АЖИГЛАГЧ

Монголд, Монголын хэвлэл мэдээлэлд юу болж байна?

Archive for the ‘МОНГОЛЫН АМЬДРАЛ’ Category

“Сансар”-ын харьцаа

Posted by Mongol on 2011/01/19

Өнөө өглөө “Сансар” кабель гэнэт тасрахад утасдвал хаяг, утсыг минь тэмдэглэж аваад “танай наагуур үнэхээр тасарсан, гэхдээ манай хүмүүс яг одоо засч байна, хэрвээ орохгүй удвал бол хэлээрэй” гэв.  Төдөлгүй эргээд утасдаж “оров уу?” гэж асуух нь тэр. “Орлоо, баярлалаа” гэвэл өөдөөс “баярлалаа” гэж байх юм. 

Өчүүхэн зүйл мэт боловч аятайхан сэтгэгдэл төрүүлэв. Ер нь “Сансар” кабелийн телевизийн утсаар гомдол санал хэлэхэд (313752, 313759 хоёрын аль нэг шиг санагдана) дунд эсвэл арай ахмад насны эрэгтэй (өнөөдөр тэр л хүн байсан байх) тайван сайхан харьцдагийг олон жилийн өмнөөс анзаарснаа хуваалцмаар санагдлаа. Тэр үед “Сансар”  үе үе тасарч заримдаа нэлээд удахад миний зүгээс хичнээн утасдсан ч үргэлж тэвчээртэй сонсдог, заавал тайлбарладаг, иймээс тайвшрахаас өөр аргагүй болгож чаддагсан. Харин сүүлийн үед бараг тасрахаа больсон тул хамгийн сүүлд хэдийд тийшээ ярьснаа мартаж.

Posted in МОНГОЛЫН АМЬДРАЛ | 1 Comment »

Сэтгүүлчдийг гарга! Камертай нь!

Posted by Mongol on 2011/01/10

Оны өмнөхөн УИХ-ын чуулганыг сурвалжилдаг сэтгүүлчдийг нэгтгэсэн Парламентийн сэтгүүлчдийн холбоо УИХ-ын тамгын газрынхантай нийлж олон улсын “Найрамдал” зусланд сайхан амарчээ.  Эхлээд бие биенээ хэсэг магтаж дараа нь “Шонхор”, “Бүргэд”  багуудад хуваагдан спортоор өрсөлдсөн байна.

Гэхдээ энэ амралтын оргил үйл явдал нь Парламентын сэтгүүлчдийн холбооноос УИХ-ын Тамгын газрын дарга Ц.Шаравдоржид сэтгүүлчдийн ажиллах нөхцлийг бүрдүүлэхэд онцгой анхаарч парламентын сэтгүүлчдийн бүтээлийг нэгтгэсэн товхимол, баримтат кино бүтээхэд дэмжлэг үзүүлсэн тул оны шагналаа гардуулжээ. Дахиад нэг өргөмжлөл!

Ингэж нялуурч байх тэр мөчид парламентын гал зууханд чанагдаж байсан УИХ-ын чуулганы хуралдааны дэгийн тухай хуулийн төсөлд сэтгүүлчдийг байнгын хорооны хуралдаанд “камертай” байтугай камергүй ч оруулахгүй болж байгааг Шаравдорж дарга дотроо санаад хөх инээд нь хүрч зогссоноос зайлахгүй. 

Хамгийн эгзэгтэй хуулиудыг “амжуулдаг” тэр аргаар оны сүүлчийн өдөр УИХ-аар дэгийн тухай хуулийг гэнэдүүлэн батлуулав.  Өнөөдөр хамгийн ардчилагч, эрх чөлөөсөг гишүүд хүртэл ийм заалт орсныг санахгүй, “хэрвээ мэдсэн бол барьж аваад сэтгүүлч та нартаа тушаачихгүй юу?” хэмээн ярьж сууна.  Эрчим хүч хэрэглэгчид,  шударгаар татвар төлөгчид, сонгогчид, жирийн иргэд ордны гадна учраас дандаа чадуулдаг. Харин сэтгүүлчид аз таарч ордон дотор сууж байсан тул бөөн шуугиан дэгдээлээ. Ажил нь тэр юм чинь. Маргаашнаас нь байнгын хороодын дарга нарын хэвлэлийн хурлыг бойкотолж эхлэв. Тэд анх удаа улс төрчдөөс асуухгүйгээр хүчээ харуулав.

Яагаад? гэсэн асуултанд УИХ-ын гишүүд хариулахдаа, камер хараад өөрийн эрхгүй шоуддаг, улс төрждөг, бас хамраа ухдаг учраас гэснээс өөр тоймтой юм хэлээгүй. Хуруугаа хамраасаа аваад л шийдчих амархан асуудал. Улс төр бол хариуцлагатай, гэхдээ тэр чигээрээ шоу. Камер хараад хэл орж, хэл амаа билүүдсэн болгон муу биш. Хэн нь хэн болохоо харуулна. Улс төрчид мөртлөө улс төржихгүй байж болох уу?  Өөр нэг улс төрч – Монгол Улсын Ерөнхийлөгч Ц.Элбэгдорж Дэгийн тухай хуулинд хориг тавиагүй хэрнээ УИХ-ын дарга  Д.Дэмбэрэл, байнгын хорооны дарга Ж.Сүхбаатар нарыг дуудаж хуулиа өөрчлөхийг үүрэгдэх далимаар бяцхан лекц уншиж “сайхан” шоудахыг харав.  Тэглээ гээд энэ гурвын уулзалтыг хаалттай хийх байсан уу?

Хэдэн жилийн өмнө УИХ-ын чуулганы хуралдааны танхимаас сэтгүүлчдийг гаргаж тусгай өрөөнд дэлгэцийн өмнө суулгасан бол яг одоо байнгын хорооны хаалгыг тас хаачихаад байна. Тэр ч бүү сэтгүүлчдийн туршлага, мэргэжил, боловсролыг харгалзан УИХ-аас нэр зааж сурвалжлах эрх олгоно гэсэн заалт оруулжээ. Арай л даварсан санаа. Энэ бүгдээс хандлага харагдаж байгаа биз?

Сэтгүүлчид салахгүй нэхсэний хүчинд Дэгийн тухай хуулийг бага сага засахаар боллоо. Яаж? Байнгын хорооны хуралдаанд хэвлэл мэдээллийнхэн та нар суугаад яахав, оронд нь бичлэг, эсвэл протоколыг өгье гэж магадгүй. Сэтгүүлчид бол түүхчид биш юмсан. Эсвэл камергүй ороод сууцгаа гэж болох… Харамсалтай нь энэ бүхнийг ажлын хэсэг, байнгын хороогоор хаалттай хэлэлцэнэ. Дараа нь нэгдсэн хуралдаан дээр “цагаан утас” ажиллуулж гаднаас дуудлага авахгүй л юм бол саналаа хэлэх бас л боломжгүй. 

Санаснаас, парламентын сэтгүүлчдэд халамжтай нөгөө дарга хаачив аа? Өргөмжлөлөө буцааж авалтай.

Posted in Сурталчилгаа, далд сурталчилгаа, "пиар", Улс төр, эдийн засаг | Leave a Comment »

Эрх чөлөөнүүдийн оочир …

Posted by Mongol on 2011/01/09

МҮОНТ-ын 18 цагийн мэдээ “Хэвлэлийн эрх чөлөөний тухай хууль УИХ-аар батлагдаж чадалгүй олон жил өнгөрлөө” гэж эхэллээ. Андуурч байна. Араас нь УИХ-ын дарга Д.Дэмбэрэлээс тодруулга авахад тэрбээр зарим зүйлийг бас л “эндүүрч” ярилаа.  Сийрүүлбэл,

Хаврын чуулганд хэвлэлийн эрх чөлөө болон мэдээлэл олж авах, хэвлэл мэдээллийн хэрэгслийн холбогдолтой хуулиудыг УИХ гаргаагүй байгаа л даа. Энэтэй холбоотой хуулийн төслүүд бол бид нар хэд хэдэн чуулганаар хэлэлцэх гээд бас амжилтанд хүрээгүй. Зарим хуулийн төслийн талаар манай сэтгүүлчид та бүхэн бол бас эсэргүүцэл илэрхийлсээр байгаад, ийм байх ёсгүй гэсээр байгаад бас хэлэлцэх асуудал нь хоёр ч удаа чуулган дамжаад байж байгаа шүү дээ. Ер нь ингээд асуудал ярих болохлоор заавал ийм л байх ёстой гээд байвал тэр түвшинд нь хүргэх, тал талдаа энэ асуудлаа ойлголцохын тулд  асуудал хойшлогдоод байгаа болохоос биш уг нь ч бас боловсруулагдсан асуудал бидэнд бий л дээ…”

Ойлгомжгүй ярьсныг нь яаж ийгээд  ойлгов.  Нэр дурдсан баахан хуулийг УИХ батлах гэхэд муйхар сэтгүүлчид нураагаад өдий хүрсэн юм байна. Үнэн хэрэгтээ Мэдээллийн эрх чөлөө буюу мэдээлэл авах эрх чөлөөний тухай ганцхан хуулийн төслийг шинэ УИХ-ын чуулган болгоны хэлэлцэх асуудлын төлөвлөгөөнд үзүүлэн шиг оруулдаг болоод арав шахам жил өнгөрчээ. Сэтгүүлчид юун саад хийхтэй манатай. 2004 оноос өмнөхийг орхиё гэж бодоход түүнээс хойш  зөвшилцөөд юу хүссэнээ чаддаг болсон эрх баригчид зүгээр л хүсээгүй хэрэг.  

УИХ-д орж ирээд, тэр тусмаа сэтүүлчид гацаасан хэвлэл мэдээллийн өөр хууль байхгүй. Гэтэл ингэж мэдэн будилсан нь ямар учиртай вэ? Ийм учиртай. 

Бүр 1998 онд батлагдсан Хэвлэлийн эрх чөлөөний тухай хуулийн шинэчилсэн төслийг Ерөнхийлөгчийн санаачлагаар ноднин боловсруулж энд тэнд хэлэлцүүлж эхэлмэгц ХЗДХЯ гэнэтхэн сэрж Хэвлэл мэдээллийн хэрэгслийн тухай хуулийн төслийг гаргаж ирлээ. Эхний хувилбарыг үзэхэд,  редакцийн дотоод дүрмэнд юу юу оруулахыг хүртэл заасан, хэнийгээ яаж нэрлэхийг “мэдээлэл түгээгч” гэхчлэн хэлж өгсөн байна лээ. 

Одоо дээр дурдсан төслүүд өрсөлдөж байна гэж хэлэхэд болно. Хамгийн эрчтэй яваа нь сүүлчийнх. Д.Дэмбэрэл дарга эхнийхийг гаргаагүй байж оочир дайруулж магадгүй. Харж л байя.

Posted in + СЭТГҮҮЛ ЗҮЙ, НИЙТЛЭЛ, НЭВТРҮҮЛЭГ, Улс төр, эдийн засаг | Leave a Comment »

www.mongold.mn

Posted by Mongol on 2010/11/12

Posted in Mongold.mn | 3 Comments »

Бээжин явсан, удахгүй ирнэ…

Posted by Mongol on 2010/09/29

Саяхан морь унасан Сүхбаатарын хөшөөг түр буулгаж Хятад руу ачаад явчихлаа. Ирэх хавар зэсээр бүрүүлж буцаан авчраад дээш гарган зогсооход алтан нарны гэрэлд шаргалтан туяарч Монгол улсын нийслэл – Улаанбаатар хотын билэг тэмдэг хэвээр үлдэхнээ.

Сүүлийн хэдэн жил Сүхбаатарын хөшөөг эзэн Чингэсийн өмнүүр сүүтэгнүүлээд яахав, бүрмөсөн буулгаж өөр тийш нь аваачья гэсэн бодолтой хүмүүс байсан ч аз, эсвэл гай болж МАХН ба АН хоорондоо зөвшилцөн ардчилал, тусгаар тогтнол хоёрыг нэг нэгээр нь хувааж өмчилснөөр дураараа болцгоожээ. Нэг нь ардчиллын 20 жилийн ойгоор төрийн одон медалийг 20-30 мянгаар тарааж бүтэн жил тэмдэглэж байгаа бол нөгөө нь Сүхбаатарын хөшөөг дахиад зуу, зуун жил хөдлөхгүйгээр бөхлөхөөр шийдсэн байна. Нэмж Эрх чөлөөний нэртэй байсан, Сүхбаатарын талбай хаагдвал нөөцөнд байдаг эсэргүүцэл, тэмцлийн талбайг Тусгаар тогтнолын нэртэй болгож авангуутаа нийслэлийн Засаг даргад үүрэг өгч засуулж эхэллээ.

Уржнан шатаалгасан байраа МАХН бүр томруулан 14 давхар болгож бариулаад дуусч байгаа бол Ардчилсан нам  Улсын драмын эрдмийн театр ба Соёлын төв ордныг холбосон хүзүүвчэн байраа 20 давхар болгож  сүндэрлүүлэн давж гарах гэж байна.

Монгол Улсын төв талбайгаар сонин ихтэй.

Posted in Барилга, хот төлөвлөлт, газар, Улс төр, эдийн засаг | Leave a Comment »

Аян доторх аян

Posted by Mongol on 2010/08/18

Туул голыг хамгаалах том шоуны талаар би хэд хоногийн өмнө бичсэн билээ. Дутуудуулчихаж. Хөөрхий байгаль хамгаалагчид, мэргэжлийн хяналтынхан, онцгой байдлынхан, бас “Тунгаа” төвийн хэсэг иргэдийн хийж байгаа харуул, эргүүлийн ажил МАХН-ын “Нийгмийн ардчиллын аян”-ны дотор багтчихжээ. Сайхан шоудах юм аа. Хэзээ нэгэн цагт “Манай нам Туулыг аврах гээд үзээд үзээд бараагүй …” гэх юм байна.

Posted in # УЛААНБААТАР, Туул гол, Улс төр, эдийн засаг | Leave a Comment »

Шударга гар

Posted by Mongol on 2010/08/07

Хамаг монголчуудын хараа урагшаа, Оюутолгой, Тавантолгойн зүгт хандчихаад байх зуур ард нь “Бороо гоулд” буюу Сентерра гоулд компани амжуулж өгчээ. Хойт зүгт, Сэлэнгэ аймгийн нутагт Бороогийн орд газрын 40 тонн алтыг ховх зөөснийхөө төлөө манайхны хараалыг идэж цадаагүй мэт дараачийн 40 тоннын нөөцтэй Гацууртын орд руу сэмхэн гэтэхээ ч больж бүр цагаандаа гарчээ. Харин телевизүүд “Бороо гоулд” гэж буянтай компани Мандал, Баянгол зэрэг сумдыг өдөр шөнөгүй өөд татаж байгаагаас өөр юм үзүүлэхээ больсон бол зөвхөн TV9 нэг удаа тэс өөрийг харуулав.

Наадмын өмнөх TV9 телевизийн “Томилолт” нэвтрүүлгийн “Хараа голыг онилсон Хүнцэлийн хор” нэртэй дугаарт Сентерра гоулд компани нутгийн иргэдийн морь уралдуулж, ундны ус авдаг газрыг нь уул хөндийтэй нь битүү хашаалаад авсан ба одоо хавь ойрын малчдын усыг машинаар зөөж “буян болж” байгааг дэлгэв. Баярламаар ч юм шиг, гэхдээ баярлаж болох уу?

Телевизээр үзэхэд ч сайхан нь мэдрэгдэх гол устай энэ нутгийг ухаж төнхөхөд дэндүү хайран. Иймээс ноднин УИХ-аас Гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай гэсэн урт нэртэй хууль баталсан биз. Тэгвэл “Бороо гоулд” нутаг буцахгүй юугаа хүлээнэ вэ?

Энэ тухай асуултанд “Бороо гоулд” компанийн ерөнхийлөгч Жон Казакофф гайхалтай хариулт өгөх нь тэр. Та зүүдлэх ч үгүй: “Ойн сав, ус мөрний… хуулийг өөрчлөх талаар Уул уурхайн үндэсний ассоциаци тэргүүлээд лобби явуулж байгааг би мэдэж байна. Нэлээд хугацаа шаардагдах байх. Ямар ч байсан энэ хууль өөрчлөгдөнө гэдэгт итгэж байна …”

Шударга гар юм аа. Уул уурхайн ассоциацийн хамгийн чухал гишүүн нь Бороо гоулд байх шүү. Хамаг нууцаа задалсан ноёнд сэтгүүлч Отгон өөрийн эрхгүй “Баярлалаа” гэв. Канадчууд биднээс арай өөр ажил хэргийн соёлтой, иймээс лобби хийлгэж буйгаа нуугаагүй бол тэр лоббиг нь хийж өгч байгаа манай монголчууд дандаа хулгайгаар… Хэвлэл мэдээллийнхний хувьд МҮОНТ тэргүүлээд урт нэртэй хуулийн эсрэг нэр хаяггүй захиалгат нэвтрүүлэг цувуулаад байсан нь ийм учиртай аж.

Posted in Улс төр, эдийн засаг | Leave a Comment »

2010 оны наадмын төгс, зоостой, гоё, Big, good, кимчитэй, бас технологийн дээдийн … хуушуур

Posted by Mongol on 2010/07/22

Улаанбаатарт улсын наадмаар баярлана гэдэг бол бөх, сур, морь үзэхээс гадна Төв цэнгэлдэхийг тойрч хуушуур идэхийг  хэлнэ. Саяын наадмаар Ерөнхийлөгч Ц.Элбэгдорж, Ерөнхий сайд Сү.Батболд нар эхнэрүүдээ дагуулан цэнгэлдэхээс гадаалсан хэрнээ хэдэн метр алхаад сурвалжлагчдад ярилцлага өгөөд буцаад орчихов. Бүтэн тойроогүй нь дүүрч. Харин хуушуур идээгүй нь жаахан тиймхэн.

АНУ-ын Ерөнхийлөгч Барак Обама айлчлалаар ирсэн ОХУ-ын Ерөнхийлөгч Дмитрий Медведевыг дагуулан гудамжны “Макдональдс” руу явж ороод хачиртай талх, ундаа авч хооллоод дараа нь хоёулаа кассан дээр очиж тооцоогоо хийж (Обама даасан) харагдсан. Тэгвэл манай төрийн өндөрлөгүүд хэзээ наадамчин олонтойгоо зэрэгцэж суугаад Төв цэнгэлдэхийн хуушуур идэх бол? Нэр хаягаараа өрсөлдсөн энэ олон хуушуурын асруудаас Монголдоо “Макдональдс” шиг брэнд мэндлэхийг хэн байг гэхэв.  

Read the rest of this entry »

Posted in Наадам | 2 Comments »

2030 оны дэлхийн хөл бөмбөгийн аваргад Монгол оролцох …

Posted by Mongol on 2010/07/20

Дэлхийд ганцхан Монгол наадмын шөнө дэлхийд ганцхан хөл бөмбөгийн аварга шалгаруулах тэмцээн өндөрлөж бараг сүүлчийн мөчид оруулсан золигийн бөмбөгөөрөө испаничууд түрүүллээ. Бүтэн сарын турш Өмнөд Африкт болсон тоглолтуудыг нойргүй (гэхдээ шар айрагтай) сахиж хөл бөмбөгийн гүрнүүдийн сүйрлийг үзэж оволзсон манай залуусын хувьд монгол наадмын хоёр өдөр тэгэсхийгээд өнгөрсөн биз. Монголын шинэ үе хөл бөмбөгийг сонгож байна.

Манай Ерөнхийлөгч, Ерөнхий сайд, (Дэмбэрэл даргыг алгасаад?) УИХ-ын гишүүдээс эхлээд зурагт үздэг хүн бүр Английг, Бразилийг, Аргентиныг, Германыг гэхчлэн дэмжжээ. Яагаад гэдгийг мэдэх үү? Яагаад гэвэл Монголын баг оролцоогүй учраас. Монгол Улс хэзээ нэгэн цагт хөл бөмбөгөө учир зүггүй хөгжүүлж чадаад Солонгос, Хятад, Япон мэтийг дийлж Ази тивээсээ гарахын төлөө явахаас өөр яахав. Хэдэн арван жил хэрэгтэй…

Өөр нэг зам бий. Энэ бол дэлхийн аваргыг Монголд явуулж зохион байгуулагч орны хувьд шууд “шалгарах”.

20-р зууны туршид энэ тэмцээн зөвхөн Европ, эсвэл Америк тивд явагдсан бол 2002 онд анх удаа Азид ирж Өмнөд Солонгос, Япон хоёрт зэрэг, 2006 онд Германд, 2010 онд Өмнөд Африкт болж өнгөрлөө. Ирэх 2014 онд Бразильд болно. Харин 2018 ба 2022 онуудад хаана болохыг 12-р сарын 2-нд Швейцарын Цюрих хотноо ФИФА-гийн төв байранд тодруулах аж. 2018 оныход Англи, Орос, АНУ, бас Португали ба Испания (хамт), Бельги + Нидерланд (хамт), харин 2022 оны төлөө Өмнөд Солонгос, Катар, Япон, Австрали тус тусдаа өргөдлөө өгөөд байна.

Яахав 2026 оныг хэн нэгэн аваг. Харин 2030 он Монголынх байж болох уу?

Бүтэшгүй санаа биз. Юуны түрүүнд тус бүрдээ хэдэн арван мянган суудалтай нэлээн хэдэн цэнгэлдэх хүрээлэн хэрэгтэй. Тэрбумаар тоологдох зардал мөнгө…

Гэтэл 2022 оныход бөмбөгөө сайн цөлбөл нисээд усанд уначихмаар бичил (ердөө 11 мянган кв.м буюу манай хамгийн жижиг Сэлэнгэ аймгаас 4 дахин бага) нутагтай, 833 мянган хүнтэй  Катар улс нэрээ өгчээ. Газрын тосоор эх захгүй баяжсан улс гэдэг. Тэгвэл биднийг удахгүй тийм болно гэж Оюутолгой, Тавантолгойн үүцыг задалсан манай томчууд амлаад байгаа. Удахгүй тэндээс мөнгө цутгаж эхэлнэ.

1990 онд Өмнөд Африкт апартеид төгсгөж Нельсон Мандела шоронгоос гарснаас хойш яг 20 жилийн дараа хөл бөмбөгийн аваргыг зохион байгууллаа. Тэгвэл Монголд 1990 онд социализмыг төгсгөснөөс хойш бас 20 жил өнгөрчээ. Барьцаад яахав. 2030 он хүртэл бидэнд сунайсан сайхан хорин жил байна.    

Ингээд бодохлоор болмоор ч юм шиг…  

P.S: Саяхан “ДАШТ-2030 Монгол” төсөл нь хэрэгжиж эхэлсэн тухай сонслоо. Ямар зорилготойг сураглавал “Монгол улсад хөлбөмбөгийн спортыг хөгжүүлэх, тив дэлхийд өрсөлдөж чадахуйц тамирчдыг нээн илрүүлэх гэсэн зэрэгт чиглэсэн үйл ажиллагааг явуулах” гэх ерөнхий өгүүлбэр харагдав. Монголчуудаа, хэтэрхий даруу байгаа юм биш үү?

Posted in Спорт | 5 Comments »

Юун Тавантолгой …

Posted by Mongol on 2010/07/06

Дэлхийгээр дүүрэн  мөнгө байна гэж “Монгол банк”-ны Чулуунбат дандаа ярьдаг. Үнэн юм байна.    

Posted in МОНГОЛЫН АМЬДРАЛ | 3 Comments »

Туслахсан

Posted by Mongol on 2010/07/06

Өнөөдөр хаа сайгүй ийм зарлал наалттай харагдав. Бичиг баримт байтугай хүн алга болсон тухай зар зөндөө тааралддаг ч харж үзээгүй тул тэр дороо мартдагдаг. Харин энэ удаад арга тасарсан “гуйя” гэсэн ганц үгнээс болж зүгээр өнгөрч  чадсангүй.    

Posted in МОНГОЛЫН АМЬДРАЛ | 2 Comments »

Үндэсний чуулганы үер

Posted by Mongol on 2010/06/09

Сүүлийн хэдхэн өдөрт Төрийн ордонд үндэсний чуулга уулзалтын үер буулаа. Төр, засгийн албан ёсны бусад хурал чуулгануудаас өөрийг хэлж байна.  

2010.06.10.04-05. Баасан-Бямба

Монгол Улсын Ерөнхий сайдын ивээл дор Монгол улсын Засгийн газар, Жендерийн тэгш байдлын үндэсний хороо, НҮБ-ын Хөгжлийн хөтөлбөрөөс зохион байгуулсан “Эмэгтэйчүүд – Хүний хөгжил” монголын эмэгтэйчүүдийн 2010 оны үндэсний чуулган болов.

2010.06.07. Даваа

Монгол Улсын Засгийн газар, Дэлхийн банк, Европын холбоо, Япон Улсын Засгийн газрын оролцоотой “Тогтвортой амьжиргаа-2” хөтөлбөрөөс зохион байгуулсан “Орон нутгийн хөгжилд иргэдийн оролцоо” үндэсний чуулга уулзалт болов.

2010.06.09-10. Лхагва-Пүрэв

УИХ-ын Нийгмийн бодлого, боловсрол, соёл, шинжлэх ухааны байнгын хороо, Нийгмийн хамгаалал, хөдөлмөрийн яам, НҮБ-ын Хүн амын сан, Үндэсний хөгжил, шинэтгэлийн хороо, МУИС хамтран зохион байгуулсан “Хүн ам зүйн цонхны үе ба хөгжлийн бодлогын зарим асуудлууд” сэдэвтэй үндэсний зөвлөлдөх уулзалт Төрийн ордонд үргэлжилж байна. 

Арай л олдоод, бас нүсэрдээд байх шиг.

Posted in Улс төр, эдийн засаг | Leave a Comment »

Оюутны талбай ба Оюутны холбоо

Posted by Mongol on 2010/06/06

Аль ч газрын оюутнууд нийгмийн хамгийн дайчин хэсэг гэгддэг. Манайд ч ялгаагүй. Сургалтын төлбөр, автобусны билет, заримдаа хичээл сургуулийн газраа хамгаалан тэмцэж чаддагаа олон удаа харуулсан. Эхний хоёрт санасандаа үргэлж хүрдэг, харин гуравдахид зогсоо зайгүй ялагддаг. МУИС-аар жишээ авахад нөгөө мөрөөдөөд байгаа кампусийн орон зай хичээлийн 1,2,3-р байрны хооронд элбэг байсан ч өнгөрсөн жилүүдэд УИХ-ын гишүүн Д.Лүндээжанцангийн “Шихихутаг” дээд сургууль, UBS-ийн захирал Ц.Балхжавын элдэв House, бас Япон төвд алдаад дуусчээ. Оюутнууд мэдээ ч үгүй, хөдлөө ч үгүй. Хамгийн сүүлд оюутны дотуур байрнуудын завсарт өөр барилга чихэхийг хэдэн өдөр дараалан эсэргүүцээд бараагүй, Оюутны конгрессын дарга нь хаашаа ч юм ачигдаад явсан гэдэг. Одоо тэнд 14-15 давхар орон сууц хэдийнэ сүндэрлэжээ.

Ноднин намар Оюутны талбайг таллаж хашаалаад суурь ухаж эхлэхэд хойноос МУИС, зүүнээс ШУТИС, урдаас МУБИС-ын мянга мянган оюутны сүрт жагсаал орж ирэхийг төсөөлж суутал …. таг чиг өнгөрсөн билээ. Яагаад гэвэл Монголын оюутны холбоо тэднийг зохион байгуулах байтугай дуугараагүй. Сэмхэн зөвшөөрсөн юм байна. Барилгын жинхэнэ эзэд нууц, зөвхөн “Угтуул” гэнэ үү нэг компанийн нэр дуулдсан. Мартсанаас, яг энд хэдэн жилийн өмнө МОХ-ын удирдлага монголын оюутан түмэнд зориулсан хөшөө цогцолборын шав тавьж цуглаан үйлдээд байсан, тэр алга болчихож!

Монголын оюутны холбоо 2004, 2008 оны УИХ-ын сонгуулиар МУИС, ШУТИС, ХҮДС, МУБИС гээд хамаг том сургуулиуд оршсон Сүхбаатар дүүрэгт МАХН-аас нэр дэвшсэн Сү.Батболдыг улаан цайм дэмжиж ажилласныг би мэднэ. Бас Ерөнхийлөгч Н.Энхбаярын улаан фэн байгууллага. МОХ-ын толгойд бат суусан экс-оюутнууд их, дээд сургуулиудын оюутны зөвлөлийн учраа мэдэхгүй дүү нарыг (оюутнууд тул 1-2 жил болоод солигддог) аргалж өөрсдийгөө ээлжлэн сонгуулсаар өдий хүрчээ. Хамгийн сүүлд МОХ-ны Ерөнхийлөгч байсан Энхтүвшин гэгч нөхөр Нийслэлийн өмчийн харилцааны газарт хэлтсийн даргын албыг давхар хашаад тууж явсан. Өнөөдөр МОХ нь монголын 100 гаруй мянган оюутны нэрээр төрөөс авсан байртай, бас хаа нэгтээ оюутнуудад кампус барих нэрээр авсан газартай, автобусаар үнэгүй зорчих билет тараадаг,  бас Оюутны талбайг оюутнуудаас асуухгүйгээр “зардаг” эрх мэдэлтэй байгуулллага болжээ.

Оюутнууд тэнэг улс биш тул мэдээж эсэргүүцэж хэл ам гаргадаг. Гэтэл хэдхэн сарын өмнө ээлжит их хурлаа гэнэтхэн Сү.Батболдын “Чингэс” зочид буудалд хоёр гурван давхар харуул хамгаалалтайгаар, зарим сургуулийн оюутны төлөөллийг оруулахгүйгээр хаалттай хуралдуулж шинэ Ерөнхийлөгчийг сонгожээ. Хэн гээч? Монголын улсын Ерөнхий сайд Сү.Батболдын зөвлөх, “Хас” банкны захирал асан, одоо “Тэнгэр” санхүүгийн нэгдлийн гүйцэтгэх захирал, бас  МАХН-ын цоо шинэ кадр Ч.Ганхуяг ах нь.  Сонгогдсоноосоо хойш оюутны асуудлаар ганц ч үг дуугарч өгөөгүй байна.  

Магадгүй 2012 оны сонгуулийн өмнө Оюутны талбайн үлдсэн талыг учир зүггүй хамгаалахаар бэлтгэж байж мэдэх.

Posted in Улс төр, эдийн засаг | 2 Comments »

Монгол 999-ын нүүр царайнууд

Posted by Mongol on 2010/06/05

Хэдэн жилийн өмнөөс гадаадаас ирсэн уул уурхайн компаниуд манай хэвлэл мэдээллээр юу хүссэнээ хийлгэж чадахаа харуулсан буюу ид харуулж байгаа бол одоо үндэсний компаниудын ээлж иржээ.

5-р сарын эхээр Монгол 999 (уруугаа харсан 666) нэртэй компаниудын компани байгуулагдав. Би бодохдоо Тавантолгой (мэдээж Энержи Ресурс, орон нутгийн “Тавантолгой” ХК, бас хэдэн луйварчдын сэмхэн гартаа оруулсан хэсгүүдийг хасаад) монголын ард түмний өмч учраас хүн бүрт 2,7 сая хуваасны нэг ногдоно, харин гадаадын болоод дотоодын компаниуд өрсөлдөөд хэн сайн нь зөвшөөрөл авч хөрөнгөө оруулж нүүрс ухаад бидний хувийг төлнө, хэрвээ ашиг гаргаж чадвал өөртөө үлдээх тухай төсөөлж явлаа.

Харин өчигдөр сүрдмээр нэртэй энэ компанийн захирал Тавантолгойг (эсвэл түүний лицензийг эзэмших компанийг) дөрөв хувааж “Эрдэнэс МЖЛ”, Монгол 999, ард түмэн гуравт эзэмшүүлж үлдсэнийг гадаадын хөрөнгийн бирж дээр зарах ёстой тухай  мэдэгдэв. Тэд ард түмний хажуугаар, дээр нь гарч байгаад “илүү тэгш эрхтэй”-гээр Тавантолгойг эзэмшихээр шийджээ. Харин нүүрс ухах ажлыг гадныхныг авчирч хийлгэнэ.  

Энэ мэт олон эргэлзээ байгаа ч ”Монгол 999” юу хийхээ сайн мэдэж юуны өмнө хэвлэл мэдээллийг бөөнөөр болон ширхгээр худалдан авснаар одоо хүмүүсийн толгойд “Үндэсний компаниудаа дэмжицгээе!” урианаас өөр юм бодогдохыг болиулав. Өдөр тутмын сонинуудаар тэдний төлбөртэй мэдээ, ярилцлагуудын хажуугаар хөндлөнгийн байр суурь цухалздаг бол телевизүүд зөвхөн тэдний дуугарснаар дуугарч байна.

Хамгийн том эргэлзээ бол Монгол 999-ын удирдлагууд. Төлөөлөн удирдах зөвлөлд хамгийн сүүлд гэхэд л Олон овоотын лицензийг бултуулж улмаар нэг банкийг дампуурахад хүргэсэн “Монгол газар”-ын Мянганбаярын нэрийг сонссон хүмүүс толгой сэгсэрч эхэлмэгц “Монгол газар”, Жаст групп компанийн хос мэдэгдэл гарган хэвлэл мэдээллээр, түүний дотор бүх телевизээр төлбөртэйгээр зэрэг цацуулж ЖАСТ-ын Батхүү, “Монгол газар”-ын Мянганбаярын захиалгатай ярилцлагуудаар сонинуудыг дүүргэж намжаав.

МҮОНТ-ын “Хариулахгүй ч байж болно” ярилцлагад Ц.Мянганбаяр оролцов. Ямар ч но-той оролцогч хариулаад л баймаар эелдэг асуултууд … Хүслээ, оролцлоо, хариуллаа.

Сонинууд “Зудад малаа алдсан малчдын банкнаас авсан зээлийг хүчингүй болгоно л гэнэ. Тэгвэл барьцаанд лицензээ тавиад алдаж байгаа “Монгол газар”-ын Ц.Мянганбаярын өрийг бас хэрэгсэхгүй болгох байсан юм биш үү. Малчид яагаад төрийн ивээлд багтаж Ц.Мянганбаяр яахаараа “Ганц худаг”-ийн камерт заларчих гээд байдаг юм бэ. Энэ бүгд арчаатай амьдарч яваагийн торгууль биш үү” гэхчлэн нулимс асгаруулах наад захын хэрэг болов.

“25-р суваг” телевизийн “Ам нээвэл…” нэртэй шинэ нэвтрүүлгээр “Цагаан шонхор холдинг” компанийн ерөнхий захирал Ч.Энхтайван ил гарч хүнд бэрх амьдралаа дурслаа.Гэхдээ хамгийн сонирхолтой нь шорон орон биш “Монгол 999” байгуулах санаагаа хэдэн жилийн өмнө бодож олсон тухайгаа уушиг нээсэн явдал юм. Бүх юм түүний санаснаар явж таарлаа. 

Монгол 999-ын дараачийн “брэнд” бол Төлөөлөн удирдах зөвлөлийн даргаар сонгогдсон “Ажнай” Д.Бат-Эрдэнэ юм. Тэрбээр ард түмэндээ хандахад нь хэвлэл мэдээлэл ямар нэгэн тайлбаргүйгээр индэр болж өгөв. Хэрвээ би эндүүрээгүй бол Тавантолгойг хэдийнэ ухаж байгаа Өмнөговь аймгийн орон нутгийн өмчит “Тавантолгой” ХК-ийн 49 хувийн ихэнхийг бөөн хэрүүлтэйгээр хамсан төдийгүй аймгийн удирдлагыг ерөнхийд нь “мэддэг”, 2008 онд УИХ-ын гишүүнээс буумагцаа аймгийн Засаг даргын зөвлөхөөр өөрийгөө томилуулж төрийн хүний дүрд хувираад “Тавантолгой” ХК-ийн ТУЗ-ын дарга болж байсан Бат-Эрдэнэ мөн байна.

P.S: Саяхан Монгол 999-ын ТУЗ-д ордог С.Одонтуяа нар ярихдаа, “зарим компани 50-60 охин компаниа оруулсныг мэдсэн, иймээс 5-р сарын 11-нээс өмнө байгуулагдсан компанийг бүртгэхгүй” гэжээ.  Хэдэн жилийн өмнөөс Монгол 999-ыг  сэдсэн “сайн эрс” аль хэдийнэ амжуулчихжээ. Удалгүй Хадгаламж зээлийн хоршоо шиг хачин юм болох биз.

Энэ олон захирлууд өөрсдийгөө Монгол 999-ын нүүр царай гэж бодож байгаа юм байх даа…

Тэд гэрчилгээгээ авчээ. Сүүлийн хэдэн өдөр монголын бүх сонин энэ талаар шуугиж байна. Төлбөртэйгээр.

Posted in + ТЕЛЕВИЗ, 25-р суваг телевиз, Монголын Үндэсний Олон Нийтийн Телевиз, Улс төр, эдийн засаг | 3 Comments »

Хаа сайгүй их мөнгөний тоо …

Posted by Mongol on 2010/05/26

Гудамжинд наагдсан зарлалуудыг үзэх юм бол Монголд  мөнгө, тэгэхдээ их мөнгө олох шиг амархан юм алга. Оюутолгойн гэрээнд санаа зовж “Монгол 999”-д багтахыг оролдох ямар ч шаардлагагүй. Утасдаад л гүйцээ. Одоо МАХН-ын 1,5 сая, АН-ын 1 сая байтугай Элбэгдоржийн 2,5 сая юу ч биш …      

Зөвхөн энэ биш …

Read the rest of this entry »

Posted in МОНГОЛЫН АМЬДРАЛ | 3 Comments »

Төгс шоу

Posted by Mongol on 2010/05/24

Сүүлийн үеийн монголын телевизийн хамгийн олон үзэгчтэй нэвтрүүлэг ба монголын хамгийн гоё ярьдаг улс төрч хоёрыг нийлүүлбэл юу болохов? Тийм ээ, төгс шоу болно.

Бямба гаригийн үдэш UBS телевизийн Universe Best Songs нэвтрүүлгийн сувгийг эргүүлтэл тайзан дээр дуучдын оронд Монгол улсын ерөнхийлөгч Ц.Элбэгдорж индэр засуулаад тухалчихсан лекцэлж өгч байна. Энэ агуу санааг Ерөнхийлөгчийн зүгээс (бараг өөрөө биз) гаргасан гэдэгт бараг 100 хувь итгэж болно.

Оролцогч жаалын “Таны хүүхдүүдээс дуучин болох хүн бий юу?” гэсэн асуултанд яаж 4 хүүтэй болсноо үе шатаар нь тоочиж дараа нь өнчин өрөөсөн 20-30 хүүхдийг өсгөн хүмүүжүүлж байгаа тухай дараачийн лекц эхэллээ. Асуулт-Лекц. Асуулт-Лекц. Асуулт-Лекц…  Ийнхүү телевиз үзэгчид гэртээ санаандгүй сууж байгаад Элбэгдорж ерөнхийлөгчийн угсраа лекцэнд давхар суух нь тэр.

“Universe Best Songs” бол яг өнөөдөртөө монголын телевизийн хүрсэн оргил, бас нүүр царай юм. Санаа нь гадаад, нэр нь гадаад, дуу нь гадаад. Ерөнхийлөгч хүртэл нэрээ хавчуулахыг хүсдэг нэвтрүүлэгтэй болсон нь сайн хэрэг, гэхдээ энэ бол зүгээр нэг шоу…

Бусад телевизүүдэд шинэ оддыг төрүүлдэг гурван шүүгчтэй нэвтрүүлэг одоогоор дахиад гурав байна. TV9-ын “Гэгээн алсын одод”, TV5-ын “Бүжгэнд урья” ба МҮОНТ-ийн “Монгол үндэстний дууны их наадам”. 

Манай дөрөвдэх засаглал үзэгчдээ шоугаар байлдан дагуулж байна.

Posted in Улс төр, эдийн засаг, UBS телевиз | 2 Comments »

Эрэлхэг сурагч

Posted by Mongol on 2010/05/17

Урьд шөнө нийслэлд орсон борооны ус хаа сайгүй цэлийж хүмүүс тойрч, харайж, хоёр гараа алдлан тэнцвэрээ шалган тэвдэж байхад ганцхан энэ сурагч найздаа цүнхээ бариулчихаад … дайран орлоо.  Улмаар ангийнхаа охидуудын өмнүүр сахилгагүй жолооч шиг ус цацан өнгөрч сэтгэл ханасан мэт өрөөсөн хөлөө өргөн хэсэг зогсов. 

Жаал удахгүй гэртээ харихад түүний хүмүүжил, ёс суртахуун, бас ирээдүйн хувь заяаных нь тухай том том үгс угтана даа. 

Бяцхан түүх санаанд орлоо. Шалбааг туучиж тоглоод норчихсон ирсэн бяцхан хүүгээ харсан аав “Юу!!! Яагаад!!!” хэмээн ширүүн эхэлтэл өөдөөс нь “Тэгвэл шалбааг яах гэж байсан  юм бэ?” гээд дуугүй болгосон гэдэг.

Шалбааг яах гэж байдгийг тэр аав мартсан байжээ.

Бусад зургуудыг бас үзээрэй.

Read the rest of this entry »

Posted in МОНГОЛЫН АМЬДРАЛ | 7 Comments »

Үйл явдлын календарь хөтөлж байх шинэ блог-сайт нээлээ

Posted by Mongol on 2010/05/05

Хаана юу болж, “хэн хаагуур ямар юмаа хийгээд яваад байгаа”-г заавал өнгөрсөн хойно биш, харин түрүүлж, олон хоногийн өмнө биш юм аа гэхэд ядахдаа тэр өглөө нь мэддэг байвал танд хэрэгтэй байж магадгүй гэж үзээд энэ блогийг нээлээ. Удахгүй сайт болгоно.

Posted in Mongold.mn | 1 Comment »

Цагаан утас: Ашигтай байрлал

Posted by Mongol on 2010/04/27

Read the rest of this entry »

Posted in МОНГОЛЫН АМЬДРАЛ | Leave a Comment »

Аймшгийн нэвтрүүлэг

Posted by Mongol on 2010/04/22

Одоо Өмнөговийн нүүрсний аварга ордуудаас Хятад руу тавих төмөр замыг хаагуур дайруулах, тэр нь өргөн нарийн ямар царигтай байх тухай маргаан Засгийн газрын боловсруулсан хуулийн төслийг УИХ-д өргөн барьж хэлэлцүүлэхийн өмнөхөн дахиад ширүүсэх төлөвтэй.

Өчигдөр “25-р суваг” телевизийн хөтөлбөрт 20.20 “Төмөр замын бүтээн байгуулалт” гэсэн даруухан нэвтрүүлэг бичигджээ. Харин жинхэнэдээ “Төмөр замын тээвэр сэхэх үү? мөхөх үү? гэсэн аймшигтай нэртэй байлаа. Товчхондоо, Сайншанд руу тавьж, тэр тусмаа өргөнийг сонговол Оросыг дагаад мөхнө, харин шууд урагшаа, хил рүү нарийныг татвал Хятадаар дамжаад дэлхийтэй холбогдож сэхнэ. Энэ санааг УИХ-ын гишүүн Р.Раш, экс ерөнхийлөгч П.Очирбат, төмөр замын инженер О.Сүрэн (УИХ-ын гишүүн асан), Ерөнхий сайд Д.Содном нар янз бүрээр нотолж ярив. Жишээлэхэд П.Очирбатын хэлснээр, өргөн төмөр зам баривал олон улсын  гэрээ хэлэлцээрийг зөрчиж, үндэсний аюулгүй байдалд харшлах аж. Айчихлаа.

Харин “Энержи Ресурс”, МАК компаниуд нарийн төмөр зам тавьж эх орноо аврах юм байна. Нэр, хаяггүй энэ нэвтрүүлгийн захиалагчийг эрж хайх шаардлагагүй болов.

Posted in 25-р суваг телевиз, Улс төр, эдийн засаг | 3 Comments »

1,5 сая +1 сая = 2,5 сая төгрөг хаачив?

Posted by Mongol on 2010/04/22

4-р сарын 5-нд эхэлсэн Амлалт нэхэх ард түмний холбооны суулт, араас нь залгасан өлсгөлөн өндөрлөв. Тэдний УИХ-д хандаж тавьсан 7 (эсвэл 8) зүйл шаардлагыг цаадуул нь биелүүлээгүй ч цаашаагаа өлсөж цангалгүйгээр ярилцахаар тохирчээ. Ингээд хоёр тал хоёулаа нэр цэвэр, хэн нэгэн амь насаа алдаагүй, эрүүл мэндээр сүрхий хохироогүй өнгөрсөн нь өөрөө амжилт юм.

АНАТХ-ныхан улс төр хийсэн хэдий ч улс төрчдөөс мөнгөний амлалтыг нэхэх маш зөв шаардлага тавьсан билээ. Хэд хоногийн өмнөөс Засгийн газар амлалтыг яаж биелүүлэхээ зарлаж, цагдаагийн удирдлага тэмцэгчдийг урьдчилсан хүлээн авч хүндэтгэл үзүүлж, эхний өдрөөс л Сүхбаатарын талбайн эргэн тойронд шилдэг цагдаа нараа хуралдуулан бараа болж, хэд хоногийн дараа эмч нарыг далдуур найран өлсөгчдийг гар дээрээ өргөн эмнэлэгт хүргэн тордуулж (өлссөн, даралт ихэссэн монгол хүн болгоныг ингэж халамжлаасай), бас үүр шөнийн заагаар согтуу эр Ланд-аар дайрч сенсаац дэгдээн, энэ хооронд УИХ-ын эрхэм гишүүд Төрийн ордонд байн байн хүлээн авах зэргээр бүгд л эрвийх дэрвийхээрээ “дэмжсэн” юм. Даанч өлсөгчид маань амлалтаа нэхэхийн хажуугаар УИХ-ыг тараах томоос том шаардлага зүүж, араас нь Оюутолгойн гэрээ, хүүхдийн  мөнгө, 7-р сарын 1, 76 тэрбум, Үндсэн хуулийг өөрчлөх гээд биелүүлэх байтугай уншаад ч барахааргүй олон зүйлийг залгасан тул эхэндээ дэмжих аядсан иргэдийн толгой эргэж гэртээ суухыг илүүд үзжээ. 

2008 оны УИХ-ын сонгуулиар МАХН ба АН-ын амалсан 1,5 ба 1 сая төгрөгүүдийг сонсоход тов тодорхой тоо хэрнээ огт тодорхойгүй амлалт байжээ. Энэ мөнгийг дараачийн сонгууль хүртэл 1 удаа олгох уу, эсвэл жил болгон уу? Бэлэн мөнгөөр үү? Биш юм бол яагаад мөнгөний зурагтай батламж гардуулав? Сар сараар цалин шиг өгөх үү, бөөндөх үү? Өгч чадахгүй бол яахав, огцрох уу? Эдгээрийг асуух сөхөө амлалтанд согтсон сонгогчдод байсангүй. Ганц найдвар хэвлэл мэдээлэл байсан ч тэднийг мөнгөөр угжсан намууд, нэр дэвшигчид илүү юм асуухыг зөвшөөрөөгүй бололтой өнөөдөр тийм хариултыг агуулсан бичлэг, сонины хайчилбар олдохгүй байна.

2009 оны Ерөнхийлөгчийн сонгуулиар нэр дэвшигч Ц.Элбэгдорж “Би МАХН-ын 1,5 сая, АН-ын 1 саяыг хоёуланг нь өгүүлнэ” гэж амалсан билээ. Гэтэл сонгогчид ба хэвлэл мэдээллийнхэн нөгөөх асуултуудыг дахиад л тавиагүй ажээ. Иймээс АНАТХ-ны тэмцэл эхэлсэн тэр өдөр нээгдсэн УИХ-ын хаврын чуулган дээр Ерөнхийлөгч Ц.Элбэгдорж “Олныг нуршилгүй шууд хэлэхэд иргэдийн “хэзээ” гэсэн асуултад өнөөдрийг оролцуулаад 2011 он гэж амлалтыг хэрэгжүүлэх хугацаагаа тогтоё” гээд бардамнан даапаалж байх юм. 2011 оноос өмнө үү, эсвэл 2011 ондоо багтааж юм уу, бүү мэд. Ерөнхийдөө “2012 он гэхэд хэдэн төгрөг тараагаад цаад сонгогчдоо дуугүй болго” гэсэн санаа биз.  Яагаад мөнгөний тоо хэлсэнгүй вэ? Нөгөө 1,5 сая +1 сая  = 2,5 сая төгрөг хаачив?

Ингээд бүхэл бүтэн ард түмэн улс төрчиддөө угсраагаар хууртдаг юм байж. Харамсалтай нь тэдэнд хэлж сануулах үүрэгтэй хэвлэл мэдээлэл хуурах ажилд эхнээс нь оролцжээ. Харин сая иргэдийн өмнөөс хэсэг нөхөд амлалт нэхэх гэсэн чинь 1,5 сая, 1 сая, 2,5 сая, бэлэн мөнгөөр, бэлэн мөнгөөр биш, жил тутам, дөрвөн жилд ганцын алин болох нотолгоо үгүй тул чухам алинийг онилж яг юуг яаж нэхэхээ мэдэхгүй баахан тэмтэчсээр ийм болов. Одоо улс төрчдийн дуугарсан 1,5 саяын хугацаа энэ тэрийг нааш цааш ярих л үлдлээ. Амлаагүйг нэхэж бас болохгүй.

Магадгүй нэр дэвшигчдийн тус тусдаа өгсөн амлалтуудыг нэхвэл хавьгүй дээр.  Яагаад гэвэл нотлох баримттай. Сонгуулийн үеэр айл гэрээр оруулж өгсөн сурталчилгааны материалуудыг хэлж байна. Харин одоо хэдэн айлд ийм нотлох баримт үлдсэн бол?

Posted in + СЭТГҮҮЛ ЗҮЙ, НИЙТЛЭЛ, НЭВТРҮҮЛЭГ, Сэтгүүл зүй, Улс төр, эдийн засаг | Leave a Comment »

Ц.Элбэгдорж: Телевизийн суваг байна, авбал аваарай…

Posted by Mongol on 2010/04/19

Хэд хоногийн өмнөх “Өнөөдөр” сонины дугаар эргүүлтэл Амлалт нэхэх ард түмний холбооны тэргүүн Г.Уянгын “Ардчилсан намд би үнэхээр гоё байж чаддаг байсан” гарчигтай ярилцлагын доторх нэг өгүүлбэр нүдэнд туслаа.  

– 2004 оны сонгуулийн дараахан Цогсүрэнгийн Ганболд ах утасдаад, Уянгаа чи томилгоо сонсов уу гэлээ. Үгүй гэсэн чинь Монгол телевизийн даргаар Куландаг томилсон байна гэсэн. Өө тийм үү гэсэн чинь, тэгсэн байна даа цаадуул чинь. Ингэдэг юм даа гэлээ. Тэгээд удалгүй Сайханбилэг утасдсан. Тэр үед Засгийн газрын хэвлэлийн албаны дарга байсан ш дээ. Ерөнхий сайд уулзья гэж байна гэсэн. Тэгээд очиж уулзсан. “Томилгоо сонссон биз дээ” гээд л шууд оронгуут асуулаа. Сонслоо гэсэн чинь тэгээд одоо яая гэж бодож байна гэсэн. Би ямар албан тушаал авна гэсэн биш мэддэг чаддагаа хийнэ дээ л гэлээ. Тэгсэн чинь яамаар байна бодож байгаад эргээд хэлээрэй гэсэн. Телевизийн суваг байна, авбал аваарай гэсэн…

Ерөнхий сайд Ц.Элбэгдорж ажлаа телевизийн сувгийг сонгуулийн бялуу юмуу төрийн өндөр албан тушаалд очсоны хувь, хишиг маягаар түгээхээс эхэлж байжээ. Гэхдээ иргэн бүрт биш! Яахав Г.Уянга суваг аваагүй юм байна. Тэгвэл дараачийн 1-2 жилд “ардчиллыг дэмждэг” хэсэг телевиз мэндэлсэн нь C1  (2005 онд нэвтрүүлгээ эхэлсэн, ард нь УИХ-ын гишүүн Х.Баттулга, З.Энхболд нар байдаг), NTV (2006, УИХ-ын дэд дарга Г.Батхүү), SBN (2006, УИХ-ын гишүүн асан С.Болдхэт), TM (2006, Үнэт цаасны компанийн захирал Б.Түмэнжаргал) байсан юм. Тэр үед ямар нэгэн тендер, сонгон шалгаруулалт явуулсан уу? Мэдээж үгүй.

Зөвхөн Ц.Элбэгдоржийг мултарсны дараа 2007 онд анх удаа  дуудлага худалдаа зарлагдаж алтны “Гацуурт” компанийн эзэн Л.Чинбат 800 гаруй сая төгрөгөөр суваг авч “Монгол” нэртэй телевиз байгуулсан билээ. Харин дараачийн буюу “Соёмбо”, BTV, “Эх орон” телевизүүдийн сувгийг дахиад л сэмхэн олгосон байна.

Posted in + ТЕЛЕВИЗ, Улс төр, эдийн засаг | 4 Comments »

Төрийн анхааруулга

Posted by Mongol on 2010/04/13

2010 оны 4 дүгээр сарын 5-нд болсон Амлалт нэхэх ард түмний холбооны цуглааныг манай телевизүүдээс TV9 ба НТВ хоёр Сүхбаатарын талбайгаас шууд дамжуулав. Өнөөдөр цорын ганц сөрөг хүчин шахам болсон TV9 телевизийн байр суурь шууд ойлгомжтой бол НТВ анхаарал татах үйл явдал гэсэн утгаар хандсан биз. Харин энэ байтугай арга хэмжээг шууд үзүүлдэг “Ийгл” телевиз шууд дамжуулсангүй. Дараачийн 3 өдрийн суулт, араас нь залгасан өлсгөлөнг мөн адил тэгэсхийгээд өнгөрүүлж байна.

Юу болчихов оо? Харин өчигдөр АНАТХ-ны өлсгөлөнд оролцож буй “Үндэсний соёмбо” хөдөлгөөний тэргүүн Н.Лхагважав ярилцлага өгөхдөө, эрх баригчид хэвлэл мэдээллийн хэрэгслүүд рүү бичиг явуулж АНАТХ-ны тэмцэл төрийн эсрэг учраас битгий гаргаарай, тусгай зөвшөөрөлтэй чинь ярина гэж дарам шахалт үзүүлсэн гэжээ.

Үнэхээр тийм байна. Лав нэгэн телевизэд дараах бичиг иржээ.

“Сүүлийн өдрүүдэд улс оронд болж буй үйл явдлыг сурвалжлах, өөрийн телевизийн сувгаар нэвтрүүлж байгаа байдал нь хүчирхийлэлд уриалан дуудах, Үндсэн хуулийн бус арга замаар засгийн эрхийг авах, нийгмийн тогтворгүй байдалд уриалсан улс төрийн болон иргэний хөдөлгөөний холбогдолтой нэвтрүүлэгийн давтамжийг эрс нэмэгдүүлэх замаар нийгэмд эмх замбараагүй байдал, бослого, төрийн эсрэг хүчирхийлэлд дэмжлэг үзүүлж болзошгүй үйл ажиллагаа болж болохыг танай телевизэд анхааруулж байна.

Ийм үйлдэлд оролцсон тохиолдолд Монгол Улсын холбогдох хууль тогтоомжийн дагуу тусгай зөвшөөрлийг цуцлах хүртэл арга хэмжээ авагдах үндэслэл болохыг сануулж байна”

Харилцаа, холбооны зохицуулах хорооны дарга Б.Болдбаатар”

Нэлээд дээрээс шидсэн чулуу байж таарна. Үндсэн хуулийн бус аргаар засгийн эрхийг авах гэж юу болохыг мэддэг, телевизийн нэвтрүүлгийн давтамж хэд байвал юунд ямар дэмжлэг үзүүлэхийг тогтоодог нь Харилцаа, холбооны зохицуулах хороо яавч биш…

Posted in + ТЕЛЕВИЗ, Улс төр, эдийн засаг | 6 Comments »

Төрд хэрэгтэй шорлог

Posted by Mongol on 2010/04/01

Зурагтаар гарсан зугаатай ярианаас.

“Өдрийн сонин”-ы “Асуух эрхийн танхим”-д Улсын клиникийн төв эмнэлгийн удирдлагатай хийсэн уулзалтын үеэр нэгэн эмч ярихдаа: Бидний цалин үнэхээр амьдралд хүрдэггүй. Машин авах гэхлээр мөнгө хүрдэггүй. Гэхдээ яахав, ард түмэн, найз нөхдийнхөө тусламжтайгаар сайхан амьдарч байна…

TV8 телевизийн “Толь” мэдээллийн хөтөлбөр”. Шөнө дунд Халдвар судлалын үндэсний төвийн дэргэдэх автобусны буудлын дэргэд гал өрдөж шорлог шараад зараад зогсож байгаа эмэгтэй нүүрээ харуулахгүйгээр: Заримдаа цагдаа нараас “наадахыг чинь манай хорооны нутагт заруулахгүй ээ, нэг бол хурааж аваад төрийн өмч болгоно оо” гэх жишээний байнга дарамт ирнэ…

Урьд нь гарсан өөр нэгэн сурвалжлагаар, үхсэн малын махаар хоол хийж хүнд өгч болохгүй шүү дээ гэсэн анхааруулганд “Саран бууз” гуанзны эзэн эмэгтэй хариулахдаа “Хүнд өгөх гээгүй, хужаа нарт өгөх гэж байсан юм” гэжээ.

Posted in + ТЕЛЕВИЗ, МОНГОЛЫН АМЬДРАЛ | 2 Comments »

Цагаан утас: Өнөө маргаашгүй дулаарна аа …

Posted by Mongol on 2010/03/26

Posted in МОНГОЛЫН АМЬДРАЛ | Leave a Comment »

Намаа засаад төрөө…

Posted by Mongol on 2010/03/12

Сүхбаатарын талбай дээр хэдэн жил дураараа дургиж төр засгийг шүүмжилсэн жагсаал цуглаанаар алдаршаад тэр чигээрээ УИХ руу дайрч орохыг хүссэн ч ялагдаад “сонгууль шударга бус болсон” гэж хашгичсаар баахан залуусыг турхирч үймээн самуун дэгдээсний улмаас МАХН-ын байр шатаж хэдэн хүний амь үрэгдсэний дараа шоронд суух болохоороо нөгөө үзэн ядаад байсан төр засгийн тэн хагас болох АН-ын өвөрт наалдан аврагдаж, дараа нь өршөөгдөнгүүтээ хуучнаа санагалзсан Магнай, Батзандан хоёр 2010 оны 3-р сарын 11-нд МҮЭ-үүдийн СТО-нд Эрх баригчдыг шүүх иргэний хөдөлгөөнүүдийн их хурал хэмээх заалны цуглааныг зохион байгуулж тэндээсээ миний барагцаалснаар хоёр зуугаад хүний жагсаалаар Энхтайвны өргөн чөлөөгөөр явсаар Төрийн ордныг нар буруу тойрон төмөр хашааны баруун хаалган дээр ирж Нямдорж, Ламбаа сайдуудыг огцор гэсэн шаардах бичиг гардуулаад тарсан байна.

Тэд хаягаа “андуурчээ”. Талбайн зүүн талд СТӨ ба Дуурийн театрын дунд хавчуулаастай АН-ын байранд очих байсан юм. Яагаад вэ гэвэл Магнай, Батзандан хоёр өөрсдөө төрийн эрхийг тэв тэнцүү барилцаж байгаа тул хариуцлагыг тэв тэнцүү хуваалцах ёстой АН-ын гишүүд учраас “намаа засаад төрөө засах” ёстойгоо “мэдээгүй шдээ”  болж жүжиглэв. Олигархуудаас цэвэрлэх гээд байгаа төрийн тэн хагас болсон намынхаа олигархуудыг харахлаараа нүдээ буруулан дальдчих атлаа (иймээс МАХН-ын олигархуудаас нэрлэж бас чадахгүй) гудамжинд гараад агсарч эхэлдэг юм байна.      

Тэд хаврын цэнгэг агаарт “Бидэнд амьсгалах агаар ч алга” уриан дор нийслэлийн төв гудамжаар ер бусын эрх жагслаа. Хэвлэл мэдээлэл метр болгоноор нь сурталчилж өгөв. Магнай, Батзандан нар нөгөө 5 хүний амийг нэхэх болов уу гэтэл үгүй аж. Ингэж “мартсаны” хариуд эрх баригчид ер бусын сайхан аашлан Энх тайвны өргөн чөлөө болон Сүхбаатарын талбай, Төрийн ордон тойрсон замуудыг хааж их хотын хөдөлгөөнийг гацаан машин тэрэгнүүдийг хажуугийн гудамжуудаар чихэлдүүлж мянга мянган хүнийг ажил албыг алдуулан үйлчилж өглөө. Нэг нь 7-р сарын 1-ны үймээн самууныг дэгдээсэн, нөгөө нь 5 хүнийг хөнөөсөн хоёр тал бие биенээ тун сайн ойлгожээ.

Жирийн иргэд л хохироод юмуу чирэгдээд үлдэх юм даа.

Read the rest of this entry »

Posted in МОНГОЛЫН АМЬДРАЛ, Улс төр, эдийн засаг | 2 Comments »

Оюутны байрны цонхоор …

Posted by Mongol on 2010/03/02

Боловсролын сайд оюутны кампусын гоё гоё макет зохиолгоод баахан шоудчихсан чинь барих газар нь олдохгүй хэцүүдэж байгаа бололтой. Газрын албаныхан оюутны нэрээр хотын захад баахан газар хямгадаж аваад сэмхэн зарчихсан гэнэ. Бас ШУТИС-ын удирдлага Баянголын аманд оюутны кампус барих хэдэн га-д аль эрт хаус маусаа шовойлгоод барчихжээ.

Гэхдээ оюутны амьдрал хотын төвд үргэлжилсээр. Өнөөдөр ШУТИС-ын оюутны нэгэн байрны цонхоор урьд урьдынхаас олон уут савнууд бөнжигнөлдөж харагдав. Цагаан сарын дараа аргагүй ээ.

Дараачийн зургуудаас ойртуулж хараарай.

Read the rest of this entry »

Posted in МОНГОЛЫН АМЬДРАЛ | 8 Comments »

Төрийн ордны арын цэцэрлэгийн дурсгалын зураг

Posted by Mongol on 2010/03/01

Төрийн ордны ар талд Парламентын шинэ ордон барих асуудал хэдийнэ шийдэгджээ. Хоёр намын хэрэгтэй хэрэггүй олон зөвшилцлийн ээлжит “үр дүн”. 

Ингээд Төрийн ордны араас залгаж хойшоогоо зам хүртэл үргэлжлэх 14 давхар аварга том Парламентын ордны хоёр хажуугийн зайг “ордны арын цэцэрлэг тэр чигээрээ үлдэнэ” хэмээн толгой эргүүлж байна. (Төрийн ордныг дундаас нь буулгаж тэр зайнд мод тариад “хэвээр үлдлээ” гэх юмсан).  Дараа нь харуул, хашлага, зогсоол, хөшөө энэ тэрээр дүүрч л таарна.  Хэдэн жилийн өмнө Төрийн ордны  эргэн тойрон ямар байгаад төмөр хэрмээр хүрээлэгдсэнийг санацгаая.

Уг нь одоогийн Төрийн ордонд эзэн Чингэсийн хөшөө, ёслол хүндэтгэлийн цогцолбороо бараадаад Улсын Их Хурал үлдвэл зүгээр юмсан.  Төрийн ордон нэртэй билээ. Харин Засгийн газрыг (яг үнэндээ Ерөнхий ба хоёр шадар сайд, Засгийн газрын хэрэг эрхлэх газрыг) эндээс нүүлгэж олон яамдууд руу нь дөхүүлбэл таарна. Тусад нь Засгийн газрын даруухан ордон бариад өгсөн ч яахав. Даанч хэдэн жилийн өмнө Сайраан гэж нөхөр монгол төрийн өмнөөс сүржигнэж Парламентын ордон (яагаад төрөх эмнэлэг, орон сууцны хороолол биш гэж?) босгох 12 сая долларыг гуйж олсноо өөрчилж чадахгүй нэрэлхээд, улмаар энэ хэдэн модыг дээрэлхэж байгаа хэрэг.   

Тэгэхээр энэ бол “Төрийн ордны арын цэцэрлэг”-ийн бараг сүүлчийн буюу дурсгалын зураг юм аа.

Posted in Улс төр, эдийн засаг | 5 Comments »

“Цагийн хүрд” чанарын шаардлага хангаж байна уу?

Posted by Mongol on 2010/02/20

Манай телевизүүд сайд, дарга, албан тушаалтнуудыг дагаж гүйсээр байгаад баримжаагаа алдаад байх шиг. Төрийн хоёр яам, агентлаг ийн хоёр дарга бие биендээ албан ёсны найрсаг айлчал хийж хамтран ажиллах гэрээ хэлэлцээрт гарын үсэг зураад зогсохгүй заавал телевиз дуудаж тэр оройжин бүх сувгаар нэгэн зэрэг гарах нь хавтгайрчээ.  Зөвхөн МҮОНТ-ийн “Цагийн хүрд”-ээс авсан ганц нэг жишээ:

… Боловсрол, соёл, шинжлэх ухааны сайд Ё.Отгонбаяр, Нийслэлийн Засаг дарга Г.Мөнхбаяртай хамтран ажиллах гэрээнд гарыг үсэг зурав… Нийслэлийн Засаг дарга Г.Мөнхбаяр харьяа байгууллагуудын дарга нартай бүтээгдэхүүн нийлүүлэх гэрээ байгуулав … УИХ-ын тамгын газар, МУИС-ийн Хууль зүйн сургуулийн хооронд хамтран ажиллах гэрээ байгуулав…

Бие биерүүгээ утастаад (яах гэж төрийн тусдаа холбоо байдаг, яах гэж утас өгч зардлыг даадаг байна аа?) ажлаа зөвлөлдөх, эсвэл уулзаад (ихэнх яам, хотын захиргаа хэдхэн байшингийн зайтай) хуралдахыг хэн ч буруутгахгүй, гэхдээ үүнд телевиз дуудаж сүржигнэх ямар хэрэг байна аа? Яагаад телевизүүд яам, тамгын газарт болсон хурал семинар, уулзалт яриа бүрийг сурвалжилсаар байгаад сургачихаж. Сүүлдээ зөвхөн телевизээр гарахын тулд энэ мэт ёслол үйлддэг болж байх шиг.

Өчигдөр үдэш МҮОНТ-ийн “Цагийн хүрд” болон бусад мэдээгээр Улсын Их Хурлын тамгын газар, ШУА-тай хамтын ажиллагааны гэрээнд гарын үсэг зурсан сурвалжлагыг хэдэнтээ давтан үзүүлэв. Бас болоогүй, араас нь УИХ-ын тамгын газрын ерөнхий нарийн бичгийн дарга Ц. Шаравдоржийг “Цагийн хүрд”-дээ урьж яриуллаа. Дэлгэцийн доогуур “Өнөөдрийн сэдэв: УИХ-аар хэлэлцэх хуулиуд чанарын шаардлага хангадаг уу?” гэсэн сүрхий асуулт тавьсан ч цаадах нь УИХ-ын тамгын газраас ШУА, Хууль зүйн сургууль, бас Ажил олгогч эздийн нэгдсэн холбоотой гарын үсэг зурах зэргээр “асар их ачаалалтай ажиллаж байгаа”, бас УИХ-ын хэвлэл мэдээллийн алба тусдаа вэб сайттай болсон зэргийг тоочлоо. Энэ хооронд хөтлөгч маань хуулийн чанарыг бүрмөсөн огоорч Төрийн ордны арын цэцэрлэгт парламентын ордон барих асуудлыг тойрсон маргааны тухай бөв бөөрөнхий асуулт дэвсэж өглөө.

Ц.Шаравдорж хэдийгээр УИХ-ын гишүүн байсан ч одоо биш, УИХ-ын гишүүдэд үйлчлэх ёстой УИХ-ын тамгын газрын ерөнхий нарийн бичгийн дарга гэдгээ бүрэн умартаж өөрөөс нь ялгаатай нь яг одоо жинхэнэ байгаа хэсэг гишүүдийг сургаж өглөө:

… Төрийн ордны ард талын цэцэрлэгийн 80 хувь үлдэнэ… Парламентын ордон барих тухай УИХ-ын тогтоол 2006 онд гарсан. Зураг төсөл, байршлыг тогтоохыг үүрэг болгосон… Нэгэнт УИХ-аар шийдвэр гарсан бол тэр шийдвэрийг УИХ-ын гишүүд дагах ёстой. УИХ-ын шийдвэрийг шүүмжилж байгаа гишүүд ёс зүйн хувьд болохгүй байна гэсэн үг.

Жинхэнэ гишүүдийн эзгүйд экс гишүүн өөрөө тодорч байгаа бол нэг хэрэг. Гэхдээ “ёс зүйн хувьд болохгүй байгаа” гэгдсэн тэдгээр гишүүд Парламентын ордон барихыг бус, зөвхөн Төрийн ордны арын цэцэрлэгт босгохыг эсэргүүцсэн (УИХ-ын тогтоолд байршил заагаагүйг өөрөө хэлсэн) гэдгийг мэдэхийн дээдээр мэдэж байгаа мөртлөө орон даяар загнаад сууж байх юм. 

Парламентын ордон заавал Төрийн ордны ард байна гэсэн хууль байхгүй. Сүүлийн үед арилжааны телевизийн мэдээллийн хөтөлбөрүүд энэ асуудлаар иргэдийн саналыг сонсоход бүгд эсэргүүцэж харагддаг.  Тэгвэл олон нийтийн телевизийн “Цагийн хүрд” яав? Шаравдорж даргыг яриулаад гүйцээ.

Posted in + ТЕЛЕВИЗ, Монголын Үндэсний Олон Нийтийн Телевиз, Улс төр, эдийн засаг | Leave a Comment »

2010 оны 2-р сарын 1. 16 цаг 03 минут. Энх тайвны өргөн чөлөө

Posted by Mongol on 2010/02/02

Posted in МОНГОЛЫН АМЬДРАЛ | 2 Comments »

Цагаан утас: Цагаан балтай хамт

Posted by Mongol on 2010/02/02

“Хүн-утас”   цувралаа энэ удаад “Цагаан утас” гэж нэрлэлээ.  Улсын бүртгэлийн ерөнхий газрын гадна цагаан утаснаас гадна цагаан бал гүйлгээтэй байдаг аж. 

Posted in МОНГОЛЫН АМЬДРАЛ | 1 Comment »

“Та өөртөө итгэлтэй байна уу?”

Posted by Mongol on 2010/01/23

Манайхан Холливудын киногоор дамжуулан сурч түгээмэл хэрэглэх болсон “Та өөртөө итгэлтэй байна уу? асуулт энэ зурганд яг таарна. Торгоно шүү гэж айлгасан хүн маань өөртөө ийм итгэлгүй байхлаар хог хаялгүй яахав дээ…  Бас ь-г хаячихаж. Хог шиг.

Posted in МОНГОЛЫН АМЬДРАЛ | Leave a Comment »

Төмөр замын тулаан удахгүй үргэлжилнэ

Posted by Mongol on 2010/01/17

Ухаа худгаас Гашуун сухайтын боомт хүртэлх төмөр замыг тойрсон телевизийн захиалгат нэвтрүүлгийн тулаан оны өмнө ба хойно хоёр удаа оволзоод түр намжаад байна. Олигархуудын санаачлагыг овсгоотой зарим нь үргэлжлүүлэхээ зарлав.      

Posted in Улс төр, эдийн засаг | Leave a Comment »

МҮОНТ учрыг магадлав

Posted by Mongol on 2010/01/17

Төмөр замын асуудлаар дэлгэцэн дээр дэгдсэн тулаанд хэвлэл мэдээлэл бараг л хэлмэгдсэн тухай үг яриа цухалзаж “муусайн олигархууд сэтгүүлчдийг худалдаж авахаа зогсоох”-ыг шаардах болов. Сэтгүүлчдийн нэрийг барьж амжуулах юм аа. Үнэндээ олигархууд сэтгүүлчдийг биш эзэд, захирлуудыг худалдаж авсан бөгөөд цаадуул нь “бонус” болгож сэтгүүлчдийнхээ амыг таглан төмөр замын талаар зөвшөөрөлгүй  дуугарах, тэр тусмаа эрэн сурвалжлахыг зогсоож иж бүрэн үйлчилгээ үзүүлсэн юм. Зөвхөн “25-р суваг” телевизээр сэтгүүлч Пүрэвхүү УИХ-ын гишүүн Л.Гүндалай, ОУСХ-ийн дэд захирал Д.Шүрхүү, эмч Б.Болдсайхан, эдийн засагч Д.Жаргалсайхан нарыг авчирж  маргалдуулав. Гүндалайг үзэх урьдын адил зугаатай, гэвч бүгдээрээ хөндлөнгийн хүмүүс болохоор юу ч тодорсонгүй.

Ухаа худгийн эсрэг ба төлөө захиалгат хоёр нэвтрүүлгийг олон нийтийн телевиз үзүүлээгүй. Яаж тэсэв ээ гэж бодсон шүү! Магадгүй хашир телевиз жинхэнэ эздээс нь урьж байгаад даацтай хэлэлцүүлэх юм болов уу? Би дахиад хууртав.

Мягмар гаригийн оройн “Цагийн хүрд” мэдээллийн хөтөлбөр “Өнгөрсөн амралтын өдрүүдэд хэвлэл мэдээллээр Ухаа худаг – Гашуун сухайтын төмөр замын талаар нэвтрүүлэг явсан, бид учрыг магадлав” хэмээн ихэд намбатай эхэлсэн ч “Төмөр зам тавих зөвшөөрлийг ганцхан “Энержи Ресурс”-д Засгийн газраас олгосон юм биш” гээд өмнөөс нь барьцах маягаар “Монголын алт” (МАК) компанийн зөвлөх, БНМАУ-ын Сайд нарын Зөвлөлийн дарга асан Д.Содномоор урагш тавих шууд төмөр замыг нь хамгаалж яриулсан, бас эдгээр төмөр замууд хэзээ нэгэн цагт төрийн өмчид ирэх тул амар амгалан байцгаа хэмээн ухуулсан сурвалжлага толилуулав. “Монголын мэдээ” агентлаг өөрөө ч бэлтгээгүй, хэд хоногийн өмнө TV9, TV5 зэрэг сувгаар нэр, хаяггүй цацагдсан бүтээл тэр чигээрээ байлаа.

 Хэдэн минутын дараа эхэлсэн “Бизнес ньюс”-ыг эргүүлтэл Энержи ресурс”-ийн захирал Г.Батцэнгэл Ухаа худгаас төмөр зам  татах зөвшөөрөл авсан тухайгаа тайлбарлаж зогсов. Дээрх сурвалжлагын дэлгэрэнгүй хувилбар болж таарлаа.  Сэтгүүлч М.Оюунчимэг бүр хөөрчихсөн “зах зээл хөгжсөн оронд дэд бүтэц нь хувийн хэвшилд байдаг … Ухаа худгийн төмөр замыг хувийн хэвшил барих боловч ашиглах нь монгол улсын бүх иргэнд нээлттэй юм байна” гэсээр жигтэйхэн баяртай өндөрлөв.

Үүнээс үүдээд сонин зүйлийг олж мэдлээ. Олон нийтийн телевиз тэсээгүй юм байна. “Баялгийн хараал”-аар илчлэгдсэн “Нүүрсний зам” захиалгат нэвтрүүлэг 2009 оны 12-р сарын 29-ны үдэш МҮОНТ-ээр “Танин мэдэхүйн аялал” тодотголтойгоор гарчээ. Үүнийг сэтгүүлч Б.Эрдэнэсолонго Улаанбаатар Эрхүү – Владивосток – Находка – Тэньжин – Бугат – Улаанбаатар маршрутаар хийсэн аялал хэлбэрээр бэлтгэж хойшоогоо ОХУ-ын нутгаар Номхон далай хүрсэн төмөр замыг муулж “…. өргөн төмөр замын үе дуусч байгаа бололтой… Орос, Монгол зэрэг хэдхэн орон өргөн төмөр замтай үлдэж байна… Үлдсэн нь дэлхий нийтийн стандарт болсон нарийн төмөр замтай… Оросууд өөрийн төмөр замыг ажилтай болгох гэж монголын нүүрсийг тээвэрлэхийг хүсч байна…Тэд онгоцны буудалд намайг дарамталж 500 рубль авсан” гэх мэтээр оросуудаас юу ч үлдээсэнгүй. Үргэлжлэлийг бид “Баялгийг хараал”-аас мэдэж авсан билээ. Төгсгөлд нь “Эх санаа M.Boom, BK Consult Forshung компанийн захиалгаар Blue Bird Production (Israel) бүтээв” гэж бичсэн байх юм. Үндэстэн дамнасан нэвтрүүлэг мөн дөө.

Бас болоогүй. 2010.01.03-ны Даваа гаригт МҮОНТ-ийн мэдээгээр Тавантолгойн нүүрсийг тээвэрлэх төмөр замыг хаагуур тавих талаар УИХ-ын гишүүн Р.Раштай хийсэн ярилцлага гэнэт оржээ. Ухаа худаг – Гашуун сухайтын төмөр замыг тавихыг “Энержи ресурс”-д зөвшөөрсөн тогтоолд 2008 онд гарын үсгээ тавьсан  эрхэм өөрөө, нарийн төмөр замыг ямар нэгэн дамжлага сааталгүйгээр Хятад руу барих нь эдийн засгийн ач холбогдол ихтэй, Чойроор дамжуулж шилжүүлэн ачилт хийхэд үр ашиггүй гэх мэтээр ярьсан нь мэдээж. Аль чиглэлийг сонгохыг Үндэсний хөгжил, шинэтгэлийн хороо гэдэг судалгааны байгууллагын дүгнэлтийг үндэслэн шийдвэрлэх хэрэгтэй гэж тэр үздэг гэнэ. Тэгвэл ҮХШХ-ны дарга нь ямар байр суурьтайгаа “Баялгын хараал”-ын эсрэг захиалгат нэвтрүүлгээр зарласан билээ.

Ухаа худгийн төмөр замын асуудлаар олон нийтийн телевиз зөвхөн “Энержи ресурс”-ын амыг харж сурталчилгааг  нь сэм сэмхэн (бараг хулгайгаар гэсэн үг) хийж өгдөг нь дахин нотлогдов. “Энержи ресурс”-ийн цөм болсон MCS яагаад өөрийн хэвлэл мэдээллийн хэрэгсэлгүй байдаг вэ гэвэл дурын хэвлэл мэдээллийг, тэгэхдээ МҮОНТ-ийг хамгийн түрүүнд худалдаад авч болдог учраас тэр гэж бодсон шүү.

Posted in + ТЕЛЕВИЗ, Монголын Үндэсний Олон Нийтийн Телевиз, Улс төр, эдийн засаг | Leave a Comment »

Хүн-утас: 23 хэмийн хүйтэнд …

Posted by Mongol on 2010/01/16

Read the rest of this entry »

Posted in МОНГОЛЫН АМЬДРАЛ | 2 Comments »

Амралтын өдрийн “агаарын” тулаан

Posted by Mongol on 2010/01/11

“Энержи ресурс”-ын Ухаа худгаас Хятадын хил рүү шууд татах төмөр замыг тойрсон “агаарын” тулаан амралтын хоёр өдөр телевизээр дэгдээд намждаг уламжлал тогтож мэдэхээр боллоо.

Эсэргүүцэгч тал өнгөрсөн Бямба гаригийн үдэш аль ч телевизийн хөтөлбөрт зарлагдаагүй “Баялгийн хараал” нэвтрүүлгийг ТМ, TV9, “25-р суваг”, Ням гаригт “Ийгл” өглөө ба орой хоёр удаа, бас TV9 телевизээр тус тус үзүүлж (суваг эргүүлэхэд тааралдсанаа дурдав. Бусад нь яасныг мэдэхгүй) гэнэтийн цохилт өглөө. Энэ удаад “Баян Монголын төлөө” хөдөлгөөн нэрээр Х.Билгүүн гэж нэрээ бичсэн залуу хөтлөв.

Дөчин минутийн туршид Ерөнхий сайд С.Баяр, УИХ-ын гишүүн С.Баярцогт, Д.Энхбат, Лу.Гантөмөр, Ж.Сүхбаатар, МУНН-ын дарга Батболд, Ноолуурын холбооны тэргүүн Н.Баатарсайхан, УИХ-ын гишүүн асан Б.Жаргалсайхан, ЗТБХЯ, Улаанбаатар төмөр замын албан тушаалтнууд, түүхч О.Батсайхан, улс төрийн тоймч Ц.Дашзэвэг, ММГШ хөдөлгөөний тэргүүн П.Болд, Ерөнхийлөгчийн зөвлөх Р.Бурмаа, эдийн засагч Д.Жаргалсайхан, геополитик судлаач О.Чулуунбилэг, Геологийн сайд асан Ч.Хурц, геологич Дүгэржав, жүжигчин Сосорбарам нарын яриа үзэгдэв. Ингэхдээ “Энержи ресурс”-ийн Ж.Оюунгэрэл, Ж.Оджаргал, П.Батсайхан, Г.Батцэнгэл нарын хэвлэлийн хурлыг үг, өгүүлбэрээр нь няцааж Хятадын эртний жанжин Сунцигийн номлолд үйлчилдэг уугуул ба суугуул урвагчид гэх мэтээр ниргэсэн ширүүн нэвтрүүлэг болжээ.

Миний сонирхлыг оны өмнөхөн телевизүүдээр цацсан “Нүүрсний зам” нэвтрүүлгийг илчилсэн хэсэг татлаа. Хэсгээс сийрүүлье:

… Саяхан уугуул, суугуул урваачдын оролцоо, захиалгаар нэгэн нэвтрүүлэг бэлтгэгдэн мөнгөөр зодон байж бүхий л сувгаар цацагдсан билээ. [Тэр нэвтрүүлгийн хэсэг. Сэтгүүлч: Үнэхээр аварга юм аа. Ёстой зууны бүтээн байгуулалт гэмээр Энэ том үйлдвэртэй нэгбүрчлэн танилцаад явах юм бол өдөртөө яваад барагдахгүй юм байна. Үнэхээр нүсэр байгууламж гэдэг нь мэдэгдэж байна даа…]

…. Бугат бол Хойт Хятадын эдийн засгийн онцгой объект бөгөөд энд гадаадын хүн сэлгүүцэх, зураг авахыг хатуу хориглодог. Гэтэл монголын нэг шальдир сурвалжлагч очоод дуртай газраа нэвтрээд хүссэн зургаа аваад явсныг юу гэж тайлбарлах вэ? Энэ бол хятадууд “Энержи ресурс”-д дээд зэргийн халамж үйлчилгээ үзүүлж хөхиүлэн дэмжиж байгаагийн тод илэрхийлэл. Энэ этгээдийн амнаас нэвтрүүлгийн туршид нэг л санаа улиг болтол давтагдлаа. Хятадуудад хямдхан, хурдханаар, ахиухнаар түүхий нүүрс хүргэж өгөх юмсан.. Худалдагдсан этгээдүүд монголоо үхэр тэргээр зүйрлэн доромжилж хятадын сансрын пуужинтай адилтган бахадсаар нэвтрүүлгээ жаргааж байх юм… Уг нэвтрүүлгийн хөтлөгч Сайншандын үйлдвэрийн цогцолборт огтхон ч санаа зовохгүй байгаа хэрнээ хятадын үйлдвэрүүдийн үйл ажиллагааг доголдох вий, тэдэнд нийлүүлэх монголын түүхий эдийн үнэ өсчих вий гэж ихэд зовниж байлааа. Монголд боловсруулах үйлдвэр хөгжөөсэй гэж ерөөчихөж чадахгүй хэрнээ харийн үйлдвэрийн чадлыг бахдаж гайхан биширч бусдыг өөр шигээ сөгдөн мөргөхийг албадагч энэ эрийн судсаар монгол цус гүйж байгаа болов уу? Хэдэн жилийн өмнө шар хэвлэлүүдэд хов жив, садар самуун мэдээ нийлүүлж явсан энэ эр одоо хятадын үйлдвэрүүдийн хувь тавиланд юунаас ч илүү санаа зовж явахын учир юм билээ. Ойлгомжтой. Мөнгө.

Уугуул, суугуулуудад урдаас хаяж өгсөн асар их мөнгөнд цатгалдагсад түүнийг хөлслөн турхирч байна. Нэгээн уугуул саяхан саяхан тэрбум төгрөгөөр испани зураачийн зургийг худалдан авснаа сайрхан ярилцлага өгчээ. Хэний баялгаар, хэний хүчээр… 250 мянган хүний сарын цалингаар ганц зураг авч баярхаж сагах хүртлээ тэнэглэсэн монголын олигархууд эхнэртээ 15 мянган доллараар цүнх авч өгч үнэтэй костюм гучийг шкафандаа овоолох мөнгийг ядуу монголчууд л төлдөг юм. Олигархуудын найруулсан архи, оросоос зөөж нугалан шахдаг бензиныг монголчууд л хөлсөөрөө, хөдөлмөрөөрөө төлж амьдралаа нулимм, архи, согтуурал, мансуурал, зовлон гуниг дунд өнгөрүүлж байгаа монголчууд тэднийг тэтгэдэг юм…

Энд балбуулж байгаа сэтгүүлчийн нэрийг Эрдэнэ ……… гэдэг шиг санана. Захиалгат нэвтрүүлэг захиалгат нэвтрүүлгээ, захиалгат сэтгүүлч захиалгат сэтгүүлчээ илчилдэг цаг ирэв бололтой. Огт илчилдэггүй байсныг бодоход том дэвшил!

Бас ноцтой баримтаар “Энержи ресурс”-ийг илчилсэн байна. Ухаа худаг – Гашуун сухайтын төмөр зам тавих зөвшөөрөл олгосон заалт нь Үндэсний аюулгүй байдлын зөвлөлийн зөвлөмж, Монгол улсын зургаан хуулийн 11 заалтыг зөрчсөн, бусад төмөр замыг 51 хувийг төрийн мэдэлд авах болзолтойгоор зөвшөөрсөн бол “Энержи ресурс-ийн тухайд ийм заалтыг санаатайгаар орхигдуулжээ.

Одоо “Энержи ресурс”-ийн ээлж. Тэд гэнэдсэн боловч түргэн авч Ням гаригийн үдэш гэхэд хариу барилаа. Сэтгүүлчид, телевизүүд бэлэн байжээ. Нэвтрүүлгийн нэр харагдсангүй. “Энержи ресурс” компанийн гүйцэтгэх захирал Г.Батцэнгэлийн мэдэгдлээр эхэлж “Энэ амралтын өдрүүдэд “Энержи ресурс” компанийн хэрэгжүүлж байгаа төмөр замын төслийн эсрэг захиалгат нэвтрүүлэг телевизүүдээр цацагдлаа… Тусгай зөвшөөрлийг холбогдох хууль журмын дагуу авсан… Бид Сайншандын төслийг хэзээ ч үгүйсгэж байгаагүй…

Ингээд араас нь баахан хүмүүсийн яриаг хөврүүлж өчигдрийн дайралтанд зүтгэсэн хүмүүстэй эчнээгээр тулалдуулав. “Монголчууд замын дөтийг хардаг” хэмээн гоё хэлсэн Бавуугийн Лхагвасүрэнгийн араас УИХ-ын гишүүн Д.Энхбат гарч өчигдрийн нэвтрүүлэгт гарсан өөртэйгээ үзэлцэх мэт харагдсан ч түүний болон МЭТНХ-ны ерөнхийлөгч Д.Цахилгаан, УИХ-ын гишүүн асан Л.Одончимэг нарын ярианаас “зөв зүйтэй” үг өгүүлбэрийг тасалж авсан байх. Нүүрсний ассоциацийн гүйцэтгэх захирал Т.Наран, эдийн Ерөнхий сайдын эдийн засгийн зөвлөх, Хас банкны Ч.Ганхуяг, Улаанбаатар төмөр замын газрын орлогч дарга Ё.Батсайхан нар ерөнхийдүү дуугарсан бол Гадаад хэргийн сайд асан Ц.Гомбосүрэн: Төмөр зам шууд урагшаа гарвал ямар ч төмөр замын царигийг солихгүй амар…, Үндэсний хөгжил, шинэтгэлийн хорооны дарга Ч.Хашчулуун: Оросын төмөр замаар тээх шаардлага байхгүй… УИХ-ын гишүүн С.Оюун: Намайг Засгийн газрын гишүүн байхад энэ зөвшөөрлийг өгсөн. Одоо ч гэсэн зөв гэж бодож байна….УИХ-ын гишүүн З.Алтай: Тавантолгойгоос урагшаа Нарийн сухайт руу 260 км төмөр замыг тавих нь зөв. Тэд чинь боловсруулах үйлдвэр барина гээд төслөө боловсруулсан байна… доктор С.Авирмэд: Урагш тавих төмөр замыг улайран эсэргүүцэж болохгүй…, Эдийн засагч Н.Дашзэвэг: Баттулга сайд нарийн төмөр замаар зөвхөн ачаа тээнэ гэсэн шийдвэр гаргачихвал нэг ч хүн тээхгүй шүү дээ… гэхчлэн ямар ч эргэлзээгүй дэмжлээ. Засгийн газрын дээрх тогтоолд Ерөнхий сайд асан С.Баярын хамт гарын үсгээ зурсан УИХ-ын гишүүн, Зам тээврийн сайд байсан Р.Раш Ухаа худгаар тавих замыг цээжээрээ хамгаалж ярьсан нь мэдээж.

Хариу нэвтрүүлгийг үзүүлсэн телевиз гэвэл TM, TV5 (хоёр удаа, “төлбөртэй” гэсэн тайлбаргүйгээр), TV9, TV8, “25-р суваг”, “Ийгл” юм.

Манай арилжааны телевизүүдийн хөтөлбөрийг Бямба, Нямд ч хамаагүй зоргоороо өөрчлүүлж хүссэн нэвтрүүлгээ дуртай цаг, минутанд шургуулж чаддаг хүч бол зүгээр л мөнгө юм. Тэр мөнгийг төр, улс төрийн нам, олигарх, компани, нэр дэвшигч, луйварчин, хятад, орос, америк хэн сарвайх нь мөнгө хураагч эздэд огт падгүй. Иймээс энэ удаад хоёр талд зэрэг ажиллаж олон ургальч үзлийн “үлгэр жишээ”-г үзүүлсэн хэрэг. Зөвхөн үүгээр зогсдог бол бас яахав. Мөнгөний “ачаар” улс орны хувь заяатай холбоотой чухал чухал асуудлаар жижиг мэдээ, сурвалжлагыг эс тооцвол маргаан, хэлэлцүүлэг телевизээс алга болжээ. Эрэн сурвалжлага ор тас мартагдсан. Сэтгүүл зүйн зарчмууд ингэж ууршсаар одоо голдуу сувгаа зардаг ажилтай болцгоожээ.

Тулаан газарт, тэнгэрт, тэнгист үргэлжилнэ гэдэг шиг араас нь сонинууд, бас сайтууд залгаж авах нь лавтай.

Posted in + ТЕЛЕВИЗ, Улс төр, эдийн засаг | 8 Comments »

Тэд Шангри-Ла-г чадсан…

Posted by Mongol on 2009/12/03

Телевизээр гэнэт сайн гүвүүлсэн “Энержи ресурс” компани өнгөрсөн ням гаригт “цаашид энэ мэт хар пиарын материал ямар нэг хэвлэлээр гарвал бид захиалагчийг олон нийтэд ил тод зарлаж гар хөл бологчдийг нь хуулийн байгууллагад шалгуулж нэр төрөө сэргээлгэх болно” хэмээн том дуугаар мэдэгдсэн ч хэлсэндээ хүрсэнгүй. Даваа гаригт “Өнөөдөр” зэрэг сонинууд палийтал хэвлэж орхисон ч дуугараагүй. Х.Баттулгын нэрийг зарлана, шүүхдэнэ гэхлээр “Үндэсний үйлдвэржилтийг мөхөөх өмнөдийн бодлого”-д “Энержи ресурс”-ийг элдэв үгээр дуудсанаас биш Үндэсний аюулгүй байдлын зөвлөлийн тогтоолоос эхлээд гарцаагүй баримтаар нотолсон байдаг…

Гэхдээ “Энержи ресурс” хариултаа хэдийнэ бодчихсон, угтуулаад нэг, хоёр ба дөрөвдэх засаглалыг Утаа худагтаа дуудаж аваачаад сэнхрүүлж өгчээ. Урьдын явдлаа олонд сануулахаас эмээж Дундговь хавиар эргэлдээд буцсан “Энержи ресурс”-ийн анхдагч, одоо Монгол улсын Ерөнхий сайд Сү.Батболдын оронд очсон тэргүүн шадар сайд Н.Алтанхуяг “ашигт малтмалыг боловсруулах нь чухал” гэж сөрөг санаатай өгүүлбэрээр бөөрөнхийлснийг эс тооцвол УИХ-ын гишүүд (Х.Бадамсүрэн, Д.Баярсайхан) болон “Энержи ресурс”-ийнхний амнаас гарсан “урд хилийг бушуухан цоолж төмөр зам тавихгүй бол сүйрлээ, хятадуудаас ичиж байна” гэсэн ухуулга дараачийн хоёр өдөр бүх телевизээр гарч нөгөө “гүтгэлэг”-ийг булж орхив.

Ухаа худаг-улсын хилийн төмөр замыг “Энержи ресурс” тавьж л таарна. Үүсгэн зохион байгуулагч нь одоо Үндэсний аюулгүй байдлын зөвлөлийн гишүүн бөгөөд Засгийн газрын тэргүүн! Харин олон нийтийн санаа бодлыг яаж эргүүлэх вэ?

Хэдхэн жилийн өмнө Сүхбаатарын талбайн зүүн урд зам дээр “Шангри-Ла” зочид буудлын барилга босгохыг бүгд эсэргүүцэхэд “Энержи ресурс”-ийн гол компани – MCS яасан билээ? Телевиз, сонин болгоноос сэтгүүлчдийг цуглуулж Хонконгт хэдэн ээлжээр айлчлуулан Шангри-Ла буудалд хонуулж авчраад “Бид ямар азтай улс вэ? Улаанбаатар маань “тэнгэрийн диваажин” (орчуулбал ийм утгатай гэнэ)-тай болно” гэсэн нийтлэл, нэвтрүүлгээр бөмбөгдүүлэхэд бүгд нам гүм болж … тэнд MCS-ийн офис сүндэрлэсэн билээ.

P.S: Сүүлийн үед зарим телевизийн хөтөлбөрт “Нүүрсний замын тэмдэглэл” нэртэй цуврал нэвтрүүлгийн нэр бичигдсэн харагдана. Сонирхвоос, “Энержи ресурс”-ийн төмөр замын магтуу ажгуу.

Posted in Улс төр, эдийн засаг | 1 Comment »

Торны цаадах Интернэт

Posted by Mongol on 2009/11/24

Би эхлээд нүдэндээ итгэсэнгүй. Ямар Куба, Хойт Солонгос биш дээ.

МУИС-ийн 2-р байрны 3-р давхарт оюутнууд торны цаанаас Интернэтэд орж байх юм Энд хувилж олшруулах үйлчилгээ явуулдаг цэгийн эзэд оюутнуудыг төдийлөн таашаадаггүй мэт санагдлаа. Өөрсдөө байшин дотор байшин буюу ТҮЦ барьж суурьшаад зөвхөн жижигхэн цонхоор харьцдаг төдийгүй борлуулдаг номнуудаа шилний цаанаас, харин Интернэтийг давхар торны цаанаас үзүүлэн орлого олж чаддаг аж. Ёстой нөгөө “Шилний цаанаас  долоолгов”.

Компьютер болгоны дээр “Хулгайчаас эд зүйлсээ болгоомжил!” хэмээн  дурайлгажээ. Монгол Улсын Их Сургуулийн оюутнуудын халаас цүнхэнд санаа тавихаас өөр санаа зовох юм байна шүү!

Оюутнуудын хувьд компьютерийн урд суух мэтийн “хэт тансаг” юм бодолтгүй. Интернэтээс татаж авсан файлаа флашанд хуулж авмаар санагдаж жижиг цонх руу аймшиггүйгээр очиж шагайвал компьютерийн ханиад томуу яриад буцаах биз. Иймээс компьютерийн хулгана, гар хоёрыг нүхээр шургуулан хэрэглүүлж байгаа нь их юм гэж бодохоос.   

Read the rest of this entry »

Posted in ИНТЕРНЭТ, ХАРИЛЦАА ХОЛБОО, МОНГОЛЫН АМЬДРАЛ | 19 Comments »

Отгонбаяр сайдын телечадавхи

Posted by Mongol on 2009/11/22

Монголын бүх телевиз, радио, сониныг зэрэгцүүлэн эзэмддэг эрхмийг танилцуулья. Нэр нь Ё.Отгонбаяр. Үндсэн ажил нь Боловсрол, соёл, шинжлэх ухааны сайд.

Зөвхөн сүүлийн хэдхэн сард МҮОНТ-ээр түүний “тоглосон” ямар ямар мэдээ, сурвалжлагууд үзсэнээ эргэн санахыг оролдьё. Лхагва гариг бүрийн Засгийн газрын хуралдааны дараа өөрийн салбарын хэлэлцсэн асуудлыг сэтгүүлчдэд танилцуулах, түүнийгээ “Нээлттэй засаг”-аар гүйцээж ярих, их, дээд, дунд, бага сургуулийн хичээлийн жилийн нээлт, сургууль цэцэрлэгийн барилга ашиглалтанд оруулах ёслол дээр үг хэлж харагдах нь зөвхөн бие халаалт байжээ.

Ялангуяа сургууль, боловсролын үйл явдал болгон заавал бүх зурагтаар гардаг, тэр болгонд Отгонбаяр сайд заавал ярилцлага өгдөг заншил тогтоод удлаа. АНУ-ын боловсролын байгууллагатай хамтран ажиллах гэрээнд гарын үсэг зурсан, “Орчлон” сургуулийн сурагчид олон улсын ерөнхий боловсролын үнэмлэхээ хүлээн авсан ёслол, Солонгост болсон урлагийн наадмаас медаль авсан хүүхдүүдэд баяр хүргэсэн, сүүлдээ БСШУЯ ба ЭМЯ хамтран ажиллах (гайхалтай!) гэрээнд гарын үсэг зурсан тухай сурвалжлагууд гарч бүгдээрээ Отгонбаярын яриагаар өндөрлөж байлаа. Төрийн хоёр яам энэ мэт ажлаа телевизгүйгээр, ерөөсөө гэрээгүйгээр, утсаар тохироод хийж чадахгүй юу? Нэг мэдэхэд БСШУЯ-наас ЭМЯ-нд явуулах албан бичигт Отгонбаяр сайд гарын үсэг зурсан тухай сурвалжлага “Цагийн хүрд”-ээр цацагдаж Отгонбаяр сайд тэр бичгийнхээ ач холбогдлыг тайлбарлаж зогсохнээ.

Алс холын Энэтхэгээс хүртэл монголын телевизийн дэлгэцийг эзэгнэсэн гээч. Ерөнхийлөгч Элбэгдорж Энэтхэгт хийсэн албан ёсны айлчлалын сурвалжлагуудын дундуур Ерөнхийлөгчөөс дутуугүй харагдаж ярьсан хүн бол Отгонбаяр.

Гай болж гахайн ханиад дэлгэрэв. Засгийн газрын хуралдаанаар сурагчдын амралтыг наашлуулсан, сунгасан, дуусгахаар шийдсэнийг зөвхөн Отгонбаяр дамжуулж, телехичээлийг Отгонбаяр эхлүүлж, ийм хичээлийг “Боловсрол суваг” телевизийнхэн бэлтгэж бусад телевизээр гаргадгийг Отгонбаяр ойлгуулж, цааш үргэлжлэх эсэхийг зөвхөн Отгонбаяр зарлав. Бусад өдрүүдэд телехичээлийн явцтай Отгонбаяр сайд танилцсан тухай сурвалжлагууд үргэлжилж, Отгонбаяр сайд юу үзсэн талаар Отгонбаяр сайд өөрөө танилцуулж зогссон. Ашгүй хичээл эхэлж телехичээл мэдээний сэдэв биш болохоос өмнө амжиж хичээлүүдийг CD-нд бичүүлэн тараах ёслолын ажиллагааг яаман дээрээ зохион байгуулж бүх телевизээр дахиад нэг гарч CD-ны ач холбогдлыг ярьж билээ.

Бас болоогүй. Отгонбаяр сайд оюутнуудад амны хаалт гардуулсан, Отгонбаяр сайд Т.Ганди сайдын хамт оюутнуудад аарц, чацарганыг улаан гараараа тараасныхаа боловсролын болоод анагаах ухааны гүн гүнзгий утга учрыг зөвхөн Отгонбаяр сайд өөрийн дуу хоолойгоор тайлбарлаж байж санаа амрав.

Өнгөрсөн долоо хоногт Олон улсын оюутны өдөр тохиоход “Цагийн хүрд”-ээр бас л Отгонбаяр сайд гэгээн дүрээрээ мэндчилгээ дэвшүүлж тэр өдөртөө амсхийх шиг санагдсан ч хэдхэн минутын дараа МҮОНТ-ийн сурталчилгааны клипэнд тоглоод дахин гарч харагдах юм. Ийнхүү боловсрол, соёл, шинжлэх ухааны салбарт багтдаг хагас сая гаруй сурагч, оюутан, багш, эрдэмтэн, театр, урлагынхан, тэдний бүх ажил, амьдрал Отгонбаяр сайдын зурагтаар гардаг фон болж хувираад байна.

Хүйтны эрч чангарсан сүүлийн гурав хоногт Отгонбаярын сайдын телечадавхи дагаад чангарлаа.

19-ны Пүрэв гаригийн үдэш НТВ-ийн “Чухал яриа”-гаар БСШУ-ны сайд Ё.Отгонбаяр

20-ны Баасан гаригийн орой TV5 телевизийн “Монгол орноо хөгжүүлье” хөтөлбөрөөр БСШУ-ны сайд Ё.Отгонбаяр.

21-ны Бямба гаригийн өглөө МҮОНТ-ийн “Ярилцъя…” нэвтрүүлгээр БСШУ-ны сайд Ё.Отгонбаяр (Саяхан шинэ ерөнхий сайд Сү.Батболд “боловсрол – тэргүүлэх салбар” гээд хэлчихснийг хоёр талаасаа ийнхүү “баярлан угтав”. Тэгэж яривал эзэн Чингэсээс эхлээд Сүхбаатар, Цэдэнбал бүгдээрээ эрдэм мэдлэгийг дээдэлдэг байсан, энэ утгаараа лав 800 жилийн өмнөөс тэргүүлэх салбар)

P.S:

Өнөөдөр амралтын өдөр МҮОНТ-ийн мэдээг санаандгүй үзтэл нөгөө Ё.Отгонбаяр сайд костюм пиджакаа ч тайлах завгүй “Бид сургуулиудад бүтэн сар хэрэглэх “Санитол” олгосон байгаа… ” хэмээн ярьж зогсоно. Хэзээ амардаг юм болдоо, хөөрхий. Ариутгалын “Санитол”-ыг хүртэл зүгээр өнгөрөөхгүй юм.

Posted in Монголын Үндэсний Олон Нийтийн Телевиз, Улс төр, эдийн засаг | 9 Comments »

2012 он хүртэл …

Posted by Mongol on 2009/11/10

Сүүлийн өдрүүдэд УИХ-ын чуулганы хуралдаанууд дээр байн байн түгшүүртэйгээр дурдах болсон 2012 оноос өмнө амжиж ноднингийн сонгуулиар “сайхан хуурсан” сонгогчдынхоо амыг мөнгөөр таглахгүй бол эрхэм гишүүдийн хувьд “ертөнцийн төгсгөл” ирнэ. Лав МАХН-ынхан үүнийг эртхэн ухаарч нийслэлийн намын хороогоо ийн чимэглэсэн ч юм билүү, хэн мэдлээ.  [Тэр орхимжтой, нүүрээ буруулсан нөхөр хэн бол?]

Үнэндээ анхааруулах зүйл олон бий. “1,5 саяыгаа гар зүсэм 20 мянгатын дэвсгэртээр тоолж авна (1.500.000 төг : 20.000 төг = 75 ширхэг юм байна!) гэдгээ анхааруулахгүй бол цэнхэр, ягаан тасалбар шиг юмаар зальдаж мэднэ. Бас одоо төсөв мөнгө хэлэлцэж байх үеэр дуу шуу муудсан Ерөнхийлөгч Ц.Элбэгдоржид ч гэсэн 2,5 саяыг нь (1,5 сая + 1 сая) анхааруулахад гэмгүй. Энэ тохиолдолд хүн бүрт 2.500.000 төг : 20.000 төг = 125 ширхэг  буюу овоохон боодол мөнгө ногдоно. Нийтдээ ийм 2,7 сая боодол мөнгө хэрэгтэй гэсэн үг. 

2012MAHN

Posted in Улс төр, эдийн засаг | 7 Comments »

Хүн-утас: “Мобиком”-ын дэргэд

Posted by Mongol on 2009/11/07

Энэ бол “Тэди” төвийн өөдөөс хараад өглөөнөөс орой болтол яриулдаг, суурин шахуу болсон цагаан утасны цэг. “Мобиком”-ын орлогоос дусал дуслаар хумслаад байгаа мэт харагдавч тэр дуслын хагас нь буцаад “Мобиком”-д орно. Утас нь “Мобиком”-ынх.  

Hun Utas

Read the rest of this entry »

Posted in МОНГОЛЫН АМЬДРАЛ | 3 Comments »

Хүн-утас: хоёулаа

Posted by Mongol on 2009/11/03

Америкийн автомашины General Motors, Crysler, Ford мэтийн аваргууд Детройт хотноо төвлөрдөг юм гэсэн. Улаанбаатарын жижиг худалдаачид Нарантуулд захад шавааралдаж, эмийн бөөний төвүүд 50 мянгатад, барилгын материалын дэлгүүрүүд Зуун айлд, автомашины засварууд Их тойруугийн дагуу жагсаж, нүдний шилний газрууд Урт цагааныг барааддаг нь тус тусдаа учиртай байж таарна.  

Гар утасны бяцхан цэг ажиллуулдаг энэ хоёр эмэгтэй өрсөлдөгч мөртлөө хоёр тийшээ тарж биш  зэрэгцэж суусан нь олон шалтгаантай биз. Тэдгээрийн нэгийг би анзаарлаа: утсаар яриулах зав чөлөөндөө энэ тэрийг хөөрөлдөнө.

P1030099

Posted in МОНГОЛЫН АМЬДРАЛ | Leave a Comment »

Хүн-утас: Хэн ч танихгүй

Posted by Mongol on 2009/10/30

Хэд хоногийн өмнө Улаанбаатарын гудамжинд цагаан утсаар үйлчилдэг хүмүүсийн зургийг цуврал болгон нийтэлж эхэлсэн чинь нэгэн уншигч “хүний зургийг зөвшөөрөлгүй авч тавьдаг ёс зүйгүй” хэмээн намайг ичээсэн байна. Харин тийм учраас нүүрийг эгц харуулахгүй, эсвэл холоос  авсан санаатай юм аа. Бид ийм мэдрэмжтэй бол сайн хэрэг, гэхдээ зураг дарахын тулд дуранд өртөж мэдэх 10, 20, 30 … хүн тус бүртэй хэлэлцээр хийж эхэлбэл дэндэнэ ээ.  (Манай нэг хуулинд тиймэрхүү, гэхдээ хэрэгждэггүй заалт бий байх шүү).

Нэг талаас, гудамжинд гарч үйлчилгээ эрхэлнэ гэдэг бол нээлттэй хүн болно гэсэн үг. Ичих  юм байхгүй. Бусдын хүч, хөдөлмөрөөр амьдрахаас хавьгүй илүү нэр төртэй.  Харин соёлтой, цэвэрхэн … гээд  шаардлагууд тавигдах учиртай. Үнэндээ хөдөлгөөнт үйлчилгээний цэг юм шүү. Тэдэнд зориулсан хөнгөхөн тавиур, сандал байж яагаад болохгүй гэж? Гадаадын жуулчдын сонирхлыг татдаг юмны нэг “хүн-утас” байх шүү.

Нөгөө талаас, ялангуяа эмэгтэйчүүд нүүрээ нуусхийж суудаг болохыг анзаарсан.

Ингээд дахиад нэг зургийг нийтлээд үзье. Дээрх шүүмжлэлийг хүлээн авч энэ эмэгтэйн нүүрийг огт харагдуулаагүй шүү. (Харин түүнээс тамхи, бохь авч зогссон хэсэг оюутан хэлмэгдчих шиг боллоо. Би тэднээс мэдээж зөвшөөөрөл аваагүй. Яах ёстой байснаа сайн мэдэхгүй л байна)  

Hun-utas111

Posted in МОНГОЛЫН АМЬДРАЛ | 4 Comments »

Утсаа аваач ээ…

Posted by Mongol on 2009/10/29

1980-аад оны дундуур Иран-Иракийн дайны ээлжит тулалдаанд алагдсан иран цэргийн бугуйнд байсан электрон цаг хэдэн сарын дараа ч зогсолгүй эзэндээ дохиолсоор байгааг барууны нэгэн сурвалжлагч бичсэнийг гэнэт саналаа. 

2009 оны 10-р сарын 27-ны өдөр нийслэлийн 4-р цахилгаан станцын зүүн зам дээр “Анод” банкны буюу тус банкны лизингтэй “Хюндэй” маркийн 95-34 УББ улсын дугаартай авто машины бензин дуусч улмаар жолооч О нь тээврийн хэрэгсэлээ зорчих хэсгийн нэгдүгээр эгнээнд зогсоож банкандаа савнаас бензин хийж байханд нь араас ирж явсан Апекс грүпийн 43-13 УБЗ улсын дугаартай “Хюндэй” маркийн хүнд даацын авто машин дайрч амь насыг нь хохироосон тухай сурвалжлагыг TV9 телевиз үзүүлэв. Дайрсан жолооч (хагас ухаантай явж харагдав) хурд хэтрүүлсэн, харин амиа алдсан жолооч ослын зогсолтын тэмдэг тавиагүй буруутай гэнэ.

Нэгэнт өнгөрчээ. Харин сэтгүүлч сурвалжлагынхаа төгсгөлд “цогцсыг бүтээсэн байхад халаасан дахь гар утас нь тасралтгүй дуугарсаар байлаа” гээд “утсаа аваач ээ” хэмээн нэхэх мэт жингэнэх тэр аяыг сонсгоход өнчирч хоцорсноо хараахан мэдээгүй ар гэрийнхэн нь нүдэнд харагдах шиг болов.

Хэлэх үг алга аа.

Posted in МОНГОЛЫН АМЬДРАЛ, TV9 телевиз | 5 Comments »

Хүн-утас (цуврал)

Posted by Mongol on 2009/10/25

Улаанбаатарын гудамжаар нааш цааш явж, эсэхүл хаа нэгтээ сууж үйлчилдэг цагаан утастай хүмүүсийг дүр зураг надад сонин санагддаг. Иймээс тааралдахаараа хааяа зургийг нь дардаг юм.

Харилцаа холбооны хамгийн шинэ технологи CDMA, GSM-ийг ашигладаг, тэгсэн мөртлөө биеийн  хөдөлмөр, дээрээс нь аливаа бизнест хамгийн чухал гурван зүйл – нэгдүгээрт, байрлал, хоёрдугаарт, байрлал, гуравдугаарт байрлал гэдгийг дээд зэргээр мэддэг хүмүүсийн эрхэлдэг ер бусын үйлчилгээ.  Манайх шиг “сая хүнтэй” дэлхийн зиндааны хотуудад лав алхам тутамд байх учиртай таксофоныг тэд 99 хувь орлохоор барахгүй 100 хувь илүү.  Гараа даллахад хүрээд ирдэг, зам дээр гацчихсан машины цонхоор ороод ирдэг таксофон гэж та сонссон уу? 

Дутагдал нь гэвэл олон хүний ам хүрдэг тул цэрвэмээр. Эйч 1 Эйн 1-ийг сануулья.   

Хэдэн жилийн өмнө дангаараа явдаг жинхэнэ хүн-утаснууд зонхилж байсан бол өнөөдөр хаа нэгтээ сууж хажуугаараа өнгөрснийг яриулаад, тамхилаад (бүр асааж өгдөг!), аманд нь чихэр хүлхүүлж бохь зажлуулаад үддэг бяцхан үйлчилгээний цэгэрхүү утаснууд давамгайлах болжээ.

Хэзээ нэгэн цагт ийм хүн-утас үгүй болж зөвхөн зурган дээр үлдэх буйзаа. 

[Урьд нь авсан зургууд байх учиртай, дараа оруулья. Бас шинэ зураг оруулж байя. Иймээс “цуврал” гэв]  

P1010840

Read the rest of this entry »

Posted in МОНГОЛЫН АМЬДРАЛ | 6 Comments »

“Намайг барьж байгаарай…”

Posted by Mongol on 2009/10/25

УИХ-ын Чингэлтэй дүүрэг дэх 24-р тойргийн нөхөн сонгуулиар ялалт байгуулсан эрх баригч нам хууль зөрчсөнийг илчлээд зогсохгүй хариуцлага нэхэж сандаргах, магадгүй том хэрэг үүсгэх хөдөлшгүй баримт УИХ-ын гишүүн З.Алтайг ажилдаа ирэх замд нь өөрөө ороод ирэх нь тэр.

Шинээр сонгогдсон гишүүн Д.Зоригтыг тангараг өргүүлсэн нэгдсэн хуралдаан дээр түүний юу ярьсныг дор буулгав.

“Зоригт боловсролтой, чадалтай, намын залуу сайн кадр, цаашдаа төр түшилцээд явахад бүрэн боломжийн хүн гэж бодож байгаа. Аав ээжийг нь ч би сайн танина, монгол телевизэд бид бас хамт олон жил ажиллаж байсан аятайхан улсууд байдаг гэж бодож байгаа. Гэхдээ саяын болж өнгөрсөн сонгуулийн талаар би энэ хувьсгалт намын нөхдүүдэд, ардчилсан намын нөхдүүдэд ч гэсэн, Сонгуулийн ерөнхий хороонд бас нэг зүйлийг хэлмээр байна. Зоригт бол үндсэндээ өөрийн чадал чадавхи, оюун ухаанаар энэ Чингэлтэйн тойрогт ямар нэгэн шахалт… муу зүйлгүйгээр гараад ирвэл гараад ирчих бүрэн боломжийн залуу шүү дээ. Өөрийнхөө чадлаар, өөрийнхөө нэрээр. Гэтэл энэ сонгуулийн ажиллагаанд хувьсгалт намын сонгуулийн штабын нөхдүүд, би тэгэж л бодож байгаа, удирдах зөвлөл нь дээрээс удирддаг юм уу асар их хэмжээний мөнгө тараасан. Хорь хорин мянгыг гарцаагүй өгсөн ш дээ. Үгүй гэж та нар хэлж чадахгүй. Манай жолооч гэр бүлээрээ тэнд амьдардаг. Манай жолоочийнд очоод 40 мянган төгрөг өгсөн. Сонгуулийн өдөр өглөө гэрээс нь машинаар авч яваад ээжтэй нь цуг сонгуулийн штаб дээр сонгуулийг нь өгүүлээд авчирч гэрт нь буулгадаг. Мөн сайхан үйлчилгээ байгаа биз. Тэр хавийн зөндөө улсуудад Энхбатаас өгсүүлээд мэднэ хорь хорин мянган төгрөг өгсөн. 60 гаруй мянган сонгогч Чингэлтэй дүүрэгт байдаг юм бол 20 мянгаар үржээд үз. Тэрбум 200 сая төгрөг биз дээ. 40 мянган сонгогч сая саналаа өгсөн юм бол хэд болохов? Би зүгээр Зоригтийг өгсөн гэж хэлэхгүй, Зоригт арай тийм муухай юм бодож санах ийм сэхээтэн залуу биш. Ерөөсөө нэг егзөр муусайн намын сонгуулиас сонгуулийн хооронд сонгуулийг эд агуурс, мөнгө хөрөнгө, элдэв юмаар … одоо хүмүүст тарааж өгч саналыг нь авч үзэл бодлыг нь эргүүлж муйхарлаж явдаг намын нэг муухай улсуудын заваан аргыг л намын штаб нь, намын хуучин егзөр кадрууд нь хэрэглэсэн гэж л би бодож байгаа. Зоригт бол тэр 20 мянгыг мэдээ ч үгүй байх. Бүх гишүүдийг би хэлэхгүй ээ. Энэ мөнгөөр аргалдаг, өрөө чадал байхгүй, нэр хүнд байхгүй, мөнгөөр аргалж хүний сонголтыг худалдаад аваад энд ичихгүй сууж байгаа энэ хоёр нам дотор цөөнгүй улсууд байгаа шүү. Одоо ингээд л гэмгүй царайлчихсан сууж байгаа. Энийгээ дараа 12 оны сонгууль дээр та нар болиоч ээ. …

Хэрвээ З.Алтай сонгуулийн луйврыг үнэхээр таслан зогсоохыг хүссэн бол Д.Зоригтод хандаж “Танай нам мөнгө тараасныг нотолчихвол чи УИХ-ын гишүүнээсээ буцах уу?” гэх мэтээр ам өчгийг нэхэхээс эхлээд гишүүний хувьд асуулга тавих, парламентын комисс байгуулахыг шаардах, бас жолоочдоо чөлөө өгч Сонгуулийн ерөнхий хороо, Авлигатай тэмцэх газар луу мэдүүлэг өгүүлэхээр илгээх, хэрвээ цаадах нь зүрх алдаад байвал өөрөө хөдөлж болохсон. Жирийн жолооч ба эрх мэдэлтэй төрийн түшээ, тэр тусмаа хамгийн “шударга” гишүүний ялгаа чухам энд байх учиртайсан.

Гэтэл яав? Танхимд байхгүй хувьсгалт намын штаб гэгчийг эзгүйчлэн харааж хэд цамнаад, харин цаадуулынхаа хулгайлж өгсөн юмыг аваад УИХ-ын танхимд ороод ирснийг нь мэдсээр байж Зоригтод тал засч байж хоёр нүүр гаргах нь тэр.

“Намайг барьж байгаарай” гээд бариулаад хэн хэндээ хал балгүй агсарч бусдын зугаа гаргадаг нэгнийг санагдуулчихлаа.

Posted in 2009 оны УИХ-ын 24-р тойргийн нөхөн сонгууль, Улс төр, эдийн засаг | 4 Comments »

No NGO …

Posted by Mongol on 2009/10/07

2005 оны үед Айвенхоу Майнз-ийн ерөнхийлөгч Роберт Фридланд уул уурхайн олон улсын хурал дээр өөрийн эзэмшлийн Монголын өмнөд говийг “яндаж болдоггүй далай шиг яасан баян нутаг вэ?” гэж шагшраад тэнд хот суурин, хүн амьтан байхгүй, садаа хийх төрийн бус байгууллага ч алга  (“no NGO”) хэмээн гайхуулсан удаатай.

Дөрвөн жилийн дараа Оюутолгойн гэрээг байгуулах тэр мөчид Төрийн ордны их танхимд дахин “no NGO” байлаа.  Тэдний оронд Думаагийн Содном гэдэг жив жирийн ганц иргэн бүгдийг төлөөлөн  (“иргэдийн төлөөлөл” гэв) уригдаж үг хэлсэн юм.

Засгийн газар сүүлийн хэдэн сард хэвлэл мэдээллийн амыг барьснаар NGO-нуудыг хамтад нь нам болгож чадсан ч энэ өдөр Төрийн ордны баруун талд уриа лоозон дэлгэсэн хэсэг нөхөд цугларч Оюутолгойн гэрээг шүүмжилсэн ч нэгэнт хожимджээ. Тэднийг өнөөдөртөө шуугиж л байг, “сумны гарз” гэж бодсон биз. …

Яг юу болоод өнгөрөв? Монголын гурван сайд, бас төрийн өмчит компанийн захирал гадаадын хоёр компанийн дэд захирлуудтай нэгэн орд газрыг ашиглах гэрээнд гарын үсэг зурсан. Иймээс энэ ёслолыг Сангийн яам, Эрдэс баялаг, эрчим хүчний яам, Байгаль орчин, аялал жуулчлалын яамны хурлын зааланд үйлдэхэд хаваасаг. Гэтэл Төрийн ордондоо залаад зогсохгүй төрийн ёслолын хэмжээнд өргөмжилж баярын цуглаан болгов. Монголын ард түмэн төр засагтайгаа хамт Оюутолгойн гэрээг дэмжин баяр хөөр болж байгааг дэлхий дахинд харуулж чадлаа. Орой их жанжин Сүхбаатарын талбайд ёслолын буудлага хийсэн бол гайхах явдалгүй…

Гэрээ чухал, мөнгөний тоо том, Айвенхоу Майнз мундаг (монгол улсын хуулийг ч цуцлуулж чаддаг!) хэдий ч манай төр хувийн компаниас бага зэрэг том баймаар.

Оюутолгойн гэрээ ашигтай юу? Ашигтай. Гэхдээ баялаг нь манайх учраас бидэнд бүр их ногдох ёстой гэж төрийн бус байгууллагууд хэлээд байгаа шүү. Цаашид зэсийн үнэ тасралтгүй өснө, тэр өссөн ашиг нөгөө талын халаас руу цутгана… Хэдэн жилийн дараа Бороо гоулдын гэрээ шиг амаа барихгүй гэсэн баталгааг хэн ч өгөөгүй.

Дуу хуураар эхэлсэн ёслол “Хөрсөн дор минь эрдэнээр баян … Яндаж болдоггүй далай шиг яасан баян нутаг вэ?” дуугаар төгсжээ. Тайвшрах юм гэвэл энэ. Монголд дахиад олон Оюутолгой үлджээ.

Posted in Улс төр, эдийн засаг | 10 Comments »

Ч.Сангарагчаа: Би хэвлэл мэдээллийнхэндээ хандаж хэлмээр байна…

Posted by Mongol on 2009/10/04

Өнгөрсөн долоо хоногт Ерөнхийлөгч Ц.Элбэгдорж Авлигатай тэмцэх газрын дарга Ч.Сангарагчааг дэд даргатай хамт дуудаж баахан загнажээ. Хэвлэл мэдээллийнхэн монголын авлигын загалмайлсан эцэг гэж урьд нь яг энэ өрөөнд сууж байсан эрхмийг зааж өгөөд байхад хөдлөөгүйд ихэд хилэгнэсэн байна.

Загнахдаа тун сайн бэлтгэсэн нь илт. Үүний тулд АТГ-ынхан 14 ажилтнаа орон сууцтай болгоход зориулж төсвийн мөнгөнөөс олгосон баримтыг “Өдрийн сонин” дээрээ дэлгэж, бас АТГ-ын дэргэдэх олон нийтийн зөвлөлийн гишүүдийг зарлигаараа өөрчилж (Ерөнхийлөгчийн эрх мэдлийн асуудал юм байна) “ардчиллынхан” зонхилсон 15 хүнтэй болгож өргөтгөөд тэднээс Ж.Батзандан тэргүүтнийг (бусад нь үзэгдсэнгүй) байлцуулав.

АТГ-ынхан “орон сууцны” нээнтгээ арилгах гэж тэр оройдоо мэдэгдэл гаргаж бүх телевизээр уншуулсан ч монголын хамаг телевизээр орон даяар шууд дамжуулах шахсан “Монгол Улсын Ерөнхийлөгч Ц.Элбэгдорж АТГ-ыг хангалтгүй ажиллаж байна гэж дүгнэв” реалити шоуны хажууд юу болохов.

Араас нь Ерөнхийлөгчийн хэвлэл мэдээллийн алба, хэвлэлийн төлөөлөгчийг байтугай Ерөнхийлөгчийг өөрийг нь орлож дутуу ярьсныг (уг нь Элбэгдорж дутуу ярина юу байхав!) гүйцээж тайлбарладаг болсон“дэд ерөнхийлөгч” Д.Дорлигжав (жинхэнэ ажил нь тамгын газрын дарга гэсэн байх шүү!) ээлжит ярилцлагаа өгч “Ийм хүнийг анх удаа л харж байна” гэж шогшроод Сангарагчааг огцрох хэрэгтэй гэв.  Ажлаа авснаас нь хойш ирж уулзаагүй юм гэнэ.

Хуулиараа бол АТГ-ын дарга өөрөө л хүсэхгүй бол Ц.Элбэгдорж байтугай Д.Дорлигжав ч огцруулах эрхгүй юм байна. Гэхдээ ингэж цочоох цаг хэдийнэ болсон. Маргаашнаас нь Н.Энхбаяр гэдэг хүн, TV9 гэдэг телевиз хоёрыг шалгаж эхэлсэн сураг дуулдав…

Энэ өдрүүдэд АТГ-аас манай хэвлэл мэдээллийг хэрхэн дүгнэсэн нь тун сонин байлаа. Тус газрын мэдэгдэлд “… өдөр тутмын зарим хэвлэлд гаргасан “Авлигатай тэмцэх газрын удирдлагууд төрийн мөнгийг дур мэдэн зарцуулдаг” гэсэн утга бүхий мэдээлэл нь худал ташаа гэдгийг албан ёсоор мэдэгдэж байна. Авлигачид, тэдний хууль бус орлогоос хүртэгч бүлэглэлийн энэ мэт явуургүй оролдого нь хэзээ ч бүтэхгүй санаархал …” гэжээ. Заримсаад байх юмгүй “Өдрийн сонин”-ийг хэлж байна. Ерөнхийлөгч Ц.Элбэгдоржийг хамгийн ихээр дэмждэг, энэ утгаараа түүнтэй “холбоотой” сонин. Тэгэхлээр “авлигачид, тэдний хууль бус орлогоос хүртэгч бүлэглэл” хэн хэн болж таарахав?

Бямба гаригт МҮОНТ-ийн “Ярилцъя” хөтөлбөрөөр Ч.Сангарагчаа дарга дахин дэлгэцнээ үзэгдэж “Би хэвлэл мэдээллийнхэндээ хандаж хэлмээр байна. Манай хэвлэл мэдээллийн байгуулагууд авлигатай тэмцэх, шударга ёсыг тогтооход ихээхэн үүрэг гүйцэтгэж байгаа. Та наргүйгээр бид алхам ч урагшаа явахгүй. Та нараар дамжуулж өдөр тутам авлигатай холбоотой эерэг, сөрөг мэдээлэл сүүлийн 2 жил дараалан сонин хэвлэлээр гардаг болсон. Авлигатай тэмцэхэд маш том тус дэмжлэг болж байгаа. Тэгэхээр би энэ удаад хэвлэл мэдээллийнхнээ энэ ажлаа улам эрчимжүүлээч гэж хэлмээр байна. Нөгөө талаас энэ хэвлэл мэдээллийнхний маань дотор шударга бус, олигархуудын гар хөл болсон, худалдагдсан, шуудхан хэлэхэд, тийм хэвлэл мэдээллийн сонин ч гэх юм уу юу ч гэх юм хэвлэл мэдээллийн хэрэгсэл цөөнгүй байгаа шүү. Үүнийг ард түмэн зүгээр энэ сонинг авч үзээд л шууд шууд хэлж байгаа шүү, энэ тэрний сонин байна, энэ тэр намын сонин байна, энэ тэр эрхтэн дархтаны сонин байна гээд л … Энэ олигархуудын дарангуйллаас хэвлэл мэдээлэлийнхэн минь гараачээ” гэж уриалмаар байна гэж өөрийн биеэр бататган хэллээ.

Авлигатай тэмцэх газрын дарга хэлж байна шүү!

Posted in "Өдрийн сонин", Улс төр, эдийн засаг | 2 Comments »

Хүүхэд бүр унтах эрхтэй…

Posted by Mongol on 2009/09/27

Нөгөө жаалууд дахин энэ гараашийг бараадан ирж намрын сүүлчийн бүлээн наранд нойроо авлаа.  

P1010607

Read the rest of this entry »

Posted in МОНГОЛЫН АМЬДРАЛ | 5 Comments »

Өглөөний наранд …

Posted by Mongol on 2009/09/18

Сүүлийн хэдэн өглөө хаа нэгтээгээс ирсэн хэдэн жаал энэ гараашийг бараадан намрын бүлээн наранд ээж нойр авдаг болов. Зэргэлдээх сургуулийн хүүхдүүд хажуугаар гүйлдэн хичээлдээ орж, машины эзэд гараашаа онгойлгон  унаандаа сууж одохыг жаалууд үл анзаарна. Биш ээ, тэд жаалуудыг үл анзаарна. Нар нэлээн дээр гарсан хойно сэрцгээж  хаашаа ч юм шулганалдан одох юм …   

Huuhduud

Read the rest of this entry »

Posted in МОНГОЛЫН АМЬДРАЛ | 3 Comments »