АЖИГЛАГЧ

Монголд, Монголын хэвлэл мэдээлэлд юу болж байна?

Archive for the ‘2008 оны УИХ-ын сонгуулийн сурталчилгаа’ Category

Бэлэн мөнгө амалсан юм уу?

Posted by Бид on 2009/11/11

МАХН-ын Эх орны хишигУржигдар “25-р суваг” телевизийн “Хэлэлцүүлэг” нэвтрүүлэг УИХ-ын гишүүн Ч.Хүрэлбаатар, Э.Мөнх-Очир, Д.Зоригт, Д.Одхүү нарыг урьж 2008 оны сонгуулиар Ардчилсан намын түрүүлж амалсан 1 сая, МАХН-ын давуулж амалсан 1,5 сая төгрөгийг хоёуланг нь бэлэн мөнгөөр өгүүүлэх хөдөлгөөнийг санаачилсан ҮШН-ын Б.Цогтгэрэл, бас нэг нөхөр, Г.Уянга нартай зэрэгцүүлж суулгаад нэлээд сайн мэтгэлцүүллээ. Харин амлалтуудаа хэдийнэ нэгтгээд “Хүний хөгжлийн сан” нэрээр бүр гоёыг амалж яваа улс төрчид “бид энд хэн нэгэнд боорлуулахаар ирээгүй” хэмээн нам дарж “Энэ бол хоёр намын улс төрийн амлалтын тухай нэвтрүүлэг. Монтажлахдаа энэ талаас нь хийгээрэй” гэж Г.Уянгыг хэлэхэд Хүрэлбаатар гишүүн “Монтажлах юм бол шүүхэд өгнө шүү” гэсэн хариу барьж байлаа.

Нэвтрүүлгийг хөтөлсөн сэтгүүлч Пүрэвхүү, Ариунаа нар “Та нар бэлэн мөнгө амалсан шүү дээ?” хэмээн хамт нэхэлцсэн боловч тэдэнд нотлох баримт (бичлэг гэх мэт) байсангүй. Хоёулаа 2008 оны УИХ-ын сонгуулиар МАХН ба АН-ын нэр дэвшигчдийн сурталчилгаанд ээлжлэн зүтгэсэн учраас тэр.

2008 оны сонгуулийн хавар хоёр намын улс төрчид 1 сая ба 1,5 сая төгрөгийн амлалтаар сонгогчдыг ховсдож, айл гэрүүдээр батламж тараан баярхаж явахад “Бэлэн мөнгө амлах хуулиар хориотой байхад танай нам яагаад?”, “Үнэхээр бэлэн мөнгө өгөх юм уу?”, “Энэ батламж чинь бэлэн мөнгө шиг харагдаад байна даа!?”, “Яг хэзээ өгөх вэ, нэг удаа юу, жил болгон юм уу? “Хүмүүс сонгуулийн маргааш өглөө эртхэн очиж авна гэж яриад байна?”, “Бэлэн мөнгийг өөр юмаар орлуулж зальдахгүй биз?”,  гэх мэтээр шаардаж, бас сонгогчдоос “Та 1,5 сая ба 1 сая төгрөгийг яг бэлнээр авна гэж ойлгов уу, эсвэл?” гэж мэтээр асуулт тавьж хариулт аваад хадгалчихсан сэтгүүлчийг би санахгүй байна. Тэр өдрүүдэд хэвлэл мэдээллийнхэн нэр дэвшигчдийн дуудлагаар очиж үйлчлээд тийм сэхээ байгаагүй юм.

Одоо батламж нэртэй цааснаас өөр ямар ч ул мөр үлдээгүй.

Posted in 2008 оны УИХ-ын сонгуулийн сурталчилгаа, 25-р суваг телевиз | 6 Comments »

СОНГУУЛИЙН “БИЗНЕС” МЭДЭЭ

Posted by Бид on 2008/12/09

2008 оны 12-р сарын 8-нд “Глоб Интернэйшнл” ТББ-аас зохион байгуулсан “19-р зүйл ба хараат бус сэтгүүл зүй” дугуй ширээний ярилцлагад зориулж өөрийн бичсэн илтгэлийг дор нийтлэв.

Аливаа нийтлэл, нэвтрүүлгийг (нийтэд хүргэдэг гэсэн утгаар бүх төрөл зүйлийг энд багтааж байна) захиалгаар бэлтгэж явуулах нь сэтгүүл зүйн мөн чанарт харшилдаг. Хэвлэл мэдээлэл бусдаас мөнгө авч тодорхой бараа, үйлчилгээг нийтэд танилцуулж болох авч энэ тохиолдолд нийтлэл, нэвтрүүлэг биш сурталчилгаа гэж нэрлэнэ. Энэ бол сэтгүүл зүйд шийдэгдсэн асуудал. Нийтлэл, нэвтрүүлгийг зар сурталчилгаанаас зааглах нь сэтгүүл зүйн үндсэн зарчмуудын нэг юм. Read the rest of this entry »

Posted in + ТЕЛЕВИЗ, 2008 оны УИХ-ын сонгуулийн сурталчилгаа, Нийтлэл, нэвтрүүлэг | 6 Comments »

Сонгууль-2008: “Лүнгийн хэрэг”-ийг хэн цайруулав?

Posted by Бид on 2008/09/07

2008 оны УИХ-ын сонгуулийн сурталчилгаанд манай хэвлэл мэдээлэл, сэтгүүлчид хэрхэн оролцож ямар үүрэг гүйцэтгэсэн зарим баримт жишээг “Сонгууль-2008” нэрээр эргэн сануулья.

Баруун зүгт Лүнгийн замыг “Очир төв” компани хоёр жилийн турш там болгоод байна. Уг нь тендерт ялж цоо шинэ засмал тавих үүрэг хүлээн ажлаа эхэлж хуучин замыг туушид нь хуулж хаясан мөртлөө шинийгээ барьж дуусалгүй өдий хүрснээс хөндий дүүрэн салаа замууд үүсч эрүүл хөрс, малын бэлчээрийг сүйтгэсэн билээ. Саяхан Зам, тээвэр аялал жуулчлалын яамны дэд сайдын яриаг сонсоход 11-р сард бүрэн дуусах гэрээтэй энэ зам дээр тус яамныхан бараг бүрэн бүрэлдэхүүнээрээ очоод сахиж суугаа боловч сайндаа л 50-70 хувийг энэ онд багтаан ашиглаланд өгвөл дээдийн заяа гэнэ. Бас наадмаар Хүй долоон худаг руу хагас дутуу тавьсан замаа одоо дахиж байгаа сурагтай.  

Хэрвээ манай сэтгүүлчид “Лүнгийн хэрэг”-ийг нэгэн дуугаар шуугиад эхэлсэн бол ийм хулхи компанийн эзэн Дамба-Очир төрд орох нь бүү хэл  өөрөө хүрз бариад тэнд халуун асфальт шидэлж зогсох учиртайсан. Гэтэл тэрбээр 2008 оны УИХ-ын сонгуултар МАХН-ын нэрээр Орхон аймгаас сонгогдож Төрийн ордонд тухалж сууна. 

Сонгуулийн сурталчилгаа эхэлмэгц Дамба-Очир “хэдэн төгрөг” гаргахад л монголын телевизүүд түүний өмнө бүрэн сөгджээ. Эхлээд МҮОНТ Дамба-Очирт худалдагдаж сонгуулийн байтугай ямар ч сурталчилгаа явуулах эрхгүй “Цагийн хүрд” мэдээллийн хөтөлбөрөөрөө  Лүнгийн замын байдлыг гүжирдэн магтаж Дамба-Очирыг хэдэнтээ сурталчилж өглөө. (Үүнийг би нэгэнтээ бичиж байсан) 

Хамгийн анхны, ардчилсан, хараат бус, чөлөөт телевиз “25-р суваг” дараачийнх. Тус телевизийн хамгийн сайн сэтгүүлч Пүрэвхүү бүсгүй “Лүнгийн зам” нэртэй 20 минутийн баримтат бүтээлээ туурвижээ. Нойр хоолгүй ажиллан зам барьж байхад гүтгэлээ гэж Дамба-Очирын өмнөөс гомдоллоод УИХ-ын чуулган дээр шүүмжлэл хэлсэн З.Энхболд, Батж.Батбаяр нарын зургийг харуулж “тэр хоёр улс төрийн шалтгаанаар дайрсан” гээд баахан балбаад дараа нь АН-аас Хэнтий аймагт нэр дэвшигч нэгний компанийн урьд тавьсан замаас хэдэн цоорхой илрүүлэн микроскопоор томруулах шахам харуулж барьцлаа. Лүнгийн замаар тэр болгон яваад байдаггүй эрдэнэтчүүд Дамба-Очирыгоо өрөвдөн нулимс унагасан биз.

 

 

Удалгүй 25-р суваг телевиз “Очир төв” нэртэй  бас нэг нэвтрүүлэг гарч эгэл жирийн амьдралын илүүд үзэж одоо болтол гуравхан өрөө байранд амьдарч байгаа Дамба-Очир хэмээх гайхамшигт хөвгүүний тухай бас нэг нэвтрүүлэг толилуулсан. Ерөнхийдөө Эрдэнэтийг босгоод авч яваа хүн гэж ойлгогдсон шүү. Тайлбарыг МҮОНТ-ийн хөтлөгч Ичинхорлоо яруу тодоор уншлаа. Олон нийтийн радио, телевизийн хуулиар хориотой зүйл. 

Үүнийг үзэж сэтгэл хөдөлсөн бололтой TV5-ын тоймч Э.Дагиймаа тэр сайн хүнийг дэмжихээр Эрдэнэтийн зүгт яаран мордож очоод “Сүүлийн үед таны тухай шуугиантай материал их гарч, хар пиар яваад байна“ хэмээн ичингүйрэн асуулаа. Хариуд нь Дамба-Очир сонгуульд өрсөлдөгчдийн элдэв гүтгэлэг доромжлолыг тоохгүй гэж даналзсанаар Дагиймаагийн бах ханаж боодол мөнгө өвөртлөн буцаж иржээ. 

Posted in + ТЕЛЕВИЗ, 2008 оны УИХ-ын сонгуулийн сурталчилгаа, 25-р суваг телевиз | 1 Comment »

Protected: Хоёр магнатын алдаа буюу телевиз, сонин хоёрын аль нь хүчтэй вэ?

Posted by Бид on 2008/07/18

This content is password protected. To view it please enter your password below:

Posted in + СОНИНУУД, + ТЕЛЕВИЗ, 2008 оны УИХ-ын сонгуулийн сурталчилгаа, TV8 телевиз | Enter your password to view comments.

Бэлэн асуултанд ээлжлэн хариулж “халз мэтгэлцэв”

Posted by Бид on 2008/06/28

Хоёр намын пиарчдын урьдчилан тохиролцсноор 2008 оны УИХ-ын сонгуулийн сурталчилгааны “оргил” нь МҮОНРТ-ээр зохион байгуулах “улс орны амьдралд шийдвэрлэх үүрэгтэй” МАХН-ын дарга С.Баяр, АН–ын дарга Ц.Элбэгдорж нарын халз мэтгэлцээн  байх байсан ч олон нийтийн телевизийн дарга нар энэ захиалгыг хууль зөрчиж гүйцэлдүүлэхээр санаархсан нь илэрсэн учраас бүтээгүй билээ. Гэхдээ хоёр нам нэгэнт тохиролцсоон халз мэтгэлцээнээ TV5 телевизээр явуулсан юм.

Харин МҮОНРТ-ээр сонгуулийн сурталчилгааны сүүлчийн буюу 6-р сарын 27-ны орой сонгуульд оролцож байгаа нам, эвслийн дарга нарын халз мэтгэлцээн болдгоороо болов. Сонгуулийн сурталчилгааны бичигдээгүй хуулиар бол илт давуутай, рейтинг өндөртэй тал нь “жижиг” намууд буюу нэр дэвшигчидтэй нүүр тулахаас зайлсхийдэг бол тусдаа мэтгэлцэж хэргээ бүтээчихсэн С.Баяр, Ц.Элбэгдорж хоёр өөрсөддөө тун итгэлтэйгээр орж ирсэн нь сонин. Хоёр нам бас л тэгэж зөвшилцсөн биз.

Энэ өдрийг хүртэл МҮОНТ-ээр улс төрийн намуудын дунд орой болгон явуулж ирсэн “Халз мэтгэлцээн” бол үнэн хэрэгтээ урьдчилан бэлтгэсэн “Манайд авлига хэр их байна?”, “Байгаль орчноо яаж хамгаалах вэ?” гэх мэт ерөнхий асуултанд ээлж дараалан хариулсан ярилцагархуу юм байсан. Энэ удаад яг тэгэж эхэлсэн боловч Иргэний эвслийн тэргүүн Д.Энхбат эсэргүүцэж, илт МАХН ба АН-д зориулсан, тэдэнтэй урьдчилан тохиролцсон нэгдүгээр ангийн хүүхдийнх шиг асуулт тавихаа болихыг уриалсан боловч бүтээгүй. С.Баяр, Ц.Элбэгдорж хоёр Д.Энхбатын тавьсан биш, хөтлөгчийн бэлтгэсэн хэдэн асуултын цаана нуугдсаар байгаад дуусгасан билээ.

Энэ үеэр хэвлэл мэдээлэлтэй холбоотой бас нэг санааг Монголын Ардчилсан хөгжлийн намын дэд дарга М.Ганзориг хэллээ:  
– Энэ удаагийн сонгуулиар 370 тэрбум хэвлэл мэдээлэл рүү орж байгаа гэж байна. Энэ их мөнгө  хэвлэл мэдээллийг асар их бохирдуулж байна. Үүний улмаас хэвлэл мэдээлэл мэргэжлийн алуурчны түвшинд хүрсэн байна…

Ганзоригийн мэдэгдлийн төгсгөлийн хэсгийг залруулах хэрэгтэй. 2008 оны УИХ-ын сонгуулиар монголын хэвлэл мэдээлэл мэргэжлийн алуурчны биш, харин асар их мөнгөтэй улс төрийн намууд, нэр дэвшигчдийн улаан хамгаалагчийн үүргийг гүйцэтгэлээ.  Нэр хаяггүй хэдэн захиалгат нэвтрүүлгийг эс тооцвол шүүмжлэл, илчлэлт, эрэн сурвалжлага огт байсангүй. Юун аллага. Чимхээд ч авсангүй. Зөвхөн магтаал. Гэхдээ энэ бол тусдаа ярианы сэдэв.

Posted in 2008 оны УИХ-ын сонгуулийн сурталчилгаа, Монголын Үндэсний Олон Нийтийн Телевиз | 1 Comment »

Хууль зөрчих гэж байснаа М.Наранбаатараас бусад нь ойлгожээ

Posted by Бид on 2008/06/27

МҮОНТ-ын ерөнхий захирал М.Наранбаатар 2008 оны 6-р сарын 26-нд “Цагийн хүрд” мэдээллийн хөтөлбөрөөрөө юу ярихыг сонсоход МАХН ба АН-ын дарга нарын мэтгэлцээнийг олон нийтийн телевиз тэр орой зохион байгуулсан бол хууль зөрчсөн үйлдэл болох байсныг хүлээн зөвшөөрөхгүй, магадгүй ойлгоогүй  хэвээрээ байх юм. Монголын хамгийн том телевиз зориудаар мэдэн будилж буруу зөрүү тайлбарласныг дагаад хууртсан юмуу эсвэл далимдуулаад намын даргадаа хайртайгаа илэрхийлэх гэсэн хэсэг хүмүүс гараад ирж. Харин ийм мэтгэлцээн гарцаагүй хууль зөрчих байсныг АН сонгуулийн ерөнхий менежер шударгаар хүлээн зөвшөөрсөн бол МАХН-ын нэг дарга бараг хүлээн зөвшөөрсөн байна.

    
Тэр оройн “Цагийн хүрд”-ээр хэн юу гэж ярьсныг дор сийрүүлэв.

Read the rest of this entry »

Posted in 2008 оны УИХ-ын сонгуулийн сурталчилгаа, Монголын Үндэсний Олон Нийтийн Телевиз | 1 Comment »

“Ярилцья”, “Гэрэлтэй цонх”, “Цагийн хүрд” хэнийг сэмхэн сонгов?

Posted by Бид on 2008/06/26

Сонгуулийн сурталчилгаа төгсгөл рүүгээ дөхөхийн хэрээр МҮОНТ хууль зөрчсөн далд сурталчилгаагаа нуухаа ч больж гэгээн цагаан өдрөөр хүртэл явуулсан юм. Зарим жишээг дурдвал

2008.06.21. “Ярилцья” нэвтрүүлэг
1. Чингэлтэй дүүрэгт МАХН-аас нэр дэвшигч,  УИХ-ын гишүүн Л.Одончимэд
2. Баянзүрх дүүрэгт “Эх орон” намаас нэр дэвшигч, УИХ-ын гишүүн С.Отгонбаяр
3. Өвөрхангай аймагт МАХН-аас нэр дэвшигч, Байгаль орчны сайд Г.Шийлэгдамба
4. Чингэлтэй дүүрэгт АН-аас нэр дэвшигч бөгөөд МҮОНТ-ийн Үндэсний зөвлөлийн гишүүн Р.Бурмаа (МСНЭ-ийн ерөнхийлөгч, МҮОНТ-ийн Үндэсний зөвлөлийн бас нэг гишүүн Ц.Дашдондов гуай ирсэнгүй гэж зарлаж байгаад 30 гаруй минут “чөлөөтэй сайхан” ярилцав)

2008.06.21.
Бүр 1990-ээд оны эхээр УИХ-ын гишүүн Т.Гандигийн хийсэн уран сайхны киног үзүүлэв. Төгсгөлийн хэсэгт Ганди өөрөө тогложээ.

     

2008.06.22. “Боловсрол  хөгжилд” нэвтрүүлэг
Хөвсгөл аймагт МАХН-аас нэр дэвшигч,  УИХ-ын гишүүн Ө.Энхтүвшин боловсролын сэдвээр тухай ярив.

2008.06.23. Ярилцлага 
Чингэлтэй дүүрэгт МАХН-аас нэр дэвшигч, АН-ын дарга Ц.Элбэгдоржтой хийсэн ярилцлага

2008.06.25.  19.30-19.40.  Хөтөлбөрт “МҮОНТ энэ долоо хоногт” гэж байв.
Баянхонгор аймагт АН-аас нэр дэвшигч, УИХ-ын гишүүн Х.Баттулгыг сурталчилсан нэвтрүүлэг

Тэгвэл харанхуй шөнөөр буюу “Гэрэлтэй цонх”-ны дор бүр замбараагаа алдсан хэвээрээ. Сүүлийн үед Дорноговь аймагт МАХН-аас нэр дэвшигч, Дорноговь аймгийн Засаг дарга Ж.Батсуурь, Дорнод аймагт нэр дэвшигч, Дорнод аймгийн ИТХ-ын дарга Ц.Шинэбаяр, Баянзүрх дүүрэгт “Эх орон” намаас нэр дэвшигч, УИХ-ын гишүүн С.Отгонбаяр нар “Гэрэлтэй цонх”-оор юу хийснийг урьд нь мэдээлсэн. Тэгвэл өчигдөр шөнө бүр гурван нэр дэвшигч болж нэмэгдлээ.

2008.06.26. “Гэрэлтэй цонх” хөтөлбөр. 01 цагаас хойш
1. Хөвсгөл аймагт МАХН-аас нэр дэвшигч, БСШУЯ-ны Санхүү, эдийн засгийн газрын дарга Ц.Даваасамбуугийн ярилцлага
2. Сэлэнгэ аймагт МАХН-аас нэр дэвшигч, Сэлэнгэ аймгийн Засаг дарга Ж.Баярмагнайн ярилцлага
3. Хан-Уул дүүрэгт АН-аас нэр дэвшигч, АМГТХЭГ-ийн дарга асан Лу.Болдын ярилцлага

   

P.S: 27-ны өглөө урьд оройн “Цагийн хүрд”-ын давталтыг харжээ байтал хөдөө орон нутагт зуншлага ийм тийм байна гэсэн тайлбар сурвалжлагаар МАХН-аас Сэлэнгэ аймагт нэр дэвшигч О.Чулуунбат гарч ирээд энэ зун тус аймгийн нутгаар цаг агаар ямар байх тухай урьдчилсан мэдээг танилцууллаа.  Мэдээж налгар сайхан сайхан зун болох ажээ. Сонгогчиддоо сайн мэдээ дуулгах шиг сайхан юм хаа байхав…

Posted in 2008 оны УИХ-ын сонгуулийн сурталчилгаа, Монголын Үндэсний Олон Нийтийн Телевиз | Leave a Comment »

Хууль зөрчүүлээгүйн төлөө МҮОНРТ-ын удирдлага маш их гомдолтой байна

Posted by Бид on 2008/06/26

Өчигдөр орой  Монголын Үндэсний Олон Нийтийн Радио, Телевиз  гэнэт сүржин мэдэгдэл хийж хэд хэдэн удаа давтлаа. Бүрэн эхээр нь сийрүүлье.

“Бид иргэнийхээ эрхийг эдэлж төрийнхөө сонгуульд оролцох гэж байгаа билээ. Энэ хариуцлагатай үйл ажиллагаанд сонгогч олныг мэдээлэл, мэдлэгтэй оролцоход нь туслах, мөн олон нийтийн радио телевизийн хуулиар олгосон үүрэг, хариуцлагаа биелүүлэх зорилгоор бид энэ жилийн сонгуульд өрсөлдөж байгаа бүх нам, эвсэлд сурталчилгааны үнэ төлбөргүй цагийг ижил олгож эдгээр улс төрийн нам, эвслийн мөрийн хөтөлбөрийг тэнцвэртэй хүргэх зорилгоор цуврал халз ярилцлагыг орон даяар шууд дамжуулан хүргэсэн. Энэ тухай өгүүлэн та бүхэнд хандаж байгаагийн учир нь өнгөрсөн долоо хоногт Монгол Улсын ерөнхий сайд С.Баяр МҮОНРТ-ийн шууд ярилцлагад оролцож байхдаа олон нийтийн хүсэн хүлээж байгаа олон асуултад хариу өгөх үүднээс АН-ын дарга Ц.Элбэгдоржтой халз ярилцлагад зохион байгуулах санал тавьж Элбэгдорж дарга ч хүсэлтийг нь хүлээн авсны дагуу 2008 оны зургадугаар сарын 26-нд радио телевизээр шууд дамжуулах байсан халз ярилцлагыг зохион байгуулахгүй болсонтой холбоотой юм. Учир нь энэхүү халз ярилцлагыг сонгуульд оролцож байгаа Иргэний эвсэл, Хөгжлийн хөтөлбөр нам болон бусад намууд буруушааж СЕХ-нд хандсан бөгөөд СЕХ-ны нарийн бичгийн дарга Баярсайханаас манайд ирүүлсэн шаардлагын дагуу ийнхүү МАХН, АН-ын дарга нарын халз ярилцлагыг нэвтрүүлэх боломжгүй боллоо. Мөн энэ шалтгаанаар парламентад суудалтай бусад намуудын сүүлийн дөрвөн жилийн үйл ажиллагааны тайлан болон хэтийн зорилгын талаар мэдээллийг хүргэх зорилготой халз ярилцлагыг нэвтрүүлэхгүй.  Олон нийтийн санал хүсэлт тэдний хүсэл зорилгод нийцсэн нийтлэл нэвтрүүлэг хүргэх зорилготой манай радио, телевиз тэнцвэртэй, ил тод мэдээллийг хүргэхийн төлөө ажилласаар ирсэн боловч дээр дурдсан шалтгаанаар зарим нэгэн нэвтрүүлгүүдийг ийнхүү хүргэж чадаагүйдээ харамсаж байна. Үзэгч сонсогч та бүхнээсээ хүлцэл өчье.  

Монголын Үндэсний Олон Нийтийн Радио Телевиз гэжээ

Ийм ноцтой асуудлаар  МҮОНРТ-ийн ерөнхий захирал М.Наранбаатар өөрөө гарч ирээд мэдэгдэл хийхийн оронд  хөтлөгчийн ард нуугдаж үлдсэн нь учиртай. Яагаад гэвэл зөвхөн 2 намын хооронд халз мэтгэлцээн явуулах нь хуулиар хориотой. Үүнийг ойлгохын тулд УИХ-ын сонгуулийн тухай хуулийн дараах хоёр заалтыг уншихад л хангалттай.

37.7. Олон нийтийн радио, телевиз нь төлбөртэйгээр сонгуулийн аливаа сурталчилгаа явуулахгүй бөгөөд Сонгуулийн ерөнхий хорооноос тогтоосон хуваарийн дагуу төлбөргүй сурталчилгаа явуулна.
37.8.Сонгуулийн ерөнхий хороо нь олон нийтийн радио, телевизээр төлбөргүй явуулах сурталчилгааны хуваарийг батлахдаа нам, эвсэл бүрт, түүнчлэн нэг тойрогт өрсөлдөж  байгаа нэр дэвшигч бүрт тэнцүү хугацаа ногдохоор тооцож, холбогдох шийдвэрийг гаргана.

Тэгэхлээр Сонгуулийн  Ерөнхий хороо, түүний дэргэдэх хэвлэл мэдээллийн орон тооны бус зөвлөл зөвхөн хууль зөрчихгүй байхыг л сануулсан хэрэг. МҮОНРТ-ийн мэдэгдэлд нэр дурдагдсан Иргэний эвсэл гомдол гаргаагүй (харин Хөгжлийн хөтөлбөр нам ийм гомдол гаргасан гэдэг бол худлаа), бас СЕХ-ноос бичиг очоогүй байсан ч хоёр намын халз мэтгэлцээний тухай саналаас М.Наранбаатар захирал эелдгээр татгалзах байсан. (“Та хоёр биднийг хууль зөрчүүлэх үйлдэл хийлгэхээр оролдож байгаад харамсаж байна… гэх мэтээр). Тэр ч байтугай МАХН-ын дарга С.Баяр ийм санал гаргахгүй, АН-ын дарга Ц.Элбэгдорж хүлээж авах ёсгүй байсан. 

С.Баяр, Ц.Элбэгдорж нарын халз мэтгэлцээнээс гадна  хууль зөрчих гэсэн бас нэг оролдлого илэрлээ. Мэдэгдлээс үзэхэд, “парламентад суудалтай бусад намуудын сүүлийн дөрвөн жилийн үйл ажиллагааны тайлан болон хэтийн зорилгын талаар мэдээллийг хүргэх зорилготой” дахиад нэг халз ярилцлага зохион байгуулахаар төлөвлөж байжээ.

Хуулиа судалцгаая. УИХ-ын сонгуулийн тухай хуулийг тэр тусмаа МАХН ба АН хоёрын нэгдсэн намын бүлэг бүхий Улсын Их Хурал 2005 оны 12-р сарын  29-нд баталсан билээ. Хэрвээ Ц.Нямдорж буруу зөрүү засчихаагүй л бол…

Posted in 2008 оны УИХ-ын сонгуулийн сурталчилгаа, Монголын Үндэсний Олон Нийтийн Телевиз | Leave a Comment »

“Экспресс ньюс” хамтлагт С.Наранбаатар, А.Батпүрэв нар тоглож хөгжмийг нь Ардчилсан Нам захиалдаг. Үүнийгээ нуудаггүй.

Posted by Бид on 2008/06/26

 

2008 оны УИХ-ын сонгуулийн сурталчилгааны кампани дуусах дөхжээ. Зарим зүйлийг дүгнэж эхэлмээр санагдлаа.

 

Намуудын сурталчилгааны нэвтрүүлгүүдээс би “Экспресс ньюс”-ийг бусдаасаа илүү гэж үнэлж байна. Хэд хэдэн шалтгаан бий. Юуны өмнө  “Экспресс ньюс” бол  нэг удаагийнх биш, аль 3-р сараас хойш ажлын өдөр болгоны орой 23. 30-24.00 цагийн хооронд C1 телевизээр тогтмол гарч ирсэн нэвтрүүлэг. (Энэ нэвтрүүлгийг  хүмүүс үздэг гэдэг утгаар би ганцаараа биш  УИХ-ын гишүүн, МАХН-аас  нэр дэвшигч Сү.Батболд, “Иргэн та баялаг” сангийн тэргүүн, АН-аас нэр дэвшигч С.Одонтуяа нар үнэлж  өөрсдийн сурталчилгааны нэвтрүүлгийг “”Экспресс ньюс”-ийн цагаар явуулсан билээ)

 

Гэхдээ миний хувьд хамгийн  гол шалтгаан бол уг нэвтрүүлгийг бэлтгэдэг хийлч, төгөлдөр хуурч хоёр нүүр царайгаа харуулдаг. Харуулдаг төдийгүй хөгжмөө цааш тавиад нэвтрүүлгээ хөтөлдөг. Тэр хоёр хөгжимчний нэрийг С.Наранбаатар, А.Батпүрэв.  Тэгвэл МАХН-ын сурталчилгааны бүх нэвтрүүлэг,  АН-ын бусад нэвтрүүлгийг бэлтгэсэн хүмүүс нэрээ тас нуудаг.  Хэн ч гарч ирж хөтлөхийг зориглодоггүй бөгөөд текстээ үл үзэгдэгч хөтлөгчөөр уншуулж байна.  Ядахдаа төгсгөлд нь нэрээ ч тавьдаггүй.  Энэ бүхэн яагаад чухал гэж? Өөрсдөө ил гарна гэдэг бол хэлж ярьж, үзүүлсний төлөө хариуцлага хүлээхэд бэлэн харуулж байна гэсэн үг.

 

“Экспресс ньюс”-ээр хэнд хэн үйлчлээд байгаа нь нь тов тодорхой. Гагцхүү үүнийгээ нуухгүй байгаа нь надад таалагддаг.

 

Агуулга нь миний хувьд чухал биш. “Экспресс ньюс”  хамтлагийн хөгжмийг Ардчилсан нам захиалдаг тул АН-ын номлоод байгаа “зөв” бодлогыг  хамгаалж “буруу” бодлоготнуудыг балбасан  мэдээ, сурвалжлага үзүүлж дундуур нь АН-ын реклам явдаг “цэвэр” сурталчилгааны нэвтрүүлэг билээ. 

 

Дугаар болгондоо ярилцлагатай.  Өнгөрсөн хугацаанд хэн хэнтэй ярилцсаныг харахад ихэнх нь буюу лав 40-өөд хүн АН-аас УИХ-ын сонгуульд нэр дэвшихийг горилогчид,  нэр дэвшигчид байлаа.  Завсар зайгаар нь хөндлөнгийн ганц нэг хүмүүсийг урьж оролцуулахдаа АН-ын бодлогод хал балгүй асуудлаар, эсвэл АН-ын гол өрсөлдөгч МАХН буюу одоогийн төр засгийг  шүүмжилсэн хүмүүс байв.  Жишээлбэл, “Эрс шинэчлэл” хөдөлгөөний тэргүүн Энхбат, Баярхүү (“Эрс шинэчлэл” хөдөлгөөн), Туяа (Хадгаламж, зээлийн хоршооны хохирогчдын холбооны тэргүүн), САПУ-гийн хохирогчийн төлөөлөл. САПУ-гийн захирал асан Жамъянсүрэн (2 удаа) гэх мэт.  

 

МАХН-ын байхаа больчихсон “Шударга ёс” жигүүрийн Г.Баярсайханыг маш их өргөмжилж нийт 5 удаа яриулжээ. Бас Ногоон намын УБ хотын салбар зөвлөлийн дарга Бум-Ялагчийг арай доогуур үнэлж  3 удаа яриулав. Тэд хоёулаа өөрсдийн намын удирдлагыг илчилсэн мэдэгдэл хийсэн учраас тэр.  Бас нэг малчныг урьсан нь Төв аймгийн малчин Сумъяадорж байж “Телевизээр Батжаргалын Батбаяр гэдэг хүн төр ноолууыг 30 мянгаас доошгүй үнээр худалдаж авья гэсэн санал их сайхан байна” гэлээ. Дараа нь 83 настай ахмад дайчин Түдэвдоржийнд очиж төр засгаас орон сууц нэхэлцэв.  “Монгол оймс” ба “Мастер матрас” үйлдвэрийн дарга нарын яриа АН-ын үйлдвэржүүлэлтийн бодлогод яв цав нийцлээ.  I Love New UB клубын дэмжигч Ануударь гэдэг залууг оролцуулсан нь  сүүлийн үед залуучуудыг байлдан дагуулж байгаа гэж сурталчилдаг I Love New UB гэдэг нь АН-ын  сонгуулийн сурталчилгааны ээлжит кампани учраас тэр.  Бас “Перфект” хамтлагийн ахлагч Гантөмөр гэдэг залуу монголын урлагын хамаг одуудын дуулсан МАХН сонгуулийн сурталчилгааны дууны уран бүтээлчдэд олгосон зардлын тооцоог гаргасан  төдийгүй одоо ид гялалзаж байгаа дууны одуудыг бөөндөж бутниргэсэн билээ.

 

“Экспресс ньюс”  харин МАХН-аас нэг ч хүн нэр дэвшигчийг урьж оролцуулаагүй, урьсан нь ч цаадуул нь илт АН-ын талын нэвтрүүлэгт оролцох ч үгүй байсан биз.

Posted in 2008 оны УИХ-ын сонгуулийн сурталчилгаа, Нийтлэл, нэвтрүүлэг | 3 Comments »

МҮОНТ-д шөнө дундаас хойш нэг юм болоод байна шүү!

Posted by Бид on 2008/06/25

Нэгэн зураачийн үзэсгэлэн дээр үзэгчдийн дунд ийм яриа болсон гэнэлээ.
– Энэ зурган дээр нар мандаж байгааг зурсан юм шиг байна
– Үгүй ээ,  жаргаж байгаа нар байлгүй яахав
– Чи яаж мэдэж байгаа юм? 
– Цаад зураач чинь үдээс  өмнө босдоггүй юм аа…

Хүмүүс МҮОНТ-ийн “Өглөө” хөтөлбөрийг бараг үздэггүй байх. Гэхдээ тэд үд болтол унтдагдаа биш бололтой. Өнөө өглөө би зориудаар сэрж үзлээ.  Интернэтээс хэдэн зураг татаж аваад  эрээн мяраанаар хүрэээлүүлж байгаад тайлбарыг орчуулж уншсан, бас уйтгартай таавар оруулдаг гойд юмгүй нэвтрүүлэг байна. Өглөө эрт босоодч МҮОНТ-ээр юу ч үзэхгүй юм байна. Бусад телевизийн өглөөний хөтөлбөрүүд, тухайлбал, ”Цай юу? Кофе юу?“, “Сэрүүлэг” хавьгүй дээр. Би уг нь “Өглөө” хөтөлбөрөөр нэр дэвшигчдийн сурталчилгаа явуулж байна гэж сэжиглээд энэ өглөө “барьж авах”-ыг оролдсон санаатай юм.  Гэтэл ямар ч нэр дэвшигч тоохгүй, тэр тусмаа нойроо хасан босч ирэхээргүй хөтөлбөр шиг санагдлаа.  

Харин  өчигдөр маш орой унтсаны ачаар дахиад сонин юм үзлээ.  Шөнийн 1 цагаас хойш “”Гэрэлтэй цонх”-ийн студид УИХ-ын гишүүн, нэр дэвшигч С.Отгонбаяр сэмхэн орж ирээд суучихсан, мөрийн хөтөлбөрөө хээв нэг ярьж сонгуулийн сурталчилгаа хийж суух юм. 

 

Орой унтвал МҮОНТ-ээр хачин юм үзэхнээ. Урьд шөнө нь Дорнод  аймгаас нэр дэвшигч, тус аймгийн ИТХ-ын дарга Ц.Шинэбаяр нисэн ирж ярилцлага өгсөн сураг дуулдав. Үнэн юм байна. 

Тэрний урьд шөнө Дорноговийн “Гэрэлтэй гудамж”-нд юу болсныг та мэднэ. МҮОНТ-д шөнө дундаас хойш нэг юм болоод байна шүү! М.Наранбаатар, Д.Мөнхбаатар дарга нар юун эрт унтдаг юм бэ?

Posted in 2008 оны УИХ-ын сонгуулийн сурталчилгаа | Leave a Comment »

Хэрвээ МҮОНТ-ээр С.Баяр, Ц.Элбэгдорж нар халз мэтгэлцвэл …

Posted by Бид on 2008/06/24

Хэвлэл мэдээллийн зөвлөлийн 2008 оны 6-р сарын 24-ны хуралдааны мэдээ

Сонгуулийн ерөнхий хорооны дэргэдэх Хэвлэл мэдээллийн орон тооны бус зөвлөлийн хуралдаан 2008 оны 6 дугаар сарын 24-нд болж МҮОНТ-ээр явуулж байгаа 2008 оны УИХ-ын сонгуулийн сурталчилгааны тэнцвэртэй байдлын талаар зарим нам, эвслээс ирүүлсэн гомдол, шаардлагыг хэлэлцээд дараах санал дүгнэлтийг гаргаж СЕХ-нд уламжлахаар болов. 

2008 оны 6-р сарын 9, 12-ны өдрүүдэд Хөгжлийн хөтөлбөр  намын хуваарьт цагаар УИХ-ын сонгуулийн Төв аймгийн 14-р тойрогт АН-аас нэр дэвшигч Д.Доржпүрэвийн сурталчилгааг явуулсан нь сурталчилгааны тэнцвэргүй байдлыг бий болгож Монгол Улсын Их хурлын Сонгуулийн тухай хуулийн 37.7 дахь заалтыг зөрчжээ. Үүний хариуцлагыг  СЕХ-ноос тогтоосон хуваарийн дагуу төлбөргүй, тэнцвэртэй сурталчилгаа явуулахаар хүлээсэн үүргээ биелүүлээгүй Монголын Үндэсний Олон Нийтийн Телевиз,  хуваарьт цагаа  өөр намд шилжүүлсэн Хөгжлийн Хөтөлбөр Нам, өөр намын хуваарьт цагаар нэр дэвшигчийнхээ сурталчилгааг явуулсан Ардчилсан намын аль аль нь хүлээх ёстой гэж үзсэн байна.

Мөн энэ долоо хоногт МАХН-ын дарга С.Баяр, АН-ын дарга Ц.Элбэгдорж нарын халз мэтгэлцээнийг МҮОНТ-ээр зохион байгуулбал олон нийтийн телевизээр явуулах хоёр намын үнэ төлбөргүй сурталчилгааны цаг бусад нам, эвслийнхээс илүү гарч тэнцвэрт  байдлыг алдагдуулж Сонгуулийн тухай хуулийн 37.7 дахь заалт зөрчигдөх тул энэхүү мэтгэлцээнийг МҮОНТ зохион байгуулахгүй, нэвтрүүлэхгүй байх нь зүйтэй гэсэн дүгнэлт хийв.

Сүүлийн үед Монголын Үндэсний Олон Нийтийн Телевизийн мэдээллийн хөтөлбөр, ярилцлага болон бусад нэвтрүүлгээр зарим нэр дэвшигчийг элдэв аргаар далд сурталчилж байгаа нь сонгуулийн сурталчилгааны тэнцвэрт байдлыг алдагдуулж, мөн арилжааны телевизүүд сонгуулийн сурталчилгааны 10 хувийн хязгаарлалтыг зөрчсөөр байгаа зэрэг хууль бус үйлдлээ зогсоохыг Хэвлэл мэдээллийн зөвлөлөөс уриалж байна.

Хэвлэл мэдээллийн зөвлөл  нь 2008 оны УИХ-ын сонгуулийн хэвлэл мэдээллийн сурталчилгааны тэнцвэрт байдлын талаар нам, эвсэл, нэр дэвшигч, иргэд, хуулийн этгээдийн өргөдөл, гомдлыг СЕХ-ны ажлын албаар дамжуулан хүлээн авч байна. 

Хаяг: Монгол Улс Улаанбаатар хот – 38,  Ж.Самбуугийн гудамж – 11  Засгийн Газрын 11 дүгээр байр,  Сонгуулийн ерөнхий хороо
Утас/факс: 263602

СЕХ-ны дэргэдэх Хэвлэл мэдээллийн зөвлөл
2008.06.24

Posted in 2008 оны УИХ-ын сонгуулийн сурталчилгаа | 3 Comments »

“Гэрэлтэй гудамж”-нд болсон явдал

Posted by Бид on 2008/06/22

Муу хүмүүс аливаа хууль бус үйлдлийг аль болох гэрэлгүй, харанхуй газарт үйлдэхийг хичээдэг бол МҮОНТ-ийнхэн бүр эсрэгээр, гэрэлтэйд амжуулах дуртай юм байна.

2008.06.21-ны Бямба гаригийн үдшийн “Гэрэлтэй цонх” хөтөлбөрийн “Гэрэлтэй гудамж” булангаар Дорноговь аймгийн Засаг дарга бөгөөд УИХ-ын сонгуульд нэр дэвшигч Ж.Батсуурийн сонгуулийн сурталчилгааг баяр хөөртэйгээр хийж өглөө. Лав 40 минут үргэлжилсэн. Уг нь УИХ-ын сонгуулийн тухай хуулиар МҮОНТ-ээр нэр дэвшигчдийн сурталчилгааг зөвхөн СЕХ-ны баталсан хуваарийн дагуу тэв тэнцвэртэй явуулах ёстой. Гэтэл “Гэрэлтэй цонх”-ийн хөтлөгч залуу Сайншанд хотын гэрэлтэй гудамжаар Баттулга даргатай зугаалангаа түүний намтар, хувийн амьдрал, амжилт бүтээлийг нэг нэгэнгүй яриулав. Говийн аймгийн төвд гудамжиндаа гэрэл асаагаад зогсохгүй усан оргилуур байгуулсан гавъяатай дарга бололтой. Магадгүй хотоос сурвалжлагч давхиж  ирээд “хоёулаа зугаалах уу?” гэхэд нь татгалзаж чадаагүй ч байж магадгүй.

Уг нь энгийн яриа хөөрөөтэй, даруувтар хүн юмуу гэж санагдсан. Даанч сурвалжлагч арай дэндүү, зөвхөн зугаалгаа ярихын оронд юу яаж  асууж байна гээч:

– Та Дорноговь аймгийн Засаг даргаар ажиллахдаа нэг удаа ч гэсэн амарч үзсэн үү?

– Таныг их хурдтай хүн гэх юм…

Цаадах нь яаж тэсэхэв. Сүүлдээ сурвалжлагч “Та Их хуралд сонгогдвол …” гэж асууснаар МАХН-ын мөрийн хөтөлбөрийн тухай хөгжилтэй яриа шөнийн Сайншанд хотын гэрэлтэй гудамжнаас Монгол орон даяар цацагдах нь тэр…

Posted in 2008 оны УИХ-ын сонгуулийн сурталчилгаа, Монголын Үндэсний Олон Нийтийн Телевиз | 1 Comment »

Хувийн телевизүүд тэнцвэргүй сурталчилгаа явуулахыг хэн ч хориглоогүй…

Posted by Бид on 2008/06/14

Өмнө дурдсанчлан “Ярилцъя” нэвтрүүлгийн төгсгөлд улс төрч, нийтлэлч Баабар сонгуулийн кампани хэрхэн өрнөж байгаа талаар өөрийн дүгнэлтээ ярилаа.  Миний хувьд хэвлэл мэдээлэлтэй холбогдуулан юу хэлсэн нь сонин байв.

Баабар ярихдаа,  
– [Хэвлэл мэдээлэл] хуулийнхаа хүрээнд ажиллах ёстой. Ийм л зарчим байх ёстой. Юугаа магтнав, юугаа  муулнав хуулийн хүрээнд бүрэн чөлөөтэй. СЕХ  телевиз, сонингуудад  [ хязгаарлалт]…  Хүн өөрийнхөө хөрөнгийг өөрөө захиран зарцуулах ёстой.  Би сонин гаргаад юм уу телевиз байгуулчихаад ганцхан депутат мөнгө өгөөд тэрнийг магтаад  л байж болно ш дээ. Яагаад гэвэл энэ бол миний миний захиран зарцуулах эрх байхгүй юу. Сонгуулийн хороо юун дээр [хязгаарлалт] тавих ёстой ганцхан танай телевиз дээр тавих ёстой.  Яагаад гэвэл танай телевизийн хөрөнгө төрөөс, ард түмнээс гарч байгаа.  Ийм учраас тэнцвэртэй байдлыг ганцхан Үндэсний олон нийтийн телевиз дээр тавина уу гэхээс биш бусад мэдээллийн хэрэгсэл дээр чи заавал тэнцүү байх ёстой … Энэ чинь миний хөрөнгө юм чинь тэнцүү байх ёстой байж байх ямар утгатай  юм. Би хүүхдээ олимпиадад, тэмцээнд оруулья л даа. Би өөрийнхөө хүүхдэд тэнцүү харагдах ёстой юм уу . Би ганц өөрийнхөө хүүхдийг л рекламдана…. Өнөөдөр НТВ юм уу TV9-ыг тэнцвэртэй байгаарай гэж загнана гэдэг хүний хөрөнгийг тэгэж болохгүй… Гэхдээ энэ жилийн мэдээллийн хэрэгслүүдийг хараад ерөнхийд нь ажиглаад байхад муухай гүтгэлэг мүтгэлэг урьдынхыг бодвол их багассан. Телевизүүд өөрсдөө тэнцвэртэй байх сонирхол байна. Сонгуулийн хорооны даалгавраар биш…

Харамсалтай нь Баабар сонгуулийн хууль, дүрмийг гүйцэт уншаагүй бололтой. Хөтлөгч бас уншаагүй байж сонгуулийн тухай ярилцлага хөтөлжээ.

Тайлбарлая.  УИХ-ын сонгуулийн тухай хуулиар МҮОНТ-ийг тэнцвэртэй  байх ёстойг шаардсаны дагуу СЕХ-ноос намуудын сурталчилгааны цагийг тус бүр 75 минутаар тэв тэнцүү хуваарилж өгсөн нь үнэн. Харин хувийн телевизүүдийг тэгээгүй, зөвхөн сурталчилгааны хэмжээ нэвтрүүлгийн нийт цагийн 10 хувиас хэтэрч болохгүйг хуулинд заасан. Магадгүй энэ заалт бас л хувийн өмчөд халдсан хэрэгт орж магадгүй ч УИХ-ын сонгуулийн тухай хуулийг Баабарын, бас хөтлөгч Мөнхтөрийн Ардчилсан Нам нь МАХН-тай сайхан зөвшилцөж байгаад 2005 онд баталсан болохоор гайгүй биз.

Уг нь хувийн телевиз аль болох тэнцвэртэй сурталчилгаа явуулахыг хичээх нэг шалтгаан байдаг. (Үүнийг сайтар ярилцах юмсан).  Өнөөдөр зарим төрийн бус байгууллага сонгуулийн сурталчилгааны мониторинг хийхдээ хувийн телевизүүд тэнцвэртэй байгаа эсэхийг хянаж байгаа нь сонгуулийн хуулиа уншаагүйнх огт биш… 

2008 оны УИХ-ын сонгуулиар хувийн телевизүүд тэнцвэртэй байх сонирхолтой болсон тухайд. Сайндаа ч биш, тэдэнд мөнгө өгвөл тэнцвэртэй байхаас ч буцахгүй болчихсон хэрэг. МАХН-ын сонгуулийн штаб юмуу нэр дэвшигч мөнгөө төлөөд захиалгат нэвтрүүлэг явуулахад маргааш нь АН-ынхан мөнгөө бариад ороод ирнэ. Ердөө л энэ. Өнөөдөр аз болж МАХН-ын хүч бараг тэнцүү, өөрөөр хэлбэл хоёулаа адилхан хэмжээ хязгааргүй их мөнгөтэй. Иймээс хувийн телевизүүд МАХН ба АН хоёрыг бахархмаар “тэнцвэртэй” сурталчилж байгаа билээ.   

Posted in 2008 оны УИХ-ын сонгуулийн сурталчилгаа, Нийтлэл, нэвтрүүлэг | Leave a Comment »

МАХН ба АН-ын нэр дэвшигчид илүү тэгш эрхтэй…

Posted by Бид on 2008/06/14

Зөвхөн өөрт нь зориулсан хууль, дүрэм хүртэл гаргаж тов тодорхой зааж өгөөд байхад  МҮОНТ, буюу түүний “Монголын мэдээ“ агентлаг хоёр намынхаа сурталчилгааг сийхгүй явуулсаар байх юм.

Бямба гариг тутмын “Ярилцъя” нэвтрүүлгийн ээлжит дугаар. Хөтлөгч эхлээд ашигт малтмал, газрын тосны үнийн өсөлтийн талаар яриулахаар Ашигт малтмал, газрын тосны хэрэг эрхлэх газрын даргаар ажиллаж байсан Лу.Болдыг  студид урьж авчирчээ. Уг нь төрийн албаа хүлээлгээд өгчихсөн, ямар ч хариуцлага хүлээхээ больсон Болдын оронд томилогдсон юм уу үүрэг гүйцэтгэж байгаа хэн байна, тэр нөхөр ирж яримаар санагдана.  Гэтэл үгүй ажээ. Ингээд хөтлөгч Ц.Мөнхтөр төрөлх намаасаа УИХ-ын сонгуулийн 21-р тойрогт нэр дэвшигч Лу.Болдоос  мөрийн хөтөлбөрийнх нь гол өгөөш болсон “”Баян Монгол” корпорац байгуулах талаар дэлгэрэнгүй ярина уу, хэн яаж байгуулах вэ? гэх мэт “зөв” асуултууд тавьснаар Лу.Болд дураараа болж бяцхан сургалт явуулах мэт сайхан тайлбарлаж өглөө.  Бас “Алтан дорнод Монгол”, “Бороо гоулд”  Монгол улсад ямар ч ашиггүй байсан талаар том мэдэгдэл хийв. Албан тушаал дээрээ 4 жил болохдоо ингэж чанга дуугарахгүй яасан юм бол? Энэ ч яахав. Хэд хоногийн өмнө Лу.Болд албан тушаалаа тушаахаасаа өмнө кадастрын албаны  даргадаа мэдэгдэлгүйгээр Хөвсгөл аймгийн нутагт ашиглалтын лиценз олгосон нь илэрч тус нутгийн оюутнууд АМГТХЭГ-т дайрах шахуу орж бөөн дуулиан дэгдээд байгаа билээ. Гэвч хөтлөгч энэ талаар асуулт тавьсангүй. Лу.Болд ийм асуултыг захиалаагүй учраас тэр биз. Ийнхүү Монголын Үндэсний олон нийтийн телевизийн хөтлөгч Ц.Мөнхтөр УИХ-ын сонгуульд Хан-Уул дүүрэгт нэр дэвшигчдийн дундаас сонголтоо аль хэдийнэ хийчихжээ.

Гэхдээ үнэгүй юм гэж үгүй. Араас нь Усны хэрэг эрхлэх газрын дарга Бадрах гэдэг нэр дэвшээгүй эрхмийг жийрэг болгож 8-хан минут ойр зуурын юм яриулаад МАХН-ын нэр дэвшигч Т.Гандийн сурталчилгааг эхлүүлэв.  Тэр хатагтай  төрийн түшээгээр 16 жил ажиллахдаа цээжилсэн бололтой гоё гоё санаанууд хэлж байх юм. Харин хөтлөгч “үнэхээр сайхан санаа байна” гэж шагшаад “Сонгуулийн тухай ярих шаардлага байхгүй. Яагаад гэвэл манайх олон нийтийн телевиз” гэж шударга зан гаргаснаа нэг секундын дараа зөрчиж  “Гэхдээ асууя. Танай тойрогт  42 хүн нэр дэвшиж байгаа…” гэж хүслээ хэлэхэд сэтгүүлч Т.Ганди өлгөн авч  ард иргэд юуг бодож сонгууль өгөх ёстойг хэлж өгөв. 

Ажиглаад байхнээ МҮОНТ-ийн “Ярилцья” нэвтрүүлэгт МАХН ба АН-ынхан ерөнхийдөө тэгш эрхтэй,  бусад нам, эвслийн нэр дэвшигчидтэй харьцуулбал илүү тэгш эрхтэй юм байна.  Энэ санаа минийх биш, Жорж Оруэлийн “Амьтны ферм” номонд гардаг.

Дөрөвдэх ярилцагч нь  улс төрч, нийтлэлч Баабар байлаа. Тэр юу ярьсан талаар дараагийн бичлэгт оруулья. (Блогийн бичлэг товчхон, гэхдээ тогтмол байвал зүгээр учраас)

Posted in 2008 оны УИХ-ын сонгуулийн сурталчилгаа, Монголын Үндэсний Олон Нийтийн Телевиз, Нийтлэл, нэвтрүүлэг | 2 Comments »

Халз мэтгэлцээнгүй сонгуулийн сурталчилгаа

Posted by Бид on 2008/06/13

Хэрвээ арилжааны телевизүүд 6-р сарын 27-ны 24.00 хүртэл эфирийн оргил цагуудаа мэдээ, сурвалжлага, ярилцлагатай нь намууд, нэр дэвшигчдэд зарчихаад мөнгөө хурааж суугаа бол Олон нийтийн телевизийг ингэж дураараа дургихыг хуулиар хязгаарласан билээ.  Юуны өмнө Сонгуулийн ерөнхий хорооноос тогтоосон хуваарийн дагуу 13 нам, эвсэл болон нэр дэвшигчдэд дунд нь тус бүр 75 минутийн  (нэг удаад 15 минутаар 5 удаа)  нэвтрүүлгийг үнэ төлбөргүй явуулах хуваарь гаргаж өгчээ. 

Гэхдээ тэр нэвтрүүлэг  бөөн уйтгар. Намууд өөрсдөө бэлтгэж өөрсдөө ярьдаг сурталчилгаа болохоор тэр.
Харин 12-ны оройноос Монголын Үндэсний Олон Нийтийн Телевиз  өөрөө санаачлан нэр дэвшигчдийн халз мэтгэлцээнийг явуулж: эхэллээ. Хэрвээ нэр дэвшигчдийг тойрог тойргоор цуглуулсан бол тэднийг өөр хооронд нь харьцуулах, хэн нь хэн бэ гэдгийг үзэгчдэд (сонгогчдод ) харуулах чухал санаачлага болох байлаа. Тэгвэл  үзэгчид “өнөө орой манай тойргийнхон мэтгэлдцэнэ” гээд хүлээж байгаад үзнэ гээд боддоо.  Харамсалтай нь “Авлига”, “Гэмт хэрэг”, “Байгаль орчин” гэхчлэн баахан сэдэв зоож байгаад  мэргэжил мэргэжлээр нь шахуу цуглуулсан тул бас л намуудын нэвтрүүлгийн үргэлжлэл болж байна.

Энэ удаагийн сонгуулийн сурталчилгаа хэтэрхий их мөртлөө нэр дэвшигчид тойрог тойргоороо нүүр тулсан яриа мэтгэлцээн огт алга. Ганц найдвар бол Монголын Үндэсний Олон Нийтийн Телевиз. Сонгуулийн өмнөх Баасан гаригт намуудын дарга нарын халз мэтгэлцээн явуулна, тэр нь бас намуудын мөрийн хөтөлбөрийн тухай яриа болно.  Тэгээд ч МАХН-ын дарга С.Баяр, АН-ын дарга Ц.Элбэгдорж хоёр яавч оролцохгүй пээдийнэ…

Бас TV9 телевиз “Нэр дэвшигчдийн мини парламент” нэрээр мэтгэлцээн зохион байгуулж байгаа. Бас л тойрог тойргоор биш.

Posted in 2008 оны УИХ-ын сонгуулийн сурталчилгаа | Leave a Comment »

УИХ-ын сонгуулийн хэвлэл мэдээллийн сурталчилгааны тэнцвэрт байдлын талаар нам, эвсэл, нэр дэвшигч, иргэд, хуулийн этгээдийн өргөдөл, гомдлыг хүлээн авч байна

Posted by Бид on 2008/06/12

Та бүхэнд нэгэн хэвлэлийн мэдээг толилуулья.

Сонгуулийн ерөнхий хорооны дэргэд Хэвлэл мэдээллийн орон тооны бус зөвлөл байгуулагдлаа. Уг зөвлөлийн ажиллах журам, бүрэлдэхүүнийг нь баталж нэг талаас хэвлэл мэдээллийн мэргэжлийн болон төрийн бус байгууллагууд, нөгөө талаас сонгуульд оролцож буй нам, эвслийн тэгш төлөөллөөс бүрдүүлсэн байна.

Зөвлөл нь нам эвсэл, нэр дэвшигчийн  хэвлэл мэдээллийн сурталчилгааны тэнцвэрт байдал буюу Улсын Их хурлын сонгуулийн тухай хуулийн 37.4-37.5 дахь заалт (сурталчилгааны сонин хэвлэл, ухуулах болон зурагт хуудас, бусад материалын хэмжээний хязгаарлалт), 37.7-37.10 дахь заалтууд (Олон нийтийн  радио, телевизийн сурталчилгааны тэнцвэртэй байдал ба арилжааны телевизийн төлбөртэй сурталчилгааны хязгаарлалт)-ын хэрэгжилтийн талаар ирүүлсэн өргөдөл гомдлыг хянан үзэж санал дүгнэлт гарган Хороонд танилцуулах үүрэгтэй ажиллах юм.

Одоо 2008 оны УИХ-ын сонгуулийн хэвлэл мэдээллийн сурталчилгааны тэнцвэрт байдлын талаар нам, эвсэл, нэр дэвшигч, иргэд, хуулийн этгээдийн өргөдөл, гомдлыг СЕХ-ны ажлын албаар дамжуулан хүлээн авч байна.

2008.06.12

Тайлбар: Энэ зөвлөлд Цэрэнжав миний бие багтдаг, бас зөвлөлийн даргын үүргийг гүйцэтгэх болсон тул чадах ядахаараа санаа тавьж, өөрийн блогийг ашиглан хүмүүст хүргэж байгаа маань энэ.

Posted in 2008 оны УИХ-ын сонгуулийн сурталчилгаа, Нийтлэл, нэвтрүүлэг | Leave a Comment »

“Та саналаа бүү зээлдүүл”

Posted by Бид on 2008/06/11

 Шөнө дундаас хойш унтсан ч дуусаагүй байдаг, өглөө эртлэн босоход ч аль хэдийнэ эхэлчихсэн байх сонгуулийн сурталчилгааны  эцэс төгсгөлгүй урсгал дунд ийм нэгэн сурталчилгаа таарлаа.

Нэгэн ууттай зүйлийг энэ хөгшин харуулж “За хүү минь энэ бэлгээ буцаагааад ав. Ах нь энэ яваа насандаа авлига авч үзээгүй хүн. Айл саахалтаасаа ичиж үхэх нь. Үр хүүхэддээ юу гэж хэлэхэв? Саналаа худалчихлаа гэх үү? Төр засаг төрөлх нутаг, уул усаа арилжчихлаа гэх үү? Эрх чөлөө, үр хүүхдүүдээ мартчхихжээ гэх үү?” хэмээн учирлана. Араас нь “бэлэг” өгснийг төдийгүй авсныг хамт шийтгэдэг Авлигатай тэмцэх газрын ноцтой анхааруулга бичигдсэнийг та харж байна. Муугүй сурталчилгаа болжээ. Ядахдаа энэ сурталчилгааг манай телевизүүд үнэ төлбөргүй нэвтрүүлдэг гэж найдья. 

  

 

Харин ганц асуулт төрж байна. Энэ хөгшинд бас ч яахав юм өгчихөөд (лав нэг шил архи цухуйж харагдана) саналыг нь худалдаж авахыг оролджээ. Тэгвэл 1 сая юмуу 1,5 сая төгрөг амалж байгаад санал авах гэж байгааг юу гэж үзэх вэ? “Та саналаа бүү зээлдүүл” гэсэн сурталчилгаа гаргавал ямар бол?  

Posted in 2008 оны УИХ-ын сонгуулийн сурталчилгаа | Leave a Comment »

МҮОНТ-ийн “сурсан юмыг сураар боож болохгүй”

Posted by Бид on 2008/05/29

2008 оны УИХ-ын сонгууль дөхөхийн хэрээр МҮОНТ сурсан зангаараа нэр дэвшихээр горилогчдын сурталчилгааг сурсан зангаараа улаан цайм хийсээр байх юм. “Цагийн хүрд”-ээр жишээ авч өнгөрсөн 4 ба 5- р саруудад миний анзаарсан заримыг (бүгдийг үзсэн биш) дурдъя.

2008.04.07
Өнгөрөгч 4-р сард Эрдэнэт үйлдвэрийн худалдаа эрхэлсэн орлогч захирал байсан Дамба-Очир тус үйлдвэрийн ажилчдын цалин хөлсийг нэмэгдүүлэх  шаардлагыг үйлдвэрийн удирдлагыг тавьж байна гэсэн сурвалжлага.  Дундуур нь Дамба-Очир нь өөрөө гарч “ажилчдын дундаж цалинг 1 сая төгрөгт хүргэж ёстой” гээд авч өглөө. (Энэ сурвалжлагад сэтгүүлчийн нэр байхгүй, текстийг нь хөтлөгч уншив).  Эрдэнэт үйлдвэрт ажиллахаа больсон мөртөө “хар хүний  төлөө шар хүн” гэгчээр ажилчдынх нь цалин мөнгөнд нь санаа зовж түүнийгээ улс орон даяар цацуулж суугаа энэ эрхэм МАХН-аас нэр дэвшихээр санаархагч байсан нь төдөлгүй ил болсон билээ.

2008.04.19
“Очир төв” ХХК баруун чиглэлийн замыг хугацаанд нь ашиглалтанд оруулна гэж ухуулсан сурвалжлага. МҮОНТ яагаад үүнд санаа зовох болов оо гэвэл ноднин тендерт ялсан ч Лүнгийн замыг засах байтугай түр замаа ч тавьж чадаагүйн улмаас замын машинууд мянганы биш мянган зам гарган сүлжилдэж  замын дагуух хамаг бэлчээрийг сүйтгэхэд хүргэсэн тус компанийн захирал нь нөгөө Эрдэнэтийн сайхан сэтгэлт Д.Дамба-Очир юм. Тэр бас л өөрийн шударга царайг харуулж “хугацаандаа өгнө” гээд ярьж зогсоно. Үзэгчид итгэхгүй гэсэн мэт ЗТАЖЯ-ны Автозамын газрын дарга Баасанхүүгээр дэмжүүлэв.

2008.05.07
Орхон аймгийн оюутан, залуучуудын холбооны 2-р чуулганыг очиж сурвалжилжээ. Болж л байна. Харин хүндэт ерөнхийлөгчөөр нь Орхон аймагт төвтэй “Очир Төв” компанийн захирал Дамба-Очирыг сонгосныг мэдээлэв. Тэгэхлээр чуулганыг биш  Дамба-Очирыг сурвалжилсан юм байна.
Араас нь Улаанбаатар-Лүнгийн чиглэлд “Очир Төв” компанийн барьж байгаа замын  ажлыг өмөөрсөн том сурвалжлага үзүүлэв. Тус компани туслах зам барьсан боловч хөрсний онцлогоос хамарч шороо суларч жолооч нар залхууран салаа замууд гаргасан, малчид хашаа, хороогоо нүүлгэхгүй цааргалсан, орон нутгийн эрчим хүчнийхэн цахилгаан тасалдаг гэхчлэн “Очир төв” ямар ч буруугүй болохыг орон даяар нотоллоо. Ямар муу хөрс, яасан муухай малчид, эрчим хүчнийхэн бэ?

2008. 4. 21.
Нийслэлийн Сүхбаатар дүүргийн нэгдсэн эмнэлэгийн удирдлагын менежмент сайн байгаа учраас (дарга нь сайн байна гэсэн үг – Д.Ц) амжилт олж байна гэсэн оршил, төгсгөлтэй сурвалжлагыг үзүүлэв. Дундуур нь тус эмнэлгийн захирал М.Чимгээ хоёр удаа ярьж эмнэлгийнхээ хамаг цонхыг вакуумдсанаа гайхуулав. “Монголын мэдээ” агентлаг  40 жилийн түүхэндээ анх удаа эрүүл мэндийн салбарын удирдлагын менежментийн асуудалд ингэж сүрхий анхаарч тэгэхдээ Улаанбаатарын бүх эмнэлгээс зөвхөн Сүхбаатар дүүргийн эмнэлгийг сонгож авлаа. Чимгээ бол МАХН-аас нэр дэвшихэээр горилогч.

2008.05.19.
Энтеровирус-71 вирусын  тархалтын явц ямар байгаа тухай сурвалжлагыг Халдварт өвчин судлалын үндэсний төвөөс бэлтгэн үзүүлэв. Мэдээж уг өвчинд өртсөн хүүхдүүдийг зөвхөн тэнд эмчилдэг болохоор аргагүй биз. Гэтэл дундуур нь Сүхбаатар дүүргийн нэгдсэн эмнэлгийн дарга Чимгээ дүрээрээ гарч ирээд энтеровирусээс сэргийлэхийн тулд гараа сайн угаах хэрэгтэй тухай мундаг зөвлөгөө өгөөд алга болчихов.  Сурвалжлага цаашаа Халдварт өвчин судлалын төвөөс үргэлжилсэн  юм.  (Дашрамд дурдахад, хөтлөгч нь түүнтэй ижил нэрт Чимгээ бөгөөд “Эрүүл хүн Монголын Чимгээ” сурталчилгааг бас уншдаг билээ)

2008.04.26.
Орон нутагт малын хулгай их байгаа, үүнээс болж малчид яаж зовж зүдэрч байгаа тухай сурвалжлагыг хаанаас бэлтгэсэн  гэж та бодож байна? Та энэ өдрийн “Цагийн хүрд”-ийг үзээгүй бол хэзээ ч таахгүй.  Боловсрол, соёл, шинжлэх ухааны яамнаас!  Мэдээж хөдөө авсан бичлэгээр дүрсжүүлсэн байж таарна. Тэгвэл хэн ярьсан бэ? БСШУЯ-ны санхүү, эдийн засгийн газрын дарга  Ц.Даваасүрэн. Тэрбээр Хөвсгөл аймгийн морин спорт, уяачдын холбооны тэргүүн бөгөөд аймгийнхаа малын хулгайн эсрэг хэрхэн амжилттай  тэмцэж байгаа тухайгаа ярив.  Улаанбаатараасаа холдохгүй, тэгсэн мөртлөө яамны ажлаа хийхгүй тэртээ Хөвсгөл аймгийнхаа малын хулгайд санаа тавьсан хачирхалтай сурвалжлага хийх болсон учир гэвэл Даваасүрэн МАХН-аас нэр дэвшихыг горилогч  ажээ.

Би сүүлийн 2 сарын “Цагийн хүрд”-ийг бүгдийг үзсэн биш, өөр зөндөө байж таарна. Лав  Байгаль орчны сайд Г.Шийлэгдамба монголын байгаль хамгаалагч хүүхдүүдийг Австрид айлчуулсан тухай сурвалжлага хэд хэд гарсан. Үзэхүл Монголд 20 аймаг, бас нийслэл гэж байдаг ч өөрийн нэр дэвшихээр горилж байгаа Өвөрхангай аймгийн  хүүхдүүдийг голлон сонгосон байх юм. Бас  Хөвсгөл аймагт “Хүмүүс” сонины уншигчдын клуб байгуулсан тухай сурвалжлага нь тус сониныг үүсгэн байгуулагч төдийгүй, МАХН-аас  нэр дэвшигч  Р.Хадбаатарын сэм сурталчилгаа байх жишээтэй. Уг нь МҮОНТ-ийн Үндэсний зөвлөлийн гишүүн ухамсартай хүн юмсан.

Миний үзсэн дээрх сэм сурталчилгаанууд бүгдээрээ МАХН-аас нэр дэвшигчдийнх байх юм.  Яагаад гэвэл МҮОНТ-ын  “Монголын мэдээ” агентлагын захирал нь МАХН-ын дэргэдэх МАСЭХ-ны зүтгэлтэн Энхтуяа гэж эмэгтэй байдаг. Өөр тайлбар хэрэгггүй буйзаа.  МҮОНТ-ийн сурсан юмыг Олон нийтийн радио, телевизийн хуулиар боож болохгүй ажээ.

Posted in 2008 оны УИХ-ын сонгуулийн сурталчилгаа, Монголын Үндэсний Олон Нийтийн Телевиз, Нийтлэл, нэвтрүүлэг | 2 Comments »

Хэдхэн цагийн дараа…

Posted by Бид on 2008/05/23

2005 онд хууль нь гарч олон нийтийн статустай болсон МҮОНТ анх удаа сонгуулийн кампанит ажлын нөхцөлд ажиллах гэж байна. Иймээс Үндэсний зөвлөл нь өчигдөр хуралдаж 2008 оны УИХ-ын сонгуулийн үеэр хэрхэн ажиллах талаар хэлэлцжээ. Тэндээс гаргасан зарчмын шийдвэр гэвэл санхүүжилтыг нэвтрүүлгийн агуулгаас салгах явдал юм байна. Харин далд  сурталчилгааг бүрэн хоригложээ. Олон нийтийн телевизийн уран бүтээлчид сонгуулийн ямар ч сурталчилгаанд оролцохгүй.  Бас хяналтын зөвлөлийг шинэчлэн байгуулж үндэсний зөвлөлийн биш хоёр хүнийг оруулжээ.  Бас төсвийн хэмнэсэн мөнгөөр машин тэрэг авах зэрэг асуудлыг шийдвэрлэсэн гэнэ.

Орой нь “Цагийн хүрд” мэдээллийн хөтөлбөрөөр энэ тухай сурвалжлага үзүүлэхдээ хэдхэн цагийн өмнө үндэсний зөвлөлийнхөө гаргасан шийдвэрийг зөрчиж далд сурталчилгаа хийх шиг боллоо.  Үндэсний зөвлөлийн 15 гишүүнээс яагаад ч юм зөвхөн УИХ-ын сонгуульд нэрээ дэвшүүлж буй хоёроор хурлын шийдвэрийг яриулж байх юм:

Р.Бурмаа (АН-аас нэр дэвшигч): Далд сурталчилгаа явуулахгүй.  Олон нийтийн телевизийн уран бүтээлчид сурталчилгаанд оролцохгүй.

Р.Хадбаатар (МАХН-аас нэр дэвшигч):  Хяналтын зөвлөлийг шинээр байгуулсан. Үндэсний зөвлөлийн биш хоёр хүн орлоо. Төсвийн хэмнэсэн мөнгөөр машин тэрэг авах зэрэг асуудлийг шийдвэрлэсэн…

Хоёр нэр дэвшигчийн хэлснийг эс тооцвол ирэх сонгуулийн сурталчилгааны кампаниар Монголын Үндэсний Олон Нийтийн Телевиз хэрхэн ажиллах журмыг олон нийтэд тодорхой танилцуулсангүй. Хэвлэлийн мэдээ бэлтгэж тараасан эсэхийг бүү мэд. Вэб сайт руу нь орсон боловч 1-р сараас хойш шинэчлээгүй харагдана.

Posted in 2008 оны УИХ-ын сонгуулийн сурталчилгаа, Монголын Үндэсний Олон Нийтийн Телевиз, Нийтлэл, нэвтрүүлэг | Leave a Comment »

Зөвхөн нэр дэвшигчидтэй “Ярилцъя”

Posted by Бид on 2008/05/03

МҮОНТ-ийн “Ярилцья” нэвтрүүлгийн ээлжит дугаар гурван хэсэгтэй байлаа.

Эхнийх мэдээж “Дэлхийн хэвлэлийн эрх чөлөөний өдөрт зориулагдсан ба сэтгүүлч С.Баярмөнх, МСНН-ийн ерөнхий нарийн бичгийн дарга Ү.Хүрэлбаатар, МСоХ-ны ерөнхийлөгч Р.Хадбаатар гэсэн гурван оролцов. Ү.Хүрэлбаатарыг мэдэхгүй, гэхдээ нөгөө хоёр нь сонгуульд нэр дэвшигчид билээ. С.Баярмөнхийг сэтгүүлч биш, “Сэрүүлэг” сонины эзэн, Гадаад хэргийн яамны Дипломат байгууллагуудын үйлчилгээ, аж ахуйн газрын дарга, УИХ-ын сонгуульд Баянхонгор аймагт МАХН-аас нэр дэвшигч, харин Р.Хадбаатарыг “Хүмүүс” сонины үүсгэн байгуулагч,  УИХ-ын сонгуульд Хөвсгөл аймагт МАХН-аас нэр дэвшигч  гэж танилцуулбал дээр байж. 

Дараа нь Монголд зуун ШТС байгуулж, хариуд нь шатахууныг хямдралтай нийлүүлье гэсэн “Роснефть”-ийн саналыг тойрч УИХ- дээр  эхэлсэн ширүүн маргааныг эрхэм  гишүүн Э.Бат-Үүл, Монгол Улсын Ерөнхий сайд С.Баяр хоёроор студид үргэлжлүүлэв. Аль ч талаасаа өндөр түвшний мэтгэлцээн байж хэний зөв бурууг шүүхээсээ илүү ямар сонголт хийвэл дээр вэ гэдэг талаар бодоход хүргэлээ. (Дашрамд хэлэхэд, Болгар улс аль 2004 онд НАТО-д элссэнийг хоёулаа мэддэггүй юм байна). Хөтлөгч Ц.Мөнхтөр чухал мэтгэлцээнийг зохион байгуулжээ.

Гэхдээ Мөнхтөр “Ашигт малтмал тойрсон асуудлаар…”   гэсэн гуравдахь ярилцлагаараа намынхаа нэр дэвшигчийг сурталчлахгүй байж чадсангүй. Тэр нь АМГТХЭГ-ын  дарга, АН-аас Баянзүрх дүүрэг, Багануурт нэр дэвшигч Лу.Болд байлаа.   Тэрбээр сонгуулийнхаа гол “хөзөр”   –  монголын ашигт малтмалыг бүх ард түмэнд эзэмшүүлэх “Баян Монгол” корпораци байгуулах тухай саналаа танилцуулав. Хөтлөгч дагаж баясан “Та манай шилдэг бизнесмен, улс төрчийн нэг …. Гайхамшигтай санал ….  Та ардчиллыг эхлүүлж байсан ….”  хэмээн байн байн дуу алдана. Сэрэмж алджээ. Нөгөөдөх нь төрийн албан тушаалтан гэдгээ мартаад “сая Багануурт Ардчиллын өдөрлөгийг зохион  байгууллаа… гэхчлэн үргэлжлүүлэв. Намын нэвтрүүлэг ч юм шиг…

Нэмж бичив: Э.Бат-Үүл, С.Баяр хоёрын мэтгэлцээнийг орой нь UBS телевизээр давтаж харагдсан. Мөн “Өнөөдөр” сонин текстээр буулгаж Даваа гаригийн дугаарт нийтэлсэн байна. Сайн мэтгэлцээн байжээ гэсэн үг. 

Posted in 2008 оны УИХ-ын сонгуулийн сурталчилгаа, Монголын Үндэсний Олон Нийтийн Телевиз, Нийтлэл, нэвтрүүлэг | Leave a Comment »

Нэвтрүүлгийнхээ баатраас уран бүтээлчид нь ичив

Posted by Бид on 2008/04/18

Өчигдөр “25-р суваг” телевизээр “Бид хойч үедээ юу үлдээх вэ?” нэртэй нэвтрүүлэг үзүүлэв.  Зайсан толгойн ам барилгаар дүүрч дархан цаазтай Богд уул, бас Туул гол хэрхэн сүйрч байгаа талаар айдас төртөл зураглаад “энэ асуудалд санаа зовж явдаг нэгэн эмэгтэйтэй уулзая” гээд эргэхэд жипнээс яг бууж таарсан эмэгтэйг тосч уулзсан нь Я.Батцэцэг байв. Хөтлөгч ихэд хөөрч “Дархан цаазат уулаа авч үлдэх гэсэн цөөнч гэсэн хүн байгаа нь аз. Одоо л авралын мэдээ сонсгоё” гэсний дараа Батцэцэг ярьж “Цаашдаа Богд ууланд барилга барихаа больж хотоо хоёр тийш нь сунгавал бүх асуудал шийдэгдэнэ” хэмээн айлдлаа. Ердөө л энэ үү? Нэгэнт баригдчихсан барилгуудыг яах талаар таг.  Юунд иймхэн “агуу” санал дэвшүүлж гайхуулах болсныг  таахад түвэггүй байлаа. Я.Батцэцэг бол УИХ-ын сонгуульд нэр дэвших санаатай, Үндэсний шинэ намын удирдах зөвлөлийн гишүүн билээ. Хөтлөгч “Тэр тэгэх гээд байна, энэ ингэх гээд байна гэж хардаад яахав? хэмээн урьдчилсан өмөөрч байх нэвтрүүлгээ төгсгөв.

Я.Батцэцэг бол “Атимос” нэртэй компанийн захирал бөгөөд ноднин МУИС-ийн оюутны хоёр байрны багахан зайнд  оюутнуудын цонхыг нь таглан 10 давхар сууц барихаар довтолж, эсэргүүцэж цугларсан оюутнуудыг цагдаагаар даруулж заримыг нь бүр хориулж байгаад санасандаа хүрсэн нэгэн билээ. Тэгэхлээр хотын төвийн эмх замбараагүй барилгажилт, оюутнуудын эрхийг хохироосон үйлдлүүдээ яаж засах, хойч үедээ ямар хот үлдээх талаар саналыг нь сонсохсон.

Нэвтрүүлгийн төгсгөлд Үндэсний шинэ намын нэр, лого, тэгээд ““Бид хойч үедээ юу үлдээх вэ? 2008 он” гэсэн хэдхэн үг тавьж, харин энэхүү сурталчилгааны бүтээлийг туурвисан студи болон сэтгүүлч, редактор, хөтлөгчид нэр, хаягаа тас нуусан байна. Батцэцэгээс эсвэл өөрсдөөсөө ичсэн биз.

Posted in 2008 оны УИХ-ын сонгуулийн сурталчилгаа, 25-р суваг телевиз, Нийтлэл, нэвтрүүлэг | Leave a Comment »

Найр эхэллээ

Posted by Бид on 2008/03/14

Нэг мэдэхэд 2008 оны УИХ-ын сонгуулийн сурталчилгаа  хэдийнэ эхэлжээ. Одоо хэнбугай ч зогсоохоосоо өнгөрсөн. Хэвлэл мэдээлэл буюу сэтгүүлчдийн хувьд дөрвөн нэг удаа тохиолддог том найр гэсэн үг. СЕХ-ын дарга найрыг албан ёсоор эхлүүлээгүй ч сонин хэвлэл, телевиз радиогийнхан нэр дэвшигчидтэй хундага тулган хөлчүүрхэж магтаал сайрхлыг урсгаж эхэллээ. Телзвизийн ярилцлага болгон хэн нэгэн нэр дэвшигчийн сурталчилгаа болон хувирчээ.

Арилжааны телевизүүд тэртээ тэргүй ойлгомжтой. SBN телевизээр өөрийгөө найрын сөгнөгч гээд итгэчихсэн нэг чалчаа залуу УИХ-д нэр дэвшинэ гэдэгтээ үнэхээр итгэчихсэн баахан нөхдүүдийг дүүрэг дүүргээр нь цуглуулж, цаадуул нь ичих ч үгүй цугларч үнэхээр сонгогдчих гээд байгаа юм шиг дэмийрч суудаг боллоо.

Монголын түүхэнд анх удаа сонгуулийн сурталчилгааг хууль журмын дагуу шударгаар явуулах ганц найдвар – олон нийтийн телевиз гайгүй юу? “Цагийн хүрд”-ийн сурвалжлагчид УИХ-ын гишүүд, сайд дарга нар буюу намуудын нэр дэвшигчдийг дагаж хөдөөгүүр хэсэх ажилдаа оржээ. Хэн нэгэн даргагүйгээр хөдөө явахаас айдаг хэвээрээ. Монгол телевиз баахан Ниссан машин аваад байсан, ердөө л дарга нарыг дагаж шоудалцахын тулд гэж үү? Өнгөрсөн бямба гаригт МҮОНТ-ийн “Ярилцья” нэвтрүүлэгт эхлээд Ж.Занаа (“Иргэдийн альянс” төв), М.Чимгээ (Сүхбаатар дүүргийн нэгдсэн эмнэлгийн дарга, тус дүүргийн МАСЭХ-ын тэргүүн, зурагтан дотроос гарахаа больсон нэгэн), дараа нь Ногоон намын Ч.Энхзаяа, УИХ-ын гишүүн Д.Баярсайхан, АН-ын гишүүн Баярсайхан, төгсгөлд нь АН-ын Н.Алтанхуяг оролцов. Бүгдээрээ нэр дэвшихийг горилогсод. Маргаашийн “Ярилцъя” нэвтрүүлгээр хэн хэн оролцохыг харцгаая.

Саяхан Засгийн газрын 100 дахь хоногийн тоо гүйцэж яам, агентлагууд өдөр тутмын сонинуудад тайлангуудаа нийтлүүлж байна. Ихэнхдээ бүтэн нүүрээр. Бичсэн түшмэдээс нь өөр хэн ч уншаагүй тоо, цифрүүдийн оройд залсан сайд юмуу даргынх нь зургийн томыг, ард түмэндээ хандсан мэндчилгээнийх нь сүржинг яана! 100 хоногт улс орныг өөд нь татаад хаячихсан юм шиг даналзаж байна аа. Ингэж сонгууль угтан төсвийн мөнгөөр өөрсдийгөө (Засгийн газар кабинетаараа нэр дэвшинэ!) сурталчлаад авах боломжийг тултал ашиглаж, сонин хэвлэлийнхэн мөнгийг нь чимээгүйхэн хүртэж сууна. Юун төсвийн мөнгө хэмнэх, юун сайд дарга нарын үрэлгэн байдлыг хянах …

6-р  сарын 29  хүртэл үргэлжлэх найр эхэлжээ. Удахгүй хавтгайрна…

Posted in 2008 оны УИХ-ын сонгуулийн сурталчилгаа, Нийтлэл, нэвтрүүлэг | Leave a Comment »