АЖИГЛАГЧ

Монголд, Монголын хэвлэл мэдээлэлд юу болж байна?

Archive for July, 2010

Үнэтэй тоглоом

Posted by Ажиглагч on 2010/07/29

Хамгийн сүүлд мэндэлсэн ETV телевиз хэдэн сарын өмнөөс туршилтын нэвтрүүлгээ цацаж байснаа наадмын өмнө албан ёсны нээлтээ хийж тэр нь бусад бүх телевизээр гарч, араас нь бөөн сурталчилгаа дагалаа. Монголчууд бид яахаараа ийм азтай улс юм бүү мэд, дүрс нь тод, нэвтрүүлэг нь бүр тод, хамт олон нь илүү тод царайтай, техник тоног төхөөрөмж нь хүртэл тодорч гялалзсан, иймээс салбартаа шууд тодрон манлайлах нигууртай энэ телевиз … тэнгэрээс буугаад ирсэн байх юм. “Тод харуулна“ уриатай, нээлтийн ёслолд хүрэлцэн ирсэн зочдын нүүр царай, гутал хувцас, яриа хөөрөө тодоос тод хэрнээ уг телевизийг үүсгэн байгуулж хэдэн зуун саяар тоног төхөөрөмжийг худалдан авч, уран бүтээлчдийг хөлсөлсөн эрхмийн царай бүдгээр барахгүй тас харанхуй өнгөрлөө. Мэдээлэл, шуудан, харилцаа холбоо, технологийн газрын дэд дарга А.Мөнхбат ирчихсэн магталцаж харагдсан болохоор Харилцаа холбооны зохицуулах хорооны www.crc.gov.mn  сайтаас ETV-ийн сувгийн зөвшөөрлийг авсан компани юмуу хүний талаар хайхад хов хоосон. Хамаг мэдээллээ [амжаад] цэвэрлэчихэж.

Ноднин BTV гэж өөр нэгэн телевиз тэнгэрээс бууж Кёкүшю цамхагийн 15,16-р давхарт тогтож аваад нэвтрүүлгээ эхэлсэн билээ. Үүнээс болж Кёкүшюзан Батбаярынх гэж баахан шуугитал биш болж таарсан. Тэгвэл хэдэн жилийн өмнө өргөн нэвтрүүлгийн хамгийн сүүлчийн сувгийг дуудлага худалдаагаар зараад дууссаныг албан ёсоор зарласаар атал BTV хаанаас олж авсан нь Олон нийтийн телевизийн хоёрдугаар сувгийг сэмхэн эзэгнэсэн тухай шивэр авир дуулдаад өнгөрснийг эс тооцвол бас харанхуй.

Монгол улс хичнээн “тод” телевизтэй болсон ч эзэмшил харъяалал туйлын бүдэг хэвээрээ, Ингээд хорь, гучхан настай хэрнээ 20-30 жилийн туршлага зааж том том ярьсан баахан охид, хөвгүүд хэдэн зуун сая, тэрбумаар “чөлөөт, хараат бус, ил тод, тэнцвэртэй” телевиз болж наадан сууцгаана. 

Үнэтэй тоглоом авч өгсөн эзэд холгүйхэн харж суугаа …

Posted in BTV, ETV | 2 Comments »

2010 оны наадмын төгс, зоостой, гоё, Big, good, кимчитэй, бас технологийн дээдийн … хуушуур

Posted by Ажиглагч on 2010/07/22

Улаанбаатарт улсын наадмаар баярлана гэдэг бол бөх, сур, морь үзэхээс гадна Төв цэнгэлдэхийг тойрч хуушуур идэхийг  хэлнэ. Саяын наадмаар Ерөнхийлөгч Ц.Элбэгдорж, Ерөнхий сайд Сү.Батболд нар эхнэрүүдээ дагуулан цэнгэлдэхээс гадаалсан хэрнээ хэдэн метр алхаад сурвалжлагчдад ярилцлага өгөөд буцаад орчихов. Бүтэн тойроогүй нь дүүрч. Харин хуушуур идээгүй нь жаахан тиймхэн.

АНУ-ын Ерөнхийлөгч Барак Обама айлчлалаар ирсэн ОХУ-ын Ерөнхийлөгч Дмитрий Медведевыг дагуулан гудамжны “Макдональдс” руу явж ороод хачиртай талх, ундаа авч хооллоод дараа нь хоёулаа кассан дээр очиж тооцоогоо хийж (Обама даасан) харагдсан. Тэгвэл манай төрийн өндөрлөгүүд хэзээ наадамчин олонтойгоо зэрэгцэж суугаад Төв цэнгэлдэхийн хуушуур идэх бол? Нэр хаягаараа өрсөлдсөн энэ олон хуушуурын асруудаас Монголдоо “Макдональдс” шиг брэнд мэндлэхийг хэн байг гэхэв.  

Read the rest of this entry »

Posted in Наадам | 2 Comments »

2030 оны дэлхийн хөл бөмбөгийн аваргад Монгол оролцох …

Posted by Ажиглагч on 2010/07/20

Дэлхийд ганцхан Монгол наадмын шөнө дэлхийд ганцхан хөл бөмбөгийн аварга шалгаруулах тэмцээн өндөрлөж бараг сүүлчийн мөчид оруулсан золигийн бөмбөгөөрөө испаничууд түрүүллээ. Бүтэн сарын турш Өмнөд Африкт болсон тоглолтуудыг нойргүй (гэхдээ шар айрагтай) сахиж хөл бөмбөгийн гүрнүүдийн сүйрлийг үзэж оволзсон манай залуусын хувьд монгол наадмын хоёр өдөр тэгэсхийгээд өнгөрсөн биз. Монголын шинэ үе хөл бөмбөгийг сонгож байна.

Манай Ерөнхийлөгч, Ерөнхий сайд, (Дэмбэрэл даргыг алгасаад?) УИХ-ын гишүүдээс эхлээд зурагт үздэг хүн бүр Английг, Бразилийг, Аргентиныг, Германыг гэхчлэн дэмжжээ. Яагаад гэдгийг мэдэх үү? Яагаад гэвэл Монголын баг оролцоогүй учраас. Монгол Улс хэзээ нэгэн цагт хөл бөмбөгөө учир зүггүй хөгжүүлж чадаад Солонгос, Хятад, Япон мэтийг дийлж Ази тивээсээ гарахын төлөө явахаас өөр яахав. Хэдэн арван жил хэрэгтэй…

Өөр нэг зам бий. Энэ бол дэлхийн аваргыг Монголд явуулж зохион байгуулагч орны хувьд шууд “шалгарах”.

20-р зууны туршид энэ тэмцээн зөвхөн Европ, эсвэл Америк тивд явагдсан бол 2002 онд анх удаа Азид ирж Өмнөд Солонгос, Япон хоёрт зэрэг, 2006 онд Германд, 2010 онд Өмнөд Африкт болж өнгөрлөө. Ирэх 2014 онд Бразильд болно. Харин 2018 ба 2022 онуудад хаана болохыг 12-р сарын 2-нд Швейцарын Цюрих хотноо ФИФА-гийн төв байранд тодруулах аж. 2018 оныход Англи, Орос, АНУ, бас Португали ба Испания (хамт), Бельги + Нидерланд (хамт), харин 2022 оны төлөө Өмнөд Солонгос, Катар, Япон, Австрали тус тусдаа өргөдлөө өгөөд байна.

Яахав 2026 оныг хэн нэгэн аваг. Харин 2030 он Монголынх байж болох уу?

Бүтэшгүй санаа биз. Юуны түрүүнд тус бүрдээ хэдэн арван мянган суудалтай нэлээн хэдэн цэнгэлдэх хүрээлэн хэрэгтэй. Тэрбумаар тоологдох зардал мөнгө…

Гэтэл 2022 оныход бөмбөгөө сайн цөлбөл нисээд усанд уначихмаар бичил (ердөө 11 мянган кв.м буюу манай хамгийн жижиг Сэлэнгэ аймгаас 4 дахин бага) нутагтай, 833 мянган хүнтэй  Катар улс нэрээ өгчээ. Газрын тосоор эх захгүй баяжсан улс гэдэг. Тэгвэл биднийг удахгүй тийм болно гэж Оюутолгой, Тавантолгойн үүцыг задалсан манай томчууд амлаад байгаа. Удахгүй тэндээс мөнгө цутгаж эхэлнэ.

1990 онд Өмнөд Африкт апартеид төгсгөж Нельсон Мандела шоронгоос гарснаас хойш яг 20 жилийн дараа хөл бөмбөгийн аваргыг зохион байгууллаа. Тэгвэл Монголд 1990 онд социализмыг төгсгөснөөс хойш бас 20 жил өнгөрчээ. Барьцаад яахав. 2030 он хүртэл бидэнд сунайсан сайхан хорин жил байна.    

Ингээд бодохлоор болмоор ч юм шиг…  

P.S: Саяхан “ДАШТ-2030 Монгол” төсөл нь хэрэгжиж эхэлсэн тухай сонслоо. Ямар зорилготойг сураглавал “Монгол улсад хөлбөмбөгийн спортыг хөгжүүлэх, тив дэлхийд өрсөлдөж чадахуйц тамирчдыг нээн илрүүлэх гэсэн зэрэгт чиглэсэн үйл ажиллагааг явуулах” гэх ерөнхий өгүүлбэр харагдав. Монголчуудаа, хэтэрхий даруу байгаа юм биш үү?

Posted in Спорт | 5 Comments »

Юун Тавантолгой …

Posted by Ажиглагч on 2010/07/06

Дэлхийгээр дүүрэн  мөнгө байна гэж “Монгол банк”-ны Чулуунбат дандаа ярьдаг. Үнэн юм байна.    

Posted in МОНГОЛЫН АМЬДРАЛ | 3 Comments »

Туслахсан

Posted by Ажиглагч on 2010/07/06

Өнөөдөр хаа сайгүй ийм зарлал наалттай харагдав. Бичиг баримт байтугай хүн алга болсон тухай зар зөндөө тааралддаг ч харж үзээгүй тул тэр дороо мартдагдаг. Харин энэ удаад арга тасарсан “гуйя” гэсэн ганц үгнээс болж зүгээр өнгөрч  чадсангүй.    

Posted in МОНГОЛЫН АМЬДРАЛ | 2 Comments »