АЖИГЛАГЧ

Монголд, Монголын хэвлэл мэдээлэлд юу болж байна?

Archive for the ‘+ СОНИНУУД’ Category

Цөмийн эсрэг хөдөлгөөн ба цаасгүй сонин

Posted by Бид on 2012/12/14

Сонгуулиас хойш хэдэн сар намжаад байсан цөмийн асуудлыг Засгийн газар 100 дахь хоногийнхоо үеэр өөрөө дахин шуугиуллаа. Тэр нь цөмийн технологи, цацраг идэвхт бодисыг Монголд тэртээ тэргүй хаа сайгүй ашиглаж байгаа тухай юм. МҮЭ-үүдийн Соёлын төв ордонд  цөмийн үүсгүүр хэрэглэдэг шинжлэх ухаан, эрүүл мэнд, геологи, уул уурхайн байгууллага, компаниуд өдөрлөг зохион байгуулж ач тустай, аюулгүй талаар сэнхрүүлжээ. Арга хэмжээний нэр нь “Амьдралд ойрхон хэрэглээ”. Хэвлэл мэдээлэл дагаад туучихсан.

Ингэх болсныгоо монголчуудын дунд буруу ойлголт, төөрөгдөл байгаагаар тайлбарлав. Үнэндээ монголчууд зөв ойлголттой. Цөмийн технологи, наад зах нь эмнэлэгт очоод рентгенээр харуулахаас хэн ч айдаггүй. Цаанаасаа зөв, болгоомжтой, аюулгүй ажиллуулах нь төрийн асуудал. Харин Монголд цөмийн хаягдал оруулж булшлахыг эсэргүүцсэн гэдэг бол үнэн. Тэмээ гэхэд ямаа гэж хариулсан сурталчилгаа байжээ.

Ингэж хадуурсан нь сэжиг төрүүлж орхилоо. 100 хоногийн үеэр Цөмийн энергийн газрын даргын үүргийг түр орлон гүйцэтгэгч Н.Тэгшбаяр, хэлтсийн даргаа дагуулан ирж МҮОНТ-ээр ухуулга хийх үеэрээ (нөгөө талыг оролцуулаад мэтгэлцүүлж болоогүй юм байх даа? Заавал Ганбаатарыг хүлээх хэрэг юун)  ам нь халж цөмийн технологи, хаягдал, аюулгүй байдлын талаарх асуултанд “ард түмэн дандаа зөв байдаггүй” маягаар цэцэрхэж суув. Дээрхэн цөмийн эрчим хүчний талаар Ерөнхий сайд Н.Алтанхуяг УИХ-д танилцуулга хийхдээ “ард түмнээсээ асууна, болохгүй бол больчихно” гэж мэдэн будлиад байсан. Монголд цөмийн хаягдал булшлахгүй гээд зарлачихсан байхад шүү! Тэгтэл Монголд цөмийн хаягдал булшлахаар хэлэлцээр хийж байсан гэж эвслийн Засгийн газрыг “гүтгэсэн”, ураны баахан лицензийг хууль бусаар олгосон гэж тоо, цифрээр нотлуулаад байсан С.Энхбатыг элчингээр томилчихлоо…

Бүр сэжигтэй байна шүү. Гэхдээ эрх баригчдын хэлсэн, хийсэн хоёрыг хянадаг “Цөмийн эсрэг хөдөлгөөн” байдагт найдья. Тэд сонин гаргадаг юм байна. Цаасан дээр хэвлэгдсэн сураг дуулсан, гэхдээ тааралдаагүй. Харин pdf-ээр чөлөөтэй үзэж болно.

Өнөө цагийн хэвлэл амар болжээ. Сонин мөртлөө цаасгүй. Цаасгүй хэрнээ сонин…

Голомт сонин_Page_01 +

Сонины дугаарыг бүрэн эхээр татаж аваад pdf хэлбэрээр уншаарай – Голомт сонин №1.

Posted in + СОНИНУУД | Leave a Comment »

Шүүмжилсны ачаар …

Posted by Бид on 2012/04/03

Аливаа хүн, хүмүүс, байгууллага, түүний дотор хэвлэл мэдээлэл эгзэгтэй үед шалгагддаг. Өдөр тутмын сонинуудаас хамгийн төвийг сахидаг, туйлширдаггүй нь “Өнөөдөр” сонин гэх дүгнэлт үе үе сонсогддог. Ердийн цагт ерөнхийдөө тийм, гэхдээ оны эхэнд Ардчилсан Нам хамтарсан Засгийн газраас гарахаа зарласны дараах өдрүүдэд хэний талд вэ гэдгээ харуулав.

2012 оны 1-р сарын 9-ны дугаараар жишээ татахад, тэргүүн нүүрэндээ энэ сэдвээрх багц нийтлэлийн дээгүүр өгсөн гарчиг “Ардчилсан нам түүхэн сонголтыг” ТҮҮХИЙРҮҮЛЛЭЭ” байлаа. Редакцийн албан ёсны байр суурь энэ. Араас нь хөвөрсөн төстэй гарчгуудаас  нэгийг дурдвал “Мааниа уншсан АН”.  Дотор нь “…өөрийнхөө хойдохыг уншчихсан нь хэдхэн сарын [дараа] тодорхой болох бус уу?” гэх мэтээр бичжээ.

Өнгөрсөн 2,3-р сард тус сонин Өвөрхангай аймгийн Хужирт суман дахь рашаан сувиллын эргэлзээтэй хувьчлалыг эргэн сурвалжилж “Алдагдсан рашааны мөрөөр”, “Мөнгөний ундарга ба алдагдсан рашаан” шүүмжилсэн цувралыг нийтэлснийхээ араас “Алдагдсан рашаан, орхигдсон эрдэст усны тухай үнэнийг өчихүй” нэртэй, ямар нэгэн тайлбар, нэр хаяггүй өгүүлэл гаргасан. Уншихад, нөгөө будлианы эзэн “Жем Хужирт” компанийн захиалга ажээ. Одоо эрэн сурвалжлага үргэлжлэх болов уу гэвэл тэгсэнгүй.

Хэрвээ “Өнөөдөр” сонин шүүмжлээгүй бол энэ орлого орохгүй байсан.

Posted in "Өнөөдөр" сонин | Leave a Comment »

Шударга телевизийн ноцтой алдаа

Posted by Бид on 2011/11/06

Экс ерөнхийлөгч Н.Энхбаярын телевиз гэж “Өдрийн сонин”-д бичүүлснийхээ хариуг барьж TV9 тус телевиз дараах тайлбарыг нэвтрүүллээ.

“….”Өдрийн сонин” бол хуучнаар парламентын үйл ажиллагааг сурталчилдаг байсан “Ардын эрх” сонин. . Энэ сонинг 1996 онд өнөөгийн Монгол Улсын Ерөнхийлөгч Элбэгдорж хувьчилж авснаар  “Өдрийн сонин” нэртэй хэвлэгдэн гарч байна. Ардчилсан намын эрх ашгийг хамгаалдаг. Ерөнхийлөгч Элбэгдоржийг дээрх хувьчлал хийж байхад буюу 1996 онд Засгийн газрын үйл ажиллагааг “Засгийн газрын мэдээ” сонин сурталчилдаг байлаа. Хоёр намын тохироо ёсоор Ардчилсан Нам “Ардын эрх” сонинг авсан бол тухайн үед МАХН-ын дарга асан Энхбаяр “Засгийн газрын мэдээ” сонинг хувьчилж авсан юм. Эдүгээ тус сонин “Зууны мэдээ” нэртэйгээр хэвлэгдэн гарч байна”.  

Маш сонирхолтой,  гэхдээ тун ноцтой алдаа гаргасан тайлбар болжээ. Нэгдүгээрт, тэр хувьчлал гээд байгаа үйл явдал 1996 биш, 1998 онд Хэвлэл мэдээллийн эрх чөлөөний тухай хууль гарсны дараа жил болсон. Хоёрдугаарт, дээрх хуулийг хэрэгжүүлэх арга хэмжээний тухай УИХ-ын 103 дугаар тогтоол гаргаж “Ардын эрх”, “Засгийн газрын мэдээ” сониныг 1999 оны 1-р сарын 1-ны өдрөөс татан буулгасан юм. Төрийн эрх мэдэл, татвар төлөгчдийн мөнгөөр бий болгосон “капитал”-ыг хувь хүмүүст ашиглуулахгүй, өдөр тутмын сонины зах зээлд шударга өрсөлдөөнийг хангахын тулд ингэжээ. Нэгэнт татан буулгасан тул хувьчлах тухай яриа байхгүй. Үүнийг давхар баталгаажуулж нэрсийг нь 5 жилийн хугацаанд дахин ашиглахгүй байхаар заасан.  Гэтэл хоёр нам хуйвалдаж хувьчилж авсныг TV9 илчилж орхилоо. Тэр үеийн Төрийн өмчийн хорооноос зохион байгуулж хоёр сониноос үлдсэн өмч хөрөнгө, байрыг “Ардын эрх”, “Засгийн газрын мэдээ” нэртэй хувьцаат компани болгож холион бантан хутгаад (хуулийг даапаалсан байгаа биз) хуучин хамт олонд нь давуу эрх нэрээр өгч тусалсан юм. 

Сүүлийн хэдэн жил шударгаараа зүй ёсоор гайхагдах болсон TV9 телевиз гэнэ алдаж бас нэгэн шударга эрхмийг хэвлэх үйлдвэр, “Өргөө” зочид буудал” дээр нэмээд гуравдахь хэрэгт оруулж Ц.Нямдорж гэдэг өөр нэг шударгын аманд хийчихвэл яана гэж бодтол санаа зовох хэрэггүйг ойлголоо. Тэр хувьчлал гээчийн хөөн хэлэлцэх хугацаа аль хэдийнэ өнгөрсөн.

Posted in "Зууны мэдээ" сонин, Улс төр, эдийн засаг, TV9 телевиз | 1 Comment »

Арван зургаа!

Posted by Бид on 2011/10/15

Хамгийн сүүлд “Үндэсний мэдээ” мэндэлснээр монголын өдөр тутмын сонинуудын тоо 16-д хүрлээ. Тоочвол 1.“Өнөөдөр”, 2.“Өдрийн сонин”, 3.“Зууны мэдээ”, 4.“Өглөөний сонин”, 5.”Ардын эрх”, 6.“Үндэсний шуудан”, 7.”Өдрийн шуудан”, 8.”Монголын үнэн”, 9.“Ардчилал”, 10.“Монголын мэдээ”, 11.”Нийгмийн толь”, 12.”Улс төрийн тойм”, 13.”Нийслэл таймс”, 14.”Улаанбаатар таймс”, 15.”МОНЦАМЭ-гийн мэдээ”, 16. “Үндэсний мэдээ”. Харин “Өнөөдрийн тойм” гэж байгаад долоо хоногт ганц болсон тул хаслаа.  

Энэ олон өдөр, өглөө, сонин, шуудан, мэдээний нэрнүүд дунд золтой л төөрчихсөнгүй. Үдэш, орой нэртэй сонин л алга. Дэлхий даяар хүмүүс орой гэртээ хариад зурагт шагайдаг болсноор ийм сонингууд үзэгдэхээ больсон төдийгүй бусад бүх сонин хаа сайгүй уналтанд орж байхад Монголд эсрэгээрээ, олшроод байдаг. Манайхан үүнийг эрүүл биш үзэгдэл хэмээн шүүмжлэхдээ  АНУ-ын нийслэл Вашингтонд өдөр тутмын хоёрхон сонин, бусад хотууд цор ганц сонинтойг жишээ татдаг. Тэнд бүх юм тогтчихсон бол өнөөдрийн Монгол (хэдэн жил гараад хаагдсан, Н.Энхбаярын гэгддэг байсан өөр нэг сонины нэр)-ын үймсэн улс төр, эрх ашгууд, жижигхэн орон болоод ч тэр үү гараа сунгаад хүрчихмээр энүүхэнд харагддаг төр лүү хийдэг авиралтууд, эдийн засгийн гялс өсөлт, бизнесүүд, энд тэндээс цутгасан их мөнгө, Оюутолгой, Тавантолгой, геополитик … гээд ид бужигнаж байна. Бүгд монголын, үндэсний, өдөр тутмын, чөлөөт гэсэн тодотголтой энэ олон сониныг хараад “манайх ч улс шиг улс юм аа” гэж бодлоо.

Өдөр тутмын сонинуудыг ижилхэн юм бичдэг гэж шүүмжилдэг. Бүгдээрээ Улаанбаатарын утаан дор, Төрийн ордонг тойрч мэрдэг учраас аргагүй. Гэхдээ тус бүр өөрийн өнцгөөс шагайдаг тул хоёр гурвыг уншихад овоо бүтэн юм ойлгогддог. Нэгэнт мэдээний машин эргэж байгаа тул муухан сонины муу дугаарт хүртэл сонин юм тааралдана. Бүгдийг ядахдаа гүйлгээд харж амждагсан бол их юм мэдэж авна. 

1989 онд өдөр тутмын ганцхан сонин – “Үнэн” гарч 120 мянган хувиар хэвлэгдэж байсан  бол 1990 онд Төрийн төв хэвлэл – “Ардын эрх”, Засгийн газрын төв хэвлэл – “Засгийн газрын мэдээ”-ийг байгуулж хоёулаа Төрийн ордон дотор лав 4-5 жил байрлаж байсныг эргээд санахад итгэмээргүй. Дөнгөж олж авсан эрх чөлөөгөө сэтгүүлчид буцаагаад өгч байжээ. 1996 оны сонгуулийн өмнө “Ардын эрх”-ын цаанаас “Өнөөдөр” нэрийг сэмээрхэн тодруулж, “Засгийн газрын мэдээ” бас дууриан энэ хоёр сониныг хувьчилж авахыг оролдсон ч бүтэлгүйтсэний ачаар өнөөдрийн “Өнөөдөр” сонин төрсөн түүхтэй. 1998 онд Хэвлэлийн эрх чөлөөний тухай хууль батлагдсаны дараа “Ардын эрх”, “Засгийн газрын мэдээ” сонинууд “Өдрийн сонин”, “Зууны мэдээ” нэрээр хоёр том намынханд нэг нэгээр очсон билээ. Хожим тэд баримжаагаа алдаж “бид хувьчилж аваад…”, “манайх хувьчлагдсанаас хойш…” гэх мэтээр үе үе ам алддаг бол саявтар “Зууны мэдээ” сонины 20 жилийн ойг тэмдэглэнэ” гэж том тэнэгтэв. Хуулиар бол хоёуланг татан буулгаад нэрийг нь 5 жилийн турш хэрэглэхийг хүртэл хориглосон юм. Гэхдээ энэ бүхэн түүх болжээ.  

Өдөр тутмын сонинууд бол монголын хэвлэл мэдээллийн хамгийн нөлөөтэй бөгөөд чанартай нь. Бусдад зориулж бичсэн юм гэдэг бол радио, телевизээр ярьж дүрсээр харуулан хүний мэдрэхүйд шууд хүрэхээс илүүтэйгээр уншигчийн бодол, эрэгцүүллээр дамжих учраас сонины үг илүү гүнзгий, оновчтой, цэгцтэй байхаар өөр аргагүй. Улс төр, нийгмийн  үйл амьдралын даацтай баримт, утга учиртай дүгнэлт,  хамаг шинэ санаа сонины хуудаснаа төрж байна. Мэдээж буруу зөрүү, дэмий юм зөндөө бичигддэг ч өдөр тутмын сонинууд яах аргагүй Монголын түүхийн анхны ноорог билээ.

Телевизүүд монгол хэлийг бужигнуулж задалж явдаг бол эмхэлжсахиулдаг нь өдөр тутмын сонинууд юмсан. Социализмын үед “Үнэн” сонинд яаж бичсэнээр тогтдог байсан бол одоо өөр болж саяхны нэг сонинд  “Бид бахархаж явдгиин”  гэсэн гарчиг тааралдав. Тэр сэтгүүлч (бодвол годгоносон охин биз) буруу бичсэнээ мэдээ ч үгүй өнгөрсөн биз.

Ажилдаа ирээд чихэртэй хар цай оочлон “намын үнэн” унших сахилга ахмад үеийнхэнтэй хамт үлдэж хоцорсон байгаа. Дээрээс нь конторт (биш ээ, офист) сууж кофе ууж сонин гарчиглах барууны маягийн соёл нэмэгдсэн. Зарим сонин дэлгэж уншихад амар гэж гонжийсон урт форматад шилжсэн бол нэг нь Financial Times-ийнх шиг шар цаасанд дээр хэвлэдэг болов. Бидний үеийнхэн цаасан дээрх бичгийн соёлын сүүлчийн төлөөлөгчид байж мэднэ.  Зузаан роман, үргэлжилсэн тууж, уран гоё өгүүллэгээс эхлээд часхийсэн өгүүлэл уншихын сайхныг бид  мартаагүй. Урт бичих, түүнийг унших хэрэгцээг одоохондоо сонинууд хангаж байна. 

Өдөр тутмын сониныг унших өөр нэг шалтгаан бол зар сурталчилгаа юм. Албаны арга хэмжээ, дотоод гадаадын хурал чуулган, өндөр цалинтай ажил, албан тушаал, төсөл хөтөлбөрийн зар, сая тэрбумын өртөгтэй тендерийн мэдээлэл зөвхөн өдөр тутмын сонинуудад албан ёсоор нийтлэгддэг (ингэж цаасан дээр хэвлэгдэж байжхүчин төгөлдөр болдог) бөгөөд өөр хаанаас ч үзэх боломжгүй.

Өдөр бүр 8,16,32 нүүрийг үг үсгээр голдуу дүүргэж хэвлүүлээд орон даяар түгээнэ, үүнийгээ бүтэн улирлын өмнө амлаж хүмүүсээр захиалуулж мөнгийг нь авна гэдэг бол том менежмент. Гэхдээ яаж ч хичээгээд хувь ширхэг өсөхөөсөө өнгөрсөн. 2000 оноос хойш өдөр тутмын сонинууд тоо зарлахаа больж зарим нь “манайх захиалгаараа манлайлж торгон жолоо өргөв” гэж сагсуурдаг хэрнээ бусдыгаа дөнгөж 5300 гэх мэтээр илчилдэггүй. Яагаад гэвэл цаадуул нь “танайх өөрөө дөнгөж 5100 байж” гэх аюултай. Хэвлэл захиалга явуулдаг “Монгол шуудан” компанийг зарлах гэхэд “бизнесийн нууц” гэж загнаад болиулсан. Товчхондоо, 10 мянгаас дээш ширхэгтэй сонин байхгүй. Одоо бүгдийг нэмээд, түүний дотор “Үнэн” (одоо “Монголын үнэн”)-ийг оруулаад ч 1989 оны “Үнэн” сонины хувь ширхэгийн талд ч хүрэхгүй шахам.  Харин тэр үеийн “Үнэн” дэндүү туранхай буюу дөрөвхөн нүүрээр гарч байсан бол одоогийн сонинуудын таргалсныг яана.  Улс төр, зөрчил тэмцэл, бас хөрөнгө мөнгө зүйрлэхийн аргагүй арвин болжээ.   

Өдөр тутмын сонин том бизнес төдийгүй улс төр. Ихэнх орлогоо захиалгаас  биш ил далд сурталчилгаа,  захиалгат, гэрээт нийтлэлүүдээс олдог болжээ. Иймээс ар тал, эзэмшил, хэлхээ холбоогоо зарлах маш дургүй, зарим нь тас нууна. Жишээлбэл “Өдрийн шуудан” МАН-ын ерөнхий нарийн У.Хүрэлсүхийнх, “Женко” Баттулга “Ардчилал”-аас гадна “Монголын мэдээ”-г авсан, гэхдээ хоёрдахийг хэн нэгэнд шилжүүлж байгаа, дөнгөж мэндэлсэн “Өглөөний мэдээ” сонин “Монгол газар”-ын Мянганбаяр, “Ажнай” Бат-Эрдэнэ хоёрын нэгнийх гэхчлэн ам дамжин сэжиглэгддэг.  (Хасагдсан “Өнөөдрийн тойм” бол УИХ-ын гишүүн С.Эрдэнийнх)   

Сонинууд телевизүүдтэй хоршиж олигтой чаддаггүй (шинэ дугаарын тойм уншуулахыг эс тооцвол) бол Интернэт рүү шууд нүүж хоёр нутагтан болцгоожээ. Сонины хуудас А2 хэмжээгээр хязгаарлагддаг бол нэтэд мянган хуудас оруулсан ч дэлгэцийн доошоо эцэс төгсгөлгүй урсана. (Ёроол байдаг болов уу?) Уншиж барахаа  л хэлцгээе. Сонинууд өөрийн сайтыг нээцгээж нийтлэлээсээ их багаар тавьж үнэгүй уншуулдаг болсон, харин харамлаж үлдээснийг өөр сайтууд олон таван үггүй хуулаад тавьчихаж байна. Аажмаар хамгийн том уншлагын танхим гэж номын сангууд биш Интернэтийг хэлэх болж, үгээр урт бичих, унших соёлыг Интернэт аварч байна. Твиттерийн 140 тэмдэгтээр бичихийг хэлээгүй.

Уг нь цаасан сонин үнэ цэнэтэй. Гартаа аваад дэлгэдэг, буцаагаад эвхэж болдог, уншиж байгааг илчилж шажигнадаг, зай талбайг  мэдрүүлдэг, шинээрээ будаг ханхалдаг, хуучрахаараа тэр өдрийн биет дурсгал болж хадгалагдана. “Шарласан” сонин гэж ярьдаг. Зуун жилийн өмнөх Нью-Йорк таймс сонины дугаарт яг тэр өдөр Европоос ямар усан онгоц ирж зангуугаа хаясан, нэр алдартай хэн эрэг дээр буусныг хүртэл мэдээлсэн байдаг. Гуч, дөчин жилийн өмнөх “Үнэн” сониныг эргүүлж социалист уралдаанаас эхлээд олон улсын  мэдээг уншихад ядахдаа зугаатай. Хүмүүс үзэхээрээ бутниргээд салдаггүй байсан бол цаашлах тусам түүхийн баримтын хувьд  тайван хандах биз.

Хавтаснаас эхлэн хуудас хуудсаар эргүүлэхэд гарчиг, текст, зураг чимэглэлүүд яг хэвээрээ дэлгэцэн дээр гарч ирдэг pdf хэмээх үзэгддэггүй цаастай сонин, сэтгүүл, ном надад маш таалагддаг. Цаасан дээрээ зүс царай тааруухан “Өдрийн сонин”-ыг онлайнаар захихад фото зураг нь хүртэл өнгөтэй болоод ирсэн байх юм.   

“Зул бөхөхөөсөө өмнө бадамладаг” гэж үг бий. Өнөөдөр өдөр тутмын цаасан сонины тоо 16 хүрсэн нь тэр байх. Гэхдээ цаасан хэвлэл мөхөх хараахан болоогүй. Одоо тайзан дээр сэтгүүлүүд гарч ирлээ. Адилхан цаасан дээр мөртлөө өдөр тутмын сонин шиг яарч тэвдсэн биш даацтай, үгээр урт, бүр урт бичдэг, зураг дүрсээр бүлтэртэл гоёдог, ном шиг зузаан учраас нэгмөсөн багтаадаг мөртлөө авсаархан…

Posted in + СОНИНУУД | 2 Comments »

25 машины төлөө!

Posted by Бид on 2011/10/05

2011 оны дөрөвдүгээр улирлын хэвлэл захиалгын гол баатар “Үндэсний мэдээ” байлаа. Бүтэн сарын турш гудамж, дэлгэц хоёроор нүд эрээлжилтэл сурталчлахыг харахад гарч эхлээгүй байсан энэ сонин амбиц, мөнгө хоёроор хахаж байх шиг санагдсан. Толгойдоо шууд л соёмбыг залжээ. Сүхбаатарын талбай дээрээс аймгууд руу 21 фургон хөлөглөсөн сурталчилгааны багуудыг илгээсэн. Бас нэг орой зад шоудав. “XXI зууны түүхэнд ганцхан удаа” гэж байгаад захиалагчиддаа 25 автомашин амалсан юм. Аймаг бүрт нэг, Улаанбаатарт дөрөв ногдоно. Гэхдээ энэ өгөөмөр сониныг бушуухан захиалсан хүмүүс  бяцхан хууртсан байлаа. Дараачийн дөрвөн улирал дараалан таслалгүй захиалах ёстойг дараа нь мэджээ. (Нэлээд хэдэн жилийн өмнө өвөр монгол эзэнтэй “Бизнесийн мэдээ” сонин аймаг болгонд нэг машин амлахдаа “нэг аймгийн захиалагчдын тоо 4000 хүрсэн тохиолдолд” гэдгээ хэлэхгүйгээр хулхидсаныг санагдуулав. Мэдээж монголын бүх аймаг онхолдсон). “Үндэсний мэдээ” дөрвөн улирал дараалж гарахгүй бол эхний захиалагчид яахав? 

“Үндэсний мэдээ” хэний мөнгө вэ? Сонины эхний дугааруудыг шуудангийн хайрцагт шургуулж үнэгүй бэлэглэснийг авч үзээд ил тодын энэ их талбай дээрээс үүсгэн байгуулагч “Үндэсний мэдээллийн сүлжээ” ХХК-ийн цаана чухам хэн байгааг мэдэж чадсангүй. Сураг сонсоход, бас энэ тэрийг үзэхэд “Зиндаа” сонин, zindaa.mn, factnews.mn сайт, тэдэнтэй төрөл садан сайтуудын эзэд нийлж байгуулсан, харин мөнгийг “Монгол газар”-ын Мянганбаяр, эсвэл “Ажнай”-н Бат-Эрдэнэ нар гаргасан гэлцэнэ. Энэ Бат-Эрдэнэ “Эх орон” телевизийг бас худалдаж авсан гээд байгаа.

Төрийн ордон руу харсан сурталчилгааны самбар ↓

 

Posted in + СОНИНУУД | Leave a Comment »

“Өглөөний сонин”-ы сурталчилгааны баг

Posted by Бид on 2011/10/03

Posted in + СОНИНУУД | Leave a Comment »

Бат-Эрдэнэ, Бен Ладен, Жириновский …

Posted by Бид on 2011/06/17

Урт нэртэй  ч түүнээсээ хавьгүй урт гол мөрөн, бас үй түмэн модыг хамгаалах учиртай хуулийг хүний өөрийнгүй нийлээд унагахад ойрхон байна.

Ноднин зун “Бороо гоулд”-ийн ерөнхийлөгч Жон Казакофф сэтгүүлчдэд хандахдаа, уг хуулийг өөрчлүүлэхээр уул уурхайн үндэсний ассоциаци лобби явуулж эхэлсэн, өөрчлүүлж чадна гэдэгт итгэлтэй байгаа учраас олборлолт явуулах бэлтгэлээ хангаж буйгаа шулуухан зарласан юм. Тэгвэл энэ хавар гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газрыг алтны компаниуд дур мэдэн ухаж довтолгоогоо эхэлсэн бол УИХ-ын танхимд хэсэг гишүүд хуулийг засварлах төслийг өргөн барьж алтны төлөөх тэмцлийн хоёрдугаар фронтыг нээв.

Том мөнгө шидэхэд хэвлэл мэдээлэл яаж хоцрохов. Зүв зүгээр байснаа УИХ-ын гишүүн Б.Бат-Эрдэнийг амалж аваад өвдөг шороодуулахыг завдах болсон “Улс төрийн тойм” сониноор жишээ авсугай. Зарим нийтлэлийг ишлэв.

2011 оны 5-р сарын 24.
“Б.Бат-Эрдэнэ гишүүн ээ, Заамарт ямар мэх хийчих нь энэ вэ?”
… Заамарынхан заамдалцаад авлаа. “Б.Бат-Эрдэнэ гишүүн цагтаа “Хүч” нийгэмлэгийн тамирчин байсан. УИХ-ын Хууль зүйн байнгын хороог ч даргалж явсан хүн. Тиймээс хүчний байгууллагынхныг бидний эсрэг турхирав уу” хэмээх хар хорын үгс Заамар хавиас дуулдаж эхэллээ… Бас Б.Бат-Эрдэнэ гишүүнээс “Заамарт заамдалцаан үүсгэхгүй л бол турж үхчих гээд байна уу” гээд асуучихмаар ч юм уу…

2011 оны 5-р сарын 27.
“Бин Ладен “амилсан” гэдэгт тэд итгэсэн бололтой”
… Төрийн “хар салхи” уул уурхайн салбарынхныг дайрав… Бүр нууц ажиллагаа явуулж, төрийн нүд, чих болдог тагнуулынхан гэгээн цагаан өдөр уурхайчдын “омог” уруу дайрцгаав. Үгүй, энэ чинь юу болж байна вэ… Ер нь энэ төрийн дээрэм үү, хууль хэрэгжүүлэгчдийн бүрэн эрх үү. Аль эсвэл тагнуулынхны найруулсан адал явдалт кино юу. Тэнд Осама Бин Ладены Монгол хувилбар бий гэдэгт тэд арай итгэчихсэн юм биш биз.

2011.06.06.
“Б.Гантогтох: Засгийн газар хууль зөрчин иргэдийг хохироож байгааг хараад дуугүй сууж чадсангүй”
-Манайх “Чамин алт” нэртэй, гаднын хөрөнгө оруулалттай компани. Сэлэнгэ аймгийн Бугант тосгонд дөрөв дэх жилдээ үил ажиллагаа явуулж байна. Монгол Улсын Засгийн газар уул уурхайг эдийн засгийн тэргүүлэх чиглэл болгон зарласантай холбогдуулан би энэ салбарыг ирээдүйтэй юм байна гэж үзээд хөгжүүлэхийн төлөө зүтгэе гэж бодсон….
-“Урт нэртэй” хуулийг дагаж мөрдөх журмын дагуу 254 лицензийг цуцалсан. Үүнд танай компанийн лиценз орсон уу?
-Орсон. Цуцалчихсан.

2011 оны 6-р сарын 9.
“Ж.Батсуурь: Хайгуул хийгээд юу ч олоогүй олон компани байгаа”
УИХ-ын гишүүн Ж.Батсуурийг ярилцах танхимдаа урилаа…

2011 оны 6 сарын 9.
“Банк дампуурах нь Б.Бат-Эрдэнэд юуны хамаатай вэ?”
… УИХ-ын гишүүн Б.Бат-Эрдэнэ аймаар уурлаж Байнгын хорооны хуралдааныг хаяж гарав. Юун В.Жириновский. Мундаг улстөрч байгаа биз дээ. Тэр ойрын үед өөрийгөө дэгээдэх мэх олонтаа хийж байна… Оронд нь Б.Бат-Эрдэнэ аварга сайд болох гэсэн юм байлгүй дээ…  Биеийн тамир, спортын тухай хуулийг санаачилснаас хойш өргөн барьчих хууль сэм хайж байтал уул уурхайн нөхөн сэргээлт хийдэггүйгээс болж байгаль орчин сүйрч байна гээд мань эр сонсчихож. Бодоод үзвэл өөрийнх нь бизнест ямар ч хамааралгүй тэр хуулийг санаачлаад батлуулчихвал алдар хүндийн тавцанд амархан гарчихаж болмоор санагдсан биз…

2011 оны 6-р сарын 10.
”Урт нэртэй” хуульд нэмэлт өөрчлөлт оруулахыг гишүүд дэмжиж байна”
“Урт нэртэй ” хуульд нэмэлт өөрчлөлт оруулах тухай хуулийн төслийг дэмжиж байгаа эсэхийг нь УИХ-ын зарим гишүүнээс лавлалаа. (П.Алтангэрэл, С.Баярцогт, Л.Гантөмөр нартай ярилцахад гурвуулаа энэ хуулинд өөрчлөлт оруулахын төлөө байжээ).

2011 оны 6 сарын 10.
“Алтны уурхайнууд ажиллаж эхэллээ”
“Уул уурхайн салбараа аваръя” хөдөлгөөнд нэгдсэн аж ахуйн нэгжүүд уг үйлдлийг хууль бус гэж үзэн өнгөрсөн Даваа гарагт Засгийн газарт шаардлага хүргүүлсэн юм. Шаардлагад “Хайгуулын болон ашиглалтын хүчин төгөлдөр тусгай зөвшөөрөл бүхий аж ахуйн нэгжүүдийн үйл ажиллагааг энэ сарын 9-ний дотор сэргээхгүй бол шууд ажиллаж эхэлнэ” хэмээн тусгасан байв. …  Ямартай ч алтны компаниуд энэ удаад шийдвэртэй алхам хийж, ажлаа үргэлжлүүлж эхэллээ.

2011.06.14.
“Б.Агваандондов: Уурхайчид УИХ-ын гишүүн Б.Бат-Эрдэнийг шүүхэд өгнө”
“Уул уурхайн салбараа аваръя” хөдөлгөөний тэргүүн Б.Агваандондовыг “Ярилцах танхим “-даа урьж ярилцлаа.
-Үйл ажиллагаагаа эхэлсэн компаниудад дарамт шахалт ирж байна уу?
-Өдөр болгон цагдаагийн байгууллага, мэргэжлийн хяналтын байгууллагаас хүмүүс ирж, тойрч явж үзээд ажил хийлгэхгүй байна. Бид нэг босвол боссон шиг босно…
-Уучлаарай, бослого гаргана гэсэн үг үү?
-Бүх амьдрал, эд хөрөнгө, хүч хөдөлмөр, цаг хугацаагаараа хохирсон бидэнд өөр алдах юм байхгүй. Хэрэв ажил хийлгэхгүй л бол хүмүүсээ аваад ирж тэмц гэж уриалах болно.

Ийнхүү “Улс төрийн тойм” сонин Осама Бен Ладен, Жириновский хоёрыг дайчилснаас үзэхэд урт нэртийг зогсоох хатуу даалгавар хүлээж авснаас зайлахгүй. Сонирхуулахад, сонин хэвлэлүүд дэргэдээ Зар сурталчилгааны албатай  байдаг бол эднийх “PR, сурталчилгаа” гэсэн албатай харагдана.

Posted in Улс төрийн тойм | 2 Comments »

Хүрээ маягийн хувьчлал

Posted by Бид on 2011/05/11

“Ингэх гээд байсан юм” гэж үг бий.  “Улаанбаатар таймс” сониноор нэрлэгдсэн барилгын битүү асуудал гэнэт сад тавилаа.

Хэдий хуучин ч 20-р зууны Монголын соёл иргэншлийн нэг эхлэл – анхны хэвлэх үйлдвэр, хожим Улсын хэвлэлийн  комбинатын түүхт барилга Төрийн ордны зүүн талд сүүлийн хэдэн жил балгас дүрээр сохойж, наагуур нь Монголд хамгийн том рекламын самбаруудыг эгнүүүлэн босгож халхлаад ч  нууж чадаагүй.

Намбар овогтой Энхбаярынх гэж бүгд хэлдэг хэрнээ бас яаж ч чадаагүй. Улсын Их Хурлын чуулганаар үе үе нийслэлд хамаатай асуудлыг хэлэлцэх үеэр зарим гишүүд “энэ хажуугийн барилга ямар учиртай вэ?” гэж заавал асуудаг, эхний удаад тэр үеийн Засаг дарга Ц.Батбаяр, дараачийн удаад одоогийн Засаг дарга Г.Мөнхбаяр нар гэнэт ой санамжаа бүрэн алдаж “Би хүмүүсээсээ нягтлаад дараа хэлж өгье” хэмээн бултсан түүхтэй. Харин одоо “тэмцээд тэмцээд бараагүй” дүр эсгэж хувьчлалаа буцааснаа зарлаж амиа хоохойлов. 

Улсын хэвлэлийн комбинатын барилгын баруун жигүүрийг “Улаанбаатар таймс” сонины нэр дээр бичих ямар утга байв? 1998 оны Хэвлэлийн эрх чөлөөний хууль гармагц татан буугдах ёстой байсан ч зальдан авч үлдээд сүүлдээ хэдхэн хувь хэвлэгдэж хотын албан тушаалтнууд өөрсдийгөө уншдаг, ганц хоёрхон өрөөнд багтчих редакцитай сонинд ийм том барилгыг ороогоод хулгайлахыг завдаж, бараг амжуулсанд хэргийн учир байгаа юм. Үүний тулд сонины редакцийг нэгхэн хэсэгт нь оруулж, бусад давхар, зай талбайг баруун солгойгүй түрээслүүлж, араас нь менежментийн хувьчлал гээчийг зохион байгуулж явсаар 2008 онд гартаа оруулмагцаа Төрийн ордны дээрээс өнгийсөн том зочид буудал барина гэж хөөрцөглөөд сүйтгэж орхисон билээ. Нийслэлээр зогсохгүй Монгол улсын түүхийг ингэж сөнөөхийг Бурхан хүртэл тэвчээгүй хилэгнэсэн дэг шүү!

Нийслэл хот гурван хэвлэл мэдээллийн хэрэгсэлтэй байсан. Ноднин УИХ-ын чуулган дээр Н.Энхболд гишүүн “UBS телевиз хувьчлагдсан юм уу, хэдийдээ вэ, нээрээ юу?” гээд итгэж ядан суусан.  Тэгсээн. Барилга байшин (хуучин нэрээрээ бол телекино үйлдвэрийн барилга), хувьчлалаас өмнө төсвийн мөнгөөр амжиж шинэчилсэн тоног төхөөрөмж, сан хөмрөг бүгдийг нийлүүлээд бас л 2008 онд 800 сая төгрөгөөр Ц.Балхжавт өгчихсөн. Үүний өмнөх гурван жилд менежментийн гэрээгээр ажиллуулсан, тэгэхлээр өөрийнх нь орлогоор хувьчлаад авсан эсэхийг хэн ч таашгүй…

Гуравдахь нь “Улаанбаатар” радио. Анх хотын хуучин өндөр (Ардын банкны) оройд антенаа зоогоод, хэдэн өрөөндөө хаваасаг байсан бол 2004 онд сүүлчээр хувьчлалыг угтуулж Нарны титмын нэг блокийг тэр чигээр нь эзэмшүүлэхээр тийш нүүлгэсэн юм. Ингээд У.Булган захиралд нийт 1200 метр квадрат талбайг хүлээлгэж өгсөн гэдэг. Цаашаагаа юу болсныг сонсоогүй. Бодвол, амжуулсан биз.

Ямар нэгэн байгууллага, хүмүүст байшин юмуу газар зүүж өгөөд бултуулдаг “хүрээ хувьчлал” гэж байна.

Posted in "Улаанбаатар таймс" | 1 Comment »

С.Батболдын ярилцлагын талаар элдвийг сэтгэж болохгүй …

Posted by Бид on 2011/03/25

Сүүлийн саруудад зурагт үзэхэд Ерөнхий сайд C.Батболдын оролцоогүй их бага хурал, чуулган, зөвлөгөөн, ойн баяр, ёслол, шалгаруулалт, үзэсгэлэн, яармаг үлдсэнгүй. Ганц нэг үлдсэн байж болзошгүй, тэгвэл телевизүүд зөвхөн Батболдтойг л үзүүлсэн байх. Өнгөрсөн долоо хоногт тэрбээр Солонгос руу айлчлалаар одсон хэрнээ телевизийн дэлгэцнээс салаагүй юм. Инчонд газардаж онгоцны хаалгаар гарч ирмэгцээ монголчуудтайгаа уулзахаар явсныг бараг бүх телевиз шууд дамжуулах мэт сэтгэгдэл төрөв. Тийм олон сэтгүүлчийг дагуулжээ.

Бас Солонгос явахаасаа өмнө хоёр том ярилцлага үлдээгээд явсан нь саявтар зарим нөхдийн ярилцлагад С.Батболд Бороогийн алтыг “Бороо гоулд”-той хавсайдаж, харин “Чингэс” зочид буудлыг ганцаараа залгисан тухай үг, өгүүлбэрүүд дахин орж тэр нь TV9-өөр нэвтэрсний няцаалт юм. Эзгүй хооронд нь бид уншиж судлах ёстой.

Эхлээд 3-р сарын 16-ны Лхагва гаригт 21.30 цагаас МҮОНТ-ийн “Ярилцлага” нэвтрүүлгээр Монгол Улсын Ерөнхий сайд орлоо. С.Батболд өөрөө ирээгүй, харин сэтгүүлч Мөнхтөр өрөөнд нь очиж урт ярилцлага авснаа үзүүлж маргааш нь давтжээ. Ингээд монголчуудад хот, хөдөөгүй үзүүлж чадлаа.

   

Гэхдээ л зарим нөхөд залхуураад үзээгүй байж магад тул “Өнөөдөр” сонинд дараачийн том ярилцлага өгснийг 3-р сарын 21-ны дугаартаа “С.Батболд: Өнгөрснийг шүүхээ больё. Мөрөөдөл ярихаа цэглэе. Урагшаа л харъя” гарчигтайгаар олон нүүр дамжуулан нийтлүүлжээ. Оршил нь: Монгол Улсын Ерөнхий сайд С.Батболдтой уулзлаа. Хөгжил дэвшлийг зорьсон монгол түмний их нүүдлийн нэгэн хөтөч нь болж яваа түүний санаа бодол, түүний тэргүүлсэн Засгийн газрын бодлого зорилтыг хөндөж бид ярилцав. Баахан урт ярилцлага болсон байж магадгүй. Гэхдээ хэвлэлээр тэр бүрий гараад, яриад байдаггүй Ерөнхий сайдаас асуух, сонирхох зүйл их байлаа. Уншигчид маань уйдахгүй биз ээ”

“Хэвлэлээр тэр бүрий гараад яриад байдаггүй” Ерөнхий сайд маань эхнэр хүүхдээ хүртэл залхтал урт ярьсан мөртлөө Бороо, “Чингэс”-ийн талаар өмнөхөө давтлаа. Ядахдаа “Бороо”-гаас яг хэдийг унагаснаа хэлбэл сонин байхсан. Даанч “өмнөхийг мартах”-ыг сануулаад цаашаагаа тэртээ тэргүй хийх ёстой ажлаа эх захгүй тайлагнасан ярилцлага байлаа.

Гэхдээ телевиз үздэггүй, сонин ч эргүүлдэггүй, Интернэтэд цаг нөхцөөдөг иргэдийн толгойд С.Батболдын үгийг яаж суулгах вэ? Сайтад тавьчихлаар бөөн эрх чөлөө эдэлсэн нөхдүүд зөв буруу бичээд салахгүй.

Гэхдээ арга олжээ. Дээрх ярилцлагыг тэр өдөртөө www.news.mn сайтад ямар нэгэн тайлбаргүйгээр нийтлүүлэв. “Өнөөдөр” сонин өөрийн сайтад ч оруулаагүй мөртлөө бусдад харамгүй зөвшөөрчээ.  Сэтгэгдэл? Бичиж болохгүй. Та “Сэтгэгдэл” гэсэн цэсэн дээр мянга дараад ч нээгдэхгүй.

Ерөнхий сайдын ярилцлагыг үүнтэй нэгэн зэрэг www.shuud.mn сайтад нийтлүүлэв. Сэтгэгдэл? Мэдээж “шууд” хаачихсан. Тийм цэс байх ч үгүй.

Тэгвэл хамгийн олон уншигчтай гэгддэг gogo.mn  сайтад яаж нийтлүүлэх нь сонин байлаа. Хэд хоног азнаад тун бүтээлчээр сэтгэж “Бороо гоулд”-той холбоотой хэсгийг товч тайлбарлан оруулав. Гэхдээ “Төлбөртэй мэдээ” гэж бичээд С.Батболдын ярилцлага тойрсон пиарыг илчлээд хаячихжээ.

Сэтгэгдлийг яасан бол? Ингэсэн байна. Өөрөөр бол төлбөр төлөхгүй байсан биз.

Posted in "Өнөөдөр" сонин, Вэб сайт, Сурталчилгаа, далд сурталчилгаа, "пиар" | 2 Comments »

“Өнөөдөр”, New York Times хоёр юугаараа ижил вэ?

Posted by Бид on 2010/03/25

Өнгөрсөн өвөл “Өнөөдөр” сонин сайтаа шинэчилж ийм гоё болсон билээ. Тэгтэл Пунцагийн  Байка ихрийн өрөөснийг дор нь илрүүлж блогтоо  The New York Times гэж нэрлэсэн байлаа. Түүнээс хойш 2 сар өнгөрөхөд ийм байна.

Posted in "Өнөөдөр" сонин, ИНТЕРНЭТ, ХАРИЛЦАА ХОЛБОО | 1 Comment »

Үзэгнээс өөр “зэвсэг”-тэй…

Posted by Бид on 2010/03/23

Хоёрдугаар улирлын хэвлэл захиалгаар хамгийн хүчтэй сурталчилгаа явуулж байгаа сонин бол “Улс төрийн тойм” юм. Өнгөрсөн сараас телевизийн хэд хэдэн сурталчилгаа бэлтгэж орой болгон тасралтгүй үзүүлсээр өдий хүрлээ. “Надад айх юм алга, юунаас ч айхав дээ” гэж пээдийсэн сагсуу авлигачийг сониноороо жижигрүүлэн намнаж байгаа хамгийн сүүлчийн клип үнэхээр сайн болсон. Зарим дугаарыг шуудангийн салбарууд, “Номин” их дэлгүүрт үнэгүй тарааж байхтай тааралдав. Бас мөнгөтэй компаниуд л түрээслэн авч рекламаа байрлуулж чаддаг гудамжны дээгүүрх том самбарт ч заларсан харагдана. Тэгтэл саяхан зуугаад оюутан хөлслөн авч Төв шуудангийн урд болон зүүн, баруун дөрвөн замын уулзварын хажуугаар биет ухуулга явуулж, тэр тухай сурвалжлагаа ч төлбөртэй цацуулжээ.

2010 оны 1-р сарын 15-нд гарсан анхны дугаараа сониныхоо үнэт зүйлсийг тодорхойлсон “С.Баярын үлдээсэн өв” нийтлэлээр эхэлж тэр нь Сү.Батболд байсан, “Улс төр, эдийн засаг, паппараци” гэсэн тодотголтой уг сонины үүсгэн байгуулагч сэтгүүлч Л.Мөнхбаясгалан үзэгнээс өөр “зэвсэг”-тэй юм байна.

Posted in + СОНИНУУД, Улс төрийн тойм | 3 Comments »

Аяганы хариу өдөртөө …

Posted by Бид on 2010/03/23

Хэдэн жил тээж яваа гомдлыг нь тайлалцаж өгсөн Үндэсний зөвлөлийн гишүүн, “Үндэсний шуудан” сонины ерөнхий эрхлэгч Б.Ганболдыг МҮОНТ өчигдөр орой урамшуулж 2010 оны 2-р улирлын хэвлэл захиалгын энэ өдрүүдэд ус, агаар мэт хэрэгтэй сониных нь сурталчилгааг орон даяар хийж өгөв. Монгол Улсад ийм агуу өдөр тутмын сонин байдаг гэж энэ мөчийг хүртэл зүүдлээ ч үгүй явсан биз, үзэгчид.

3-р сарын 22-ны Даваа гаригийн “Цагийн хүрд” мэдээллийн хөтөлбөрийн сурвалжлагууд дотроос хамгийн урт (4 минутаас давсан) нь энэ байлаа.

Хөтлөгч: “… хэн нэгэн мөнгөтэй хүний захиалгаар нийтлэл мэдээлэл гардаг болсон энэ цаг үед хэнд итгэх вэ гэсэн уншигчдын тээнэгэлзээг өөрчлөх цаг болсон гэж үзэг нэгтнүүд маань уриалж байна. Монголын нийгмийг гэгээрүүлэх үүргээ мөнгөөр биш сэтгүүл зүйн том ёс зүйгээр удирдах тийм эр зориг энэ салбарынханд байгаа. Улс төрчдөөс ангид захиалгагүй сэтгүүл зүй сонин хэвлэлийн салбарт орон зайгаа олсон таатай мэдээллээр бид “Цагийн хүрд” мэдээллийн хөтөлбөрөө үргэлжлүүлж байна. Сурвалжлагч “Нийгмийг эмчлэгч нь, хоточ нохой мэт үнэнч байгч нь, бас дөрөвдэх том засаглал нь сэтгүүл зүй. Энэ салбарт цэвэр тунгалаг байж чадвал эцэс төгсгөлгүй мэт өнөөгийн улс төржилт, хэн нэгнийг хардсан чулуу боож шидсэн тэр л мэдээллүүд бидний тогооноос гарах ёсгүй юм. Үүний оронд харин олон нийтэд толгой бөхийн тэдний төлөө ажиллах ёстой төрийн өндөр дээд эрхмүүдийн ажлыг үнэнч шударгаар нийтэд дэлгэх захиалгагүй сэтгүүл зүй монголын сонины салбарт нэвтрэх цаг болжээ. Цаг үеэ эмчлэх сэтгүүлчдийн ёс зүйг байх ёстой тэр л байр сууринд нь аваачих захиалгагүй нийтлэл, мэдээллээрээ ”Үндэсний шуудан” сонин олны анхаарлыг татаж байна. Энэ сонины хамт олны 80 хувь нь сэтгүүл зүйд 10-20 жил ажилласан, “Бодлын солбицол”, “Ардын эрх”, “Зууны мэдээ” зэрэг сониныг үүсгэн байгуулж байсан мэргэжлийн сэтгүүлчид юм. Тус сонин хэвлэлийн зах зээл дээр ганц зүйлээр тод ялгардаг, энэ нь ардаа ямар нэгэн эзэн, улс төрийн намын харъяалал, компанийн өмчлөлгүй цорын ганц сонин юм. [Ерөнхий эрхлэгч Б.Ганболдын яриа. Нэгэнт сурталчлуулж байгаа болохоос сониноо магтах нь мэдээж тул ишлээд яахав] Сэтгүүлч: Энэ ч утгаараа “Үндэсний шуудан”-гийн нийтлэлийн бодлого нь нийгмийн олонхийн эрх ашгийг хамгаалсан, захиалгагүй учраас үнэний дуу хоолой болж чаддаг гэсэн дүнг тэдэнд уншигчдаас өгч монголын хамгийн олон захиалагчтай өдөр тутмын сонингуудын аман хүзүүнд давхиж явна… [Хамт олны магтаал. Бас л ойлгомжтой тул алгасав] Сэтгүүлч: Сүүлийн үед дуулиан тарьсан “Үндэсний шуудан” сонины нийтлэлүүдээс дурдвал УИХ-ын гишүүдийн тойрогтоо хуваарилсан 76 тэрбум төгрөгийн луйвар, гишүүдийн хууль баталсныхаа төлөө авах болсон 35 сая төгрөгийн булхайг тууштай эсэргүүцэж нийгмийн дэмжлэг болон холбогдох байгууллагуудын анхаарлыг татаж чадсан юм байна. “Үндэсний шуудан” сонины нийтлэлийн бодлого нь нийгмийн сайн сайхан, нийтийн эрх ашиг, шударга ёсны төлөө байдаг. Харин үүн дээр нэмээд ногоон сэтгүүл зүйг хөгжүүлэхийн төлөө нийтлэлийн бодлогынхоо нэг хэсгийг зориулж ирсэн байна. Үүний нэг илрэл нь Тужийн нарсыг нөхөн сэргээх ажлыг анх санаачилж гурван жил дараалан улс орон даяар хөдөлгөөн илрүүлсний үр дүнг өнөөдөр энэ ойн 60 гаруй хувь нь сэргэснээр монголын ард түмэн мэднэ. Дээжилж барьдаг нь дээшээ харсан биш, харин ч ард олныхоо дунд байж чаддаг “Үндэсний шуудан” орон нутагт ч захиалгынхаа тоог нэмэгдүүлж нийгмийн түүчээ байх, өглөө бүр таныг шинэ мэдээллийн талхаар дайлахаар захиалгаа эхлүүлснээ бас уламжилж байна аа”

Манай мэдээллийн хэрэгслүүд дотроос өдөр тутмын сонинууд хамгийн чанартай нь. Тэдгээрийн дунд “Үндэсний шуудан” гарцаагүй урдуур давхидаг байж болно. Тэглээ гээд олон нийтийн телевиз ингэж намба алдан нялуурч болох уу?

Posted in "Зууны шуудан" сонин, Монголын Үндэсний Олон Нийтийн Телевиз | Leave a Comment »

Төвөгтэй сонин

Posted by Бид on 2010/03/11

“Зар мэдээ, сурталчилгаа” ба “Шуурхай зар” хоёрын хүч тэнцүү ноёрхож байгаа зарын сонины зах зээлд нэвтрэх оролдлого тасрахгүй юм.

Оны эхэнд баруун дөрвөн замаас уруудаад, “Рокмон” төвийн урд томоос хаягаа зүүж зар сурталчилгааны хувьсгалд хичээнгүйлэн бэлтгээд цагаан сарын дараа хэвлэлийн хурал зарлан ил гарч ирлээ. Өөрсдийгөө “Бид зөв сэтгэлгээтэй монгол хүмүүс” гэж танилцуулсан гурван залуу үүсгэн байгуулжээ. Тэд Монголд зарын сонины зах зээл тогтчихсон байгааг хүлээн зөвшөөрөөд “томчууд”-ыг ямар аргаар унагахаа тооцоолжээ.

Долоо хоногт адилхан хоёр удаа гарна, зарын хайлт хийхэд хялбаршуулсан бүтэцтэй, элдэв тэмдэглэл хийх тусдаа хуудастай, ердөө 250 төгрөгийн үнэтэйгээс гадна уншиж ашигласан сониноо буцаагаад тэр үнээр нь тушааж болно. Иймээс “Иргэний зарыг иргэнд үнэгүй” уриатай.  Бас урдаа нэгэн тэргэнцэр тавьчихсан “сэтгүүлчдийн тусламжтайгаар хэрэгтэй хүнийг олж олгоно”, цаашдаа хандивын булан нээн тусламж авах хүсэлтэй иргэдийн санал авч, ивээн тэтгэгч байгууллагуудтай холбож өгнө гэв.

Тэд сониноо буцааж авах журмаа дахиад л дэлгэрэнгүй ярьснаас үзэхэд, баримт бичигтэй ирээрэй, регистрийн дугаараар авна, нэг хүнээс нэг дугаараас нэгийг л авна, сонин дээр бичиж зурсан, тэмдэглэл хийсэн, гэмтсэн байж болно, гагцхүү харин хуудас бүтэн байх ёстой…

 Анхны дугаар амалсан ёсоор 3-р сарын 1-нд хэвлэгдэн гарлаа. “Иргэний зар” хэмээх ногоон толгой нь дажгүй. Харин дор нь уншсан сониноо буцаан тушаах цэгүүдийн хаяг, журам (хуудасны тоог дутааж болохгүй, өөрийгээ гэрчлэх бичиг баримттайгаа ирэх гэх мэт) гээд нөгөө л танилцуулга харагдана. 250-хан төгрөгийн төлөө юун түвэгтэй юм бэ?  Доторх цөөн хуудсыг эргүүлбээс эхлэл төгсгөлгүй нэвсийсэн зарууд. Нөгөө “хялбаршуулсан бүтэц”  олдсонгүй.

“Иргэний зар”-ыг үүсгэн байгуулагч залуус шинэ бизнестээ бүтээлчээр хандаж уншигчдыг татах чамин аргуудыг бодож олсон ч түүндээ хэт автаж зарын сонины хувьд хамгийн чухал нь зар гэдгийг орхигдуулжээ. Иймээс дараачийн дугаарууд амалсан хугацаандаа үзэгдсэнгүй.

Гэхдээ тэд шантраагүй гэдэгт найдья.

Posted in + СОНИНУУД | 1 Comment »

Зарлал: Хэвлэл мэдээллийн байгууллагууд мэдээллээ байршуулна уу

Posted by Бид on 2010/03/10

Хэвлэл мэдээллийн байгууллагуудыг http://www.televiz.mn, http://www.khevlel.mn, http://www.radiostants.mn сайтуудад мэдээллээ байршуулахыг урьж байна.

           

Posted in + РАДИО, + СОНИНУУД, + СЭТГҮҮЛ, + ТЕЛЕВИЗ, Сурталчилгаа, далд сурталчилгаа, "пиар" | 1 Comment »

“Ичдэггүй” телевиз

Posted by Бид on 2010/02/26

Өчигдөр орой TV5 телевизийн “Цаг” мэдээллийн хөтөлбөрийн “Шар мэдээ” булангийн элдэв марзан сурталчилгаануудын дундуур “Өдрийн сонин”-ы эсрэг шав шар тайлбар орж ирлээ.

“Өдрийн сонин” гэж өрөвдөлтэй амьдралтай газар байна аа. Бүх юмыг хар өнгөөр харна, хардана гэдэг нь туйлдаа хүрсэн. Хэн нэгнийг муулж л байвал кайф авдаг. Ийм сониныг хөөрхий гэхгүй ч яах билээ. Энэ насандаа олимп явж үзээгүй, тамирчин хүний хөдөлмөрийг мэддэггүй, үүрэндээ өмхийрчихөөд унгасаараа бусдыг хордуулж байдаг. Олимп нэвтрүүлж байгаа телевиз ичдэгүй, олимпод оролцсон сонин ичдэггүй, ганц “Өдрийн сонин” Гангаатайгаа ичсэн юм байхаа. Өвлийн олимпод амжилттай оролцох ул үндсийг нь гаргаад тавьчихдаг танай сонинд дуу хоолойгоо хэвлэлийнхэн дуу хоолойгоо нэгтгэх л байсан. Олимпод оролцох үгүйгээ монгол улс “Өдрийн сонин”-оор заалгах юм гэнэ. Хүний хөдөлмөрийн үгүйсгдэг хэн бэ, та нар. Гангаа бид хоёр спорт мэддэг ч гэж юу байхав. Зарим улс төрчийн улыг долоочих гээд, заримыг нь газар дор оруулах гэж оролдох, гадаадад хамт явсан багаа ирээд муулчихна. “Өдрийн сонин”-ы өрөвдөлтэй төрх энэ гэнэ ээ. Сонин нь ёс зүйгүй, сэтгүүлч нь ёс суртахуунгүй, тагнуулд бол бүх хамт явж болохгүй, араас чинь хутга шаах хогийн амьтад энэ сонин үүрлэжээ”

Яаж гомдохоороо ингэж давшилдаг байна аа? Нэр дурдагдсан сэтгүүлч Ж.Гангаа TV5-ын талаар юу бичсэнийг хайвал хэд хоногийн өмнөх дугаараас олдов. “… Тэр дагаж яваа телевизийн сурвалжлагч нь хүртэл “Медальд хүрэх боломж байсан уү? ч гэх шиг … Ванкуверийн өвлийн XXI олимпийн наадамд оролцсон манай хоёр тамирчны амжилтыг хэлэхээс үнэхээр ичиж байна. Ичдэггүйгээрээ “ТВ-5”-ынхан болон мань хоёр хэлэхдээ “Непал, Бермуд… зэрэг орны тамирчдыг ардаа орхиж бахдам амжилт гаргалаа. Бас хувийнхаа амжилтыг ч ахиулсан ” гэв.

Манай телевизүүд олимп, олон улсын тэмцээн, тоглолтуудыг сурвалжлах гэж заримдаа яаж холион бантан хутгаж байгааг бүгд хардаг. Наад зах нь “шууд дамжуулж байна” гэж худлаа яриад л. Алдаж онохгүй хэн байхав. Үүнийхээ төлөө шүүмжлүүлж л байдаг. Энэ удаад тэр Гангаа “ичдэггүй” гэсэн ганц үгээр чимхээд авчээ. Бас хэлсэн үгнийхээ төлөө хариуцлага хүлээхээр нэрээ тавьж. Харин TV5 телевиз эмзэг газраа хөндүүлснээ хүлээн зөвшөөрөх мэт “зарим улс төрчийн улыг долоочих гээд, заримыг нь газар дор оруулах” гэсэн элдэв тайлбарыг сэм сэм шургуулдаг “Шар мэдээ”-гээрээ хариу барихдаа “… өмхий… унгас… араас хутга шаах хогийн амьтад” зэрэг үгсийг сэжиглэхгүйгээр цуглуулж уншаад сууж байх юм. “Ичдэггүй” телевиз л ингэнэ дээ. 

Ер нь нэр, хаяггүй тайлбарыг тухайн хэвлэл мэдээллийн албан ёсных гэж үздэг тал бий.

Posted in "Өдрийн сонин", TV5 телевиз | 12 Comments »

Бие биенийхээ “хар”-ыг гайхав

Posted by Бид on 2010/02/05

Лхагва гаригт TV9 телевизийн “Энэ өдөр” мэдээллийн хөтөлбөр “сүүлийн үед хэвлэл мэдээллийн эрх чөлөөнд захиалгатайгаар халдах боллоо” гэсэн утгатай тайлбар сурвалжлага үзүүлэх нь тэр. Үзтэл “Өнөөдөр” сонины Даваа гаригийн дугаар нийтлэгдсэн “Худалч, хулгайч телевиз” гарчигтэй нийтлэлийг няцаажээ.

TV9-ийг хилэгнүүлсэн тэр өгүүлэл “ Монголд телевиз үзэх, хятад бараа авах хоёр бараг л адилхан болжээ. Аль аль нь хулхиддаг болохоор авсан нь хохироод үлдэнэ… Телевиз хэмээх тархи угаагч машиныг дарж зогсох хүн Монголд байна уу, үгүй юу? Эс бөгөөс энэ телевизүүд бүгд аль нэг эрхтэн дархтаны “нууц хүү” юу? Реклам сурталчилгаанаас мөнгө олдог “дархан цаазат” газар уу?” гэж эхлээд цаашаагаа жижиг гарчгуудын дор телевизийг мөч мөчөөр жиргэж орхисон байх юм.

Солонгос кино: Солонгос кино үзсэн хүн эргүү болдог….

Монголд хэдэн телевиз хэрэгтэй вэ?: Улаанбаатарт 14 суваг байна… Японд бол улсын хэмжээний зургаахан телевиз байдаг…

Оюуны өмч телевизэд хамаагүй юу?: Гадаадын киног хулгайгаар авч орчуулаад үзүүлдэг…

Сумо: хулгайгаар дамжуулдаг…

Тархи угаах: ард түмнийхээ тархийг гадаадын телевизийн шоу, драмаар угаалгаад, хараад л сууж байдаг сайхан Засгийн газартай” гэсэн хатгаасаар төгсөв.

Телевизүүдийг Засгийн газраар унтраалгахыг хүсчээ, янз нь. Японд зургаа байдаг юм чинь Монголд 0,06 байхад хангалттай, тэр нь 25-р сувгийн хэлтэрхий байх уу? “Монголын нэр хүнд” гарчгийн дор Олимп, дэлхийн аваргын тоглолтыг дамжуулах эрх авсан телевизүүд мөнгөө төлөхгүй хулхиддаг. Телевизийнхэн монголын хэдэн компаниас олимпийн тоглолт дамжуулах эрх авахад хэрэгтэй гээд хэдэн төгрөг салгаад авчихсан байгаа юм. Тэгсэн мөртлөө тэр эрхээ бусад телевиздээ дамжуулаад зарчихдаг гэж байгаа. Турины олимпийг дамжуулах эрх авсан телевиз “ажилласан” явдал энэ бизнесийн том жишээ буюу” хэмээн илчлүүлсэн телевизийн тогийг хамгийн түрүүнд тасчих биз. Аль  телевиз бол?    

Тэгтэл “юун гуя” гэдэг шиг TV9 телевиз гэнэт өндөлзөж өөрийгөө илчлээд “олон улсын уралдаан тэмцээнийг зохион байгуулахад маш их мөнгө төлдөг” гэсэн утгатай уртаас урт тайлбарыг инженер залуугаараа хийлгэв. Их төлдөг нь үнэн байх, гэхдээ тэр эрхийг зарсан, зараагүй гээд түс тас хариулсангүй. Үүний оронд “Өнөөдөр” сонины “Монголд мэргэжлийн сэтгүүл зүйн төгсгөл ирж байна” гэсэн гарчигтай дугаарыг харуулж байгаад “цаанаасаа захиалгатай ийм нийтлэлийг цувралаар гаргаж байна” гэж төгсгөв өө.  Даанч тэр захиалагчийн овог нэр, ажлын газрыг бас л хэлсэнгүй.

Эмгэнэлт гарчгийн цаана юу байгааг үзлээ. “Өнөөдөр” сонины редакцид сэтгүүл зүйн тулгамдсан асуудлаар зохион байгуулсан хэлэлцүүлэгт судлаачид, бас МСНЭ-ийн удирдлагууд оролцохдоо юу ярьсныг буулгаж хэвлэсэн юм байна. Даанч хэдэн нүүр дүүрсэн зөв зүйтэй өгүүлбэрүүдийг урсгагчид мэргэжлийн сэтгүүл зүй яагаад мажийхад хүрснийг мэдэхийн дээдээр мэддэг мөртлөө хэлчихэж чадсангүй. Бие биенээ хараад суухад нүүр халаад хэцүү байдаг биз…

Ноднин намраас хойш “Өнөөдөр” сонины редакци “Сэтгүүл зүйн үнэт зүйлийн төлөө” лоозонтой хэлэлцүүлэг эхэлж энэ мэт сүржин нийтлэл, ярилцлагуудыг үе үе нийтлэн сэтгүүл зүй бохирдож, сэтгүүлчид худалдагдсан, эзэддээ үйлчилдэг, улс төрчдөд халааслагдав гэх мэтчилэн халагласаар удлаа. Даанч өөрсдөө тийм байдаг учраас нэг ч сонин, телевиз, сэтгүүлч, эзний  нэр, ганц ч жишээ баримт хэлж чаддаггүй.  

Сонгууль болгоны дараа гавьяат эзэд, гадаст сэтгүүлчдийн тоо суга өсдөг. Энэ удаад бүр онцгой. “Одонгүй сэтгүүлчийг сэтгүүлч гэдэг юм уу?” болов. Зарим редакцид багталцахгүй хэцүүддэг гэнэ. Манай хэвлэл мэдээллийнхэн ийм мундаг юм бол мэргэжлийн сэтгүүл зүй яахаараа төгсөх болж байна?

Чухам ийм учраас төгсөх гээд байж магадгүй.

Posted in "Өнөөдөр" сонин, + СОНИНУУД, + СЭТГҮҮЛ, TV9 телевиз | 3 Comments »

Төмөр замын ээлж ирлээ

Posted by Бид on 2009/11/04

“Айвенхоу Майнз”-ийн захиалгаар гэнэтийн ашгийн 68 хувийг цуцлах хуулийг батлах санал хураалтын өмнөхөн УИХ-ын гишүүн Ц.Даваасүрэн “Хүний өөрийнгүй нийлээд энэ хуулийг батлуулах юм байна” хэмээн дуугарч билээ. Одоо Тавантолгойн ээлж ирэхийн өмнөхөн түүний нэгээхэн хэсэг – Ухаа худгийг ухаад урагш гоожуулж эхэлсэн “Энержи Ресурс” компани төрийнхөн, бас хэвлэл мэдээлэлтэй нийлээд төмөр замаа хүссэнээрээ урагш шууд хил давуулах нь гарцаагүй юм байна.

Лхагва гаригт УИХ-ийн байнгын хорооны хуралдаанаар ЗТБХБ-ийн сайд Х.Баттулга уг төмөр замыг урагшаа биш, Сайншанд руу тавьж монголын үндсэн төмөр замтай холбох хэрэгтэйг нотлон маргалдаж, ажлын хэсгийн ахлагч нь “Энержи Ресурс”-ийн эздийн нэг, УИХ-ын дэд дарга Г.Батхүү байхдаа яадаг юм гэж хэрэлдээд дийлдсэн бол “Энержи Ресурс” хэвлэл мэдээллийг яаралтай дайчилж “Өнөөдөр” сонины маргааш өдрийн дугаарт сэтгүүлч Л.Болормаагийн тус компанийн гүйцэтгэх захиралтай хийсэн ярилцлага “Г.Батцэнгэл: Ухаа худаг-Гашуун сухайтын төмөр замын бүтээн байгуулалт бол Монгол Улсын эдийн засагт хямралын үед төдийгүй цаашдаа ч ихээхэн ач холбогдолтой гэж харж байна” гэсэн гарчигтайгаар нийтлэгдэв. 

Мягмар гаригт МҮОНТ-ээр “Транзит Монгол” нэрээр зарлаж байгаад “Халуун сэдэв” захиалгат нэвтрүүлэг үзүүлсэн. Олон нийтийн телевиз хэзээд бэлхэн!

Эхлээд Оросын болоод Казахстаны төмөр замыг тэнгэрт тултал магтсанаа Монголын төмөр замын хоцрогдол, доройтлыг элдвээр дуудаж “2007 онд зүтгүүрүүдийн 85 хувь хуучирсан технологитой байсан бөгөөд байнга эвдэрдэг. Эдгээр зүтгүүрүүд нь удаан, нүүрсээр ажилладаг” гэв. Монгол-Оросын хамтарсан төмөр замыг муулах нь зөв, гэхдээ ингэж гүжирдээд яахнав. Хар утаа хаясан хар зүтгүүр зөвхөн кинон дээр л явдаг болоод удаж байгаа шүү.

Тэгснээ “… Монгол улс хувийн хөрөнгө оруулагчдын төмөр замд оруулах хөрөнгийг талархан хүлээн авч төрөөс ил тод зохицуулах чиглүүлэх болно гэдгийг ойлгуулах нь маш чухал“ гээд захиалагчдынхаа даалгаврыг палхийтэл зарлаж орхив. Төрөөс зохицуулахыг зөвшөөрсөнд баярлалаа! Тэгсэн хэрнээ “… Үнэндээ төмөр замын газрын даргыг ЗТБХБЯ-ны сайд томилдог, үүний зэрэгцээ тухайн яам Улаанбаатар төмөр замын хувьцаа эзэмшигч байдаг, энэ нь тухайн яам төмөр замын салбарт бизнесийн болон бодлогын ашиг сонирхолтой болохыг илэрхийлж байгаа бөгөөд улмаар зохицуулалтын тухай ярихад ашиг, сонирхлын асар том зөрчил гарна” гэж төмөр замын салбарт төрийн бодлогыг хэрэгжүүлдэг яамыг жийж орхиод зохицуулалт хийдэг хараат бус байгууллагыг шаардлаа. Тун удалгүй манай төр төмөр замаасаа хөөгдөх биз. 

Яриаг нь хасч танахыг мэдээгүй юу, Улаанбаатар төмөр замын орлогч дарга Л.Халтар Монгол Улсын Засгийн газрын Худалдаа, тээврийг хөнгөвчлөх үндэсний хорооны гишүүн нэрээр (үндсэн ажлаа нуусныг бодоход мэдэж байж), Монголын төмөр замын газрын Бодлогын хэрэгжилт, хамтын ажиллагааны хэлтсийн дарга Ц.Энхбаяр, Монголын төмөр зам ТӨХК—ийн захирал А.Батболд нар төмөр зам дахь хувийн хэвшлийг мөрөөдөн хэсэг ярьцгаав. Уг нь төрд хамаатай албан тушаалтнууд юмсан. Эцэст нь 2008 онд хятадаас маш гоё зүтгүүр (нүүрсээр ажилладаггүй!) оруулж ирээд төмөр замд шахаж чадаагүй бололтой “Транскон” ХХК-ийн захирал Н.Ариунзаяа гомдлоо тайлав.

Нэвтрүүлэг “Энэхүү нэвтрүүлгийг бэлтгэхэд Засгийн газрын хэрэгжүүлэгч агентлаг – Төмөр замын хэрэг эрхлэх газар, МТЗ ТӨХК, Транскон ХХК гүн туслалцаа үзүүлэв” гэж төгсөв. Ямар нэгэн нэр, хаяг алга. Хэн захиалсан бэ?

P.S:  Уг нэвтрүүлгийг Пүрэв гаригийн үдэш тэр чигээр нь давтан үзүүлэв. Нэг нэвтрүүлгийг МҮОНТ хоёр удаа оргил цагаараа явуулсан бол цаана нь том захиалагч байна гэсэн үг.

P.P.S: Бямба гаригийн орой 3 дахь удаагаа үзүүлэх нь тэр. 

Read the rest of this entry »

Posted in "Өнөөдөр" сонин, Монголын Үндэсний Олон Нийтийн Телевиз | 3 Comments »

Том шуугиан дэгдэнэ…

Posted by Бид on 2009/11/02

Монголд улсын үндэсний аюулгүй байдлыг хангахад стратегийн ач холбогдолтой аж ахуйн нэгжид гадаадын хөрөнгө оруулалтыг хэрэгжүүлэх журмын тухай хуулийн төслийг УИХ-ын гишүүн Г.Занданшатар, С.Бямбацогт, Н.Батбаяр, Ц.Баярсайхан, Д.Тэрбишдагва, Ө.Энхтүвшин нар санаачлан өргөн барьжээ. Дэлхийд хаа сайгүй иймэрхүү зохицуулалтаар гадныхныг хязгаарладаг, харин манайд уул уурхайн хамаг лицензээ алдчихаад Оюутолгойнхоо 34 хувийг Айвенхоу-аас зээлдэж авсан бол бараг бүгд гадаадынхны гарт байсан ураны лицензүүдийг дахин бүртгэх нэрээр 11-р сарын 15 хүртэл арайхийн түдгэлзүүлээд түгшүүртэй сууж байгаа. Буцааж олгохгүй гэвэл цаадуул нь том шуугиан дэгдээж хилийн наана цаанаас дарамтлуулсаар байгаад авч л таарна.

Стратегийн ач холбогдолтой гэж үзсэн 26 салбарын тоонд хэвлэл мэдээлэлтэй холбоотой нь лав дөрөв байна.

18. Монгол Улсын хүн амын тал буюу талаас илүү хувь нь оршин суух газарт телевизийн дамжуулах үйл ажиллагаа явуулах,

19. Монгол Улсын хүн амын тал буюу талаас илүү хувь нь оршин суух газарт радиогийн дамжуулах үйл ажиллагаа явуулах.

24. Полиграфийн үйл ажиллагаа нь сард нэг саяас дээш хүчин чадалтай бол холбогдох үйл ажиллагаа явуулах

25. Сард нэг дугаар нь 10.000-аас дээш хувиар гардаг өдөр тутмын хэвлэлийн үйл ажиллагаа явуулж байгаа бол түүнтэй холбогдсон үйл ажиллагааг…

Ойлгомж муутай, түүхий тодорхойлолтууд байх шиг. “Хүн амын тал буюу тэн хагасаас илүү хувь“ гэхлээр нийслэл Улаанбаатар (одоо 45 хувь амьдарч байгаа), эсвэл нэг буюу хэд хэдэн аймагт, зүүн, баруун, өмнө зүгийн аймгуудыг тусад нь бүрхсэн гадаадын телевиз, радиог яах ч үгүй. “Дамжуулах үйл ажиллагаа явуулах” гэжээ. Нэвтрүүлэг үйлдвэрлэдэг телевизэд хамаагүй болж таарлаа. “Ийгл” нэртэй өрсөлдөгчөө хөөж гаргахын хүслэн болсон манайхан тогтоолын төслийг баярлан угтаж, “Монгол ньюс”-ийн “Өнөөдөр” сонин “Гадныхан Монголын хэвлэл мэдээллийн салбарт 100 хувь хөрөнгө оруулж, мэдээллийн салбарыг өмчилж буй нь эргээд үндэсний аюулгүй байдалд заналхийлсэн. Өнгөрсөн жил болсон “Долдугаар сарын 1”-ний үйл явдлыг хөөрөгдөж, үймээн самуун болгоход гаднын хөрөнгө оруулагчидтай телевизүүдийн хөөрөгдсөн мэдээ, мэдээлэл том үүрэг гүйцэтгэснийг мартах ёсгүй” гээд ховлож эхэлсэн нь арай эртэджээ. Хэрвээ “25-р суваг” телевиз тэр өдөр МАХН-ын байрны галдан шатаалтыг шууд дамжуулж чадсан бол түүгээрээ өнөөдөр яасан их бахархаж, “Хамгийн ардчилсан, чөлөөт, хувийн телевиз” цолон дээрээ шуурхай гэсэн чимэг нэмж зүүх байсан. Даанч чадаагүй.

Гэхдээ “Библ” телевизийг хязгаарлаж, “Өглөө” кинон дээр гардаг шиг, түмэн олон христчдийн хэргийг түүнд үлдээгээд, төрийн хэргийг салгах нь зүйтэй. Тэр үед бас нэг томоос том шуугиан дэгдэж, Монгол Улс үзэл бодлоо илэрхийлэх эрх чөлөөний олон улсын рейтингийн ёроолд шууд ойчно… Яая гэхэв. Дэлхий дээр үнэгүй юм гэж алга.

Полиграфийн үйл ажиллагаа гэж хэвлэх үйлдвэр биз. Миний хувьд өнгө тод, хугацаа түргэн, үнэ хямд бол хэн байвал арьсны өнгө хамаагүй. Харин “Сард нэг дугаар 10.000 хувиас дээш гардаг” буюу өдөр тутмын сонинууд үндэсний үйлдвэрлэл хэвээр байхыг бүрэн дэмжинэ. Тэртээ тэргүй хувь ширхэг нь буурч хамаг уншигчдаа сайтуудад алдан зүдэрч байхад гаднын нэг нөхөр орж ирээд хэд савхдаад зүйл дуусгаж мэднэ.

Posted in + СОНИНУУД, + СЭТГҮҮЛ ЗҮЙ, НИЙТЛЭЛ, НЭВТРҮҮЛЭГ, + ТЕЛЕВИЗ | Leave a Comment »

Ч.Сангарагчаа: Би хэвлэл мэдээллийнхэндээ хандаж хэлмээр байна…

Posted by Бид on 2009/10/04

Өнгөрсөн долоо хоногт Ерөнхийлөгч Ц.Элбэгдорж Авлигатай тэмцэх газрын дарга Ч.Сангарагчааг дэд даргатай хамт дуудаж баахан загнажээ. Хэвлэл мэдээллийнхэн монголын авлигын загалмайлсан эцэг гэж урьд нь яг энэ өрөөнд сууж байсан эрхмийг зааж өгөөд байхад хөдлөөгүйд ихэд хилэгнэсэн байна.

Загнахдаа тун сайн бэлтгэсэн нь илт. Үүний тулд АТГ-ынхан 14 ажилтнаа орон сууцтай болгоход зориулж төсвийн мөнгөнөөс олгосон баримтыг “Өдрийн сонин” дээрээ дэлгэж, бас АТГ-ын дэргэдэх олон нийтийн зөвлөлийн гишүүдийг зарлигаараа өөрчилж (Ерөнхийлөгчийн эрх мэдлийн асуудал юм байна) “ардчиллынхан” зонхилсон 15 хүнтэй болгож өргөтгөөд тэднээс Ж.Батзандан тэргүүтнийг (бусад нь үзэгдсэнгүй) байлцуулав.

АТГ-ынхан “орон сууцны” нээнтгээ арилгах гэж тэр оройдоо мэдэгдэл гаргаж бүх телевизээр уншуулсан ч монголын хамаг телевизээр орон даяар шууд дамжуулах шахсан “Монгол Улсын Ерөнхийлөгч Ц.Элбэгдорж АТГ-ыг хангалтгүй ажиллаж байна гэж дүгнэв” реалити шоуны хажууд юу болохов.

Араас нь Ерөнхийлөгчийн хэвлэл мэдээллийн алба, хэвлэлийн төлөөлөгчийг байтугай Ерөнхийлөгчийг өөрийг нь орлож дутуу ярьсныг (уг нь Элбэгдорж дутуу ярина юу байхав!) гүйцээж тайлбарладаг болсон“дэд ерөнхийлөгч” Д.Дорлигжав (жинхэнэ ажил нь тамгын газрын дарга гэсэн байх шүү!) ээлжит ярилцлагаа өгч “Ийм хүнийг анх удаа л харж байна” гэж шогшроод Сангарагчааг огцрох хэрэгтэй гэв.  Ажлаа авснаас нь хойш ирж уулзаагүй юм гэнэ.

Хуулиараа бол АТГ-ын дарга өөрөө л хүсэхгүй бол Ц.Элбэгдорж байтугай Д.Дорлигжав ч огцруулах эрхгүй юм байна. Гэхдээ ингэж цочоох цаг хэдийнэ болсон. Маргаашнаас нь Н.Энхбаяр гэдэг хүн, TV9 гэдэг телевиз хоёрыг шалгаж эхэлсэн сураг дуулдав…

Энэ өдрүүдэд АТГ-аас манай хэвлэл мэдээллийг хэрхэн дүгнэсэн нь тун сонин байлаа. Тус газрын мэдэгдэлд “… өдөр тутмын зарим хэвлэлд гаргасан “Авлигатай тэмцэх газрын удирдлагууд төрийн мөнгийг дур мэдэн зарцуулдаг” гэсэн утга бүхий мэдээлэл нь худал ташаа гэдгийг албан ёсоор мэдэгдэж байна. Авлигачид, тэдний хууль бус орлогоос хүртэгч бүлэглэлийн энэ мэт явуургүй оролдого нь хэзээ ч бүтэхгүй санаархал …” гэжээ. Заримсаад байх юмгүй “Өдрийн сонин”-ийг хэлж байна. Ерөнхийлөгч Ц.Элбэгдоржийг хамгийн ихээр дэмждэг, энэ утгаараа түүнтэй “холбоотой” сонин. Тэгэхлээр “авлигачид, тэдний хууль бус орлогоос хүртэгч бүлэглэл” хэн хэн болж таарахав?

Бямба гаригт МҮОНТ-ийн “Ярилцъя” хөтөлбөрөөр Ч.Сангарагчаа дарга дахин дэлгэцнээ үзэгдэж “Би хэвлэл мэдээллийнхэндээ хандаж хэлмээр байна. Манай хэвлэл мэдээллийн байгуулагууд авлигатай тэмцэх, шударга ёсыг тогтооход ихээхэн үүрэг гүйцэтгэж байгаа. Та наргүйгээр бид алхам ч урагшаа явахгүй. Та нараар дамжуулж өдөр тутам авлигатай холбоотой эерэг, сөрөг мэдээлэл сүүлийн 2 жил дараалан сонин хэвлэлээр гардаг болсон. Авлигатай тэмцэхэд маш том тус дэмжлэг болж байгаа. Тэгэхээр би энэ удаад хэвлэл мэдээллийнхнээ энэ ажлаа улам эрчимжүүлээч гэж хэлмээр байна. Нөгөө талаас энэ хэвлэл мэдээллийнхний маань дотор шударга бус, олигархуудын гар хөл болсон, худалдагдсан, шуудхан хэлэхэд, тийм хэвлэл мэдээллийн сонин ч гэх юм уу юу ч гэх юм хэвлэл мэдээллийн хэрэгсэл цөөнгүй байгаа шүү. Үүнийг ард түмэн зүгээр энэ сонинг авч үзээд л шууд шууд хэлж байгаа шүү, энэ тэрний сонин байна, энэ тэр намын сонин байна, энэ тэр эрхтэн дархтаны сонин байна гээд л … Энэ олигархуудын дарангуйллаас хэвлэл мэдээлэлийнхэн минь гараачээ” гэж уриалмаар байна гэж өөрийн биеэр бататган хэллээ.

Авлигатай тэмцэх газрын дарга хэлж байна шүү!

Posted in "Өдрийн сонин", Улс төр, эдийн засаг | 2 Comments »

68 хувийг тэг болтол “зодож байна”

Posted by Бид on 2009/08/20

Одоо үйлчилж байгаа хууль тогтоомжийн дагуу, элдэв хөнгөлөлт чөлөөлөлт үгүйгээр  Оюутолгойн гэрээг байгуулаад ир гэсэн тов тодорхой үүрэг өгсөн УИХ-ын 57-р тогтоолын хариуд Засгийн газрын ажлын хэсэг “Ёстой гоё гэрээ байгуулах боллоо, харин хэдэн хуулийг өөрчлүүлье” гэсэн хариу даалгаврыг өргөн барихад Д.Дэмбэрэл дарга “жа” хэмээн хүлээж авсан тэр мөчөөс хойш монголын хэвлэл мэдээллээр гэрээний заалтуудыг магтах, ялангуяа 68 хувийн татварыг муулах сурталчилгааны кампани өрнөж байна. Ерөнхийлөгчийн суудлаас ховхормогцоо сая шударга үнэнийг нэхэж эхэлсэн Н.Энхбаярын TV9 телевиз (бас мэдээж “Зууны мэдээ”) гэрээний төслийг эсэргүүцэгчдийг яриулснаас биш , хэвлэл мэдээлэл, сэтгүүлч, тоймчид бараг бүгдээрээ Засгийн газрын талд орж УИХ-ын чихийг зөөлрүүлэх гэсэн мэт балбаж эхэллээ “Өнөөдөр” сонин УИХ-ын гишүүдийг “Нусаа тат” гэж загнасан бол UBS телевиз “… 68 хувийн татварыг авах гэж байгаа нь УИХ-ын гишүүдийн хувь хүртэх гэсэн сонирхолтой холбоотойг олон хүн мэдэж байгаа”-г илчлэв. (Харин “мэдэж байгаа” хүмүүсээ UBS мэдэж байгаа эсэх нь тодорхойгүй).  Бас Оюутолгойн гэрээ ба хуулийн өөрчлөлтүүдийг хэлэлцэх УИХ ээлжит бус чуулганд “Амжилт хүсье!”, эрхэм гишүүдийг “Зөв шийдвэр гаргаж чадна гэдэгт итгэж байна” гэх мэт боловсон  анхааруулга ч цувлаа… 

Ийнхүү Засгийн газар, “Айвенхо майнз”, түүний мөнгөнд согтсон хэвлэл мэдээлэл гурав 68 хувийн татварыг шууд газарт унаган тэг болтол зодож байхыг хараад манай яруу алдарт олон нийтийн телевиз яаж зүгээр өнгөрөхөв. Бишээ, өмөөрөөгүй… 

Эхлээд “Айвенхоу майнз”-ийн түнш – “Рио Тинто” компанийн сурталчилгааны нэвтрүүлгийг МҮОНТ оргил цагаараа сэмхэн шургуулав. Америкт суралцахдаа Оюутолгойн гэрээний гэнэтийн ашгийн 68 хувийн татвар бурууг мэдчихээд ирсэн МУИС-ын багш Баянмөнх “… энэ татварыг хөрөнгө оруулагч тал зөвшөөрөхгүй… яавал тэдэнд ашигтай байлгахав?” гэх мэтээр хичээл заалаа. Бас геологийн ухааны нэгэн доктор ярив. (Яг энэ хоёр ярианы хэсгээс тэр оройн “Цагийн хүрд” үзүүлсэн юм. Мэдээллийн хөтөлбөр хүртэл захиалгатай байжээ). Төгсгөлд нь “Улаанбаатар хот. 2009 он.

Тэгвэл чуулган нээгдсэн оройн оргил цагаараа Оюутолгойн гэрээнээс 68 хувийг татварыг авч хаяхыг ухуулсан дараачийн нэвтрүүлэг хулгайгаар орж ирлээ. (Бас л хөтөлбөрт байгаагүй гэсэн үг). Нөгөө хичээл зонхилж, түүнийг Засгийн газрын төслийг өргөн барих үед Сангийн сайд С.Баярцогтын хэлсэн үг, УИХ-ын дарга Д.Дэмбэрэлийн “жа”-гаар чимсэн байлаа. Төгсгөлд нь бас л “2009 он” гэжээ.

“Захиалгат нэвтрүүлэг” гэсэн тайлбар тавихаа ч больж. Олон нийтийн телевиз цайрчээ. 

P.S: Энэхүү захиалгат нэвтрүүлгийг нөгөө TV9 телевиз маань 20-ны оройн оргил цагаараа гэнэтхэн үзүүлэв. Мөнгө, мөнгө, мөнгө … Бүр ахиухан мөнгө төлбөл иргэний хөдөлгөөнийхнийг яриулахаа ч болих биз.

Posted in "Өдрийн сонин", Монголын Үндэсний Олон Нийтийн Телевиз, TV9 телевиз, UBS телевиз | 9 Comments »

Монголын зам муу, гэхдээ Малайзынх маш сайн …

Posted by Бид on 2009/07/18

Сүүлийн өдрүүдэд МҮОНТ тэргүүтэй телевизийн хэд хэдэн сувгаар Сингапур, Малайз хичнээн сайхан хөгжиж байгааг харуулсан сурвалжлагууд тасралтгүй гардаг боллоо. Ялангуяа автозамынх нь ганц ч нүхгүй, толигор сайхныг ээ!!!

Манай телевизүүд яагаад энэ хоёр улсыг гэнэт сонирхов? Нэг ч сэтгүүлч энэ талаар дуугарсангүй.

Харин “Өнөөдөр” сониноос явсан сэтгүүлч “Эдийн засаг, дэд бүтцийн хөгжлөөрөө дэлхийд гайхагдах орнуудын туршлагаас эх орондоо нэвтрүүлэхийн тулд монголчуудынхаа оюуны мэлмийг нээх тал дээр УИХ-ын гишүүн Х.Баттулга сэтгүүлчидтэй хамтран ажиллахаар шийджээ. Тэрбээр хувиасаа хөрөнгө гарган, хэвлэл мэдээллийн 26 ажилтныг Сингапур, Малайзаар аялуулсан нь дээрх ажлын гараа болов” хэмээн шударгаар бичив.

Зөвхөн гараа нь ийм байгаа юм чинь  цаашаа мөн ч урт зам туулахнээ. Гэхдээ УИХ-ын гишүүн төдийгүй Зам тээвэр, дэд бүтэц хариуцсан сайд Х.Баттулга эхлээд монголын зам ямар байгааг, хэрхэн Сингапур, Малайзынх шиг болгож буйгаа сурвалжлуулмаар аа.  Хэвлэл мэдээллийн 26 ажилтныг нийслэл хотын замаас эхлээд Лүнгийн замаар аялуулаасай.

Социализмын үеийн онигоо байдаг:

Сангийн аж ахуйн хурал дээр хоёр асуудал хэлэлцэхээр төлөвлөв.  1. Малын саравч засах ажил  2. Коммунизм байгуулах зорилтын тухай.  Хурал эхлэхэд дарга босч ” Одоогоор банз байхгүй тул шууд хоёрдахь асуудалдаа орьё” гэжээ.

Posted in "Өнөөдөр" сонин, + ТЕЛЕВИЗ, Нийтлэл, нэвтрүүлэг | 2 Comments »

“Үнэгүй” vs “Зар мэдээ, сурталчилгаа” ба “Шуурхай зар”

Posted by Бид on 2009/06/22

Хэдэн долоо хоногийн өмнөөс нийслэлийн төвийн бараг бүх гудамж замын хоёр хажуугаар  ийм нэгэн сурталчилгааны самбарууд жагссан билээ.

Unegui zar sonin

Удалгүй http://www.unegui.mn сайт нээгдэж, харин цаасан дээрх “Үнэгүй” (“Түмний зар сонин”) сонины анхны дугаар 2009 оны 6-р сарын 15-нд хэвлэгдэн гарав. Зарын хэмээх хоёр сонин сүүлийн 10 гаруй жилийн турш эзэгнэж байгаа зах зээл рүү цөмөрч орох гэсэн ээлжит оролдлого энэ болой.

Тэр хоёр сониныг бүгд мэдэх учраас дэлгэрэнгүй танилцуулахгүйгээр зарим нэг баримтыг дурдаад орхиё. Анхных нь “Шуурхай зар”. 1990-ээд оны эхээр мэндэлсэн зах зээлийн анхдагчдын нэг бөгөөд “Зарлан мэдээлэх чөлөөт хэвлэл” тодотгол нь тэр цагаас үлджээ. Эрхлэн гаргагч “Ширэвгэр” компанийн захирал Г.Төмөрбаатарт одоо улс төрд орж Сүхбаатар дүүргийн Засаг даргын суудалд суусан байна. Тус сонин одоогоор вэб сайтгүй.

Хоёрдахь нь “Зар мэдээ, сурталчилгаа”. Онцлог гэвэл зарыг зарын цэгүүдэд биеэр төдийгүй БаянСАТУ1904 лавлах утас, Мобиком, Скайтелийн утсанд мессежээр, бас http://www.zarsonin.mn сайтад гишүүнээр элсүүлж мөнгөөр цэнэглэх данс ашиглан хүлээн авч сониндоо нийтлэхээс гадна хэдэн өдрийн дараа сайтдаа тавьдаг юм байна.

“Шуурхай зар”, “Зар мэдээ сурталчилгаа” хоёр нэлээн төстэй. Хоёулаа 4000 орчим хувь хэвлэгддэг гэсэн тоо бий. Адилхан А3-ын 60-70 нүүрээр долоо хоногийн Мягмар, Баасан гаригт зэрэг хэвлэгддэг. Худалдах үнэ нь нэмэгдсээр одоо яг адил 800 төгрөг болсон. Хоёулаа зарыг төлбөртэй хүлээн авч , сониноо 800 төгрөгөөр зардаг. Тэд ийнхүү Монгол дахь зарын сонины жишгийг тогтоожээ. Тэгвэл “Үнэгүй” тэднийг дууриахдаа долоо хоногт нэг удаа Даваа гариг бүр хэвлэгдэхдээ зарыг утас ба мессежээр үнэгүй хүлээн авснаараа нөгөө хоёрыг давж гарахаар тооцоолжээ.

Юу болохыг харж л байя. Өнгөрсөн жилүүдэд зарын сонин гаргаж зах зээлд тогтох гэсэн оролдлогууд зөндөө байж ялангуяа ажлын зар, орон сууц, автомашин гэх мэтээр төрөлжиж ялгарахыг хичээсэн хөл дээрээ тогтсон нь үгүй. Зөвхөн энэ онд гэхэд “Хамгийн ШУУРХАЙ ЗАР МЭДЭЭ, мэдээлэл” (нэрээрээ төөрөгдүүлж байгаад худалдагдах гэсэн оролдлого бололтой) сонин нэмэгдсэн ч нөгөө хоёрын цаанаас цухуйхгүй л байна. http://www.topzar.mn сайт нь хаалттай.

Бас http://www.zarmedee.mn гэдэг “Үндэсний зарын портал сайт” бий. “Зараа үнэгүй өг, Зараа үнэгүй үз” гэсэн урианаас бүх юм ойлгомжтой. Гэхдээ зөвхөн онлайн учраас жирийн уншигчид бараг мэдэхгүй.

Зарын цаасан сонинууд, тэр дундаа “нөгөө хоёр” байр сууриа тавих хараахан болоогүй…

Posted in + СОНИНУУД | 530 Comments »

TV Zone vs Тop Info TV

Posted by Бид on 2009/06/09

Зурагтын мэдээ бол телевизорын дагуул. Долоо хоногт нэг, жилдээ 52 удаа солигддог дагуул. Таны санаанд хамгийн түрүүнд “зуугийн мэдээ” орж байгаа биз. Өнөөдөр “ТВ долоо хоног”, “ТВ суваг” (Монголын телевизүүдийн холбооны дэргэдэх гэсэн тодотголтой), “ТВ элч” (МҮОНРТ-ийн), “Танайд хоноё”, (бас “ТВ толь” гэх мэтийн нэг удаагийн оролдлогууд зөндөө) сонинууд хэдийнэ 200 төгрөгийн үнэтэй болж өнөөдрийн олон телевизийн мэдээг эмх замбараагүй унжралдуулан нийтэлж орхидог хэвээрээ ч янз бүрийн зар мэдээ, реклам сурталчилгааг өнгөтөөр тавьдаг, бас хямдхан тул байр сууриа хараахан алдаагүй өдий хүрчээ. Гэхдээ хэдэн саяын үнэтэй Bravia телевизорын хажууд “зуугийн мэдээ” юмуу өдөр тутмын сонины “мэдээтэй” нүүр нугларан хэвтэх зохимжгүй харагдана.

Сэтгүүл бол өөр хэрэг. Ноднин телевизийн мэдээний сэтгүүлүүд шинээр гарч ирсний эхнийх нь UBS телевизийн эрхэлдэг TV Zone юм.

Tv Zone setguul

Дараачийнх нь “Top Info TV (хамаг чухал үгсийг хамсан яасан ховдог нэр вэ?) сэтгүүл. Дээр дурдсан “TV суваг” сониныг, бас “Ноён зууч 1950” утсыг эрхэлдэг “Билэгт дөлгөөн” ХХК-ийн хэвлэл юм байна. Хоёулаа 999 төгрөгийн үнэтэй. (Нэг төгрөгийн хариулт өгдөг болов уу?).

IMG_1106

Өнгөрсөн сард Next Week нэртэй гуравдахь сэтгүүл мэндэлжээ. Хуудас цөөн, үнэ хямдхан – ердөө 300 төгрөг. Гурвуулаа гадаад нэртэй сэтгүүл байна.

Яг одоогоор TV Zone, Top Info TV сэтгүүлүүд ширүүн тулж байгааг UBS ба TV9 телевизээр явах шинэ дугаарын сурталчилгаанууд, бас “Номин”-гийн бүх супермаркетад зэрэгцэн зарагдаж байгаагаас та анзаарсан байх. Хоёуланд нь элдэв мэдээ, сонирхолтой ярилцлага, өгүүлэл, орчуулга, зураг, зөвлөгөө, англи хэлний хичээл пиг дүүрэн нийтлэгддэг юм байна.

Миний хувьд телевизийн мэдээ нь чухал. Хоёуланг авч үзвэл харамсалтай нь гял цалыг эс тооцвол “зуугийн мэдээ”-нээс дээрдэх юм алга: нөгөө л холион бантан. Уншигчид (үзэгчид) өөрт хэрэгтэй телевизийн суваг, өдөр цагийг олохын тулд бөөн эрэлд мордоно, дээрээс нь жижигхэн үсгээр хэвлэдэг тул томруулдаг шил шаардагдана. Нэвтрүүлэг, киноны тайлбар, танилцуулга байхгүй. Ингээд телевизийн мэдээний сэтгүүлийн хамгийн муу нийтлэл нь телевизийн мэдээ болж таарлаа. Япончууд нэг мундаг цаг бүтээсэн нь радио сонсгож телевиз үзүүлэхээс эхлээд тоглоом тоглуулдаг, тоо боддог, ном ярьж өгдөг, агаарын хэм, эзэмшигчийн цусны даралтыг хүртэл хэмждэг гээд түмэн үйлдэлтэй мөртлөө цаг, минутийг заалгахыг мартчихсан байжээ гэдэг шиг.

Top Info TV сэтгүүл янз бүрийн телевизийн нэвтрүүлэг, тэдгээрийн сэтгүүлч, уран бүтээлчдийг дугаар бүртээ аятайхан танилцуулдгаараа давуу боловч бусад сэдвээр задгайдуу. Харин TV Zone сэтгүүл илүү соёлтой ч ерөнхийдөө UBS-ийн Zone-д хашигдсан санагдав.

Posted in + СОНИНУУД, + СЭТГҮҮЛ, + ТЕЛЕВИЗ, UBS телевиз | 21 Comments »

Тэргүүн нүүрний эсэргүүцэл

Posted by Бид on 2009/05/27

Саяын Ерөнхийлөгчийн сонгуулиар өдөр тутмын сонинуудын дунд хоёр туйл байсны нэг нь “Өдрийн сонин”, нөгөө нь “Зууны мэдээ”. Бүр 1999 онд төр, засгийн хоёр сониныг Ц.Элбэгдорж, Н.Энхбаяр нар татан буулгах нэрээр итгэлтэй хүмүүстээ авч өгсөн нь явсаар 10 жилийн дараа хэрэг болжээ. Улс төрчид холыг харах юм аа.

Өнгөрсөн саруудад хоёр сонин ямаршуу байсныг бид мэднэ. Харин санал хураалт дуусч сонгуулийн дүн тодорсон ч тэд тайвшраагүйг тэргүүн нүүрүүд илэрхийлсээр байна.

“ӨДРИЙН СОНИН”

2009.05.25-ны Даваа гаригийн дугаар шөнө дундаас хойш хэвлэлтэнд шилжиж ялалтын мэдээг тэргүүн нүүрэндээ залж амжсан байна: “02.30 цагийн байдлаар Ц.Элбэгдорж ялж байв”. Гэтэл хажууд нь “Экс ерөнхийлөгч үхэлдээ хэнийг ч буруутгахгүй байхыг хүсчээ. Тэр хаднаас үсэрч амиа хорлов” гээд БНСУ-ын Ерөнхийлөгч байсан Ну Му Хен-ы үхлийн тухай том тайлбарын эхлэлийг зураг хөрөгтэйгээр өнгө ялган онцолжээ. Солонгост гарцаагүй сенсаац боловч Монголд шууд хамаагүй энэ явдлыг тэргүүн нүүрэндээ залж гашуудсан нь хачин. “Өдрийн сонин” тэр Ерөнхийлөгчид тун сайн байж дээ…  

 2009.05.26-ны дугаарын эхний нүүр арай даруухан байв: “Ардчилсан ерөнхийлөгч ард түмнийхээ төлөө ажиллахаа амаллаа”, Н.Энхбаяр: Би санал хураалтын дүнг хүндэтгэж байна” гэсэн тайван сурвалжлагуудыг нийтэлж “Элбэгдорж 51.24 хувиар ялалт байгууллаа” гэсэн ялалтын мэдээ 3-р нүүр лүү шилжсэн байна.

2009.05.27-ны дугаарын тэргүүн нүүр буцаад хачин болчихов: “МАХН-ын “Б” төлөвлөгөө буюу ялалтыг яаж хүчингүй болгох вэ?”. Бас нэг ярилцлагын гарчиг: “Сонгуулийн ерөнхий хороо сэжигтэй байна”.

Одоо сонгуулийн дүнг СЕХ-ноос бушуухан баталгаажуулж зарлахгүй бол “Өдрийн сонин” хэцүүдлээ шүү!

Тэгвэл “ЗУУНЫ МЭДЭЭ” яав?

2009.05.25-ны Даваа гаригийн дугаарын тэргүүн нүүр зөвхөн “СЕХ-ны дарга Н.Лувсанжав 21.00 цагийн мэдээгээр улсын хэмжээнд нийт сонгогчдын 64.61% санал өглөө” гэж мэдээлэв. Хэрвээ Энхбаяр ялж яваа мэдээлэл ахиухан  ирсэн бол энэ нүүр ямар их баяр хөөрөөр дүүрэх байсан бол?

 2009.05.26-ны эхний нүүрний гарчиг гайхалтай: “Н.Энхбаяр 50.31 хувийн саналаар орон нутагт ялжээ”. Одоогийн ерөнхийлөгч ингэж ялаад байхад өрсөлдөгч нь бас ялчихсан байгаа үзэгдээгүй явдлыг мэдээнийхээ дотор тун дургүй хүлээн зөвшөөрсөн харагдана. Гэхдээ хоёрдугаар нүүрэндээ “Н.Энхбаяр зангарагтай улс төрч гэдгээ харуулсан”-ыг бахархалтайгаар зарлав.  

2009.05.27-ны дугаараас сонгуулийн үнэр бүрэн арилжээ. Өнгөрсөн бүтэн сайнд болсон “жижиг” үйл явдлыг ингээд мартав уу гэтэл “Хөрөнгө оруулагчид Монгол Улсаас болгоомжилж эхэллээ” гэсэн том нийтлэлийн гарчиг байна. Ц.Элбэгдорж ялсанд гадныхан тун дургүй байгаа гэнэ.

Монголчууд буруу сонголт хийснээ цаашдаа “Зууны мэдээ”-гээс улам сайн мэдэж авах биз.

Posted in "Зууны мэдээ" сонин, "Өдрийн сонин", 2009 оны Ерөнхийлөгчийн сонгууль | 3 Comments »

“Болжмор” намнах кампани

Posted by Бид on 2009/04/26

1958 он. БНХАУ.
Их жолоодогч Мао Цэдуны их үсрэлтийн бодлогын үеэр хөдөө аж ахуйн ургамлын дөрвөн хортон болох хулгана, шумуул, ялаа, болжмортой тэмцэх кампанит ажил Хятад орон даяар өрнөжээ. Ялангуяа болжмор шувууг хамгийн ихээр ургац идэж сүйтгэдэг ангийн дайснаар тодруулж заналтайгаар онилсон байна.

boljmor-1958-hyatadБолжмор турь муутай, агаарт 15 минутаас удаан нисч чаддаггүй тул тариачид, бас хотоос дайчлагдан ирсэн сая сая ажилчид, залуучууд, пионерууд чавхаар харваж, түмпэн сав, бөмбөр гээд юу ч хамаагүй нүдэж, толгой дээрээ алчуур, шуудай сав эргүүлж, бас шавар байшин, модны оройд хүртэл авирч орилж хашгиралдахад хөөрхий болжморууд бууж чадалгүй бахардаж унахад бяц цохиж гүйцээгээд утсанд хэлхэж овоолдог байж. Үхсэн болжмор дүүртэл ачсан машины тэвшин дээр хятад пионерууд баатарлагаар зогсож явааг зурагтаар үзсэнээ санаж байна…Энэ кампаниар нийтдээ 2 тэрбум ширхэг болжмор устгасан тайлан гарчээ.

2009 он. Монгол Улс.
Монгол Улсын Ерөнхийлөгчийн сонгуулийн гэгээлэг сурталчилгааны өдрүүдэд нэгэн сахилгагүй “болжмор” сонины мухлагт буумагц TV9 телевизийн “Ардын мэдээ” нэвтрүүлгийн хөтлөгч пионер сонор соргогоор мэдэж харваж унаган шинжээд эзнийх нь өрсөлдөгчийн тал нисгэсэн болохыг өчиггүй тогтоож уучлал гуйхыг шаардан баахан дүвчигнэв ээ. Тэр ч бүү хэл хүн бүр “Бор шувуу”-г 500 төгрөгөөр худалдаж аваад уншихгүйгээр, хүнд үзүүлэхгүйгээр шатаан устгахыг шаардлаа. Үнсийг нь цуглуулж тэвшин дээр ачаад гудамжаар явах юм байна л даа….

Энэхүү үйлийн үртэй болжмор бол “Шууданч бор шувуу” нэртэй бичил сонин. Дэлгээд нийлүүлсэн ч сурталчилгааны сонины ганц нүүрнээс хэтрэхгүй, бичил сонин гэхэд ч ахадмаар, алгын чинээ жижигхээн товхимол.

Яг энэ мөчөөс Ерөнхийлөгчийн сонгуульд соёлын хувьсгал эхлэх нь тэр. Бор шувуу тойрсон хэвлэлийн хурлууд цуврав. АН-ын сонгуулийн штаб гэнэт оволзож “Бид хэзээ ч ийм жол юм хийхгүй. Хийвэл хийсэн шиг хийнэ” гэж пээдийгээд хувьсгалт намынхны тавьсан тавьсан жүжиг хэмээгээд хөөрхий болжморыг үргээж явуулсан бол МАХН-ын сонгуулийн штаб, ерөнхийлөгчийн хэвлэлийн төлөөлөгчтэй хамтран сэтгүүлчдийг цуглуулж байгаад тэдний нүдэн дээр мөч мөчөөр нь жиргэж орхив. Энэ завсар Ерөнхийлөгчийн зөвлөх найрагч Түмэнжаргал цэрэг цагдаа хөдөлгөж, уржигдар уг сониныг тарааж явсан залууг хэвлэлийн бирж дээр отолт хийж баривчилсан сураг дуулдана.

Араас нь манай сэтгүүлчид ч болжмор үргээх сайн үйлсын аянд мордлоо. “Өнөөдөр” сонин гэхэд л “… энэ удаагийн Ерөнхийлөгчийн сонгуулийн үеэр өнөөх гэм хоргүй “өхөөрдөм” бор шувуу маань муу ёрын, хар зүгийн гэсэн тодотгол зүүж, хэрээний хэлээр шаагилдаж, тасын шуналаар амьсгалах болов” гээд авч өгөх нь тэр.

Монголыг донсолгосон тэрхүү аймшигт “бор шувуу”-г хайж сонины мухлагт хүрч очвол багтаж ядсан олон сонин, сэтгүүлийн завсраар өрөвдөлтэйеэ цухайв. Хөөрхий дөө, хэн ч тоож ч харахгүй юм. Би өрөвдөөд 500 төгрөгөөр худалдаж аваад эргүүлэв.

Д.Арвиныг айлгасан мэдээ
УИХ-ын гишүүн Д.Арвинг Ерөнхийлөгч Н.Энхбаяраас урваагүй маш цөөн хүмүүсийн нэг гэдгийг бид мэддэг. Саяхан Хэвлэлийн төлөөлөгч Я.Төмөрбаатарын нисгэсэн “Ерөнхийлөгч буудуулав” гэсэн мэдээг сонсоод эрхэм гишүүний маань нүд эрээлжлээд унах дөхсөн байв. Удалгүй түүнээс ч дор “Ерөнхийлөгчийн ээжийн бие муу тул Бээжин нисэв” гэсэн мэдээг сонссон гишүүний зүрх хаагдах шахаж сандаргажээ. Сандарсан Д.Арвин Бээжингийн билет яаралтай захиалах гэж байтал Ерөнхийлөгчийн төрсөн ээж бус хадам ээж нь өвдсөн тухай мэдээд арай гэж тайвширсан байна
.

Гэх мэтээр элэг хөшөөм мэдээнүүд, бас сонирхолтой баримтууд ч байна.

Г.Батхүүгийн хандив
Ерөнхийлөгчтэй тохиролцсоны дагуу Ерөнхийлөгчийн сонгуульд Ардчилсан намаас нэр дэвшээд сайн дураараа “өгөөш” болох гэж байсан УИХ-ын гишүүн Г.Батхүү өөрийн намын нэр дэвшигчид хандиваа өгснийхөө дараахан МАХН-аас нэр дэвшигч дээр очин Ц.Элбэгдоржид өгснөөсөө арав дахин илүү мөнгө хандивласан байна. 2005 оны сонгуулиар энэ эрхэм М.Энхсайханд 20 сая, Н.Энхбаярт 100 сая төгрөг хандивлаж байсныг нь Баабар гуай нийтэд ил зарласан билээ. Энхбаяр Батхүү хоёр хөрөнгө мөнгөөр холбогдсон эртний андууд аж.

TV9-ын хөтлөгч пионер Батхүүгийн өмнөөс ихэд гомдож “Ахаа, таныг доромжилсон байна шдээ, будаа болгоод өгөөч” гэж ховлоод байсныг саналаа. Минийхээр бол мөнгө ихтэй тэр эрхмийг нам эвсэл гэж явцуурдаггүй өглөгч болохыг харуулсан гэгээлэг мэдээ байна даа.

Бусад мэдээг МАХН-ын сонгуулийн штабыхан няцаах нэрээр монголын бүх телевизээр үг үсэггүй уншиж өгсөн тул алгасъя. Тэгээд ч бичил сонин Интернэтийн хаягаа бичжээ. Хэрвээ та 500 төгрөгөө хэмнэе, эсвэл гадаадад суугаа бол http://www.borshuvuu.blogspot.com хаягаар ороод бүрэн эхээр нь уншаарай.

Харин цаасан дээр буугаагүй нэгэн реклам энд тавигджээ: “Итгэхэд бэрх ч тэд Таниас хандив гуйж байна”. Маш гоё сөрөг сурталчилгаа.

enkhbayar-elbegdorj-handiv

Харин арын нүүрэнд одоогийн Ерөнхийлөгчийн эсрэг агуулгатай зохиомол “Энхбаярын дуу”-г тавиад З.Түмэнжаргал, Ч.Энхээ нарыг зохиосон гэжээ. Тэд яалаа гэж ийм муухай юм зохиохов. Гэхдээ овоо босгоогүй бол болжмор хаанаас суухав. З.Түмэнжаргал найрагч Ерөнхийлөгчийн бөөрөнд үргэлж наалдаастай, Ч.Энхээ Ерөнхийлөгчийн сонгууль эхлэх бүрийд түүнийг дэмжих хөдөлгөөн байгуулдагийг ашиглаж муулсан хэрэг.

Бас итгэхэд бэрх хачин мэдээ ч байна: “Ерөнхийлөгчийн удам судрын талаар бичсэн сэтгүүлч ор сураггүй болов” Энэ бол 100 хувь худлаа байж таарна.

Гэхдээ “Шууданч бор шувуу” бусдаас илүү худалч, марзагнагч биш ээ. Бичээд байгаа хоёр нэр дэвшигчийн нэг нь мянган хүний өмнө “Надад 500 сая төгрөгийн хахууль өгөх гээд…” сийхгүй худал залсан бол нөгөө нь албаны нисдэг тэргээр ан хийгээд шүүмжлүүлэхдээ “монголын төр өөртөө зүтгэсэн хүнд халтай” гэж ихэрхсэн санагдана. Тэгэхэд хэнийг нь ч отолт хийж бариагүй билээ.

Баасан гаригийн “Өнөөдөр” сонины дугаарт “Энхбаяр агуу агуу” гэсэн бичлэг нийтлэгдэв. Ерөнхийлөгчийн хэвлэлийн төлөөлөгч Төмөрбаатартай ярилцсаны сэм бичлэг гэнэ. Харин ориг Төмөрбаатар нь албан ёсоор няцаалаа. Зохиосон байж таарлаа. Гэхдээ түүний нэрийг хасчихвал агуулга нь надад таалагдав. Ерөнхийлөгч Н.Энхбаяр дээд боловсролыг үнэ төлбөргүй болгох авантюр амлалтаа хожим хэрхэн тайлбарлаж болох нэг л хувилбарыг маш логиктой дэлгэж чаджээ.

Яагаад өчүүхэн “бор шувуу” том намуудыг донсолгож монголын сонгуульд хятад маягийн “соёлын хувьсгал”-ыг эхлүүлэв ээ? Ер нь яагаад хоёр нэр дэвшигчийн талаар чөлөөтэй жиргэж, уран зохиож, элэглэж, таамаглаж болохгүй болчихов? Шалтгаан маш энгийн: МАХН, АН хоёр найрч зөвшилцсөөр байгаад бие биенээ ил тод шүүмжлэхэд бэрх болж. Нэг нь шүүмжилбэл нөгөө нь “гүтгэлэг” гээд чарлачихна. Ингээд хоёр тал нэр, хаяггүй нийтлэл нэвтрүүлгээр “соёлтой “үзэлцэж байна. Намынхаа нэвтрүүлэг, захиалгат сурвалжлагаар харилцан “гүтгэхлээр” яах ч үгүй, харин үл мэдэгдэх нөхөр хэдхэн ширхэг бичил сонин (уншсан хүмүүс нь гэвэл хоёр намын штабынхан, тэгээд би… ингээд дуусах байх) гаргахад л цагдаагаар бариулах нь тэр.  МАХН, АН хоёр “гүтгэлэг” хийх эрхийг хүртэл өмчлөөд авчихаж…

“Шударга” гэгдэх сонгуулийн дайсан – болжмор намнах кампани Монголд оволзов.

Posted in "Өнөөдөр" сонин, 2009 оны Ерөнхийлөгчийн сонгууль, TV9 телевиз | 21 Comments »

Бид нэг хүнийг шоронд мартсан юм шиг байна …

Posted by Бид on 2009/03/10

“Иргэдийн шударга шүүх” ТББ-ын тэргүүн Х.Бат-Ялалт дөрвөн сарын ял аваад шоронд сууж байгаа. 2-р сарын 18-нд Ганцхудагт болсон шүүх хурал дээр түүний эсрэг 5 үндэслэлээр ял тулгасны 4 нь нурж, харин тав дахь буюу жилийн өмнө Х.Бат-Ялалтын хийлгэсэн хэвлэлийн хурлаас “Өдрийн сонины” сурвалжлагч Б.Цэцэгдэлгэр мэдээ бичихдээ хоёр дүүргийн нэрийг сольж бичсэнийг нотлох баримтад авч 4 сарын хорих ял оноосон юм. Тэр үед Бат-Ялалт сэтгүүлч охидыг буруу зөрүү бичихвий хэмээн сэргийлж хэвлэлийн мэдээ бэлтгэж тараасан ч Цэцэгдэлгэр алдаа гаргачихжээ. Тэгсэн мөртлөө Бат-Ялалт тэгэж ярьсныг л би бичсэн гэж зүтгээд ядахдаа ноорог, тэмдэглэлийн дэвтэр гээд юу ч үзүүлээгүй ажээ.

Х.Бат-Ялалт “би зөв ярьсан, харин сэтгүүлч алдаа гаргасан бол түүнтэй хариуцлага тооц” гээд Цэцэгдэлгэртэй барьцаж болох байсан ч тэгээгүй бөгөөд эр хүн шиг байж цаашаа ачигдсан гэж ойлголоо. Түүний өмгөөлөгч Самбуугийн Сүрэнжав ч гэсэн сэтгүүлчийг буруутгаад яахав дээ гээд ярьж суусан.

Харин Б.Цэцэгдэлгэр дээрх шүүх хуралд гэрч болж мэдүүлэг өгсөндөө туйлаас гомдсон сурвалжлага бичиж “Сурвалжлагч хэвлэлийн бага хурлын мэдээ бичсэнийхээ төлөө гэрч болов” хэмээн гарчиглажээ. Уг нь мэдээ бичсэний төлөө биш, харин буруу бичсэнийхээ төлөө гэрчээр дуудагдсан баймаар. (Бусад сонин хэвлэлийн сурвалжлагчид зөв бичсэн учраас гэрч болоогүй). Цэцэгдэлгэр сурвалжлагаа “Ийнхүү сэтгүүлч хүний нэр төр, алдар хүндийг гутаасан гэх шүүх хуралд гэрч болж мэдүүлэг өглөө. Бусад оронд үүнийг хуулиар хориглож, сэтгүүлчийн хэвлэн нийтлэх эрхийг нь хангасан юм байдаг юм билээ” хэмээн дэвэн дэлхийтэй барьцаж төгсгөсөн байна.

“Өдрийн сонины” сэтгүүлч Б.Цэцэгдэлгэр бас л алдаа хийчихжээ. Сэтгүүл зүйн ном сурах бичиг, гарын авлагад зөв бичээд байхад л ингэж буруу ойлгоод байх юм даа.

Түүнийг сурвалжлагаа хэвлэлд шилжүүлэх мөчид шүүхийн шийдвэр хараахан гараагүй байсан ч тэр оройдоо Бат-Ялалт 4 сарын ял авсныг Цэцэгдэлгэр маргааш, нөгөөдөр, нөгөөдрийн цаад өдөр гээд лав 3-р сар гартал сониндоо мэдээлээгүй юм. Дахиад буруу бичээд ялыг нэмүүлэхээс айсан гэж найдья. Харин Бат-Ялалтыг суллагдаад гарч ирэхээр очиж уулзаад уучлал гуйгаасай даа. Гэхдээ битгий бичээрэй. Бас алдчихвал буцаагаад суулгачихаж мэднэ…

Posted in "Өдрийн сонин", + СОНИНУУД | 6 Comments »

“Сэрүүлэг”-т ажилладаг тэнгэрийн бүсгүй сэтгүүлчид ..

Posted by Бид on 2009/03/07

Дуучин Дэлгэрмөрөн ба “Сэрүүлэг” сонины хооронд бараг л үхэх сэхэхээ үзэх тулаан шүүхийн танхимд болохоор зарлагдсан боловч шал пал хийгээд замхрав аа.

2-р сарын эхээр “Дуучин Т.Дэлгэрмөрөн нялх биетэй эхнэрээ хэвтэрт ортол нь зоджээ” гэсэн гарчиг бүхий нийтлэл “Сэрүүлэг”-т гарсан билээ. Монголын бүх бүсгүйчүүдийг тэнгэрт тултал өргөмжилж чаддаг ( “Хайрт минь, хань минь” дууг нь сонсоод ийм сайхан хоолой тэнгэрээс л заяадаг байх гэж бодсон шүү) мөртлөө нэгийг нь сугалж аваад балбаж суудгийг мэдсэн уншигчид түүнийг харааж ерөөж эхэлмэгц дуучин маань хэвлэлийн хурал зарлаж эхнэрээ дагуулсаар орж ирээд няцаалт хийлээ. “Хэвтэрт ортлоо зодуулсан” эхнэр нь зүв зүгээр явааг бүгд харав. Нийтлэл гарсны дараа, бичсэн сэтгүүлчийг олж уулзахаар сонины редакци дээр очиход цаадуул нь бөмбөг хөөлгөөд явуулсныг хэлээд Дэлгэрмөрөн “Би энэ сонинтой нэгийгээ үзнэ. Та нар битгий захиалаарай. Ийм ёс зүйгүй сонинг байхгүй болгоно” гэж амаллаа. Энэ бол хувь ширхэг нь тасралтгүй буурч (өнөөдөр яг хэдэн хувь хэвлэгдэж гардгаа тас нуудаг) байгаа сонины хувьд тун ноцтой заналхийлэл!

Маргааш нь ГХЯ-ны Дипломат байгууллагын үйлчилгээ, аж ахуйн газрын даргаас чиглэл авсан бололтой “Сэрүүлэг” сонины ерөнхий эрхлэгч, редактор , хариуцлагатай нарийн бичгийн дарга гэсэн Өлзийдэлгэр, Жаргалсайхан, Хишигсүрэн нарын дөрвөн бүсгүй сөрөг хэвлэлийн хурал хийж дуучинг өөрийг нь шүүхэд өгөх болсноо мэдэгджээ. Авгайгаа 100 хувийн баталгаатай зодсон, шинэ он гарсны дараахан болсон явдал, харин ч бид хүндлээд өдөр судар зэрэг тодорхой мэдээллийг нь хасаад бичсэн, бүх баримтыг зөвхөн шүүх дээр дэлгэж Дэлгэрмөрөнг нам болгоно гэлээ. Тэгснээ “чөлөөт хэвлэлийн магнат”-ын өнгөрсөн арван хэдэн жилийн гавъяаг тоочоод  ийм агуу сониныг хаана гэж хэлсэн нь мянга түмэн уншигчдыг төдийгүй монголын чөлөөт хэвлэлийг, ерөөсөө хэвлэлийн эрх чөлөөг доромжилсон хэрэг хэмээн загнасаар дуусгав.

Ингээд шүүхийн танхимаас мэдээ, сурвалжлага хүлээх л үлдэв. Гэтэл дуучин Дэлгэрмөрөн “Тэнгэрийн бүсгүй” тоглолтоо эмэгтэйчүүдийн баяраар хийх болсноо зарлаж сэтгүүлчдийг цуглуулахад тоглолтыг биш (тэртээ тэргүй сайхан болно, суудал пиг дүүрнэ) нөгөө хэргийг тэсч ядан асуухад, “Би хуулийн байгууллагад хандсан. Харин “Сэрүүлэг” сониныхон буруугаа хүлээж маргаашийн дугаартаа хүлцэл өчихөө амласан. Одоо энэ асуудал дууссан” гэжээ.

Үнэхээр маргаашийн “Сэрүүлэг”уучлал гуйлаа. Гарчиг нь: “”Дуучин Дэлгэрмөрөнгийн нэр хүндэд халдан “Тэнгэрийн бүсгүй” тоглолтыг нь болиулахыг санаархав”. Агуулга нь бүр агуу: “Дуучин Т.Дэлгэрмөрөн нялх биетэй эхнэрээ хэвтэрт ортол нь зоджээ” нэртэй нийтлэл нь сурвалжлагчийн буруугаас үүдсэн ташаа мэдээлэл байсан тул дуучин Т.Дэлгэрмөрөнгийн эхнэр, хүүхэд, аав ээжээс нь хүлцэл өчиж байна. Энэхүү нийтлэл нь дуучин Т.Дэлгэрмөрөнгийн олон улсын эмэгтэйчүүдийн баяраар хийх “Тэнгэрийн бүсгүй” тоглолтыг нь болиулах, санаатайгаар нэр хүндийг нь унагаах гэсэн оролдлого байсан нь тогтоогдсон болно. Иймээс дуучин Дэлгэрмөрөнгийн “Тэнгэрийн бүсгүй” тоглолтонд амжилт хүсч, цаашдынх нь амьдрал, уран бүтээлийн зам нь дардан байхыг хүсье” гэжээ.

Сайхан зальдаж байна аа. Дуучин Дэлгэрмөрөн эхнэрээ зодоогүй, гэхдээ “Сэрүүлэг” сонин бас буруугүй, харин нэр нь үл мэдэгдэх этгээдийн хорон санаат явуулга байж таарлаа. Хэрвээ дуучин Дэлгэрмөрөн шиг унаж босохоор өндөр нэр хүндтэй биш, шүүхэд хандаж чадахгүй жирийн нэгнээр энэ сонин яаж зугаацдаг бол?

“Сэрүүлэг”-т ажилладаг сэтгүүлч бүсгүйчүүд хааяа тэнгэрийн гэж хэлмээргүй аашлах юм даа…

Posted in + СОНИНУУД | 7 Comments »

Ц.Балдоржийн нэрэмжит сэтгүүл зүйн дээд шагналыг зарлав

Posted by Бид on 2008/12/16

Шинэ жил дөхөж хэвлэл мэдээллийн оны шилдгүүд сүлд модны дэргэд бөөн бөөнөөрөө тодрох цаг ирлээ. Монголын Сэтгүүлчдийн Нэгдсэн Эвлэл, Монголын Сонины Холбоо, Монголын Телевизүүдийн Холбоо, МАСЗХ, “Залуу удирдагч” сан, цагаан сараас өмнөхөн Хэвлэлийн хүрээлэнгийн оны шилдгүүдийн хувилбарууд мэндэхлээр өргөмжлөл, гуншингүй сонин хэвлэл, телевиз, радио, сэтгүүлч Монголд үлдэхгүй.

Өчигдөр “Монгол ньюс” компанийн мэдээллийн төвд нэрт сэтгүүлч Ц.Балдорж агсаны нэрэмжит сэтгүүл зүйн цоо шинэ шагнал бий болгосныг зарласан хэвлэлийн бага хурал хийлээ. Гэхдээ энэ удаагийн шинэ жилээр бус харин жил бүрийн 9-р сарын 20-нд буюу Ц.Балдорж агсаны төрсөн өдрөөр гардуулна. Шагналын болзлыг танилцуулсныг сонсоход зөвхөн сонинд хамаатай, иймээс өдөр тутмын юмуу долоо хоног тутмын сонинуудад (“Сэрүүлэг”, “Хүмүүс”, “Зиндаа” багтана гэсэн үг) хэвлэгдсэн сэтгүүл зүйн бүтээлүүдийн зохиогч “би шагнал авья” гэж, эсвэл “түүнд өгнө үү” гэж редакци нь юмуу уншигчид дэвшүүлэх ажээ.

Шалгаруулах зөвлөл 9 хүний бүрэлдэхүүнтэй, түүнд “Монгол ньюс” группийн захирал Б.Нандинтүшиг, МУИС-ын сэтгүүл зүйн тэнхмийн эрхлэгч, доктор М.Зулькафиль, Радио, телевизийн дээд сургуулийн захирал, сэтгүүлч Э.Сонинтогос, Балдорж агсаны гэргий, “Улаанбаатар зочид буудал” ХК-ийн захирал Н.Шүр, “25-р суваг” телевизийн гүйцэтгэх захирал А.Авирмэд, МЗЭ-ийн гүйцэтгэх захирал, МҮОНТ-ийн удирдах зөвлөлийн дарга Х.Чилаажав, УИХ-ын гишүүн Ж.Энхбаяр, ахмад сэтгүүлч, соёлын гавьяат зүтгэлтэн Х.Цэвлээ нар багтжээ.

Хэвлэлийн хурлыг “25-р суваг” телевизийн 2-р сувгаар шууд дамжуулахыг (ийм сайхан боломжийг Балдорж агсан сэдсэн байж таарна) үзлээ. Ерөнхийдөө сэтгүүлчдийг (бас редакцийг) бүтээлээр нь шалгаруулна, үүнд сэтгүүл зүйн бүх төрөл зүйл хамаарна гэж ойлголоо. Гэтэл зарим шүүгч ердийн мэдээг ч хамаагүй шалгаруулах тухай дуугарсан бол нөгөө нь сэтгүүлчдийг сар сараар зогсоо сунгаж оноогоор байр эзлүүлж байгаад дүгнэх юм болоод явчихав. Сэтгүүлч маань амралтаа авбал яах болж байна?

Тэгтэл сэтгүүл зүйн доктор М.Зулькафиль сурвалжлагчид ярилцлага өгч “Манай ХЗДХЯ-нд 2500 хэвлэл мэдээллийн хэрэгсэл бүртгэгдсэн нь эрүүл үзэгдэл бус” гэж хаа сайгүй хэлдэг тэр юмаа давтаж,  үүнийг цэгцлэхийн тулд энэ шагналыг бий болгосон гэсэн утгатай сонин тайлбар хийж орхив.  Наадах чинь 1990-ээд он, харин одоо 2008 он. Хүн бүр хэвлэн нийтлэх эрх чөлөөг эдэлдэг ардчилсан Монгол улсад 2500-хан сонин, хэвлэл, радио, телевиз зүгээр л бүртгүүлсний төлөө (ихэнх нь үйл ажиллагаа явуулдаггүй) ингэж сүр бадруулах хэрэг байна уу? Зулькафиль доктор Интернэтэд орж тэнд байгаа сайт, блогуудыг тоолж гаргаад цэгцэлнэ гэж давхивал яана аа!  Энэ чухал шагналын комиссыг иймэрхүү хүн онол талаас нь  удирдаж будлиулах вий дээ. “Гурваас илүүгүй сэтгүүлч баг болоод бүтээлээ дэвшүүлж болно” гэх мэт хачин заалт харагдана. Хамтраад бичиж барина гэсэн санаа алга.  Тэгэхлээр тус тусдаа хийсэн бүтээлээ нийлүүлж байгаад хавсайдаж болохнээ?

Хэвлэлийн хурлын зааланд Ц.Балдоржийн нэрэмжит шагналыг Америкийн Пулицерийн шагналтай байн байн зүйрлэж байлаа. Үнэхээр төстэй шагнал болоосой. Жозеф Пулитцер (1847-1911) америкийн сэтгүүлч, сонины эзэн байсан бөгөөд нас барахаасаа өмнө Колумбийн их сургуульд гэрээсэлж үлдээсэн 2 сая долларын зарим хэсгээр түүний нэрэмжит шагналыг болгосон нь өнөөдөр Америкийн сэтгүүл зүйн дээд шагнал юм. Одоо жил бүр сонины голдуу сэтгүүлчдийг 21 (!) ангиллаар шалгаруулж тус бүрт 10000 доллар олгодог гэсэн.

Гэхдээ Пулитцерийн шагналыг тойрсон маргаан үе үе дэгддэг. Худлаа баримт зохиогоод шагнал хүртчихсэн сэтгүүлч илчлэгдэж буцааж байсан түүхтэй.  Тэгвэл Ц.Балдоржийн нэрэмжит шагналыг монголын сэтгүүл зүйн дээд шагнал болгохын тулд тов тодорхой зарчим боловсруулж, нэгд нэгэнгүй бодож боловсруулсан дүрэм журмын дагуу ажиллаасай. Өчигдрийн хэвлэлийн хурлыг үзэхэд тэгэж тогтсон юм алга, иймээс шүүгчид санаанд орсноороо дуугарч бараг л сэтгэгдлээ ярих шиг санагдсан.

Өнөөдөр мэдээ, “бизнес мэдээ”-гээ ялгахаа больсон монголын сэтгүүл зүй хэмээх холион бантан, дөнгөж сая сонгуулийн найрнаас буусан сэтгүүлчид дундаас юм олно гэдэг маш хэцүү байх шүү…

Posted in "Өнөөдөр" сонин, + СОНИНУУД | 3 Comments »

Нийслэлийн өдрийг “Улаанбаатар таймс” сонин 10-р сарын 12-нд тэмдэглэв

Posted by Бид on 2008/10/16

Уг нь нийслэлийн өдрийг жил бүрийн 10-р сарын 29-нд тэмдэглэдэгсэн. Харин нийслэлийн нэрийг зүүсэн “Улаанбаатар таймс” сонин үүнийг мартчихсан мэт энэ жилийн нийслэлийн өдөрт зориулсан тусгай дугаараа 10-р сарын 9-нд хэвлүүлжээ. Өдөр тутмын сонины хувьд арай эрт байгаа биз? 

Учрыг амархан оллоо. “Нийслэлийн 369 жилийн ойд зориулав” хэмээн хаягласан энэ дугаар тэр чигээрээ орон нутгийн сонгуульд зориулагдаж 10-р сарын 12-ны санал хураалтын өмнө амжиж тараахын тулд ийнхүү яарчээ. Нэр дэвшигчдийн мөрийн хөтөлбөрийг харьцуулж, сайн мууг дүгнэж цэгнэсан агуулгатай юм болов уу гэтэл зүгээр л МАХН-ын сурталчилгааны дугаар байх юм. Ерөнхий сайд, МАХН-ын дарга С.Баярын UBS телевизэд өгсөн ярилцлагаар эхэлж бас хэд хоногийн өмнө “Улаанбаатар” радиогоор явсан “Маргааш сонгуулийн дүн гарвал” прогноз, бусад магтаал сайрхлууд багтжээ. Хэний төлөө саналаа өгөхийг янз бүрийн хүнээс асууж хариулт авахад бүгдээрээ зөвхөн МАХН-ыг дэмжихээ илэрхийлсэн байна. 

Бас МАХН нэр дэвшигчдийн талаар “Нөхөрсөг элэглэл”-үүд нийтэлжээ. Заримыг ишлэе. 

Нийслэлийн ИТХ-ын дарга Г.Мөнхбаяр танаа. 

“Нийтийн аж ахуйн оргилын “сар” 

Нийслэлийн менежментийн ойрын “бар”…”

Баянзүрх дүүргийн Засаг дарга Б.Мөнхбаатар танаа

“Байгаа байдал нь бөх

Байраа сүр нь “бух”

Баянзүрхдээ “бар”

Сонгинохайрхан дүүргийн Засаг дарга Л.Найдан танаа. 

“..Найдан даргад найдвар бий. 

Намаас өгсөн даалгавар бий. 

Найраг бичдэг авъяас ч бий… ”  

гэхчлэн хөөргөсөн бол АН-аас нэр дэвшигчдийг болохоор “Жиг жуг” буланд “Нарантрэйдын босс бусдын алдаанд нүд хурц”, “УИХ-д унтаж сурсан Б.Батбаатар нийслэлийн ИТХ-д юу хийх юм?”, “Хэтэрхий мэргэн жараахай буюу Баабар” гарчигтайгаар баалж өгчээ.

Ингээд өнгөтөөр 150 мянган хувь хэвлүүлж сонгуулийн сурталчилгааны сүүлчийн өдөр нийслэлийн айл өрхүүдээр тараасан байна. “Улаанбаатар таймс” сонин өөрөө хэдхэн зуун захиалагчтай боловч нийслэлийн удирдлага Төрийн ордны зүүн талын хэвлэх үйлдвэрийн урт барилгыг түүнд эзэмшүүлж байгаад хэн нэгэнд хувьчилж өгөх нууц ажиллагаа хэдэн жилийн турш чимээгүйхэн үргэлжилж байгаа билээ. Зарим хэвлэл мэдээлэл Ерөнхийлөгчийн гэр бүлийг нэрлэсэн байдаг. Магадгүй ээ. Саяхан ерөнхий эрхлэгчээр нь Ерөнхийлөгчийн шадар сэтгүүлч До.Чулуунбаатарыг томилсон харагдана.

Posted in + СОНИНУУД, 2008 оны Орон нутгийн сонгуулийн сурталчилгаа | Leave a Comment »

Protected: Хоёр магнатын алдаа буюу телевиз, сонин хоёрын аль нь хүчтэй вэ?

Posted by Бид on 2008/07/18

This content is password protected. To view it please enter your password below:

Posted in + СОНИНУУД, + ТЕЛЕВИЗ, 2008 оны УИХ-ын сонгуулийн сурталчилгаа, TV8 телевиз | Enter your password to view comments.

Монголын сонинуудын хувь ширхэг буурч байна

Posted by Бид on 2008/07/10

Сүүлийн жилүүдэд дэлхий даяар сонин хэвлэлийн борлуулалтын хувь ширхэг тасралтгүй буурч байгааг бүгд хүлээн зөвшөөрдөг болжээ. Иймээс монголын хэвлэл мэдээллийн байдлыг тоон үзүүлэлтээр харуулдаг Хэвлэлийн хүрээлэнгийн 2007 оны мониторингийн ээлжит тайлангаас манайд байдал ямар байгааг сонирхлоо.

Нийт хувь ширхэгээрээ монголын сонины зах зээлийн тэн хагасыг эзэлдэг өдөр тутмын сонины нэр төрөл нэмэгдэж 12-т хүрсэн ч нийт захиалга, борлуулалт 3,8 хувиар буурчээ. Энэ хандлага 2004 оноос хойш үргэлжилж “Өнөөдөр”, “Өдрийн сонин”, “Зууны мэдээ” зэрэг тэргүүлэх сонинуудын захиалга жилээс жилд багассан байна. Харин долоо хоног тутмын сонинуудаас “Хүмүүс”, “Сэрүүлэг”, “Зиндаа” сонинуудын борлуулалт ноднин 8000-10000 хувиар буурчээ.

2008 оны УИХ-ын сонгуулийн жил сонинуудын хувь ширхэг “улс төрийн” шалтгаанаар буцаад өссөн байхыг үгүйсгэхгүй ч хүмүүс цаасан дээрх сонин унших нь багассаар байгаа чиг хандлагыг өөрчилж чадахгүй биз.

Posted in + СОНИНУУД | Leave a Comment »

“Өдрийн сонин” дээр гарсан “бослого”

Posted by Бид on 2008/07/04

Үндэсний аюулгүй байдлын зөвлөлөөс “Өдрийн сонин”-ы ерөнхий эрхлэгч Ж.Мягмарсүрэнд “…танай сонины 2008 оны долдугаар сарын 1,2-ны өдрийн дугааруудад болж буй үйл явдалд өрөөсгөл байр сууринаас өнгөц хандсан, тогтворгүй байдлыг дэвэргэхэд чиглэсэн мэдээ, мэдээлэл нийтлэгдэж байгаад харамсч байна.  Тиймээс та бүхнийг “Онц байдлын тухай” Монгол Улсын хууль, “Онц байдал тогтоох тухай” Монгол Улсын Ерөнхийлөгчийн зарлиг, холбогдох бусад хууль тогтоомжийг үйл ажиллагаандаа мөрдөн ажиллахыг анхааруулж байна. Хэрвээ хуулиар хүлээсэн үүрэгтээ хайхрамжгүй хандаж, эмх замбараагүй байдлыг дэвэргэсэн үйлдлээ үргэлжлүүлбэл хуулийн хүрээнд дараагийн арга хэмжээг авахыг мэдэгдье” гэсэн бичиг ирүүлжээ.

“Өдрийн сонин” ч аягыг нь хоосон буцаасангүй, уг мэдэгдэлд ҮАБЗ-ын нарийн бичгийн дарга М.Ганболд гарын үсэг зурсныг өлгөж аваад “М.Ганболд нь Монгол Улсын Ерөнхийлөгч Н.Энхбаярын багын найз нь билээ. Иймд Энэхүү мэдэгдлийг төрийн тэргүүний “Өдрийн сонин”-д хандаж байгаа хандлага гэж ойлгож болох бололтой” гэсэн тайлбар зүүгээд нийтэлчихэж.

Албан ёсны биш ч гэсэн АН-ын төв хэвлэл болсон “Өдрийн сонин” тэртээ тэргүй элдвийг бичих нь тодорхой. Гэхдээ хоёрхон хоногийн дараа онц байдал дуусахын хооронд нөгөө галдан шатаагч маягийн танхайчууд огт уншдаггүй өдөр тутмын сонинд яагаад мэдэгдэл хүргүүлэх болов?

Дурдсан хоёр дугаарыг  сөхөж үзлээ.  “Өдрийн сонин”-ы зарим дүгнэлт, жишээлбэл үймээн самууныг “бослого” гэж нэрлэсэнд хэргийн учир байгаа бололтой. Энэ үгийг үнэхээр бодлоготой хэрэглэсэн харагдана. Тухайлбал,

2008-07-01
“Ард түмэн ардчиллыг дэмжиж босч эхэллээ” (Сэтгүүлч Б.Долзодмаа)
2008-07-02
“Сонгох эрхээ боогдуулсан ард түмний тэмцэл эцэстээ бослого болж хувирлаа” (Сэтгүүлч Л.Мөнхбаясгалан)

Бас энэ дугаарт нийтлэгдсэн ”Д.Баярсайхан: Бид үүргээ л биелүүлсэн” гэсэн ярилцлагын оршилд “Өчигдөр болж өнгөрсөн эсэргүүцлийн жагсаал бодит байдал дээр юу болж өрнөснийг, цагдаа нар иргэд рүү хэрхэн буудаж, бороохойдож бас босогчид хэрхэн МАХН-ын байрыг галдаж байгааг… ” гэжээ.

Өөр нэг өгүүллийн гарчиг: “Гадаадын хэвлэлүүд эсэргүүцлийн бослогын тухай мэдээлж эхэллээ”. Гадаадын хэвлэлүүд үнэхээр бослого гэж нэрлэв үү? Эх сурвалжтай нь тулгаж үзвэл Оросын newsru.com сайт дээр “акция” гэж бичсэнийг “ӨС” мушгиж  “бослого” хэмээн орчуулжээ.

Тийм ээ, 2008 оны 7 дугаар сар 1-ны үйл явдал бол яавч бослого биш, анх улс төрийн цуглаан хэлбэрээр эхэлснээ  хяналтгүй болж сүүлдээ дээрэм тонуул, галдан шатаалт болж хувирсан үймээн самуун гэдэг нь гарцаагүй. Харин “Өдрийн сонин“ хүслээ илэрхийлээд ч юм уу дэмий юм бичээ л биз. Тэглээ гээд “дараагийн арга хэмжээ авна” гэж айлгаж байгаад болиулна гэвэл санасны гарз. “Өдрийн сонин”-ийхон өөр хүчтэй үг олоод л биччихнэ. Жишээлбэл, хувьсгал. Яахав, бүтээгүй хувьсгал гэнэ биз. Эсвэл зөөлрүүлж Монгол төрийн эсрэг биш, зөвхөн МАХН-ын эсрэг бослого байсан гэнэ. Тэр өдрийн дугаартаа “Коммунист намуудын мөхсөн түүх” нэртэй өгүүллийг анхааруулга мэт нийтэлсэн нь тохиолдол биш байх.

P.S: 2008.07.05.
Өнөөдөр онц байдлын дэглэмээр дээд зэргийн хариуцлагатай ажиллаж байсан МҮОНТ-ээр үзүүлсэн Батлан Хамгаалах Яамны “Дуулга” студийн нэвтрүүлгээр  хөтлөгч нь”2008 оны 7-р сарын 1-нд болсон эсэргүүцлийн бослогын үеэр…”  гэж хэлээд авч байх юм.  ҮАБЗ-ын нарийн бичгийн дарга Ганболд сэрдхийсэн байх даа.

Posted in "Өдрийн сонин", 2008.07.01 | 4 Comments »

“Монголын газар нутаг савхдуулсаар дуусах нь ээ”

Posted by Бид on 2008/05/19

Сонин гарчиглах гэж аятайхан үг бий. Өнөөдөр хэвлэгдэн гарч байгаа тэр олон сониныг уншиж барах ч үгүй, шаардлага  ч үгүй, ихэнх тохиолдолд гарчиглахад л хангалттай. Эхнээс дуустал уншмаар сайн нийтлэл цөөн, байсан ч часхийсэн гарчигтай байж нүдэнд тусдаг билээ. Сүүлийн хэдэн өдрийн сонинуудаас анзаарсан ганц нэг гарчгийг толилуулья.

Замын-Үүдийн болон Алтанбулагийн чөлөөт бүсийн ажил бүтэл муутай, нэг нэг том хашааг олон жил барьж байгаа тухай албаны тайлангаас хуулсан бололтой нуршуу нийтлэлийн гарчиг нь харин энгийн бөгөөд ойлгомжтой: “Худалдааны чөлөөт бүс хашаатайгаа ноцолдсоор” (“Ардчилал”.2008.05.15). 

Сэлэнгэ аймгийн Хүдэр суманд хятадын савхны үйлдвэр олон жил ажиллаж залуу сайхан хус модоор туйлж байгааг зурагтаар харсан монгол хүн бүр ийм тохиолдолд боддог тэр юмаа бодсон байх. Харин “Нийгмийн толь” сонины сэтгүүлч бодсоноо шууд хэлж сурвалжлагаа “Монголыг савхдах “шаахайтны нүүдэл айсуй” (2008.05.17-ны дугаар) гэсэн бол дараачийн сонин энэ санааг бүрмөсөн гүйцээж “Монголын газар нутаг савхдуулсаар дуусах нь ээ” (“Ардын эрх”. 2008.05.19) гэжээ. 

Posted in "Нийгмийн толь" сонин, Нийтлэл, нэвтрүүлэг | Leave a Comment »

“Өглөөний сонин” vs “Өнөөдрийн Монгол”

Posted by Бид on 2008/04/14

Саяхан 3 жилийн ойгоо тэмдэглэсэн “Өнөөдрийн Монгол” сонин өөрийгөө “Монголын сэтгүүл зүйд өөрийн гэсэн өнгө төрхийг болгож чадсан” хэмээн магтуулж их л сүрхий байсан боловч хэвлэлтийн зардлаа ч төлж чаддаггүй нь өнөөдөр ил болов.

“Өглөөний сонин”-ы тэргүүн нүүрэнд “УИХ-ын гишүүн Д.Тэрбишдагва, Ж.Бадамжунай нар өрөө төл” гэсэн мэдэгдэл нийтлэгдэж, “Эрхэм гишүүн та бүхний эзэмшлийн “Өнөөдрийн Монгол” сонин нь сониноо хэвлүүлдэг үйлдвэртээ их хэмжээний өр төлбөрөө барагдуулахгүй байгаа тухай бид та бүхэнд өмнө нь дуулгасан билээ. Гэтэл эрхэм  гишүүд хувийн эзэмшлийн компанийхаа энэхүү өр ширийг барагдуулах тал дээр үл тоомсорлож, ямар нэг  арга хэмжээ  авахгүй байгаа учир бид дараа дараагийнхаа арга хэмжээг авахад хүрээд байна. Тиймээс  та бүхэн сонины хэвлэх үйлдвэрт төлөх ёстой өрөө барагдуулахгүй, эсвэл энэ их мөнгөний тухай “мартчихаад” байгаа бол өдөр тутмын бүх сонин хэвлэлээр “ӨРИЙН БИЧИГ”-ээ илгээж байхаа бид мэдэгдэж байна. “Улаанбаатар хэвлэл” ХХК” гэжээ. 

Ингэснээр гурван жилийн турш амжилттай нууцалж ирсэн “Өнөөдрийн Монгол” сонины эзэд нэг л өглөө тов тодорхой боллоо. Тэрбишдагва, Бадамжунай нар хувийн сониныхоо 3 жилийн ойгоор хүрэлцэн ирж баяр хүргэлгүй нуугдсан ч тус болсонгүй. 2008 оны сонгуульд ашиглахаар тооцоолж хэдэн төгрөг гаргаж байгуулсан сонины “өөрийн гэсэн өнгө төрх” нь тааруухан байсан учраас хэвлэлийн зардлаа ч дийлэхээ байж. Эздээсээ ээлжит удаагаа мөнгө хүссэн ч цаадуул нь нэр дэвшихээ больсон тул хөдлөөгүй биз.

“Улаанбаатар хэвлэл” ХХК бол “Өглөөний сонин”-той хамт одоо УИХ-ын сонгуульд Хөвсгөл аймагт МАХН-аас нэр дэвшихээр яригдаж байгаа Р.Хадбаатарын эзэмшил юм. Манайд өдөр тутмын тэжээвэр сонинууд хэтэрхий олширч, сүүлдээ МАХН-ын гишүүдийн мэдлийн өдөр тутмын сонинууд ч хүртэл энэ зах зээлд багталцахаа больжээ.  

Posted in + СОНИНУУД, Нийтлэл, нэвтрүүлэг | 1 Comment »

Ерөнхийлөгч урагшаа, Ерөнхий сайд хойшоо явсныг ганцхан “Зууны мэдээ” анзаарчээ

Posted by Бид on 2008/04/14

Өдөр тутмын сонинуудыг уншиж суухад өөрт таалагдсан зарим нэг гарчгийг дор жагсаав.
– Л.Гүндалай АН-ыг “Аврах хантааз”-аа болгов”  (“Зууны мэдээ”)
– “АН-ын “Олон нийттэй бүдүүлэг харьцах алба” нээлтэй байна” (“Өглөө орой”)
– “Та минь, цаана чинь хатан Туул “идээ бээрэндээ” баригдчихаж” (“Ардын эрх”)
– “Ерөнхий сайдын “шийтгэл”-ийг тушаал дэвшүүлж гүйцэтгэжээ” (“Зууны шуудан”)
– “Зам тээврийн яам замаа алдлаа”  (“Нийгмийн толь”)
– “Хамгийн ядуу ‘‘ УИХ-ын гишvvд ч атаархмаар сайхан амьдардаг” (“Ардын эрх”)
Гэхдээ хамгийн  сонирхолтой гарчиг бол “Ерөнхийлөгч урагшаа,  Ерөнхий сайд хойшоо” (“Зууны мэдээ”). Үнэхээр Монгол улсын ерөнхийлөгч Н.Энхбаяр олон улсын чуулга уулзалтанд оролцохоор Хятад руу буюу урд зүгийг зорьсон бол  Ерөнхий сайд С.Баяр ОХУ-руу айлчлахаар нөгөө тийшээ ниссэнийг товч бөгөөд тодорхой илэрхийлж чаджээ.  Гэхдээ зөвхөн энэ биш. Ерөнхийлөгчийн сонин гэгддэг “Зууны мэдээ” сонин Н.Энхбаярыгаа урагшилж буюу өөдөлж явахад С.Баяр хойшоо ухарч явна гэсэн утгаар чимхээд авчихаж байгаа юм.

Posted in "Зууны мэдээ" сонин, Нийтлэл, нэвтрүүлэг | Leave a Comment »

“Нийгмийн толь” сонины удирдах зөвлөлийн гишүүд хэн хэн бэ?

Posted by Бид on 2008/04/11

Өдөр тутмын “Нийгмийн толь” сонин өнөөдрийн дугаарын тэргүүн нүүрэндээ дараах мэдэгдлийг нийтэлжээ.
Түүнийг сийрүүлье. 
“Жигүүр гранд” гэх нэр хаягтай, өөрсдийгөө Монголын тэргүүн баячууд гэж хөөрцөглөсөн нөхдийн талаар манай сонины уншигчаас баримт бүхий нийтлэлийн бичиж ирүүлсэн билээ. Тэрбээр захидалдаа баримт, нотолгоонд эргэлзэх хэрэггүйг онцлон тэмдэглэсэн байгаа. Хэдийгээр уншигч маань өөрийн нэр хаягаа нууцлахыг хүсээгүй ч бид аливаа болзошгүй зүйлээс сэргийлэхийн үүднээс зохиогчийн нэрийг өөрчлөн нийтлэхээр шийдвэрлэсэн юм. Өдгөө энэ нь ч зөв алхам болж. Эрэн сурвалжлах сэтгүүлзүйг чиглэлээ болгон ажилладаг манай “Нийгмийн толь” сонин нь “Жигүүр гранд” гэх компанид хамтарч ажиллах, рекламны гэрээ байгуулах зэрэг ямар ч хүсэлт, албан тоот тоож илгээгээгүй болно. Гэтэл өдгөө тэд хаанаас ч юм бэ олсон орлогоороо сонин бүхний төлбөртэй зай талбайг худалдан авч гүтгэлгийн чанартай мэдэгдэл хэвлүүлсээр байна. Үүний зэрэгцээ манай сонины удирдах зөвлөлийн гишүүд рүү дугаар нууцалсан утаснаас ээлж дараалан заналхийлж, улмаар сонины чинь эрхийг хаалгана хэмээн чихний хэнгэрэг хагартал орилолдох болов. Сонины редакци руу ийнхүү өдөр үл өнжин дайрч давшилж буй тэдний өмнө нийтлэлийг бичиж ирүүлсэн уншигчийнхаа нэрийг ил гаргасан бол хувь иргэн рүү юу ч “нүүлгэж” мэдэхээр байгаа нь энэ биш үү. Уншигчийнхаа захидлыг нийтэлсний улмаас тэд манайхыг шүүхэд өгнө хэмээн гүйж ирсэн. Бид тэгээ л гэсэн. Уншигчийн ирүүлсэн баримтыг бид шүүхийн өмнө л дэлгэхээс хэн нэг хэн нэг тэргүүн барилгачны өмнө сарвайх шаардлага үгүй гэж үзэж байна. Гэтэл тэд шүүхэд хандахын өмнө “Нийгмийн толь” сониноос хамтран ажиллахыг шаардсан, улмаар шантаажилсан гэхчлэн төлбөрт гүтгэлгүүдийг нэр бүхий хэвлэлүүдэд нийтлүүлжээ. Манай сонины хувьд “Жигүүр гранд” нэртэй ямар ч компанид хамтарч ажиллах санал тоож хүргүүлээгүй бөгөөд тэдний хэлж заншсан шантааж гэдэг үгийг ч тэдний төлбөрт нийтлэлүүдээс анх харж байна. Иймд эл гүтгэлгийг санаатайгаар, төлбөр төлөн нийтлүүлж, сонины нэр хүндэд ноцтойгоор халдаж, улмаар зарим нэг ажилтныг заналхийлж буй “Жигүүр гранд” компанийг бид шүүхэд өгөх болсоноо албан ёсоор мэдэгдэж байна”
Энд дурдагдсан “Жигүүр Гранд групп” компанийн мэдэгдэл өчигдрийн “Өдрийн сонин”, “Зууны мэдээ” сонинуудын бас тэргүүн нүүрэнд нийтлэгдсэн бөгөөд “Нийгмийн толь” сонины 2008 оны 3-р сарын 31-ны дугаарт гарсан “Жигүүр грандын Баттөрийн шунахай сэтгэл иргэдийг хохироож байна” нийтлэлийг эсэргүүцсэн агуулгатай юм. Гэхдээ няцаасан биш. Харин би “Нийгмийн толь” сонины мэдэгдлээс  “манай сонины удирдах зөвлөлийн гишүүд рүү дугаар нууцалсан утаснаас” гэж бичсэн өгүүлэл сонирхол татаж байна. Өөрөөр хэлбэл, “Жигүүр гранд”-ийнхан тус сонины эздийг мэддэг болж таарлаа. Гэхдээ яагаад зарлахгүй байгаа нь сонин юм.

Posted in "Нийгмийн толь" сонин, Нийтлэл, нэвтрүүлэг | Leave a Comment »

Монголын нийгмийн гуравны нэг нь сэтгүүлчид юм байна.

Posted by Бид on 2008/02/07

“Өнөөдөр” сонин оны алдартан шалгаруулах санал асуулгаа долоо дахь жилдээ зарлан дүгнэж гахай жилийн алдартнуудаа нэрлэсэн байна.  Хэнийгээ шалгаруурнав, “Өнөөдөр” сонины өөрийн хэрэг.  Тэртэй тэргүй шоу. Харин үүнийгээ “Монголын нийгмийг төлөөлж чадахуйц, олны танил 150 эрхэм саналаа өглөө. Тэдний нэр болоод санал өгсөн эрхмүүдийг нь ил тод зарладаг болохоор асуулгын дүн бодитой гардгийг олон нийт мэддэг, хүлээдэг” гэж итгүүлэхийг оролдох нь ямар вэ? “Өнөөдөр” сониных хамгийн нуруутай нь гэж ярьж бичдэг хүмүүс олон болсон байна.

Үнэхээр тийм үү? “Монголын нийгмийг төлөөлж чадахуйц” гэсэн атал аймаг орон нутгийнхан, ажилчин, малчин, наймаачин, оюутан сурагчид монголын нийгэмд хамаагүй юм байх. 150 хүний бараг гуравны нэг буюу 48 нь хэвлэл мэдээллийнхэн. Нэрсийг дурдвал: А.Авирмэд (“MN-25 дугаар суваг” телевизийн дэд  захирал), Ж.Алтангэрэл (ММ агентлагийн тоймч), Д.Ариунболд (МОНЦАМЭ агентлагийн ерөнхий захирал), Н.Ариунтуяа (“Улаанбаатар таймс” сонины ерөнхий эрхлэгч), А.Баасандорж (“Өнөөдөр” сонины тоймч), Т.Баасансүрэн (МСНЭ-ийн УЗ-ийн гишүүн), Л.Балхжав (UBS телевизийн захирал, соёлын гавьяат зүтгэлтэн), Б.Батбилиг (“Ардчилал” сонины орлогч эрхлэгч), С.Батзаяа (NTV телевизийн сэтгүүлч), Л.Болормаа (“Өнөөдөр” сонины нэгдүгээр орлогч эрхлэгч), Б.Болдхүү (“Ням гариг” сонины ерөнхий эрхлэгч), С.Булган (“Улаанбаатар” радиогийн захирал), Б.Галаарид (“Зууны мэдээ” сонины орлогч эрхлэгч), Д.Галсанжаргал (MN-25 дугаар суваг телевизийн албаны дарга), А.Ганбаатар (NTV телевизийн захирал), Ц.Ганбат (“Үнэн” сонины ерөнхий эрхлэгч), Б.Ганчимэг (“Өдрийн сонин”-ы албаны дарга), Ш.Даваадорж (“Өнөөдөр” сонины албаны дарга), Э.Дагиймаа (ТВ-5 телевизийн ерөнхий редактор), Г.Жигжидсүрэн (Ардын жүжигчин, кино найруулагч), Д.Заяабат (“Өнөөдөр” сонины албаны дарга), Б.Золбаяр (“Өдрийн сонин”-ы албаны дарга), Г.Золжаргал (Соёлын гавьяат зүтгэлтэн, МҮОНТ-ийн редактор), М.Зулькафил (Соёлын гавьяат зүтгэлтэн, МУИС-ийн багш), Б.Лигдэн (Соёлын гавьяат зүтгэлтэн, доктор, сэтгүүлч), Р.Манлай (Даамын улсын аварга, “Таван цагариг” сонины сэтгүүлч), М.Мөнхмандах (Монголын Хэвлэлийн хүрээлэнгийн гүйцэтгэх захирал), Ц.Мөнхтөр (“ММ” агентлагийн ерөнхий редактор), Ж.Мягмарсүрэн (“Өдрийн сонин”-ы ерөнхий эрхлэгч), Х.Наранжаргал (“Глоб интернэшнл” ТББ-ын тэргүүн), С.Насанжаргал  (MN 25 дугаар суваг телевизийн редактор), Ө.Отгонбаатар (С1 телевизийн Мэдээний албаны дарга), Б.Оюунчимэг (Телевизийн сэтгүүлч), Б.Пүрэвдаш (Монголын үндэсний радиогийн ерөнхий захирал), И.Рэнчинханд (Соёлын гавьяат зүтгэлтэн, “Өнөөдөр” сонины албаны дарга), Д.Сарангэрэл (МСНЭ-ийн ерөнхийлөгч), Н.Сарангэрэл (“Өнөөдөр” сонины хариуцлагатай нарийн бичгийн дарга), Б.Сарантуяа (“Бизнес таймс” сонины ерөнхий эрхлэгч), Ч.Сумъяабазар  (“The UB Post” сонины ерөнхий эрхлэгч), Ц.Сүхбаатар (“Хурд” агентлагийн дарга, сэтгүүлч), Б.Тэмүүлэн (“Ардын эрх” сонины ерөнхий эрхлэгч), Б.Цагаанбаатар (“Таван цагариг” сонины ерөнхий эрхлэгч), С.Цацралт (“ГАММА”агентлагийн захирал), Р.Чулуун (Соёлын гавьяат зүтгэлтэн, “Өнөөдөр” сонины сэтгүүлч), Ц.Энхбат (“TV-9” телевизийн захирал), Д.Энхболдбаатар (зохиолч, сэтгүүлч), Д.Энхтуяа (“Ийгл” телевизийн редактор), Р.Эмүжин (“Өнөөдөр” сонины тоймч, яруу найрагч).

Бахархмаар. Эдгээр сэтгүүлчид тус тусын хүнийг нэрлэсэнд буруу юм огт байхгүй, гэхдээ энэ 48 хүнээр, тэгэхдээ “энэ сэтгүүлч МАХН-ынх, тэгэхлээр намын даргаа нэрлэнэ” гэсэн зарчмаар сонгож аваад монголын нийгмийн гуравны нэгийг төлөөлүүлжээ. Хэтрээд “Монгол ньюс”-ийн харьяа сонинууд ба телевизийг төлөөлсөн  15 хүн, салбар компанийн төлөөлөгчдийг нэмбэл бараг 20 хүний саналыг авч.  Улаанбаатарт суугаа орос, хятадын сурвалжлагчид монголын нийгмийг бас төлөөлөв.   Би энэ удаад зөвхөн хэвлэл мэдээллийн “эрхмүүд”-ийг анзаарлаа, бусад 102 эрхмийг сонгосон талаар энэ байтугай сонин юм хэлж болохсон. 

“Өнөөдөр” сонины сонгож авсан 150 эрхэм хэн гурвыг нэрлэснийг ил тод зарласан нь үнэн, гэхдээ “Өнөөдөр” сонины удирдлага дээрх 150 эрхмийг сонгохдоо л оны алдартнаар хэнийг шалгаруулахаа үндсэндээ шийдчихээд ард нь нуугдаж хоцорчээ. С.Баяр тасархай түрүүлэх нь бүр ч аргагүй. Найдвартай хийсэн юм чинь…

Ер нь оны алдартанг, тэр тусмаа олон хүнийг шалгаруулахад тэртээ тэргүй төрийн өндөр албан тушаалтнууд, бөхчүүд, сүүлийн үед сонин хэвлэлээр шуугиулсан нөхдүүд гарна, тэгэхлээр ийм шалгаруулалт бол алдартнуудад нэгэн зэрэг тал засах арга юм. “Өнөөдөр” сониных “Шилдэг 76” гэх мэт бусад шалгаруулалтаас нэг их ялгаагүй. Арга нь үл мэдэг өөр.

Америкийн “Тайм” сэтгүүл жил тутам “Оны хүн”-ийг шалгаруулдаг. Худлаа жүжиг тавьж “америкийн нийгмийг төлөөлсөн” ХХХ тооны эрхмүүдийг  сонгож авдаггүй бөгөөд зүгээр л редакцийн зөвлөл хуралдаад шийдчихдэг. Илүү шударга юм даа…

Posted in "Өнөөдөр" сонин, Нийтлэл, нэвтрүүлэг | Leave a Comment »

Галт тэрэг замаасаа гараад машин мөргөөд …

Posted by Бид on 2008/01/28

“Нийгмийн толь” сонины өнөөдрийн дугаарын нэг гарчиг шууд нүдэнд туслаа: “Галт тэрэг замаасаа гараад машин мөргөөд байна, яах вэ?”.
Цаашаа бүр зугаатай: “Зарим хэвлэлээр “Галт тэрэг машин мөргөв” гэсэн гарчигтай мэдээ, нийтлэл гарах болоод удаж байна. Зүгээр зогсож байгаа машиныг галт тэрэг замаас гаран хөөж очоод мөргөж байгаа юм шиг ойлгогдож байгаа биз. Энэ нь төмөр замыг олон салаа замтай болж, дураараа сүлжин давхих сайхан ирээдүй хүлээж байна гэж зөгнөж буй хэрэг үү. Эсвэл замын хөдөлгөөний дүрмэнд “Галт тэрэг нь ойртон ирж буй автомашин, ердийн хөсөг, явган зорчигчид зам тавьж өгөх үүрэгтэй. Хайс, хашаа арайхийн давж буй согтуу хүн болон тэвш дүүрэн ачаа ачсан тээврийн хэрэгсэлд онцгойлон зам тавьж өгөх” гэсэн заалт оруулчихсан юм уу. Хохирогчдын хэлж буйгаар тийм л юм шиг байна. Саяхан Багахангай орчимд төмөр замын гармаас портер машин гарч байгаад галт тэргэнд мөргүүлэв. Гэтэл галт тэрэг “портер” машин мөргөлөө хэмээн шуугиж байна. Яахаараа галт тэрэг амь амьдралаа залгуулах гэж яваа жолоочийн портерийг мөргөдөг байна аа. Мөн нүүрс ачаад яарч явсан ядарсан нөхрийг машиныг галт тэрэг “хуссан” сурагтай….Уг нь портерийн жолооч биш галт тэрэгний машинист тээврийн хэрэгс¬лийг алсаас харж, хүндэтгэл үзүүлэн зогсох ёстой байж л дээ” гэхчлэн бичжээ. Сайн даапаалсан байгаа биз.

Хэд хоногийн өмнө манайхан нисэх талбайнхаа цасыг цэвэрлэж амжаагүйгээс болж “Эйр Чайна”-гийн онгоцыг буулгаж чадалгүй хүлээлгэсэн тухай өгүүллээ тус сонин “Хятадын онгоцыг нэг цаг зугаалахыг хүсчээ” гэж гарчигласан билээ. Цаадуул нь ямар ойд зугаалж яваа биш уурлаад шууд буцаад нисэлгүй яахав.

Энэ мэтээр “Нийгмийн толь”  заримдаа дажгүй сайн гарчиг өгдөг болж. Өнөөдрийн дугаарын өөр нэг гарчиг: “Улаанбаатар Улаанчулуут шиг боллоо”. Улаанчулуут гэж юу болохыг мэддэг хүн сэрдхиймээр…

Posted in "Нийгмийн толь" сонин, Нийтлэл, нэвтрүүлэг | 2 Comments »

Юун Барсболд?

Posted by Бид on 2008/01/27

Ховд аймаг дахь Хөшөөтийн уурхайг хятадууд эзэмшиж Хонконгийн бирж дээр мөнгө босгож байгаа болон хилээр хорт бодисыг хууль бусаар оруулж ирснийг тойрсон PR кампани түр намжаад байна.

Ховдоос ирсэн иргэдийн хэвлэлийн бага хурлыг угтуулж болон дараа нь Mon Эn Kо-гийн талаас Хүний нөөцийн асуудал хариуцсан захирал Д.Баттулга ганцаараа зогсоо зайгүй ажиллаж “Хөшөөтөд хэрүүл биш хөгжил хэрэгтэй” гэсэн гарчигтай, сонинууд ямар үсэг сонгосноос шалтгаалж 1,5-2 нүүр эзэлсэн томоос том төлбөртэй ярилцлага өдөр тутмын сонинуудад нийтлүүлжээ.“Зууны мэдээ”, “Арын эрх” хоёр төлбөртэй болохыг дурдаагүй бол “Өнөөдөр”, Зууны шуудан” хоёр “Сурталчилгаа” нүүрт оруулсан байх жишээтэй.

Тэгтэл УИХ-ын гишүүн Л.Пүрэвдорж хэвэллийн бага хурал зарлаж, араас нь Ховд аймгийн удирдлагуудын десант бууж сөрөг тал давшилтанд орлоо. Гэхдээ гол цохилт нь” “Зууны мэдээ” сонины тэргүүн нүүрны “Хєшєєт ба Барсболд” гэсэн гарчигтай өгүүлэл байв. Мэдээжийн хэрэг, Д.Өрнөд хэмээх нууц зохиогчтой.

“… Сvvлийн vед хэвлэл мэдээллийн хэрэгслээр Хєшєєтийн уурхайтай холбогдсон дуулиан єрнєж байна. Энэ дуулианыг МАХН-ын шинэчлэлийн тєлєє санаачилгад 2004 оноос эхлэн vзэл бодлоо нэгтгэн зогсч, одоогийн намын даргын vзэл баримтлалыг шууд дэмжин, тvvнээсээ vvдэн сайн муугаар хэлvvлж яваа нэгэн эрхэмтэй зохион байгуулалттайгаар холбохыг хичээж байгаа нь анхаарал татаж байна… Энэ жишээн дээр Монголын улс тєрд сvvлийн vед ноёлоод байгаа сурталчилгааны технологийн бvх дамжлага ил тод харагдаж байгаа юм. Бас энэ жил болох УИХ-ын сонгуулийн сурталчилгааны компани, сценари ч иймэрхvv маягаар явж магадгvй гэдгийг ч хэлэх хэрэгтэй.Энэ хvн бол МАХН-ын шинэчлэлийн 25 дугаар их хурлаас намын даргаар сонгогдсон С.Баярын удирдаж буй єнєєгийн аппаратад намын нарийн бичгийн даргаар сонгогдсон У.Барсболд юм…. Ингэж харах юм бол оны эхний хар пиарын захиалагч нь У.Барсболдын нутгийн залуу Ц.Элбэгдорж байж болно. Ховдоос мань хvн нэр дэвших санаа євєрлєн, ирээдvйн єрсєлдєгчдєє эртхэн дарах тооцоо хийсэн байхыг vгvйсгэх аргагvй. У.Барсболдын санаачлан идэвхтэй дэмжиж эхлvvлсэн Хєшєєтийн уурхайн хєрєнгє оруулалтын тєслийн ирээдvй тэнд єрсєлдєх ямар ч хvнийг сандаргахаар байгаа юм…. У.Барсболдын нялх vеийн зохиомол тvvх, зvс царайны онцлог, бvр удам судрыг нь зохион тєєрєлдvvлж аль болох сvржин vг, vзэн ядмаар дvрслэлээр бичдэг байна…” гэх мэтээр урсгажээ.

Барсболд нь өөрөө дуугараагүй байхад энэ өгүүлэл ёстой л нөгөө “юун гуя?” болов бололтой. Үүний оронд Хөшөөтийн лицензийг У.Барсболд биш юм бол хэн авсан, хэнд зарсан, хэн эзэмшдэг гээд хэдэн нэр биччихсэн бол …

Чухам энэ өгүүлэлд дээр дурдсанчлан “Монголын улс тєрд сvvлийн vед ноёлоод байгаа сурталчилгааны технологийн бvх дамжлага ил тод харагдаж байгаа юм”.

Posted in "Зууны мэдээ" сонин, Нийтлэл, нэвтрүүлэг | Leave a Comment »

Аймгийн телевизvvдийг UBS-ийн жишгээр хувьчилж авахнээ…

Posted by Бид on 2008/01/27

(Арваад хоног завсарласны эцэст дахин бичиж эхэллээ)  

Өнгөрсөн өдрүүдийн үйл явдлуудаас орон нутгийн хэвлэл мэдээллийнхэн Сонгуулийн ерөнхий хорооноос тэдэнд зориулсан семинарт ирэхдээ хэвлэлийн бага хурал зарлаж зарим нэг сонин мэдэгдэл хийснийг онцолж байна.  Зохион байгуулагч нь  орон нутгийн хэвлэл мэдээллийн холбоо. Тус холбооны тэргүүн нь С.Шаравдорж. Тэрбээр нэлээд хэдэн жилийн өмнөөс аймгуудад хувийн сониноо ээлж дараалан байгуулж, одоо 10 гаруй аймагт сонин эзэмшдэг, бас орон нутгийн сонины холбоог  үүсгэн байгуулсан бол одоо орон нутгийн телевиз, радиог нэмж багтаасан хэрэг.

Өнөөдөр аймгуудад 34 сонин хэвлэгдэн гардаг,  ес нь хувийн, хоёр нь намын, 16 нь компанийх. Тэгвэл 29 телевизийн 10 нь хувийн, гурав нь нам хүчнийх, тав нь төрийн, дөрөв нь компанийн, бусдынх нь харьяалал тодорхой бус гэнэ. Нэлээд хэдэн аймгийн радио, телевиз ИТХ-ын харъяанд үйл ажиллагаа явуулдаг, гэхдээ цаана нь ИТХ-д хяналтаа тогтоосон МАХН-ын, эсвэл АН-ын хэдэн хүн байдаг. Бас орон нутгийн хэвлэл мэдээллийнхэн  орон нутгийн телевизүүд төр, захиргааны байгууллага, нам эвслийн дарамтанд байна, тэндээс санхүүжилт авч байна гэхчлэн тэр ярьжээ.

Хачин тооцоо байна. Хувийн  ба компанийн өмчийн хооронд ямар ялгаатайг бүү мэд. Өөрийн арван хэдэн сониноо хувийнхад хамруулсан уу, эсвэл компанийхад уу? Орон нутагт хувийн өмчийн хэвлэл мэдээлэл илт давамгайлжээ. Тэгэхлээр ИТХ-ийн дэргэдэх хэвлэл мэдээллийг жинхэнэ олон нийтийн болгох нь хамгийн тулгамдсан асуудал баймаар.

Гэтэл С.Шаравдорж огт өөр санал дэвшүүлж байна. Олон нийтийн радио, телевизийн тухай хуулийн “Орон нутагт олон нийтийн радио, телевиз байж болно” гэсэн заалтыг өөрчилж одоо ИТХ-ын мэдэлд байгааг нь хувьчлах хэрэгтэй,  тэгэхдээ зөвхөн менежментийн  гэрээгээр хувьчлах ёстой, орон нутагт олон нийтийн телевиз байх шаардлагагүй, зөвхөн МҮОНТ-ийг үздэг байхад хангалттай гэж мэдэгджээ.

Эндээс орон нутгийн хэвлэл мэдээллийн зах зээлд байр сууриа бэхжүүлэх гэсэн компанийн захирлын сонирхол илт цухалзаж байна. Аймгийн телевизүүдийг UBS-ийн жишгээр хувьчилж авахнээ.  Огт үнэ төлөхгүйгээр удирдлагыг нь гартаа оруулж байр сав, техник тоног төхөөрөмжийг хэдэн жил үнэгүй ашиглаж орлого олоод улмаар өөрийнх нь  мөнгөөр худалдан авч хувийн болгосноор дуусдаг.

Гэхдээ орон нутагт UBS шиг орлого олох боломжгүйг бас “бодолцож” аймгуудын төвд хэвлэл мэдээллийн төвийн хоёр давхар барилга барих хэрэгтэй,  үүний тулд ерөнхийлөгчид хандана, бас Гадаад хэргийн яамаар дамжуулан гаднын улс, олон улсын байгууллагаас зээл, тусламж авахад туслахыг хүснэ гэхчлэн санаан зоргоор мөрөөдөж өгчээ. Мөнгө төлдөггүй менежментийн хувьчлалаар авах гэж байгаа болохоор аргагүй…  

Posted in Орон нутгийн хэвлэл мэдээлэл | 1 Comment »

Өдөр тутмын сонинуудын эзэмшил: 2008 оны 1-р сар

Posted by Бид on 2008/01/07

Манайд энэ талын мэдээлэл ихээхэн хаалттай, үүнийг албан ёсоор зарладаг журам,  ядахдаа наад захын соёл байхгүй тул би мэдээллийг бага багаар цуглуулж байна. Явцын дунд нэмж засварласаар гүйцээх болно. Та бүхэн өөрсдийн мэдэж байгаагаа болон санал сэтгэгдлээ нэмэрлээрэй. Удахгүй албан ёсоор эхлэх 2008 оны УИХ-ын сонгуулийн сурталчилгааны өмнө хэн нь хэнийх болохыг бүгд мэддэг байгаасай. 

Нэр Албан ёсны статус, удирдлага Эзэмшлийн тухай мэдээлэл 2008 оны УИХ-ын сонгуулийн сурталчилгааны үеэр ямар байр суурьтай байгаа.
“Ардчилал” “Олон нийтийн чөлөөт хэвлэл” Ерөнхий эрхлэгч  Ц.Цолмон

Вэб сайт. www.ardchilal.com

Монголын Ардчилсан Холбооны хэвлэл. УИХ-ын гишүүн Х.Баттулга санхүүжүүлдэг. АН, түүний нэр дэвшигчдийг бүх талаар дэмжиж, МАХН-ыг шүүмжилдэг. 
“Ардын эрх” “Өдөр тутмын чөлөөт хэвлэл” Ерөнхий эрхлэгч Б.Тэмүүлэн

Вэб сайт: www.news.mn

Бодь группийн Д.Баясгалан, Л.Болд нар  үүсгэн байгуулжээ. Харьцангуй бие даасан байр суурьтай, гэхдээ АН-ын тодорхой нэр дэвшигчид болон ИЗН-ыг дэмждэг.
“Зууны мэдээ” “Үндэсний өдөр тутмын сонин Ерөнхий эрхлэгч Д.Болдхуяг

Вэб сайт: www.zuuniimedee.mn

 Монгол Улсын Ерөнхийлөгч Н.Энхбаярын гэр бүлийн мэдлийн сонин.   Ерөнхийлөгч Н.Энхбаярыг дэмждэг. МАХН ба АН-ыг шүүмжилдэг. 
“Зууны шуудан” “Үндэсний өдөр тутмын сонин” Ерөнхий эрхлэгч Б.Ганболд

Вэб сайт: www.zuuniishuudan.mn

 Тодорхойгүй Харьцангуй бие  даасан байр суурь баримталдаг, гэхдээ МАХН ба АН-ын тодорхой нэр дэвшигчдийг дэмждэг.
“Монголын мэдээ” “Үндэсний өдөр тутмын сонин” Ерөнхий эрхлэгч Ё.Гэрэлчулуун Анхны үүсгэн байгуулагч нь Б.Эрдэнэбат .  2008 оноос УИХ-ын гишүүн Х.Баттулга болон  АН-ын дарга Ц.Элбэгдоржийн мэдэлд шилжсэн гэсэн мэдээлэл бий. АН-ын  байр суурийг хамгаалж МАХН-ыг шүүмжилдэг.
“Нийгмийн толь” “Монголын үндэсний өдөр тутмын эрэн сурвалжлах сонин” Ерөнхий эрхлэгч С.Энхтуул

Вэб сайт: www.niigmiintoli.mn

Нийтлэлийн агуулгаас үзэхэд  цагдаагийн байгууллагын удирдах албан тушаалтнуудтай холбоотой.    Харьцангуй бие даасан байр суурьтай бөгөөд МАХН ба АН-ын аль алиныг шүүмжилдэг.
“Өглөө, орой”  “Монголын үндэсний өдөр тутмын сонин” Ерөнхий эрхлэгч Б.Болор-Эрдэнэ  Үүсгэн байгуулагч тодорхойгүй МАХН-ын дэмждэг ба АН-ыг шүүмжилдэг.
“Өглөөний сонин”  “Монголын үндэсний өдөр тутмын чөлөөт хэвлэл”  “Хүмүүс” сонины эзэн Р.Хадбаатарын үүсгэн байгуулсан сонин. МАХН-ыг байр суурийг дэмждэг. МАХН-ын тодорхой нэр дэвшигчид ба Ерөнхий сайд С.Баярыг  идэвхтэй дэмждэг. 
“Өдрийн сонин” “Монголын үндэсний өдөр тутмын сонин” Ерөнхий эрхлэгч Ж.Мягмарсүрэн

Вэб сайт: www.dailynews.mn

Ерөнхий эрхлэгч Ж.Мягмарсүрэнгийн хувийн   сонин АН-ын бүх талаар дэмжиж харин МАХН-ыг шүүмжилдэг. Ялангуяа Ерөнхий сайд С.Баяр, мөн Ерөнхийлөгч Н.Энхбаярын эсрэг хатуу байр суурьтай. 
“Өнөөдөр” “Монголын үндэсний өдөр тутмын сонин” Ерөнхий эрхлэгч Б.Нандинтүшиг

Вэб сайт: www.mongolnews.mn

Ц.Балдорж агсны үүсгэн байгуулсан “Монгол ньюс” компанийн хэвлэл  Харьцангуй бие даасан байр суурьтай.
“Өнөөдрийн Монгол” “Монголын үндэсний өдөр тутмын сонин” Ерөнхий эрхлэгч Б.Мөнхбаяр   УИХ-ын гишүүн Д.Тэрбишдагва, Т.Бадамжунай нарын санхүүжүүлдэг гэсэн мэдээ бий.   Монгол Улсын Ерөнхийлөгч Н.Энхбаярыг дэмжиж МАХН-ын байр суурийг хамгаалдаг ба АН-ыг байнга шүүмжилдэг.
“Өнөөдрийн тойм” “Монголын Үндэсний өдөр тутмын чөлөөт хэвлэл” Ерөнхий эрхлэгч Н.Нинж УНДЕГ-ын дарга С.Эрдэнэүүсгэн байгуулсан АН-ыг дэмжиж, МАХН-ын эсрэг байр суурь баримталдаг.
“Улаанбаатар таймс” “Нийслэлийн өдөр тутмын сонин” Эрхлэгч Н.Ариунтуяа

Вэб сайт:  www.ubtimes.mn

2004 оноос менежментийн гэрээгээр ажилласан боловч одоогоор бүрэн хувьчлагдсан эсэх тодорхойгүй. МАХН-ын байр суурийг дэмждэг. Нийслэлд МАХН-аас нэр дэвшигчдийг тусгайлан дэмждэг.  
“Үнэн” “МАХН-ын төв хэвлэл” Ерөнхий эрхлэгч Ц.Ганбат

Вэб сайт: www.unen.mn

Тайлбар шаардлагагүй. Тайлбар шаардлагагүй
“Хөдөлмөр” МҮЭ-үүдийн холбооны хэвлэл. Эрхлэгч Бүрэнжаргал   2008 оноос өдөр  тутам гарч эхэлсэн боловч 4-р сараас хаагдсан.

Posted in + СОНИНУУД | 1 Comment »

Насантогтох шар сониныг дийлэхгүй…

Posted by Бид on 2005/11/18

Би 2005 оны сүүлчээр www.blog.mn дээр блог нээж хоёр, гурван юм бичээд залхуураад орхичихсон. Өнөөдөр тэр үеийн файл дотроос зарим нэгийг олоод он сартайгаа байсан тул нөхөж оруулахаар шийдэв. Он сарыг ухраан  нийтэлж болдог эсэхийг туршиж байгаа санаатай юм.

Монгол Улсын гавъяат жvжигчин Ч.Насантогтох хувийн амьдралаа дэлгэсэн “Гавьяат болсныхоо дараа амьдралаа аврахын тулд бааранд хvртэл дуулж vзсэн” нэртэй ярилцлага “Зиндаа” сонинд нийтлэгджээ. Би иймэрхvv ярилцлагыг vзэх бvртээ хvмvvс хувийн амьдралаа хамаа намаагvй дэлгэж бусдын зугаа болдогт гайхдаг юм.

Харин өчигдөр Насантогтох зарим телевизэд хандаж ийм ярилцлага өгөөгvй тухайгаа мэдэгдэв. Тэгтэл өөдөөс нь “Зиндаа” сонин эсэргvvцэж, тийм ярилцлага vнэхээр өгсөн, бичлэг бий, дараачийн дугаартаа бvр үг үсэггүй нийтлэнэ, бас FM-vvдээр цацна гэж сvрдvvллээ. 

Хэнийх үнэн бэ? “Зиндаа” сонины сурвалжлагч Ариунаа 2005 оны 1-р сард дуучинтай уран бvтээлийн тухай ярилцлага хийжээ. Тэр vеэр Насантогтох эмэгтэй хvний зангаар зовлон жаргалаа ярьж сэтгэлээ онгойлгосон бололтой. Мэдээж, сонин дээр гарна гэж зvvдлээ ч vгvй… Харин сурвалжлагч эмэгтэй сэмхэн бичиж аваад арван сарын дараа гэнэт нийтэлсэн хэрэг.

Одоо өнгөрсөөн. Шар сониныг хэн ч дийлэхгvй. Олон арван мянган хувь хэвлэгдээд хот хөдөөгvй тарчихсан. Шvvхээр яваад хэдэн төгрөгөөр торгуулаад яах юм.

Гэхдээ хvнийг ингэж мэхэлсэн сурвалжлагчид хариу барих ганц арга бий. Хэрвээ Насантогтох сэтгvvлч Ариунаагийн хувийн амьдралыг сонирхож элдэв баримт цуглуулбал… Өө сэвгvй хvн гэж хаана ч үгүй. Уншигчдын зугааг гаргах юм заавал олдоно. Яг өнөөдөр биш юм аа гэхэд маргааш. Бусад шар сонинууд яасан дуртай өлгөж авах бол? Гэхдээ дуучин Насантогтох сэтгvvлч биш учраас тэгэж чадахгvй.  Ингээд өнгөрч байгаа юм.

[2010.01.24] P.S : Ерөнхийлөгч Ц.Элбэгдоржийн удам судар судлаач Ариунаа судлаач биш биз?

Posted in + СОНИНУУД | 1 Comment »