P.S: Уг нь TV9 телевиз компаниудыг биш, байгаль орчныг хамгаалдаг, тухайлбал сурвалжлагч Отгон Сэлэнгэ аймгийн Хүдэр сумаас баримт нотолгоотой сайн  сурвалжлагуудыг бэлтгэж АМГТХЭГ-ын дарга Лу.Болдыг хүртэл сандаргаж байгаа юмсан.

Posted in Нийтлэл, нэвтрүүлэг | Leave a Comment »

Хэдхэн цагийн дараа…

Posted by Бид on 2008/05/23

2005 онд хууль нь гарч олон нийтийн статустай болсон МҮОНТ анх удаа сонгуулийн кампанит ажлын нөхцөлд ажиллах гэж байна. Иймээс Үндэсний зөвлөл нь өчигдөр хуралдаж 2008 оны УИХ-ын сонгуулийн үеэр хэрхэн ажиллах талаар хэлэлцжээ. Тэндээс гаргасан зарчмын шийдвэр гэвэл санхүүжилтыг нэвтрүүлгийн агуулгаас салгах явдал юм байна. Харин далд  сурталчилгааг бүрэн хоригложээ. Олон нийтийн телевизийн уран бүтээлчид сонгуулийн ямар ч сурталчилгаанд оролцохгүй.  Бас хяналтын зөвлөлийг шинэчлэн байгуулж үндэсний зөвлөлийн биш хоёр хүнийг оруулжээ.  Бас төсвийн хэмнэсэн мөнгөөр машин тэрэг авах зэрэг асуудлыг шийдвэрлэсэн гэнэ.

Орой нь “Цагийн хүрд” мэдээллийн хөтөлбөрөөр энэ тухай сурвалжлага үзүүлэхдээ хэдхэн цагийн өмнө үндэсний зөвлөлийнхөө гаргасан шийдвэрийг зөрчиж далд сурталчилгаа хийх шиг боллоо.  Үндэсний зөвлөлийн 15 гишүүнээс яагаад ч юм зөвхөн УИХ-ын сонгуульд нэрээ дэвшүүлж буй хоёроор хурлын шийдвэрийг яриулж байх юм:

Р.Бурмаа (АН-аас нэр дэвшигч): Далд сурталчилгаа явуулахгүй.  Олон нийтийн телевизийн уран бүтээлчид сурталчилгаанд оролцохгүй.

Р.Хадбаатар (МАХН-аас нэр дэвшигч):  Хяналтын зөвлөлийг шинээр байгуулсан. Үндэсний зөвлөлийн биш хоёр хүн орлоо. Төсвийн хэмнэсэн мөнгөөр машин тэрэг авах зэрэг асуудлийг шийдвэрлэсэн…

Хоёр нэр дэвшигчийн хэлснийг эс тооцвол ирэх сонгуулийн сурталчилгааны кампаниар Монголын Үндэсний Олон Нийтийн Телевиз хэрхэн ажиллах журмыг олон нийтэд тодорхой танилцуулсангүй. Хэвлэлийн мэдээ бэлтгэж тараасан эсэхийг бүү мэд. Вэб сайт руу нь орсон боловч 1-р сараас хойш шинэчлээгүй харагдана.

Posted in 2008 оны УИХ-ын сонгуулийн сурталчилгаа, Монголын Үндэсний Олон Нийтийн Телевиз, Нийтлэл, нэвтрүүлэг | Leave a Comment »

“Монголын газар нутаг савхдуулсаар дуусах нь ээ”

Posted by Бид on 2008/05/19

Сонин гарчиглах гэж аятайхан үг бий. Өнөөдөр хэвлэгдэн гарч байгаа тэр олон сониныг уншиж барах ч үгүй, шаардлага  ч үгүй, ихэнх тохиолдолд гарчиглахад л хангалттай. Эхнээс дуустал уншмаар сайн нийтлэл цөөн, байсан ч часхийсэн гарчигтай байж нүдэнд тусдаг билээ. Сүүлийн хэдэн өдрийн сонинуудаас анзаарсан ганц нэг гарчгийг толилуулья.

Замын-Үүдийн болон Алтанбулагийн чөлөөт бүсийн ажил бүтэл муутай, нэг нэг том хашааг олон жил барьж байгаа тухай албаны тайлангаас хуулсан бололтой нуршуу нийтлэлийн гарчиг нь харин энгийн бөгөөд ойлгомжтой: “Худалдааны чөлөөт бүс хашаатайгаа ноцолдсоор” (“Ардчилал”.2008.05.15). 

Сэлэнгэ аймгийн Хүдэр суманд хятадын савхны үйлдвэр олон жил ажиллаж залуу сайхан хус модоор туйлж байгааг зурагтаар харсан монгол хүн бүр ийм тохиолдолд боддог тэр юмаа бодсон байх. Харин “Нийгмийн толь” сонины сэтгүүлч бодсоноо шууд хэлж сурвалжлагаа “Монголыг савхдах “шаахайтны нүүдэл айсуй” (2008.05.17-ны дугаар) гэсэн бол дараачийн сонин энэ санааг бүрмөсөн гүйцээж “Монголын газар нутаг савхдуулсаар дуусах нь ээ” (“Ардын эрх”. 2008.05.19) гэжээ. 

Posted in "Нийгмийн толь" сонин, Нийтлэл, нэвтрүүлэг | Leave a Comment »

МҮОНТ-ээс төрж байгаа реклам сурталчилгааны одууд

Posted by Бид on 2008/05/16

Телевизийн хөтлөгч юмуу сэтгүүлчид элдэв реклам сурталчилгаанд тоглодог моод хавтгайрч байх шиг. Урьд нь телевизийнхэн үе үе тоглодог байсан ч үзээд л өнгөрдөг байж. Ямар нэгэн хориглолт юмуу зохицуулалт байсангүй. Харин одоо МҮОНТ-ийнхний тухайд буруу зөв эсэх тухай асуулт  тавих цаг болжээ. 

МҮОНТ-ийн “Монголын мэдээ” агентлагийн хөтлөгч Чимгээ янз бүрийн рекламанд тоглосноороо толгой цохидог. Лав “Маршал” хотхоны шинэ орон сууцны сурталчилгаанд гэр бүлээрээ тоглож харагдсан.  Сэтгүүлч Ш.Гүрбазар  “Би Монголоороо гоёдог” шүлгээ уншиж “Хас” банкны рекламанд тоглосон нь эхлээд МҮОНТ-ээр гарч, дараа нь бусад телевизээр таржээ.  

     

“Аяллын цаг” нэвтрүүлгийн хөтлөгч, сэтгүүлч Г.Бадамсамбуу сансрын холбооны “Иридиум” утасны рекламанд тоглож тэр нь телевизийн бараг бүх сувгаар хэдэн сарын турш гарч байгаа нийт үргэлжлэлийг нэмбэл “Аяллын цаг”-аасаа давж гарна. Ерөөсөө Бадамсамбуугийн нэвтрүүлэгт заримдаа Ниссаны ч юмуу сурталчилгаа тасардаггүй. Бараг нэвтрүүлгээрээ рекламанд тоглодог гэлтэй.

     

Одоо “Монголын мэдээ” агентлагын сэтгүүлч, хөтлөгч Дөлгөөн гэдэг нэртэй рекламын ширүүн од мэндэлж байх шиг. МҮОНТ-ээс бусад бүх телевизээр даатгалын нэг компанийг, дараа нь “Говь”-ийн ноолууран цамцыг танин мэдүүлж эхэллээ.

Тэгээд юу гэж? МҮОНТ бол төсвийн буюу татвар төлөгчдийн мөнгөөр мөнгөөр санхүүждэг. Чимгээ, Гүрбазар, Бадамсамбуу, Дөлгөөн нар тэндээс цалин авч ажиллахдаа үндэсний хэмжээнд үзэгдэж харагдсаныхаа ачаар танил болчихоод тэр нэр хүндээ хувийн компанийн барааг сурталчлахад ашиглаж, бас багагүй мөнгө түрийвчилж байна гэсэн үг.  Тэд янз бүрийн тоглолт цэнгүүн, одонгийн найр, хурим хөтөлдөг нь эх захаа алдсанийг ярихгүй байна. Гэхдээ энэ бол тэдний хувийн хэрэг биз.

Тэгтэл сонгуулийн сурталчилгаа эхэллээ. Чимгээ гэхэд сонгууль дөхөхлөөр МАХН-ын цагаан байр луу гүйдэг, лав 2004 оны МАХН-ын сурталчилгааны хамаг шоуг бас монгол телевизийн өөр нэг хөтлөгч Цоодолтой (нэрийг нь андуурсан байж магадгүй) хослон хөтөлж гүйцээсэн билээ. Энэ жил яахыг харж байя. Магадгүй, нөхөр нь улс төрд орж байгаа болохоор ИЗН-д зүтгэж магадгүй.

    

Саяхан хэд хоногийн турш телевизүүдээр гарч дууссан МАХН-ын өнгөрсөн 4 жилийн тайлагнасан том нэвтрүүлгийг МҮОНТ-ийн хөтлөгч Харцага цог золбоо дүүрэн хөтөлж сурагчдад үдийн цай түгээх зэргээр мэргэжлээ солиод байна.

Харин сонгуулийн кампани дуусахлаар Чимгээ, Бямбадорж, Харцага болон бусад хөтлөгч, сэтгүүлчид юу ч болоогүй юм шиг төв царайлан Монголын Үндэсний Олон Нийтийн Телевизийн дэлгэцэн дээр гарч ирнэ. Дараачийн сонгууль хүртэл…. Манайд намын гишүүн гэдгээ 3 жил хагас тас нууж байгаад сонгуулийн өмнөхөн нэр дэвшээд давхичихдаг, ялагдангуутаа буцаад төрийн томоотой албан хаагч болж хувирдаг хоёр нүүрт нөхдүүдээс нэг их ялгаа алга.

Posted in Монголын Үндэсний Олон Нийтийн Телевиз, Нийтлэл, нэвтрүүлэг | 1 Comment »

“Танайд хоноё” жүжиг болов

Posted by Бид on 2008/05/05

“25-р суваг” телевизийн “Танайд хоноё” нэвтрүүлгийн ээлжит дугаар Ням гаригийн орой гарлаа. Сүүлийн үед миний хувьд хамгийн сонирхолтой  хэсэг нь хонох айлаа хэрхэн олсноо харуулсан оршил жүжиг болоод байна. 

Энэ удаад хөтлөгч Алтантүрүү Улаанбаатарын хөл чимээнээс зайлсхийж сүүлийн үед архины хордлого энэ тэр дуулддаг тэр газрын амьдралтай танилцахаар шийдсэнээ мэдэгдээд замд гарч Багануур дүүргийн захиргааны өмнөх талбай дээр очиж тааралдсан хэдэн хүүхнийг зогсоож “Танайд хоноё” гэж гуйлаа.   Нэг эмэгтэй эгчийндээ амьдардаг ч ерөнхийдөө зөвшөөрөх янзтай байтал Алтантүрүү өөрөө “Эгч чинь уурлах болов уу?” гээд ухарчихаж байх юм. Ашиггүй айлд хонохыг хүсээгүй биз. Бас эрэгтэйчүүд буюу өрхийн тэргүүнүүдэд хандаагүй нь тохиолдлын хэрэг биш бололтой. (Би хасч монтажлан найруулсан бичлэгээс энэ дүгнэлтийг хийж байна. Бүтнээр нь үзүүлсэн бол…).

Дараа нь Алтантүрүү хүмүүсээс гуйхаа больж “Зөндөө  хүмүүсээс асуугаад бүтсэнгүй. Миний ард байгаа захиргааных нь байранд ороод Засаг даргынд хоноё гэж бүгдээрээ дайрья”  гэж хэлээд оров. Харуул манаа ч яасан юм, нариийн бичгийн дарга чтааралдахгүй явсаар Багануур дүүргийн Засаг дарга Д.Эрдэнэбатын албан өрөөнд явж орлоо.

Дараачийн үйл явдлууд төдийлөн сонирхолтой бус. Мэдээж Засаг дарга шууд зөвшөөрч Алтантүрүүг гэртээ авчрахад авгай хүүхдүүд нь  гал тогооны өрөөндөө эргэлдэн угтлаа. Гурван өрөө бололтой ердийн орон сууцны айл ажээ. Багануурынхны жишиг амьдрал иймэрхүү юм байна гэж хөтлөгч хэдэнтээ давтсан бол Засаг дарга өөрөө “Миний амьдрал нэг иймэрхүү” гэж лав 10 удаа хэллээ. Цааш өөрийгөө элдэв янзаар магтаж (бусдын жишгээр амьдардаг, авлигал авч үзээгүй, би хүнтэй харилцахдаа зарчим л ярьдаг гэх мэт), ухаантай санал дэвшүүлж (Засаг даргыг иргэд нь сонгодог байвал зүгээр), тэгснээ гурил элдэн цуйван хийж хичнээн ардач эр болохоо харуулж амжлаа. Алтантүрүү уламжлал ёсоор “Хэлсэн үгэндээ үнэнч, холбирдоггүй хүн юм шиг байна” гээд хэсэг магтаад “мешок”-тоо орж нойрсов. Хүнийг ганцхан оройн дотор танина гэдэг ховор чадвар шүү.

Харин өглөө босоод микрод сууж буцахаа хэлж Засаг даргаар үдүүлэн тэднийхээс гарсан юм. “25-р суваг” телевизийн хамгийн сайн нэвтрүүлгийнхээ сурвалжлах хэсгийг аппарат хэрэгсэлтэй нь явганаар илгээлээ гэж үү? Минийхээр бол, төлбөргүй нэвтрүүлэг хийдэг, иймээс унаа ч байхгүй гэдгээ харуулах гээ давхар жүжиг тавиад амжив. 

Хэрвээ үнэхээр төлбөргүй нэвтрүүлэг байсан бол Д.Эрдэнэбат нь УИХ-ын сонгуульд АН-аасаа нэр дэвших хүсэлтэй, бас Багануурын Засаг дарга төдийгүй тэргүүн баян, “Ноён” групп хэмээх том компанитай, Багануурын  хамгийн том “Ноён” телевизийн эзэн, Улаанбаатарт гэхэд л Алтантүрүүг өдөр болгон  хонуулаад цуйвангаар байтугай  дайлж чадах “Залуучууд” зочид буудлыг эзэмшдэг гэдгийг яриулж болох байсан даа.

Бямба гаригийн “Өнөөдөр”-ийн дугаарт Алтантүрүү том ярилцлага өгөхдөө  “Нэвтрүүлгийн нэр “Манайд хонооч” болсон байна лээ?” гэсэн асуултанд,  “Алтантүрүү сонгуулиар далимдуулж мөнгө хийж байна гэж. Мөнгө аваад оцойтлоо баяжсан юм алга, ажлаа хийгээд л явж байна. Сонгуультай холбоотойгоор долоо хоногт хоёр айлд хонож байгаа нь үнэн. “MN 25 дугаар суваг” телевиз бол арилжааны телевиз. Гэхдээ энэ үед хэнийд хонох вэ гэдэг нь хамгийн чухал. Монголын сэтгүүлчдийн нэгдсэн эвлэлээс 2007 оны “Ирээдүйтэй залуу сэтгүүлч” гэсэн шагналыг надад өгсөн. Өөрөө ч мэдээгүй, манай хамт олон шагналыг минь аваад ирсэн. Тийм болохоор би итгэл алдахыг хүсэхгүй байгаа. Хэн нэгнийг дэмжсэн, магтаж малгайлсан нэг ч асуулт тавьдаггүй. Байгаагаар нь л гаргахыг хүсдэг. Нэр дэвшигч итгэл даах хүн мөн үү гэдгийг харуулахыг хүсч байгаа” гэжээ.

Бас НТВ телевизийн “Үнэн үү” нэвтрүүлэг  (зочиндоо  асуулт тавьж үнэн хариулсан эсэхийг дэлгэцийн доогуур графикаар харуулдаг бололтой) сэтгүүлч Алтантүрүүг урьжээ. Ярилцлага гэхээсээ илүү сэтгэл зүйн сорилтыг санагдуулах  бөгөөд хөтлөгч Нямбаяр сүрхий асууж чаддаг залуу байна. Жишээлбэл, хуруугаа учиртайхан имэрч “ийм юм аваад айлд хоноод байна уу?” гэж асуулаа. Алтантүрүү  “Үгүйсгэхгүй. 25-р суваг бол телевиз арилжааны телевиз. Шударга, гарах ёстой хүмүүсийнд урилгаар хонож байгаа” гээд “мөнгө авлаа гээд асуудгаа л асууна, яаж асуулт тавихав гэдэгтээ байгаа юм” гэхчлэн өөрийгөө  хамгааллаа. Гэхдээ хөтлөгч Нямбаяр “Сонгууль дуустал УИХ-ын гишүүдээр явах юм байна”, “Үнийг нь авсан тэр хүндээ тааруулж ярина даа?”, “Бялдуучилж явахгүй гэж итгэж байна” гэдгээ хэлээд авч байв. 

Ийнхүү айлд “Танайд хоноё” нэвтрүүлэг “Захиалгаар хоноё”  юмуу “Дуудлагаар хоноё” болсон нь тодорхой болжээ. “Шударга, гарах ёстой” нэр дэвшигч гэдгийг яаж мэдэж байна аа? Алтантүрүүг урьсан болохоор уу? Мөнгийг нь авчихсан бол зөвхөн “Нэр дэвшигч итгэл даах хүн мөн” гэдгийг харуулж болно. Харин нэр дэвшигч “итгэл даах хүн биш” гэдгээ харуулах гэж мөнгө төлдөггүй л байхгүй юу… 

Иймээс гудамжинд хүмүүсийг зогсоож “Танайд хоноё” гэсэн жүжиг тавихын оронд “Би уригдлаа” гээд нэр дэвшигчийнд шуудхан явж очвол ядахдаа шударга юм даа.  Монголын сэтгүүл зүйн найдвар болсон шинэ үеийн нэгэн сайн сэтгүүлч элдэв улс төрчидтэй сэмхэн тохирч мөнгө төгрөг авчихаад дараа нь санаандгүй тааралдсан мэт уулзаж, гэрт нь очоод огт уулзаж байгаагүй мэт жүжиглэж үзэгчдээ хууран мэхэлдэг болсон нь  харамсалтай. Шинэ үеийн захиалгат сэтгүүл зүй ийнхүү эхэлжээ.

Posted in 25-р суваг телевиз, Нийтлэл, нэвтрүүлэг | 9 Comments »

Зөвхөн нэр дэвшигчидтэй “Ярилцъя”

Posted by Бид on 2008/05/03

МҮОНТ-ийн “Ярилцья” нэвтрүүлгийн ээлжит дугаар гурван хэсэгтэй байлаа.

Эхнийх мэдээж “Дэлхийн хэвлэлийн эрх чөлөөний өдөрт зориулагдсан ба сэтгүүлч С.Баярмөнх, МСНН-ийн ерөнхий нарийн бичгийн дарга Ү.Хүрэлбаатар, МСоХ-ны ерөнхийлөгч Р.Хадбаатар гэсэн гурван оролцов. Ү.Хүрэлбаатарыг мэдэхгүй, гэхдээ нөгөө хоёр нь сонгуульд нэр дэвшигчид билээ. С.Баярмөнхийг сэтгүүлч биш, “Сэрүүлэг” сонины эзэн, Гадаад хэргийн яамны Дипломат байгууллагуудын үйлчилгээ, аж ахуйн газрын дарга, УИХ-ын сонгуульд Баянхонгор аймагт МАХН-аас нэр дэвшигч, харин Р.Хадбаатарыг “Хүмүүс” сонины үүсгэн байгуулагч,  УИХ-ын сонгуульд Хөвсгөл аймагт МАХН-аас нэр дэвшигч  гэж танилцуулбал дээр байж. 

Дараа нь Монголд зуун ШТС байгуулж, хариуд нь шатахууныг хямдралтай нийлүүлье гэсэн “Роснефть”-ийн саналыг тойрч УИХ- дээр  эхэлсэн ширүүн маргааныг эрхэм  гишүүн Э.Бат-Үүл, Монгол Улсын Ерөнхий сайд С.Баяр хоёроор студид үргэлжлүүлэв. Аль ч талаасаа өндөр түвшний мэтгэлцээн байж хэний зөв бурууг шүүхээсээ илүү ямар сонголт хийвэл дээр вэ гэдэг талаар бодоход хүргэлээ. (Дашрамд хэлэхэд, Болгар улс аль 2004 онд НАТО-д элссэнийг хоёулаа мэддэггүй юм байна). Хөтлөгч Ц.Мөнхтөр чухал мэтгэлцээнийг зохион байгуулжээ.

Гэхдээ Мөнхтөр “Ашигт малтмал тойрсон асуудлаар…”   гэсэн гуравдахь ярилцлагаараа намынхаа нэр дэвшигчийг сурталчлахгүй байж чадсангүй. Тэр нь АМГТХЭГ-ын  дарга, АН-аас Баянзүрх дүүрэг, Багануурт нэр дэвшигч Лу.Болд байлаа.   Тэрбээр сонгуулийнхаа гол “хөзөр”   –  монголын ашигт малтмалыг бүх ард түмэнд эзэмшүүлэх “Баян Монгол” корпораци байгуулах тухай саналаа танилцуулав. Хөтлөгч дагаж баясан “Та манай шилдэг бизнесмен, улс төрчийн нэг …. Гайхамшигтай санал ….  Та ардчиллыг эхлүүлж байсан ….”  хэмээн байн байн дуу алдана. Сэрэмж алджээ. Нөгөөдөх нь төрийн албан тушаалтан гэдгээ мартаад “сая Багануурт Ардчиллын өдөрлөгийг зохион  байгууллаа… гэхчлэн үргэлжлүүлэв. Намын нэвтрүүлэг ч юм шиг…

Нэмж бичив: Э.Бат-Үүл, С.Баяр хоёрын мэтгэлцээнийг орой нь UBS телевизээр давтаж харагдсан. Мөн “Өнөөдөр” сонин текстээр буулгаж Даваа гаригийн дугаарт нийтэлсэн байна. Сайн мэтгэлцээн байжээ гэсэн үг. 

Posted in 2008 оны УИХ-ын сонгуулийн сурталчилгаа, Монголын Үндэсний Олон Нийтийн Телевиз, Нийтлэл, нэвтрүүлэг | Leave a Comment »

Алтай монголын бүх телевизээр ингэж агсарвал ч …

Posted by Бид on 2008/05/03

“25-р суваг “ телевизийн захирал З.Алтай УИХ-ын сонгуульд нэр дэвшихээр шийдэж Монголын телевизүүдийн холбооны өмнөөс хэвлэлийн хурал зарлан хуралдуулав. Түүнийг Ц.Балхжав (UBS), А.Ганбаатар (НТВ), Д.Сарангэрэл (TV5), Ц.Энхбат (TV90) нар дэмжихээр ирсэн байлаа.

МТХ-ны ерөнхийлөгч З.Алтай шуудхан эхэллээ: Би УИХ-ын сонгуульд Баянзүрх дүүргээс бие дааж нэр дэвшихээр шийдлээ. Уг нь дэвшье гэж бодоогүй, гэхдээ энэ улс орны байгаа байдлыг хараад тэссэнгүй, улсаа бодохоор шийдлээ, би амиа бодсон бол 25-тайгаа яваад байх байсан, 16 жил, 18 жил тэслээ, бидний ирээдүй дэндүү бүрхэг, дэндүү харанхуй байна, одоо иргэний үүргээ гүйцэтгэх боллоо. Аль нэг намд орохгүй, аль нэг нам хүчнийг дагаж далбайхгүй, аль болох энэ нам, улс төрөөс хол байя… Энэ нөхдүүд арван хэдэн жил буг болчихоод суугаад байна, тэгэхлээр  тэнд нэг амттай юм байна аа, тэдний нэг ч гэсэн суудлыг авья … Миний ард Монголын телевизүүд байна, монголын сая сая үзэгчид байна, телевиз шиг хүчтэй хэрэгсэл байхгүй, яадаг юм би телевизийн ашиглана, мэргэжлээ ашиглана… Намайг телевизээр их мөнгө олдог гэж бодож байна уу, юу ч олдоггүй, миний дансыг  шалгаад үз, юу ч гарахгүй…

Энэхүү хачин яриагаа 20 гаруй минутийн турш зогсоо зайгүй урсгав. Алтай юу болчихов оо? Зүгээр л сонгуульд нэр дэвшихээ зарлаад, бас телевизээрээ олигтой мөнгө олдоггүй, ядуугаа өрөвдүүлэх гээд байгаа юм бол хөрөнгө орлогын мэдүүлгээ гаргаад үзүүлэхийн оронд сагсуураад, тэгснээ агсраад ч байх шиг. Хэн л түүний дансыг шалгаад явав гэж…

Араас нь телевизийн захирлууд бие биенээ хөөргөж гарав: 
Д.Сарангэрэл: Би Алтайг 20 гаруй жил мэднэ…. Баянзүрх дүүргийн сонгогчдыг уриалж байна. Сэтгүүлчдийг уриалж байна.
З.Алтай: Монголын эмэгтэйчүүд Сараа шиг байгаасай.  Дэлхийн олон мундаг улс төрч сэтгүүлчдийн дундаас гарсан шүү… Ер нь чи өөрөө дэвшвэл яасан юм бэ?
Ц.Энхбат: Тавь шүргэж байгаа бидэн шиг улсууд албан тушаал энэ тэр горьдоод явдаггүй.  Энэ удаагийн сонгуулийн хууль азийн хоолтой тэстэй. Би бол телевизийнхээ зүгээс дэмжинэ.
Д.Сарангэрэл: Сэтгүүлчдэд үзэгнээс өөр хөрөнгө байхгүй, гэхдээ бид хандивын хүлээн авалт зохион байгуулна.
А.Ганбаатар: Үүнийг сонгуулийн сурталчилгаа болгож битгий  сурталчлаарай…
З.Алтай: Би УИХ-д ордог л юм бол… Орохгүй бол гомдохгүй ээ. 
Д.Сарангэрэл: Маргааш 3500 сэтгүүлч UB Palace-д үнэгүй шоу үзнэ. Билетээ авсан биз дээ…

Хэвлэлийн хурлыг шууд дамжуулсан “25-р суваг” телевизийн 2-р суваг төгсгөлд нь “Үүргэвчтэй аялал“ нэвтрүүлгийнх нь хөгжмийг эгшиглүүлж захирлынхаа сурталчилгааг эхлүүлэв. Сонгуулийн кампани, сурталчилгааг албан ёсоор зарлаагүй байхад телевизийн захирлууд ингэж хавсайдаж болох уу? Тэр жигшээд байгаа улс төрчдөөсөө ялгаагүй нөхдүүд байна. 

2000 онд байх аа, Монголын радиогийн сэтгүүлч М.Цагаан УИХ-ын сонгуульд Говь-Алтай аймгаас нэр дэвшихдээ нутагтаа нэг ч очихгүйгээр зөвхөн өөрийн хөтөлдөг нэвтрүүлгээр сурталчилгаа хийсээр байгаад гарчихна гэж тооцоолж хэдэн сар амаа чилтэл донгодоод бараагүй билээ.  Харин энэ удаад З.Алтай монголын бүх телевизээр сурталчлуулсаар байгаад гарч ирэхээр шийджээ. Гэхдээ энэ хэвлэлийн хурал дээрх шиг дүвчигнөөд, түүнийг нь монголын бүх телевиз үзүүлээд байвал эсрэгээр ч эргэж мэднэ.

P.S: Энэхүү хэвлэлийн хурлыг “25-р суваг” тэр өдөртөө хэдэн удаа, Бямба гаригийн үдэш хөтөлбөрт орсон Алтантүрүүг айлд хонуулахгүй “амрааж” байгаад бүрэн үзүүллээ. Ням гаригт Алтайн алдарт “Үүргэвчтэй аялал” нэвтрүүлэг гарч эхэллээ. Гэхдээ сонгуулийн сурталчилгаа гэдэг бол гадаадад оччихоод монгол хэл мэдэхгүй улсуудыг монголоор муулж зугаацахаас арай өөр байж таарна…

Posted in 25-р суваг телевиз, Нийтлэл, нэвтрүүлэг | 1 Comment »

Швейцаричууд Шийлэгдамба сайдыг бишрэн ярилцахыг TV5-ын сурвалжлагч сонсчээ

Posted by Бид on 2008/05/02

Монгол Улсын байгаль орчны сайд Г.Шийлэгдамба өнгөрсөн 4-р сарын сүүлчэээр Европын холбооны орнуудаар ажлын айлчлал хийсэн юм байна.   Тэгэх далимаар монголын байгаль хамгаалагч хүүхдүүдийг Австри улсад аялуулсан нь УИХ-ын сонгуульд нэрээ дэвшүүлэх төрөлх Өвөрхангай аймгаас нь голдуу байсан төдийгүй мөнгө зардал нь байгаль орчны чиглэлийн нэгэн төслөөс гарчээ. Сайдын албан тушаалаа ашигласан энэ баримтыг манай сэтгүүлчид илчилбэл нэр дэвшихийг нь болиулахад ч хангалттай. Гэтэл Шийдэгдамба сайд тэднийг бас худалдаад авчихжээ.  Лав TV5 ба МҮОНТ-ийн сурвалжлагчдыг (мэдээж төсвийн мөнгөөр) дагуулаад явсан учраас тэгэж хэлж байгаа юм. 

Зугаалгаас ирсэн сэтгүүлчид юу үзүүлэв? 
TV5 телевизийн “Цаг” мэдээллийн хөтөлбөр  залуу сайдыг хэдэн өдөр дараалан амьсгаадан байж магтлаа. Өдөрт дараалан 5 уулзалтанд ороод ядраагүй Шийлэгдамбын ажил хэрэгчийг швейцарчууд биширсэн төдийгүй залуу сайдын гарын үсгийг хуучин монголоор зуруулж авсандаа баярлаж бараг л найр наадам хийсэн юм байх. (Харин  нэгэн шүүмжлэлийг зоригтой хэлсэн нь Швейцариас нэг тоног төхөөрөмж авахад шаардлагатай хуулийг батлахгүй удааж залуу сайдын ажлыг уясан манай УИХ байв). 

Сүүлдээ хэрэгтэй хэрэггүй уулзалтуудаас (үзэгчдэд сонирхоод байх юмгүй) үзүүлэх юм дуусаад хөшөө дурсгал энэ тэрийг сонирхуулдаг болов.  Аз болж залуу сайд очсон газрынхаа Элчин сайдын яамдаар ороод гарсны ачаар TV5-ын сурвалжлагчийн шинэ магтаал ундрав. Монголынхоо төлөө Европод зүдэрч суугаа тэр гурваас Францад дахь элчин сайд Алтангэрэл маш залуу мөртлөө франц хэлийг  францчуудаас илүү мэддэг (түүнтэй францаар хөөрөлдөж шалгаад авчээ), Австрид суугаа Энхтайван герман боловсролтой учраас яамныхаа хөрөнгө санхүүг хэтэрхий сайн барьдаг (дансыг шалгаад амжиж), харин Швейцарьт суугаа Болдбаатар Орост боловсрол эзэмшсэн учраас ёстой “мужик” (ганц шил юм хуваасан байх), ингээд энэ гурав  бол “хамгийн шилдэг дипломатчид ”гэж дүгнэв. Гэхдээ Монголын уу, эсвэл Европод уу гэдгийг хэлэхээ мартав. “Дэлхийн хамгийн хамгийн шилдэг дипломатчид” гэсэн бол би лав гайхахгүй.

МҮОНТ-ийн тухайд бол дээр дурдсан  байгаль хамгаалагч хүүхдүүдийн аялалын тухай нэлээд хэдэн сурвалжлагыг “Цагийн хүрд”-ээрээ үзүүлэв. Эхэндээ дан хүүхдүүд гоё байгаль, амьтны хүрээлэн, усан цахилгаан станц үзээд сайхан явж байна, гэнэт  залуу сайд гарч ирээд ярилцлага өгч сонирхолгүй болгочих юм. Энэ бүхнийг төсвөөс, төслөөс санхүүжүүлсэн залуу сайд эрхээ эдэлсэн хэрэг. Шийлэгдамбын энэхүү түүхэн айлчлалын сурвалжлагыг бас 25-р суваг телевизээр үзүүлсныг бас дурдая. 

Posted in Нийтлэл, нэвтрүүлэг, TV5 телевиз | 1 Comment »